வெப்பத்தை மூலமாகக் கொண்டு மின்சாரத்தை உருவாக்கும் பல செலுத்தங்களில் (Process) வெப்பம் பலவகைகளிலும் விரயமாகிறது. இந்த விரயங்களை மீண்டும் மின்சாரமாக மாற்றும் ஒரு புதிய நுட்பத்தை (Technology) ஆஸ்திரேலியவைச் சேர்ந்த விஞ்ஞானிகள் உருவாக்கியுள்ளனர். மின்நிலையங்கள் மற்றும் வாகன புகைக் கழிவுகளில் வெளியேறும் வெப்பத்தில் இருந்து நேரிடையாக மின்சாரம் தயாரிக்க முடியும் என்று கூறுகின்றனர்.
மோனஷ் பல்கலைக்கழகம் ஆராய்ச்சியாளர்கள் அயனி திரவத்தைச் (Ionic Liquid) சார்ந்த கரிய உமிழ்வற்ற (Carbon Emissions) அதிசக்தி வெளிப்பாடு கொண்ட மின்சாரம் தயாரிக்கும் வெப்பசெல் (Thermo Cell)ஒன்றை உருவாக்கியுள்ளதாக தெரிவிக்கின்றனர். இது சுமார் 212 முதல் 392 டிகிரி பாரன்ஹீட் வெப்பநிலையில் இயங்கக்கூடியது.
ஒரு பொருளின் ஒரு பகுதியை குளுமையான பரப்பிலும் மற்றொரு பகுதியை சூடான பரப்பிலும் வைக்கும் போது அந்தப் பொருளில் சூடான பகுதியில் இருந்து குளுமையான பகுதியை நோக்கி மின் நகர்வு ஏற்படும். இதைச் செய்யும் சாதனம் தான் வெப்பசெல் (ThermoCell) என்று அழைக்கப்படுகிறது.
மின்நிலையங்களில் தரங்கெட்ட(Low Grade) நிலக்கரியைப் பயன்படுத்தி மின்சாரம் தயாரிக்கும் போது அதிலிருந்து கழிவாக வெளியேறும் 266 டிகிரி பாரன்ஹீட் வெப்பம் கொண்ட புகையில் இந்த புதுவித முறையைக் கொண்டு மின்சாரம் தயாரிக்க முடியும் என்று மோனஷ் விஞ்ஞானிகள் கூறுகின்றனர்.
மின்நிலையங்களில் புகையுடன் சேர்ந்து வெளியேறும் வெப்பத்தை வெப்பசெல்லின் (ThermoCell)ஒரு பகுதியிலும், காற்று மற்றொரு பகுதியிலும் படும்படி வைக்கும் போது மின்சாரம் சேமிக்கப்படுகிறது/உருவாக்கபடுகிறது.
"பொதுவாக வெப்பசெல்களில் வெப்பத்தை கட்டுப்படுத்த நீரை மட்டுமே பயன்படுத்துவோம். ஆனால் நாங்கள் உருவாக்கிய வெப்பசெல்களில் நீருக்குப் பதில் மின்பகுபொருள் கொண்ட திரவப் பொதியை (Liquid packed with electrolytes) பயன்படுத்துகிறோம். அது அதிக கொதிநிலையை தாங்கக் கூடியது" என்று மோனஷ் ஆராய்ச்சியாளர்கள் கூறுகின்றனர்.
சூடான எந்தவொரு பொருளில் இருந்தும் மின்சாரத்தை உண்டாக்குவது இந்த வெப்பசெல்கள் (ThermoCell). சூடான இடம் என்றால் கார்களின் எஞ்சின்கள், சூரிய வெப்பம், மின்நிலையங்கள் என சொல்லலாம். ஏன் மனிதனின் உடல் சூட்டில் இருந்தும் மின்சாரம் தயாரிக்கலாம் (கூகுளின் அறிவியல் சந்தையில் இதைப் பற்றிய செய்தி உண்டு)
வெப்பசெல்கள் சாதாரண மின்சார தயாரிப்பு செலுத்தங்களைக் (Process) காட்டிலும் விலை மலிவானது. மேலும் மோனஷ் ஆராய்ச்சியாளர்கள் இதன் மின்சார வெளிப்பாட்டை (Output)அதிகரிக்க அதற்குரிய மேம்படுத்தும் வேலைகளில் ஈடுபட்டுள்ளனர்.
http://puthutamilan.blogspot.in/2013/08/blog-post.html
