பெரியார் முழக்கம் - ஏப்ரல் 2014

விவரங்கள்

எழுத்தாளர்: அருந்ததி ராய்

பிரிவு: பெரியார் முழக்கம் - ஏப்ரல் 2014

வெளியிடப்பட்டது: 19 ஏப்ரல் 2014

• அம்பேத்கர்
• காங்கிரஸ்
• காந்தி

‘அவுட் லுக்’ (மார்ச் 10) ஏட்டில் அருந்ததி ராய், அம்பேத்கர் நூலுக்கு எழுதிய முன்னுரிமை குறித்து வழங்கிய பேட்டியின் ஒரு பகுதி ஏற்கனவே பெரியார் முழக்கத்தில் (மார்ச் 20) வெளி வந்தது. பேட்டியின் மற்றொரு பகுதி:

கேள்வி: காந்தி ஏகாதிபத்தியத்தை எதிர்த்துப் போரிடவில்லையா? அவர் நமது நாட்டுக்கு சுதந்திரம் வாங்கித் தரவில்லையா?

பதில் : இதை சுதந்திரம் என்று சொல்வதைவிட வேண்டுமனால் ‘அதிகார மாற்றம்’ என்று சொல்லலாம். காந்திய-அம்பேத்கரிய விவாதத்தில் ‘ஏகாதிபத்தியம், சுதந்திரம்’ போன்ற வார்த்தைகள் நமது புரிதலில் இன்னும் சற்று ஆழமாகவும், சிக்கலாகவும் மாறிப் போகிறது.

அம்பேத்கர் முதல்முறையாக, 1931 ஆம் ஆண்டு காந்தியைச் சந்தித்தார். அப்போது, காங்கிரஸ் மீதான அம்பேத்கரின் தீவிர விமர்சனம் குறித்து காந்தி கேட்கிறார். அதற்கு அம்பேத்கர் அளித்த பதில் மிக பிரபலமானது: ‘காந்திஜி! எனக்கென்று தாயகம் ஏதுவுமில்லை; தீண்டத்தகாதவர்கள் பெருமைப்பட இங்கு எதுவுமில்லை.”

அவர் தென்னாப்பிரிக்காவிலிருந்து திரும்பிய பின்னரும்கூட, பிரித்தானியப் பேரரசுக்குப் ‘பொறுப்புணர்ச்சி’யுடன் நடந்து கொண்டார். ஆனால், ஒரு சில ஆண்டுகளிலேயே முதல் தேசிய ஒத்துழையாமை இயக்கம் பிரித்தானியர்களுக்கு எதிராகத் திரும்பியது. இலட்சக்கணக்கான மக்கள் அவரின் அழைப்பை ஏற்று திரண்டனர். எனினும், அவர் மட்டுமே பிரிட்டிஷார் பிடியிலிருந்து இந்தியாவுக்கு விடுதலை பெற்றுத் தந்தார் என சொல்வது சரியல்ல. நிச்சயமாக, அவருக்கும் அதில் ஒரு தனிப் பங்கு இருந்தது. முழுப் போராட்டத்தின் ஒரு கட்டத்தில், சமத்துவமின்மை பற்றி ஒரு சமூக சீர்திருத்தவாதியைப்போல் அவர் பேசியிருக்கிறார். ஆனால், பாரம்பரிய சாதிய ஏற்றத் தாழ்வு அமைப்பு, பெரு நிலவுடமையாளர்களின் அதிகாரத்தில் அவர் என்றுமே தலையிட்டதில்லை என்பதை யாராலும் மறுக்க முடியாது.

டாடா, பிர்லா, பஜாஜ் போன்ற தொழிலதிபர் களின் வீட்டில் இருந்துகொண்டு, அவர்கள் ஆதரவுடனேயே காந்தி தனது அரசியல் நடவடிக்கை குறித்து சிந்தித்தார். எனவே, அவர்களுக்கு எதிராக, காந்தி ஒரு போதும் செயல்பட்டதில்லை. அதில் அவர் மிகவும் கவனமாக இருந்தார். அவர்களில் பலர், முதல் உலகப் போரில் பெரும் பணம் ஈட்டினர். பிரிட்டிஷ் ஆட்சியின் கட்டுப்பாடுகளும் அவர்களின் இன மேலான்மையும் மீது அவர்கள் வெறுப்புற்றனர், எனவே, அவர்கள் தேசிய இயக்கத்தின் பின்னால் தங்கள் பலத்தைக் காட்டத் தொடங்கினர்.

காந்தி, தென்னாப்பிரிக்காவிலிருந்து திரும்பிய பின்னர், அகமதாபாத் நூற்பாலை நிர்வாகத்தினரால் எந்தப் பயனும் அடையாத தொழிலாளர்கள் தொடர்ச்சியான வேலை நிறுத்தம் செய்தனர். நூற்பாலை முதலாளிகள் பிரச்சனையைத் தீர்த்து வைக்க காந்தியை நாடினர். தொழிலாளர் தகராறு களில் காந்தியின் தலையீடு, தொழிற்சங்கங்களை அவர் கையாண்ட விதம், வேலை நிறுத்தத்தின்போது தொழிலாளர்களுக்கு அவர் செய்த அறிவுரை என... இவை அனைத்தும் விடுகதைபோல் புதிரானவையாக இருக்கின்றன.

காந்திய நடைமுறைகள் வியப்பான திருப்பங்களைக் கொண்டவை. எடுத்துக்காட்டாக, 1924 ஆம் ஆண்டு பூனாவுக்கு அருகில் டாடா குழுமம் கட்டுமானம் செய்யவிருந்த முல்ஷி அணைக்கு, அருகில் இருந்த கிராமவாசிகள் கடும் எதிர்ப்பு தெரிவித்தனர். அதிலிருந்து மும்பையில் உள்ள ஆலைகளுக்கு மின்சாரம் உற்பத்தி செய்ய இருப்பதாகச் சொல்லி, போராட்டத்தைக் கைவிடு மாறு காந்தி அம்மக்களுக்கு கடிதம் எழுதினார். உலக வங்கி உதவியுடன் உருவாக இருந்த ‘சர்தார் சரோவர்’ அணை திட்ட வழக்கில், 2000 ஆம் ஆண்டு உச்சநீதிமன்றம் தீர்ப்பளித்ததுபோல் இருந்தது காந்தியின் வாதம்.

அம்பேத்கர் உடனடியாக அதில் குறுக்கிட்டு, “காங்கிரஸ் சுதந்திரத்துக்காகப் போராடுகிறது என்பதைவிட, அது யாருடைய சுதந்திரத்திற்காகப் போராடுகிறது என்பதுதான் மிக முக்கியமானது” என்றார்.

விவரங்கள்

எழுத்தாளர்: விஷ்ணுபுரம் சரவணன்

பிரிவு: பெரியார் முழக்கம் - ஏப்ரல் 2014

வெளியிடப்பட்டது: 14 ஏப்ரல் 2014

• தமிழ்த் தேசியம்
• பெரியார்
• தமிழ் மொழி
• ம.பொ.சி.

மதிவண்ணன் நூல் வெளியீட்டு நிகழ்வில் பேசிய பத்திரிகையாளர் விஷ்ணுபுரம் சரவணன், பெரியார் மீது ம.பொ.சி. யின் பேத்தி பரமேசுவரி என்பவர், இணையதளத்தில் அவதூறுகள் எழுதி வருவதை சுட்டிக்காட்டி பேசினார். அவரது உரையையும், அவதூறுக்கு மறுப்பாக‘குடிஅரசு’ பதிவுகளையும் (4 ஆம் பக்கம்) வெளியிடுகிறோம்.

ராவ் சாகிப் எல். சி. குருசாமி சட்டமேலவை உரைகள் மற்றும் மதிவண்ணன் எழுதிய, ‘உள்ஒதுக்கீடு’; ‘தொடரும் விவாதம்’; ‘மெல்ல முகிழ்க்கும் உரையாடல்’, ‘ஏதிலியைத் தொடர்ந்துவரும் நிலா’ ஆகிய மூன்று நூல்கள் வெளியீட்டு நிகழ்வு 15.3.2014 அன்று சென்னை அய்கப் அரங்கில் நடைபெற்றது. ‘கருப்புப் பிரதிகள்’ இந்த நூல்களை வெளியிட்டுள்ளது. நூல்களை ஆதித் தமிழர் பேரவைத் தலைவர் அதியமான் வெளியிட, பொதுச் செயலாளர் விடுதலை இராசேந்திரன் பெற்றுக் கொண்டார். வ. கீதா, புனித பாண்டியன் மற்றும் தோழர்கள் உரையாற்றினர். நீலகண்டன் தொகுத்து வழங்கினார். ‘மெல்ல முகிழ்க்கும் உரையாடல்’நூலை அறிமுகம் செய்து பத்திரிகையாளர் விஷ்ணுபுரம் சரவணன் எழுத்துப்பூர்வமாக பதிவு செய்த உரையில் ஒரு பகுதி:

இந்த தொகுப்பின் கட்டுரைகளை இலக்கியம் சார்ந்தும் அரசியல் சார்ந்தும் இரண்டாகப் பிரிக்கலாம். ஆனால் இரண்டையும் தலித்திய பார்வையில் அலசுகிற இதன் ஆய்வு நோக்கில் ஓர் ஓர்மை இருப்பதை அவதானிக்க முடிகிறது. உதிரிகள் என்று சொல்லிக் கொள்கிற இலக்கியவாதிகள் பதிகிற செய்திகளை/படைப்புகளைத் தான் சில அல்லது பல ஆண்டுகள் கழித்து அரசியல் செயல்பாடுகளில் ஈடுபடுபவர்கள் கையாள்கிறார்கள். உதாரணமாக நிறைய சொல்லலாம். ஒன்றை மட்டும் இங்கு பார்ப்போம். பெங்களூர் குணா பேசுகிற தூயதமிழ்க் குருதி தேசியம் பல ஆண்டுகளாக உதிரி பிரதியாக யாரும் அதை பெரிதாக பொருட்படுத்தாத நிலையில் கிடந்தது. கோ.கேசவன், அ. மார்க்ஸ் போன்றோர் அவ்வப்போது அதற்கு எதிர்வினை புரிந்து வந்தனர். ஆனால், இப்போது முளைத்திருக்கும் சில தமிழ்த் தேசிய இயக்கங்கள், கட்சிகள் அவரின் கொள்கையை வெளிப்படையாக தங்கள் இயக்கக்கட்சி செயல் திட்டங்களாக முன் வைக்கின்றன. தங்கள் இதழ்களில் அவரது கட்டுரைகளுக்கு முன்னுரிமை தந்து வெளியிடுகின்றன. எனவே உதிரிகளின் பிரதி ஒருவகையில் இங்கு ஆவணமாக பதிவாகி வருகின்றன என்பதை நாம் கவனத்தில் கொள்ள வேண்டியிருக்கிறது.

இந்தத் தொகுப்பின் தொடக்கமாக இருக்கும் “இலக்கியமும் இலக்கியம் சார்ந்தும்” எனும் கட்டுரையே இந்தத் தொகுப்பின் கட்டுரையை நாம் வாசிக்க வேண்டிய மனநிலையை தெளிவாக வரையறுத்து விடுகிறது.

சுந்தர ராமசாமியின் நாவல்கள் குறித்த கட்டுரை மிக முக்கியமானது. தமிழ் இலக்கியவெளியில் சுந்தர ராமசாமி ஒரு பிதாமகனாக உருவமைக்கப்படுகிற நிலையை நாம் காணமுடிகிறது. பாரதியார், புதுமைப்பித்தன், சுந்தர ராமசாமி என்று வரிசையை கட்டமைக்கிற வகையில் விழாக்கள் கொண்டாடப்படும் சூழலில் சுந்தர ராமசாமியின் நாவல்களை ஊடறுத்து அதில் மையமாக இருக்கும் இந்துத்துவா மனநிலையை வெளிப்படையாக உடைத்துப் போடுகிறது இக்கட்டுரை. புளிய மரத்தின் கதை, ‘ஜெ. ஜெ’ சில குறிப்புகள் நாவல்களை தலித்திய நோக்கில் ஆராய்ந்திருக்கிற இக்கட்டுரை, சு.ரா.வின் மொழி நடையில் மயங்கி அந்த நாவல்களை தமிழில் சிறந்த இலக்கியமாக கட்டமைக்க முயல்கிற முயற்சிக்கு பெரும் கலகக் குரலாக முன் நிற்கிறது. பிரேமிள். ராஜன் குறை-உள்ளிட்ட பலரும் சுந்தர ராமசாமியின் நாவல்களின் படைப்பு ரீதியிலான பலவீனங்களை விரிவாக எழுதியிருக்கின்றனர்.

சுந்தர ராமசாமி ஏன் இவ்வளவு தூரம் விமர்சிக்கப்பட வேண்டும் என்பதற்கு அவரை ஒட்டுமொத்த தமிழ் இலக்கியத்திற்கு குலசாமியாக மாற்ற முயலும் அவரின் வாரிசுகளின் பேராசையை வெளிச்சமிட்டு காட்ட மட்டுமல்ல. . . பெரியாரை தமிழருக்கும் தலித்துக்கும் விரோதியாக்க முயல்கிற முயற்சிகளில் சுந்தர ராமசாமி ஆரம்பித்த ‘காலச் சுவடு’பத்திரிகைக்கும் முக்கிய இடமுண்டு. அந்த மாதிரியான முயற்சிகளுக்கு பெரியாரியவாதிகள் தக்க பதில் தந்து அடக்கி வைக்கும்போதெல்லாம், அந்தப் பத்திரிகை தூபம் போட்டு கிளப்பிவிடும். பெரியார் 125 சிறப்பிதழ் வெளியிட்டு, பெரியார் மீதான அவதூறை பொழிந்தது. தொடர்ந்த எதிர்வினையின் போது ரவிக்குமார் காலச்சுவட்டின் குரலாய் ஒரு இடத்தில் பதிகிறார். இவை எல்லாம் பெரியார் பற்றிய மீள் உரையாடலுக்குப் பயன்பட்டது என்று பெரியார் மீது பூசப்படுகிற அவதூறுக்கு முலாம் பூசினார்கள்.

பெரியார் பற்றி அவதூறை பொழிபவர்களுக்கு காலச்சுவட்டின் இதழிலும் மேடைகளிலும் பிரதான இடம் கிடைக்கிறது. ஸ்டாலின் ராஜாங்கம் தனது சமீபத்திய பேட்டியில் இன்றைய ஊடகங்கள் பற்றி கேட்கும்போது அவர் பாராட்டும் ஒரே பத்திரிகை காலச்சுவடுதான். தலித் பிரச்சினைகள் குறித்து தலித்துகளாலே நடத்தப்படும் இதழ்கள்கூட அவருக்கு நினைவில் இல்லை. மேலும் காலச்சுவட்டில் தான் எழுதுவது தலித்துகள் கருத்தியல் தளத்தில் நடத்திய போராட்டத்தின் வெற்றி என்றும், காலச்சுவட்டில் தான் எழுதும் கருத்துகளை வேறெந்த இதழிலும் எழுத முடியாது என்றும் கூறுகிறார். இது மட்டுமல்லாது “தமிழகத்தில் மனுதர்மவிதி செயற்பட்டதா என்பதும் எவ்விடத்தில் என்பதும் தெரியவில்லை” என்கிறார். இப்படி பெரியார் எதிர்ப்பாளர்களை எப்படி பயன்படுத்த வேண்டும் என்று நன்றாக ‘இந்துத்துவா’அறிந்து வைத்திருக்கிறது.

ம.பொ.சி.யின் பேத்தி

ம.பொ.சி.யின் பேத்தியான பரமேஸ்வரி ஒரு கட்டுரையில், ‘பெண் ஏன் அடிமையானாள்’என்ற நூல் பெரியாரால் எழுதப்படவில்லை என்று நிறுவ முயல்கிறார். பெண்கள் மாநாடுகூட்டி, ‘பெரியார்’ என்று பட்டம் கொடுத்ததுகூட ஏதோ செவிவழி கதைதானாம்.
“ஈ. வெ. ரா. பெரியாருக்குப் ‘பெரியார்’ என்ற பட்டத்தைப் பெண்களே செங்கல்பட்டில் நடந்த மாநாட்டில் தந்ததாக செவி வழி கதை உண்டு. தலித் ஆதரவாளரான மீனாம்பாள் கொடுத்தது என்றும், தர்மாம்பாள் கொடுத்த பட்டம் என்றும்கூடப் பாட பேதங்கள் இதில் உண்டு. ஒருநூற்றாண்டுகூட ஆகாத ஒரு செய்தியை நம்மால் உறுதி செய்து கொள்ள முடியவில்லை” என்கிறார். ஆனால், “சென்னையில் நடந்த பெண்கள் மாநாட்டில் 1938இல் தீர்மானமாக இயற்றப்பட்ட செய்தி ‘குடிஅரசு’ இதழில் வெளி வந்திருப்பதை இணையத்தில் தேடினால் அரை நிமிடத்தில் காண முடியும். இந்த அரை நிமிடத் தேடலைக்கூட செய்யாமல் செவிவழிக் கதை என்கிறர் ம.பொ.சி. பேத்தியான பரமேஸ்வரி.

மேலும் அவரது கட்டுரையில், “திராவிடர் தலைவர்களுக்குத் தங்களுக்குத் தாங்களே இப்படி பட்டங்களைச் சூட்டிக்கொள்ளும் ஒரு மரபு உண்டு. அறிஞர் அண்ணா, கலைஞர் கருணாநிதி, நாவலர் நெடுஞ்செழியன், சொல்லின் செல்வர் சம்பத் இப்படி... இதன் முன்னோட்டம் ஈ. வெ. ரா. பெரியாரிலிருந்து தொடங்குகிறது போலும். . . ” என்று கூறி திராவிடம் மீதுள்ள தன் வெறுப்பை நீட்டி முழக்குகிறார். ம.பொ.சி.யின் துரோகப் பணி தொடர்கிறது என்பதைத் தவிர வேறென்ன சொல்வது?

ஸ்டாலின் ராஜாங்கத்தை பேட்டி எடுத்ததும் பரமேஸ்வரியே. அதில் திரும்ப திரும்ப பெரியார் பற்றியும் திராவிட இயக்கங்கள் பற்றியுமே கேள்விகளாக கேட்கப்படுகின்றன. தனக்கு தேவையான பதிலுக்கான கேள்விகளாகவே அவை அமைந்திருக்கின்றன. ம.பொ.சி.யின் இந்துத்துவா பற்றை தனியே சொல்ல வேண்டுமா என்ன?

பெரியார் விமர்சனத்திற்கு அப்பாற்பட்ட ஒருவரல்ல. ஆனால், பெரியார் மீதான விமர்சனங்களைத் தலித்துகள் சார்பாக முன் வைக்கப்பட்டாலும் அதனைக் கொண்டாடி மகிழ்வது யார்? என்பதிலிருந்து நாம் புரிந்து கொள்ள வேண்டியது நிறைய இருக்கிறது. இந்த இடத்தில் மதிவண்ணன் இந்த நூலை சமர்ப்பித்திருக்கிற பகுதியை நினைவுக் கூர்வது முக்கியமானது.

“ஊர்மேயப் பிறந்தவர்களின் / அவிசாரிப் பட்டத்திற்கு அஞ்சாது / தன் வாழ்நாளை / ஒருவேலைத் திட்டமாக நிறைவேற்றிய துறவியும் / தேவதையுமான / மணியம்மைக்கு. . . ” என்று கூறி நூலை சமர்ப்பித்துள்ளார். இதில் துறவி, தேவதை என்கிற சொற்களுக்கான பொருளை அப்படியே பொருத்திக் கொள்ளமாட்டீர்கள் என்று நம்புகிறேன்.

தி.பரமேஸ்வரியின் முகநூல் பகிர்வொன்றை இங்கு சுட்டுவது பொருத்தமாக இருக்கும். “கண்ணகி என்று கூறப்பட்டிருக்கிற பெண்ணுக்கு சிறிதளவாவது அறிவு மனித உணர்ச்சி -தன்மானம் இருந்தது என்று யாராவது ஒப்புக் கொள்ள முடியுமா?” என்று கம்பீரமாகக் கேள்வி போடுகிறார் ஈ.வெ.ரா. உணர்ச்சிக்காக அல்லாமல் உடைமைக்காக முதுமையைக் காதலிக்கும் பெண் மனித உணர்ச்சி அற்றவள்தான். ஊரார் பழிக்கும் நிலையிலும் உணர்ச்சியற்ற கட்டையாக கிழத்தோடு பவனி வரும் பெண் தன்மானமற்றவள்தான்! இந்தக் குறைபாடுகள் அனைத்தும் கொண்ட ஒரு பெண்ணை ஈ.வெ.ரா. எப்போதோ எங்கேயோ சந்தித்து விட்டார் போலும்! அவளை நினைவில் வைத்துக் கொண்டு கண்ணகியைச் சாடுகிறார். (ம. பொ. சிவஞானம் எழுதிய ‘இலக்கியத்தின் எதிரிகள்’ நூல்)

காசுக்காக பெரியாரை மணியம்மை திருமணம் செய்து கொண்டார் எனும் தொனியை இலக்கிய ரசம் சொட்ட ம.பொ.சி. எழுதியிருக்கும் இந்தக் குறிப்பை தன் முகநூலில் பதிகிற கட்டுரையாளர்தான் மணியம்மைக்கு 27 வயதில் 70 வயது பெரியாருடன் திருமணம் நடந்தது பற்றி கவலைப்படுகிறார். இதில் பொருந்தா திருமணம் குறித்த அக்கறையோ, பெண்ணியம் சார்ந்த நோக்கமோ அவர் எழுதுவதில் இல்லை. பெரியார் மீதான எதிர்ப்பு, திராவிட இயக்க ஒவ்வாமையோடுதான் எழுதுவதாக நாம் புரிந்து கொள்ள முடியும். என்ன நோக்கத்திற்காக எழுதப்படுகிறது என்பதை முதன்மையாக்கி பார்ப்பதுதான் பெரியார் நமக்கு கற்றுக்கொடுத்த பாடமாக நான் கருதுகிறேன்.

விவரங்கள்

எழுத்தாளர்: விடுதலை இராசேந்திரன்

பிரிவு: பெரியார் முழக்கம் - ஏப்ரல் 2014

வெளியிடப்பட்டது: 14 ஏப்ரல் 2014

• தமிழ்த் தேசியம்
• பெரியார்
• பெண்ணுரிமை
• தமிழ் மொழி

பெரியார் பற்றிய அவதூறுகள் - தீவிர ‘தமிழ்த் தேசியம்’ பேசும் சில குழுக்களால் இணையதளங்களிலும் எழுத்துகளிலும் பரப்பப்பட்டு வருகின்றன. தமிழனுக்கு அடையாளம் ஜாதியே என்று பார்ப்பனியத்துக்கு சேவை செய்யவும் ஒரு சிலர் புறப்பட்டிருக்கிறார்கள். ம.பொ.சி.யின் பேத்தியான பரமேசுவரி, ‘பெரியார்’ என்ற பட்டத்தை பெண்கள் கொடுத்தார்கள் என்பதற்கே சான்று எதுவும் இல்லை என்று எழுதியிருக்கிறார். இந்த அவதூறுகளுக்கு மறுப்பாக பெண்கள் மாநாட்டில் 13. 11. 1938இல் பெரியாருக்கு பட்டம் தந்த செய்தியை ‘குடிஅரசு’ (நவம். 20, 1938) இதழிலிருந்து எடுத்து இங்கு வெளியிடுகிறோம்.

தமிழ்மொழிக்கும் பெண்கள் உரிமைக்கும் 1938ஆம் ஆண்டிலேயே பெரியார் இயக்கம் குரல் கொடுத்திருக்கிறது என்பதை ‘காமாலைக் கண்’ கொண்டு பார்ப்போருக்கு உணர்த்திட, பெண்கள் மாநாட்டில் நிறைவேற்றப்பட்ட தீர்மானங்களையும் இங்கு வெளியிடுகிறோம். தீர்மானங்களில் சில:

• இந்தியாவில் இதுவரையும் தோன்றின சீர்திருத்தத் தலைவர்கள் செய்ய இயலாமற்போன வேலைகளை இன்று நமது தலைவர் ஈ. வெ. ராமசாமி அவர்கள் செய்து வருவதாலும், தென்னாட்டில் அவருக்கு மேலாகவும், சமமாகவும் நினைப்பதற்கு வேறொருவருமில்லாமையாலும் அவர் பெயரைச் சொல்லிலும், எழுத்திலும் வழங்கும்போதெல்லாம் ‘பெரியார்’ என்ற சிறப்புப் பெயரையே வழங்குதல் வேண்டுமென இம்மாநாடு எல்லோரையும் கேட்டுக் கொள்கிறது.

• மணவினை காலத்தில் புரோகிதர்களையும் வீண் ஆடம்பரச் செலவுகளையும் விலக்கிவிட வேண்டுமென இம்மாநாடு கேட்டுக் கொள்கிறது.

• மற்ற நாடுகளைப்போல் தமிழர்கள் ஒன்றுபட்டு ஒரு சமூகமாய் வாழ்வதற்கு இன்றுபெருந் தடையாயிருப்பது சாதி வேற்றுமையாதலால், சாதி வேற்றுமைகளை ஒழிப்பதற்கு இன்றியமையாத கலப்பு மணத்தை இம்மாநாடு ஆதரிக்கின்றது.

• இந்திய மாதர் சங்கம் என்னும் பேரால் தங்கள் கமிட்டிக் கூட்டத்திலும் மகாநாட்டிலும், கட்டாய இந்தியை ஆதரித்துத் தீர்மானம் நிறைவேற்றியிருப்பதைக் கண்டிக்கின்றது.

• இந்திய மாதர் சங்கம் என்பது சில பார்ப்பனப் பெண்களும், பார்ப்பன அன்பு பெற்ற தாய்மொழியறிவில்லாத சில பெண்களும் கூடிய கூட்டமென்று கருதுகிறது.

• இம்மாகாணத்தில் எப்பகுதியிலாவது பெண்களைக் கூட்டிக் கட்டாய இந்தியை நிறைவேற்ற வீரமிருந்தால் இந்திய மாதர் சங்கத்தார் செய்து பார்க்கட்டுமென இம்மாநாடு அறைகூவி அழைக்கிறது.

• பத்திரிகைகளின் வாயிலாகப் பணம் சம்பாதிப்பது ஒன்றையே எண்ணி தமிழர் இயக்கங்களைக் கேவலப்படுத்தி வெளிவரும் ‘ஆனந்த விகடன்’, ‘தினமணி’, ‘தமிழ்மணி’ முதலிய பத்திரிகைகளைத் தமிழர்கள் இனி வாங்கக் கூடாதெனவும் இம்மாநாடு கேட்டுக்கொள்கிறது.

• கணவனை இழந்த இளம் பெண்களின் துயர் நீங்க மாதர் மறுமணத்தை இம்மாநாடு ஆதரிக்கிறது.

• தமிழ்நாட்டில் 100-க்கு 95 மக்கள் கண்ணிருந்தும் குருடராய் தாய் மொழியில் கையெழுத்துப் போடத் தெரியாத நிலைமையில் இருக்கையில் சென்னை முதன் மந்திரியார் அதற்காவன செய்யாமல் அதற்கு மாறாக இந்தியைக் கட்டாயமாக செய்திருப்பதையும் அதனை கண்டிக்குமுகத்தான் தமிழ்நாட்டு பெருமக்களும், அறிஞர்களும் எவ்வளவோ எடுத்துச் சொல்லியும், மாபெருங் கூட்டங்கள் கூட்டி தெரிவித்தும் அதனைச் சிறிதும்பொருட்படுத்தாமல் பிடிவாதமாகயிருப்பதையும் இதைப்பற்றி தங்களுக்குள்ள மனக்கொதிப்பைக் காட்டும் முறையில் அமைதியாக மறியல் செய்பவரை சிறையில் அடைத்துக் கொடுமைப்படுத்துவதையும் இம்மாநாடு வன்மையாகக் கண்டிக்கிறது.

• தமிழ் மொழியைக் காப்பாற்றும் முறையில் இந்தியைக் கண்டித்து மறியல் செய்துசிறை புகுந்த வீரர்களுக்கு இம்மாநாடு மனமார்ந்த நன்றி செலுத்துகிறது. தீர்மானங்களை விளக்கியும், தமிழ்ப் பெண்கள் நிலைமையை விரித்தும் தோழர் ஈ.வெ.ரா. ஒரு சொற்பொழிவாற்றினார் - என்று ‘குடிஅரசு’ பதிவு செய்துள்ளது.

விவரங்கள்

எழுத்தாளர்: விடுதலை இராசேந்திரன்

பிரிவு: பெரியார் முழக்கம் - ஏப்ரல் 2014

வெளியிடப்பட்டது: 14 ஏப்ரல் 2014

• இந்துத்துவா
• இடஒதுக்கீடு
• பாஜக
• பார்ப்பனர்கள்

வாக்குப் பதிவின் முதல் கட்டம் முடிந்த பிறகு, தேர்தல் அறிக்கையை ஒரு வழியாகவெளியிட்டு விட்டது பா. ஜ. க, . அரசியல் சட்டத்துக்கு உட்பட்டு அயோத்தியில் இராமன்கோயில் கட்டப் போவதாகவும், காஷ்மீருக்கு வழங்கப்பட்டுள்ள சிறப்பு உரிமைச் சட்டமான370 ஆவது பிரிவை நீக்கப் போவதாகவும், சிறுபான்மையினரின் மதச் சட்டங்களை நீக்கி, ஒரே சிவில் சட்டம் கொண்டு வரவிருப்பதாகவும் கூறும் தேர்தல்- இட ஒதுக்கீடுகொள்கையிலும் கைவைத்து விட்டது. தாழ்த்தப்பட்டோர், பிற்படுத்தப்பட்டோருக்கான ஜாதியடிப்படையிலான இடஒதுக்கீடு முறைக்கு ‘சமாதி’ கட்டிவிட்டு அனைவருக்கும் சமவாய்ப்பு வழங்கக்கூடிய ஒரு முறையைக் கொண்டு வரப் போவதாக கூறுகிறது. இது குறித்து பா.ஜ.க. வின் பேச்சாளர் நிர்மலா சீத்தாராமன், இடஒதுக்கீடு முறைகளை மாற்றி அமைக்கத் திட்டமிட்டுள்ளதாகக் கூறியுள்ளார். மிகவும் பின்தங்கியுள்ள 100 மாவட்டங்களை அடையாளம் கண்டு ஏனைய மாவட்டங்களோடு தரம் உயர்த்தும் முறையைக் கொண்டுவருவதாக இடஒதுக்கீட்டு முறை இருக்கும் என்று அவர் கூறியிருக்கிறார். இடஒதுக்கீட்டுக்கான சமூகக் காரணிகளை முற்றிலும் புறந்தள்ளி விட்டதாகவே தெரிகிறது.

2009 ஆம் ஆண்டு பா.ஜ.க. தேர்தல் அறிக்கையில் தாழ்த்தப்பட்டோர், பிற்படுத்தப்பட்டோருக்கான ஜாதி அடிப்படையிலான இடஒதுக்கீடு தொடரும்; அதேநேரத்தில் பொருளாதாரத்தில் பின்தங்கி யோருக்கும் இடஒதுக்கீடு வழங்கப்படும் என்று குறிப்பிடப்பட்டிருந்தது. இந்த அறிக்கை அதற்கு நேர்மாறாக - ‘பார்ப்பனர் குரலை’ முன்வைத்திருக் கிறது. அயோத்தியில் ராமன் கோயில் கட்டும் பிரச்சினை நீதிமன்றத்தில்இருக்கும்போது, கோயிலைக் கட்டும் மதவெறி செயல்திட்டம் முன் வைக்கப்பட்டுள்ளது.

காஷ்மீர், இந்தியாவுடன் இணைக்கப்பட்ட போது, அந்த பகுதி மக்களிடம் வாக்கெடுப்பு நடத்தி, மக்கள் கருத்தை அறிந்த பிறகே இந்தியாவுடன் இணைப்பது குறித்து இறுதிமுடிவெடுக்கப்படும் என்று இந்திய அரசு உறுதி தந்தது. 370ஆவது சிறப்பு உரிமைச் சட்டப்பிரிவு, அவர்களின் ‘தனித்துவம்’ கருதியே அரசியல் சட்டத்தில் சேர்க்கப்பட்டது. இப்போது அந்த உரிமையையும் பறிக்கப் போவதாக தேர்தல் அறிக்கை கூறுகிறது. பா.ஜ.க. அதிகாரத்துக்கு வந்துவிடுமேயானால், நாட்டில் கலவரங்களும் குழப்பங்களும் தலைதூக்கிநிற்கும் என்பதற்கான எச்சரிக்கையாகவே இந்த தேர்தல் அறிக்கை வெளிவந்திருக்கிறது.

மோடியை பிரதமராக்க - பா.ஜ.க. வுடன் கூட்டணி சேர்ந்துள்ள கட்சிகள், இந்த பார்ப்பன இந்துத்துவா செயல் திட்டங்கள் குறித்தும் இடஒதுக்கீட்டுக்கு எதிர்ப்பான கொள்கைகள் குறித்தும் தங்கள் நிலைப்பாட்டை தெரிவிக்க வேண்டும். பா.ஜ.க. வின் தேர்தல் அறிக்கை எப்போதுமே ஆர். எஸ். எஸ். மதவாத கருத்துகளையே பிரதிபலித்து வருகிறது. 1998 ஆம்ஆண்டு அதன் தேர்தல் அறிக்கை “சனாதன தர்மம்தான் இந்திய தேசியத் தத்துவம் ;அரசியலில் இந்துத்துவம் உருவாவது, சமுதாயத்தில் சில பிரிவினரை திருப்திப்படுத்தவும், அவர்களை வாக்கு வங்கிகளாக மாற்றி திருப்திப்படுத்தும் செயல்பாடுகளுக்கு முற்றுப்புள்ளி வைக்கும்” என்று கூறியதோடு இந்தியாவில் பன்முகத்தன்மை ஏதும் கிடையாது. “ஒரே நாடு; ஒரே மக்கள்; ஒரே தேசம்” என்று முழங்கியது.

‘இந்துத்துவ பார்ப்பன’ கொள்கைகளை இப்படி வெளிப்படையாக அறிவிக்காமல், ரகசியமாகவே செயல்படுத்தலாம் என்று பா.ஜ.க. வில் ஒரு அணி கூறுகிறது. முரளிமனோகர் ஜோஷி போன்ற கடும் போக்குக் கொண்ட பார்ப்பன தீவிரவாதிகள், வெளிப்படையாக அறிவிக்க வேண்டும் என்று வற்புறுத்தினார்கள். பா.ஜ.க. தேர்தல் அறிக்கை வெளியிடுவதில் தாமதம் ஏற்பட்டதற்கு காரணமே கட்சிக்குள் நடந்த இந்தப் போராட்டம்தான். நம்மைப் பொறுத்த வரையில் வெளிப்படையாக தங்களை அடையாளம் காட்டிக்கொள்ளும் பிரிவையே வரவேற்கப்படக் கூடியவர்களாக கருதுகிறோம்.

பூனைக்குட்டி வெளியே வந்துவிட்டது; அபாயச் சங்கு ஊதப்பட்டுவிட்டது; தமிழ்நாட்டில் பா.ஜ.க.வும் அதன் கூட்டணி கட்சிகளும் தோற்கடிக்கப்பட வேண்டும் என்ற உறுதியான முடிவுக்கு தமிழர்கள் வந்தாக வேண்டும்!