“தன்னை அறிதல் என்பது உலகை அறிதலின் முதல் படி.”

ஒரு நல்ல புத்தகம் நமக்குப் புதிதாகச் சில செய்திகளைச் சொல்வதோடு நின்று விடுவதில்லை; அது நம்மைப் பற்றி நாமே சிந்திக்கச் செய்கிறது. சில புத்தகங்கள் அறிவைத் தருகின்றன; சில புத்தகங்கள் அனுபவத்தைத் தருகின்றன; மிகச் சில புத்தகங்களோ நம் வாழ்க்கையைப் பார்க்கும் பார்வையையே மாற்றி விடுகின்றன. அத்தகைய ஆழமான தாக்கத்தை எனக்குள் ஏற்படுத்திய நூல்தான் இறையன்பு ஐ.ஏ.எஸ். அவர்கள் எழுதிய ‘உன்னை அறிந்தால்’.

இந்த நூலை வாசிப்பதற்கு முன்பு, “என்னைப் பற்றி எனக்கு நன்றாகத் தெரியும்” என்ற எண்ணம்தான் என்னுள் இருந்தது. எனது விருப்பங்கள், திறமைகள், பழக்கங்கள், எண்ணங்கள் என எனக்குத் தெரிந்ததாகவே நினைத்திருந்தேன். ஆனால் நூலை வாசிக்கத் தொடங்கியபோது, நம்மைப் பற்றி நாமே அறிந்து வைத்திருப்பது மிகவும் குறைவு என்பதை உணரத் தொடங்கினேன்.

நாம் பிறரைப் பற்றி அறிந்து கொள்ள அதிக நேரம் செலவிடுகிறோம். பிறருடைய வெற்றி, தோல்வி, பழக்கம், வாழ்க்கை முறை ஆகியவற்றைப் பற்றி ஆராய்கிறோம். ஆனால், நம்முடைய எண்ணங்களை நாமே எத்தனை முறை ஆராய்ந்திருக்கிறோம்? நம்முடைய பலம் என்ன? பலவீனம் என்ன? எதற்காக நாம் கோபப்படுகிறோம்? எது நம்மை மகிழ்ச்சியடையச் செய்கிறது? எது நம்மைத் தளரச் செய்கிறது? நம்முடைய வாழ்க்கையின் இலக்கு என்ன? போன்ற கேள்விகளை நம்மிடம் நாமே கேட்பது அரிது.

இந்த நூல் என்னிடம் அந்தக் கேள்விகளை எழுப்பியது.

“நம்மை நாம் அறிந்து கொள்வதே நம்முடைய முன்னேற்றத்திற்கான முதல் படி” என்ற சிந்தனை எனக்குள் ஆழமாகப் பதிந்தது. நம்முடைய குறைகளை மறைத்துக் கொண்டு வாழ்வது வளர்ச்சி அல்ல. குறைகளை உணர்ந்து, அவற்றைத் திருத்திக் கொள்ள முயல்வதே உண்மையான வளர்ச்சி என்பதைப் புரிந்து கொண்டேன்.

வாழ்க்கையில் ஏற்படும் தோல்விகளையும் இந்த நூலின் பார்வையில் புதிதாகப் பார்க்கத் தொடங்கினேன். தோல்வி வந்துவிட்டால் பல நேரங்களில் நம்மையே குறை கூறுகிறோம். சில சமயங்களில் சூழ்நிலையையும், மற்றவர்களையும் குறை கூறுகிறோம். ஆனால் தோல்வி என்பது நம்மை நிறுத்துவதற்காக வருவதில்லை; நம்முடைய பயணத்தில் எதை மாற்ற வேண்டும் என்பதை உணர்த்துவதற்காக வருகிறது என்பதை உணர்ந்தேன்.

அதேபோல், வெற்றியையும் வேறொரு கோணத்தில் பார்க்கக் கற்றுக் கொண்டேன். பிறரை முந்துவது மட்டுமே வெற்றி அல்ல. நேற்று இருந்த நம்மைவிட இன்று சிறப்பாக இருப்பதே உண்மையான வெற்றி. இந்த எண்ணம் என்னுடைய வாழ்க்கைப் பார்வையில் ஒரு நல்ல மாற்றத்தை ஏற்படுத்தியது.

இந்த நூல் எனக்குக் கற்றுக் கொடுத்த மிக முக்கியமான பண்புகளில் ஒன்று சுயபரிசோதனை. ஒவ்வொரு நாளின் முடிவிலும் சில நிமிடங்களாவது நம்முடைய செயல்களை நாம் சிந்தித்துப் பார்க்க வேண்டும். இன்று நான் செய்த நல்ல செயல் என்ன? யாருடைய மனதையும் புண்படுத்தினேனா? என்னுடைய நேரத்தை எவ்வாறு பயன்படுத்தினேன்? நான் கற்றுக் கொண்ட புதிய விஷயம் என்ன? நாளை என்னை எப்படி மேம்படுத்திக் கொள்ளலாம்? என்று நம்மிடம் நாமே கேட்கத் தொடங்கினால், நம் வாழ்க்கையில் மாற்றம் தவிர்க்க முடியாததாகிவிடும்.

ஒரு ஆசிரியராக இந்த நூலை வாசித்த அனுபவம் எனக்கு இன்னும் ஆழமானதாக இருந்தது. ஏனெனில் மாணவர்களின் எதிர்காலத்தை உருவாக்கும் பொறுப்பில் இருக்கும் ஆசிரியர் முதலில் தன்னையே அறிந்திருக்க வேண்டும். ஒவ்வொரு மாணவனும் ஒரே மாதிரியானவன் அல்ல. ஒருவனிடம் கல்வித் திறமை இருக்கலாம்; மற்றொருவனிடம் கலைத்திறமை இருக்கலாம்; இன்னொருவனிடம் விளையாட்டுத் திறமை இருக்கலாம். ஒருவன் பேசுவதில் சிறந்து விளங்கலாம்; மற்றொருவன் எழுதுவதில் சிறந்து விளங்கலாம்.

எனவே, மாணவர்களை மதிப்பெண்களால் மட்டுமே அளவிடக் கூடாது என்ற எண்ணம் என்னுள் மேலும் வலுப்பெற்றது. ஒவ்வொரு மாணவனுக்குள்ளும் ஒளிந்திருக்கும் தனித்திறமையை அடையாளம் கண்டு வெளிக்கொணர்வதே ஆசிரியரின் மிகப்பெரிய கடமை என்பதை இந்த நூல் எனக்கு நினைவூட்டியது.

மேலும், இந்த நூல் எனது வாசிப்புப் பழக்கத்தையும் சிந்தனை முறையையும் மாற்றியது. ஒரு புத்தகத்தை வாசித்து முடித்துவிடுவது வாசிப்பின் நிறைவு அல்ல. அதில் கிடைத்த கருத்துகளை நம் வாழ்க்கையோடு ஒப்பிட்டுப் பார்ப்பதுதான் உண்மையான வாசிப்பு. ஒரு நல்ல நூல் நம்மிடம் பதில்களை மட்டும் தருவதில்லை; நம்மைச் சிந்திக்க வைக்கும் கேள்விகளையும் தருகிறது.

‘உன்னை அறிந்தால்’ என்ற தலைப்பே எனக்கு ஒரு வாழ்க்கைப் பாடமாக மாறிவிட்டது. உலகத்தை மாற்ற வேண்டும் என்று நினைப்பதற்கு முன்பு, நம்மை மாற்றிக் கொள்ள வேண்டும். பிறரைப் புரிந்து கொள்ள வேண்டும் என்றால் முதலில் நம்முடைய மனதைப் புரிந்து கொள்ள வேண்டும். வாழ்க்கையில் உயர வேண்டும் என்றால் முதலில் நம்முடைய திறமையை அடையாளம் காண வேண்டும்.

இந்த நூலை வாசித்த பிறகு நான் என்னிடம் அடிக்கடி கேட்டுக்கொள்ளும் கேள்வி:

“நான் உண்மையில் யார்?”

இந்தக் கேள்விக்கு ஒரே நாளில் விடை கிடைத்துவிடாது. வாழ்க்கையின் ஒவ்வொரு அனுபவமும், ஒவ்வொரு தோல்வியும், ஒவ்வொரு வெற்றியும் அந்த விடையை நோக்கி நம்மை அழைத்துச் செல்கின்றன.

எனக்கு ‘உன்னை அறிந்தால்’ ஒரு புத்தகம் மட்டுமல்ல; அது ஒரு மனக்கண்ணாடி. அந்தக் கண்ணாடியில் என்னுடைய முகத்தை மட்டும் பார்க்கவில்லை; என்னுடைய எண்ணங்களையும் பார்த்தேன். என்னுடைய குறைகளையும் உணர்ந்தேன்; என்னுடைய திறமைகளையும் கண்டறிந்தேன். என்னை நான் திருத்திக் கொள்ள வேண்டிய இடங்களையும் புரிந்து கொண்டேன்.

இறுதியாக, இந்த நூல் எனக்குக் கற்றுக் தந்த மிகப்பெரிய பாடம் இதுதான்:

“உலகத்தை அறிந்தவன் அறிவாளியாக இருக்கலாம்; தன்னை அறிந்தவனே உண்மையில் வாழ்க்கையை அறிந்தவன்.”

அந்த வகையில், இறையன்பு அவர்களின் ‘உன்னை அறிந்தால்’ என்னுடைய வாசிப்பு அனுபவத்தைத் தாண்டி, என்னை நான் அறிந்து கொள்ளத் தொடங்கிய ஒரு புதிய பயணத்தின் தொடக்கமாக அமைந்தது. ஒரு நல்ல புத்தகம் கையில் இருந்து இறங்கிய பிறகும் மனதில் தொடர்ந்து பேசிக் கொண்டே இருக்கும். அந்த வகையில், ‘உன்னை அறிந்தால்’ என்ற நூல் இன்னும் என்னோடு பேசிக் கொண்டிருக்கிறது.

- பா.நூருல்லாஹ், முதுகலைத் தமிழாசிரியர், அல் அமீன் மேல்நிலைப்பள்ளி, மதுரை