இந்திய நாடாளுமன்றத்தின் மீது 13.12.2001 அன்று நடைபெற்ற தாக்குதலுக்கான திட்டத்தைத் தீட்டியதாகப் பொய்யாகக் குற்றம் சுமத்தப்பட்டு கைது செய்யப்பட்டவர், பேராசிரியர் எஸ்.ஏ.ஆர். கிலானி. கீழ் நீதிமன்றத்தால் மரண தண்டனை விதிக்கப்பட்ட அவரை, உயர் நீதிமன்றமும் அதைத் தொடர்ந்து உச்ச நீதிமன்றமும்-இவ்வழக்குக்கும் அவருக்கும் எந்தத் தொடர்பும் இல்லை என்று விடுதலை செய்தன. காஷ்மீரில் பிறந்த இவர், தில்லி பல்கலைக்கழகத்தில் ஒரு பேராசிரியராகப் பணியாற்றிய போதும், தனது மண்ணான காஷ்மீரில் இந்திய அரசு அரங்கேற்றி வரும் கொடூரமான மனித உரிமை மீறல்களை வெளிக்கொண்டு வருவதற்கு, ஜனநாயக வழிமுறைகளில் தொடர்ந்து முயற்சி செய்து கொண்டிருந்ததுதான் இவர் செய்த குற்றம். இவரை எந்த வழக்கிலாவது சிக்க வைக்க வேண்டும் என்று காத்துக் கொண்டிருந்த இந்திய உளவுத்துறை, நாடாளுமன்ற தாக்குதல் வழக்கு பதிவு செய்யப்பட்ட மறுநாளே கிலானிதான் அதற்கு மூளையாக செயல்பட்டார் என்று கைது செய்தது. அன்று முதல் இன்று வரை உச்ச நீதிமன்றமே அவரை குற்றமற்றவர் என்று தீர்ப்பளித்து விட்டபோதிலும்-இச்சமூகம் அவரை ஒரு பயங்கரவாதியாக, தேசத்துரோகியாக, ஆபத்தானவராகவே பார்க்கிறது.

kilani அண்மையில் அவர் பங்கேற்ற ஒரு கருத்தரங்கில் இந்து மதவெறி அமைப்பை (ஏ.பி.வி.பி.) சேர்ந்த மாணவன் ஒருவன் மேடையில் வைத்து, கூடியிருந்த பார்வையாளர்கள் முன்னிலையில் கிலானி மீது காறித் துப்பியிருக்கிறார். இதுதான் உரிமைக்காக குரல் கொடுக்கும் ஒருவருக்கு, இந்த இந்து சமூகம் கொடுக்கும் மரியாதை. சிறையில் பல கொலை முயற்சிகளிலிருந்து தப்பித்து பல்வேறு துன்புறுத்தல்களை அனுபவித்து மீண்ட கிலானி, தான் விடுதலையான நாளிலிருந்து சிறையில் அரசியல் கைதிகள் கீழ்த்தரமாக நடத்தப்படுவதற்கு எதிராகப் போராடி வருகிறார்.

அண்மையில் அகில இந்திய அளவில் "அரசியல் கைதிகளின் விடுதலைக்கான அமைப்பை' அவரும் பல்வேறு மனித உரிமையாளர்களும் இணைந்து தொடங்கியுள்ளனர். இதற்கான அறிமுக விழாவில் பங்கேற்பதற்காக கிலானி சென்னை வந்திருந்தார். இந்து சமூகம் அளித்து வரும் கொடூரமான அனுபவங்களையெல்லாம் தனது உறுதிக்கான உரமாக மாற்றிக் கொண்டு, தொடர்ந்து மனித உரிமைகளுக்காகப் போராடி வரும் கிலானியை-‘தலித் முரசு'க்காக சந்தித்தபோது நடைபெற்ற உரையாடலில் இருந்து சில பகுதிகள்.

சந்திப்பு : பூங்குழலி

தங்களுடைய குடும்பப் பின்னணி, மற்றும் இள வயது பற்றி கூறுங்கள்?

நான் காஷ்மீரில் பிறந்தேன். அங்குதான் வளர்ந்தேன். பள்ளிப் படிப்பையும் காஷ்மீரிலேயே முடித்தேன். மேற்படிப்பிற்காக தில்லிக்கு வந்தேன். தில்லி பல்கலைக்கழகத்தில் இருந்து எம்.ஏ. மற்றும் எம்.பில். பட்டங்கள் பெற்றேன். பின்பு 1997 இல் இருந்து தில்லி பல்கலைக் கழகத்தில் கற்றுக் கொடுத்தேன். அன்றிலிருந்து இன்று வரை அங்குதான் பணிபுரிகிறேன். மனித உரிமைகள் தொடர்பான பணிகளில் தொடக்கத்தில் இருந்தே செயல்பட்டுக் கொண்டிருந்தேன். நான் தில்லிக்கு வந்த நாள் முதலாக மனித உரிமைப் பணிகளில் ஈடுபட்டு வந்திருக்கிறேன். எனது கவனம் முதன்மையாக காஷ்மீரை குறித்தே இருந்தது. காஷ்மீர் இயக்கத்தோடு நான் என்னை இணைத்துக் கொண்டேன். காஷ்மீரில் இந்திய ராணுவம் நடத்தும் மனித உரிமை மீறல்களை வெளிக் கொணர பாடுபட்டேன்.

என்ன மாதிரியான வகைகளில் வெளிக் கொணர்ந்தீர்கள்?

பல வகைகளில்... மாநாடுகள், கருத்தரங்குகள், கண்காட்சிகள் நடத்துவது போன்ற முறைகளில். பின்னர் 2001இல் நான் கைது செய்யப்பட்டேன். சிறையில் அடைக்கப்பட்டேன். சிறையிலிருந்து வெளிவந்த பிறகும் மரண தண்டனை விதிக்கப்பட்டவனாக இரண்டு ஆண்டுகள் இருந்தேன். நான் வெளிவந்த பிறகு சிறைக்கைதிகளுக்காகப் பணியாற்றுவது என முடிவு செய்தேன். ஏனெனில் நான் சிறையில் அவர்களின் நிலையை கண்கூடாகப் பார்த்திருக்கிறேன். குறிப்பாக, அரசியல் கைதிகள் எனப்படுபவர்கள் அதாவது பல்வேறு அரசியல் கருத்தியல்களைக் கொண்டவர்கள், பொது நலனிற்காகவும் சமூக முன்னேற்றத்திற்காகவும் போராடுபவர்கள் அனைவருமே அரசியல் கைதிகள்தாம். இந்த அரசியல் கைதிகள் சிறைகளில் மிக மோசமாக நடத்தப்படுகின்றனர். அதற்குக் காரணம், அவர்கள் நம்பும் அரசியல் கருத்தியல்கள். அதனால் நான் சிறையிலிருந்து வெளி வந்த அன்றே பத்திரிகையாளர் சந்திப்பில் நான் அரசியல் கைதிகளுக்காகப் பணியாற்றப் போகிறேன் என்று அறிவித்தேன்.

நாடாளுமன்றம் மீது நடைபெற்ற தாக்குதலில் உங்களுக்கு தொடர்பு இருப்பதாக உங்கள் மீது ஒரு பொய் வழக்குப் போடப்பட்டது. அதிலும் தாக்குதல் நடந்த மறுநாளே நீங்கள் கைது செய்யப்படுகிறீர்கள். என்ன பின்னணியில் உங்கள் மீது அப்படியொரு பொய் வழக்கு போடப்பட்டது என்பதை சொல்ல இயலுமா?

என்னால் ஊகிக்க மட்டுமே முடியும். உண்மையை காவல் துறையினர் மட்டும் தான் சொல்ல முடியும். நான் தில்லியில் காஷ்மீர் பிரச்சனைக்காக குரல் கொடுத்து வந்தேன். காஷ்மீரில் இந்தியா செய்து வந்த தவறுகளை, இந்திய ஆக்கிரமிப்பு ராணுவம் செய்து வந்த தவறுகளை நான் வெளிக் கொணர்ந்து கொண்டிருக்கிறேன். இதனால் தொடக்கம் முதலாகவே நான் குறி வைக்கப்பட்டிருந்தேன். ஏறத்தாழ 1994-95 முதலே இந்திய அரசின் பல துறைகளிலிருந்தும் என்னைத் தொடர்பு கொண்டு-என்னை விலைக்கு வாங்கவோ, அச்சுறுத்தவோ தொடர்ந்து முயல்கின்றனர்.

kilani_ நாடாளுமன்றத் தாக்குதல் நடந்தவுடன், இந்திய அரசு அதை காஷ்மீருடன் தொடர்புபடுத்த விரும்பியது. அதற்கான
காரணம் என்னவென்று பார்க்கையில், இது அமெரிக்க இரட்டை கோபுரங்கள் மீதான தாக்குதலுக்குப் பிறகு நடைபெற்றது. அச்சமயத்தில், பயங்கரவாதத்திற்கு எதிரான போருக்கான அழைப்பு விடுக்கப்பட்டிருந்தது. "பயங்கரவாதத்திற்கு எதிரான போர்' என்ற பெயரில் உலகமே தலைகீழாக நின்றது. காஷ்மீர் இயக்கத்தைப் பயங்கரவாதத்தோடு தொடர்பு படுத்த இந்தியா பெரிதும் விரும்பியது. இந்த நிகழ்வு அனைவரின் கண்டனத்திற்கும் உள்ளானதால், காஷ்மீர் போராளி இயக்கங்கள், பிற இயக்கங்கள் என அனைவரும் இதனை கண்டித்ததால், இந்தியா இந்நிகழ்வை காஷ்மீரோடு தொடர்பு படுத்தியது. அதன் மூலம் உலகின் பார்வையில் காஷ்மீர் இயக்கத்தை ஒரு பயங்கரவாத இயக்கமாக சித்தரிக்க அது முயன்றது. இதற்காக இந்த நிகழ்வைத்திறம்பட திட்டமிட்டவராக ஒருவரை காட்ட வேண்டி இருந்தது. அப்படியான ஒரு ஆளை அவர்கள் தேடிய போது-நான் நினைக்கிறேன் நான் தான் அதற்கு சரியான ஆளாக இருந்திருக்க வேண்டும்.

ஏனெனில், நான் தில்லியில் நல்ல முறையில் வாழ்ந்து கொண்டிருந்தேன். கல்வித் துறையில் இருந்தேன். இந்தியாவின் மிக உயர்ந்த நிறுவனம் ஒன்றில் பணியிலிருந்தேன். பரவலாக அறியப்பட்டவனாக இருந்தேன். அதிலும் காஷ்மீர் சிக்கலுக்காக குரல் கொடுப்பவனாக நன்கு அறியப்பட்டிருந்தேன். இந்தியாவின் செயல்கள் குறித்தும் இந்தியாவின் ஆக்கிரமிப்பு குறித்தும் பேசுபவனாக அறியப்பட்டிருந்தேன். அதனால் அத்தகையதொரு குற்றச்சாட்டை வைத்தால், அனைவரும் நம்பத் தகுந்த அனைத்து விஷயங்களும் என்னிடம் இருந்தன. மக்கள் ஏற்கனவே நான் இது குறித்தெல்லாம் பேசுபவன் என அறிந்திருந்தனர். அதனால் என் மீது இத்தகைய குற்றச்சாட்டு வைக்கப்பட்ட போது, அதை நம்புவது அவர்களுக்கு எளிதாக இருந்தது. இதுதான் நான் புரிந்து கொண்ட வரையில் நான் கைது செய்யப்பட்டதன் பின்னணியாக இருக்க வேண்டும் என்று நினைக்கிறேன்.

உங்கள் பார்வையில் வழக்கின் விசாரணை எப்படி நடந்தது என்று நினைக்கிறீர்கள்? உங்கள் பகுதி மட்டுமல்ல, ஒட்டுமொத்த வழக்கு விசாரணையும் நேர்மையாக நடந்ததாக நினைக்கிறீர்களா?

காவல் துறைக்கும் நீதித் துறைக்கும் இடையில் மோசமான கூட்டு உள்ளது என்று நான் வெளிவந்த அன்றே கூறினேன். அதையே தான் இன்று வரை சொல்கிறேன். விசாரணை மிக வேகமாக நடைபெற்றது. முழுவதுமே அதி வேகத்தில் நடைபெற்றன. எங்கள் தரப்பை எடுத்துச் சொல்ல வாய்ப்பே இல்லை. எடுத்துக்காட்டாக, அப்சலின் நிலையை எடுத்துக் கொள்ளுங்கள். உலக அளவில் பின்பற்றப்படும் சட்டம் மட்டுமல்ல; இந்திய குற்றவியல் சட்டப்படியும் குற்றம் சாட்டப்பட்ட ஒவ்வொருவருக்கும் தங்கள் தரப்பை எடுத்துச் சொல்ல முழு வாய்ப்பு அளிக்கப்பட வேண்டும். இந்த நாட்டின் சட்டம் என்ன சொல்கிறது என்றால், குற்றம் சாட்டப்பட்ட எவருக்கும் ஒருவழக்குரைஞரை அமர்த்தித் தருவது அரசின் கடமையாகும்.

ஆனால் இந்த வழக்கின் நீதிமன்ற ஆவணங்களைப் பார்த்தால், அப்சலுக்கு விசாரணை நீதிமன்றத்தில் வழக்கறிஞரே அமர்த்தப்படவில்லை என்பது தெளிவாகும். விசாரணை நீதிமன்றம் என்பதே ஒரு வழக்கின் போக்கை, அமைப்பை நிர்ணயிப்பது. அங்குதான் வழக்கு கட்டமைக்கப்படுகிறது. குற்றம் சாட்டப்பட்டவருக்கு எதிரான சான்றுகள் இங்குதான் ஆய்வுக்குள்ளாக்கப்படுகின்றன. சாட்சிகள் இங்குதான் குறுக்கு விசாரணை செய்யப்படுகிறார்கள். மேல் நீதிமன்றங்களான உயர் நீதி மன்றமோ, உச்ச நீதி மன்றமோ ஒரு சட்ட வாய்ப்பு மட்டுமே. அவை விசாரணை நீதிமன்றத்தின் ஆவணங்களை அடிப்படையாக வைத்தே தங்கள் முடிவுகளை எடுக்கின்றன. அதனால் விசாரணை நீதிமன்றத்திலேயே வழக்கின் அமைப்பு தவறாகச் செல்லுமானால், உயர் நீதிமன்றத்திலோ, உச்ச நீதிமன்றத்திலோ அற்புதங்கள் நடக்கும் என எதிர்பார்க்க முடியாது.

நீங்கள் வழக்கு ஆவணங்களைப் பார்த்தால் அப்சல், தன்னால் வழக்குரைஞரை நியமித்துக் கொள்ள இயலாத நிலைமையையும், நீதிமன்றம் தனக்கு ஒரு வழக்கறிஞரை நியமித்துத் தரக் கோரியும், ஏறத்தாழ 4 அல்லது 5 மனுக்களை அளித்திருப்பதை காண முடியும். அம்மனுக்களில் அவரே சில வழக்குரைஞர்களின் பெயர்களையும் குறிப்பிடுகிறார். அவர்களில் ஒருவரை நியமித்துத் தரக் கோருகிறார். ஆனால் அரசு எந்த வழக்குரைஞரையும் நியமித்துத் தரவில்லை. அதனால் என்ன நடந்தது. எல்லாம் அவருக்கு எதிராக மாறியது. அப்சல் மீதான வழக்கை ஒட்டுமொத்தமாகப் பார்த்தால், விசாரணை நீதிமன்றத்திலும் உயர் நீதிமன்றத்திலும் வழங்கப்பட்ட தீர்ப்பு, அப்சலின் ஒப்புதல் வாக்குமூலத்தின் அடிப்படையிலேயே வழங்கப்பட்டிருந்தது. உச்ச நீதிமன்றம் அதை ஒதுக்கியுள்ளது. இதனால் உச்ச நீதிமன்றம் அப்சலுக்கு எதிராக நேரடியான சான்று இல்லை என்று கூறியது. ஆனால் அதே நேரத்தில் காவல் துறை போலியான ஆவணங்களையும், சான்றுகளையும் தயாரித்துள்ளது என்றும் உயர் நீதிமன்றம் சொல்கிறது.

அவருக்கு எதிராக இருப்பதெல்லாம் சூழ்நிலைச் சான்றுகள் மட்டுமே. அந்த சூழ்நிலைச் சான்றுகளையுமே பார்த்தால், அவை அப்சலுக்கு எதிராக நிலைப்பதற்கு ஒரே காரணம், அவருக்கென ஒரு வழக்குரைஞர் இல்லாததினால் மட்டுமே. ஒரு சூழ்நிலைச் சான்றை எடுத்துக் கொள்வோம். எச்.எஸ்.கில் எனும் போலிஸ் அதிகாரி விசாரணை நீதிமன்றத்தில் அளித்த வாக்குமூலத்தில், அப்சல்தான் நாடாளுமன்றத் தாக்குதலில் கொல்லப்பட்ட 5 நபர்களையும் அடையாளம் காட்டியதாகக் கூறினார். அதன் மூலம் அப்சலுக்கு இதில் தொடர்பு இருப்பது தெரிகிறது என்ற வகையில் சொல்லப்பட்டது. ஆனால் உச்ச நீதிமன்றம் என்ன சொல்கிறது என்றால், இந்த எச்.எஸ்.கில்லை யாருமே குறுக்கு விசாரணை செய்யவில்லை. அவர் பொய் சொல்லக் கூடும் என்ற கேள்வியே எழுப்பப்படவில்லை. நீதிமன்ற ஆவணங்களைப் பார்த்தால், அப்சல், கில்லின் வாக்குமூலத்தை மறுத்திருப்பது தெரியும். ஆனால் அப்சலுக்கு ஒரு வழக்கறிஞர் கூட இல்லாத நிலையில் எச்.எஸ். கில்லை யார் குறுக்கு விசாரணை செய்திருக்க முடியும்? அவர் பொய் சொல்கிறார் என்ற கேள்வியை யார் எழுப்பியிருக்க முடியும்? ஆக, இந்த சூழ்நிலைச் சான்று அப்சலுக்கு வழக்கறிஞர் இல்லாத ஒரு காரணத்தினால் மட்டுமே நிலைத்தது.
ஒட்டுமொத்த விசாரணையும் அதி வேகத்தில் நடைபெற்றது.

"பொடா' சட்டத்தின் கீழ் நடைபெற்ற முதல் வழக்கு இது. சிறப்பு நீதிமன்றம், சிறப்பு நீதிபதி மற்றும் "சிறப்பு நோக்கம்' உடையதாகவும் இருந்தது. நாங்கள் முதன் முதலில் அந்நீதிமன்றத்திற்குச் சென்ற போது, அது எங்கள் மீதான குற்றப்பத்திரிகையைப் பதிவு செய்வதற்கு ஆறு மாதங்களுக்கு முன்பு, காவல் துறை எங்கள் மீதான குற்றச்சாட்டிற்கு எவ்வித ஆதாரத்தையும் கொடுக்கவில்லை. காவல் துறை அது வரையில் எங்கள் மீது எந்த குறிப்பிட்ட குற்றச்சாட்டையும் சுமத்தவில்லை. ஆனால் அந்த நிலையிலேயே நீதிபதி ஒரு முன் தீர்மானத்திற்கு வந்து விட்டவராகத் தென்பட்டார். அந்த முதல் நாளில் கைது செய்யப்பட்டவர்களில் ஒருவரான அப்சான் மற்றும் இவரது கணவரான ஷவுகத்தும் கைது செய்யப்பட்டிருந்தனர்.

அப்சான் நீதிமன்றத்தில் அழுது கொண்டிருந்தார். அவர் ஏன் அழுது கொண்டிருக்கிறார் என நீதிபதி கேட்டார். அதற்கு அப்சான், “நான் எதற்காக கைது செய்யப்பட்டிருக்கிறேன். எதற்காக சித்திரவதை செய்யப்படுகிறேன் என்று தெரியவில்லை, நான் என்ன குற்றம் செய்தேன்?'' என்று கேட்டார். உடனே அதற்கு பதிலளித்த நீதிபதி “நாடாளுமன்றத்தைத் தாக்க சதித்திட்டம் தீட்டும்போது இதைப் பற்றி நீ யோசித்திருக்கவேண்டும்'' என்று கூறினார். “இப்போது வருத்தப்பட்டு என்ன பயன்? நாடாளுமன்றத் தாக்குதலில் இறந்தவர்களைப் பற்றி, அவர்களின் குடும்பங்களைப் பற்றி யோசித்துப் பார்'' என்றெல்லாம் கூறினார்.

இது எப்போது? குற்றப்பத்திரிகை தாக்கல் செய்வதற்கு 6 மாதங்களுக்கு முன்னரே. அப்போதே அந்த முதல் நாளிலேயே, நாங்கள் குற்றவாளிகளென நீதிபதி தீர்ப்பு சொல்லிவிட்டார். நீதிபதி பல முறை நீதிமன்றத்திலேயே வெளிப்படையாக “இந்த நீதிமன்றத்தில் எனக்கு அரசுத் தரப்பு வழக்கறிஞரே தேவையில்லை'' என்று சொல்லியிருக்கிறார். ஆக, இந்த வழக்கு முழுமையாக எங்களுக்கு எதிராகவே இருந்தது. இதில் மேலும் வேதனையானது என்னவெனில், ஊடகங்களும் எதிராகவே இருந்தன. நீதிமன்றத்தில் நடப்பவை ஊடகங்களில் நேர்மையாக வெளியிடப்படவில்லை. இத்தனைக்கும் விசாரணை வெளிப்படையாகவே நடைபெற்றது. ஊடகங்கள் அனைத்தும் விசாரணையை நேரடியாகவே பார்த்தன. ஆனால், காவல் துறை அவர்களுக்கு என்ன கதையை சொல்கிறதோ அதை மட்டுமே வெளியிட்டார்கள். எங்கள் வழக்குரைஞர்கள் சொல்வதை அவர்கள் வெளியிடவில்லை.
-அடுத்த இதழிலும்

Pin It

நமது நாட்டில் இன்று முதன்மையாய் நடைபெற வேண்டியது சமூக சீர்திருத்தமேயாகும். ஆனால் அதற்கு இன்று நாட்டில் செல்வாக்கில்லை. உண்மையான சமூக சீர்திருத்தக்காரர் ஒருவர் இருவர் இருந்தாலும், அவர்களுக்கும் நாட்டில் செல்வாக்கில்லாமல் மக்களின் எதிர்ப்புக்கும், வெறுப்புக்குமே ஆளாகிறார்கள். பெரும்பான்மையான மக்களுக்கும், மனித சமூகத்தில் சமூகக் கட்டுப்பாட்டின் பயனாய் வெகுகாலமாய் தொடர்ந்து துன்பமனுபவித்து வரும் பாமர மக்களுக்கும், பயனற்றதான அரசியல் சீர்திருத்தம் என்னும் விஷயத்திற்கே-இன்று நாட்டில் செல்வாக்கு ஏற்படுத்தப்பட்டு விட்டது.
ஜனங்கள் அரசியல் கிளர்ச்சி மாயையில் இருந்து என்று விடுபடுகிறார்களோ, அன்றுதான் சமூகச் சீர்திருத்தத்தின் அவசியத்தையும், உண்மையையும் அறிய முடியும். மற்றபடி அதுவரையில் போலி சமூக சீர்திருத்த ஏமாற்றந்தான் நடைபெறும். அதுவும் அரசியல் சீர்திருத்தக்காரர்கள் தங்களுக்கு அனுகூலம் செய்து கொள்ளுவதற்காக, மக்களை ஏமாற்ற வேண்டிச் செய்யும் ஏமாற்றும் பிரச்சாரமேயாகும்.

periyar உண்மையான சமூக சீர்திருத்தத்தை இன்று எந்த அரசியல்வாதியும், பொருளியல்வாதியும் ஒப்புக் கொள்ளவே மாட்டார்கள். நம் நாடு மாத்திரமல்லாமல், இன்று உலகில் எங்கே பார்த்தாலும் அதிகார வெறியும், பண வெறியும் கொண்ட மக்களால்-அவர்களது நன்மைக்கேற்ற அரசியல் சீர்திருத்தக் கிளர்ச்சிகள்தான் நடந்து வருகின்றன. என்றாலும் இவற்றால் எல்லாம் பெரும்பாலான மனித சமூகத்துக்கு, எவ்வித நன்மையும் ஏற்பட்டிருப்பதாகச் சொல்லுவதற்கில்லை.

இங்கிலாந்து தேசம் அரசியலில் எவ்வளவோ பெரிய யுத்தங்களையெல்லாம் சமாளித்து, ஜனநாயக முறைப்படி பார்லிமெண்டு அமைத்து, அந்தப் பார்லிமெண்டுக்கு மந்திரிகளையும், அரசரையும் கட்டுப்படுத்தி, உலகத்திலேயே முதல் தரமான அரசியல் முறை என்றும் சொல்லும்படியான அரசியலைக் கொண்டு ஆட்சி நடத்தப்பட்டு வருகின்றது. இதன் பயனாய் தந்திர புத்தி உள்ளவர்களும், பிரபுக்களும், முதலாளிகளும்தான் பயனடைந்து வருகிறார்களே ஒழிய, பாமர மக்களுக்கு ஒரு நன்மையும் உண்டாகவில்லை.

அமெரிக்கா தேசம் உலகத்திலேயே பெரும் செல்வம் பொருந்தியதாய் இருந்தும், குடி அரசு ஆட்சியாய் இருந்தும், அங்குகூட பிரபுக்களும், வியாபாரிகளும், அறிவுக் கூட்டத்தாரும்தான் மேன்மையாய் வாழ்கின்றார்களே ஒழிய, பாமர மக்கள் கோடிக்கணக்காய் வேலை இல்லாமல், ஜீவனத்துக்கு மார்க்கமில்லாமல், வீடுவாசலற்றுத் தவித்துக் கொண்டுதான் இருக்கிறார்கள். மக்கள் யாவருக்கும் பிறவியில் சமத்துவமும், சம சுதந்திரமும் இருக்கும்படியானதும் அரசியல் சீர்திருத்தத்தில் உச்ச நிலையை அடைந்ததுமான அய்ரோப்பா, அமெரிக்கா நாடுகளிலேயே இப்படி இருக்கின்ற தென்றால், நம் நாடு அதாவது பிறவியிலேயே கீழ் மேல் நிலையும், பிறவி காரணமாக அடிமைத் தன்மையும் இருந்து வரும் நாட்டின் நிலையைப் பற்றி, நான் உங்களுக்கு விவரிக்க வேண்டுமா என்று கேட்கின்றேன்.

மனித சமூகமானது, பாமர மக்களை ஜாதி, மதம், பழக்கம், வழக்கம், பழைய சாஸ்திரங்கள், கடவுள் கட்டளைகள் என்னும் பேரால் கட்டுப்படுத்தப்பட்டு, அவர்களது வாழ்க்கையையே மிருக வாழ்க்கையை விட மிகக் கீழானதாகவும், அடிமை வாழ்க்கையாகவும் ஆக்கி வந்திருக்கிறது. நம்முடைய அரசியல் மாத்திரமல்லாமல், உலகில் எந்த அரசியலும் இப்படிப்பட்ட சமூகக் கொள்கைகளை அஸ்திவாரமாகக் கொண்டே கட்டப்பட்டிருக்கிறது. இந்த சமூகக் கொடுமைக்கு அஸ்திவாரமான மதம், ஜாதி, பழக்க வழக்கம், சாஸ்திரங்கள், கடவுள் கட்டளைகள் என்பவை தகர்க்கப்படாமல்-எப்படிப்பட்ட அரசியல் சீர்திருத்தம் ஏற்பட்டாலும், ஒரு காதொடிந்த ஊசியளவு பயனும் பாமர மக்களுக்கு ஏற்படாது.

ஒரு பெருங்கூட்ட மக்கள் இன்று சமூக வாழ்வில் தீண்டப்படாதார்களாகவும், மற்றொரு பெருங்கூட்ட மக்கள் சமூக வாழ்வில் சூத்திரர்கள், அடிமைகள், கூலிகள், தாசி மக்கள், இழிமக்கள் என்கின்ற பெயருடனும் இருந்து வருகிறார்கள் என்றால், இது மாறுவதற்கு அருகதை இல்லாத சுயராஜ்யம் யாருக்கு வேண்டும்? இது மாறுவதற்கு இல்லாத மதமும், சாஸ்திரமும், கடவுளும் யாருக்கு வேண்டும்?

வெள்ளைக்காரனை வைவதின் (திட்டுவது) மூலம், மக்களை ஏமாற்றி அடிமையாகவும் மானமற்றவர்களாகவும் நிரந்தரமாய் வைத்திருக்கச் செய்யும் சூழ்ச்சியே இன்றைய காங்கிரசின் யோக்கியதையாகும். இம்மாதிரியான கொடுமைகளுக்கு நான் பார்ப்பனர்களை மாத்திரமே குற்றம் சொல்ல வரவில்லை. பார்ப்பனர்களை வைகின்றோமே ஒழிய, அவர்களுடைய சூழ்ச்சிகளுக்கு நாம் நிபந்தனையில்லாத அடிமைகளாய் இருந்து வருகிறோம். பார்ப்பனனுடைய மதத்தை நாம் ஒப்புக் கொண்டிருக்கிறோம். அவன் சாஸ்திரங்களுக்கு அடிமையாய் இருந்து வருகிறோம்; அவன் கடவுளுக்குப் பக்தி செலுத்தி வருகின்றோம். இவற்றையெல்லாம் செய்து கொண்டு, பார்ப்பனனை வைவதால் என்ன பயன்?


Pin It

1. நீல நிற மேடையிலே
கோடி மலர் கிடக்குது.
எடுப்பாரும் இல்லை
தொடுப்பாரும் இல்லை!-அது என்ன?

Moon 2. எட்டாத தூரத்திலே
எவரும் இல்லா காட்டிலே
எழிலான பெண் ஒருத்தி
இரவெல்லாம் சிரிக்கிறாள்!-அவள் யார்?

3. விதைக்காத விதை விண்ணிலே
அறுக்காத கதிர் மண்ணிலே!-அது என்ன?

4. ஊருக்கு அழகு எது என்றேன்
ஒன்றுடன் சேர்ந்த அய்ந்து என்றார்!-அது என்ன?

5. சித்திரையில் சிறு பிள்ளை
வைகாசியில் வளரும் பிள்ளை
ஆனியில் அழகுப்பிள்ளை
ஆடியில் விழும் பிள்ளை!-அது என்ன?

6. உச்சியில் பூவிருக்கும்
ஊருணிக் கரையிலிருக்கும்
வெள்ளம் புரண்டு வரும்
அவரை வீழ்த்த முடியாது!-அவர் யார்?

7. பூத்த போது மஞ்சள்
பூத்ததும் சிவப்பு
காய்த்த போது சிவப்பு
காய்த்ததும் கறுப்பு!-அது என்ன?

8. வந்ததுதான் வந்தீர்களே
வந்து ஒருதரம் போனீர்களே
போய் ஒரு தரம் வந்தீர்களே
போனால் இனிமேல் வருவீர்களா?-அவர் யார்?

9. அண்ணன் தம்பி அய்வரும்
ஆளுக்கு ஆள் வேறு உயரம்
அய்வர் வீட்டுக்கும் ஒரே முற்றம்!-அது என்ன?

10. மூன்றெழுத்து விலங்கு.
நடு எழுத்து இல்லாவிடில் குழந்தைகள் அதை விரும்புவர்
கடைசி எழுத்தோ மாதமாகும்!-அவை யாவை?

விடைகள் :

1. விண்மீன்கள்
2. நிலா
3. சூரியன், சூரிய ஒளி
4. ஆறு
5. பனம்பழம்
6. நாணல் புல்
7. பேரிச்சை
8. பல்
9. விரல்கள், உள்ளங்கை.
10. கழுதை


Pin It
அன்பான குழந்தைகளே! வணக்கம். நலமாக இருக்கிறீர்களா?

student
இந்த ஒரு மாத காலமாக செய்தித் தாள்களிலும், தொலைக்காட்சிகளிலும் திரும்பத் திரும்ப ஒரு செய்தி வந்த வண்ணம் உள்ளது. அது என்னவென்று உங்களுக்குக்கூட தெரியும். மாணவர்கள் மோதல்! சென்னையில் இருக்கும் டாக்டர் அம்பேத்கர் அரசு சட்டக் கல்லூரியில் மாணவர்கள் ஒருவரை ஒருவர் அடித்துக் கொண்டார்கள்.

இதைத் தொடர்ந்து தமிழ் நாட்டில் உள்ள பல மேல்நிலைப் பள்ளிகளிலும் கூட, மாணவர்கள் ஒருவரோடு ஒருவர் மோதிக் கொள்ளும் நிலை உருவானது. சமூகத்தில் இருக்கின்ற முட்டாள்தனமான பிரிவினைகளை காரணம் காட்டி, ஒருவரை ஒருவர் அடித்துக் கொள்வது தவறானது; கல்வியின் அடிப்படைப் பண்புகளுக்கு எதிரானது. மாணவப் பருவம் படிப்பதற்கான பருவம். அந்த வயதில் படிப்பதுடன், தங்களுக்குள்ளே இருக்கும் திறமைகளை வளர்த்துக் கொள்ள வேண்டும். பிறமொழிகளில் ஏதேனும் ஒன்றையாவது தேர்வு செய்து பயிற்சி பெற வேண்டும். உங்களை ஒரு முழு மனிதராக மாற்றிக் கொள்ள முயல வேண்டும்.

பாடங்களின் வழியே நீங்கள் பெற்ற மதிப்பீடுகளான பொய் பேசாமலிருத்தல், ஒழுக்கத்தை கடைப்பிடித்தல், அனைவரையும் மதித்தல், சாதி, மத கருத்துக்களை தூக்கி எறிதல், மனித உரிமை கருத்துக்களைப் பின்பற்றுதல் போன்றவற்றை கடைப்பிடித்தால்-உங்கள் சிந்தனை தெளிவு பெறும். எதிர்காலத் தமிழகம் சீர்பெறும்.
Pin It

ரொம்ப காலத்திற்கு முன்னால், அதாவது நீங்களும் நானும் பிறக்காததற்கு முன்னால் நடந்த கதை இது. அப்போது ஒரு பெரிய காட்டில் நரியொன்று வாழ்ந்து வந்தது. அதன் தினப்படி வேலை என்ன தெரியுமா? பக்கத்தில் உள்ள கிராமங்களுக்குச் சென்று கோழிகளையும் வாத்துகளையும் திருடித் தின்பதுதான். லேசுப்பட்ட ஆள் இல்லை இந்த நரி. திருடுவதில் மகா ‘கில்லாடி'.

இப்படி இருக்கும் போது ஒரு நாள் நரி வழக்கம் போல கோழி திருடுவதற்காக கிராமத்திற்குப் புறப்பட்டது. கிராமத்தில் உள்ள ஒரு வீட்டருகில் அது பதுங்கிக் காத்திருந்தது. அந்த வீட்டில் ஒரு அம்மாவும் அவர்களது சிறிய மகளும் இருந்தார்கள். அம்மா ஒரு புத்தகத்தில் உள்ள கதையைப் படித்து தன் மகளிடம் சொல்லிக் கொண்டிருந்தார்கள். ஒளிந்திருந்த நரி இதை ஆர்வமாகக் கேட்டது.

Jackle “அந்தக் கதை இந்தக் கதை கேளு பாப்பா
நல்லக் கதை எல்லாம் கேளு பாப்பா.
ஆமையும் முயலும் கதை சொல்வேன்
ஓட்டப் பந்தய கதை சொல்வேன்.
குரங்கும் முதலையும் கதை சொல்வேன்
வேடனை ஏய்த்த கதை சொல்வேன்.
ஒட்டகம் ஒன்று கூடாரத்தில்
இடம் கேட்ட கதையும் நான் - சொல்வேன்
எந்தக் கதை வேண்டும் சொல்- பாப்பா,
அந்தக் கதை உடனே நான் - சொல்வேன்.''

ஒரு புத்தம் புதிய கதைப் புத்தகத்தைப் பார்த்துதான் அம்மா அந்தப் பாட்டைப் ச்பாடிக் கொண்டிருக்கிறார்கள் என்று நரிக்குப் புரிந்தது. அந்தப் பாடலில் ஒரு முறை கூட நரி என்ற பெயர் வரவே இல்லை. எனவே அதில் தன்னைப் பற்றி ஒரு கதையும் இல்லை என்று நரி தெரிந்து கொண்டது. அதற்கு மிகவும் கோபம் வந்தது. அந்தப் புத்தகத்தை எப்படியாவது திருடிச் செல்ல வேண்டுமென்று அது உடனே முடிவு செய்தது. அன்று இரவு எல்லோரும் தூங்கியபோது நரி பதுங்கிப் பதுங்கி அந்த வீட்டின் ஜன்னலை நெருங்கியது. பிறகு அங்கேயிருந்த கதைப் புத்தகத்தை எடுத்துக் கொண்டு ஒரே ஓட்டமாக ஓடியது. ஓடி ஓடி வெகு தொலைவிற்குச் சென்ற பிறகு, சற்று இளைப்பாறிவிட்டு கதைப் புத்தகத்திடம் சொன்னது நரி:

“அந்தக் கதை இந்தக் கதை இருந்தாலும்
என் கதை எழுது புத்தகமே!
இனியும் என்கதை எழுதாதிருந்தால்
கடித்துக் கிழிப்பேன் உன்னை நான்!''

இதைக் கேட்டு பயந்து நடுங்கியது புத்தகம். அய்யோ! நான் அச்சிடப்பட்டு கொஞ்சம் நாட்கள் கூட ஆகவில்லையே... அதற்குள் இந்த நரி கிழித்து விடுவேன் என்று மிரட்டுகிறதே என்று வருந்தியது. அது தயங்கித் தயங்கி நரியிடம் சொன்னது:

“நரியே நரியே என்னைக் கிழிக்காதே!
பல பேர் படிக்கும் புத்தகம் நான்...
நரியே நரியே கிழிக்காதே,
உன் கதை நானே எழுதுகிறேன்!
முதலில் சென்று எங்கிருந்தும்
பேனா ஒன்றைக் கொண்டு வா!''

புத்தகம் சொன்னது நியாயமாகத்தான் தெரிந்தது நரிக்கு. எழுத வேண்டுமென்றால் ஒரு பேனா வேண்டுமல்லவா? எனவே, நரி புத்தகத்தை ஒரு தாழம்புதரில் மறைத்து வைத்து விட்டு பேனா கொண்டு வருவதற்காகப் புறப்பட்டது. நடந்து நடந்து அது தூரத்தில் இருந்த ஒரு வீட்டை அடைந்தது. அந்த வீட்டில் உட்கார்ந்து எழுதிக்கொண்டிருந்த சிறுவன் அப்போதுதான் வெளியே சென்றிருந்தான். ஜன்னலருகில் இருந்த மேசை மீது பேனா கிடந்தது.
அந்தப் பேனாவிடம் சொன்னது நரி:

“எழுதுபவனே உடனே வா!
கதை எழுதப் போவோம் வா!
மாட்டேன் என்று சொன்னாயோ,
கடித்து உடைப்பேன் பார்த்துக் கொள்!''

இதைக் கேட்ட பேனா பயந்து நடுங்கியது. அய்யோ நான் உருவானதிலிருந்து கொஞ்சம் பக்கங்கள் கூட எழுதி முடிக்கவில்லையே... அதற்குள் இந்த நரி உடைத்துவிடுவேன் என்று மிரட்டுகிறதே என்று வருந்தியது. அது தயக்கத்துடன் நரியிடம் கூறியது :

“நரியே நரியே நான் வருவேன்!
கதை எழுதவே நான் வருவேன்!
ஒரு துளி மையும் இல்லாமல்
என் வயிறும் காய்ந்து கிடக்கிறதே
மையில்லாமல் எழுதுவது
யாரால் இயலும் சொல் நரியே''

பேனா சொல்வதும் நியாயமாகத்தான் தெரிந்தது நரிக்கு. மை இல்லாமல் எந்தப் பேனாவால் தான் எழுத முடியும்? அது பேனாவை ஒரு கற்றாழைப் புதரில் மறைத்து வைத்துவிட்டு நடந்தது. நடந்து நடந்து ஒரு மை வியாபாரியின் கடைக்குச் சென்றது. கடைக்கு அருகிலேயே பதுங்கிக் காத்திருந்தது. முதலாளி சற்று அசந்த நேரம் பார்த்து ஒரு மைப் புட்டியை எடுத்துக் கொண்டு ஒரே பாய்ச்சலாக ஓடி வந்தது.

நரி மைப் புட்டியை எடுத்துக் கொண்டு நேராகக் கற்றாழைப் புதருக்குச் சென்றது. அங்கிருந்த பேனாவிடம் மைப்புட்டியைக் கொடுத்தது. பேனா என்ன செய்தது தெரியுமா? மை முழுவதையும் ஒரே மடக்கில் குடித்து விட்டது. மை குடித்து வயிறு நிறைந்தவுடன் பேனா நரியுடன் புறப்பட்டது. விரைவிலேயே அவர்கள் இருவரும் புத்தகம் இருந்த தாழம்புதரை அடைந்தார்கள்.

பேனா கிடைத்ததும் புத்தகம் தன் பக்கங்களில் அந்த நரியைப் பற்றிய கதையை எழுதத் தொடங்கியது. அதைப் பார்த்ததும் மிகவும் மகிழ்ச்சியடைந்தது நரி. மகிழ்ச்சி தாங்காமல் துள்ளிக் குதித்தது. ஊளையிட்டபடியே மண்ணில் புரண்டு குட்டிக் கரணம் அடித்தது. “ஹா... ஹா... ஹா! ஊ... ஊ... என்னைப் பற்றிய கதை இல்லாமல் ஒரு கதைப் புத்தகம் இருக்கலாமா? நான் அதை அனுமதிப்பேனா?'' என்று கூச்சலிட்டது. சற்று நேரம் கழிந்த பிறகு புத்தகம் சொன்னது:

“நரியே நரியே அருகே வா,
உன் கதை எழுதி முடித்தேன் நான்.
உனக்கும் படித்துக் காட்டட்டுமா?''
நரி ஆனந்தமாய் அரைக்கண் மூடிக்கொண்டு தலையசைத்தது. நரியின் கதையை வாசிக்கத் தொடங்கியது புத்தகம் :

canines “நரி நரி திருட்டு நரி
கோழி திருடும் குள்ள நரி.
கோழி திருட ஒரு முறை
பாய்ந்து பாய்ந்து வந்தது!
பாய்ந்து வந்த நேரத்திலே
புத்தகத்தைக் கவர்ந்தது!
பின்பு அது ஓடிச் சென்று
நல்ல பேனாவையும் எடுத்தது!
பேனா திருடிச் சென்ற நரி
மறைத்தெடுத்தது மையையும்!
நரி நரி குள்ள நரி
கண்டதெல்லாம் திருடும் நரி!''

புத்தகம் சொன்ன கதையைக் கேட்டு நரி மிகவும் அதிர்ச்சியடைந்துவிட்டது. அதற்கு ஏற்பட்ட கோபத்தையும் வருத்தத்தையும் தாங்கிக் கொள்ளவே முடியவில்லை. வெட்கத்துடன் தலையைக் குனிந்து கொண்டு விரைவாக வீடு நோக்கி நடந்தது. நடந்து போகும் போது அது இப்படிச் சொன்னது: “ச்சே! இந்தக் கதைப் புத்தகங்களில் உள்ள கதைகளெல்லாம் ஒரு பைசா கூட பெறாத கதைகள். ச்சே, ச்சே! முட்டாள்கள்தான் கதைப் புத்தகங்களைப் படிப்பார்கள்...'' இதைக்கேட்டு புத்தகமும் பேனாவும் குபீரென்று சிரித்தன. பிறகு அவரவர் வீட்டிற்கு நடந்து சென்றன.
மலையாளம் : எம்.ஆர். பிரதீப்
தமிழில் : யூமா வாசுகி

-நன்றி : "முள்ளம்பன்றியின் கனவு' அறிவியல் வெளியீடு,

Pin It