அண்மைப் படைப்புகள்

கீற்றில் தேட

தென்னிந்திய நடிகர் சங்க வெப்சைட்டில் (www.nadigarsangam.org) உறுப்பினர்கள் பட்டியலைப் பார்த்துக் கொண்டிருந்தேன். அப்போது ஒரு கறுப்பு வெள்ளை புகைப்படத்தில் 232 என்ற எண் எழுதப்பட்டிருந்தது.

TKS NATARAJANஅவர் முகத்தை என்னால் அவ்வளவு எளிதில் மறக்க முடியாது. எம்ஜிஆர் நடித்த 'மீனவநண்பன்' படத்தில் துவக்க காட்சியில் வி.கே.ராமசாமி வீட்டில் சப்பாத்தி, கோழிக்கறி ஆகியவற்றை பசிக்கொடுமையால் அந்த முதியவர் திருடி விடுவார். அதைப் பார்த்த சமையல்காரன் பிடித்து அடிக்கவும், வில்லன் நடிகர் கண்ணன், திருடிய நபரை அடித்து தெருவில் தள்ளி விடுவார்.

அப்போது அந்த முதியவரை கர்ச்சீப் கட்டிய கை தூக்கி விடும். அதாவது கதாநாயகன் அறிமுக காட்சி. எம்ஜிஆர் கை தான் அது. டெண்ட் கொட்டகையில் விசில் பறக்க, கிழித்து வைத்த பேப்பரை திரையை நோக்கி ஒரு கும்பல் வீசியெறிய, கண்ணனை எம்ஜிஆர் புரட்டி எடுப்பார். அடிபட்டுக் கிடக்கும் அந்த சப்பாத்தி திருடிய நபரை தோளில் போட்டுக் கொண்டு செல்வார். இந்த படம் வந்தது 1977ம் ஆண்டு.

அது ஒரு ஸ்டார் ஹோட்டல். விக்ரம் தர்மா உள்ளிட்ட வில்லன் கோஷ்டி சாப்பிட்டுக் கொண்டிருக்கும். ஒரு முதியவர் அங்கு வந்து பசிக்கிறது என்பார். ஒரு கோழி சப்பையைத் தூக்கி வீசும் விக்ரம் தர்மா, அதை கைகளைப் பின்னால் கட்டிக் கொண்டு மொட்டி போட்டவாறு வந்து சாப்பிட வேண்டும் என்பார்.

பசி மயக்கத்தில் இருக்கும் அந்த முதியவரும், அதே போல செய்வார். வில்லன் கோஷ்டி சிரிக்கும். அப்போது கீழே விழும் அந்த முதியவரை ஒரு கரம் பற்றித் தூக்கும். வழக்கம் போல தியேட்டரில் விசில் சத்தம். பேப்பர் கிழிசல் திரை நோக்கி வீசப்படுகிறது. அந்த முதியவரை தூக்கும் கரத்திற்கு சொந்தக்காரர். சூப்பர்ஸ்டார் ரஜினிகாந்த். 'தம்பிக்கு எந்த ஊரு' என்ற இந்த படம் வந்தது 1984ம் ஆண்டு.

இந்த 2 படங்களிலும் அடிபட்ட முதியவர் தான் நடிகர் சங்கத்தில் 232 ஆக இருப்பவர். அடிபடுபவரை காக்க மக்கள் கூட்டத்தில் இருந்து யாரும் வரமாட்டார்கள். கதாநாயகன் தான் வரவேண்டும் என்ற கதை இலக்கணப்படி எம்ஜிஆரும், ரஜினியும் காப்பாற்றும் கேரக்டர்களில் நடித்தவரின் நடிப்பு பயணம் இன்னும் தொடர்ந்து கொண்டிருக்கிறது.

கடந்த 21.8.1967ம் ஆண்டு நடிகர் சங்கத்தில் உறுப்பினரான அந்த நடிகர் ஏற்று நடிக்காத பாத்திரங்கள் இல்லை.

கறுப்பு வெள்ளை காலம் முதல் வண்ணப்படம் வரை அவர் கோயில் பூசாரி, நடத்துநர், காவலாளி, பாகவதர், வாத்தியார், போலீஸ்காரர், சேட், வண்டிக்காரன், தபால்காரர் என பல வேஷம் போட்டிருக்கிறார்.

கடந்த 23.7.1933ம் ஆண்டு பிறந்த அந்த நடிகர், தென்னிந்திய நடிகர் சங்கத்தின் ஆயுட் கால உறுப்பினர். சினிமா, தொலைக்காட்சி, மேடை நாடகங்களில் நடித்தாலும் அவர் இன்றளவும் பேசப்படுகிறார் என்றால், அவரின் குரலை வைத்து தான்.

'என்னடி முனியம்மா, உன் கண்ணில மையி' என்ற தெம்மாங்கு பாடல் மூலம் தமிழகம் முழுவதும் பிரபலமான டிகேஎஸ்.நடராஜன் தான் அவர். தூத்துக்குடி மாவட்டத்தைச் சேர்ந்த விபி.நடராஜன் தான்

தமிழ் நாடகத்துறையில் புகழ்பெற்ற டிகேஎஸ் கலைக்குழுவில் பாலகனாக சேர்ந்து அதன் மூலம் டிகேஎஸ்.நடராஜனாக மாறினார்.

1954ல் வெளியான ஸ்ரீதர் வசனம் எழுதிய 'ரத்தபாசம்' படத்தின் மூலம் அறிமுகமான டிகேஎஸ், நாடோடி, நீதிக்குத் தலைவணங்கு, பொன்னகரம், தேன்கிண்ணம், கண்காட்சி, பகடை பனிரெண்டு, ராணி தேனீ, ஆடு புலி ஆட்டம், பட்டம் பறக்கட்டும், மங்களவாத்தியம், உதயகீதம், ஆனந்த கண்ணீர் , இதோ எந்தன் தெய்வம், காதல் பரிசு என 500க்கும் மேற்பட்ட படங்களில் நடித்துள்ளார்.

உதயகீதம் படத்தில் தேங்காயில் பாம் வைத்து விட்டார்கள் என கவுண்டமணி சொல்ல, அர்ச்சகர் வேடமிட்டிருக்கும் டிகேஎஸ், 'தேங்காயில் சட்னி வைக்கலாம்... பாம் வைக்கலாமா?' என கேட்கும் காமெடி இன்று வரை பேசப்படுகிறது. கவுண்டமணியோடு சேர்ந்து பல படங்களில் இவர் நடித்துள்ளார்.

'வருஷம் 16' படத்தில் குஷ்பு பரத நாட்டியமாடும் பாடலுக்கு ஜதி சொல்லும் காட்சியில் நடித்தவர் டிகேஎஸ் தான். அவரைத் தூக்கி விட்டு அந்த இடத்தில் நடிகர் கார்த்திக் அமர்ந்து 'கங்கைக் கரை மண்ணனடி' பாடலைப் பாடுவார். ஆனால், முறையாக பரத நாட்டியம் கற்றவர் டிகேஎஸ்.

தமிழ் சினிமாவில் தெம்மாங்கு பாடலாக சங்கர் கணேஷ் இசையில் 'வாங்க மாப்பிள்ளை வாங்க' படத்தில் டிகேஎஸ்.நடராஜன் பாடிய 'என்னடி முனியம்மா உன் கண்ணுல மையி' என்ற பாடல் தான் அவரைத் தமிழகம் முழுவதும் அடையாளப்படுத்தியது. "கொட்டாம்பட்டி ரோட்டிலே " என்ற அடுத்த பாடல் வெளியூர் மோட்டல்களில் தேசிய கீதமானது.

இசைஞானி காலத்திற்கு முன்பே தெம்மாங்குப் பாடல்கள் திரையில் ஒலிக்க ஆரம்பித்து விட்டன. சின்னகுட்டி நாத்தனா , சில்லரைய மாத்தினா,வெரசா போடுது தூறல் அடி மேலே பறக்குது சாரல், மானத்திலே மீன் இருக்க மதுரையிலே நீ இருக்க, ஏரியில எலந்தை மரம் தங்கச்சி வச்ச மரம்,ஏறாத மலை மேலே - எலந்தை பழுத்து இருக்கு,ஓடுகிற தண்ணியில், ஒரசி விட்டேன் சந்தனத்தை , ஒத்த ரூவா தாரேன் ஒரு ஒனப்புத் தட்டும் தாரேன் என எண்ணற்ற பாடல்கள் இன்றளவும் தெம்மாங்கின் சாட்சிகளாக உள்ளன.

கிராமத்து வயலில் நாத்து நடும் போது பாட்டுக் கற்றுக் கொண்ட டிகேஎஸ்.நடராஜனிடம் எண்ணற்ற பாடல்கள் மனப்பாடமாய் இருந்தன. 'என்னடி முனியம்மா' பாடலையடுத்து அவர் பெயர் தமிழகம் முழுவதும் தெரிய ஆரம்பித்தது. இதற்குக் காரணம் இசையமைப்பாளர்கள் சங்கர் கணேஷ் இரட்டையர்கள் தான்

இதனைத் தொடர்ந்து டிகேஎஸ் தெம்மாங்கு கச்சேரிகளுக்குச் செல்ல ஆரம்பித்தார். அவர் பாடிய என்னடி முனியம்மாவை நடிகர் அர்ஜீன் நடித்த 'வாத்தியார்' படத்தில் ரீமிக்ஸ் செய்திருந்தார்கள். அந்த பாடலிலும் டிகேஎஸ் நடித்திருந்தார் என்பது தான் சிறப்பு..

இவரின் தெம்மாங்குப் பாடல்கள் ஒலித்த காலத்தில் தான் சிங்கம்புணரி தங்கராஜன், பரவை முனியம்மா, புஷ்பவனம் குப்புச்சாமி, என பலர் கச்கேரிகளில் தெம்மாங்கு கீதங்களை வழங்கினர்.

டிகேஎஸ்.நடராஜன் தனது ஒட்டு மொத்த பாடல்களையும் 'நாட்டுப்புற தெம்மாங்கு' என்ற கிராமிய இசைத் தொகுப்பாக வெளியிட்டுள்ளார். தமிழ் திரையிசை உலகில் அச்சு அசல் கிராமத்துக் குரலைக் கொண்டு வந்தவர் டிகேஎஸ்.நடராஜன்.

- ப.கவிதா குமார்

Pin It

நாச்சியார் டீஸரைப் பற்றி இன்னமும் விவாதம் தீர்ந்தபாடில்லை. என்ன நடக்க வேண்டுமென இயக்குநர் பாலா நினைத்தாரோ அது நன்றாகவே நடந்து விட்டது. சமூக வலைத்தளங்களில் கழுவிக் கழுவி ஊத்தியே இலவச விளம்பரமாகி விட்டது.

சென்சாரில் அந்த வார்த்தை mute செய்யப்படும் எனத் தெரியாததல்ல அவருக்கு. அப்படியென்றால் அவர் அந்த வார்த்தையை வைத்தார் என நாம் கேட்க முடியாது. ஏனெனில், அது படைப்பாளியின் சுதந்திரம் என்பார்கள். இன்றைய நாளில் அவரது படம் சமூக வலைத்தளங்களில் கழுவி ஊற்றப்பட்டது அப்படத்திற்கு கிடைத்த விளம்பரம் தான். அதை பாலா நன்கு புரிந்து வைத்துள்ளார்.

Janani Iyer in avan ivan

இயக்குநர் பாலுமகேந்திராவின் பட்டறையில் உருவானவர் என்பதால் பாலா மீது எனக்கு மிகுந்த மரியாதை உண்டு.

'நாச்சியார்' படத்தில் ஜோதிகா பேசிய வசனத்தால் எனக்கு எந்த அதிர்ச்சியும் ஏற்படவில்லை. . ஏனெனில், இதற்குப் பதில் அவர் வேறு வசனம் கொடுத்திருந்தாலும் நடித்திருப்பார். அவருக்கு அது ஒரு காட்சி அவ்வளவு தான். ஆனால், நான் இந்தப் பதிவில் பேச வந்தது ஜோதிகா பேசிய வசனம் பற்றி அல்ல. அவர் ஏற்றிருந்த போலீஸ் வேடம் பற்றித் தான்.

தனது திரைப்படங்களில் கதாநாயகர்களை செமி கிறுக்கனாகவே காட்டிப் பழக்கப்பட்ட பாலா, போலீஸ்காரர்களை முழு கிறுக்கனாகவே காட்டுவார்.

தமிழில் மிகச்சிறந்த படமான சேதுவை தந்த பாலா, அந்தப் படத்தின் கதாநாயகனை பிற்பகுதியில் மனநோயாளியாக சித்தரிப்பார். நந்தா படத்தில் கொலைக்கார விட்டேத்தியாக சூர்யாவைக் காட்டியிருப்பார். பிதாமகனில் விக்ரமை பைத்தியக்காரனாகவே காட்டியிருப்பார். அந்த படத்தில் லைலா கேரக்டரும் பாதி பிதாமகன் போலவே உருவாக்கப்பட்டிருக்கும். பரதேசி படத்தில் அதர்வாவையும் அப்படித்தான் காட்டியிருப்பார்.

தமிழ் சினிமாவில் மனப்பிறழ்வு மனிதர்களை பாலாவைப் போல், காட்சிப்படுத்திய இயக்குநர் வேறு யாரும் இருக்க முடியாது. இப்படியான படங்களுக்கு தேசிய விருதுகள் கிடைக்கும் என்பதை உணர்ந்ததாலோ, தொடர்ந்து அவர் படங்களில் இப்படியான கிறுக்குத்தனம் நிரம்பியிருக்கிறது.

தமிழ் சினிமாவில் எத்தனையோ போலீஸ் கதையம்சம் கொண்ட படங்கள் வந்துள்ளன. சிவாஜியின் தங்கப்பதக்கம், எம்ஜிஆரின் ரகசிய போலீஸ் 115, ரஜினியின் மூன்று முகம், கமலின் காக்கிசட்டை, விஜயகாந்தின் ஊமை விழிகள், பிரபுவின் மறவன், சத்தியராஜின் வால்டர் வெற்றிவேல், அர்ஜீனின் குருதிப்புனல், சரத்குமாரின் கம்பீரம், விஜய்யின் ஜில்லா, அஜித்தின் பில்லா, விஜய்சேதுபதியின் சேதுபதி என நிறைய படங்கள் வந்திருக்கின்றன.

ஆனால், இவர்கள் படத்தில் உள்ள போலீஸ்காரர்களுக்கும், பாலாவின் படத்தில் உள்ள போலீஸ்காரர்களுக்கும் நிறைய வித்தியாசம் உள்ளது. பாலா படத்தில் இருப்பவர்களை தமிழகத்தில் எந்த போலீஸ் ஸ்டேஷனிலும் பார்க்க முடியாது. அவ்வளவு கேணக்கிறுக்கன்களாக இருப்பார்கள்.

'நந்தா' படத்தில் லொடுக்கு பாண்டி கேரக்டரில் கருணாஸ் நடித்திருப்பார். அந்த படத்தில் அவர் நீதிபதி வீட்டில் திருடி, அந்தப் பொருட்களை ஏற்றிச் செல்ல இன்ஸ்பெக்டருக்கு போன் செய்து அனுப்பச் சொல்வார். திருடனின் போனை நம்பி எந்த விசாரணையும் இல்லாமல், இன்ஸ்பெக்டரே டிராவல்ஸ்க்கு போன் செய்து வேனை நீதிபதி வீட்டுக்கு அனுப்பி வைப்பார்.

'பிதாமகன்' படத்தில் கொட்டக்கடை நடத்தி மோசடி செய்பவராக சூர்யா நடித்திருப்பார். அந்த சூதில் லைலா வாட்ச், செயின், பணம் உள்ளிட்ட அனைத்தையும் இழந்து விடுவார். அனைத்தும் இழந்த கோபத்தில் சூர்யாவை அடிக்க துரத்துவார். போலீசும் சேர்ந்து துரத்தும்.. சூர்யா சிக்கிக் கொள்ளும் போது, ஒரு பெண் போலீசை 'குந்தாணி' எனத்திட்டுவார். அப்படியெல்லாம் போலீசை திட்ட முடியுமா? இபிகோ சும்மா விடுமா?

'அவன் இவன்' படத்தில் விஷால், ஆர்யா என இரண்டு கதாநாயகன்கள். இதில் எதற்கு விஷாலை அப்படி கேரக்டரில் நடிக்க வைத்தார் என்று இதுவரைக்கும் விஷாலுக்கே தெரிந்திருக்காது. வழக்கம் போல, கதாநாயகர்கள் தலையில் காரக்கொழம்பை கரைத்து ஊற்றி பழக்கப்பட்ட பாலா, இந்த படத்தில் ஆர்யா தலையில் அதை ஊற்றி விட்டிருப்பார்.

களவு குறித்து வேல.ராமமூர்த்தி எழுதிய குற்றப்பரம்பரை கதையைப் படித்த பின், பாலாவின் இந்த படத்தைப் பார்க்கும் போது 'தாய் மீது சத்தியம்' படம் பார்ப்பது போன்ற உணர்வைத் தான் தந்தது.

இந்த படத்தில் காவல்துறை அதிகாரி, குற்றவாளிகளை அழைத்து கறிவிருந்து நடத்துவார். அப்போது இனி திருடமாட்டேன என திருடர்களிடம் சாப்பிடும் முன் சத்தியம் செய்யச் சொல்வார்.

போலீஸ் ஸ்டேஷனிலே சரக்கு, சைடு டிஸ் ஆகியவற்றோடு கறிச்சோறு எங்காவது போட முடியுமா? புகார் தரப் போறவர்களிடம் புகார் எழுத பேப்பர் வாங்கி வரச்சொல்லும் கச்சேரிக்கு பாலா போனதில்லை போலும்.

இந்த படத்தில் போலீசாரின் வாக்கி டாக்கி காணாமல் போய் விடும். அதை தேடி போலீஸ் அலையும். அப்போது காவல்துறை அதிகாரியை குண்டு சிறுவன் கடுமையான லந்து கொடுப்பான்.

அவர்களுக்குள் நடக்கும் ஒரு டயலாக். ' டேய்.. என் கண்ணுல இருந்து கண்ணீர் வர வெச்சுட்டீங்கடா.' என காவல்துறை அதிகாரி சொல்ல, அதற்கு அந்த சுள்ளான், "டி எஸ் பி சார்.. கண்ல இருந்து தண்ணி தான் வரும்... பின்னே மூத்திரமா வரும்?” என லந்தடிப்பான்.

இந்த படத்தில் வசனம் ஆபாசம் என்பதைத் தாண்டி வக்கிரமாகவே இருந்தது. ' ஏண்டி.. நான் தெரியாம தான் கேட்கறேன்.. ஆம்பளைங்க பேண்ட்ல ஜிப் இருக்கறது ஓக்கே.. பொம்பள புள்ளைங்க பேண்ட்ல எதுக்குடி ஜிப்?" ( எழுதினது எஸ்.ராமகிருஷ்ணனா?)

இந்த படத்தில் நீதிபதி வீட்டு பீரோ சாவி காணாமல் போகும். அந்த பீரோவை திறக்க திருடனான ஆர்யாவை இன்ஸ்பெக்டர் அழைத்துச் செல்வார். பீரோவை திறந்த பிறகு நீதிபதியின் சைரன் வைத்த வாகனத்திலேயே ஊருக்குள் ஆர்யா வருவார். இப்படியெல்லாம் யாராவது யோசிக்க முடியுமா? இதில் கதாநாயகியாக வருபவரும் போலீஸ் தான். அவர் வீட்டில் திருடப்போகும் விஷாலிடம் அவர் பேசும் வசனங்கள் ‘ஏ’ ஒன் !

இப்படி பாலா படம் என்றாலே போலீஸ்காரர்களை நட்டு கழன்றவர்களாய் காட்டும் நிலையில், நாச்சியாரில் ஜோதிகாவும் காவல்துறை அதிகாரியாக நடித்துள்ளார் என்பதை நினைத்துப் பார்க்கும் போது ரொம்ப ரொம்ப பயமாய் இருக்கிறது.

- ப.கவிதா குமார்

Pin It

ன்றைய குழந்தைகள் விரும்பும் ஹாரிபார்ட்டர் படம் போல, அன்றைய காலத்தில் எனக்குத் தெரிந்த மாய உலக சினிமா என்பது காந்தாராவ் நடித்த படங்கள் தான். 'ஆந்திராவின் எம்ஜிஆர்' என்ற அழைக்கப்பட்ட காந்தாராவின் படங்கள் பெரும்பாலும் எங்கள் புதூர் டெண்ட் கொட்டகைக்கு வந்து விடும்.

சிறுவயதில் டப்பிங் படங்கள் மீது இருந்த ஆர்வமென்பது, மாயஉலகம் மீதான மாயையாய் இருந்தது. விசித்திர மனிதர்கள், பேசும் சிலை, கண்ணாடியில் தெரியும் உருவம், நெருப்பு கக்கும் வாள்,பயமேற்படுத்தும் குகை என ஒரு விசித்திர கற்பனை உலகை தந்தது. அப்படியான படங்கள் நிறையவே அப்போது வந்தது.

மதுரை ஆத்திகுளம் வீரலெட்சுமியும், மூன்றுமாவடி ராஜாவிலும் அப்படியான படங்கள் நிறைய பார்த்திருக்கிறேன். அதில் கதாநாயகன், கதாநாயகி சுத்த தமிழில் தான் பேசுவார்கள். ஆனால், நகைச்சுவை நடிகர்கள் ஹெக்கே பிக்கே வசனங்கள் தான் பேசுவார்கள். எம்ஜிஆர் மீதிருந்த ப்ரியத்தின் காரணமாக காந்தாராவ் படங்கள் பலவற்றை பார்த்திருக்கிறேன்.

தெலுங்கு டப்பிங் படம் என்பதைத் தாண்டி அப்படத்தில் வசனங்கள் நெருக்கமாய் இருந்தது. அப்படியான வசனங்களை எழுதிய ஒருவரைப் பற்றிய பதிவு தான் இது.

டப்பிங் சினிமா என்றவுடன் ஆந்திரா தான் நமக்கு ஞாபகத்திற்கு வருகிறது. 1980ம் ஆண்டுகளில் சிரஞ்சீவி நடித்த பல படங்கள் தமிழில் டப்பிங் செய்யப்பட்டது.

1990ம் ஆண்டுகளுக்குப் பிறகு டாக்டர் ராஜசேகர் படங்களும், அதன் தொடர்ச்சியாக விஜயசாந்தி படங்களும் வந்தன. இப்படங்கள் பல தமிழகத்தில் 100 நாட்களைக் கடந்து ஓடின.

நாகர்ஜீன் நடித்த உதயம் உள்ளிட்ட பல படங்கள் வரிசை கட்டி வந்தன. சலங்கை ஒலி, வாலிபன் என பல படங்கள் வெற்றிப்படங்களாக அமைந்தன.

இப்படங்களில் பாடல்களும், வசனங்களும் தெலுங்கு வாடையற்றே இருந்தன.

இப்படங்களை தமிழுக்குக் கொண்டு வந்த தயாரிப்பாளர்கள், வசனம் எழுத மிகச்சிறந்த நபர்களையே தேர்வு செய்தனர். 1990ம் ஆண்டுகளுக்குப் பிறகு இப்பணியைத் திறம்படச் செய்தவர் மருதபரணி. அவரே வசனம், பாடல்களைக் கவனித்துக் கொண்டார்.

அதற்கு முன்பு அதாவது கருப்பு, வெள்ளை காலத்தில் இருந்து இப்படியான ஏராளமான மொழிமாற்றுப் படங்களுக்கு வசனம் எழுதிய ஒருவர், தமிழில் மிகச்சிறந்த பாடலாசிரியராக பயணித்துள்ளார். அவர் எழுதிய பல பாடல்கள் இன்றளவும் தமிழின் மகத்தான சூப்பர் ஹிட்டாக உள்ளன. அத்துடன் சூப்பர் ஸ்டார் ரஜினிகாந்தை வைத்து படத்தை இயக்கியுள்ளார்.

யார் தான் அவர்?

1976ம் ஆண்டு கே.விஜயன் இயக்கத்தில் வெளிவந்த 'ரோஜாவின் ராஜா'. மிகச்சுமாரான படம். இப்படத்தில் கதாநாயகன் சிவாஜிகணேசன். கதாநாயகி வாணிஸ்ரீ. இப்படத்தின் அனைத்துப் பாடல்களும் கற்கண்டு போல சொற்சுவை கொண்டது. அத்தனைப் பாடல்களையும் எழுதியதும் டப்பிங் படங்களுக்கு வசனம் எழுதிய அதே நபர் தான்.

இன்றளவும் இப்படத்தில் இடம் பெற்ற இப்பாடல்கள் காலையில் தொலைக்காட்சிகளில் காண முடிகிறது. மெல்லிசை மன்னர் எம்.எஸ்.விஸ்வநாதன் இசையில் ஒலிக்கும், ' அலங்காரம் கலையாத சிலை ஒன்று கண்டேன் அன்பே உன் எழில் கண்ட ஒரு நாளிலே' என்ற டிஎம்.சௌந்தராஜன் குரலை மறந்து விட முடியுமா?

இதே படத்தில் இடம் பெற்ற இன்னொரு பாடல், இலங்கை வானொலி நிலையத்தில் ராமன் வரிசைப் பாடல்களை ஒலிபரப்பு செய்த போது, நீண்ட காலமாக முதலிடத்தில் இருந்தது.

'நாணம் ஒரு புறம் 
ஆசை ஒரு புறம்
கவலை மறு புறம்  
அவள் நிலைமை திரிபுரம்'

என சந்தம் கொட்டும் அந்த பாடல்,' ஜனகனின் மகளை மணமகளாக ராமன் நினைத்திருந்தான். ராஜாராமன் நினைத்திருந்தான் '. இந்த பாடலை பாடியவர் பி.சுசீலா.

இவ்வளவு அருமையான பாடல்களை எழுதிய அந்த கவிஞர், பாடலாசிரியர் புரட்சிதாசன் தான் குறித்து தான் இன்றைய பதிவு. மொழிச்செழுமை நிறைந்த தமிழ் சினிமாவில் அரை நூற்றாண்டு காலம் உழைத்த இந்த கலைஞனின் அடையாளம் வெளியே தெரியவே இல்லை என்ற ஆதங்கமே இந்த பதிவு.

தமிழ் திரைப்பட தயாரிப்பாளர்களில் படம் வெளியாகும் தேதியை முதலில் அறிவித்து படத்திற்கு பூஜை போட்டவர் என சாண்டோ எம். எம். ஏ. சின்னப்பத் தேவரை குறிப்பிடுவார்கள். அவரது சகோதரர் எம்.ஏ.திருமுகம். அதிகம் எம்ஜிஆரை வைத்து படத்தை இயக்கியவர்.

தமிழின் முதல் ஏ சர்டிபிகேட் படமான 'மர்மயோகி' படத்தின் எடிட்டர் இவர் தான். தமிழ் சினிமாவில் மிருகங்களை வைத்து படம் செய்யும் உத்தியை உருவாக்கி நிறுவனம் இவர்களது தேவர் பிலிம்ஸ் தான்.

இவர் 1956ம் ஆண்டு எம்ஜிஆரை வைத்து 'தாய்க்குப் பின் தாரம்' என்ற மகத்தான வெற்றிப் படத்தை எடுத்தார். இதன் பின் கன்னட நடிகர் உதயகுமார் நடிப்பில் 1960ம் ஆண்டு வெளியான 'யானைப்பாகன்' என்ற படத்தை திருமுகம் இயக்கினார்.

சிவாஜிகணேசன் போன்ற முகத்தோற்றம் கொண்ட  உதயகுமாருக்கு இப்படத்தில் ஜோடி சரோஜாதேவி. இப்படம் பயங்கர பிளாப். ஆனால், கே.வி.மகாதேவன் இசையில் இப்படத்தின் பாடல்கள் மிகச்சிறப்பாக அமைந்தது. புரட்சிதாசன் எழுதிய இப்பாடல் நாதமணி சீர்காழி கோவிந்தராஜன், பி.சுசீலாவின் குரலில் என்றும் இனிக்கும்.

'செங்கனி வாய் திறந்து சிரித்திடுவாய்
தித்திக்கும் தேன் குடமே செண்பகப் பூச்சரமே.
சீர்காழி பாடிய காதல் பாடல்கள் மிக மிகக்குறைவு. ஆனால், அதில் நிறைவு செய்த பாடல் இது தான். 

இதே படத்தில் பி.லீலா குழுவினரின் பாடிய பாடுபட்ட 'தொழிலாளி பசிக்குதென்றான்' என்ற பாடலையும் புரட்சிதாசன் எழுதியிருந்தார்.

இதற்கு முன்பே சின்னப்பத் தேவர் 1958ம் ஆண்டு உதயகுமார், சரோஜாதேவி நடிப்பில் செங்கோட்டை சிங்கம் என்ற படத்தை எடுத்தார். வி. என். ரெட்டி இயக்கிய படத்திலும் புரட்சிதாசன் பாடல் எழுதியுள்ளார்.

அன்றைய காலத்தில் இசைத்தட்டில் சாதனைப்படைத்த பாடல்களில் ஆர்.பாலசரஸ்வதியின் பாடல்களைக் குறிப்பிடுவார்கள். 1957ம் ஆண்டு 'ஆவதெல்லாம் பெண்ணாலே' படத்தில் அவர் பாடிய இனிய தாலாட்டு பாடல் இன்றளவும் யூடியூப்பில் நீங்கள் கேட்டு மகிழலாம். "வெண்ணிலா ராஜா வேகமாய் நீ வா" என்ற அந்த பாடலை எழுதியது புரட்சிதாசன் தான்.  

1955ம் ஆண்டு சிவாஜி கணேசன், பத்மினி நடிப்பில் வெளியான படம் 'மங்கையர் திலகம்'. வி.தக்சிணாமூர்த்தி இசையில் கமலா பாடிய கண்டு கொண்டேன் பாடலை புரட்சிதாசன் எழுதியிருந்தார்.

1980ம் ஆண்டுகளுக்குப் பிறகு சிவாஜி கணேசன் நடித்த பல படங்கள் தோல்விப் படங்களாக அமைந்தன. அப்படி ஒரு படம் 'தராசு'. அவரின் பேவரைட் நடிகையான கே.ஆர்.விஜயா நடித்த படம் 1984ம் ஆண்டு வெளியானது. இப்படத்தை ராஜகணபதி இயக்கியிருந்தார்.

இப்படத்தின் அனைத்துப் பாடல்களையும் எழுதியது புரட்சிதாசன் தான். எம்எஸ்.விஸ்வநாதன் இசையில் டிஎம்.சௌந்தராஜனுடன், ராகவேந்தர் என்ற விஜயரமணி பாடிய 'ஆயா கடை மசாலா வடை' பாடலும், வாணி ஜெயராம், விஜயரமணியோடு இணைந்து பாடிய 'நான் தான்யா சிலுக்கு சிலுக்கு' என்ற பாடலும், டிஎம்.சௌந்தராஜன் குரலில் ‘சிந்தனை தோன்றி அறிவு வளர்ந்தது இன்றல்ல நேற்றல்ல என்ற இனிமையான பாடலும் இப்படத்தில் இடம் பெற்றன.

இப்பதிவின் நோக்கத்திற்கு அடுத்து சுட்டிக்காட்டும் படத்திற்கும் பெரும் பங்கு உண்டு. காரணம், இப்படத்தில் இசைஞானி இசையில் ஒலித்த இனிமையான பாடல்கள். அப்பாடல்கள் அனைத்தையும் எழுதியது புரட்சிதாசன் என்பது இரட்டிப்பு மகிழ்ச்சி.

அவர் தெலுங்கு டப்பிங் படங்களில் பணியாற்றியதாலோ என்னவோ, 1979ம் ஆண்டு அவருக்கு இயக்குநராகும் வாய்ப்பு கிடைத்த போது தெலுங்கு பாணியில் தமிழில் 'நான் போட்ட சவால்' படத்தை இயக்கினார்.

அப்படத்தில் சூப்பர்ஸ்டார் ரஜினி தான் ஹீரோ. ஆனால், படத்தின் கதை வழக்கமான பழிவாங்கும் படலமாக இருந்ததால், அட்டர் பிளாப் படம்.

ஆனால், இன்றளவும் புரட்சிதாசன் பெயர் சொல்வதற்கும் அப்படம் தான் காரணமாக இருக்கிறது.

ஏனெனில், அப்படத்தில் மலேசியா வாசுதேவனும், வாணி ஜெயராமும் இணைந்து பாடிய 'சுகம் சுகமே.. தொடத் தொடத்தானே' என்ற இனிய பாடல் இடம் பெற்றுள்ளது. இப்பாடல் வழங்கிய இனிமையை ஒவ்வொரு நாளும் யூடியூப்பில் இப்பாடலைக் கேட்டு மகிழ்கிறேன்.

திருச்சி லோகநாதனின் புதல்வர் டி.எல்.மகாராஜன் பாடிய இனிய பாடல்

'நெஞ்சே உன் ஆசையென்ன
அதை நினைத்தால் ஆகாதெதென்ன'

இப்பாடல் மிக நம்பிக்கையூட்டும் வரிகளைக் கொண்டது. இவ்வளவு அழகான குரல் வளம் கொண்ட பாடகனை தமிழ் திரையுலம் கைவிட்டது தான் மிக வேதனை.

மலேசியா வாசுதேவன் பாடிய 'நாட்டுக்குள்ள சில நரிகள் இருக்குது... ரொம்ப நியாயமான புலிகள் இருக்குது' என்ற பாடல் அவர் பெயருக்குப் பொருத்தமாகவே இருந்தது. இந்த பாடல் அதன் பின் வந்த பல தெலுங்கு மொழிமாற்றுப் படங்களுக்கு அதே டியூனில் பயன்படுத்தப்பட்டுள்ளது என்பது குறிப்பிடத்தக்கது.

வாணி ஜெயராம் குரலில் 'மயக்கமா' என்ற பாடலும், வாணியும், சைலஜாவும் இணைந்து பாடிய 'சில்லறை தேவை இப்போ தேவை' என்ற பாடலும் இப்படத்தில் இடம் பெற்றன. மொழிகளைக் கடந்து அரை நூற்றாண்டு காலம் திரையுலகில் படைப்பு சாதனை படைந்த புரட்சிதாசன் என்றும் நினைவில் நிலைத்திருப்பார்.  

- ப.கவிதா குமார்

Pin It

'னவுகள் இல்லையென்றால் பூமியில் தற்கொலை என்பது தடுக்க முடியாத செயலாகி விடும்' என்று என்றோ எழுதிய கவிதை, திரைத்துறைக்கு பொருத்தமாகவே இருக்கிறது.

Ashok kumar producerகனவுலகமான சினிமாவில் எத்தனை தற்கொலைகள்... காதல், வீரம், சோகம், துரோகம் என அத்தனை மசாலாவும் நிறைந்த சினிமா உலகில் ரயில் வண்டியின் தண்டவாளம் போல நீண்டு கொண்டேயிருப்பது தற்கொலைகள் மட்டுமே.

இயக்குநர் சசிகுமாரின் உறவினரான தயாரிப்பாளர் அசோக்குமார், அதற்கு முன்பு இயக்குநர் மணிரத்னத்தின் சகோதரர் ஜி.வி என்ற வெங்கடேஸ்வரன் ஆகியோரின் தற்கொலையைத் தொடர்ந்தே உறைந்து கிடந்த தமிழ் திரையுலகத்தின் உதடுகள் முணுமுணுக்க ஆரம்பித்துள்ளன. இந்த இரண்டு சாவுகளுக்கும் காரணம் கந்துவட்டி அன்புச்செழியன் என்றுகுற்றச்சாட்டுகள் எழுந்தும் அக்குற்றச்சாட்டுக்கள் வழக்காகி விடவில்லை.

திடீர் தயாரிப்பாளர்
---------------------------

 என்ற ரூபம் கொண்டபோதே, அத்தனை நியாய, தர்மங்களும் குழி தோண்டி புதைக்கப்பட்டு விட்டன.

ரெடிமேட் புளியோதரை போல நான்கு படங்களில் நடித்தவுடனே சொந்த தயாரிப்பு கம்பெனியை அவரது மேனேஜர் பெயரில் பினாமியாக துவங்கும் கதாநாயகன்கள் உருவாகியுள்ள தமிழ் சினிமாவில், அப்படத்திற்கு பணம் முதலீடு செய்யப்போகிறவர்கள் யார் என்ற கேள்வியை திரையுலகம் இன்றுவரை எழுப்பியிருக்கிறதா?

அறிமுகமான படத்தில் இருந்து 4 படங்களிலேயே ஒரு திரைப்படத்தை எடுக்க குறைந்தது 5 கோடி ரூபாயை அந்த நடிகர் சம்பாதித்திருப்பாரா என்ற கேள்வியை இதுவரையும் யாரும் கேட்க தயாரில்லை. வருமான வரித்துறையினரும் அவர்களை நோண்டி நொங்கெடுப்பதில்லை. இதற்கு பின் உள்ள மாயஉலகம் பணத்தால் கட்டமைக்கப்பட்டது. அதற்கு மேனேஜர்கள் அல்ல... அன்புச்செழியன்களே தேவைப்படுகிறார்கள்.

ஏனெனில் லாபம் தரும் தொழிலாய் சினிமா இல்லை என்பது வங்கிகளுக்குத் தெரியும். ஒரு காலத்தில் படம் போட்டவுடன் இந்தியன் வங்கி கோபாலகிருஷ்ணனுக்கு நன்றி கார்டு போடாத திரைப்படமே இல்லை. ஆனால், இன்று எவ்வளவு பெரிய நடிகரை வைத்து படம் எடுத்தாலும் 4 நாட்களுக்கு மேல் ஓடுவதில்லை. அப்படி ஓடினாலும்,அப்படத்தின் இயக்குநர், நடிகர்களுக்காக அப்படத்தின் திரைவிநியோகம் திரைமறைவில் சென்று விடுகிறது.

பிழைப்புவாதிகள்
-------------------------
மணிரத்னத்தின் சகோதரர் தற்கொலை செய்து கொண்ட போது இதே போல கந்துவட்டிக்கு எதிராக பொங்கிய சூப்பர்ஸ்டார், கலைஞானி உள்ளிட்டவர்கள், அதற்கு பின் எத்தனையோ நடிகை, நடிகைகள் தற்கொலை செய்து கொண்ட போதும் பொங்கவில்லை.

அசோக்குமார் தற்கொலையில் என்ன பேசினார்களோ, அதையே தான் வெங்கடேஸ்வரனின் மரணத்தின் போதும் அவர்கள் பேசினார்கள். அதன் பின் அவர்கள் பிழைப்பைப் பார்க்க போய் விட்டார்கள்.

அவர்களுக்கு உண்மை தெரியும். ஏனெனில் காவல்துறை, அரசியல்வாதிகளின் கூட்டுத் தொடர்பில் உள்ள கந்துவட்டி முதலைகளை தூண்டில் போட்டு ஒரு போதும் பிடித்திட முடியாது.

இந்த கட்டுரை கந்துவட்டி பற்றியோ, அன்புச்செழியனைப் பற்றியோ எழுதப்பட்டதல்ல.

நூற்றாண்டு கொண்டாடிய தமிழ் சினிமாவில் தொடர்ந்து நிகழும் தற்கொலைகளைப் பற்றித் தான். இத்தனை தற்கொலைகள் நடந்தும் நடிகர் சங்கமோ, தயாரிப்பாளர் சங்கமோ, தொழிலாளர் சங்கமோ ஏன் இதுவரை தடுப்பதற்கான நடவடிக்கை எடுக்கவில்லையென்ற கேள்வியை முன்வைத்து எழுதப்பட்டது தான்.

தற்கொலை முடிவு சரியா?

--------------------------------------

ஒருவரின் தனிப்பட்ட தற்கொலைக்கு இவர்கள் எப்படி பொறுப்பேற்க முடியும் என்ற கேள்வி இயல்பாக எழும். நம்மைப் போன்ற சாதாரண மனிதர்கள் தற்கொலை செய்து கொண்டால், நாளிதழ்களில் 2 காலமோ, சிங்கிள் காலமாகவோ செய்தியாக வரும். ஆனால், சினிமா பிரபலங்களில் தற்கொலை அப்படியல்லவே. அவர் ஏன் செத்தார், எதற்கு செத்தார் என்ற பல நாட்கள், ஏன் பல ஆண்டுகள் வரை அச்செய்தி அச்சேறும். இதில் நடிகைகளாக இருந்தால் சொல்லவே வேண்டும்.

இதுவரை தமிழ் சினிமாவில் அதிகமாக தற்கொலை செய்து கொண்டது நடிகைகள் தான். இதில் பலரது மரணங்கள் இன்னனும் துப்பு துலங்காமல் மர்மமம் நிறைந்ததாகவே இருக்கிறது. என்றாவது இதுகுறித்து விசாரணை கமிஷன் வைக்கச்சொல்லி திரைப்பட தயாரிப்பாளர் சங்கமோ, நடிகர் சங்கமோ கேட்டிருக்கிறதா? தற்கொலை முடிவு சரியா, தவறா என்ற பட்டிமன்றத்திற்கு போகாமல் அதை உருவாக்கும் காரணிகளைக் கண்டறிந்துள்ளதா?

கவர்ச்சியில் துவங்கிய சாவு
---------------------------------------
தமிழ் திரையுலகில் தற்கொலையென பரபரப்பு உண்டானது 1974ம் ஆண்டு தான். நான் , உலகம் இவ்வளவு தான் , அதே கண்கள், குலவிளக்கு , பாபு, தெய்வ மகன், தெய்வம் பேசுமா, நான் யார் தெரியுமா, சித்தி போன்ற படங்களில் நடித்த விஜயஸ்ரீ திடீர் என தற்கொலை செய்து கொண்டார். தமிழ் , மலையாளப் படங்களில் அப்போது பிரபலமாக நடித்துக் கொண்டிருந்தவர். கவர்ச்சி நடிகை தற்கொலை என்ற செய்தியோடு முடிந்தது அவரது சாவு.

கொலையா, தற்கொலையா?
-----------------------------------------

ரஜினிகாந்த் நடித்த 'தர்மயுத்தம்' படத்தில் இடம் பெற்ற 'தங்கரதத்தில் ஓர் மஞ்சள் நிலவு' பாடலை அவ்வளவு சீக்கிரமாக மறந்திட முடியாது. அப்படத்தில் ரஜினியின் தங்கையாக நடித்தவர் லக்ஷ்மிஸ்ரீ. 1979ம் ஆண்டு தூக்கு போட்டு தற்கொலை செய்து கொண்டார். முதலில் கொலையென பேசப்பட்டது, கடைசியில் தற்கொலை வழக்கமாகவே மாறியது.

 அழிந்த கோலம் 
------------------------
ஒரு கதாநாயகியின் மரண ஊர்வலத்தை தமிழ் சினிமா முதல் முதலில் பதிவு செய்தது ஷோபாவிற்கு தான். அவர் தற்கொலை செய்து கொள்ளும் போது வயது 18 தான்.பசி படத்திற்காக தேசிய விருது பெற்றவர். மத்திய அரசின் ஊர்வசி விருது பெற்றவர். 1966ம் ஆண்டு சந்திரபாபுவின் இயக்கத்தில் வெளியான 'தட்டுங்கள் திறக்கப்படும்' என்ற படத்தில் பேபி மகாலட்சுமி என்ற பெயரில் குழந்தை நடிகையாக அறிமுகமானார்.

அவரிடம், ' மற்றவர்கள் ஒளிப்பதிவில் படு சுமாராகத் தெரியும் நீங்கள், பாலு சார் ஒளிப்பதிவில் பேரழகியாகத் தோன்றுகிறீர்களே' என்று ஒரு நிருபர் கேள்வி கேட்டார்.

"மற்றவர்கள் என்னை காமிரா, லைட்ஸ், மற்றும் பிலிம் கொண்டு ஒளிப்பதிவு செய்கிறார்கள். எங்க அங்கிள் என்னைக் காமிரா, லைட்ஸ், மற்றும் ஃபிலிம் இந்த மூன்றோடும் நிறையப் பாசத்தையும் குழைத்து ஒளிப்பதிவு செய்கிறார். அவர் ஒளிப்பதிவில் நான் பேரழகியாக ஜொலிப்பதற்கு இதுதான் காரணம்" என்று ஷோபா பதில் சொல்லியிருந்தார்.

'பூ வண்ணம் போல நெஞ்சம் பூபாளம் பாடும் நேரம் பொங்கி நிற்கும் தினம்', 'அழகு மிகுந்த ராஜகுமாரன் மேகமாகி போகிறான்' என்ற வரிகளுக்கு முக பாவத்தால் உயிரூட்டிய நடிகை. மூடுபனி விலகாத அவரது வாழ்க்கை, தூக்கு கயிற்றின் மூலம் அழியாத கோலமாகிப் போனது.

பட்டென மறைந்த படாபட்
----------------------------------------

'நித்தம் நித்தம் நெல்லுச்சோறு நெய் மணக்கும் கத்திரிக்காய்' பாடலை மறக்காதவர்கள் படாபட் ஜெயலட்சுமியையும் மறந்திருக்க மாட்டார்கள். அவள் ஒரு தொடர்கதை, ஆறில் இருந்து அறுபது வரை, முள்ளும் மலரும், காளி,அன்னக்கிளி, ராம் ராபர்ட் ரஹீம், வருவான் வடிவேலன் உள்ளிட்ட எண்ணற்ற படங்களில் நடித்துக் கொண்டிருந்தார். அவர் பேசிய வசனம் மூலமாகவே படாபட் ஜெயலெட்சுமியாக இன்றும் அறியப்படுகிறார். எம்ஜிஆரின் சகோதரர் சக்கரபாணியின் மகன் சுகுமாருடன் 'குங்குமம் கதை சொல்கிறது' படத்தில் சேர்ந்து நடித்தார். அவருடன் ஏற்பட்ட நட்பின் காரணமாகவே அவர் தற்கொலை முடிவு எடுத்ததாக பரபரப்பாக பேசப்பட்டது.

ஓயாத அலை
---------------------

டிஆர்.ராஜகுமாரிக்கு அடுத்து அதிக ரசிகர்களைக் கண்களால் கட்டிப் போட்டவர் சில்க் ஸ்மிதா. தமிழ், தெலுங்கு, கன்னடம், மலையாளம் மற்றும் இந்தி ஆகிய மொழிகளில் 450ற்கும் மேற்பட்ட திரைப்படங்களில் நடித்தவர். அவர் இல்லாத படங்களே இல்லையென்ற வகையில் அவருக்காகவே நடன காட்சிகள் இயக்குநர்களால் அமைக்கப்பட்டன.

'அலைகள் ஓய்வதில்லை' படத்தில் மிகச்சிறப்பான நடிப்பை வெளிப்படுத்தியிருந்த நடிகை அவர். 1996ம் ஆண்டு அவரும் தூக்கு கயிற்றுக்கு தான் உயிரை கொடுத்தார். அவரின் மரணம் இன்று வரை ஒரு ரகசியமாகவே இருக்கிறது. நடிகையின் வாழ்க்கை சரித்திரம் படமாவது அரிது. ஆனால், சில்க் ஸ்மிதாவின் வாழ்க்கையை மையமாக வைத்து 'தி டர்டி பிக்சர் 'என்ற திரைப்படம் பல மொழிகளில் எடுக்கப்பட்டுள்ளது.இன்று வரை அவர் விட்டுச் சென்ற இடத்தை இட்டு நிரப்ப நடிகைகள் வரவில்லை.

ஒரிஜனலான டூப்
-------------------------
ஒரு படம் எடுத்துக் கொண்டிருக்கும் நிலையில் கதாநாயகி தற்கொலை செய்து கொள்கிறார். அவருக்கு டூப் போட்ட நடிகை பிரபலமான கதாநாயகியான வரலாறு தமிழ் சினிமாவில் தான் நடந்தது. 'நிலாப்பெண்ணே' படத்தில் நடித்த திவ்யபாரதி தான் அவர். இவரின் மரணத்தில் நிலவிய மர்மம் நீடிக்கிறது. இந்தி திரையுலகில் பிரபலமாக இருந்த திவ்யபாரதி 1993ம் ஆண்டு ஏப்ரல் 5ம் தேதி பால்கனியில் இருந்த தவறி விழுந்ததாக கூறப்பட்டது. இவரின் மரணத்திற்கு பின்னணியில் மும்பையின் நிழல் உலக தாதாக்கள் இருப்பதாக பரபரப்பாக புகார் எழுந்தது. ஆனால், பல 1998ம் ஆண்டு இவரது மரணம் விபத்து என்று போலீசாரால் முடிக்கப்பட்டது. 19 வயதில் முடிந்து போனது அவரது வாழ்க்கை. அவருக்கு டூப்பாக நடித்து கதாநாயகியாக புகழ் பெற்றவர் நடிகை ரம்பா.

5 ஆண்டு சிறை  
----------------------

நடிகர்கள் விஜயகாந்த், சத்யராஜ் , முரளி ஆகியோருடன் ஜோடி சேர்ந்து நடித்த இந்த நடிகை, உண்மை வாழ்வில் காதலுடன் ஜோடி சேர முடியவில்லையென விஷம் குடித்தார். அவருடன் காதலும் விஷம் குடித்தார். காதலன் தப்பித்தார். காதலி இறந்த போனாள். தற்கொலைக்கு தூண்டியதாக காதலனுக்கு 5 ஆண்டுகள் சிறைத்தண்டனை கிடைத்தது. அந்த நடிகை பிரதியுஷா.

இயக்குநர் கங்கை அமரனால் 'கோழி கூவுது' படத்தில் கதாநாயகியாக அறிமுகப்படுத்தப்பட்டவர் விஜி. 30க்கும் மேற்பட்ட படங்களில் கதாநாயகியாக நடித்தவர். திடீரென வீட்டில் தூக்கு போட்டு தற்கொலை செய்து கொண்டார். சாவதற்கு முன் டேப்பில் தற்கொலைக்கு காரணமானவர்கள் என சிலரை சொல்லி விட்டுச் செத்துப்போனார். ஆனால், சென்னை மகளிர் நீதிமன்றத்தில் நடந்த இந்த வழக்கில் குற்றச்சாட்டுகள் சந்தேகத்திற்கிடமின்றி நிரூபிக்கப்படவில்லை என ஒரு இயக்குநர் உள்பட 3 பேரை நீதிமன்றம் விடுதலை செய்தது.

நீளும் பட்டியல்
------------------------

இவர்களைத் தவிர நடிகைகள் மோனல், ஷாலினி, வைஷ்ணவி, விஜயலட்சுமி,ஷோபனா ,சபர்ணா உள்ளிட்ட சின்னத்திரை நடிகைகள் பலர் தற்கொலை செய்து கொண்டுள்ளனர். நடிகர்கள் குணால், சாய்பிரசாந்த், முரளி மோகன், பாலாஜி யாதவ் உள்ளிட்ட பலரும் தற்கொலை செய்து கொண்டுள்ளனர். இன்னும் பல பிரபல நடிகர்கள், நடிகைகள் தற்கொலைக்கு முயற்சித்துள்ளனர்.

என்ன செய்யப்போகிறது நடிகர் சங்கம்?
----------------------------------------------------------

இத்தனை சாவுகளும் காதல், ஏமாற்றம்,துரோகம், வறுமை, வாய்ப்பின்மை என ஏதோ ஒன்றோடு சம்பந்தப்பட்டதாக இருக்கிறது. கந்து வட்டி என்ற கொடுமையான சமூக அவலத்திற்கு எதிராக கொடி தூக்கும் தமிழ் திரையுலகம், தங்கள் துறைக்குள் பலர் இப்படி தற்கொலை செய்து கொண்டதை சத்தமில்லாமல் மௌனமாக கடந்து விட்டது தான் சோகத்திலும் பெரும் சோகம்.

தற்கொலை முடிவுகளை தடுக்க நடிகர்-நடிகைகளுக்கு நடிகர் சங்கம் கவுன்சிலிங் அளிக்க வேண்டும் என்ற நீண்ட நாள் கோரிக்கை நிறைவேற்றப்படாமலே உள்ளது. தயாரிப்பாளர் அசோக்குமாரின் மரணம் அப்படியான உரையாடலுக்கான வாசலைத் திறந்து வைக்கட்டும்.

- ப.கவிதா குமார்

Pin It

இப்படி ஒரு அவல நிலை தமிழ்நாட்டில் இருக்கும் முற்போக்குவாதிகளுக்கு வந்திருக்கக் கூடாது. எதை எதை எல்லாமோ ஆதரித்துப் பேசவேண்டிய நிலைக்கு இந்த பிஜேபி பாவிகள் அவர்களை தள்ளிவிட்டுவிட்டார்கள். நேற்றுவரை முதுகு சொறிவதற்கும், காது குடைவதற்கும் மட்டுமே பயன்படுத்தி வந்த தங்கள் புரட்சி பேனாக்களை இன்று பல பேர் வாடிவாசலில் துள்ளிக் குதித்து அடங்க மறுத்து ஓடிவரும் மெர்சல் அப்பா விஜயைப் போல பிஜேபிக்கு எதிராக புரட்சிக் காவியம் தீட்ட எடுத்திருக்கின்றார்கள். எடுத்ததோடு மட்டுமல்லாமல் பல நாள் அடக்கி வைத்திருந்த பிஜேபிக்கு எதிரான தங்கள் கோபத்தை எல்லாம் கொட்டி தீர்த்துக் கொண்டு இருக்கின்றார்கள். சரி எழுத்தாளர்கள் கொஞ்சநாள் எழுதாமல் இருப்பதும், பிறகு திடீரென பைத்தியம் பிடித்தது போல நினைத்தை எல்லாம் எழுதி மற்றவர்களை அச்சுறுத்துவதும் சகஜம்தான் என்றாலும், நேற்றுவரை கை சூப்பிக் கொண்டிருந்த குழந்தைகள் எல்லாம் இன்று பேஸ்புக், ட்விட்டர்வரை வந்து “எப்படிடா எங்க தலைவரை, வருங்கால முதலமைச்சரை நீங்கள் திட்டலாம்” என்று கண்ட மேனிக்கு கசமுசா கசமுசா என்று எச்சிக்கலை ராஜாவையும், தமிழிசையும் திட்டித் தீர்த்துக்கொண்டு இருக்கின்றார்கள்.

mersal vijayதமிழ்நாட்டில் பிஜேபியை அடிப்பதற்கு ஆள் இல்லை என்ற கவலை எல்லாம் எப்போதுமே இருந்தது கிடையாது. பிஜேபி விளம்பரத்துக்காக கோவணத்துடன் நடந்தால் அதை முறியடிக்க அம்மணமாக கூட நடக்க இங்கே பல கட்சிகள் தயாராக இருக்கின்றன. இல்லை என்றால் இப்படி ஒரு மகா மட்டமான மொக்கை படத்துக்கு ஆதரவாக இத்தனை பேர் களத்தில் இறங்குவார்களா? சில இடங்களில் கைப்பிள்ளை விஜய் ரசிகர்களுடன் இணைந்து பிஜேபிக்கு எதிராக புரட்சி முழக்கம் இட்டிருக்கின்றார்கள் சேகுவேராவின் கொள்கை புத்திரர்கள். நாளை சன்னிலியோனுக்கு எதிராகவோ, இல்லை ஷகிலாவுக்கு எதிராகவோ பிஜேபி பாரததேசத்தை அவமதிக்கின்றார்கள் என்று களத்தில் இறங்குமேயானால் சன்னிலியோனோ, இல்லை ஷகிலாவோ சும்மா இருந்தாலும் நம் கொள்கைக் குன்றுகள் அவர்களின் ரசிகமணிகளின் துணையுடன் கருத்துச் சுதந்திரப் போருக்கு அணிதிரள்வார்கள். எள்ளுதான் காய்கின்றதே எலி புழுக்கை எதற்காக காயவேண்டும் என்று யாரும் கேள்வி கேட்கக் கூடாது. அது எதிர்ப்புரட்சி சக்திகளின் சதியாகிவிடும்.

எனக்கு மிக வருத்தமாக இருக்கின்றது. 100 ரூபாய் அநியாயமாக போய்விட்டதே என்று. அட காசு போனால் கூட பரவாயில்லை. எப்படிதான் இந்தக் கருமத்தை எல்லாம் கண்கொண்டு பாக்குறாங்கனே தெரியல. இந்தப் படத்தை தீபாவளி தவிர மற்ற நாட்களில் வெளியிட்டு இருந்தால் நிச்சயம் அட்டர் பிளாப் ஆகியிருக்கும். போதாத குறைக்கு இந்தப் பிஜேபி அயோக்கியர்கள் தேவையே இல்லாமல் ஜி.எஸ்.டி பத்தி தப்பா பேசிட்டாங்க, டிமானிடைசேஷன் பற்றி தப்பா பேசிட்டாங்க என்று விளம்பரத்துக்காக படத்தை எதிர்க்க, விஜய் படத்தை வாழ்நாளில் தியேட்டரில் போய் பாக்காத என்னைப் போன்ற பல பேரை தியேட்டரை நோக்கி அவரச அவரசமாக கிளம்ப வைத்துவிட்டார்கள். கொடும கொடுமனு கோயிலுக்குப் போன அங்க ரெண்டு கொடும அவுத்து போட்டுகிட்டு ஆடுச்சாம். அந்த மாதிரி ஆகிப்போச்சு நம்ம நிலை.

படத்தில இலவச மருத்துவம் வேண்டும் என்பதுதான் மைய கதைக்கரு என்று சொல்கின்றார்கள். இத சொல்றதுக்கு எதுக்குடா அப்பன் விஜய், இரண்டு மகன் விஜய் என்று தெரியவில்லை. மூனு பேரு மூஞ்சும் ஒரே மாதிரிதான் இருக்கு. அப்பன் விஜயின் மூஞ்சில் கொஞ்சம் வெள்ளை மயிர் எட்டிப் பார்க்குது. ஆனா சேட்டை எல்லாம் ஒரே மாதிரிதான் இருக்கு. இரட்டைக் குழந்தைகள் என்றால் ஒரே மாதிரி இருக்கும் என்று கேள்விப்பட்டு இருக்கின்றேன். ஆனால் அண்ணன், தம்பி கூட பார்ப்பதற்கு அதுவும் வெயிட்டு, ஹைட்டு என எல்லாமே ஒரே மாதிரி இருக்குறத இப்பதான் பார்க்கின்றேன். படத்தில ஆயிரத்தெட்டு ஓட்டை. ஒவ்வொரு பாட்டையும் கேட்கும் போதும் எங்க எங்கயோ எரியுது. விஜய் அழுவதைப் பார்த்தால் நமக்கு அடக்க முடியாமல் சிரிப்புதான் வருது. இதை எல்லாம் உண்மையில் விஜய் ரசிகர்கள் மட்டுமே பார்க்க முடியும். உலகில் வேறு எந்த ஜீவராசியும் பார்க்க முடியாது.

இந்தப் படத்தில் மொத்தம் ஒரு பத்து நிமிடம் விஜய் அரசியல் பேசியிருந்தாலே அது பெரிய விடயம்தான். மாறன் விஜய்க்கு வெளிநாட்டில் பரிசு கொடுக்கும் போது சரியா ஒரு நிமிசம் மருத்துவ சேவை பற்றிப் பேசுகின்றார். ஒரு நாட்டில் பணக்காரனுக்கு கிடைக்கும் அதே மருத்துவம் அந்த நாட்டில் உள்ள எல்லா குடிமக்களுக்கும் கிடைக்க வேண்டும் என்று சொல்கின்றார், அடுத்து தொலைக்காட்சி நிகழ்ச்சியில் ஒரு மூன்று நிமிடம் பேசுகின்றார். கடைசியாக ஒரு ஐந்து நிமிடம் அரசியல் பேசுகின்றார். அதில் கூட அரசை நேரடியாக குற்றம் சொல்லத் துப்பில்லாமல் அரசு மருத்துவமனைகள் ஒழுங்கா நடக்காமல் போனதற்கு யாரெல்லாம் காரணமோ அவங்க தான் முக்கிய குற்றவாளி என்றுதான் சொல்கின்றார். யார் அந்தக் குற்றவாளி என்று வெளிப்படையாக சொல்லும் திராணிகூட படத்தை இயக்கிய அட்லிக்கும் இல்லை, வருங்கால முதலமைச்சர் இளைய தளபதி விஜய்க்கும் இல்லை. வடிவேலு டிஜிட்டல் மணி பற்றி பேசும் வசனம் ஒரு பத்து செகண்டுதான் வருது. அதுவும் ஒரு பொறுக்கித்தனமான சண்டையில் வருது. எப்படிப் பார்த்தாலும் ஒரு பதினைந்து நிமிடத்திற்கு மேல் பிஜேபியை ‘குலைநடுங்க வைக்கும்’ காட்சிகள் அதில் இல்லை என்று உறுதியாக சொல்லலாம்.

இந்தக் காட்சிகள் கூட படத்தில் போக்கில் இயல்பாக காட்சிப்படுத்தப்படாமல் வலுக்கட்டாயமாக திணிக்கப்பட்டது போல்தான் இருக்கின்றது. மருத்துவ உலகில் நடக்கும் மோசடி பற்றியும், அது எப்படி சாமானிய இந்திய குடிமகனை பாதிக்கின்றது என்பதையும், டிமானிடைசேஷன் போன்றவற்றால் எப்படி மக்கள் கடுமையாக பாதிக்கப்பட்டார்கள் என்பதையும் காட்சியாக பாதிப்புகளைக் காட்டாமல் வடிவேலு கைநக்கிக் காட்டுவதும், விஜய் வசனங்கள் மூலம் சொல்வதும் அதற்குப் பதிலாக படத்தில் 90 சதவீத நேரத்தை விஜய் சண்டை போடுவதற்கும், குத்தாட்டம் ஆடுவதற்கும், குரங்கு சேட்டை பண்ணுவதற்கும் செலவழித்துவிட்டு 'படத்தில் மெசேஜ் சொல்கின்றேன் பேர்வழி' என்று சில செய்திகளை சொல்லி தன்னை புரட்சி வீரனாக காட்டிக்கொள்வதும் தமிழ் சினிமாவை பிடித்திருக்கும் சாபக்கேடு என்றுதான் சொல்ல வேண்டும்.

விஜய் போன்ற மொக்கை பேர்வழிகளை வைத்து பணமும் பண்ண வேண்டும், அதே சமயம் இந்த மொக்கைப் பேர்வழியின் அரசில் அரிப்புக்கு உள்ளே ஏதாவது சமூகப் பிரச்சினைகள் பற்றிய செய்திகளை திணித்து விளம்பரமும் தேடிக் கொடுக்க வேண்டும் என்பதுதான் படத்தை இயக்கியவன், வசனம் எழுதியவன், தயாரித்தவன் போன்ற அனைவரின் நோக்கமாக இருந்திருக்கின்றது. அதனால்தான் பிரச்சினை வந்தவுடன் பிஜேபி சொன்ன காட்சிகளை நீக்குவதாக தயாரிப்பாளர் ஒப்புக்கொண்டு இருக்கின்றார். இந்தப் பிரச்சினையில் இதுவரை அட்லியோ, இல்லை வருங்கால முதலமைச்சர் இளைய தளபதி விஜய்யோ வாயே திறக்கவில்லை என்பதையும் நாம் பார்க்க வேண்டும். அவர்களின் பணி மிக எளிதாக முடிந்துவிட்டது. போட்ட பணத்திற்கு மேல் பல மடங்கு நிச்சயம் எடுத்திருப்பார்கள். படம் எடுத்ததன் நோக்கம் நிறைவேறிவிட்டது. பிஜேபியின் அதிகப்பிரசங்கித்தனத்தால் அதிகம் பாதிக்கப்பட்டது சாமானிய பொது மக்கள்தான்.

இலவச மருத்துவம், ஜி.எஸ்.டி, டிமானிடைசேஷன் போன்ற மிகப்பெரிய பிரச்சினைகளை அல்பத்தனமாக, மொக்கையாக விஜய் போன்ற மொக்கை நடிகர்களை வைத்து குத்தாட்டமும், கும்மாளமும், குரங்கு சேட்டையும் கலந்து சொல்லி அந்தப் பிரச்சனையின் உண்மையான தீவிரத்தன்மையையே கேலிக்கூத்தாக்கி இருகின்றது இந்தக் கூத்தாடி கும்பல். நாம் ஒரு கோரிக்கையாக திரை உலகைச் சேர்ந்தவர்களுக்கு வைக்கின்றோம். உங்களுக்கு பணம் சம்பாதிப்பது மட்டும் தான் நோக்கம் என்றால் நாலுசண்டை, ஒரு அயிட்டம் சாங், ஒரு இன்ரோடெக்சன் சாங், இரண்டு லவ் சாங், அப்புறம் அம்மாவையோ, அக்காவையோ, தங்கச்சியையோ இல்லை பொண்டாட்டியையோ சாகடித்துக் கொஞ்சம் சென்டிமெண்ட், இடைஇடையே பஞ்சு டயலாக் என தங்களின் வழமையான உத்தியைப் பயன்படுத்தி படம் எடுங்கள். அது போன்ற படங்களில் நீங்கள் விஜய்யை வைத்து எடுத்தாலும் சரி, அஜித் ,சூர்யா இல்லை யாரை வேண்டும் என்றாலும் வைத்து எடுத்து பணம் சம்பாதித்து சமூகத்தை குட்டிச் சுவராக மாற்றுங்கள். ஆனால் தயவு செய்து இப்படி சமூகப் பிரச்சினை பற்றி படம் எடுக்கின்றேன் என்று சொல்லி இருப்பவனை எல்லாம் தேவையில்லாமல் பதற்றப்படுத்திக் கொண்டிருக்க வேண்டாம்.

பிஜேபிக்கு எதிராக போராடுற புரட்சி பாய்ஸ் எல்லாம் கொஞ்சம் இந்த மாதிரி மொக்கைப் படம் எடுக்கிறவன், நடிக்கிறவன் வீட்டு முன்னாடியும் போராடுனா நல்லா இருக்கும். ஏன் என்றால் காவி பயங்கரவாதத்தை ஒழிப்பது போல நாம் கதைப் பயங்கரவாதத்தையும் ஒழிக்க வேண்டும். இரண்டுமே மக்களின் சிந்தனைக்கு எதிரானது.

Pin It