மொட்டைமாடி மொட்டைமாடி

1. வீடு: உன் உலகம்

வீட்டிற்குள்ளே
உன் சொந்தம் மட்டுமே உலகம்.
வீட்டுக்கு மேல்
உலகமே உனக்குச் சொந்தம்.

2. மடி தேடும் படிகள்

வீட்டுக்கு மேலும் மேலும்
சாய்ந்து கொள்ள
ஒரு கூடுதல் மடி –
சில படிகள் தூரத்தில்.

3. போதிமரத்தின் நிழல்

கூரைக்கு மேல்
ஒரு பரந்து விரிந்த
போதிமரம் –
எட்டிப் பிடிக்கும்
ஞானத்தின் இலைகள்.

4. பஞ்சம்

ஆறில்லா ஊரில்
நீர்ப்பஞ்சம்.
மொட்டை மாடியில்லா வீட்டில்
அன்புப்பஞ்சம்.

5. படியேறும் வானம்

மொட்டைமாடிப் படிகள்
நேராக வானத்தைத் தொடும்;
ஒவ்வொரு அடியும்
உனக்கொரு கிரீடம்.

6. பிடிவாதங்கள் கழன்று

மொட்டைமாடிப் படியேறும்போது
பிடிவாதங்கள்
கீழே உதிர்கின்றன –
காற்றில் மிதக்கும்
வெறும் சொற்கள்.

7. தினசரி தபசு

நலமாய் வாழ
வருடம் ஒருமுறை
சபரிமலைப் படி.
ஆனால் தினந்தினம்
மொட்டைமாடிப் படி!

8. படியேறும் பரிணாமம்

படியேறினால்
கோபம் இறங்கி விடும்;
காதல் மேலேறும்.
நான் தினந்தோறும்
மொட்டைமாடிப்
படியேறும் பெருமாள்!

- அ.சீனிவாசன்