எங்களுக்குள்
பத்தாண்டுகளுக்கும் மேலான
ஒரு பந்தமிருக்கிறது
முதன்முதலில்
அதற்கு சீருடை அணிவித்து
அழகு பார்த்தோம்
வளர வளர இருவரும்
வண்ணங்களாய்ப் பிரிந்தோம்
என்னுடைய நிறத்திற்கு
இயற்பியலென்று பெயரிடப்பட்டது
அவனுடையதோ
வணிகவியலாகிப் போனது
எத்தனையோ இடைவெளிகளைக் கடந்தும்
பிரிவும், முறிவுமாகி
மீண்டும் இணைந்த போது
எங்களிடம் பத்தாண்டுகளுக்கும் மேலான
வளர்ச்சியிருந்தது
வளர்ந்து நிற்கும் பருவத்தில்
நட்பாய் விலகி நின்றோம்
நாட்கள் கைபிசைந்தபடி உருண்டோட
யாரும் எதிர்பாரா வகையில்
தொலைந்தே போனது
இருவருக்குமிடையிலான
கண்துடைப்பான சாத்தியமொன்று
கடைசியில் காட்டிக் கொடுக்கப்பட்டு
அடிமையாகிப் போனோம்
முதற்காதலின் வேரூன்றலுக்கெதிராக
எங்களைக் கடந்த
எந்தப் புயலுக்கும் அசைத்துப் பார்க்கும்
சக்தியில்லையென்பதை
உணரத் துவங்கிய கணத்தில்
முதன்முதலாய்
எங்கள் இருவரது சைக்கிள்களும்
ஒரு திருப்புமுனையில்
மோதி நின்ற
பதின் பிரமிப்பாயிருக்கிறது....!
- புலமி