இந்தியா முழுவதும் இயல்புக்கு மாறான மக்கள்தொகை மாற்றங்கள் மற்றும் சட்டவிரோதக் குடியேற்றங்களை அறிவியல் பூர்வமாக ஆய்வு செய்வதற்காக, மே 26, 2026 அன்று உள்துறை அமைச்சகம் வெளியிட்ட உயர்நிலைக் குழுவின் (HLCDC) தீர்மானம் மிகவும் கலக்கமடையச் செய்கிறது. இது இந்துத்துவாவின் அஜெண்டாவிற்குச் சேவை செய்கிறது மற்றும் நாட்டிற்கே ஒரு அச்சுறுத்தலாகும்.அறிக்கையின்படி, கடந்த 15 ஆண்டுகளாகப் பிறப்பு, வாகனப் பதிவு, பள்ளிகளில் சேர்க்கை, சொத்துப் பரிமாற்றங்கள் மற்றும் மாவட்ட வாரியான மதக் கட்டடங்களின் விவரங்கள், மேலும் ஆதார் மற்றும் வாக்காளர் அடையாள அட்டைப் பதிவில் ஏற்பட்டுள்ள வழக்கத்திற்கு மாறான அதிகரிப்பு ஆகியவற்றுடன் தொடர்புடைய மதம் சார்ந்த தரவுகளை மத்திய அரசு கோருகிறது.

இத்தகைய விவரங்கள் முற்றிலும் தேவையற்றவை, ஏனெனில் இது குடியுரிமைத் திருத்தச் சட்டம் (CAA), தேசிய குடிமக்கள் பதிவேடு (NRC) பொறிமுறையை நினைவூட்டுவதுடன், குடியுரிமை விவகாரத்தின் மீது தொடுக்கப்படும் மற்றொரு தாக்குதலாகும். இதன் முக்கியப் புள்ளி என்னவென்றால், இது எந்தவொரு நோக்கத்திற்கும் உதவாது, மாறாக மக்களைப் பிரித்து இந்திய முஸ்லிம்களை மேலும் ஓரங்கட்டுவதற்கான மறைமுக முயற்சியாகும். இத்தகைய முயற்சி இந்தியாவின் அரசியலமைப்பின் அடிப்படைக் கட்டமைப்புக்கு எதிரானது.

இதைப் பற்றிய மிகவும் அதிர்ச்சியூட்டும் விஷயம் என்னவென்றால், உச்ச நீதிமன்றத்தின் ஓய்வுபெற்ற நீதிபதி ஒருவரின் தலைமையில் அமைக்கப்பட்ட குழு மேற்கண்ட தகவல்களைக் கோரும் கேள்வித்தாளைத் தயாரித்து, அதை மாநில அரசுகளுக்கு அனுப்பும் என்றும், மாநில அரசுகள் அவற்றை மாவட்டத் தலைவர்களுக்கு அனுப்பும் என்றும் மத்திய அரசு அறிவித்துள்ளது.

மதத்தின் அடிப்படையில் எந்தவொரு பதிவையும் மாநில அரசுகள் பராமரிக்காததால், மக்கள்தொகைக் குழு கோரியுள்ள இந்த விவரங்களைச் சேகரிக்கும் கடினமான பணியை மாநில அரசுகள் எதிர்கொள்ள நேரிடும்.

மக்களை மக்களிடமிருந்து திறம்படப் பிரிக்கும் மதத்தின் அடிப்படையில் பதிவுகளைப் பராமரிப்பதை நோக்கமாகக் கொண்ட கேள்விகளுக்குப் பதிலளிப்பது தங்களுக்கு முற்றிலும் சாத்தியமற்றது என்பதை மாநில அரசுகள் மக்கள்தொகைக் குழுவிற்குத் திட்டவட்டமாகத் தெரிவிக்க வேண்டும் என்பதே இப்போது அவசியமானதாகும்.

தரவுகளைச் சேகரிப்பதில் உள்ள சிரமம் பற்றிய அக்கறை இங்கு மையப் பிரச்சினையல்ல; மாறாக, இந்தியாவின் மதச்சார்பற்ற கட்டமைப்பிற்குள் இத்தகைய தகவல்களின் தேவை என்ன என்பதே உண்மையான அக்கறையாகும்.

மக்கள்தொகைக் குழுவின் கேள்வித்தாளின் மற்றொரு குழப்பமான பகுதி, அட்டவணைப் பழங்குடி சமூகங்களுக்குள் மதமாற்றம் குறித்து உளவுத்துறை மதிப்பீடுகளையும் ஆணைய அறிக்கையையும் கேட்பதுதான். இது அரசின் சமூக மேம்பாட்டு யோசனைகளுடன் முற்றிலும் தொடர்பில்லாதது.

மதத்தின் அடிப்படையிலான குடியுரிமைப் பாதையை உருவாக்கிய 2019 ஆம் ஆண்டின் குடியுரிமைத் திருத்தச் சட்டம் (CAA), இந்தியாவின் அரசியலமைப்பை நேரடியாக மீறியது. பரவலான பொதுமக்களின் எதிர்ப்பையும் மீறி, அரசாங்கம் அடக்குமுறை மூலம் எதிர்ப்பை ஒடுக்கிவிட்டு அதன் நடைமுறைப்படுத்தலுடன் முன்னோக்கிச் சென்றது.

இந்திய முஸ்லிம்களை இலக்காகக் கொண்டு அனுப்பத் தயாராக இருக்கும் மக்கள்தொகைக் கேள்வித்தாளை உருவாக்குவதில் இதே போன்ற ஒரு தீய வடிவமைப்பு செயல்படுவதைப் போல் தெரிகிறது.

ஷாகீன் பாக் போராட்டக்காரர்களின் நெஞ்சில் எரிந்துகொண்டிருக்கும் மறைமுக நெருப்பை மக்கள்தொகைக் குழுவின் கேள்வித்தாள் நிச்சயமாகப் பற்றவைக்கும். ஏனெனில், அத்தகைய கேள்வித்தாள் இந்திய நாட்டின் மதச்சார்பற்ற தன்மையை ஒரு மதவாத நாடாக மாற்றுவதை நோக்கமாகக் கொண்ட பாஜகவின் அஜெண்டாவை முன்னெடுத்துச் செல்லப் பயன்படுகிறது.

பாஜகவால் அரசியலமைப்பின் முகப்புரையை மாற்ற முடியாது என்பதால், தற்போதைய ஆட்சியாளர்கள் மக்கள்தொகைக் குழுவின் கேள்வித்தாள் மூலமாக அரசியலமைப்பின் அடிப்படைக் கட்டமைப்பை மாற்றியமைக்க விரும்புகின்றனர்.

மத அடையாளத்தின் அடிப்படையில் குடிமக்களை வகைப்படுத்துவதன் மூலம், மக்கள்தொகைக் குழு அரசியலமைப்பின் முகப்புரையில் குறிப்பிடப்பட்டுள்ள இந்தியாவின் மதச்சார்பற்ற தன்மையைத் திறம்படப் பலவீனப்படுத்துகிறது.

இந்திய அரசியலமைப்பே அரசாங்கத்தை உருவாக்கியது; மேலும் அரசாங்கங்கள் அரசியலமைப்பின் பார்வை மற்றும் விதிகளுக்கு இணங்க மட்டுமே செயல்பட முடியும்.

அப்படியானால், குடிமக்கள் இந்தியாவின் அரசியலமைப்பின் விதிகளை நிலைநிறுத்த விரும்புகிறார்களா அல்லது பாஜகவின் இந்துத்துவ அஜெண்டாவை நடைமுறைப்படுத்த விரும்புகிறார்களா என்பதைத் தாங்களே முடிவு செய்ய வேண்டும்.

பாஜக அரசாங்கத்தின் நோக்கம் முஸ்லிம் சமூகத்திடையே பயத்தை உருவாக்குவதும், நாட்டில் அமைதியைக் குலைப்பதும், தங்களைப் பாதுகாத்துக் கொள்ள அதிகாரத்தில் உள்ளவர்களுடன் மக்கள் இணங்கிச் செல்லக் கட்டாயப்படுத்துவதும் என்பது வெளிப்படையானது.

இத்தகைய நடவடிக்கை செயல்படுத்தப்பட்டால், அது அரசியலமைப்பின் பார்வை மற்றும் விதிகளுக்கு முற்றிலும் முரணாக இருக்கும். இது மக்களின் ஆணைக்கு, குறிப்பாக அதன் முகப்புரை மற்றும் மாநிலக் கொள்கையின் நெறிமுறைக் கோட்பாடுகளுக்கு இணங்கவில்லை.

HLCDC வெளியிட்ட கேள்வித்தாள் அரசியலமைப்பின் பார்வையை மீறுகிறது. இது நாட்டில் பெரும் குழப்பத்தை ஏற்படுத்திய CAA மற்றும் NRC இன் நீட்சியைப் போல் தெரிகிறது. அரசாங்கத்தின் இந்தச் செயலைத் தொடக்கத்திலேயே கிள்ளியெறிய வேண்டும்.

- சையத் அலி முஸ்தபா

தமிழாக்க உதவி: நிவேதிதா, கோவை