கூடடையத் துடிக்கும் மின்மினிப்பூச்சி

மழலையின்
மனம் ஒத்த உள்ளசைவுடையவள்
கண்களைப் போத்திக்கொண்டு
கனவுகாணும் பட்டாம்பூச்சி அவள்…

மூச்சுக்காற்றையும் முகவரியோடு
கைப்பற்றத் துடிப்பவளவள்
தனதுடலில் தீப்பந்தமேந்தி தேடலின் வழியே
கூடடையத் துடிக்கும் மின்மினிப்பூச்சி அவள்…

விழியின் சைகையால் தன்வசப்படுத்தும்
சூனியக்காரியவள்
உன் தோள் சாய்ந்து இரசித்துப்போன
ஒற்றை நிலாவை தொலைத்துவிட்டு
தேடியலையும் முகில்கூட்டம் அவள்…

மலையை விடப் பெரியது
வானத்தை விடப் பரந்தது
அவளின் எதிர்பார்ப்பு
உனக்கும் அவளுக்கான காதல் பயணத்தில்...

- வழக்கறிஞர் நீதிமலர்