makkal_report_logo

ஜனவரி 20-26, 2012 தேதியிட்ட சமுதாய மக்கள் ரிப்போர்ட் இதழில் டெல்லி பாட்லா ஹவுஸ் போலி என்கவுண்ட்டர் விவகாரம் குறித்து விரிவாக எழுதியிருந்தோம்.

உத்திரப் பிரதேசத் தேர்தலில் அரசியல் கட்சிகளுக்கு மத்தியில் தீயைப் பற்ற வைத்தது பாட்லா ஹவுஸ் விவகாரம். இன்றும் கூட பாட்லா ஹவுஸ் விவகாரத்தில், காங்கிரஸ் அரசு மறு விசாரணைக்கு உத்தரவிடாமல் இருப்பது உ.பி. முஸ்லிம்கள் மத்தியில் கோபக் கணலாக கனன்று கொண்டிருக்கும் நிலையில் - கடந்த 17ம் தேதி நள்ளிரவு பாட்லா ஹவுஸ் இருக்கும் டெல்லி ஜாமியா நகரில் டெல்லி போலீசார் நடத்திய போலி ரெய்டால் கொந்தளித்துள்ளனர் அப்பகுதி முஸ்லிம்கள்.

17ம் தேதி நள்ளிரவு 1.30 மணிக்கு ஜாமியா நகர் பகுதிக்கு வந்த சீருடை அணியாத டெல்லி போலீஸின் பங்களாதேஷ் பிரிவு காவல்துறையினர் அங்கு திடீர் சோதனையில ஈடுபட... விழித்துக் கொண்ட அப்பகுதி முஸ்லிம்கள் காவல்துறையினரை சுற்றி வளைக்க... இரு தரப்புக்கும் மோதல் நிகழ்ந்துள்ளது.

உள்ளூர் காவல்துறைக்கு கூட தகவல் தெரிவிக்காமல் ஜாமியா நகருக்கு வந்திருக்கிறது டெல்லி போலீஸ். பாட்லா ஹவுஸ் போலி என்கவுண்ட்டர் சம்பவத்தைத் தொடர்ந்து அடுத்தடுத்து போலீஸôரால் முஸ்லிம் இளைஞர்கள் பிடித்துச் செல்லப்பட்டதையும், போலீஸ் டார்ச்சரையும் அனுபவித்து வந்த ஜாமியா நகர் மக்களின் பயம் விலகாத நிலையில் மீண்டும் ஒரு பீதியைக் கிளப்பியுள்ளது டெல்லி போலீஸ்.

பங்களாதேஷைச் சேர்ந்த முஸ்லிம்கள் ஜாமியா நகர் பகுதியில் சட்ட விரோதமாக குடியேறியுள்ளதாகவும் அவர்களைப் பிடிக்கத்தான் இந்த சோதனை என்று கூறிய டெல்லி போலீஸ், அப்பகுதியைச் சேர்ந்த ருஸ்தம் கான் உள்ளிட்ட 7 பேரை கைது செய்து போலீஸ் வேனில் திணிக்க முற்பட்டிருக்கின்றனர்.

மற்றவர்களோடு சேர்த்து தன்னை ஏன் கைது செய்கிறது போலீஸ் என்று ருஸ்தம் கானும், ருஸ்தம் கானோடு சேர்த்து எங்களை ஏன் கைது செய்கிறது போலீஸ் என மற்றவர்களும் புரியாமல் குழம்பியிருக்கின்றனர்.

இதற்கிடையில், ருஸ்தம் கானின் மனைவி ரூபினாவுடன் வேறு சிலரையும் கைது செய்து வேனில் ஏற்றியிருக்கிறது போலீஸ். கைது செய்யப்பட்டவர்களின் அலறல் குரல் கேட்டு விழித்தெழுந்த ஏரியா மக்கள், இவர்களை ஏன் கைது செய்கிறீர்கள் என எதிர்ப்பு காட்ட... போலீசுக்கும் பொது மக்களுக்குமிடையில் மோதல் ஏற்பட்டது.

தகவல் அறிந்து விரைந்து வந்த உள்ளூர் காவல்துறையினர் இரண்டு ரவுண்டு வானத்தை நோக்கி சுட்டு நிலைமையை கட்டுக்குள் கொண்டு வந்தது.

கைது செய்து வேனில் ஏற்றப்பட்ட பகுதிவாசிகள் பங்களாதேஷைச் சேர்ந்த சட்ட விரோத குடியேறிகள் என டெல்லி போலீசின் பங்களாதேஷ் பிரிவினர் கூற... அவர்கள் அனைவரும் இந்திய குடிமக்கள் என்பதற்கான ரேஷன் கார்டு, வாக்காளர் அடையாள அட்டை ஆகியவற்றைக் காட்டி அவர்களை மீட்டுள்ளனர் ஏரியாவாசிகள். இதனையடுத்து டெல்லி போலீசின் வரம்பு மீறலைக் கண்டித்து அப்பகுதி மக்கள் ஜாமியா நகர் காவல் நிலையத்தில் டெல்லி போலீசுக்கு எதிராக புகார் அளித்ததைத் தொடர்ந்து, சட்ட விரோத செயலில் ஈடுபட்ட 6 போலீசாரை சஸ்பெண்ட் செய்துள்ள உயரதிகாரிகள், அவர்கள் மீதான விசாரணைக்கும் உத்தரவிட்டுள்ளனர்.

சம்பவம் குறித்து செய்தியாளர்களிடம் பேசிய டெல்லி தென் மண்டல காவல்துறை இணை கமிஷ்னர் அஜய் சவுத்ரி, “டெல்லி போலீஸின் பங்களாதேஷ் பிரிவினருக்கு வந்த தகவலையடுத்து தான் அவர்கள் இந்த சோதனையில் ஈடுபட்டனர். ஆயினும், உள்ளூர் காவல்துறையினருக்கு அவர்கள் தகவல் தராதது தவறுதான்...'' எனத் தெரிவித்துள்ளார்.

“காவல்துறை மக்களை பாதுகாக்க வேண்டும். மக்கள் மத்தியில் பாதுகாப்பு உணர்வை ஏற்படுத்த வேண்டும். மாறாக இதுபோன்று சட்ட விரோத ரெய்டு நடத்தி மக்களை மனரீதியான பாதிப்புக்கு உள்ளாக்கக் கூடாது...'' என்கிறார் சிவில் உரிமைகள் பாதுகாப்பு சங்கத்தின் பொதுச் செயலாள ரான அக்லாக் அஹ்மது.

ஜாமியா நகரில் வசிக்கும் தொகுதி எம்.எல்.ஏ.வான ஆசிப் அஹ்மது கானும் போலீஸôரின் இந்த சட்ட விரோத நடவடிக்கையைக் கண்டித்துள்ளார்.

“இப்பகுதியில் போலீசார் கூறுவதுபோல பங்களாதேஷைச் சேர்ந்த எவரும் இல்லை. அப்படி காவல்துறையினர் சோதனையிட வேண்டுமானால் அதற்கான சட்ட ரீதியான வழிமுறை இருக்கிறது. அதை விடுத்து நள்ளிரவில் ரெய்டு நடத்தி பொது மக்களை பீதிக்குள்ளாக்குவது, அதுவும் உள்ளூர் போலீசுக்கும் தகவல் தெரிவிக்காமல் ரெய்டு நடத்துவது சட்டத்தை மீறிய செயல்தான்...'' என்கிறார் ஆசிப் முஹம்மது கான்.

சில வாரங்களுக்கு முன் மும்பையிலி ருந்து வந்த மஹாராஷ்டிரா தீவிரவாத தடுப் புப் படை இதே ஜாமியா நகருக்கு வந்து தகீ அஹ்மது என்ற முஸ்லிம் இளைஞரை வலுக்கட்டாயமாக கைது செய்ய முயற் சித்த சம்பவம் நிகழ்ந்தது. அதற்கு எதிர்ப்பு கிளம்பியவுடன், தகீ அஹ்மதுவுக்கு "சம்மன்' கொடுக்கத்தான் தீவிரவாதத் தடுப்புப் படை யினர் சென்றனர் என கதை விட்டது மும்பை போலீஸ்.

ஆனால் டெல்லிக்கு வந்து ஒருவருக்கு சம்மன் வழங்க மும்பை போலீசுக்கு சட்ட அதிகாரம் கிடையாது. அது டெல்லி போலீஸின் அதிகார வரம்பிற்கு உட்பட்டது என்ற அறிவு கூட இல்லாமல் நடந்து கொண்டது மஹாராஷ்டிரா தீவிரவாதப் படை என்பது குறிப்பிடத்தக்கது.

டெல்லி காவல்துறையின் சட்ட மீறல்கள் தொடர்ந்து அரங்கேறிக் கொண்டிருக்கும் நிலையிலும், அதனைக் கட்டுப்படுத்த மத்திய உள்துறை அமைச்சகம் எவ்வித நடவடிக்கையும் எடுக்கவில்லை என்பதைத் தான் டெல்லி போலீஸின் பங்களாதேஷ் பிரிவினர் நடத்திய நள்ளிரவு வேட்டை வெளிப்படுத்தியுள்ளது.

Pin It

குஜராத் கலவரத்தைத் தொடர்ந்து நிகழ்ந்த வன்முறையின்போது முஸ்லிம்களின் வழிபாட்டுத் தலங்கள் அழிக்கப்பட்டதற்கு மோடி அரசு நஷ்ட ஈடு வழங்க வேண்டும் என்று இஸ்லாமிய உதவிக்குழு குஜராத் உயர்நீதிமன்றத்தில் வழக்குத் தொடர்ந்திருந்ததையும், மோடி அரசு நஷ்டஈடு வழங்க உயர் நீதிமன்றம் உத்தரவிட்டிருந்ததையும் கடந்த வார இதழில் எழுதியிருந் தோம்.

உயர் நீதிமன்றத்தின் வரலாற்று சிறப்பு மிக்க தீர்ப்பைப் பெற்ற குஜராத் இஸ்லாமிய உதவிக் குழு, துரிதமான செயல்பாட்டில் இறங்கியிருக்கிறது. மாநிலம் முழுவதும் சேதப்படுத்தப்பட்ட அல்லது அழிக்கப்பட்ட வழிபாட்டுத் தலங்களின் பொறுப்பாளர்கள் அந்தந்த மாவட்ட முதன்மை நீதிபதிகளிடம் இழப்பீடு வேண்டி மனு அளிக்குமாறு அது வேண்டுகோள் விடுத்திருக்கிறது.

இஸ்லாமிய உதவிக்குழு உயர்நீதிமன்றத்தில் மோடி அரசு குறித்து தெரிவித்த அனைத்து குற்றச்சாட்டுகளையும் அப்படியே உயர் நீதிமன்றம் ஏற்றுக் கொண்டுள்ளது குறிப்பிடத்தக்கது. அதில் முக்கியமானவை, கலவரத்தின்போது மாநில அரசின் உள்துறை அமைச்சகமே செயலிழந்து விட்டது என்பதும், வழிபாட்டுத் தலங்களுக்கு உரிய பாதுகாப்பு வழங்கவும், சேதமடைந்த வழிபாட்டுத் தலங்களுக்கு இழப்பீடு தரவும் அரசு முன் வரவில்லை என்பதுமாகும்.

சேத மதிப்பு குறித்த விபரங்களுடன் மாவட்ட முதன்மை நீதிபதியிடம் அளிக்கப்படும் விண்ணப்பங்களை தனித்தனியாக ஆய்வு செய்து தேசத்திற்கான இழப்பீட்டுத் தொகையை நீதிபதி முடிவு செய்வார். இதனை தவறாமல் சம்பந்தப்பட்ட மத நிறுவனங்கள் பயன்படுத்திக் கொள்ள வேண்டும் எனக் கேட்டுக் கொண்டுள்ளது இஸ்லாமிய உதவிக் குழு.

கலவரம் நடந்தபோது மத வழிபாட்டுத் தலங்களை பாதுகாக்க தவறிய மோடி அரசு அதன் இழப்புத் தொகைக்குப் பொறுப்பேற்க வேண்டும் என்பது, தவறு செய்த அரசு அந்தத் தவறுக்கான தண்டனை அனுபவித்தே ஆக வேண்டும் என்பதைப் போன்றதுதான்.

மோடியின் அரசு இயந்திரம் கலவரத்தின்போது செயல்படாமல் போனது என்பதை தேசிய மனித உரிமை ஆணையம் விசாரணை மேற்கொண்டு 1/4/2002 மற்றும் 31/5/2002ல் அறிக்கை வெளியிட்டிருந்தது. அதோடு, தேசிய மனித உரிமை ஆணையத்தின் வருடாந்திர அறிக்கை (2002-2003)யிலும் இதனை குறிப்பிட்டிருந்தது.

ஆணையத்தின் வருடாந்திர அறிக்கையில் சொல்லப்பட்ட, அழிக்கப்பட்ட மற்றும் தேசப்படுத்தப்பட்ட வழிபாட்டுத் தலங்களுக்கு அரசு உடனடியாக இழப்பீட்டுத் தொகையை வழங்க வேண்டும் என்பதை மோடி அரசு அப்போதே கொள்கையளவில் ஏற்றுக் கொண்டிருந்தது. ஆயினும் நீதிமன்ற விசாரணைகளின்போது மத வழிபாட்டுத் தலங்கள் சேதப்படுத்தப்பட்டது குறித்து மோடி அரசு அலட்டிக் கொள்ளவில்லை. மாறாக, இழப்பீடு வழங்குவதில்லை என்பது எங்கள் (அரசின்) கொள்கை முடிவு. குஜராத்தில் பூகம்பம் ஏற்பட்டபோது கூட நாங்கள் இழப்பீடு தரவில்லை' என்று சம்பந்தமில்லாமல் நியாயப்படுத்தியது.

மோடி அரசின் இந்த நிலைப்பாட்டிற்கு எதிர்ப்பு கிளம்பியவுடன், இழப்பீடு வழங்குவது என்பது இந்திய அரசியல் அமைப்புச் சட்டத்தின் 27வது பிரிவை மீறுவதாகும் என வாதாடியது. இந்த வாதத்தை நிலைநிறுத்த, இந்தியா ஒரு மதச்சார்பற்ற நாடு. அதனால் ஒரு மதத்தினரின் வழிபாட்டுத் தலங்களுக்கு இழப்பீட்டைத் தர முடியாது என்றது. பின்னர், 37 வழிபாட்டுத் தலங்களைத் தவிர்த்து அநேகமாக சேதப்படுத்தப்பட்ட எல்லா வழிபாட்டுத் தலங்களும் புணரமைக்கப்பட்டு விட்டன என்று பொய் சொன்னது குஜராத் அரசு.

ஆனால் இஸ்லாமிய உதவிக் குழுவின் மனுவின் மீதான நியாயத்தை உணர்ந்த உயர் நீதிமன்றம், இப்பிரச்சினையை சமரச திட்டத்தின் அடிப்படையில் இரு தரப்பு பிரதிநிதிகளும் ஆலோசனை செய்து தீர்த்துக் கொள்ள வேண்டும் என்று தனது விருப்பத்தை வாய்மொழி உத்தரவாக தெரிவித்தது. இதையும் ஏற்றுக் கொள்ள குஜராத் அரசு மறுத்து இழப்பீடு தரக்கூடாது என்கிற அதன் நிலைப்பாட்டிலேயே உறுதி காட்டி வந்தது. இந்தப் பிரச்சினையை விடாத உயர் நீதிமன்றம், புனரமைக்கப்படாத 37 வழிபாட்டுத் தலங்களை உடனே புனரமைக்குமாறு வாய் மொழியாக உத்தரவு பிறப்பித்துப் பார்த்தது. இதையும் செயல்படுத்த மறுத்து விட்டது மோடி அரசு.

இறுதியாகத்தான் இஸ்லாமிய உதவிக் குழு அளித்த மனுவின் நியாயத்தை மறுக்க முடியாமல் சேதப்படுத்தப்பட்ட மத வழிபாட்டுத் தலங்களை உடனடியாக மறு நிர்மானம் செய்து தர வேண்டும் என முக்கியத்துவம் வாய்ந்த தீர்ப்பை கடந்த 8ம் தேதி வழங்கியது உயர் நீதிமன்றம்.

இழப்பீடுகளைப் பெற 10 வருடங்கள் கடந்துள்ளது என்றாலும், இதை ஒரு வேண்டுகோளாக ஏற்று மாநில அரசு 2002 கலவரத்தில் பாதிக்கப்பட்ட, இழப்புக்குள்ளான தரப்பிற்கு பொருளாதார உதவி வழங்குகிறோம் என்ற நோக்கில் இதனை அணுக வேண்டும். மாறாக, பாதிக்கப் பட்டவர்கள் இழப்பீட்டை பெறுவதற்காக சண்டையிடுவதாக எண்ணி விரோத மனப்பான்மை யோடு இதனை அரசு அணுகக் கூடாது என்று கூறும் இஸ்லாமிய உதவிக் குழுவும், வேறு தொண்டு நிறுவனங்களும் சேதமடைந்த வழிபாட்டுத் தலங்கள் பலவற்றை புணரமைக்க தங்கள் சக்திக்கு உட்பட்டு பொருளாதார உதவிகளை ஏற்கெனவே செய்திருக்கின்றன என்பது குறிப்பிடத்தக்கது.

Pin It

இலங்கை கிழக்கு மாகாணத்தில் முஸ்லிம்கள் பெரும்பான்மை மக்களாக வசித்து வருகின்றனர். இந்த முஸ்லிம் பெரும்பான்மையை குறைக்கும் நோக்கில் பல உள்ளடி வேலைகளை செய்து வருகிறது சிங்கள அரசு. வட கிழக்கு பிரதேசங்களில் தமிழ் - முஸ்லிம் சமூகம்தான் பெரும்பான்மையினராக இருந்து வந்தனர். யுத்தத்தின் காரணமாக வடக்குப் பகுதியில் இருந்த தமிழ் மக்களின் எண்ணிக்கை பெருமளவில் குறைக்கப்பட்டது. தமிழ் மக்கள் வாழ்ந்த யாழ்ப்பாணம் உள்ளிட்ட பகுதிகளில் சிங்கள குடியேற்றங்களும், இராணுவ முகாம்களும் பெருமளவில் ஏற்படுத்தப்பட்டுள்ளன.

தமிழ் மக்களுடன் இணைந்து முஸ்லிம் சமூகமும் அரசியல் ரீதியான அச்சுறுத்தலாக மாறக் கூடும் என்ற தொலைநோக்குச் சிந்தனையால் அரசியல் ரீதியாக, பூகோள ரீதியாக முஸ்லிம்களின் வலிமையை குறைக்கும் முயற்சிகளில் பல ஆண்டுகளாக ஈடுபட்டு வருகிறது சிங்கள அரசு.

தமிழ்ப் பகுதிகளில் அமைக்கப்பட்டு வருவதைப் போன்றே முஸ்லிம் பிரதேசங்களிலும் சிங்களக் குடியேற்றங்களையும், புத்த விகார்களையும் அமைத்து வந்த இலங்கை அரசு தற்போது இராணுவ முகாம்களையும் அங்கு ஏற்படுத்தி வருகிறது.

வடகிழக்குப் பிரதேசங்களிலிருந்து விரட்டப்பட்டு சொந்த நாட்டில் அகதிகளாக வாழ்ந்து வருகின்ற முஸ்லிம் மக்களை அவர்களது சொந்த மண்ணிற்கு திருப்பி அனுப்பவோ, அவர்களின் எதிர்காலம் குறித்து அக்கறை கொள்ளவோ தயாராக இல்லாத சிங்கள அரசு, முஸ்லிம் பகுதிகளை அபகரித்து அங்கு சிங்கள மக்களை குடியேற்றுவதும், இராணுவ முகாம்கள் அமைப்பதும் வரலாற்றுத் துரோகமாகும்.

சிங்கள அரசு முஸ்லிம் பிரதேசங்களில் புத்த விகார்களை அமைத்து வருகிறது என்றும், சிங்கள குடியேற்றங்களை ஏற்படுத்தி வருகிறது என்றும் தொடர்ந்து குற்றஞ்சாட்டி வருகின்றனர் கிழக்கு மாகாண முஸ்லிம்கள். இம்மக்களின் குற்றச்சாட்டுகளை முஸ்லிம் அரசியல் தலைமைகள் உரிய கவனத்துடன் பரிசீலிக்கவில்லை என்றுதான் சொல்ல வேண்டியுள்ளது. ஏனெனில் நெடுங்காலமாக சொல்லப்பட்டு வரும் இப்பிரச்சினையை பாராளுமன்றத்தில் உரிய முக்கியத்துவத்துடன் ஒலிக்கவில்லை முஸ்லிம் பாராளுமன்ற உறுப்பினர்கள்.

முஸ்லிம் தலைமைகளின் கவனக்குறைவின் விளைவு கிழக்கு மாகாணம் அம்பாறை மாவட்டத்திற்குட்பட்ட அஷ்ரப் நகரில் 87 ஏக்கர் நிலப்பரப்பை ஆக்கிரமித்திருக்கும் இலங்கை இராணுவம் அங்கு இராணுவத்திற்கான முகாமை கட்டும் முயற்சியில் ஈடுபட்டு வருகிறது. இந்த நிலம் முஸ்லிம்களுக்கு சொந்தமானது என்று கூறும் அஷ்ரப் நகர் முஸ்லிம்கள் இராணுவ ஆக்கிரமிப்பை எதிர்த்து போராட்டம் நடத்தி வருகின்றனர்.

87 ஏக்கர் நிலப்பரப்பை சுற்றி வேலி அமைத்திருக்கிறது இராணுவம். இந்த நிலத்திற்குள் வசித்து வரும் முஸ்லிம் குடும்பங்கள் படிப்படியாக இராணுவத்தினரால் வெளியேற்றப்பட்டு வருகின்றனர். இந்த 87 ஏக்கர் நிலப்பரப்பிற்குள் 13 முஸ்லிம் குடும்பங்கள் இருந்தன. அதில் 8 குடும்பங்களை இராணுவம் வெளியேற்றியிருக்கிறது. எஞ்சியுள்ள 5 குடும்பங்களே அங்கு உள்ளன என்று தெரிவிக்கும் அஷ்ரப் நகர் மக்கள், இந்நிலம் தொடர்பான ஆவணங்கள் எங்களிடம் உள்ளது என்றும் கூறுகின்றனர்.

ஆனால் இராணுவ பேச்சாளரான பிரிகேடியர் நிஹல் ஹேபு வராச்சியோ, “இராணுவ கேம்ப் அமைக்கும் இந்த குறிப்பிட்ட நிலப்பகுதி அரசாங்கத்திற்கு சொந்தமானது. தனியாருக்கு சொந்தமானதல்ல. இராணுவ கேம்ப்பிற்கான கட்டுமானப் பணிகளை வனப் பாதுகாப்புத் துறையின் அங்கீகாரத்துடன் பாதுகாப்பு அமைச்சகம் கட்டி வருகிறது...'' என்று தெரிவித்துள்ளார்.

கடந்த 1990 ஆண்டு அம்பாறை மாவட்ட பொன்னம்வெளி முஸ்லிம்களின் மேட்டு நிலம், விவசாய நிலங்களில் சிங்கள மக்கள் குடியேறினார்கள். இவர்களின் சட்ட விரோத குடியேற்றத்தை அங்கீகரித்த சிங்கள அரசு, 150 ஏக்கர் நிலத்தை அவர்களுக்கு வழங்கியது. அப்போது இதனை ஸ்ரீலங்கா முஸ்லிம் காங்கிரஸ் கட்சியின் நிறுவனரான அஷ்ரப் கடுமையாக எதிர்த்தார்.

அஷ்ரபின் எதிர்ப்பின் காரணமாக மாற்று ஏற்பாடாக அப்போது அரசு ஒதுக்கிய 140 ஏக்கர் நிலம்தான அஷ்ரப் நகர் நிலம். இந்த நிலத்தில் 87 ஏக்கர் நிலத்தை அபகரித்துதான் இராணுவ முகாமின் கட்டுமானப் பணிகள் நடைபெற்று வருகின்றன. இங்கு இராணுவக் கட்டுமானப் பணிகள் தொடர்ந்து மேற்கொள்ளப்பட்டால் அஷ்ரப் நகரில் இருக்கும் 150 முஸ்லிம் குடும்பங்கள் பெரும் பாதிப்புக் குள்ளாவார்கள் என்கின்றனர் அப்பகுதி மக்கள்.

இராணுவம் ஆக்கிரமித்து வேலி அமைத்துள்ள பகுதிகளில் தீகவாய புனிதப் பிரதேசம் என (பவுத்தர்களின் புனித இடம்) அறிவிப்பு பலகையையும் வைத்திருக்கிறது இராணுவம்.

புனிதப் பிரதேசம் என்று கூறி முஸ்லிம்களை அவ்விடத்திலிருந்து அப்புறப்படுத்தி, சிங்கள மக்களை அங்கு குடியமர்த்தும் அரசின் திட்டத்தின் ஒரு பகுதியாக, இராணுவ முகாமிற்கான கட்டுமானப் பணிகள் என்ற பெயரில் சிங்கள அரசு செய்யும் சதிதான் இது என்றும் அப்பகுதி மக்கள் சந்தேகப்படுகின்றனர். இப்பிரச்சினையை கையில் எடுத்திருக்கும் ஸ்ரீலங்கா முஸ்லிம் காங்கிரஸ் கட்சியின் நிர்வாகிகள் அப்பகுதியைப் பார்வையிட்டுச் சென்றுள்ளனர்.

இங்குள்ள குடும்பங்களை வலுக்கட்டாயமாக வெளியேற்ற முயற்சித்து வரும் இராணுவம், அவர்களுக்கு வேறு மாற்று இடங்களைத் தருவதாக ஆசை வார்த்தைகளைக் கூறி வருகிறது.

“நிலத்தின் அனுமதிப் பத்திரங்களோடு வாழ்ந்து வரும் அஷ்ரப் நகர் மக்களை வெளியேற்றத் துடிக்கும் இராணுவத்தின் செயற்பாடுகளுக்கு எதிராக நடவடிக்கை மேற்கொள்ளப்படும்...'' என்கிறார் ஸ்ரீலங்கா முஸ்லிம் காங்கிரஸின் பொதுச் செயலாளரான எம்.டி. ஹசன்.

பாலஸ்தீனத்தில் இஸ்ரேல் ஏற்படுத்தி வரும் குடியேற்றங்களைப் போலவே, இலங்கை வட கிழக்கில் சிங்களக் குடியேற்றங்களை ஏற்படுத்தி வருகிறது அந்நாட்டு அரசு. சமீப காலங்களாக இஸ்ரேலுடன் அதிக நெருக்கம் காட்டத் தொடங்கியிருக்கிறது இலங்கை அரசு இந்த குடியேற்றங்கள். அரசியல் ரீதியாக முஸ்லிம்களின் பலத்தை குறைக்கும் வகையில் இஸ்ரேலின் மறைமுக தூண்டுதலின் பேரில் சிங்கள அரசு ஏற்படுத்தி வருகிறதோ என்ற சந்தேகத்தை எழுப்புகிறது.

முஸ்லிம் - தமிழ் பகுதிகளில் சிங்கள குடியேற்றங்கள் நிகழ்வதை தமிழ் - முஸ்லிம் அரசியல் தலைமைகள் கடுமையாக எதிர்க்க வேண்டும்.

- கொழும்பிலிருந்து ஷராஃப்தீன்

Pin It

மார்ச் 1, 2012 முதல் தேசிய பயங்கரவாத எதிர்ப்பு மையம் என்கிற சக்தி வாய்ந்த விசாரணை அமைப்பு நாட்டில் இயங்கத் தொடங்குகிறது. இந்த புதிய விசாரணை அமைப்பு முழு அதிகாரத்துடன் செயல்படும் வகையில் வடிவமைக்கப்பட்டுள்ளது. நாட்டில் உள்ள அனைத்து விசாரணை மற்றும் உளவு அமைப்புகளும் என்.சி.டி.சி.யின் கீழ் செயல்படும்.

மாநில அரசின் விசாரணை அமைப்புகள் மேற்கொள்ளும் சட்ட விரோதக் கைதுகள் மற்றும் தேடல்கள் குறித்தும் விசாரிக்கும் உரிமைகள் என்.சி.டி.சிக்கு வழங்கப்பட்டிருக்கின்றன. நாட்டிலுள்ள உளவு அமைப்புகளான ரா (Research and Analysis Wing) மத்திய உளவுத்துறை (I.B), தேசிய தொழில்நுட்ப ஆராய்ச்சி மையம் (National Technical Research Organisation), பாதுகாப்பு புலனாய்வு ஏஜென்சி (Defence Intelligence Agency) போன்ற புலனாய்வு நிறுவனங்கள் தனித்தனியாகவும், தங்கள் விருப்பப்படியும் இயக்கி வருகின்றன.

இந்த அமைப்புகளுக்குள் ஒன்றுக்கொன்று ஒத்துழைப்பில்லாமலும், ஒருங்கிணைப்பு இல்லாமலும் இயங்கி வருகின்றன. இதன் காரணமாக நெருக்கடியான கால கட்டங்களில் இந்தியாவின் பாதுகாப்பு கேள்விக் குறியாக்கப்படுகிறது. மையப்படுத்தப்பட்ட ஒரு இயங்குமுறை இல்லாததால் இந்த அமைப்புகளுக்குள் அவசர காலத்தில் உதவிக் கொள்ளும் செயற்பாட்டில் பலவீனம் வெளிப்படுகிறது. இதனால் நாட்டின் பாதுகாப்பும் பலவீனமடைகிறது.

பயங்கரவாதச் சம்பவங்கள் நிகழ்ந்து விட்டால் அதன் தோல்வியை ஒப்புக் கொள்ளாமல் ஒரு அமைப்பு இன்னொரு அமைப்பின் மீது பழி சுமத்தும் போக்கும் நிலவுகிறது. அதோடு, இந்தியாவிற்கு தீவிரவாத அச்சுறுத்தல்களும் தொடர்கிறது. இதையெல்லாம் கருத்தில் கொண்டு கடந்த வருடம் மத்திய உள்துறை அமைச்சர் ப.சிதம்பரத்தின் சிந்தனையில் உதித்ததுதான் தேசிய பயங்கரவாத எதிர்ப்பு மையம் (NCTC).

மத்திய உள்துறை அமைச்சகத்தின் நேரடிக் கட்டுப்பாட்டில் என்.சி.டி.சி. இயங்கும். பாதுகாப்பு அமைச்சகம், நிதித்துறை அமைச்சகம் மற்றும் பிரதம மந்திரி அலுவலகத்தில் இயங்கி வரும் பாதுகாப்பு நிறுவனங்கள் உள்பட நாட்டிலுள்ள அனைத்து பாதுகாப்பு மற்றும் புலனாய்வு அமைப்புகளும் என்.சி.டி.சி.யின் கீழ் இயங்கும் எனத் தெரிகிறது. இது தவிர, நாட்டில் பயங்கரவாதச் சம்பவங்கள் நிகழ்ந்தால் மாநில அரசின் அனுமதியைப் பெறாமலே நேரடியாக மத்திய விசாரணை அமைப்புகளை களமிறக்கும் உரிமையும் என்.சி.டி.சி.க்கு அளிக்கப் பட்டிருக்கிறது.

இவ்வளவு சக்தி வாய்ந்த அமைப்பாக செயல்படவிருக்கும் என்.சி.டி.சி.யை தமிழக முதல்வர் ஜெயலலிதா, குஜராத் முதல்வர் நர மோடி உள்பட 8 மாநில முதல்வர்கள் எதிர்க்கிறார்கள்.

பிரதமர் மன்மோகன் சிங்குக்கு கடிதம் எழுதியுள்ள நரேந்திர மோடி, “சட்டம் - ஒழுங்கை மாநில அரசின் பட்டியலில் வைத்திருக்கிறது அரசியல் அமைப்பு. சட்டம் - ஒழுங்கு பிரச்சினை தொடர்பாக விசாரணை மேற்கொள்வது போலீஸ் மற்றும் மாநில அரசின் அதிகாரத்திற்கு உட்பட்டது. இந்த உரிமையை என்.சி.டி.சி. தடை செய்கிறது. இது இந்திய கூட்டாட்சி முறைக்கு வேட்டு வைக்கிறது. அதனால் உடனடியாக என்.சி.டி.சி. தொடர்பான மத்திய அரசின் ஆணையை ரத்து செய்ய வேண்டும்...'' என அலறியிருக்கிறார்.

இதே காரணத்தை முன் வைத்துத் தான் மோடியின் தோழியான ஜெயலலிதாவும் எதிர்ப்பு காட்டி வருகிறார். பெரும்பாலும் பாஜக முதல்வர்கள்தான் இந்த எதிர்ப்பை காட்டி வருகின்றனர். இனி, மத மோதல்களைத் தூண்டி விட்டோ, போலி என்கவுண்ட்டர்களை நடத்தியோ அல்லது குண்டு வெடிப்புகளை நடத்தி அதன் பழியை சிறுபான்மையினர் மீது போட்டோ அரசியல் ஆதாயம் அடைய முடியாது என்று நினைக்கும் மோடியும், மோடி சிந்தனை உடையவர்களும் என்.சி.டி.சி.யை எதிர்த்து வருகின்றனர்.

மற்றபடி பெரும்பாலான மாநில முதல்வர்களும், நாட்டு மக்களும் இதனை வரவேற்கிறார்கள். அதனால் நாட்டு மக்களின் எண்ணத்திற்கு மதிப்பளித்து எக்காரணத்தைக் கொண்டும் மத்திய அரசு என்.சி.டி. சி. குறித்த அரசாணையை ரத்து செய்யாமல் அது அறிவித்தபடி மார்ச் 1 முதல் அமுல்படுத்த வேண்டும் என்பதே நாட்டு மக்களின் எதிர்பார்ப்பாகும்.

Pin It

ஜனவரி 20-26, 2012 தேதியிட்ட சமுதாய மக்கள் ரிப்போர்ட்டில், "தொடரும் முஸ்லிம் விரோதப் போக்கு - காவல்துறையின் காட்டு தர்பார்' என்ற தலைப்பில், மதுரையில் அத்வானி பிரச்சாரம் செல்லவிருந்த பாதையில் வைக்கப்பட்டிருந்த பைப் வெடிகுண்டு விவகாரத்தில் விசாரணை என்ற பெயரில் மதுரை காவல்துறை, அப்பாவி முஸ்லிம்களை தொந்தரவு செய்து வருவதை குறிப்பிட்டிருந்தோம். அதில், மதுரை எஸ்.ஐ.டி. இன்ஸ்பெக்டர் சக்கரவர்த்தி, தென்காசியைச் சேர்ந்த சுலைமான் சேட் என்ற இளைஞரைப் பிடித்து, “எங்களுக்கு இன்ஃபார்மராக மாறு. இல்லையென்றால் உன்னை டெல்லிக்கு தூக்கிட்டுப் போய் ஐ.பி.யிடம் மாட்டி விட்டுடுவேன்...'' என்று மிரட்டியிருந்ததையும் சுட்டிக் காட்டி நேரடி ரிப்போர்ட்டாக கொடுத்திருந்தோம்.

இந்த விவகாரத்தில், சுலைமான் சேட்டிற்கு போலீஸ் தொந்தரவு செய்வதை நிறுத்திக் கொள்ள வேண்டும் என்று கூறி மதுரை ஹைகோர்ட் கிளையில் வழக்கு ஒன்றை தாக்கல் செய்திருந்தார் சுலைமான் சேட்டின் மனைவி ஷர்ஃபு நிசா.

ஷர்ஃபு நிசாவைப் போன்றே நெல்லை மேலப்பாளையத்தைச் சேர்ந்த மெஹ்ராஜ் பேகம் என்ற பெண்மணியும், தனது கணவர் முஹம்மது ஹனிபாவை பைப் வெடிகுண்டு சம்பவத்தில் சம்பந் தப்படுத்தி காவல்துறை தொந்தரவு செய்வதாக வழக்கு தொடுத்திருந்தார். இந்த இரு வழக்குகளையும் இணைத்து விசாரித்த மதுரை உயர் நீதிமன்றம் முக்கியத்துவம் வாய்ந்த முன் மாதிரி தீர்ப்பை வழங்கியிருக்கிறது.

மெஹ்ராஜ் பேகம் தனது மனுவில், “எனது கணவர் முஹம்மது ஹனீபா எங்கே இருக்கிறார் என்ற விபரம் எனக்கு தெரியாது. ஆனால் போலீசார் தேவையில்லாமல் விசாரணை என்ற பெயரில் எனக்கு தொந்தரவு கொடுத்து வருகின்றனர்!'' என்றும், ஷர்ஃபுநிசா தனது மனுவில், “பைப் வெடிகுண்டு தொடர்பாக என் கணவர் சுலைமான் சேட்டை தென்காசி துணை போலீஸ் சூப்பிரண்டு விசாரித்து வெடிகுண்டு சம்பவத்துக்கும் என் கணவருக்கும் சம்பந்தமில்லை என்று விடுவித்து விட்டார்.

அதன் பின்னர் தேவையில்லாமல் சிறப்பு புலனாய்வு பிரிவு போலீஸ் இன்ஸ்பெக்டர் சக்கரவர்த்தி என்னையும், எனது கணவரையும் துன்புறுத்தி வருகிறார்...'' என்றும் குறிப்பிட்டிருந்தனர்.

இந்த வழக்கை விசாரித்த மதுரை உயர் நீதிமன்றக் கிளையின் நீதிபதி சசிதரன் காவல்துறைக்கு எதிராக சாட்டையை சுழற்றியிருக்கிறார்.

நீதிபதி சசிதரன் பிறப்பித்த உத்தரவில், “ஒரு வழக்கில் குற்றம் சாட்டப்பட்டவர்களை விசாரிக்க போலீஸôருக்கு உரிமை உள்ளது. ஆனால் விசாரணை என்ற போர்வையில் தேவையில்லாமல் அப்பாவிகளை துன்புறுத்த எந்த அதிகாரமும் இல்லை. விசாரணைக்காக போலீசார் அழைக்கும்போது எந்த வழக்கு விசாரணைக்காக அழைக்கிறோம் என்ற தகவலை சொல்ல வேண்டும். சம்மன் இல்லாமல் ஆஜராகச் சொல்வது தவறு.

காவல்துறையில் சில அதிகாரிகள் தாங்கள் வைத்தது தான் சட்டம் என்று நினைத்துக் கொண்டு செயல்படுகிறார்கள். இப்படிப்பட்ட போலீஸ் அதிகாரிகள் சட்ட விதிகளை மதித்து நடக்க வேண்டும். உண்மை நிலையை கருத்தில் கொண்டு சம்மன் கொடுத்து விசாரிக் வேண்டும். அதே சமயம், காவல்துறையில் சமூகப் பார்வையுடன் செயல்படும் நல்ல அதிகாரிகளும் இருக்கிறார்கள். இப்படிப்பட்ட அதிகாரிகள் விசாரணையின்போது கண்ணியம் காக்கின்றனர்...'' என்று சட்டத்தை துஷ்பிரயோகம் செய்து அதிகார பலத்தை காட்டும் காவல்துறை அதிகாரிகளுக்கு உரைக்கும் வகையில் சுட்டிக் காட்டியுள்ளார்.

போலீசாரால் துன்புறுத்தலுக்கு ஆளான சுலைமான் சேட் டிடம் தீர்ப்பு குறித்து கேட் டோம்.

“இந்தத் தீர்ப்பை மனதார வரவேற்கிறேன். நீதிபதி சசிதரன் தெள்ளத் தெளிவான தீர்ப்பைத் தந்திருக்கிறார். காவல்துறையினரால் மக்களுக்கு பாதுகாப்பு இல்லை. சட்டத்தை தவறாக பயன்படுத்தும் போலீஸôருக்கு இது சாட்டையடித் தீர்ப்பு.

நீதிபதி சசிதரன் விசாரணையின்போது, “சுலைமான் சேட் உங்கள் விசாரணைக்கு ஒத்துழைப்பு தருகிறார்; நீங்கள் அழைக்கும்போது வருகிறார். பிறகு ஏன் நீங்கள் தேவையில்லாமல் அவருக்குத் தொல்லை கொடுக்கிறீர்கள்? நீங்கள் சட்டத்தை கையிலெடுத்துக் கொண்டு இன்ஃபார்மராக மாறு என்று சொல்வது அதிகாரிகளுக்குரிய அழகல்ல...'' என்று போலீஸ் தரப்பைப் பார்த்துக் கேட்டார்.

உண்மையிலேயே நான் கோர்ட்டுக்குப் போன பின்தான் முஸ்லிம்கள் உயிரோட வாழ உரிமை இருக்கு என்கிற நம்பிக்கை எனக்கு வந்தது. பாரபட்சம் காட்டாத நேர்மையான நீதிபதிகள் இருக்கிறார்கள் என்பது இந்தத் தீர்ப்பின் மூலம் தெரிகிறது. அது மட்டுமல்ல, காவல்துறையில் பாதுகாப்பு இல்லை. நீதிமன்றத்தில்தான் மக்களுக்கு பாதுகாப்பு இருக்கிறது என்ற எண்ணத்தை நீதிபதி சசிதரனின் தீர்ப்பு ஏற்படுத்தியிருக்கிறது ரொம்பவே சந்தோஷமா இருக்கு...'' என்றார் முக மலர்ச்சியுடன்.

இந்த சிறப்புமிகு தீர்ப்பின் பின்னணியில் இயங்கிய வழக்கறிஞர்களான பஹதூர் ஷா, ஜின்னா, ஆறுமுகம் ஆகியோர் நிச்சயமாக பாராட்டுக்குரியவர்கள்தான். இந்தத் தீர்ப்பின் மூலம் முஸ்லிம் இளைஞர்கள் பாதுகாப்பை பெறுவார்கள் என்றால் அது மிகையல்ல.

தீர்ப்பு குறித்து வழக்கறிஞர்கள் தரப்பு என்ன சொல்கிறது?

நாம் பஹதூர்ஷாவிடம் பேசினோம். “எவரையும் விசாரணைக்கு அழைக்க வேண்டும் என்றால் சம்மன் கொடுத்து சட்டப் படி அழைக்க வேண்டும். அதை பெரும்பாலான விசாரணை அதிகாரிகள் பின்பற்றுவதில்லை. சுலைமான் சேட் போன்றவர்கள் தொழில் செய்பவர்கள். இப்படித் தொழில் செய்பவர்களை தொல்லை கொடுக்கும் நோக்கில்தான் காவல் துறை செயல்படுகிறது. மதுரை, நெல்லை, கோவை, சென்னை ஆகிய நான்கு நகரங்களில் எஸ்.ஐ.டி. அலுவலகம் இருக்கிறது. ஒரு வழக்கிற்காக நான்கு இடங்களுக்கு விசாரணைக்காக அழைக்கிறார்கள். மைசூரில் தொழில் செய்யும் சுலைமான் சேட் இப்படித்தான் அலைகழிக்கப்பட்டார்.

தினந்தோறும் மதுரை, சென்னை, கோவையிலிருந்து 5 முதல் 10 நபர்களை (முஸ்லிம்களை) விசாரித்துக் கொண்டிருக்கிறது எஸ்.ஐ.டி. என்ற தகவல் எங்களுக்கு வருகிறது. விசாரணைக்கு அழைக்கும்போது, எழுத்துப்பூர்வமாக நாங்கள் பதில் தருகிறோம். காவல்துறை சட்டப்படி சம்மன் கொடுத்து அழைக்க வேண்டும். ஆனால் அவர்கள் அப்படிச் செய்வதில்லை.

விசாரணைக்கு ஒருவரை அழைத்துச் செல்லும்போதே அவரை போட்டோ எடுப்பது, கை ரேகை பதிவு செய்வது, வெள்ளைத் தாளில் கையெழுத்து வாங்குவது என தனி நபர் உரிமையை மீறுகிறது காவல் துறை. டி.கே. பாசு வழக்கில் தனி நபர் உரிமை மீறல் கூடாது என்று உச்ச நீதிமன்றம் கொடுத்த தீர்ப்பு இருந்தும் காவல்துறை இதனை கடைபிடிப்பதில்லை. நீதிபதி சசிதரன் கொடுத்த தீர்ப்பைப் பொறுத்தவரை அற்புதமான தீர்ப்பு. குறிப்பாக முஸ்லிம்களுக்கு இது மகிழ்ச்சியளிக்கக் கூடிய தீர்ப்பு. இந்தத் தீர்ப்பு முஸ்லிம் இளைஞர்களுக்கு பாதுகாப்பானதும் கூட...'' என்றார் வழக்கறிஞர் பஹதூர் ஷா சந்தோஷமான குரலில்.

Pin It