அறிவியல் ஆயிரம்

விவரங்கள்

வீ.கிருஷ்ணகுமார்

பிரிவு: சுற்றுச்சூழல்

வெளியிடப்பட்டது: 14 அக்டோபர் 2026

• இயற்கைப் பேரிடர்
• புவி வெப்ப உயர்வு

“தீயவை தீய பயத்தலால் தீயவை

தீயினும் அஞ்சப் படும்” (குறள் - 202)

ஒரு தீய செயல் தனிப்பட்ட பாதிப்பில் மட்டும் முடிவதில்லை. மேலும், ஒரேயொரு பாதிப்போடும் அது நின்றுவிடுவதும் இல்லை; அதேபோல ஒரேயொரு பாதிப்பை மட்டும் ஏற்படுத்துவதும் இல்லை. அது மேலும் பல்வேறு வகையான தீய விளைவுகளை உருவாக்கும் என்பதுதான் இந்தக் குறள் கூறும் உண்மை. இதனையே நேர்மறையாகக் கொண்டோமானால், ஒரு சிறிய நற்செயல் தொடர்ந்து நிற்காமல் பெரிய நல்விளைவை ஏற்படுத்தும் என்பதுதான் நிதர்சனம். இதனைத்தான் முற்றிலுமாக இந்தப் பட்டாம்பூச்சி விளைவு விளக்குகிறது.பட்டாம்பூச்சி விளைவு என்பது குழப்பவியல் (Chaos Theory) சார்ந்த ஒரு முக்கியமான கருத்தாகும். ஒரு நிகழ்வின் தொடக்க நிலையில் ஏற்படும் மிகச்சிறிய மாற்றம் என்பது, காலப்போக்கில் மிகப்பெரிய அல்லது எதிர்பாராத விளைவுகளை உருவாக்கக்கூடும் என்பதே இந்த விளைவு கூறும் உண்மை. இதன் உண்மைத் தன்மை குறித்துத் திரைப்பட நடிகர் திரு. கமல்ஹாசன் அவர்கள், தான் நடித்த 'தசாவதாரம்' படத்தில், மனிதர்களால் ஏற்படுத்தக்கூடிய சிறிய சிறிய தவறுகள்தான் உலகத்தின் பெரும் அழிவுக்குக் காரணமாக அமைந்துவிடுகிறது என்பதை விளக்க, சுனாமி பேரலை எழுவதற்கான காரணத்தைக் காரணகாரியத் தொடர்போடு விளக்கியிருப்பார். மேலும், சின்னச் சின்ன தவறுகளைப் பட்டாம்பூச்சியின் சின்னச் சின்ன இறக்கைகளின் அசைவின் மூலம் அழகாகக் காட்சிப்படுத்தியிருப்பார்.

இதனைப் பாமர மக்கள் உச்சரிக்கும் ‘சிறுதுளி பெருவெள்ளம்’ என்ற பழமொழியோடும் ஒப்பிட்டுப் பார்க்கலாம். சேமிப்பிற்கான நல்ல பழமொழி என்றாலும் கூட, தற்காலச் சூழலில் தீமைக்கும் இதனைப் பொருத்திப் பார்ப்பது பொருந்தும். ஆகவே, ஒரு சிறிய தவறு முதலில் அழிவை உருவாக்குவதில்லை; அவையெல்லாம் சேர்ந்தே உலகின் மிகப்பெரும் அபாயமாக மாறிவிடுகிறது.

பட்டாம்பூச்சி விளைவின் உருவகம்

நேபாளம் போன்ற பல உலக நாடுகளில் ஏற்படும் பெரும் வெள்ளப்பெருக்கும், மனித அழிவும், பொருளாதாரப் பின்னடைவும் நம்மால் ஏற்பட்டது என்பதை கண்டிப்பாக மனித சமூகம் ஏற்றுக்கொண்டே ஆக வேண்டும். இயற்கையான ஒரு பட்டாம்பூச்சியின் இறக்கை அசைவு, தொலைதூரத்தில் ஒரு புயலை உருவாக்கும் அளவுக்கு வலிமையான மாற்றத்தைத் தொடக்க நிலையில் ஏற்படுத்துமா? என்றால், அதன் அர்த்தம் உண்மையில் ஒரு பட்டாம்பூச்சி ஒரு புயலை உருவாக்குகிறது என்பதல்ல; இந்தச் சின்ன விளைவுதான் ஆரம்பநிலையில் வானிலை போன்ற சிக்கலான அமைப்புகளில் சிறிய வேறுபாட்டை அடைந்து, பின்னர் பெரிய நிகழ்வுகளாக மாறி வளரக்கூடும் என்பதை விளக்கும் உருவகம்தான் அது.

மேலும், இந்த உருவகத்திற்கு வலுசேர்க்கும் விதமாக வானிலை ஆய்வாளரான எட்வர்ட் லோர Lorenz (Edward Lorenz) அவர்களின் வானிலை மாதிரி ஆய்வுகளுடன் இந்தக் கருத்தானது முதலில் ஒப்பிட்டுப் பார்க்கப்பட்டு, பின்பு 1960களில் பிரபலமானது. அதில் எட்வர்ட் லோர Lorenz கூறும்போது, “தொடக்க நிலைகளில் ஏற்படுத்தும் மிகச்சிறிய வேறுபாடுகள், நீண்டகால வானிலைக் கணிப்புகளில் மிகப்பெரிய வேறுபாடுகளை ஏற்படுத்தக்கூடும்” என்பதைத் தெளிவுபடுத்தினார். இதன் அடிப்படைதான் நாம் தற்போது எதிர்கொண்டு வரும் எல் நினோவின் விளைவுகளும், இனி எதிர்வரும் காலங்களில் எதிர்கொள்ளவிருக்கும் விளைவுகளும் ஆகும்.

இயற்கையின் செயல்பாடுகள் எப்போதும் ஒரே மாதிரியான விளைவுகளைத் தருவதில்லை. கடலில் ஏற்படும் ஒரு சிறிய வெப்பநிலை மாற்றம், வளிமண்டலத்தின் இயக்கத்தை மாற்றி, பல்லாயிரம் கிலோமீட்டர் தொலைவில் மழை, வறட்சி, புயல், வேளாண்மைக் குறைவு, உணவுப் பொருட்களின் விலையேற்றம் போன்றவற்றில் தாக்கத்தை ஏற்படுத்த முடியும். இதனை எல் நினோ மற்றும் பட்டாம்பூச்சி விளைவு கொண்டு விளக்குவது மிகவும் பொருத்தமானதாக இருக்கும்.

எல் நினோ மற்றும் மனிதனின் பங்களிப்பு

எல் நினோ என்பது ஏதோ புதிதாக ஏற்பட்ட இயற்கை மாற்றம் என எண்ண வேண்டாம். மத்திய மற்றும் கிழக்கு வெப்பமண்டல பசுபிக் பெருங்கடலின் கடற்பரப்பு வெப்பநிலை, இயல்பான நிலையிலிருந்து அதிகமாக உயர்வதைக் கொண்ட ஒரு இயற்கையான காலநிலை மாற்ற நிகழ்வு ஆகும். இந்த வெப்பநிலை மாற்றம் சிறிது சிறிதாக அதிகரித்ததன் விளைவு, நம்மைத் தற்போதுள்ள மிக மோசமான நிலைக்குத் தள்ளியிருக்கின்றது. எல் நினோ மாற்றத்தின் மூலம் உலகின் பல்வேறு பகுதிகளில் வெப்பநிலை மற்றும் மழைப்பொழிவு முறைகளில் மிகப்பெரிய மாற்றத்தை ஏற்படுத்தி வருகிறது. மேலும், 2023–24 ஆம் ஆண்டுகளில் எல் நினோ மிகவும் வலுவான நிகழ்வாக இருந்தது. 2024 ஆம் ஆண்டு உலகளாவிய அளவில் எல் நினோவின் பங்கு மிகவும் வலுப்பெற்றுள்ளதாக உலக வானிலை அமைப்பு தெரிவித்துள்ளது.

அதேவேளையில், புதைபடிவ எரிபொருட்களான நிலக்கரி போன்றவற்றால் வெளிப்படும் கார்பன் டை ஆக்சைடு, விவசாயம் மற்றும் கால்நடைகளால் உருவாகும் மீத்தேன், தொழிற்சாலைகளிலிருந்து வெளியேற்றப்படும் நைட்ரஸ் ஆக்சைடு, நீராவி மற்றும் குளிர்சாதனப் பெட்டிகள் மூலம் வெளிப்படும் குளோரோ புளோரோ கார்பன் போன்ற மனிதனின் பயன்பாட்டால் வெளியிடப்படும் பசுமைக்குடில் வாயுக்களின் நீண்டகாலத் தாக்கமும் ஒரு முக்கிய காரணியாக இருக்கின்றது என்பது மறுக்க முடியாத உண்மையாகும்.

சங்கிலித் தொடர் விளைவுகள்

இதன் விளைவாக ஒரு சங்கிலித் தொடர் போல எல் நினோ விளைவுகள் நிகழ்ந்துகொண்டே வருகின்றன. அதில் ஒரு பகுதியாகப் பசிபிக் கடல் வெப்பநிலையில் மாற்றம், வளிமண்டலச் சுழற்சியில் ஏற்படும் மாற்றம், தொடர்ச்சியான மழைப்பொழிவு, சில இடங்களில் ஏற்படும் வெள்ளம் மற்றும் வறட்சி, வேளாண்மை உற்பத்தி குறைவு, அதன் தொடர்ச்சியாக உணவு மற்றும் பொருளாதார நிலைகளில் பல்வேறு நாடுகளில் ஏற்படும் தாக்கம் என இதன் பட்டியல் நீண்டு கொண்டே செல்கிறது.

இந்த நிகழ்வே ஒரு காலத்தில் எங்கோ ஏற்பட்ட மாற்றம், இன்று தொலைதூர இடங்களில் எதிர்பாராத விளைவுகளை உருவாக்குகிறது என்ற பட்டாம்பூச்சி விளைவை விளக்குகிறது. மேலும், கடலில் தொடங்கும் ஒரு மாற்றம், வானில் பயணித்து, நிலத்தில் மழையாகவும் வறட்சியாகவும் வெளிப்பட்டு, இறுதியில் மனிதனின் உணவுத் தட்டிலும் பொருளாதாரத்திலும் தாக்கத்தை ஏற்படுத்துகிறது.

இதில் எல் நினோ என்பது உலகளாவிய காலநிலை அமைப்பை மாற்றும் ஒரு குறிப்பிட்ட இயற்கை நிகழ்வு; பட்டாம்பூச்சி விளைவு என்பது சிக்கலான அமைப்புகளில் சிறிய வேறுபாடுகள் எவ்வாறு பெரிய வேறுபட்ட விளைவுகளுக்கு வழிவகுக்கும் என்பதை விளக்கும் கருத்து. இந்த இரண்டையும் ஒன்றாகப் பார்க்கும்போது, இயற்கை அமைப்புகளின் தொடர்பும் உணர்திறனும் தெளிவாகப் புரியும்.

நேர்மறை மாற்றங்களுக்கான சாத்தியங்கள்

பட்டாம்பூச்சியின் இறக்கை அசைவு போன்ற ஆரம்பநிலை என்பது, சிறிய மற்றும் நல்ல தொடக்கம் எனலாம். இது வருங்காலங்களில் மிகப்பெரிய மாற்றங்களை நிகழ்த்தலாம். அதாவது நெகிழிப் பயன்பாட்டைத் தடுப்பதற்கான அரசின் மஞ்சப்பை நடவடிக்கை, மதுபான விற்பனைக் கூடங்களில் கண்ணாடி பாட்டில்களைத் திரும்பப் பெறும் முறை, போதைப் பழக்கங்களிலிருந்து இளைஞர்களை மீட்கும் சிறிய முயற்சிகள், பெண்களைப் பாதுகாக்க அரசு எடுக்கும் முன்னெச்சரிக்கை நடவடிக்கைகள் போன்றவை இந்தச் சமுதாயத்தில் இனி ஏற்படவிருக்கும் மிகப்பெரிய மாற்றங்களுக்கு இந்தப் பட்டாம்பூச்சி விளைவை எடுத்துக்காட்டாகக் கூறலாம்.

பட்டாம்பூச்சியின் விளைவுகளில் இறக்கை அசைவு புயலை உருவாக்குகிறது என்பது ஒரு கவித்துவமான உருவகம்; ஆனால், இயற்கை அமைப்புகள் ஒன்றோடொன்று எவ்வளவு நெருக்கமாக இணைந்துள்ளன என்பதை அது உணர்த்துகிறது. எல் நினோ அதற்கான நிஜ உலக உதாரணங்களில் ஒன்று. பசுபிக் பெருங்கடலில் நிகழும் மாற்றம் உலகின் வேறு மூலைகளில் அதிர்வுகளை ஏற்படுத்துகிறது என்றால், உலகம் தனித்தனி நிகழ்வுகளின் தொகுப்பு அல்ல; அது ஒன்றோடொன்று இணைந்த நிகழ்வுகளின் சங்கிலி என்ற உண்மை புரியவரும். அதே சமயம் உலகின் ஒரு மூலையில் நடைபெறும் பெரிய மற்றும் சிறிய விளைவுகளுக்கு நாடும், நாமும் ஏதோ ஒருவகையில் காரணம் என்ற உண்மையும் உணரக்கூடும்.

- முனைவர் வீ. கிருஷ்ணகுமார், உதவிப் பேராசிரியர், முதுகலை வணிகவியல் மற்றும் ஆராய்ச்சித்துறை, ஏல விவசாயிகள் சங்கக் கல்லூரி, போடிநாயக்கனூர், தேனி மாவட்டம் – 625582

விவரங்கள்

சிதம்பரம் இரவிச்சந்திரன்

பிரிவு: சுற்றுச்சூழல்

வெளியிடப்பட்டது: 23 செப்டம்பர் 2026

• நேபாளம்
• புவி வெப்ப உயர்வு

அச்சமூட்டும் வகையில் இமயமலை உருகுவதால் இந்தியா உட்பட தெற்காசியாவில் கடும் காலநிலை பாதிப்புகள் ஏற்படும் என்று பிரிட்டனைச் சேர்ந்த லீட்ஸ் பல்கலைக்கழக விஞ்ஞானிகள் நடத்திய ஆய்வுகள் கூறுகின்றன. சமீப பத்தாண்டுகளில் இங்கு, முன்பு பனிப்பாறைகள் விரிவடைந்து உருவான குறுகிய பனிக்காலம் (Little Ice Age) எனப்படும் 400-700 ஆண்டுகளில் சராசரியாக இருந்ததைக் காட்டிலும் இப்போது பத்து மடங்கு வேகமாக உருகுகிறது.சுருங்கும் இமயம்

இங்கு உள்ள பனிப்படலங்கள் உலகின் மற்ற இடங்களைக் காட்டிலும் வேகமாகச் சுருங்குகின்றன. இதனால் உருவாகும் பனிக்கட்டிகளின் இழப்பு வரலாறு காணாத ஒன்று என்று ஆய்வாளர்கள் கூறுகின்றனர். இந்த ஆய்வுக்கட்டுரை 'சயின்டிஃபிக் ரிப்போர்ட்ஸ்' (Scientific Reports) இதழில் வெளியிடப்பட்டுள்ளது. குறுகிய பனிக்காலத்தில் இருந்த 14,798 பனிப்படலங்கள் அதே அளவு மற்றும் பனிப்பரப்புடன் செயற்கை மாதிரிகளாக உருவாக்கப்பட்டு ஆய்வுகள் நடத்தப்பட்டன.

இதன் மூலம் பனிப்படலங்களின் 40% பனிப்பரப்பு சுருங்கியுள்ளதை ஆய்வாளர்கள் கண்டறிந்தனர். 29,000 சதுர கி.மீ. பரப்பில் இருந்த பனிச்சிகரங்கள் இன்று 19,600 சதுர கி.மீ. என்ற அளவிற்குச் சுருங்கியிருப்பது தெரியவந்துள்ளது. இமயமலையில் இன்று உருகி ஓடியிருக்கும் பனிக்கட்டிகள் மத்திய ஐரோப்பிய ஆல்ப்ஸ், காக்கசஸ் (Caucasus) மற்றும் ஸ்காண்டிநேவியா பகுதியில் இருக்கும் பனிப்பரப்புகளின் ஒட்டுமொத்த அளவிற்குச் சமம்.

இதனால் 0.92 மி.மீ. முதல் 1.38 மி.மீ. அளவிற்கு உலகக் கடல்களில் நீர்மட்டம் அதிகரித்துள்ளது.

கடந்த பல நூற்றாண்டுகளில் இல்லாத அளவு இப்போது இமயமலையில் பனி உருகுவது இந்த ஆய்வுகள் மூலம் தெளிவாக எடுத்துக் காட்டப்பட்டுள்ளது என்று இந்த ஆய்வுக்கட்டுரையின் தொடர்பு ஆசிரியர் மற்றும் லீட்ஸ் பல்கலைக்கழக புவியியல் பள்ளித் துணைத்தலைவர் டாக்டர் ஜோனתן காரிவிக் (Dr. Jonathan Carrivick) கூறுகிறார்.

மனிதத் தூண்டல்களால் நிகழ்ந்து வரும் காலநிலை மாற்றத்தின் காரணமாகவே பனி உருகுதல் இந்த அளவு துரிதகதியில் சமீப ஒரு சில பத்தாண்டுகளுக்குள் நிகழ்ந்துள்ளது என்று காரிவிக் கூறுகிறார். ஆர்க்டிக், அண்டார்டிகாவிற்கு அடுத்து உலகில் மிகப்பெரும் பரப்பில் பனிப்பாறைகள் இமயமலையில் உள்ளன. இதனால் இது 'உலகின் மூன்றாவது துருவம்' (Third Pole) என்று அழைக்கப்படுகிறது.

இந்த அதிதீவிர உருகுதல் பிரம்மபுத்திரா, கங்கை, சிந்து போன்ற மிகப் பெரிய நதிகளின் நீரை நம்பி வாழும் லட்சக்கணக்கான மக்களின் வாழ்வாதாரத்தைப் பாதிக்கிறது. உணவு மற்றும் ஆற்றல் தேவைக்கு இவர்கள் இந்நதிகளையே நம்பியுள்ளனர். ஆய்வாளர்கள் டிஜிட்டல் பிம்பங்கள், உயரப்படுத்தப்பட்ட மாதிரிகளை (Elevated Digital Elevation Models) பயன்படுத்தி ஆய்வுகளை நடத்தினர்.

இதன் மூலம் 700 ஆண்டுகளுக்கு முன் இமயமலையில் இருந்த பனிப்பரப்புகளின் மாதிரிகள் உருவாக்கப்பட்டு ஆராயப்பட்டன. இதில் பழைய பனிப்பாறைகளின் முனை (Ridge) மற்றும் பனிப்படலத்தின் எல்லைகள் கணக்கில் எடுத்துக் கொள்ளப்பட்டன. செயற்கைக்கோள் படங்களின் உதவியுடன் அன்றிருந்த பனிப்படலங்கள் இன்று உள்ளதுடன் ஒப்பிடப்பட்டு ஆய்வு செய்யப்பட்டது.

பனிப்படலங்களின் கன அளவு மற்றும் அவற்றின் அடர்த்தியில் ஏற்பட்ட மாறுதல்கள் கணக்கிடப்பட்டு பனிக்கட்டிகளின் இழப்பு பற்றிய விவரங்கள் கண்டுபிடிக்கப்பட்டன. அமைவிடம், வளிமண்டலத்துடன் உள்ள தொடர்பு காரணமாக கிழக்கு நேபாளம், பூட்டானின் வட பகுதியில் உருகுதல் வேகமாக நடைபெறுவது கண்டறியப்பட்டது.

உருகும் மலையில் உருவாகும் ஏரிகள்

உருகி ஓடும் நீர் பெருமளவில் சேகரிக்கப்பட்டு புதிய ஏரிகள் அதிகமாக உருவாகின்றன. இவை மலையடிவாரத்தை அடையும்போது பெரும் பாதிப்புகள் ஏற்படுகின்றன. உருகுதல் வேகமாக நடைபெறும்போது அதிக நீர்வரத்து காரணமாக இந்த ஏரிகளின் அளவு பெரிதாகிறது. பனிப்பாறை ஒன்றில் ஏற்படும் பனி இழப்பு மற்றவற்றையும் பாதிக்கிறது. இடிபாடுகளுடன் உள்ள பாறைகள் தங்கள் எடையை இழக்கின்றன. இதனால் எதிர்பாராத நேரங்களில் இவை உருண்டு விழுகின்றன.

இவ்வாறு பனிப்படலங்களில் உருவாகும் விரிசல்கள் மூலம் ஏற்படும் சேதத்தால் அவற்றின் கன அளவில் 46.5% இழப்பு ஏற்பட்டுள்ளது. மொத்தம் இருக்கும் 7.5% பனிப்படலங்களில் இது நிகழ்ந்துள்ளது என்று காரிவிக் கூறுகிறார். பல நூறாண்டுகளில் காணப்படாத சூழல் சீரழிவை இன்று இங்கு வாழும் மக்கள் சந்திக்கின்றனர் என்று டண்டி (Dundee) பல்கலைக்கழக புவியியல் மற்றும் சூழலியல் துறை மூத்த விரிவுரையாளர் சைமன் குக் (Simon Cook) கூறுகிறார்.

எங்கோ காணாத் தொலைவில் இருக்கும் ஆர்க்டிக்கிலும் அண்டார்டிகாவிலும் வெப்பம் அதிகரிக்கிறது, உலகம் முழுவதும் இருக்கும் கடல்கள் சூடாகின்றன என்றெல்லாம் கேட்கும்போது கண்டுகொள்ளாமல் இருந்தோம். ஆனால் இன்று? காலநிலை மாற்றம் நம் வீட்டு வாசற்படியில் வந்து நிற்கிறது.

- சிதம்பரம் இரவிச்சந்திரன்