கரையைச் சேரும் அலைகள்

ஒலிகளை நிரப்பி

இரவினை அணைத்தபடி

பெய்து கொண்டிருந்தது

மழை.

மறுநாள் எழுந்து

பார்க்கையில் அவன்

காகிதங்களில்

எழுதிய காதல் கவிதைகள்

ஈரமாகி இருந்தன.

கோர்வையாக

ஒவ்வொரு வரியிலும்

ஈரத்துளிகள்.

யாரோ படித்துவிட்டு

போயிருக்கிறார்கள்.

“நீ தான் நான் காதலித்த

முதல் பெண்”

“எனக்கும் நீங்க தான்”

அன்னோன்யமாக

பேசிக் கொண்டிருந்தனர்

கடற்கரையில் ஒரு தம்பதி.

கரையைச் சேரும் அலைகள்

மொத்தம் இரண்டு.

கடலின் நடுவில் இறக்கும்

அலைகள் அவர்கள் கணக்கில் இல்லை.

கிளியைப் படத்தில்

பார்த்து மகிழ்ந்த பருவம்

கிளியை உண்டிக்கல்லில்

குறி பார்த்த பருவம்

கிளியை வாஞ்சையுடன்

வளர்த்த பருவம்

எல்லாம் முடிந்து

கிளியை நினைவில் நிறுத்தி

ஏங்கி

சிரித்து

மகிழும்

பருவம் தொடங்கியாயிற்று…