ஒரு இரகசியப்பெட்டியும், கள்ளச்சாவியும்

உனக்கான
எந்த ஒரு சொல்லையும்
நீ என்னிடத்தில்
சொன்னதேயில்லை..!

உன் ஊருக்குச் செல்லும்
வழியை ஒரு போதும்
நீயெனக்கு
அறிமுகப்படுத்தவில்லை..!

உனக்கான மரணம்
அந்த வழியாகத் தான்
சென்றிருக்கக்கூடும்..!

இளமையின்
இரகசியப்பெட்டியில்
பூட்டி வைத்திருந்த உயிரை

மரணம் -
கள்ளச்சாவிப் போட்டு
திறந்து விட்டது..!  

இசைக்கத் துவங்கும் போதே
ஊமையாகிப்போன
புல்லாங்குழல் நீ..!

உனக்கான இராகத்தை
என் மூச்சுக்காற்று..
இசைத்துக் கொண்டே இருக்கிறது..!

மரணம் -
ஒரு முறை தான்
நிகழும் என்பதை
நீ பொய்யாக்கி விட்டாய்..!

உன் வழியாக எனக்கு
ஒரு முறை
நிகழ்ந்து விட்டது..!

இன்னொரு முறைக்காக
காத்திருப்பின் வரிசையில்
வாழ்க்கை
நின்று கொண்டிருக்கிறது..!