அரசியல் அதிகாரம் - என்ன சொன்னார் அம்பேத்கர்?

சகோதரத்துவம் என்கின்ற சொல் வெறும் வார்த்தை அல்ல. அது மூவாயிரம் ஆண்டு கால அடக்குமுறைக்கு எதிரான பண்பாட்டு புரட்சி. அந்த ஜனநாயக ஒற்றுமை எளிதாகப் பெறக்கூடியது அல்ல. எது ஜனநாயகம் என்றால் “சகோதரத்துவத்துடன் அனைத்து மக்களும் இணைந்து வாழ்வதே ஜனநாயகம்” என்று இந்திய சமூகத்தில் அம்பேத்கரை தவிர வேறு எவரால் பதிலளித்து விட முடியும். மனித மாண்பின் அவசியத்தையும், அவற்றின் பண்பையும் பெரிதும் மதித்தும் பிறருக்கு அறிவுறுத்தியும், தன் வாழ்நாள் முழுவதும் சமத்துவம் பேசிய சமத்துவர் அம்பேத்கர்.

புரட்சியாளர் அம்பேத்கரின் பல பரிமாணங்களை இன்னும் நாம் அறிந்திடாமல் இருப்பதும், அறிய முற்படாமல் இருப்பதும் அறிவு தேக்கம் என்று தான் சொல்ல வேண்டும். இவ்வகை அறிவு தேக்கமும் ஒரு வகை ஊனம் என்பதை நினைவில் கொள்ள வேண்டும். சமத்துவத்திற்கான அறிவூற்று நமக்கு எதைக் நினைவூட்டிச் சென்றிருக்கிறாரென எண்ணிப் பார்ப்பது அவரின் நினைவைப் போற்றும் நமக்குப் பாடமாக அமையும். புரட்சியாளர் அம்பேத்கர் அவர்கள் ஜனநாயக மாண்பை பேசிவிட்டு மட்டும் சென்றவர் அல்ல. ஜனநாயகத்தின் உறுதிப்பாடு, ஜனநாயகத்தின் மீதான ஆர்வம், ஜனநாயகத்தின் மீதான மதிப்பீடென அனைத்தும் உணர்ந்து, தெளிந்து செயல்பட்டவர். ஒரு இடத்தில் கூட எதேச்சிய அதிகார போக்குடனோ அல்லது ஆதிக்க தன்மையிடனோ கருத்தியலுக்கு எதிராக நடந்து கொண்டதில்லை. ஏனெனில் அம்பேத்கரின் வாழ்நாள் போராட்டமே ஆதிக்க அதிகார செலுத்திகளை எதிர்த்துத் தான். அண்ணல் அம்பேத்கர் பார்வையில் அடிதட்டு மக்களுக்கு எதிரான ஜனநாயகப் போக்கை எந்த வகையில் அணுகுகிறார் என்பதை அறிதலே ஜனநாயகத்தின் மீதான அவரின் பார்வையை புலப்படுத்தும்.

1944 ஆம் ஆண்டு இந்திய அரசின் தொழில்துறை உறுப்பினரான அம்பேத்கர் அவர்களுக்குச் செப்டம்பர் 22 ஆம் தேதி மதராஸ் நகர சபை சார்பில் ரிப்பன் மாளிகையில் பாராட்டும், வரவேற்பும் கொடுத்தனர். அந்த நிகழ்வில் அம்பேத்கர் அவர்கள் இப்படி உரை நிகழ்த்துகிறார்,

"இந்தப் பாராட்டுப் பத்திரம் நகர சபையில் ஏகமனதாக நிறைவேறவில்லை என்றும், சில எதிர்ப்புகள் இருந்ததாகவும் நான் பத்திரிக்கையில் படித்தேன். இதைச் சர்ச்சையாகவோ ஒரு விமர்சனமாக இல்லாமல் இங்குக் குறிப்பிட விரும்புகிறேன். இது ஏக மனதாக நிறைவேறவில்லை என்பதற்காக அதிக மகிழ்ச்சியடைகிறேன். ஏக மனதாகச் செய்யப்படுகிற காரியங்கள் பலவும் ஒரு சடங்கிற்காகச் செய்யப்படுவதே, நாகரிகத்தின் வெளிவந்த பொய்மையாகவோ விளங்குகின்றன. இதனை நாம் ஒவ்வொரு நாளும் ஒரு அர்த்தமும் இல்லாமல் செய்து வருகிறோம்" என்று, தன் பாராட்டுக்கு, வரவேற்புக்கு எதிர்ப்பு தெரிவித்த நிகழ்வை எதிர் நிலையில் இருப்பவருக்கும் அந்த ஜனநாயக தன்மை உண்டு என, எவர்மீதும் பகை உணர்வு கொள்ளாமல் அதை நாம் அனுமதிக்க வேண்டும் இதுவே ஆரோக்கியத்தை உருவாக்கும் எனச் செயலில் செய்து உணர்த்துகிறார் அண்ணல் அம்பேத்கர்.

ஜனநாயகத்தில் தனக்கான உரிமை கோருபவர்களையும் வகுப்புவாரி கேட்பவர்களையும் பார்ப்பனர்கள் எப்படி அணுகினர்? அணுகியவர்களின் நிலை என்ன? உரிமை பெற்ற பார்ப்பனரல்லாதவர்களுக்கான அம்பேத்கரின் ஒருவரி கேள்வி, ஒரு நூற்றாண்டின் உழைப்பை நினைவுபடுத்திப் புது விடுதலைப் போருக்கு இட்டுச் செல்வதாக அமைகிறது.

ஆம். 1944 செப்டம்பர் 23 ஆம் நாளில் மதராஸ் கன்னிமாரா ஹோட்டலில் பேசிய அம்பேத்கர், பார்ப்பனரல்லாதார் கட்சியின் தோற்றம் நோக்கம் சாதனை தோல்விகளைக் குறிப்பிட்டு பேசுகிறார். பிறப்பினால் பிறவி பேதம் கற்பித்து, இவர்கள் படிக்க வேண்டும், இவர்கள் படிக்கக் கூடாது, இவர்களுக்கு இவர்கள் அடிமை என்று சமூக மற்றும் பொருளாதார ரீதியில் சுரண்டலை ஏற்படுத்தி, அதன் மூலம் அதிகார தன்மையை நுகர்ந்து, ஒருபோதும் பார்ப்பனர் தவிர்த்து யாவரும் கல்வி கற்றுவிடக் கூடாது, உத்தியோகம் என்கின்ற ஆசை நினைத்து விடக் கூடாது என்பதிலிருந்து முட்டி மோதி, சுயமரியாதை உணர்வு பெற்று பார்ப்பனரல்லாத மக்களுக்கும் அடிப்படை உரிமை வேண்டும், கல்வி உத்தியோகம் வேண்டும். என்ற உரிமை குரல் எழுப்பி நீதிக்கட்சி எனும் இயக்கம் கட்டி, அரசியல் அதிகாரம் பெற்று பார்ப்பனரல்லாத மக்களுக்குக் கல்வி உரிமை வழங்கிய நீதிக் கட்சியை, பார்ப்பனர் அல்லாத மக்களுக்காகக் கல்வி மற்றும் அரசு உத்தியோகம் கேட்டார்கள் என்பதற்காகவே பார்ப்பனர்களும் பார்ப்பன பத்திரிகைகளும் எப்படி அழைத்தார்கள் என்பதை அம்பேத்கர் குறிப்பிடுகிறார்.

"பிராமணர் அல்லாத இளைஞர்களுக்கு வேலை கிடைப்பதற்காக இக்கட்சி (நீதிக்கட்சி) 20 வருட காலம் போராடி இருக்கிறது. இருந்த போதிலும் தமக்கு வேலையும் ஊதியமும் கிடைத்த பின்னர் அவர்கள் நீதி கட்சியை நினைத்துப் பார்த்தார்களா? என்கிற கேள்வியை எழுப்புகிறார் அம்பேத்கர்". நமக்கு உரிமையும், உணர்வும், கல்வியும், வேலையும் வழங்கிய பார்ப்பனரல்லாதார் இயக்கத்தை யார் நினைத்துப் பார்த்தது? பார்ப்பனரல்லாத மக்களே நினைத்துப் பார்க்கவில்லை என்கின்ற ஆதங்கத்தை வெளிப்படுத்துகிறார். இன்றைக்கு பார்ப்பனரல்லாத இயக்கமான நீதிக்கட்சியின் தொடர்ச்சி சுயமரியாதை இயக்கம், திராவிடர் கழகம் இன்றும் அதே நிலையிலிருந்து பார்ப்பனரல்லாத மக்களின் உரிமைக்காகச் செயலாற்றி வருகிறது. அவ்வியக்கத்துக்கு நாம் எவ்வளவு நன்றி உணர்வோடு இருக்கிறோம் என்பதை நாமே மதிப்பிட்டுக் கொள்வதுதான் உகந்ததாக இருக்கும். மேலும் பார்ப்பனரல்லாத இயக்கம் பார்ப்பனரல்லாத மக்களுக்குச் செய்ததையும் நினைத்துப் பார்ப்பதும், அவர்களின் செயல்களுக்கு உறுதுணையாக இருப்பதும், பின்னால் இருக்கக்கூடிய சமூகத்திற்கு ஏணிப்படியாய் இருந்து உதவுவதையே அம்பேத்கர் இப்படி கூறுகிறார். இச்செயலைச் செய்ய நீதி கட்சிக்குப் பின் பலன் பெற்றவர்கள் யாரும் முன் வரவில்லையேயெனக் கேள்வி எழுப்புகிறார்.

"பார்ப்பனரல்லாதார் கட்சியின் வேலைப்பாடுகளை இக்கட்சியின் எதிரிகள் 'வேலை தேடிகள்' என அழைத்தனர். இந்தச் சொல்லைத் தான் 'இந்து' பத்திரிக்கை அடிக்கடி பயன்படுத்தியது. இந்தக் குற்றச்சாட்டை நான் பெரிதாக எடுத்துக் கொள்ளவில்லை என்று கூறிவிட்டு, சொல்கிறார். அடுத்த கட்சியினரும் (பார்ப்பனர்களும்) இதே வகை பட்டவர்கள் தானே" எனக் கேள்வி எழுப்புகிறார். அம்பேத்கர் அவர்கள் எழுப்பிய இக்கேள்வி மிகுந்த ஆழமுடையது. பார்ப்பனர்கள் அப்போது தொடங்கி இப்போது வரை இட ஒதுக்கீட்டைத் தகுதி, திறமை என்னும் பெயரில் எதிர்த்தே வருகின்றனர். ஆனால் நீதிக்கட்சி ஆட்சியில் வகுப்புவாரி பிரதிநிதித்துவம் பார்ப்பனர்களுக்கும் சேர்த்து இட ஒதுக்கீடு கொடுக்கப்பட்டது என்பது தான் வரலாறு. ஒருபுறம் இட ஒதுக்கீட்டை எதிர்த்தாலும் மறுபுறம் இட ஒதுக்கீடு வேண்டும் என்ற பார்ப்பனர்களின் நிலையைதான் அம்பேத்கர் இப்படிச் சொல்கிறார். பார்ப்பனரல்லாத இயக்கத்தவரை வேலை தேடிகள் என்றபோது வேலைக்காக இட ஒதுக்கீடு கேட்கும் 'நீங்களும் வேலை தேடிகள் தான்' என்று அன்றே பதில் உரைக்கிறார் அம்பேத்கர்.

அம்பேத்கரின் இந்தக் கூற்று இப்போதும் பார்ப்பனர்களுக்குச் சரியாகப் பொருந்துகிறது. தங்களுக்கான உரிமையைப் பேசாமல், கோரிக்கை வைக்காமல், போராடாமல் கூட வேலை தேடிகளால் 10% இட ஒதுக்கீட்டைப் பொருளாதார ரீதியில் பின் தங்கிய உயர் ஜாதிகளுக்கு (EWS - Economically Weaker Sections) நாடாளுமன்றத்தில் எந்த விவாதத்திற்கும் எடுத்துக் கொள்ளப்படாமல் சட்டமாக நிறைவேற்றிக் கொள்ள முடிகிறது. அரசமைப்பு சட்டத்தை மீறி அட்டூழியம் செய்ய முடிகிறது என்பதே இதற்க்கு சான்று.

மேலும் ஆளும் வர்க்கம் அவற்றின் நிலைத்தன்மையை பற்றிக் குறிப்பிடும்போது 1937 இல் நடந்த தேர்தலைக் கணக்கில் கொண்டு அம்பேத்கர் இவ்வாறு சொல்கிறார். " நீங்கள் என்னதான் செய்தாலும் இந்த நாட்டில் பிராமண வகுப்பினர்தான் ஆள்கிற வகுப்பாக இருக்கிறார்கள். அது இன்று நிதர்சனமானது. வேறொன்றும் நடந்துவிடவில்லை. ஏதாவது ஒரு விஷயத்தை இந்தத் தேர்தல் நிரூபித்துள்ளது என்று சொன்னால், இந்த நாட்டின் பிரதான பகுதியாக ஒரு வகுப்பினர் மட்டுமே ஆளும் வர்க்கமாக இருக்கிறார்கள்" என்கின்ற உண்மையை உரைக்கிறார். ஆம் தோழர்களே அம்பேத்கர் குறிப்பிடும் காலத்திற்க்கும் முன்பிருந்தே இன்றுவரையிலும் இந்த நாட்டின் அரசுத் தலைமை பதவிகளில் ஒரு வகுப்பினர் மட்டுமே அதிகாரத்தைச் செலுத்திக் கொண்டிருக்கிறார்கள். இட ஒதுக்கீடு கோரும் அவர்கள், ஆண்டாண்டு காலமாகத் தங்களின் இட ஒதுக்கீட்டைத் தாண்டிய பலனை அனுபவித்துக் கொண்டிருக்கிறார்கள். தகுதி திறமை இருந்தும் பார்ப்பனர்களைத் தவிர பிறர் செல்லக்கூடாத, செல்ல முடியாத தலைமை இடங்களாகவே அவை உள்ளன. 100க்கு 3 விழுக்காடு உள்ள பார்ப்பனர்கள், நூற்றுக்கு நூறு பதவிகளையும் தாங்களே அனுபவித்து தீர வேண்டும் என்கின்ற எண்ணமும், பார்ப்பனரல்லாத மக்களுக்கு எப்போதும் எட்டிவிடக் கூடாது என்கின்ற நோக்கமுமே அவர்களை ஆதிக்க போதையில் ஆழ்த்துகிறது. இதோ 2023லும் பார்ப்பனர் அல்லாத மக்களுக்கு இழைக்கப்படும் அநீதிக்கான சான்று,

குடியரகத் தலைவர் செயலகத்தின் மொத்த பதவிகள் - 49;

பார்ப்பனர்கள் - 39, தாழ்த்தப்பட்ட மற்றும் பழங்குடியினர் - 4; பிற்படுத்தப்பட்டோர் – 6.

குடியரசு துணைத் தலைவர் செயலகத்தின் பதவிகள் - 7: பார்ப்பனர்கள் 7, தாழ்த்தப்பட்ட மற்றும் பழங்குடியினர் - 0; பிற்படுத்தப்பட்டோர் - 0,

கேபினட் செயலாளர் பதவிகள் - 20.

பார்ப்பனர்கள் – 17; தாழ்த்தப்பட்ட மற்றும் பழங்குடியினர் - 1 பிற்படுத்தப்பட்டோர் - 2.

பிரதமரின் அலுவலகத்தில் மொத்த பதவிகள் - 35

பார்ப்பனர்கள் - 31 ; தாழ்த்தப்பட்ட மற்றும் பழங்குடியினர் - 2 ; பிற்படுத்தப்பட்டோர் 2.

விவசாய அமைச்சரகத்தில் மொத்த பதவிகள் - 274

பார்ப்பனர்கள்-25; தாழ்த்தப்பட்ட மற்றும் பழங்குடியினர் - 45;

பிற்படுத்தப்பட்டோர் - 10.

பாதுகாப்பு அமைச்சகம் - மொத்த பதவிகள் - 1379

பார்ப்பனர்கள்- 1300; தாழ்த்தப்பட்ட மற்றும் பழங்குடியினர் – 48; பிற்படுத்தப்பட்டோர் – 31.

சமூக நல மற்றும் சுகாதார அமைச்சகம்-மொத்த பதவிகள் - 209

பார்ப்பனர்கள் - 132 ; தாழ்த்தப்பட்ட மற்றும் பழங்குடியினர் - 17; பிற்படுத்தப்பட்டோர் - 60.

நிதி அமைச்சகத்தின் மொத்த பதவிகள் - 1008:

பார்ப்பனர்கள் - 942 ;

தாழ்த்தப்பட்ட மற்றும் பழங்குடி யினர் - 20; பிற்படுத்தப்பட்டோர் – 46,

பொருளாதரம் மற்றும் வணிகவியல் அமைச்சகத்தின் மொத்த பதவிகள் – 409;

பார்ப்பனர்கள் - 327: தாழ்த்தப்பட்ட மற்றும் பழங்குடியினர் - 19.

பிற்படுத்தப்பட்டோர் – 63,

தொழில் அமைச்சகத்தின் மொத்த பதவிகள் - 74:

பார்ப்பனர்கள் - 59; தாழ்த்தப்பட்ட மற்றும் பழங்குடியினர் - 4; பிற்படுத்தப்பட்டோர் - 9.

கெமிக்கல்ஸ் மற்றும் பெட்ரோலிய அமைச்சகத்தின் மொத்த பதவிகள் - 121

பார்ப்பனர்கள் – 91; தாழ்த்தப்பட்ட மற்றும் பழங்குடியினர் - 9 பிற்படுத்தப்பட்டோர் - 21.

ஆளுநர் மற்றும் துணை நிலை ஆளுநர் ஒட்டு மொத்தம்-27;

பார்ப்பனர்கள் - 25: தாழ்த்தப்பட்ட மற்றும் பழங்குடியினர் - 0;

பிற்படுத்தப்பட்டோர்-2.

தூதுவர்கள் வெளி நாட்டில் வாழ்ந்து வருகின்றனர் – 140:

பார்ப்பனர்கள் – 140; தாழ்த்தப்பட்ட மற்றும் பழங்குடியினர் – 0;

பிற்படுத்தப்பட்டோர் - 0.

மந்திய அரசு பல்கலைக் கழகத் துணைவேந்தர் – 116:

பார்ப்பனர்கள் - 108; தாழ்த்தப்பட்ட மற்றும் பழங்குடியினர் - 3; பிற்படுத்தப்பட்டோர் - 5.

ஒன்றிய பொதுச் செயலாளர் பதவிகள் - 26

பார்ப்பனர்கள் - 18, தாழ்த்தப்பட்ட மற்றும் பழங்குடியினர் – 1

பிற்படுத்தப்பட்டோர் -7,

உயர்நீதிமன்ற நீதிபதி - 330;

பார்ப்பனர்கள் - 306, தாழ்த்தட்டட்ட மற்றும் பழங்குடியினர் – 4; பிற்படுத்தப்பட்டோர் - 20.

உச்சநீதிமன்ற நீதிபதி - 26:

பார்ப்பனர்கள் - 23; தாழ்த்தப்பட்ட மற்றும் பழங்குடியினர் - 1 ; பிற்படுத்தப்பட்டோர் 2.

அய்.ஏ. எஸ் அதிகாரிகள் 3600;

பார்ப்பனர்கள் - 2750, தாழ்த்தப்பட்ட மற்றும் பழங்குடியினர் - 300, பிற்படுத்தப்பட்டோர் 350,

டில்லியை அடிப்படையாகக் கொண்ட "யங் இந்தியா" எனப்படும் நிறுவனத்தினர் தகவல் அறியும் உரிமைச்சட்டத்தின் கீழ் பெறப்பட்ட தகவல்கள்தான் இவை. வகுப்புவாரி பிரதிநிதித்துவம் என்னும் இட ஒதுக்கீடு உரிமை இருக்கும்போதே பார்ப்பனரல்லாத மக்களுக்கு (BC, MBC, SC, ST) இழைக்கப்படும் அநீதி இவ்வளவு என்றால் இன்னும் இட ஒதுக்கீடு என்னும் உரிமையை ஒழித்து விட வேண்டும் என்கின்ற பிஜேபியின் அரசின் நோக்கம் நிறைவேறிவிட்டால், பார்ப்பனர் அல்லாத மக்களின் நிலைமையை நாம் எண்ணிப்பார்க்க வேண்டும்.

ஆளும் வர்க்கம் ஆட்சிக்கு வருவதனால் அந்த ஆளும் வர்க்கத்தின் கண்ணோட்டம் என்ன? அதன் தத்துவம் என்ன? அது எதை நம்புகிறது? என்று நாம் கேள்வி எழுப்ப வேண்டும். ஆளும் வர்க்கம் மனிதர்களைப் பல மட்டங்களாகப் பிரித்து, ஒன்றின் மீது மற்றொன்றை வைத்துச் சமத்துவத்தில் நம்பிக்கையின்றி எல்லா மனிதர்களும் மனிதர்கள் அல்ல, சிலரை தொடக் கூடாது, சில வகுப்பார் மட்டுமே கல்வி பெற தகுதி உள்ளவர்கள். மற்ற வகுப்பாருக்கு அத்தகுதி இல்லை. தகுதியற்ற இவர்கள் அடிமையாகப் பிறந்தவர்கள். அடிமையாகவே சாக வேண்டும் என நம்பினால் நான் கேட்கும் கேள்வி இதுதான். " ஒரு தேசிய அரசு அமைத்து அந்த அரசு அத்தகைய ஆளும் வர்க்கத்தின் கைக்குள் போனால் தற்போது பதவியில் உள்ள அரசைவிடத் தேசிய அரசு சிறப்பாகச் செயல்படுமா?" என்கிற கேள்வியை முன் வைக்கிறார். மேலும் "அரசியல் அதிகாரம் ஆளும் வர்க்கத்தைப் பலப்படுத்த மட்டும் பயன்படும் என்றால் மற்ற வகுப்பரின் உரிமைகள் நசுக்கப்படும். இதில் எங்கு இருக்கிறது இந்தியாவின் ஜனநாயகம்" என்கின்ற கேள்வியையும் முன் வைக்கிறார். ஆளும் வர்க்கம் ஆட்சிக்கு வருவது என்பதும் ஆள வேண்டும் என்கின்ற நோக்கம் கொண்டவர்கள் ஆட்சிக்கு வருவது என்பதும் ஒரே நிலைப்பாடு உடையவர்களாக இருக்கிறார்கள் என்றும், இவ்விருவரும் அதிகாரம் செலுத்துவதையும், ஆதிக்க மனப்பான்மையையும் தான் இருக்கிறதே தவிர புதியதாக மாற்றம் எதுவும் நிகழப்போவதில்லை. இந்நிலைமையால்தான் பழமை மிகச்சிறந்ததாகவே இருந்து கொண்டிருக்கிறது இந்நாட்டில் என்று விளக்குகிறார். எவ்வித மாற்றமும் இல்லாமல் அடிமை சமூகமாக மாற்றி அமைக்கப்பட்ட மக்கள்மீது அதிகார ஆளும் வர்க்கம் அதிகாரமற்ற மக்களை வஞ்சித்துக் கொண்டே இருக்கிறது என்பதே உண்மை என்கிறார் அம்பேத்கர் .

நமது நோக்கம் என்ன?

ஆளும் அதிகார வர்க்கம் இப்படி இருக்கையில் நாம் எதை நோக்கிச் செல்ல வேண்டும் என்கின்ற பாதையைத் தீர்மானித்துக் காட்டுகிறார் புரட்சியாளர் அம்பேத்கர்.

அதிகார வர்க்கத்தின் மாறுபாட்டை நாம் எதிர்பார்த்தாலோ அல்லது வலியுறுத்துவதாலோ அதன் இறுதி முடிவு மாற்றம் இல்லாமல் அந்த அதிகாரத்தன்மையை நிலைபெறச் செய்வது தான் அவர்களின் இறுதி முடிவு என்பது நமக்குப் புரியும். அதிகார வர்க்கத்தின் ஆதிக்க வேரைப் பிடுங்கி எறிய வேண்டுமென நினைப்போருக்கும், பேதமில்லாத சமூக, பொருளாதார சுரண்டல் இல்லாமல் அனைவரும் சமத்துவமாக வாழ வழிவகை செய்ய வேண்டும் என எண்ணுவொருக்கும், அம்பேத்கர் சொல்வது என்பது அரசியல் அதிகாரத்தைக் கைப்பற்றுவதே.

இந்தியாவில் இந்துக்களின் நலன் என்பது ஒட்டுமொத்த மக்களின் நலன் என எண்ணுவது முட்டாள்தனங்களில் முதலாவது முட்டாள்தனம். இந்துக்களின் நலன் என்பது பார்ப்பனர்களின் நலன் என்பதே உண்மை. ஒரு திட்டத்தை ஆதரிப்பதிலும், எதிர்ப்பதிலும் எப்போதும் பார்ப்பனரல்லாத இந்துக்களின் பக்கம் நின்ற வரலாறு பார்ப்பன ஹிந்துக்களுக்கு கிடையாது. மாறாக 3 % இருக்கக்கூடிய பார்ப்பனர்களின் தேவைக்காக, நன்மைக்காகத்தான் 97 % ஹிந்துக்களின் உணர்வுகளை, உரிமைகளை எதிர்த்துச் சாதித்துக் கொள்ளும் பார்ப்பன இந்துவாகவே அவர்கள் இருப்பார்கள். பார்ப்பனர்கள் வேதமத இந்து கருத்துருவாக்கம் பரப்புவதிலும் பாதுகாப்பதிலும் மிகத் தெளிவுடன் இருப்பர். இவ்வகை சுரண்டல், பிளவு, பிறவி ஜாதி இழிவு, பாலின பாகுபாடு, சுயமரியாதையற்ற தன்மை, மூடநம்பிக்கை, புராணம், இதிகாசம், பகுத்தறிவற்ற தன்மையை நிலைபெறச்செய்யவே கடவுள், மதம், ஜாதி, சாம்பிரதயங்கள் உருவாக்கப்பட்டன. சமத்துவமற்ற இந்தப் பித்தலாட்டங்களை ஏற்றுக் கொண்ட மக்கள்தான் இந்துக்கள் என்பது மிகதெளிவாகத் தெரியும். இவ்வேளைகளை மிகச் சரியாகச் செய்யும் பார்ப்பனரல்லாத மக்கள் ஒருவருக்கொருவர் பிரிந்திருந்து, சண்டையிட்டு, ஒற்றுமை இல்லாமல் இருக்கிறோம். இதையே பார்ப்பன மதமும் விரும்புகிறது. பார்ப்பனரல்லாத மக்களாகிய நம் ஒற்றுமையைச் சீர்குலைக்கவே மதம், ஜாதி, கடவுள், சாஸ்திர புராணங்கள் பார்ப்பனர்களால் உருவாக்கப்பட்டன என்பதை மக்கள் உணர வேண்டும். இந்தக் குப்பைகளிலிருந்து வெளியேற்றமே நல்ல பண்பாடு பகுத்தறிவு நெறிமுறைக்கு நம்மை இட்டுச் செல்லும். பகுத்தறிவு சமதர்ம நெறிமுறையே பிரிந்து கிடக்கும் மக்களை இணைக்கும், ஜாதி பேதங்களை ஒழிக்கும். அடிப்படை சமூக பண்பாடு மாறாமல், வெறும் அரசியல் மாற்றம் மட்டும் போதும் என்பது எவ்வகையிலும் மக்களுக்கு நன்மை பயக்காது என்பதில் மிகத் தெளிவாக நிற்கிறார் அம்பேத்கர். அடிப்படை சமூக பண்பாட்டு மாற்றம் தான் நல்ல அரசியலை, நல்ல அரசைத் தேர்ந்தெடுக்கும் செயல் என நம்புகிறார்.

குப்பையில் தூக்கி எறிய வேண்டிய இந்து மதத்தில் ஜாதியெனும் அழுக்கில் நாமெல்லாம் ஒட்டிக்கொண்டு, பெருமை பேசிக்கொண்டு, பார்ப்பனரல்லாத மக்களின் கல்வி, வேலைவாய்ப்பு, அடிப்படை உரிமை என்று ஒவ்வொன்றையும் பார்ப்பனியம் என்ற அதிகார குவியலிடம் நாம் கெஞ்சிக் கொண்டிருக்கிறோம். இந்த நிலை மாறப் புரட்சியாளர் அம்பேத்கர் சொல்லும் வழி "பிற்படுத்தப்பட்ட மக்களும் தாழ்த்தப்பட்ட மக்களும் இணைந்து அரசியல் களம் கண்டால் தான் நமக்கான விடுதலையை வென்றெடுக்க முடியும்" என்கிறார். 1944 செப்டம்பர் 23 மாலை சென்னை எழும்பூர் ரயில்வே ஷெட்யூல்டு வகுப்பு மற்றும் ஷெட்யூல்டு வகுப்பு அல்லாத பிறஜாதி தொழிலாளர்கள் இணைந்து பாபாசாகிப் அம்பேத்கருக்கு வரவேற்பு அளித்த நிகழ்வில் இப்படி பேசுகிறார்.

"ஷெட்யூல்டு வகுப்பு தொழிலாளர்களும் பிற ஜாதிகளை சார்ந்த தொழிலாளர்களும் சென்னையில் முதன்முதலாக ஒன்றாக இணைந்து இருப்பதை காண்பது மகிழ்ச்சி அடைகிறேன். நீங்கள் ஒன்றாக இணைந்து நின்று போராடி உங்கள் வறுமைக்கு ஒரு முடிவு கட்ட வேண்டும். தொழிற்சங்கங்கள் அமைப்பதை விட அரசியல் அதிகாரத்தைக் கைப்பற்றுவது மிகவும் முதன்மையானது" எனப் பேசுகிறார். அரசியல் அதிகாரம் தான் ஒட்டுமொத்த மாற்றத்தையும் மாற்ற இயலும் என்றும் அதற்குத் தடையாய் இருக்கும் பகுத்தறிவுக்கு ஒவ்வாத ஜாதி, மதம், கட்சி அனைத்தையும் உதரித்தள்ளிவிட்டு, பார்ப்பனரல்லாத மக்கள் ஒன்றிணைந்து, நமது உரிமைக்காக அதிகாரத்தைக் கைப்பற்றுங்கள் என்றும் அந்த அரசியல் அதிகாரம் தான் ஆதிக்கவாதிகளின் திமிரை உடைக்கும் என்கிறார்.

மேலும் 1944 செப்டம்பர் 23 இல் கன்னிமாரா ஹோட்டலில் நடந்த நிகழ்வில் இப்படியாகப் பேசுகிறார், "பிராமணரல்லாதவருக்கு நான் சொல்லிக் கொள்வதெல்லாம் ஒற்றுமை என்பது மிகவும் முக்கியமானது. எனவே தாமதமின்றி பாடம் கற்றுக் கொள்ளுங்கள்" என்று முடிக்கிறார் அம்பேத்கர். இக்கருத்தை தான் நாம் மிகத் தெளிவாகச் செயல்படுத்திட வேண்டும். ஒன்றிணைதல் என்கிற ஆயுதம் தான் எதிரிகளை வீழத்தும் வழி. அவ்வழியே சுதந்திரத்திரக்கான, சமத்துவதிறக்கான வழி. இந்த ஒற்றுமையைச் சீர்குலைக்கவே அரசியல் கட்சிகளுக்குக் கடவுளும் ஜாதியும் தேவைபடுகிறது. பார்ப்பனரல்லாத மக்களிடம் இந்த ஒற்றுமை ஏற்படவில்லை என்றால் சமூக பொருளாதார முன்னேற்றத்தில் பார்பனியத்தின் அதிகாரதிர்க்கும், சூழச்சிக்கும் அடிமையாகவே இருந்துவிட வேண்டியது தான் என்பதை நினைவில் கொண்டு நம் சுயமாரியதைக்காக நாம் போரிட வேண்டும். ஜனநாயகம், சுதந்திரம், சமத்துவம், சகோதரத்துவம், மனித மாண்பு, அதிகார பகிர்வு, அரசியல் அதிகாரம் என்று இக்காலகட்டத்திற்கும் அம்பேத்கரின் பேச்சு சரியாகவே பொருந்துகிறது. அன்று தொட்டு இன்றுவரை நடப்பதெல்லாம் ஆரிய - திராவிடர் போர் தான் என்பதை உணர்தல் வேண்டும். நம் ஒவ்வொரு நகரவும் சமத்துவமற்ற இந்து மத கோட்பாட்டைத் தகர்க்கும் அடியாக இருக்க வேண்டும். உரிமைகளற்ற மக்களின் உரிமை குரலாய் அரசியல் அதிகாரம் கைப்பற்ற முனைப்போடு நிமிர்வோம். ஜனநாயகத் தன்மையின் அடிச்சுவட்டை அம்பேத்கரின் துணையோடு வென்றெடுப்போம்.

- த.மு. யாழ் திலீபன்