நீண்ட நெடிய மரமொன்றின்
மிகப் பெரிய கிளையில்
ஒரு மஞ்சள் நிற ஆப்பிளையும்
அதற்கு அடுத்ததாய்
கொஞ்சம் வளைந்தவாறு
இருந்த ஒரு
சின்னக் கிளையில்
நான்கோ ஐந்தோ
ஆரஞ்சுப் பழங்களையும்
அதற்கும் அடுத்து
இலைகள் இல்லாத
கிளையொன்றில்
சில வெண்டைக்காய்களையும்
கீழ்நோக்கித் தொங்கிக் கொண்டிருந்த
கடைசிக் கிளையில்
ஒரு வெள்ளை நிற
டெடி பியரையும்
தொங்க விட்டிருந்தாள்
பூஜாக் குட்டி
அவளின் ஓவியப் புத்தகத்தில்...
- கிருத்திகா தாஸ்
