திருமணச் சட்டங்களில் வரலாற்றுச் சிறப்புமிக்க மாற்றங்களை உருவாக்கிய தமிழ்நாடு, ஜாதி அடிப்படையிலான ஆணவக் குற்றங்களைத் தடுக்க தனிச்சட்டம் கொண்டு வருவதில் ஏன் இன்னும் தாமதிக்கிறது? கர்நாடகா ஏற்கனவே சட்டம் இயற்றியுள்ளது. நாம் ஏன் இல்லை?

இந்தக் கொலைகளில் எந்தவிதமான "குடும்ப கௌரவமும்" இல்லை. இத்தகைய ஜாதி அடிப்படையிலான ஆணவக் குற்றங்களைத் தடுக்க தமிழ்நாடு உடனடியாக ஒரு தனிச்சட்டத்தை இயற்ற வேண்டிய அவசியம் உள்ளது. சமூக நீதி மற்றும் முற்போக்கு சீர்திருத்தங்களில் நூற்றாண்டு பாரம்பரியம் கொண்டதாக பெருமை பேசும் தமிழ்நாட்டில், "ஆணவக் கொலைகளைத்" (Honour Killings) தடுக்க தனிச்சட்டம் தேவையா? என்ற விவாதம் இன்னும் தொடர்கிறது. இதேவேளை, கர்நாடகா 2025, மார்ச் மாதத்தில் இதற்கென ஒரு சட்டத்தை இயற்றி இந்தத் துறையில் முன்னோடியாகத் திகழ்கிறது.

``கர்நாடகா திருமணத் தேர்வு சுதந்திரம் மற்றும் ஆணவம், பாரம்பரியம் என்ற பெயரில் நடைபெறும் குற்றங்களைத் தடுக்கும் மற்றும் தடைசெய்யும் சட்டம், 2025 (Karnataka Freedom of Choice in Marriage and Prevention and Prohibition of Crimes in the Name of Honour and Tradition Act, 2025) பொதுவாக "எவ நம்மவா" (Eva Nammava)'' சட்டம் என அழைக்கப்படுகிறது. இந்தச் சட்டம் 16-ஆம் நூற்றாண்டு தத்துவஞானி பசவண்ணர் அவர்களின் வாக்கியத்தை மேற்கோள் காட்டுகிறது:

"அவர்கள் யார் என்று கேட்காதீர்கள்; அவர்கள் நம்மவர்களே." என்பது பசவண்ணா கூற்று. இந்தச் சட்டத்தின் பிரிவு 4-ன் படி, திருமணம் செய்ய விரும்பும் இரு வயது வந்த சம்மதமுள்ள நபர்கள் மாவட்ட ஆட்சியர் அல்லது நியமிக்கப்பட்ட அதிகாரியிடம் பாதுகாப்பு கோரி அணுகலாம். அவர்களின் குடும்பத்தினர், உறவினர்கள் அல்லது சமூக அமைப்புகளின் அழுத்தத்தின் பேரில் அந்தத் தம்பதியினருக்கு எதிராக எந்த நடவடிக்கையும் எடுக்கப்படாதபடி உள்ளூர் காவல்துறை உறுதி செய்ய வேண்டும்.

தமிழ்நாட்டில் கடந்த மூன்று தசாப்தங்களாக ஆட்சியில் இருந்த அரசுகள் இதுபோன்ற தனிச்சட்டத்தை இயற்றுவதில் தயக்கம் காட்டி வந்துள்ளன. அண்மையில் சமூக நீதி அமைச்சர் வன்னி அரசு, நீதிபதி கே.என். பாஷா தலைமையிலான குழு தனது அறிக்கையைச் சமர்ப்பித்த பிறகு, ஜாதி அடிப்படையிலான ஆணவக் கொலைகளைத் தடுக்க தனிச்சட்டம் இயற்ற முதலமைச்சரிடம் வலியுறுத்துவேன் என்று கூறினார். ஆனால் இந்தக் கருத்தை அவர் தனிப்பட்ட முறையில் வெளியிட்டதாகவும், தற்போது இத்தகைய சட்டத்தை இயற்றுவதில் அரசுக்குள் கருத்து வேறுபாடுகள் இருப்பதாகவும் கூறப்படுகிறது.

ஜாதிப் பாகுபாட்டை ஒழிக்கப் பணிபுரியும் ஒரு தன்னார்வ அமைப்பு, 2016-இலேயே, கடந்த மூன்று ஆண்டுகளில் தமிழ்நாட்டில் ஜாதி மறுத்து திருமணம் செய்ததற்காக 80-க்கும் மேற்பட்ட தம்பதிகள் கொல்லப்பட்டதாக தெரிவித்தது. இந்தச் சம்பவங்கள் அதிகரித்ததைத் தொடர்ந்து, இந்திய கம்யூனிஸ்ட் கட்சி (மார்க்சிஸ்ட்) எடப்பாடி கே. பழனிசாமி அரசிடம் தனிச்சட்டம் கொண்டுவர வலியுறுத்தியது. ஆனால் அப்போதைய துணை முதலமைச்சர் ஓ. பன்னீர்செல்வம், ஏற்கனவே உள்ள குற்றவியல் சட்டங்களே போதுமானவை என்று கூறி தனிச்சட்டத்தை எதிர்த்தார்.

லதா சிங் எதிர் உத்தரப் பிரதேச அரசு (2006) வழக்கில் உச்சநீதிமன்றம், ஜாதி மற்றும் மதம் கடந்து திருமணம் செய்யும் தம்பதிகளுக்கு எதிரான வன்முறையைக் கடுமையாகக் கண்டித்தது. ஜாதி அமைப்பு `நாட்டின் சாபம்' என்று குறிப்பிட்ட உச்ச நீதிமன்றம், ஜாதி மறுப்பு திருமணங்கள் தேசிய நலனுக்குப் பயன்படுகின்றன என்றும், அவை ஜாதித் தடைகளை உடைக்க உதவுகின்றன என்றும் கூறியது. மேலும், ஒவ்வொரு வயது வந்த நபருக்கும் தன் விருப்பப்படி திருமணம் செய்து கொள்ளும் அடிப்படை உரிமை இருப்பதாகவும், பெற்றோர் விரும்பவில்லை என்றால் உறவைத் துண்டிக்கலாம்; ஆனால் மிரட்டவோ, தொந்தரவு செய்யவோ அல்லது வன்முறையில் ஈடுபடவோ உரிமை இல்லை என்றும் தெளிவுபடுத்தியது. அதுமட்டுமல்லாமல், இத்தகைய தம்பதிகளுக்கு காவல்துறையும் நிர்வாகமும் பாதுகாப்பு வழங்க வேண்டும் என்றும், அவர்களை மிரட்டுபவர்கள் அல்லது தாக்குபவர்கள் மீது உடனடியாக குற்றவியல் நடவடிக்கை எடுக்க வேண்டும் என்றும் உத்தரவிட்டது.

இருப்பினும், ஒன்றிய அரசு இதுகுறித்து மாநிலங்களுக்கு அறிவுரைகள் வழங்கியதைத் தவிர பெரிதாக எதையும் செய்யவில்லை. 2009-ஆம் ஆண்டு அப்போதைய மத்திய உள்துறை அமைச்சர் ப. சிதம்பரம், ஆணவக் கொலைகள் தொடர்பான தனிப்பட்ட புள்ளிவிவரங்கள் தேசிய குற்றப் பதிவுத் துறையிடம் இல்லை என்று நாடாளுமன்றத்தில் தெரிவித்தார். இத்தகைய குற்றங்கள் பெரும்பாலும் குடும்ப விவகாரங்களாக மறைக்கப்படுவதால் அவற்றை தனி வகையாகப் பதிவு செய்வது கடினம் என்றும் அவர் கூறினார். பின்னர் நீதிபதி பி.வி. ரெட்டி தலைமையிலான சட்ட ஆணையம் தனது 242-வது அறிக்கையில், ஆணவக் குற்றங்களைத் தடுக்க தனிச்சட்டம் தேவை என்று பரிந்துரைத்தது. திருமணங்களை எதிர்த்து சமூகக் கூட்டங்கள் நடத்துதல் அல்லது சமூகப் புறக்கணிப்பை திணித்தல் போன்றவை சட்டவிரோதக் கூட்டமாகக் கருதப்பட வேண்டும் என்றும், அவற்றுக்கு கட்டாய குறைந்தபட்ச தண்டனை வழங்கப்பட வேண்டும் என்றும் பரிந்துரைத்தது. இதன் அடிப்படையில் "Prevention of Crimes in the Name of Honour and Tradition Bill, 2010" என்ற மசோதாவையும் மத்திய அரசு மாநிலங்களவையில் அறிமுகப்படுத்தியது.

2021-இல் திமுக ஆட்சிக்கு வந்த பிறகு, விடுதலைச் சிறுத்தைகள் கட்சி உள்ளிட்ட கூட்டணிக் கட்சிகள் தனிச்சட்டம் கோரி அழுத்தம் கொடுத்தன. இதையடுத்து நீதிபதி கே.என். பாஷா தலைமையில் குழு அமைக்கப்பட்டது. சட்டமன்றத் தேர்தலுக்குப் பிறகு, சி. ஜோசப் விஜய் தலைமையில் புதிய அரசு பொறுப்பேற்றது. பதிவுத்துறை அமைச்சர் லோகேஷ் தமிழ்செல்வன், "காதலுக்கு சிவப்பு நாடா முறை இருக்காது" என்று அறிவித்து, திருமணப் பதிவு எளிதாக நடைபெறும் என உறுதியளித்தார். திருமணப் பதிவுக்கு பெற்றோரின் சம்மதம் அல்லது வருகை தேவை என்ற முந்தைய அரசின் சுற்றறிக்கையும் சட்டவிரோதமானது என ரத்து செய்யப்பட்டு, துணைப் பதிவாளர்கள் எந்தத் தடையும் இல்லாமல் திருமணங்களைப் பதிவு செய்ய உத்தரவிடப்பட்டனர்.

ஆனால், முற்போக்கான அறிவிப்புகள் இருந்தபோதிலும், ஜாதி அடிப்படையிலான ஆணவக் குற்றங்களைத் தடுக்க தனிச்சட்டம் இயற்றுவதில் குறிப்பிடத்தக்க முன்னேற்றம் இல்லை. நீதிபதி கே.என். பாஷா குழுவின் பதவிக்காலம் ஆகஸ்ட் நடுப்பகுதியில் முடிவடைய உள்ளது. அது நீட்டிக்கப்படுமா? என்பதும் தெளிவாக இல்லை. உண்மையில், இத்தகைய சட்டம் தேவையா? என்று தொடர்ந்து விவாதிப்பதை விட, இந்தப் பிரச்சினைக்கு உறுதியான சட்டரீதியான தீர்வை உருவாக்குவதே காலத்தின் தேவை.

எனவே, கர்நாடகாவின் `எவ நம்மவா’ சட்டத்தின் சிறந்த அம்சங்களை எடுத்துக் கொண்டு, தமிழ்நாட்டிலும் அதேபோன்ற ஒரு சட்டத்தை இயற்றுவது பொருத்தமானதாக இருக்கும். சமூக நீதியின் நீண்ட பாரம்பரியம் கொண்ட தமிழ்நாட்டில், அந்தச் சட்டத்திற்கு `பிறப்பொக்கும் எல்லா உயிர்க்கும்’ என்ற திருக்குறள் வரியைப் பெயராக வைப்பதைவிட பொருத்தமானது வேறு எதுவும் இருக்க முடியாது. இது நீண்ட காலமாக நிலுவையில் உள்ள ஒரு சட்டத் தேவையாகும்.

(கருநாடக மாநில அரசைப் பின்பற்றி தமிழ்நாட்டில் ஆணவப் படுகொலை சட்டம் கொண்டுவர வேண்டும் என்று வலியுறுத்தி முன்னாள் நீதிபதி சந்துரு `டைம்ஸ் ஆப் இந்தியா’ ஜூலை 17, நாளேட்டில் எழுதிய கட்டுரை.)