இந்த இரவு முடியப் போகிறது
நான் என் தனிமையை
உனக்கு அனுப்பட்டுமாவென கேட்டேன்
வேண்டாம்
என் தனிமை கெட்டுவிடுமென்றாய்
ஒரு எழுதப்படாத கவிதையின் பின்னால்
போய்க்கொண்டிருந்த தனிமை மீது
ஒரு சொல் உன் உதட்டிலிருந்து நழுவி
ஒரு மழைத்துளியைப் போல் விழுந்தது
சூடான என் தனிமை மீது
சட்டென்று உள்ளிழுத்துக்கொண்ட
மழைத்துளியை தேடி நீ வந்தாய்
தொடங்கிற்று
எனக்கும் உனக்குமான
முடிவில்லாத உரையாடலின் முதல் வார்த்தை.