எல்விஸ் பிரெஸ்லி (Elvis Presley) அமெரிக்காவின் மிஸ்ஸிசிப்பி மாகாணத்தின் டுபேலோ (Tupelo, Mississippi)  என்ற ஊரில், 1935 ல் ஒரு வெள்ளை ஏழைக் குடும்பத்தின் ஒரே மகனாகப் பிறந்தார். இவர் பெற்றோருடன் டென்னிசியிலுள்ள மெம்பிஸ் (Memphis, Tennessee) என்ற ஊருக்கு குடி பெயர்ந்தார்.

அங்கே ஆப்பிரிக்க - அமெரிக்க இனத்தினர் வசிக்கும் பகுதியில், கூச்ச சுபாவமுள்ள, கிடார் வாசிக்கும் சிறுவனாக 'Blues' இசைத்தட்டுக் கம்பெனியைச் சார்ந்து வளர்ந்தார். அப்பொழுது அங்கு கனரக வாகனம் ஓட்டிப் பழக பயிற்சிப் பள்ளியில் சேர்ந்தார். இருந்தாலும், அவர் கிடார் வாசித்துப் பாடுவதில் மிகுந்த ஆர்வமாயிருந்தார்.

அதிர்ஷ்டவசமாக 1954 ல் ஒரு நல்ல நேரமும் வாய்ப்பும் அமைந்தது. அங்கே ஒருநாள் 'Blues' இசைத்தட்டுக் கம்பெனியின் வழக்கமான ஒலிப்பதிவின் இடைவேளையில், அந்தக் கம்பெனியின் பிரபலமான "That's All Right' என்ற பாடலை எல்விஸ் பாடுவதை, இசைத்தட்டுக் கம்பெனியின் உரிமையாளர் Sam Phillips கேட்க நேர்ந்தது.

அப்பொழுதுதான், ஒரு அழகிய தோற்றமுள்ள வெள்ளைச் சிறுவனிடம் 'Blues' ன் உணர்வைத் தூண்டும் பாடல்களைப் பாடக்கூடிய திறமை பளிச்சிடுவதை இசைத்தட்டுக் கம்பெனியின் உரிமையாளர் உணர்ந்தார். அதுவரை அத்தகைய சங்கீதம் கறுப்பினத்திற்கான பாணியாக அமைந்திருந்தாலும், எல்விஸ் பாடிய பாங்கு மக்கள் கேட்டதும், ஒரே இரவில் மிகவும் பிரபலமான நட்சத்திரப் பாடகரானார்.

இசைத்தட்டில் ஒளிப்பதிவு செய்ய அவருடன் ஒப்பந்தம் செய்யப்பட்டு, 1956 ல் அவர் பாடிய இசைத்தட்டு வெளிவந்தபோது, அவர் தேசிய மற்றும் சர்வதேச அளவில் மிகப் பிரபலமான பாடகரானார்.  அந்த இசைத்தட்டில் அவர் பாடிய 'Heartbreak Hotel', 'Hound Dog', 'Love Me Tender'  என்ற பாடல்கள் மிகப் பிரசித்தம்.

அமெரிக்காவின் தலைசிறந்த தொலைக்காட்சி நிகழ்ச்சிகளில் தோன்றிப் பாடும் அவரது ஒயிலான குரல், மிரட்டலான பார்வை, உந்துதலான சுழற்சியான ஆட்டம் ஆகியன இளைஞர்களை அவருடைய பாடல்கள் மீது பைத்தியமாக்கியது.

ஆனால், மூத்த ராக் பாடகரான பிராங்க் சி்நெட்ரா, அமெரிக்க     பழமைவாதிகள் சார்பில், எல்விஸ் பாடும் பாணியை ஏளனம் செய்து கோபம் கொண்டு, அவர் பாடும் இசைத் தன்மை வருந்தத்தக்க துர்நாற்றமுள்ளது என்றும், இளைஞர்களிடம் அழிவுக்கான எதிர்விளைவுகளை ஏற்படுத்தும் என்றும் கூறினார். ஆனால், இளைஞர்களிடம் எல்விஸின் தனிப்பட்ட செல்வாக்கும், தங்கு தடையில்லா இசையும் பெரும் தாக்கத்தை ஏற்படுத்தியது தவிர்க்க முடியாததாகியது.

எல்விஸ் இசையில் கறுப்பர்களின் நாகரிக அடையாளம் இருந்தது என்றும், இணக்கமற்ற நிற வேறுபாட்டைத் தணித்து ஆசுவாசப்படுத்த உதவியது என்றும், வெவ்வேறு சமுதாயங்களுக்குப் பொதுவான நாகரீகத்தையும் உருவாக்கியது என்றும் கலிபோர்னியா யுனிவர்சிட்டியின் வரலாற்றாளர் Cheri Paris தெரிவிக்கிறார்.

1957 ல் எல்விஸ் ராக் சங்கீத நட்சத்திரமாக திகழ்ந்தபோது, Memphis ல் Graceland Mansion என்ற பெரிய மாளிகையை வாங்கினார். சினிமா நடிகராகி நான்கு வெற்றிப் படங்களையும் கொடுத்த முதல் ராக் பாடகரும் இவர்தான். 1958 ல் ராணுவ சேவையிலும் சேர்ந்து இரண்டாண்டுகள் ஜெர்மனி சென்றார்.

இவர் 1960 ல் ராணுவப் பணி முடிந்து திரும்பியபோது, ரயில் நிலையத்தில் இவரது ராக் இசை ரசிகர்களின் பெரும் கூட்டம் காத்திருந்தது. மீண்டும் இசைத்தட்டுகளில் பதியப்பட்ட 'It's Now or Never', 'Are You Lonesome Tonight' என்ற பாடல்கள் பி்ரபலமாயின. Graceland Mansion க்கு திரும்பியபொழுது அவருக்கு துணையாயிருந்த இளவயது Priscilla Beaulieu சில காலங்களில் அவருக்கு மனைவியாகவும் ஆனார். அப்படியே ரசிகர்களிடமிருந்தும் விலகி தனிமையை விரும்பி ஒதுங்கிவாழ்ந்தார். ராக் இசை நிகழ்ச்சிகள் நடத்துவதையும் தவிர்த்தார். அவருடைய தொழில் நடவடிக்கைகளை Calonel Tom Parker என்ற நிர்வாகி கவனித்துக் கொண்டார்.

1960 லிருந்து 1969 வரை 27 படங்களில் நடித்தார். 1968 ல் எல்விஸ் பாடும் தொழிலில் விருப்பமின்றி, அவரால் உருவாக்கி வளர்க்கப்பட்ட  ஹிப்பி நாகரிகத்தையும் வெறுத்தார். ஏழு வருட இடைவெளிக்குப் பின் சிறப்பு கிறிஸ்துமஸ் நிகழ்ச்சியாக ரசிகர்கள் முன் தோன்றினார். 

பெருகி வரும் ஹிப்பி நாகரிகத்திற்கும், போதை மருந்து உபயோகத்திற்கும் எதிராக, தனது புகழுடன் கூடிய மக்களிடம் உள்ள ஈர்ப்பைப் பயன்படுத்தி, பொதுமக்களிடம் எடுத்துச்சொல்ல விருப்பம் தெரிவித்து, தனது நாட்டுப்பற்று உணர்வை அன்றைய அமெரிக்க ஜனாதிபதி Richard Nixon க்கு கடிதம் மூலம் 1970 ல் வெளிப்படுத்தினார்.

எல்விஸின் Prisclla வுடனான திருமண வாழ்க்கையில் விரிசல் விழுந்தது. அவர் உடலும் அளவுக்கதிகமாக பெருத்தது. அவர் தன்னம்பிக்கையை இழந்து, அதீதமான தூக்க மாத்திரைகளில் சரணடைந்து, 1973 லிருந்து சிறுகச் சிறுகத் தன்னை இழந்து கொண்டிருந்தார்.

இவர் 1953  - 1977 கால கட்டத்தில் சுமார் 800 பாடல்களுக்கு மேல் பாடியிருக்கிறார். 1963  - 1964 ல் நான் பார்த்த, 'Girls Girls Girls' படத்தில் வரும் 'Look Like An Angel' பாடல் எங்கள் மாணவ நண்பர்களிடம் மிகப் பிரபலம். 

1977 ல் அவர் ஒரு விபரீதமான கேலிச்சித்திரம் போல இருந்ததாக அவரின் வாழ்க்கை வரலாறு எழுதிய Tony Scherman கூறுகிறார். அதே ஆண்டின் ஆகஸ்டு, 16 ஆம் தேதி, காலை 6 மணிக்கு Racquetball விளையாடிச் சென்ற Rock 'n Roll இசை மன்னன் எங்கும் காணாமல், மதியம் 2.30  மணியளவில் (42 வயதில்) அவரது மாளிகையின் குளியலறைத் தளத்தில் மர்மமான முறையில் இறந்து கிடந்தார்.

இவர் இறப்பிற்கு, இவர் நீண்ட காலமாக மருத்துவரின் ஆலோசனைப்படி, மிக அதிகமான - 10000 தடவைக்கு மேல் எடுத்துக் கொண்ட மயக்க மருந்துகள் (Narcotics-Morphine), மன அமைதிப்படுத்தும் மருந்துகள் (Tranquilliser), தூக்க மாத்திரைகள் (Ethinamate), Antihistamine மாத்திரைகள் (Chlorpheniramine) ஆகியவைகளின் கூட்டு விளைவே எனப்படுகிறது.    

எல்விஸ் இன்றும் தன பாட்டுக்களினாலும், அவர்தம் அழகிய  தோற்றத்தினாலும் ராக் இசைப் பிரியர்களின் மனம் கவர்ந்தவர்.

- வ.க.கன்னியப்பன் (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)

Pin It