அவைகளோடு நானும்...

உன் வீட்டு எதிரில் நின்றுகொண்டு
உனைப் பற்றி
வெளிச்சமாய் பாடிக்கொண்டிருக்கும்
அந்தத் தெருவிளக்கைப் போல

நீர் ஊற்றிய பாசத்தில்
மை தொட்டு
உன் பெயரைப்
பூக்களாய் எழுதிப்பார்க்கும்
உன் தோட்டத்துச் செடிகளைப்போல-

கண்ணில் படும்போதெல்லாம்
தன் குரலை
நீ வளர்க்கும் உயிரில் தேய்த்து - உனை
மெல்லக் கூப்பிடும்
அந்த இளங்கன்றைப் போல -

உனைப் பார்த்த பரவசத்தில்
கைநீட்டிச் சிணுங்கி ஓடிவரும்
உன் அக்காளின் குழந்தையைப் போல

நானும் அழைக்க உறவு வேண்டும்;
மனசு தருவாயா?

- பச்சியப்பன்