kaattaaru may2017

உங்களுடைய பெயர், நீங்கள் எந்த ஊர், எந்த குலத்தைச் சேர்ந்தவர்?

என்னுடைய பெயர் செல்வி, கணவர் பெயர் கந்தன், எங்கள் ஊர் வடுகபாளையம். என்னுடைய அப்பா தாசர் குலத்தைச் சேர்ந்தவர், கடவுள் கருடபெருமாள். கணவனின் குலதெய்வம் சென்றாயப்பெருமாள் கணவரின் குலம் நாரமுத்துக் குலம் நான் செக்கிங் சென்டரில் வேலை செய்கிறேன்.

நீங்கள் எத்தனை தலைமுறைகளாக குலதெய்வத்தை வழிபடுகிறீர்கள்?

நாங்கள் 5, 6 தலைமுறைகளாக குலதெய்வத்தை வழிபட்டுக் கொண்டிருக்கிறோம். நாங்கள் சாமிக்கு 16 வகையான பூஜைகள் செய்வோம். 16 வகையான பூ வைத்து வழிபடுவோம். இந்தக் கோவிலுக்கு வானத்தில் இருந்து சங்கு பறந்து வந்து விழுந்திருக்கிறது. நாங்கள் அதை பூக்கூடையில் வைத்து இருக்கிறோம். பூசாரி வீட்டில் இருக்கும். கோவில் விஷேச நாட்களில் மட்டும் சாமியை (சங்கு) வெளியே எடுத்துக் கொண்டு வருவோம்.

எந்தெந்த நாட்களில் குல தெய்வ கோவில்களில் விஷேசம் இருக்கும்?

புரட்டாசி மாதம் சனிக்கிழமையும், கார்த்திகை மாதத்தில் கார்த்திகை தீபநாளிலும் விஷேசமாக இருக்கும். மாசி மாதத்தில் காரமடைக்கு பந்த சேவை எடுப்போம். இந்த மூன்று மாதங்களிலும் மிகவும் சிறப்பாக இருக்கும். மற்ற நாட்களில் அமாவாசை போன்ற தினங்களில் சிறப்பாக பூஜைகள் நடைபெறும். வாரம் வாரம் வெள்ளிக்கிழமை நாட்களில் பூஜைகள் நடக்கும். இந்தக் கோவிலைச் சார்ந்தவர்கள் இடைப்பட்ட நாட்களில் கோவிலுக்கு வந்து சாமி தரிசனம் செய்துவிட்டு போவார்கள்.

கோவிலுக்கு பூஜை செய்வது யார்? கோவில் செலவுகளையெல்லாம் யார் ஏற்றுக் கொள்வார்கள்?

கோவிலுக்கு பூஜை செய்வது எங்களுடைய குலத்தைச் சேர்ந்தவர்கள்தான். நாங்கள் அனைவரும் சேர்ந்து முடிவு எடுத்து பூசாரியைத் தேர்ந்தெடுப்போம். பூசாரியாக இருப்பவர்கள் மிகவும் கட்டுப்பாட்டுடன் இருக்க வேண்டும். எந்த ஒரு வீடுகளிலும் தண்ணீர் கூட வாங்கிக் குடிக்கமாட்டார்கள். பாயில் படுக்க மாட்டார்கள். அவருக்குப் பின் அவருடைய மகன்கள் பூஜை செய்ய வேண்டும். மகன்கள் பூசாரி பட்டத்தை வேண்டாம் என்று சொல்லும்போது பங்காளிகள் யாராவது பூஜை செய்வார்கள்.

கோவில் செலவுகளையெல்லாம் கோவிலைச் சார்ந்தவர்களிடம் வரி வசூல் செய்வோம். கோவிலுக்கு வரி செலுத்தியும், அன்னதானச் செலவுகளையும் ஏற்றுக் கொள்ள முன்வருவார்கள். ஒவ்வொரு செலவுகளையும் தானாகவே முன்வந்து ஏற்றுக் கொள்ள பலர் வருவார்கள். வேறு சமூகத்தைச் சார்ந்தவர்களும் கோவிலுக்கு நன்கொடையாகவோ, செலவுகளை ஏற்றுக் கொள்வார்கள்.

பந்த சேவை எடுக்கும் வரலாறு பற்றிச் சொல்லுங்கள்

கோயம்புத்தூர் மாவட்டம் காரமடை பெருமாள் கோவில் அரங்கநாத சுவாமிக்கு வருடம் ஒருமுறை மாசி மாதத்தில் பெளர்ணமி நாட்களில் பந்த சேவை எடுக்கும் வழக்கம் உள்ளது. இந்தப் பந்த சேவை எடுப்பதன் நோக்கம் என்னவென்றால், இராமயணத்தில் வரும் ஆஞ்சநேயருக்குப் பெருமை சேர்க்கும் விதமாக இராமனும், சீதையும் செய்யும் வழிபாடு.

இராமயணத்தில் இராவணன், சீதையைத் தூக்கிக் கொண்டு போனதற்குப் பிறகு இராமனும், இலட்சுமணனும் மற்றும் அனுமன் படையும் இலங்கை இராவணனிடம் போர் செய்து, சீதையை அழைத்து இராமேஸ்வரம் வருகிறார்கள். அங்கு கடற்கரையில் சிவனை வழிபடுவதற்காக ஒரு சிலை தேவைப்படுகிறது. சூரிய உதயத்திற்குள் அந்தச் சிலையை வைத்து வணங்கவேண்டும் என்பது இராமன் மற்றும் சீதையின் நோக்கமாக இருந்தது.

அதற்காக ஒரு சிலை வேண்டும் என்று அனுமானிடம் கூறினார்கள். அனுமான் சிலையைத் தேட செல்கிறார். சிலையைக் கொண்டு வருகிறார். சூரிய உதயம் ஆகிவிட்டது. இராமனும், சீதையும் மணலிலே ஒரு சிலையை செய்து வணங்கிக் கொண்டிருந்தார்கள். அனுமான் கோவத்துடன்  “சாமி நான் சிலையைக் கொண்டு வந்துள்ளேன். அதற்குள் நீங்களே சிலையை வைத்து வணங்குகிறீர்கள். இது நியாயமா” என இராமனிடன் கேட்கிறார்.

இராமன் அனுமானிடம் “சரி இந்தச் சிலையை அகற்றி விட்டு அந்தச் சிலையை வை” எனக் கூறுகிறார். சிலையை தன் வாலால் அகற்ற முயற்சிக்கிறார் அனுமான். வால் அறுந்து விடுகிறது. இராமனிடம் அனுமான் கோபமுடன் பேசுகிறார் “சுவாமி என் வால் அறுந்து விட்டது. எனது கூட்டத்திற்கே இது மிகவும் ஒரு கவலையான செய்தியாக உள்ளது. என்னை இப்படி கொடுமைப்படுத்துவது சரிதானா எனக் கேட்கிறார். அதற்கு இராமன் “கோபப்படாதே.... இந்த வாலை வைத்து மிக முக்கியத்துவம் வாய்ந்த விழாவாக செய்கிறேன்” என்று சொல்லி இராமனும், சீதையும் இணைந்து ஒரு நிகழ்ச்சியை நடத்துகிறார்கள். இராமன் பந்தசேவை எடுக்கிறார். சீதாதேவி நேர்த்திக் கடனுக்காக வீடு வீடாக, தானியங்களை பிச்சை எடுக்கிறாள். இராமனும், சீதையும் இப்படிச் செய்யும்போது அனுமான் மகிழ்ச்சியுடன் ஆடிக் கொண்டிருக்கிறார்.

இதுதான் பந்த சேவை எடுப்பதன் வரலாறு. இதில் கவாளம் எடுப்பது என்பது ஊருக்குள் அனைவரும் அனுமானுக்குப் பழங்களைத் தருவார்கள். அதை அனுமான் கவாளம் எடுப்பார். திருமணம் ஆகி குழந்தை இல்லாத தம்பதியினர் நேத்திக் கடன் செய்வார்கள். எப்படி என்றால் கவாளம் எடுக்கும் பழங்களை வாயில் எடுத்து, பிள்ளை இல்லாதவர்களுக்கு பிள்ளைவரம் கொடுக்கும் நோக்கத்துடன் தருவார். அது ஒரு நம்பிக்கையாக இன்று வரை வணங்கி வருகிறார்கள்.

காரமடைக்குப் பந்தசேவை எடுப்பது யார் வேண்டுமானாலும் எடுக்கலாமா? இதை எடுப்பதனால் என்ன நன்மை?

பந்தசேவை ஆண்கள் அட்டுமே எடுக்க முடியும்.  அவர்களும் முத்திரை போட்டவர்களாக இருக்க வேண்டும். அவர்கள் மட்டுமே சேவை எடுக்க அனுமதி இருக்கிறது. பெண்கள் எடுப்பதற்கு அனுமதி இல்லை. பந்த சேவை எடுப்பதனால் நல்ல மழை பெய்யும், கெட்ட சக்திகள் எதுவும் ஊருக்குள் இருக்காது என்பது ஐதீகம்.

முத்திரை போடுவது என்றால் என்ன?

இந்தப் பந்தசேவை எடுப்பதற்கு முழுமையான தகுதி என்னவென்றால் கணவன் இராமவதார முத்திரையும், மனைவி சீதையின் முத்திரையும் பதித்துக்கொள்ள வேண்டும். அந்த முத்திரைப் பதிப்பதற்கென்று காரமடை அரங்கநாத சுவாமி கோவிலுக்குச் சென்று ஜீயர் அய்யர்களிடம் காணிக்கை செலுத்தி,

“நாங்கள் இன்று முதல் இராமக் கடவுளுக்கும், சீதைக்கும், அனுமானுக்கும் நேத்திக்கடன் செலுத்தும் விதமாக மிகவும் கட்டுப்பாடான உணவுமுறை, வாழ்வியல் முறை (சடங்கு, தீட்டு இழவுத்தீட்டு நிகழ்வுகளில் கலந்து கொள்ளாமல் தள்ளி வாழ்வது) கட்டுப்பாடுடன் வணங்குகிறோம் என்று உறுதி எடுத்து முத்திரையிடுகிறோம்”

என்று ஐயர்களிடம் கூறி வருடவருடம் நடைமுறைப்படுத்துவார்கள். பந்தசேவை எடுக்கும் குடும்பம் அதை தலைமுறை தலைமுறையாக வழி நடத்தவேண்டும். இல்லையெனில் குடும்பத்தில் நீங்கா கஷ்டங்கள் ஏற்படும் என்று ஐயர்கள் கூறுவார்கள்.

அதேபோல முத்திரையிட்ட பின்னர் தொடர்ச்சியாக மூன்று வருடங்களுக்குப் பந்தசேவை எடுக்கும் பத்து தாசர்களுக்கு நாங்கள் அன்னதான சேவை நடத்தவேண்டும். இது அவரவர் வசதிக் கேற்றார் போல் செலவு செய்வார்கள். இது பெருமாளை வணங்கும் எந்தக் குலத்திற்காரர்கள் வேண்டுமானாலும் முத்திரையிட்டு வழிபடலாம்.

அதுபோல் இந்த முத்திரையிட்டதாசர் இறந்து விட்டால் முத்திரை இறக்குதல் என்ற சடங்கு உள்ளது.அதற்கு 10 தாசர்கள் வரவழைக்கப்பட்டு சடங்குகள் செய்து முத்திரையை இறக்கி மகன் மற்றும் மகன் வழி பேரன்களுக்குப் பந்தசேவை எடுக்கும் வழிபாட்டைத் தருவார்கள். இதற்கு 10 ஆயிரம்  முதல் 20 ஆயிரம் வரை செலவு கூட ஆகும்.

கோவிலுக்கு முத்திரை போடுவது யார்? யார் வேண்டுமானாலும் போடலாமா? இந்த முத்திரை எங்கே போடுவீர்கள்? யார் போடுவார்கள்? என்ன செலவாகும்?

பெருமாளுக்கு முத்திரை போடுவது 30 வயதுக்கு மேற்பட்ட ஆண்களும், பெண்களும் போடலாம். ஆனால் மிகவும் கட்டுப்பாட்டுடன் இருக்க வேண்டும். இந்த முத்திரை காரமடையில் போய் போடுவோம். ஐயர் தான் போட்டு விடுவார். காரமடையில் போட்டால் சாமிக்கு பூ, பழம், தேங்காய், துளசிமாலை, ஐயருக்கு கொடுக்கும் பணம் எல்லாம் சேர்த்து 5000 ரூபாய் ஆகும். நம் வீடுகளில் முத்திரை போட்டால் ஐயரை வீட்டுக்கு அழைத்து வரவேண்டும். அன்னதானம் உள்பட 50,000 ரூபாய் வரை கூட செலவாகும்.

உங்களுடைய குல தெய்வ கோவில் கட்டுவதற்கு யாரிடமாவது ஆலோசனை செய்வீர்களா?

முதலில் எங்கள் குலத்தைச் சேர்ந்தவர்கள் எல்லாம் பேசி முடிவு எடுப்போம். அதன்பிறகு பல்லடம் தண்டபாணி கோவிலில் ஐயரிடம் போய்ப் பேசுவோம். அவர் நாள் குறித்துக் கொடுப்பார் அந்த நாளில் கோவில் கட்டுமானப் பணிகளைத் தொடங்குவோம். வேறு எந்த ஒரு விஷேசமாக இருந்தாலும் ஐயர் குறித்துக் கொடுத்த நாளில்தான் நடத்துவோம்.

கோவில் கும்பாபிகேஷத்தை உங்கள் குலத்து ஆட்களே சேர்ந்து நடத்துவீர்களா?

இல்லை. முதலில் ஐயர்தான் பூஜை செய்வார். கோவில் கலசத்தில் தண்ணிர் ஊற்றுவதும் அவர்கள்தான். நம்மிடம் கொடுக்க மாட்டார்கள். கும்பாபிஷேகம் முடிந்து 48 நாட்கள் நந்த தீபம் எரியும். அதன் பிறகுதான் எங்கள் குலத்தைச் சார்ந்தவர்களிடம் பொறுப்பைக் கொடுப்பார்கள். 48 நாட்கள் பூஜைக்கும் ஒரு நளைக்கு 500 ரூபாய் பணம் கொடுக்க வேண்டும். மற்றும் தேங்காய், பூ, பழம் போன்றவையும் வாங்கித்தர வேண்டும்.

வேறு சமூகத்தைச் சார்ந்தவர்கள் உங்கள் குலதெய்வ கோவில்களுக்கு வருவார்களா?

வருவார்கள். நாயக்கர் சமூகத்தைச் சார்ந்தவர்கள். வருவார்கள். சாமி கும்பிடுவார்கள். எங்களுக்கு வேண்டிய உதவிகளைச் செய்வார்கள். நாங்களும் அவர்களை மதிப்பும் மரியாதையுடனும் நடத்துவோம்.

நாயக்கர் சமூகத்தைச் சார்ந்தவர்கள் உங்கள் குலதெய்வக் கோவிலுக்கு வருவதுபோல் உங்களை அவர்கள் கோவிலுக்குள் அனுமதிப்பார்களா?

முதலில் அனுமதி இருந்தது. இப்பொழுது இல்லை. வெளியில் நின்றுதான் சாமி கும்பிட வேண்டும். அனுமதி இருந்த காலங்களில் அபிஷேகம் செய்வது, பொங்கல் வைத்து படையல் போட்டு வழிபடுவது என இருந்தது. நாங்கள் கோவிலுக்குள் உள்ளே சென்று வழிபடுவது நாயக்கர் சமூகத்தில் உள்ள ஒரு சிலர் ஏற்றுக் கொள்கிறார்கள். ஒரு சிலர் எதிர்க்கிறார்கள். அதனால் நாங்கள் யாரும் உள்ளே செல்வதில்லை. வெளியே நின்றே தேங்காய் பழம் உடைத்து சாமி கும்பிடுவோம்.

Pin It

உங்கள் குலத்தைப் பற்றி சொல்லுங்கள்

நாங்கள் காடை குலம் எங்களுக்குப் எங்களது மாமன், மச்சான் குலங்கள் என்பது பட்டூகன் குலம், ஓதாலன் குலம் ஆகியவை ஆகும். அந்தக்குலத்தில் தான் பெண் கொடுத்து பெண் எடுப்போம். ஒரே குலத்தைச் சார்ந்தவர்களிடன் திருமண உறவுமுறையை வைக்க மாட்டோம். எங்கள் குலத்தைச் சார்ந்தவர்கள் 7, 8 தலைமுறைகளாக வீரமாத்தி அம்மனை வணங்கி வருகிறோம். சுமார் 1500 குடும்பங்கள் இந்தக் குலத்தைச் சார்ந்தவர்களாக இருக்கிறோம்.

உங்களுடைய குல தெய்வம் பற்றி சொல்லுங்கள்

எங்களுடைய குல தெய்வமான வீரமாத்தி அம்மன் பிறந்த இடம் பூளவாடி கிராமம். பட்டூகன் குலத்து ஆணுக்குக் காடை கூட்டத்தைச் சேர்ந்த பெண் வீரமாத்தியைத் திருமணம் செய்ய முடிவு செய்கிறார்கள். பெண் குழந்தைகளுக்குச் சிறு வயதிலேயே திருமணம் செய்வது அந்தக் காலத்துப் பழக்க வழக்கமாக இருந்தது. வயதுக்கே வராத சிறு குழந்தையான வீரமாத்திக்குத் திருமணம் முடிவு செய்யப்பட்டது.

வீரமாத்தியைப் பெண்பார்த்துவிட்டுச் சென்ற ஆண், திருமணத்திற்கு சில நாட்களே இருந்த சமயத்தில் மாடு மேய்க்கப் போகிறார். போகும்போது காட்டில் பாம்பு கடித்து இறந்து விடுகிறார். அவரைக் கொண்டு போய் எரிக்கிறார்கள். வீரமாத்தி, தானாகவே வந்து எரிகின்ற தீயில் விழுந்து இறந்து போகிறாள். ஏன் இப்படி செய்கிறாள் என்றால்,  ஊரில் இருப்பவர்கள் இவளைப் பெண் பார்க்கச் சென்றுதான் அவனுக்கு இந்த நிலைமை என்று பேசுவார்கள். மேலும் இவள் ஒரு ராசி இல்லாதவள் என்றும் இவளை பெண் பார்க்கப் போனால் இப்படித்தான் உயிர்ப்பலி ஏற்படும் என்றும் ஊர் பேசும் என்ற பயத்தில் தீயில் விழுந்து தற்கொலை செய்து கொள்கிறாள். தீயில் விழுந்து எரிந்தவளை ஊரே தெய்வாக வணங்க ஆரம்பித்து விட்டது. எங்களது முன்னோர்களின் கனவில் வந்து, தான் தெய்வமாக மாறிவிட்டதாகவும் நானே காடை குலத்தைக் காக்கும் கடவுள் என்றும் அனைவரும் என்னை வணங்க வேண்டும் என்றும் கூறியதாகவும் அதிலிருந்து காடை குலத்தைச் சார்ந்தவர்கள் குல தெய்வமாக வணங்குகிறோம்.

ஒரே குலத்தைச் சார்ந்தவர்கள் திருமணம் செய்து கொண்டால் தவறா? அப்படி திருமணம் செய்பவர்களை நீங்கள் என்ன செய்வீர்கள்?

ஒரே குலத்தைச் சார்ந்தவர்கள் திருமணம் செய்யக்கூடாது. ஏனென்றால் அவர்கள் அண்ணன் தங்கை உறவு முறையாக இருப்பார்கள். அப்படியும் கட்டுப்பாட்டை மீறித் திருமணம் செய்து கொண்டவர்களை எங்கள் குலத்திலிருந்து விலக்கி எங்களுடைய ஜாதியிலும் நாடோடிக் கூட்டங்களான தொம்பன் குலம் மற்றம் கத்தி முழுங்கும் குலம் அதாவது வீதிகளில் தெருக்களில் கத்தியை முழுங்கி வித்தை காட்டம் கூட்டத்தோடு அனுப்பிவிடுவோம்.

உங்கள் குலக் கட்டுப்பாட்டை உங்களுக்கு யார் கற்றுக் கொடுத்தார்கள்?

எங்களுடைய முன்னோர்கள் கற்றக் கொடுத்தார்கள். அவர்களுக்கு முப்பாட்டன்களும் முப்பாட்டன்களுக்கு முணிவர்களும் குலக்கட்டுப்பாட்டைக் கற்றுக் கொடுத்ததாக சொல்லப்படுகிறது.

வீரமாத்தி அம்மன் உருவ வழிபாட்டைப் பற்றி கூறுங்கள்

எங்கள் முன்னோர்கள் நடுகல் வைத்துத்தான் வணங்கி வந்தனர். எங்கள் தலைமுறையில்தான் நடுகல்லைச் சிலையாக வடிவமைத்து வணங்குகிறோம். இந்தச் சிலையை இதே காடை குலத்தைச் சேர்ந்த கவுண்டர் சமூகத்தைச் சேர்ந்தவரின் கனவில் வந்து அம்மன் முக உருவத்தை செய்து வைக்க வேண்டும். அப்படி செய்தால்தான் உன்னுடைய மாடு, ஆடு எல்லாம் நன்றாக இருக்கும் என்று சொல்லப்பட்டது. அதன் காரணமாக கவுண்டர் சமூகத்தைச் சேர்ந்தவர்கள் 1 ஙூ கிலோ மதிப்பில் வெள்ளியினாலான முக உருவத்தைச் செய்து கொடுத்தார்கள்.

கவுண்டர் சமூகத்தில் காடை குலத்தைச் சேர்ந்தவர்கள் உங்களுடைய தெய்வமான வீரமாத்தியை வழிபடுகிறார்களா?

இல்லை. அவர்கள் குலம் காடை குலமாக இருந்தாலும் அவர்களின் குல தெய்வம் வேறு. பொடாரப்பன், கண்ணியம்மை என்பது அவர்களின் குல தெய்வம். இந்த கோவில் காங்கேயம் அருகே காடையூரில் உள்ளது.

உங்கள் கோவிலை கட்டி எத்தனை ஆண்டுகள் ஆகின்றன? அதற்குன்டான செலவுகளை யார் ஏற்றுக் கொண்டார்கள்?

கோவில் கட்டி 13 வருடமாகிறது. கோவில் செலவுகள் எல்லாம் கோவிலைச் சார்ந்தவர்களின் குடும்பங்களுக்கு மாங்கல்ய வரியாக 2000 ரூபாய் வசூல் செய்யப்பட்டது. அந்தப் பணத்தை வைத்துத்தான் கோவில் கட்டப்பட்டது. கோவில் கட்டுமானச் செலவு, கும்மாபிஷேக செலவு மற்றும் ஐயருக்கு கொடுக்கின்ற பணம் கும்பாபிஷேகம் முடிந்து 48 நாட்கள் நந்த தீபம் எரியும். அந்தக் காலகட்டத்தில் தினமும் பூஜை செய்வதற்கும் ஐயர் அல்லது பண்டாரம் வந்து பூஜை செய்வார். அனைத்துமே வசூல் பணத்தில்தான் நடக்கும்.

கோவில் பணி தொடங்குவதற்கு முன்பு யாரிடமாவது ஆலோசனை செய்தீர்களா? கும்பாபிஷேகம் ஐயரை வைத்து நடத்தினிர்களா? அல்லது உங்கள் சமூகத்தைச் சார்ந்தவர்கள் கும்பாபிஷேகம் செய்தார்களா?

கோவில் பணி தொடங்குவதற்கு முன்பு ஐயரிடம் போய் நல்ல நாள் பார்த்து முடிவு செய்வோம். கட்டுமானப்பணி முடிந்தவுடன் ஐயரை வைத்து கும்பாபிஷேகம் செய்து கலச பூஜை செய்து அம்மனுக்கு கண்திறந்து விடுவார்கள். இதற்கு சுமார் 10,000 ரூபாய் முதல் 20,000 ரூபாய் வரை செலவாகும். 48 நாட்கள் பூஜை நடைபெறும். 48 நாட்கள் நந்த தீபம் எறியும். அனைத்து நாட்களும் ஐயருக்குப் பூஜைக்குப் பணம் கொடுக்க வேண்டும். 48 நாட்கள் முடிந்த பின்புதான் நமது குலத்தைச் சார்ந்தவர்களிடம் பொறுப்பு ஒப்படைக்கப்படும்.

இந்த கோவிலைச் சார்ந்தவர்கள் வெளிநாடுகளில் வசிக்கிறார்களா? வேறு மதங்களில் உள்ளார்களா?

வெளிநாடுகளில் இருக்கிறார்கள். வரி கொடுப்பார்கள். நன்கொடை கொடுப்பார்கள். வெளிநாடுகளிலிருந்து ஊருக்கு வந்தால் கண்டிப்பாக குலதெய்வம் கோவிலுக்கு வருவார்கள்.

அதே போல் கிறிஸ்த்துவ மதத்திற்கு மாறியவர்கள் இருக்கிறார்கள். அவர்கள் கோவில் விசேஷத்தின் போது வரி கொடுப்பார்கள். நாங்கள் அவர்களை வற்புறுத்துவது இல்லை. விருப்பத்தின் பேரில் அவர்களாக கொடுக்கிறார்கள்.

Pin It

தங்களின் குலதெய்வமான சாம்பான் பற்றிய கதையைக் கூறுங்கள்

ஒட்டுமொத்தப் பறையர்களின் குலதெய்வம் சாம்பான். எங்களுடைய குலத்தின் பெயர் சாம்பான் குலம். அதனால் சாமியின் பெயரும் சாம்பான். நான்கு, ஐந்து தலைமுறைக்கு முன்பு இருந்து இக்கோவில் இங்கு உள்ளது. சாம்பான் எங்கள் முதாதையர் என்று மட்டும்தான் தெரியும். வரலாறு தெரியாது. (ஓலைச்சுவடிகள்  இருந்தது பராமரிப்பில்லாமல் செல்லரித்து விட்டன. வீரப்பூரில் இருந்து திருவிழாவிற்கு வரும் பெண்கள் சாம்பான் பற்றிக் கதைப் பாடலைப் பாடுவார்கள்.) அவர் நினைவாக, கற்களை அடுக்கிக் கும்பிட்டு வந்தோம். சிலை மொழுக்கென்று உருவமில்லாமல் இருக்கும். நாங்கள்தான் கோயில் கட்டியிருக்கிறோம்.

சாம்பான் என்ற உங்கள் மூதாதையரை எந்த அடிப்படையில் லிங்கமாக மாற்றினீர்கள்?

கோவில் கட்ட முடிவெடுத்தவுடன் சிவன் கோவில் ஐயரிடம் சென்று “ஆடை அலங்காரம் பண்ணுவதற்கு வசதியில்லாமல் சிலை மொழுக்கென்று (கல்) இருக்கிறது” என்று சொன்னோம். அவர் வந்து பார்த்துவிட்டு, இது சாம்பவமூர்த்தியோட சேர்ந்த சிலை, அதனால் ஏற்கனவே இருக்கும் சிலையைக் குழிதோண்டிப் புதைத்து விட்டு, அதன் மேலேயே சிவலிங்கம் செய்து வைத்துவிடலாம் என்று கூறினார். சரி, இவர் இப்படிச் சொல்கிறார். நாம் வேறு ஐயரைப் பார்க்கலாம் என்று மற்றொரு ஐயரிடம் விசாரித்தோம்.

அவர் “முன்பு சிலை செய்கிற அளவுக்கு வசதி வாய்ப்பு இல்லாத்தால் இப்படி வைத்திருக்கிறார்கள். இப்ப நாகரீகமான காலத்தில் சிற்பங்களைச் செதுக்கி அழகு அழகா வைக்கிறார்கள். அதனால் சிலையை லிங்கமாக வடித்து வைத்தால் கோவில் பிரகாசமாக இருக்கும். ஜாதி நல்லா விருத்தியாகும்” என்று சொன்னார். சாம்பானும், சாம்பசிவ மூர்த்தியும் வேறு வேறு இல்லை, இரண்டும் ஒன்றுதான் என்று சொன்னார். அதற்குப் பிறகு தான் சிவலிங்கம் செய்து நிலைநாட்டி இருக்கிறோம்.

கும்பாபிஷேகம் நடந்துள்ளதா? நடத்தியவர்கள் பார்ப்பனர்களா? இல்லை உங்கள் ஜாதியினரா?

கும்பாபிஷேகம் நடந்து பத்து மாதம்தான் ஆகிறது. ஐயரை அழைத்து யாகசாலை கட்டி, ஓமகுண்டம் வளர்த்து ஓர் இரவு முழுவதும் தங்கி, பரிகாரம் பண்ணிவிட்டுப் போனார்கள். 48 நாள் விளக்குப் போட்டோம். ஆறு, ஏழு ஐயர்கள் வந்திருந்தனர். அரிசி, பணம், தேங்காய் பழம், துணி அனைத்தையும் தட்டில் வைத்துக் கொடுத்தோம். எங்கள் இனத்தைச் சார்ந்த வெளியூரில் வேலை செய்பவர்கள் ஐயருக்கு பட்டு வேட்டி, துண்டு காணிக்கை கொடுத்து வழியனுப்பினார்கள். கும்பாபிஷேகம் எங்கள் இனத்தவர் நடத்தவில்லை.

எத்தனை வருடத்திற்கு ஒரு முறை கும்பாபிஷேகம் நடத்துவீர்கள்?

கும்பாபிஷேகம் முடிந்து ஒரு வருடம் ஆகப் போகிறது. மூன்று வருடங்கள் தொடர்ந்து கும்பாபிஷேகம் பண்ண வேண்டும் என்று ஐயர் சொல்லியிருக்கிறார். அதற்குப் பிறகுதான் திருவிழா நடத்தவேண்டும்னு சொல்லியிருக்காங்க.

சாம்பானைக் கும்பிடும் மக்கள் தொகை எவ்வளவு? வேறு எந்த ஜாதியைச் சார்ந்தவர்கள் கும்பிடுவார்கள்? அல்லது பறையர்களுக்கு மட்டுமான கடவுளா?

சாம்பான் கும்பிடுபவர்கள் சுமார் ஆயிரம் தலைக்கட்டு குடும்பங்கள் கணியூரில் இருக்கிறார்கள். எங்கள் பங்காளிகள் கோயம்புத்தூர், வேட்டைக்காரன்புதூர், பழநி, மானூர், தாராபுரம் கொளிஞ்சவாடி, சுண்டப்பாளையம், மதுரை, சென்னை, திருச்சி என பல ஊர்களில் வசிக்கிறார்கள். பறையர்களிலேயே மற்றவர்கள் எங்களையும் சேர்த்தே குறிப்பார்கள். ஆதியில் இருந்தே நாங்கள் தான் சாம்பான் குலம். ஆனால் எங்களைப் பள்ளு, பறையரோடு சேர்த்துக் கொள்கிறார்கள். எஸ்.சி என்று சொல்லி எல்லோரையும் ஒன்றாக்க் குறிப்பிடுகிறார்கள். ஆனால் நாங்கள் அவர்களைவிட மேம்பட்டவர்கள். எங்களுடைய முறைபாடு வேறு, அவர்களுடைய முறைபாடு வேறு. ஒட்டுமொத்தப் பறையர்களின் குல தெய்வம் சாம்பான்தான்.

பறையர் ஜாதியில் எந்த உட்பிரிவு சாம்பானைக் கும்பிடுவார்கள்? மற்ற உட்பிரிவுக்கும், மற்ற ஜாதியினருக்கும் இக்கோவிலில் எந்த அளவுக்கு உரிமை உள்ளது?

கிழக்கத்து குலம், தாசர் குலம், விருமன் குலம், கருத்தான்குலம், அழகநான் குலம் என இருபதுக்கும் மேற்பட்ட குலங்கள் இருக்கின்றன. அனைவருக்குமே சாம்பான் பொது தெய்வம். மற்ற ஜாதியினர் இக்கோவிலுக்கு வந்து சாமி கும்பிட்டு விட்டுச் செல்லலாம். எந்த உரிமையும் இல்லை.

நீங்கள் எந்த உட்பிரிவுடன் மண உறவுகளை வைக்கிறீர்கள்? அவர்கள் எந்த சாமியைக் கும்பிடுவார்கள்? அதனுடைய பெயர் கதை என்ன?

தாசர் குலத்தைச் சார்ந்தவர்கள் கிழக்கத்த குலம் மற்றும் கருத்தான் குலத்துடன் மண உறவு வைத்துக் கொள்வோம். அவர்களுடன் பொண்ணு கொடுத்து, பொண்ணு எடுத்துக்குவோம். இவ்வாறே விருமன் குலத்துக்காரர்கள், சின்னக்காவை கும்பிடும் இராமர் குலத்துக்காரர்களோடு மணஉறவு வைத்துக் கொள்வோம்.

ஆதியில் கணியூரில் வீரமாத்தியைக் கும்பிடும் விருமன் கூட்டத்தில் திருமண வயதில் பெண்கள் நிறைய இருந்ததாகவும், ஆண்கள் குறைவாக இருந்ததாகவும் - அதனால் கீரனூர் பெரியஆண்டவர் கோவில் சப்பாணியைக் குலதெய்வமாகக் கொண்ட அழகநான் குலத்துக்காரர் களுக்குப் பெண்ணும் கொடுத்து, மண்ணும் கொடுத்து கணியூரில் இருக்க வைத்ததன் நினைவாக விருமன் குலத்து வீரமாத்தி கோவிலில் அழகநான் கூட்டத்துடைய சப்பாணி சிலையை வைத்திருப்பதாகவும் முன்னோர்கள் சொன்னார்கள். அதனால் இந்த இரண்டு குலமும் ஒருத்தர் இல்லாமல் ஒருத்தர் சாமி செய்ய முடியாது.

80, 90 வருடங்களுக்கு முன்பு ஸ்ரீவில்லிபுத்தூரில் இருந்து மண் எடுத்துக் கொண்டு வந்து சிலை செய்திருக்கிறார்கள். வீரமாத்தியின் பூர்வீகம் ஸ்ரீவில்லிபுத்தூர் என்று எங்கள் தாத்தா கூறியிருக்கிறார். தற்போது கோவில் மாற்றம் அடைந்துவிட்டது. வீரமாத்தியோடு வீரப்பனையும் வைத்துக் கும்பிடுகிறார்கள். அதனால் நாங்கள் அங்கிருந்து மண் எடுத்துவந்து வீரப்பன், வீரமாத்தி என்று இரண்டு சிலைகளை வைத்து கும்பிடுகிறோம்.

உங்களது தினசரி வாழ்க்கையில் குலதெய்வத்திற்கும், பூசாரிக்கும் எந்த அளவுக்கு முக்கியத்துவம் கொடுப்பீர்கள்?

பூசாரிக்கு அனைத்து உரிமைகளும் இருக்கு. கோவில் நிர்வாகத்தில் இருந்து வாழ்க்கையில் நடக்கும் நிகழ்வு வரை அனைத்திலும் குலதெய்வத்துக்கும், பூசாரிக்கும் பங்கு இருக்கிறது. குழந்தைகளுக்கு முதல் முடி இறக்குவது, காது குத்துவது, கல்யாணம் போன்றவற்றைக் குலதெய்வக் கோவிலில் பண்ணுவோம். தற்போது பெண் பார்க்கும் நிகழ்ச்சியைக் கூட குலதெய்வக் கோவிலில் வைக்கிறார்கள்.

பூசாரி ஒரே குடும்பத்தினர்தான் பரம்பரையாக பரம்பரையாக வந்துள்ளார்களா? வேறு பிரிவிலிருந்து நியமிப்பிர்களா?

ஒரே குடும்பத்தைச் சார்ந்த பங்காளிகளுக்குள் தான் பரம்பரை, பரம்பரையாகப் பூசாரியை நியமிப்போம். இது முன்னோர் காலத்திலிருந்து நடைமுறையில் இருக்கிறது. வேறு பிரிவில் நியமிக்க மாட்டோம்.

குல தெய்வ கோவில் உள்ள ஊர் அல்லது இடம் எது? கோவிலாக இருந்தால் கட்டிட அமைப்பு எப்படி உள்ளது? பஸ் வசதி உண்டா?

பறையர் குல தெய்வமான சாம்பான் கோவில் ஊருக்குள் சுற்றுச்சுவர் கட்டி, கோபுரத்துடன் காட்சியளிக்கிறது. இக்கோவில் தரை மொசைக் போடப்பட்டுள்ளது. கோபுரத்தில் பார்வதி, துர்க்கை, முருகன், தட்சிணாமூர்த்தி லிங்கேஸ்வரன் சிலைகளும் கோவிலுக்கு உள்ளே சிவலிங்கமும் வைத்து இருக்கிறார்கள். இக்கோவிலைக் கட்டுவதற்கு அரசாங்கப் பதவியில் உள்ள எங்கள் ஆட்கள் ஒவ்வொருவரும் நன்கொடையாக பத்தாயிரம், இருபதாயிரம் என்கிற ரீதியில் கொடுத்து உதவினார்கள்.

இராமர் குல தெய்வமான சின்னக்கா நடுத்தெருவிலும், மற்றொரு குலதெய்வமான வீரமாத்தி ஊருக்கு ஒதுக்குப் புறமாக ஆற்றோரத்தில் இருக்கிறது. சுற்றுச்சுவர் இருக்கிறது. காண்கிரிட் போட்டிருக்கிறோம், கோபுரம் கிடையாது. சிலை வைத்திருக்கிறோம். கடத்தூரில் இருந்து பஸ் இருக்கிறது. வாய்க்கால் பஸ் ஸ்டாப். அதற்கும் அருகில் கோவில் உள்ளது. இராமர் குலத்து தெய்வமான சின்னக்கா சிறிய அளவில் தான் இருக்கிறது. அந்தக் காலத்தில் கட்டியது. மிகவும் பழுதடைந்து விட்டது. அக்கோவிலைக் கட்ட தற்போது ஒரு குடும்பத்திற்கு ஐயாயிரம் (5000) வீதம் வசூலித்துக் கொண்டிருக்கிறோம். இராமர் குலத்துக்காரர்களிடம் மட்டுமே பணம் வசூலிக்கப்படும்.

கோவிலுக்கு என்ன என்ன காணிக்கைகள் செலுத்துவார்கள்? திருவிழாவிற்கு எவ்வளவு செலவாகும்? அந்த செலவை எப்படி சமாளிப்பீர்கள்?

காணிக்கை பெரிசா ஒண்ணும் கிடையாதுங்க. பூசாரியின் தட்டிலும், உண்டியலிலும் காசு, பணம் போடுவார்கள். அவ்வளவு தான். திருவிழா நடத்துவதற்கு ஒரு இலட்ச ரூபாய்க்கு மேல் ஆகும். மொத்தச் செலவையும் கணக்கிட்டு மாங்கல்ய வரி (தலக்கட்டு வரி) என்ற பெயரில் ஒரு குடும்பத்திற்கு ஐந்நூறு, ஆயிரம் என்று போடுவோம். சென்ற வருடம் நாங்கள் விதித்த வரி ஒரு குடும்பத்திற்கு 1200 ரூபாய். இது இல்லாமல் ஊருக்குள் இருக்கும் மற்ற ஜாதியினர் கொடுப்பதையும் ஏற்றுக் கொள்வோம்.

இம்மக்கள் எவ்வளவு வரைக்கும் படிக்கிறார்கள்? வேலைவாய்ப்பு எப்படி உள்ளது? முதலில் இருந்ததற்கும் தற்போதைக்கும் என்னவிதமான வேறுபாடு?

நாங்கள் பெரும்பாலும் விவசாயக் கூலிகள். ஒன்றிரண்டு பேர் விவசாயம் செய்கிறார்கள். ஆனால் எங்கள் பிள்ளைகளைப் படிக்க வைத்திருக்கிறோம். அன்றைக்கு ஒரு சிலேட்டு பலகை கூட வாங்க முடியாத சூழ்நிலை இருந்ததால் நாங்கள் படிப்பை விட்டோம். அன்று அக்கம் பக்கம் கடன் கேட்டால் கூட கொடுப்பதற்குக் காசு இருக்காது. காசு பழக்கம், நாணயம் மிக குறைவு. (ஓட்டைக்காசு, குதிரைக்காசு, ரவுண்ட்காசு, ஒரணா, ரெண்டனா தான்  இருக்கும்) அனால் இன்று சின்னப் பையனிடம் கூட 100 ரூபாய் நோட்டு புழங்குகிறது. கடன் வாங்கியாவது படிக்க வைக்கின்றோம். அன்று கல்வியறிவு இல்லாததால் பொருளாதாரத்தில் பின்தங்கியிருந்தோம். இன்று கல்வி கற்றதால் பொருளாதாரம் மேம்பட்டிருக்கிறது.

சமூக அந்தஸ்த்து எந்த அளவில் உள்ளது?

முன்னோர் காலத்தைவிட எவ்வளவோ பரவாயில்லை. முன்னோர் காலத்தில் வீட்டுக்குள் விட மாட்டார்கள். பொதுக் கோவிலான மாரியம்மன் கோவிலுக்கு உள்ளே விடமாட்டார்கள். முளைப்பாரி, மாவிலக்கு, பூவோடு எடுத்துச் சென்றால் கோவிலுக்கு வெளியே நிறுத்தி அனுப்பி விடுவார்கள்.

1972 ம் ஆண்டு கோவிலுக்கு உள்ளே அனுமதிக்க வேண்டும் என்று வழக்குப் போட்டு வாதாடி ஜெயித்து, கோவிலுக்குள் சென்றோம். தற்போது கோவிலுக்கு உள்ளே சென்று தீர்த்தம் ஊற்றுகிறோம். கர்ப்பக்கிரகத்தைத் தவிர்த்து கோவிலின் அனைத்துப் பகுதிகளுக்கும் போகிறோம். எந்தவிதமான பாகுபாடும் கிடையாது. நாங்கள் உள்ளே நுழைவதை ஆட்சேபித்த பெரியவர்கள் இறந்துவிட்டார்கள். தற்போது உள்ளவர்கள் கொஞ்சம் மாறியிருப்பதால் கோயிலுக்குள் செல்ல எந்த ஆட்சேபணையும் இல்லை. (இவர்கள் குறிப்பிடும் கோவில் சித்திரை மாதம் சாட்டப்படும் ஊர்ப் பொதுக் கோவிலான மாரியம்மன் கோவில்)

கோவில்களில் பெண்களின் உரிமைகள், பங்கு என்ன? பூசாரிகளாக இருக்கிறார்களா?

கோவிலில் பெண்களுக்கு ஒரு உரிமையும் இல்லை. கோவில் நிர்வாகத்தில்  அனைத்து முடிவுகளையும் ஆண்கள் தான் எடுப்போம். பெண்கள் கருத்தைக் கேட்க மாட்டோம். ஏதோ 100க்கு 2 பேர் வந்து வேடிக்கை பார்ப்பார்கள். அவ்வளவுதான். நாங்கள் தடங் காட்டுவதை பெண்கள் செய்வார்கள். முளைப்பாரி எடுக்கிறது, மாவிளக்கு எடுக்கிறது, பால்குடம் கொண்டு வருவது போன்ற சடங்குகளைச் செய்வார்கள். பெண்களைப் பூசாரிகளாக நியமிக்க மாட்டோம். பெண்தெய்வம் இருக்கும் கோவிலுக்கும் ஆண்தான் பூசாரி. பெண்கள் சாமி கும்பிட்டுவிட்டுப் போகலாம்.

கல்யாணத்திற்குப் பின் தந்தையின் குல தெய்வத்தை வணங்குவார்களா? கணவனின் குலதெய்வத்தை வணங்குவார்களா? தலக்கட்டுவரி எந்தக் குடும்பம் சார்பில் வசூலிக்கப்படும்?

கல்யாணத்திற்குப் பின் கணவரின் குலதெய்வத்தையே வணங்குவார்கள். கணவர் குலதெய்வம் சார்பில் தான் கட்டாயமாக தலக்கட்டுவரி வசூலிக்கப்படும். பிறந்தவீட்டுக் குலதெய்வத்திற்கு அக்குலத்தில் பிறந்த பெண்கள் ஒன்ற சேர்ந்து (பெண் பிறந்த மகள்கள்) பணம் சேர்த்து ஒரு சீட்டு மாதிரி போட்டு கோவில் செலவுகளுக்குப் பணம் கொடுப்பார்கள். அதோடு இல்லாமல் தந்தையின் குலதெய்வத்திற்கு ஆண்களுக்கு 1000 ரூபாய் தலக்கட்டு வரி போட்டால் திருமணமாகிப்போன பெண்ணுக்கு 500 ரூபாய் போடுவோம். அவர்களும் விருப்பப்பட்டுக் கொடுப்பார்கள்.

குலதெய்வக் கோவில்களில் பிற்படுத்தப்பட்ட அல்லது பிற தாழ்த்தப்பட்ட மக்களிடம் வரி வாங்கப்படுகிறதா?

சாம்பான் சாமிக்கு ஒட்டுமொத்த பறையர்களிடம் வரி வசூல் செய்வோம். பிற்படுத்தப்பட்ட அல்லது தாழ்த்தப்பட்ட மக்களிடம் வரி வசூலிக்க மாட்டோம். நன்கொடையாகக் கொடுத்தால் வாங்கிக் கொள்வோம். சின்னக்கா மற்றும் வீரமாத்தி சாமிக்கு அந்தந்த குலத்துக்காரர்களிடம் மட்டும் வரி வசூல் செய்வோம். மற்றவர்களிடம் வாங்கமாட்டோம்.

குலதெய்வக் கோவில் விழா தொடங்குவது முதல் முடியும் வரை என்னென்ன செய்வீர்கள்?

வருடம் ஒரு தரம் ஆடம்பரமாக, விமரிசையாகக் கொண்டாடுவோம். பறையர் குலத்திற்கு அடிப்படையாக இருக்கும் இராமையாக்கவுண்டன் புதூரில் இருக்கும் அரண்மனைக்குச் சென்று சாமி கும்பிடுவோம். அவர்கள் தீர்த்தம், திருநீறு, பச்சரிசி, கிடாய் அனைத்தும் கொடுப்பார்கள். அதை வாங்கிக்கொண்டு வந்து தீர்த்தம், திருநிறு போட்டுத்தான் சாம்பான் கோவிலே சாமி சாட்டுவோம்.

திருவிழா நடப்பதற்கு ஒரு வாரம் முன்பே விளம்பரம் கொடுத்துவிடுவோம். எட்டு நாள் சாட்டு, அனைவரும் சுத்தபத்தமாக இருந்து விழாவை நடத்திக் கொடுக்கணும்னு கேட்டுக்குவோம். செவ்வாய்க்கிழமை சாட்டு. அனைவரும் வந்து கொடிநட்டு, தண்ணீர் ஊற்றி, சாமி கும்பிடுவோம். முளைப்பாரி மற்றும் மாவிளக்கு எடுத்துக்கொண்டு வந்து ஆடல், பாடல் நிகழ்ச்சிகளுடன் விழாவை நிறைவு செய்வோம். சப்பரத்தில் சாமியை வைத்து எங்கள் குடியிருப்புப் பகுதிகளில் வலம் வந்து நிறுத்தி விடுவோம்.

சின்னக்கா, வீரமாத்தி கோவில்களில் சாட்டெல்லாம் கிடையாது. இக்கோவில்களின் பேழை (பெட்டி) சிவசம்பூகன் கோவிலில் இருக்கிறது. வருடத்திற்கு ஒரு தரம் ஆடி பதினெட்டு அன்று பேழைகளைக் கொண்டு போய் அதிலிருக்கும் கத்தி, அருவாள் போன்றவற்றை ஆற்றில் கழுவி எடுத்துக்கிட்டு வந்து, இக்கோவிலில் வைப்போம். பறையர் குலத்தில் மட்டும் வீட்டுக்கு 100 ரூபாய் வீதம் வசூலித்து, அன்று அனைவரும் சாப்பாடு செய்து போடுவோம். கிடாய் வெட்டுவார்கள். அன்று ஒரு நாள் மட்டும் விஷேசம் நடைபெறும்.  

Pin It

குலங்கள் மற்றும் அதன் அமைப்பு முறைகள்

கொங்கு வேளாளக் கவுண்டர்கள் தங்கள் குலங்களை, பேச்சு வழக்கில் கூட்டங்கள் எனக் குறிப்பிடுகிறார்கள். மொத்தம் 125 க்கும் மேற்பட்ட கூட்டங்கள் நடைமுறையில் உள்ளன. ஒவ்வொரு குலங்களுக்கும் தனித்தனியாக குலதெய்வங்கள் உள்ளன. ஒரே குலங்களைச் சார்ந்தவர்கள் தங்களுக்குள் பங்காளிகள் என அழைத்துக் கொள்கிறார்கள். நகரமயமாகாத கிராமங்களில் குறிப்பிட்ட பகுதிகளில் குறைந்தது 25 முதல் 50 குடும்பங்கள் வரை வாழ்கிறார்கள். ஆனாலும் மாவட்டங்கள் மாறி வெவ்வேறு பகுதிகளில் வாழ்ந்தாலும் இவர்களுக்குள் மணஉறவு வைத்துக் கொள்வதில்லை. திருமணப் பதிவு நிலையங்களில் மிக முக்கியமாகக் கூட்டம் (குலம்) எதுவெனக் குறிப்பிட வேண்டும்.

ஒரு குறிப்பிட்ட பகுதியில் வாழும் குலத்தினர், அவர்கள் வீடுகளில் நடைபெறும் துக்க நிகழ்வில் நிச்சயமாகப் பங்கேற்க வேண்டும். சடங்குகளை அவர்களே முன் நின்று நடத்துவார்கள். துக்கச் சடங்குகள் நடத்துபவர்கள் குறைந்தபட்சம் 16 நாட்களுக்கு திருமணம், கோவில் நிகழ்வுகள் ஆகியவற்றில் பங்கேற்க மாட்டார்கள்.

முழுக் காதன் குல வரலாறு

காங்கேயம் அருகே உள்ள காடையூரில் உள்ள காடேஸ்வரர் கோவிலில் உள்ளது. அக்கோவிலின் பிரகாரத்தில் முழுக்காதன் குல வரலாறு பதிவு செய்யப்பட்டுள்ளது. அக்கதையைப் பாருங்கள்.

தமிழ்நாட்டில் கொங்குநாட்டுப் பகுதியில் உள்ள காங்கயம் என்ற ஊருக்கு அருகில் உள்ள ஒரு கிராமத்தில் ஒரு பெரும் விவசாயிக்கு நான்கு மகன்களும் ஒரு பெண்ணும் பிறந்தார்கள். பெண் குழந்தை பிறவியிலேயே வெளுத்திருந்தாள். அவளை வெள்ளையம்மாள் என்று பெயரிட்டு அழைத்தார்கள். பெண் வளர்ந்து கல்யாணம் செய்யும் வயதை நெருங்கினாள். விவசாயியும் அவர் மனைவியும் பெண்ணின் திருமணத்தை நினைத்துக் கவலைப்பட்டார்கள்.

அவர் பண்ணையிலே மாடு மேய்க்க, தூர தேசத்திலிருந்து ஒரு வாலிபன் வந்து வேலைக்குச் சேந்தான். அவனும் அவர்கள் சாதியைச் சேந்தவன் தான். ஆனால் ஏழை. வெள்ளையம்மாளின் அய்யன் (தந்தை) அந்த மாடு மேய்ப்பவனுக்கே தம் பெண்ணைத் திருமணம் செய்து வைக்க முடிவு செய்தார். நினைத்த உடனேயே அவர் பையனுடைய ஊருக்குச் சென்று அவன் பெற்றோரிடம் பேசி சம்மதிக்க வைத்தார். திருமணமும் நடந்தது. வெள்ளையம்மாள் மூன்று குழந்தைகளுக்குத் தாயானாள். பின்னர் வெள்ளயம்மாளின் அண்ணன்மார்களுக்கும் திருமணம் நடந்தது. அனைவரும் ஒன்றாக கூட்டுக் குடும்பமாக வாழ்ந்தனர்.

வெள்ளையம்மாளின் தந்தையின் இறுதிக் காலம் நெருங்கியது. அப்போது அவர் தம் பிள்ளைகளைக் அழைத்து வெள்ளையம்மாளுக்கு ஒரு காணி நிலம் கொடுக்கச் சொல்லி விட்டு இறந்தார். ஆனால் வெள்ளையம்மாளின் அண்ணன்கள் அவளது கணவனை வஞ்சகமாகக் கொன்றுவிட்டு அவளை வீட்டை விட்டுத் துரத்தி விட்டனர்.

கர்ப்பிணியாக இருந்த வெள்ளையம்மாள் தன் மூன்று குழந்தைகளையும் கூட்டிக்கொண்டு எங்கு போவது என்று தெரியாமல் மனம்போன போக்கில் சென்றாள். அப்போது ஒரு சர்தார் (அந்நாளைய முஸ்லிம் அரசாங்க உயர் அதிகாரி) குதிரையில் அமர்ந்து வருவதைக் கண்டு அஞ்சி புதரில் ஒதுங்கினாள்.

சர்தார் அவளைப் பார்த்தவுடன் நின்று விசாரித்து அவள் அனாதை நிலையைக் கண்டு இரக்கம் கொண்டார். “நான் வரி வசூலுக்காக அவசரமாகச் சென்று கொண்டிருக்கிறேன். திரும்பி வந்ததும் உன்னுடைய கஷ்டத்தைத் தீர்த்து வைக்கிறேன். அதுவரை பக்கத்தில இருக்கும் கோட்டையில் பத்திரமாக இரு” என்று ஆறுதல் சொல்லி, அவளைக் கோட்டையில் தங்க ஏற்பாடு செய்து வரி வசூலிக்கச் சென்றார்.

பல மாதங்கள் கழிந்தன. வெள்ளையம்மாளுக்குக் குழந்தை பிறந்தது. திரும்பிய சர்தார் வெள்ளையம்மாளை அவளது ஊருக்கு அழைத்துச் சென்றார். வெள்ளையம்மாளின் அண்ணிகள் அவளை அவதூறாகப் பேசினர். அவள் ஒரு விபச்சாரி என்று ஏசினர். வெள்ளையம்மாள் சாதி கெட்டு விட்டதால் அவளுக்கு நிலம் தர அவளது அண்ணன்மார்கள் மறுத்தனர்.

இதைக்கேட்ட வெள்ளையம்மாள் தான் கடவுள் சாட்சியா எந்தத் தவறும் செய்ய வில்லை. இதை எங்கே வேண்டுமென்றாலும் சத்தியம் செய்வேன் என்று சொன்னாள். அவளது அண்ணன்கள் வெள்ளையம்மாள் மூன்று சத்தியங்கள் செய்தால் நாங்கள் எங்கள் நிலம் எல்லாவற்றையும் வெள்ளையம்மாளுக்கே கொடுத்துவிடுகிறோம். அப்படிச் செய்யாவிட்டால் இவள் தீக்குளிக்க வேண்டும் என்று கூறினர். அந்த சத்தியங்கள் என்னவென்றால்,

காளமாட்டை ஏரிலோ அல்லது வண்டியிலோ பூட்டுவதற்கு வெடத்தலா மரத்தில் நுகத்தடி செய்து வைத்திருப்பர். இது நன்றாக முற்றிய மரமாகவும், காய்ந்த மரமாகவும் இருக்கும். அந்த நுகத்தடியை மண்ணில் நட்டுத் தண்ணீர் ஊற்றினால் அது துளிர் விடவேண்டும்.

அந்த ஊர்க்கோவிலில் நிறுத்தியிருக்கும் மண் குதிரைக்குத் தண்ணீர் தெளித்தால் அது தலையைக் குலுக்கி கணைக்க வேண்டும்.

இதற்குத் தேவையான தண்ணீரைச் சுடாத பச்சை மண் குடத்தில் எடுத்து வரவேண்டும். அப்போது அந்த மண்குடம் கரையாமல் இருக்க வேண்டும்.

இதைக்கேட்ட சர்தார், வெள்ளையம்மாளிடம் இவர்கள் உன்னைக் கொல்லப் பார்க்கிறார்கள். நீ இதற்கு ஒப்புக்கொள்ளாதே என்று கூறினார். ஆனால் வெள்ளையம்மாளோ, நான் பதிவிரதை, நான் இந்தச் சத்தியங்களைச் செய்வேன் என்று கூறினாள். அவ்வாறே செய்தும் காட்டினாள்.

வெள்ளையம்மாளின் அண்ணன்மார்கள் நால்வரும் சர்தாரிடம் வந்து எங்கள் சொத்து அனைத்தையும் வெள்ளையம்மாளுக்கே கொடுத்து விடுகிறோம் என்று சொல்லி ஊரை விட்டுச் சென்றனர். சர்தாரும் வெள்ளையம்மாளுக்கு வாழ்த்து சொல்லிட்டு தன் ஊருக்குப் போனார். வெள்ளையம்மாளின் கணவரின் குலமே முழுக்காதன் குலம் அவரின் அப்பா சேடர் குலம்

இப்போதும் அக்கோவிலில் உள்ள வெடத்தலா மரம், வெள்ளையம்மாள் நட்ட மரம் தான் என நம்பப்படுகிறது. சர்தார் வெள்ளையம்மாவை காப்பாற்றியதால் முழுக்காதன் குலத்தார் இசுலாமியர்களை மாமா என அழைப்பார்கள். இப்போது அப்பழக்கம் வழக்கொழிந்து விட்டது...

பெரும்பாலான கவுண்டர் சமூகத்தினரின் குலதெய்வங்களில் முதன்மை கோவில்கள் பெரும்பாலும் ஈசுவரன் கோவில்களாகவும் கிளைக்கோவில்கள் அம்மன் கோவில்களாகவும் உள்ளன.  இவற்றில் கும்பாபிஷேகம் என்றால் அவை பார்ப்பனர்களை வைத்தே நடத்தப்படுகின்றன.

மாங்கல்ய வரி

இதில் முக்கியமாக ஆணின் குலம் இறுதிவரை மாறாது. ஆனால் பெண் திருமணத்திற்குப் பிறகு கணவனின் குலமாகவே கருதப்படுவார். குலதெய்வவரி வசூலிப்பதுகூட வீட்டில் உள்ள திருமணமான பெண்களின் எண்ணிக்கை அடிப்படையிலேயே உள்ளது. இதை மாங்கல்ய வரி என்பார்கள் ஒரு வீட்டில் மாமியார், மருமகள் இருவரும் கணவனை இழக்காமல் இருந்தால் இரண்டு வரி ஒரு பெண்னின் கணவர் இறந்திருந்தால் வரி இல்லை.

குலதெய்வக் கோவில்

பொதுவாகவே கொங்கு வேளாளக் கவுண்டர் சமுகத்தைச் சார்ந்தவர்களின் குலதெய்வக் கோவில்கள்  பெருந்துறை, காங்கேயம் மற்றும் அதன் சுற்றுவட்டாரப் பகுதிகளிலேயே அதிகம் காணப்படுகிறது. ஆனால் கோவை மாநகரம் மற்றும் அதைச் சுற்றி வாழ்பவர்கள் தாங்கள் அதிகம் வாழும் பகுதிகளில் கிளைக்கோவில்களை உருவாக்கி அதையே தங்கள் குல தெய்வக் கோவில்களாக ஏற்றுக் கொண்டுள்ளனர். ஒவ்வொரு குலத்தினரும் தங்கள் குல தெய்வக் கோவில்கள் 2 அல்லது அதற்கு மேற்பட்ட இடங்களில் வைத்து இருக்கிறார்கள். சில இடங்களில் கடவுள்களே கூட மாறி மாறி இருக்கிறது.

கடந்த பத்து ஆண்டுகளில் கோவை மற்றும் அதன் சுற்று வட்டாரப் பகுதிகளில் ஏற்பட்ட நில மதிப்பு உயர்வு காரணமாக உயர்ந்த பொருளாதாரச் சூழலால் பல்வேறு கோவில்கள் புதுப்பிக்கப் பட்டன. கிளைக்கோவில்கள் புதுப்பித்தலில் அந்தந்தப் பகுதிகளில் வாழும் அச்சமுதாயத்தைச் சேர்ந்த அரசியல்கட்சிப் பொறுப்பாளர்கள், ஊராட்சி மன்றத் தலைவர்கள் முன்னிலை வகித்தனர்.

மாற்றியமைக்கப்பட்ட கோவில்களில் முழுமையாக வாஸ்து பார்க்கப்பட்டது. குடமுழுக்கு சில இடங்களில் தமிழ் முறைப்படியும், சில இடங்களில் பார்ப்பனர்களாலும் நடத்தப்பட்டது. மிக முக்கியமாக புதுப்பிக்கப்பட்ட குலதெய்வக் கோவில்களில் முழுமுதற் கடவுள் என்ற பெயரில் விநாயகர் சிலை வைக்கப்பட்டுள்ளது. குலதெய்வக் கோவில் கட்ட குறிப்பிட்ட குலத்தாரிடம் மட்டும் வசூலிப்பது என்பது போய், குறிப்பிட்ட கோவில்கள் அமைந்துள்ள ஊரில் நிறுவனம் நடத்தும் வெளியூர் ஆட்களிடமும் வசூல் செய்யப்படுகிறது.

சடங்குகள்

கொங்கு வேளாளர் குடும்பங்களின் திருமணங்களில் முதல் நாள் முகூர்த்தக்கால் நடுவது என்ற சடங்கு அதே சமூகத்தைச் சேர்ந்த அருமைக்காரர் (சீர்க்காரர் எனவும் சொல்கிறார்கள்) என்பவர்களால் நடத்தப்படுகிறது இதில் சலவை தொழிலாளர் விளக்குப் பிடிக்கவும், அருந்ததியர் செருப்பு மாட்டவும் பயன்படுத்தப்படுகிறார்கள். முகூர்த்தம் எனும் தாலி கட்டும் நிகழ்வில் பார்ப்பனர்கள் வருகிறார்கள். இறப்பு நிகழ்வுகளில் பெரும்பாலான சடங்குகள் பங்காளிகள் எனப்படும் ஒரே குலத்தினரால் செய்யப்படுகிறது.

Pin It

உங்களுடைய குல தெய்வம் என்ன?

எங்களுடைய குலதெய்வம் தில்லாளம்மன் அல்லது தில்லையம்மன். தில்லை யம்மன் என்பது தில்லையில் இருக்கக்கூடிய  அம்மன். சிவபெருமானுடைய மனைவி என்பதனால் தில்லைஅம்மன் என்று பெயர் வந்தது. தில்லாளம்மன் என்பது அதனுடைய மறுபெயர்தான். தில்லையம்மன், தில்லாளம்மன், பார்வதி, பகவதியம்மன், காமாட்சி அம்மன் எல்லாம் பார்வதியைக் குறிக்கக்கூடிய பெயர்கள்.

கும்பம்பட்டியில் இருக்கக்கூடிய தில்லைஅம்மன் என்பது பார்வதியைக் குறிக்கக் கூடியது. அதை நாங்கள் குலதெய்வமாக வைத்துக் கொண்டோம். காவல் தெய்வமாகிய கருப்பசாமியையும் குலதெய்வமாக வைத்துக் கொண்டோம்.

தில்லாளம்மன் கோவிலின் கதை என்ன?

பல கதை இருக்கு. எங்களுக்குத் தெரிந்ததைச் சொல்றோம். எங்களுடைய பங்காளிகள் அரியலூர் பக்கத்துல, பெரம்பலூர் பக்கத்தில் அன்றைய திருச்சி மாவட்டம் கல்பாடி என்ற ஊரில் தங்கியிருந்து சிவனை வழிபட்டவர்கள். ஒரு காலத்தில் கடல் கொந்தளிப்பு ஏற்பட்ட நேரத்தில் அந்த இடத்தை விட்டு நீரலையால் ஏற்படக்கூடிய ஆபத்திலிருந்து தப்பிப்பிழைக்க வேண்டும் என்பதால் குடி பெயர்ந்து கல்பாடி பகுதியிலிருந்து துறையூர் வந்து தங்கினார்கள்.

திருச்சி மாவட்டம் துறையூரில் இருந்த போது எங்களுடைய பங்காளியில் ஒருவர் தொட்டிய நாயக்கர் பெண்ணை தொட்டதனால் அந்த ஊரில் வாழமுடியவில்லை. ஆகையால் காவிரிக் கரையைத் தாண்டிப் புறப்பட்டார்கள். காவிரிக் கரையின் தெற்கே வந்த போது துறையூரில் இருந்து தொட்டிய நாயக்கர்கள் விரட்டி வந்து பிடித்த போது, இந்தப் பெண்ணை புதைத்து வைத்து விட்டுத் தப்பி வந்தார்கள். அந்தப் பெண்ணுடைய ஆவி தங்களைத் தொடர்ந்து வந்ததாக நினைத்து தொட்டிச்சி அம்மனுக்கு ஒரு சிலையும் வைத்து அதை தெய்வமாக வணங்குகிறார்கள்.

கல்பாடியில் இருந்த காவல் தெய்வமாகிய கருப்பசாமியை பிடிமண் பிடித்தக் கொண்டு வந்து கும்பம்பட்டியில் வைத்து, குடகனாற்றுக் கரையில் வைத்து அதைக் குலதெய்வமாக வைத்துக் கொண்டனர்.

கும்மம்பட்டியில் எத்தனை கோவில்கள் உள்ளன?

எங்களுடைய பங்காளிகள் என்று ஒரு பகுதி கல்பாடியில் இருந்து பிரிந்து வந்தவர்களின் குலதெய்வம் தில்லாளம்மன். அந்தத் தெய்வம் தவிர, அங்காள பரமேஸ்வரி, காமாட்சி அம்மன் கும்பிடுபவர்களும் இந்த ஊரில் இருக்கிறார்கள். அவர்கள் எங்களுக்கு மாமன், மச்சான் முறையில் வருவார்கள். அந்தச் சாமியைக் கும்பிடுபவர்களில் நாங்கள் பெண் கொடுத்துப் பெண் எடுப்போம்.

குலதெய்வக் கோவில் கும்பிடு நடத்தவேண்டும் என்று யார் முடிவு செய்வார்கள்?

பூசாரி, பெரியதனம், சேர்வை ஆகியோர் முடிவுசெய்து, நாலு ஊருக்கு ஆள்விட்டு இந்தக் கோவிலில் கலந்து பேசுவோம். தீத்தாம்பட்டி, அனுமந்தராயன்கோட்டை, மேட்டுப்பட்டி, வக்கம்பட்டி ஆகிய கிராமங்களில் வசிக்கும் வன்னியர்களில் எங்கள்குல பங்காளிகளுக்கு அழைப்புக் கொடுத்து, இங்க, கோயிலுக்கு வரச் சொல்வோம். அவர்களைக் கலந்துபேசி மாசி மாசத்துல ஒரு நாளைக் குறிப்போம்..

குறித்த நாளில், ஊரில் உள்ள தில்லாளம்மன் கோவிலில் தேங்காய், பழம் வைத்து பூஜை செய்து சாமிசாட்டுவோம். 1 வாரம் கழித்து, ஆத்தங்கரையில் இருக்கும் இந்தக் கருப்புச்சாமி கோயிலில் கெடா வெட்டிப் பொங்கல் வைப்போம்.

நான்கு ஊர் கூடி சாமிகும்பிட வேண்டும் என்ற முடிவு செய்கிறீர்கள். இந்த முடிவு எடுக்கும் கூட்டத்தில், பெண்கள் அதாவது, பிறந்த மக்களோ அல்லது திருமணம் மூலமா உங்க குடும்பங்களுக்கு வந்த பெண்களோ அதில் கலந்துகொள்வார்களா?

இல்ல. பெண்கள் யாரும் அதில் கலந்துகொள்ள மாட்டார்கள். ஆம்பளைக மட்டும் தான் முடிவு செய்வோம்.

இதற்கு யார் யாரிடம் தலைக்கட்டுவரி வாங்குவீர்கள்?

தில்லாளம்மன் கும்பிடுபவர்களிடம் மட்டும் வரி வாங்குவோம். வன்னியர்களிலேயே மற்ற குலத்தவர்களிடம் வரி வாங்குவதில்லை. நன்கொடை மட்டும் வாங்குவோம். சேரி மக்களிடம் வரியோ, நன்கொடையோ வாங்குவதே இல்லை. எங்கள் குலத்தில் மட்டுமே வாங்குவோம். எங்கள் குடும்பத்தில் பிறந்த பெண்களிடம் தலைக்கட்டு வரி பாதியாக வாங்குவோம். ஆண்களுக்கு முழு வரி வாங்குவோம்.

விழா எப்படி நடக்கும் என்று விளக்கமாகக் கூறுங்கள்

ஊரில் உள்ள தில்லாளம்மன் கோவிலில் இருந்து, ஆற்றங்கரையில் இருக்கும் கருப்புச்சாமி கோவில் வரை ( 1 கி.மீ) தூரத்திற்கு முழுவதும் லைட்டுகள் கட்டப்படும். மைக் செட் வைப்போம்.

மாலை 6 மணிக்கு ஊரில் இருந்து கெடா, பொங்கப் பானையோடு ஊர்வலம் புறப்படும். இரவு 10 மணிக்குத்தான் கருப்புச்சாமி கோவிலுக்கு வருவோம். இரவு 12 மணியைப்போல பொங்கல் வைத்து முடிப்போம்.

நைட் 2 மணிக்குக் கெடா வெட்டு நடக்கும். படைக்கும் பூசாரியாக இருப்பவர், பொங்கலையும், கெடாயின் இரத்தத்தையும் கலந்து தாம்பாளத் தட்டில் என்னிடம் (ஆடும் பூசாரியிடம்) கொடுப்பார். நான் கருப்புச்சாமிக்கு அதைக் கொண்டு போவேன். நைட் 2 மணிக்கு எல்லா லைட்டுகளையும் நிறுத்திவிடுவார்கள். லைட்ட பூரா ஆஃப் பண்ணிப்புட்டு, கோயிலச் சுத்தி வந்து, தனியா நடந்து போவேன். இரத்தம் கலந்த அந்தப் பொங்கல், அந்தத் தாம்பாளத் தட்டோட அப்படியே காணாமப் போயிரும். கருப்பச்சாமி எடுத்துக்கும். அந்தத் தட்டக்கூட யாரும் பாக்க முடியாது. காலைல வந்து வெளிச்சத்துல பாத்தாலும் அந்தத் தட்டு யார் கண்ணுக்கும் சிக்காது.

இந்தக் கோவிலுக்குப் பூசாரிகளாக யார் வருவார்கள்? அதை எப்படி முடிவு செய்வீர்கள்?

பரம்பரை பரம்பரையாக எங்கள் குலத்தில், எங்கள் குடும்பத்தைச் சேர்ந்தவர்கள் தான் பூசாரியாக வருவார்கள்.

உங்க குடும்பத்தில் ஆண்வாரிசு இல்லாவிட்டால் என்ன செய்வீர்கள்? பெண்களைப் பூசாரியாகத் தேர்ந்தெடுப்பீர்களா?

எங்கள் குடும்பத்தில் ஆண்வாரிசு இல்லாவிட்டால் பங்காளிகளின் குடும்பத் திலிருந்து பூசாரியைத் தேர்ந்தெடுப்போம். பெண்கள் பூசாரியாக வரவே முடியாது.

உங்க வாழ்க்கையில் குலசாமிக்கு எந்த அளவுக்கு முக்கியத்துவம் கொடுப்பீங்க?

நேத்திக்கடன் வைத்தவர்களும், குழந்தைகளுக்கு முதல்முடி எடுக்கவும், காது குத்தவும் இந்தக் கோவிலுக்குத்தான் வருவாங்க. கல்யாணம்னா முதல் பத்திரிக்கை ஊரில் உள்ள தில்லாளம்மன் கோவிலில் தான் வைப்பார்கள். குலசாமி என்ன என்பதை வைத்துத்தான் கல்யாணமே நிச்சயம் பண்ணுவாங்க.

இந்தக் கோவில் கும்பிடும் போது தாழ்த்தப்பட்ட மக்கள் கும்பிட வருவார்களா?

இந்தக் குலதெய்வம் சாமி சாட்டும் நாள்ல இருந்து சாமிகும்பிடு முடியுற வரைக்கும் காலனில இருக்க சேரிச்சனங்க, ஊருக்குள்ளயே வரமாட்டாங்க.

கும்பாபிஷேகம் நடக்கும் போது யார் வருவார்கள்?

கும்பாபிஷேகம் நடத்துவதற்கு திண்டுக்கல் அபிராமி அம்மன் கோவிலில் இருந்து ஐயர்கள் வருவார்கள். நாங்கள் கும்பாபிஷேகம் பண்ணினால் அது நிறைவு இல்லை என்று ஐயர்கள் சொல்கிறார்கள். 

Pin It