அறிவியல் ஆயிரம்

விவரங்கள்

சிதம்பரம் இரவிச்சந்திரன்

பிரிவு: இயற்கை & காட்டுயிர்கள்

வெளியிடப்பட்டது: 09 ஜூன் 2023

• இயற்கை & காட்டு உயிர்கள்

வாழிடங்களின் ஆரோக்கியம் மனிதர்களின் நலம் மட்டும் அல்ல; எல்லா உயிரினங்களின் நலமும் சேர்ந்ததுதான் அது என்பதை கொரோனா தொற்றுக் காலத்தில் உலகம் புரிந்து கொண்டது. தாவரங்கள், விலங்குகள், பறவையினங்கள் அடங்கிய உயிரினங்களின் உலகைப் பற்றி பல ஆய்வுகள் நடந்து வருகின்றன. இந்த ஆய்வுகள் மனிதன் இதுவரை பார்த்த கண்களைக் கொண்டு சுற்றிலும் இருக்கும் உயிரினங்களை இனி பார்க்கக் கூடாது என்பதை உணர்த்துகின்றன.

எல்லா உயிரினங்களுக்கும் உணர்வுகள் உண்டு

மனிதனுக்கும் சுற்றுப்புறத்திற்கும், மனிதனுக்கும் எண்ணற்ற உயிரினங்களுக்கும் இடையில் இருக்கும் உறவை எவ்வாறு நீதியுடன் கையாளலாம் என்பது பற்றியே நவீன அறிவியல் இன்று மனித குலத்திற்கு எடுத்துச் சொல்கிறது. மற்ற உயிரினங்களுக்கும் மனிதனுக்கு இருப்பது போலவே உணர்வுகளும் சிந்தனைகளும் உண்டு என்பதை வெகுகாலம் ஆய்வாளர்கள் ஏற்கவில்லை. பாலூட்டிகளுக்கும், மனிதனுக்கு முன் தோன்றிய குரங்கினங்களுக்கும் உள்ள ஆற்றலும் அறிவுக்கூர்மையும் மீன்களுக்கு இல்லை என்றே இதுவரை கருதப்பட்டு வந்தது.

இன்றும் பல விஞ்ஞானிகள் மீன்கள் உணர்வு உள்ளவை என்பதை ஏற்க மறுக்கின்றனர். ஆனால் கடந்த 25 ஆண்டுகளாக தொட்டி மீன்களின் நடத்தை பற்றி ஆராய்ந்து வரும் சிட்னி பல்கலைக்கழக ஆய்வாளர்கள் இந்த உயிரினங்கள் உணர்வுப்பூர்வமாக வாழ்கின்றன என்று வலியுறுத்திக் கூறுகிறார்கள்.மீன்களின் சிந்தனைகள், அவற்றின் சமூக, வாழ்வியல் முறைகளைப் பற்றி புதிய ஆய்வு முடிவுகள் இதுவரை மனிதகுலம் அறியாத பல வியப்பூட்டும் உண்மைகளைக் கூறுகிறது. ஒரு மீன், மற்றொரு மீனிடம் உள்ள பயம், பதட்டம் போன்ற உணர்வுகளைப் புரிந்து கொள்கிறது. அந்த உணர்வுகளை அது பகிர்ந்து கொள்கிறது என்று சமீபத்தில் சயன்ஸ் (Science) என்ற ஆய்விதழில் வெளிவந்த கட்டுரை கூறுகிறது.

மீன்களின் மூளையில் உள்ள ஆக்சிடாசின் (Oxytocin) என்ற வேதிப்பொருள் இதற்குக் காரணமாக உள்ளது என்று மற்றொரு ஆய்வு கூறுகிறது.

ஜீப்ரா மீன்களில் நடந்த ஆய்வுகள்

ஆய்வுக்கூடத்தில் ஜீப்ரா (Zeebra) மீனின் மூளையில் இருந்து இப்பொருள் அகற்றப்பட்டு ஆராயப்பட்டது. அந்த மீன்கள், சக மீன்களின் பதட்டத்தைப் புரிந்து கொள்ள முடியாத உயிரினங்களாக (antisocial) மாறிவிட்டன! இப்பொருளை மீண்டும் செலுத்தியபோது அந்த மீன்கள் இயல்பான நிலைக்கு மாறின.

சக மனிதர்களைப் பரிவுடன் நடத்தும் நம் பண்பிற்கு (care) வரலாற்றுக்கால பழமை உண்டு. மனிதர்கள், பாலூட்டிகள், மீன்கள் போன்ற உயிரினங்கள் பரிணாம ரீதியில் தோன்றுவதற்கு முன்பிருந்த காலத்தில் வாழ்ந்த ஆதி உயிரினங்களிடம் இந்தப் பண்புகள் உருவாகியிருக்கலாம் என்று ஆய்வாளர்கள் நம்புகின்றனர்.

நிம்மதியில்லாத வாழ்வு

வளர்ப்பு மீன்களின் வாழிடம், கடல், ஏரி குளங்களைப் போன்றதல்ல. மீன் பண்ணை, ஆய்வுக்கூடம் மற்றும் மீன் தொட்டியில் வாழும் மீன்களுக்கு மின்சார வெளிச்சம் நிம்மதியில்லாத சூழ்நிலையை ஏற்படுத்துகிறது. பளபளப்பு மிக்கக் கண்ணாடிச் சுவர்களை அவற்றால் சகித்துக் கொள்ள முடிவதில்லை.

இயற்கையில் நீர் நிலைகளில் இருக்கும் தாது உப்புகள் தொட்டியில் இருக்கும் நீரில் இல்லை. இதுபோன்ற செயற்கை வாழிடச் சூழல்களில் வாழும் மீன்கள் மன அழுத்தத்தை (stress) அனுபவிக்கின்றன. அவை வேதனை உணர்வை வெளிப்படுத்துகின்றன. சில இன மீன்கள் புதிய சூழ்நிலைகளை விரும்புகின்றன. வேறு சில கூட்டு சேர்ந்து வாழ விரும்புகின்றன.

தொட்டியில் உணவு, சுத்தநீர் போல அவற்றின் வாழிடமும் முக்கியத்துவம் வாய்ந்தது. வளர்ப்பு மீன்களுக்காக பொதுவான ஒரு வாழிடச் சூழலை உருவாக்குவது சுலபமானதில்லை. ஒவ்வொரு இன மீனுக்கும் அவசியமான சூழல் வெவ்வேறானது. ஒவ்வொரு இனத்திற்கும் வேறுபட்ட வளர்ச்சிக் கட்டங்கள் உள்ளன.

ஈல் இன மீன்கள் குஞ்சாக இருக்கும்போது நதியில் மண்ணிற்கடியில் ஒளிந்து கொண்டு வாழ விரும்புகின்றன. வளர்ந்தவுடன் இந்த குணம் அவற்றிடம் காணப்படுவதில்லை.

நடத்தை ஆய்வுகள்

மீன்களின் நடத்தை ரீதிகள் பற்றிய ஆய்வுகள் மிகக் குறைவாகவே நடந்துள்ளன. 2007ல் ஆய்வுக்கூடங்களில் அடைக்கப்பட்ட நிலையில் வாழும் உயிரினங்கள் பற்றி நடத்தப்பட்ட எழுநூற்றுக்கும் மேற்பட்ட ஆய்வு முடிவுகள் விஞ்ஞானிகளால் ஆராயப்பட்டன. இவற்றில் மீன்கள் பற்றிய ஆய்வுகள் 0.1 சதவிகிதத்திற்கும் குறைவாகவே நடந்துள்ளது.

ஆய்வுக்கூடங்களில் தொட்டிகளில் நீண்டகாலம் வாழும் மீன்கள் போன்ற உயிரினங்கள் நிம்மதியில்லாத வாழ்வை நடத்துகின்றன. இதனால் மீன்களின் பதில் வினை புரியும் தன்மை வெகுவாகக் குறைந்து காணப்படுகிறது. இவற்றைப் பயன்படுத்தி நடத்தப்பட்ட ஆய்வுகளின் முடிவுகள் எவ்வாறு உண்மையானதாக இருக்க முடியும் என்று ஆய்வாளர்கள் கேள்வி எழுப்புகின்றனர்.

சால்மன் மீன்கள்

சால்மன் மீன்களின் எண்ணிக்கை குறைந்தபோது மீன் முட்டை பொரிக்கும் கூடங்களில் இருந்து கொண்டுவரப்பட்ட மீன் குஞ்சுகள் நதியில் விடப்பட்டன. ஆனால் அவை அந்த இயற்கை சூழ்நிலையில் வாழ முடியாமல் உயிரிழந்தன. இயற்கையான வாழிடச்சூழல் போல உருவாக்கப்பட்ட பண்ணைகளில் இருந்து கொண்டு வரப்பட்டவை, நதியில் விடப்பட்டபோது அவற்றில் பாதிக்கும் மேற்பட்டவை உயிர் வாழ்ந்தன.

செடிகள், மறைவிடங்கள் இருக்கும் மீன் தொட்டிகளில் இந்த இன மீன்கள், இச்சூழல் இல்லாத தொட்டிகளில் இருக்கும் மீன்களை விட அதிக இனப்பெருக்கத் திறன் பெற்றவையாக இருந்தன. எதுவும் இல்லாத தொட்டியில் சிறிதளவு கற்கள் போடப்பட்டபோது அதில் இருந்த சால்மன் குஞ்சுகளின் மூளை வளர்ச்சி வேகமாக நடந்தது.

மீன் தொட்டியில் பாறைகளும், கற்களும்

நதிகளில் இருப்பது போல பாறைகள், கற்களை தொட்டியில் போட்டபோது இவற்றின் குஞ்சுகளிடையில் மன அழுத்தம் குறைந்தது கண்டுபிடிக்கப்பட்டது. சிறிய கற்கள், மரக்கிளைகள் போடப்பட்ட தொட்டிகளில் வளர்ந்த மீன்களில் பாக்டீரியா தொற்று குறைவாகக் காணப்பட்டது. மிகச் சிறந்த வாழிடச் சூழலை ஏற்படுத்தினால் வளர்ப்பு மீன்களின் ஆரோக்கியம் சிறப்பாக இருக்கும். 

தமக்கென்று விருப்பு வெறுப்புகள், தேவைகள், சிக்கலான வாழ்வியல் முறைகளை உடைய மற்ற உயிரினங்களை தன்னுடைய தேவைகளுக்காக பயன்படுத்தவே மனிதன் விரும்புகிறான்.

இதனால் மற்ற உயிரினங்களின் சுதந்திரத்தையும், உணர்வுகளையும் மனிதன் ஏற்க மறுக்கிறான், அலட்சியப்படுத்துகிறான், புறக்கணிக்கிறான். இந்த மனப்போக்கு இருப்பதாலேயே மனிதன் பல உயிரினங்களை தன்னை விட தாழ்ந்தவையாகக் காண்கிறான். சில உயிரினங்களை மட்டும் பாசத்துடன் வளர்க்கிறான். பாம்புகள் போன்ற வேறு சிலவற்றை ஈவு இரக்கம் இல்லாமல் கொல்கிறான்.

மீன்களும் இனவியல் இரைகளே. நிறவெறி, பாலியல் வேறுபாடு அநீதி போல இனவியல் வேறுபாடும் கடுமையாக எதிர்க்கப்பட வேண்டியது என்று ஆய்வாளர்கள் வலியுறுத்துகின்றனர். இதிலிருந்து மனித குலம் மீளும் காலமே மற்ற உயிரினங்களுக்கு விடியல் காலமாக இருக்கும்.

மேற்கோள்கள்: https://www.mathrubhumi.com/environment/columns/nature-future-column-on-fishes-and-their-emotional-pain-1.8565835

- சிதம்பரம் இரவிச்சந்திரன்

விவரங்கள்

சிதம்பரம் இரவிச்சந்திரன்

பிரிவு: இயற்கை & காட்டுயிர்கள்

வெளியிடப்பட்டது: 17 மே 2023

• இயற்கை & காட்டு உயிர்கள்

சூழல் நட்புடைய உலக நாடுகளின் பட்டியலில் முதலில் நிற்பது சுவிட்சர்லாந்து. இங்கு கட்டுப்பாட்டுக்கு உட்பட்டு விலங்குகளை வேட்டையாடிக் கொல்வது சட்டப்பூர்வமாக அங்கீகரிக்கப்பட்டுள்ளது. 26 மாகாணங்கள் உள்ள இந்நாட்டில் 25 மாகாணங்களிலும் வேட்டையாடுதல் சட்டப்படி அனுமதிக்கப்பட்டுள்ளது.

மனித உயிர்களுக்கு ஆபத்தை ஏற்படுத்துவதால் இங்கு வேட்டையாடுதல் நடைபெறவில்லை. வன விலங்குகளின் எண்ணிக்கையைக் கட்டுப்படுத்தி கொல்லப்பட்டவற்றின் இறைச்சியை உணவாக உட்கொள்ள வேட்டையாடுதல் நடைபெறுகிறது. இந்நாட்டில் 30,000 முழுநேர வேட்டைக்காரர்கள் உள்ளனர். இதில் 1500 பேர் பெண்கள்.

2016ல் இங்கு 40,616 ரோ மான்கள், 11,873 சிவப்பு மான்கள், 11,170 சமோய்ஸ் என்னும் காட்டு ஆடுகள் வேட்டையாடப்பட்டன. இவை தவிர ஐபக்ஸ், குள்ளநரிகள், அணில்கள், முயல்களையும் வேட்டையாடுவதுண்டு. இவ்வாறு வேட்டையாடிய பிறகும் அங்கு உணவகங்களுக்குத் தேவையான விலங்கு இறைச்சியில் மூன்றில் ஒரு பகுதி மட்டுமே கிடைக்கிறது. அதனால் இந்நாடு மீதியை மற்ற நாடுகளில் இருந்து இறக்குமதி செய்கிறது.

விவசாயத்திற்கும் வளர்ப்பு விலங்குகளுக்கும் தொல்லை தருவதால் பாதுகாக்கப்படும் விலங்கான செந்நாய்களையும் வேட்டையாட சுவிஸ் அரசு தீர்மானித்துள்ளது.பின்லாந்தில் நடப்பதென்ன?

ஸ்கான்டிநேவியன் நாடுகள் என்றால், அங்கு நிலவும் சூழல் நட்புடைய வாழ்க்கைமுறையே நம் நினைவிற்கு வரும். கேரள மாநிலத்தைப் போல எட்டு மடங்கு பெரிய நாடு பின்லாந்து. உலகின் மிகச்சிறந்த வாழ்க்கைத் தரம் உள்ள நாடு என்று பெயர் பெற்ற இங்கு 300 செந்நாய்கள் வாழ்கின்றன. இவற்றின் எண்ணிக்கையைக் கட்டுப்படுத்த 2023ல் இவற்றில் 20 செந்நாய்களைக் கொல்ல அரசு முடிவு செய்தது. இங்கு மூன்று இலட்சம் வேட்டைக்காரர்கள் உள்ளனர்.

ஸ்வீடனும் நார்வேயும்

உலகப் புகழ் பெற்ற சூழல் போராலி க்ரெட்டா தன்பெர்க் வாழும் நாடான ஸ்வீடனில் 2023ல் மொத்தமுள்ள 400 செந்நாய்களில் 200 நாய்களைக் கொல்ல அரசு முடிவெடுத்து செயல்படுத்தியது. நோபல் விருதிற்கு புகழ்பெற்ற நார்வேயில் செந்நாய்கள் ஆடுகளுக்கு அச்சுறுத்தலாக இருப்பதால், அங்கு வாழும் 68 விலங்குகளில் 70 சதவிகிதம் விலங்குகளையும் கொல்ல முடிவு செய்தபோது சூழல் போராளிகளின் பலத்த எதிர்ப்பினால் இந்த எண்ணிக்கை பதினைந்தாகக் குறைந்தது.

ஜெர்மனி

இந்நாட்டில் பல விதமான வேட்டையாடல்களுக்கு உரிமம் வழங்கப்படுகிறது. இதன் மூலம் கிடைக்கும் தொகை நாட்டிற்கு கணிசமான வருமானத்தை ஈட்டித் தருகிறது. மான்கள், காட்டுப்பன்றிகள், முயல்கள் மற்றும் பலதரப்பட்ட பறவைகள் இங்கு வேட்டையாடப்படும் விலங்குகளில் ஒரு சில.

கொல்லப்படும் தேசிய விலங்கு

ஆஸ்திரேலியாவின் தேசிய விலங்கான கங்காரு வேட்டையாடப்படும் முக்கிய விலங்கு. ஆண்டுதோறும் இருபது இலட்சம் கங்காருகள் அங்கு சுடப்பட்டு கொல்லப்படுகின்றன. கங்காரு சாது விலங்குதான் என்றாலும், எண்ணிக்கையைக் கட்டுப்படுத்தவே அவை கொல்லப்படுகின்றன. தலையில் சுட்டு கொல்ல வேண்டும் என்பதே சட்டம். கொல்லப்பட்ட கங்காருவை அவர்கள் எரிப்பதில்லை, குழி தோண்டிப் புதைப்பதில்லை. உணவாக உட்கொள்கின்றனர். இங்கு நடைபெறும் கங்காரு வேட்டையே உலகின் மிகப் பெரிய வன விலங்கு வேட்டை.

நியூசிலாந்தில்

இங்கு விலங்குகளை வேட்டையாடுவது சட்டப்பூர்வமாக அங்கீகரிக்கப்பட்டுள்ளது. தேசிய வன விலங்கு சரணாலயங்களில் கூட எந்த விலங்கினை வேண்டுமானாலும் வேட்டையாடலாம். ஆயுதங்களைக் கையில் எடுத்துக் கொண்டு பயணம் செய்வதில் எந்தத் தடையும் இல்லை. வேட்டையாடுதல் ஒரு ஜனரஞ்சகமான பொழுதுபோக்கு.

மனிதர்கள் இங்கு குடியேறும் முன்புவரை இந்நாட்டில் இரண்டு வகை வௌவால்கள் மற்றும் இரண்டு வகை சீல்கள் மட்டுமே பாலூட்டிகளாக வாழ்ந்து வந்தன. ஐரோப்பிய குடியேறிகள் வேட்டையாட, உணவிற்காக தங்களுடன் விலங்குகளையும் இங்கு கூட்டிக் கொண்டு வந்தனர். இப்போது இங்கு அதிக எண்ணிக்கையில் இருக்கும், வடிவில் பெரிய சிவப்பு மான்கள் வேட்டையாடுபவர்களுக்கு மிகப் பிடித்தமான விலங்கு.

வேட்டையாடிக் கொன்ற மான்களை உண்பதற்கும், மான் தோலை சுவர் அலங்காரமாகப் பயன்படுத்தவும் வேட்டைக்காரர்கள் அவர்கள் வேட்டையாடியதை சொந்த நாடுகளுக்குக் கொண்டு செல்வதில் எந்தத் தடையும் இல்லை.

இந்தியாவில் இருந்து 1903ல் நியூசிலாந்திற்கு அன்பளிப்பாக அனுப்பப்பட்ட மூன்று இணை இமாலயன் தார் என்ற ஆடு வகையைச் சேர்ந்த விலங்குகள் 1970களில் நாற்பதாயிரமாக அதிகரித்தன. அதனால் இவை வேட்டையாடப்பட்டன. 1984ல் எண்ணிக்கை இரண்டாயிரத்திற்கும் குறைவாக ஆனபோது இவற்றை வேட்டையாடுவதில் சட்டதிட்டங்கள் கொண்டு வரப்பட்டன. இப்போது இவற்றின் எண்ணிக்கை 1000.

பல இன மான்கள் தவிர பன்றிகள், வாத்துகளும் இங்கு வேட்டையாடப்படுகின்றன. 110 கிலோ வரை எடையுடைய பன்றிகள், நாய்கள் உதவியுடன் வேட்டையாடப்படுகின்றன. இயற்கையாக வளரும் விலங்குகளின் இறைச்சிக்கு சுவை அதிகம் என்பதால் சூழல் நாசத்தை ஏற்படுத்தும் பன்றி வேட்டை இங்கு பிரபலமானது.

வேட்டையாடச் செல்பவர்களுக்கு உதவ, உடன் செல்ல பலவித பாக்கேஜ்கள் உண்டு. ஐந்து நாள் வேட்டை, நான்கு நாள் இரவுத் தங்கல் மற்றும் இரண்டு ஆட்கள் உதவியுடன் டிராபி அல்லது வேட்டைப்பரிசாக பெரிய மான் ஒன்றின் தலையைக் கொண்டு செல்ல ஆகும் செலவு நான்கு இலட்சம் ரூபாய்!

அமெரிக்காவும் கனடாவும்

அமெரிக்காவின் மொத்த நிலப்பரப்பில் 60% இடங்களில் வேட்டைக்கு அனுமதி உண்டு. தேசிய வன விலங்கு சரணாலயங்களிலும் விலங்குகளைக் கொல்லலாம். ஆண்டுதோறும் ஒன்றரை கோடி வேட்டைக்காரர்கள் 20 கோடிக்கும் கூடுதலான வன விலங்குகளை கொல்கின்றனர். இது அங்கு வாழும் மக்கதொகையில் பாதியளவு. கனடாவில் ஆண்டுதோறும் 30 இலட்சம் உயிரினங்கள் 13 இலட்சம் வேட்டைக்காரர்களால் கொல்லப்படுகின்றன.

தீர்வு யார் கையில்?

வாழிடம் சுருங்கிய வன விலங்குகளின் எண்ணிக்கையைக் கட்டுப்படுத்த அவற்றை ஒரு இடத்தில் இருந்து மற்றொரு இடத்திற்கு மாற்றுதல் மற்றும் இனப்பெருக்க கட்டுப்பாட்டு முறைகளைப் பின்பற்றுதல் போன்ற நடவடிக்கைகளை மேற்கொள்ள சில நாடுகள் முயல்கின்றன. என்றாலும் இது நடைமுறையில் முழு வெற்றி பெறவில்லை. இந்த இரண்டு செயல்களின்போதும் மனிதன் வன விலங்குகளுடன் நெருங்கிப் பழக நேரிடும்.

இதன் மூலம் இதுவரை அறியப்படாத பல புதிய நோய்கள் வனப்பகுதிகளில் வாழும் மற்ற விலங்குகளுக்குப் பரவலாம். வன விலங்குகளைப் பிடிக்கும்போது காயம் படும் விலங்குகள் பிறகு காடுகளில் வாழ இயலாமல் போகலாம். ஒரு இடத்தில் பிடிக்கப்படுபவை மற்றொரு இடத்தில் வாழ்வது சாத்தியமற்றதாகலாம். ஆப்பிரிக்காவில் யானைகளுக்கு இனப்பெருக்கத் தடை ஏற்படுத்த முயற்சிகள் நடந்தன.

திறந்தவெளிப் பரப்பாக இருக்கும் காடுகளில் யானை போன்ற விலங்குகளுக்கு இனப்பெருக்கத் தடை ஏற்படுத்துவது சுலபமானதில்லை. இதற்கு மாற்றாக மக்கட்தொகைப் பெருக்கம் கட்டுப்படுத்தப்பட வேண்டும். காடுகளை மனிதன் ஆக்ரமிப்பதை நிறுத்த வேண்டும். வன விலங்குகளின் இயல்பான வாழிடங்களை அழிக்காமல் அவற்றின் போக்கில் அவற்றை வாழ விடுவதே சிறந்த தீர்வு என்று ஆய்வாளர்கள் வலியுறுத்துகின்றனர்.

மேற்கோள்: https://www.mathrubhumi.com/environment/columns/eco-story-column-by-vinay-raj-speaks-about-culling-and-it-s-implementation-in-eco-friendly-countries-1.8228451