thozhilalar_otrumai_100

தொடர்பு முகவரி - 358, வள்ளுவர் நகர், 1-ஆம் தெரு (கிழக்கு)
கோவில்பட்டி, தூத்துக்குடி மாவட்டம், தமிழ்நாடு 628 501
கைபேசி 075980 69667 e-mail: இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

புரட்சிகர பாதையில் அணிவகுக்க தொழிலாளர்கள், உழவர்கள், பெண்கள், இளைஞர்கள் உறுதியேற்பு

வீரத்தியாகி பகத் சிங்கினுடைய 109-ஆவது பிறந்த நாளைக் கொண்டாடுவதற்காக அரியானா குருஷேத்திராவில் நடைபெற்ற ஒரு மக்கள் பேரணியில் ஆயிரக்கணக்கான தொழிலாளர்கள், உழவர்கள், பெண்கள் மற்றும் இளைஞர்கள் பேரார்வத்தோடு பங்கேற்றனர். பங்கேற்றவர்கள் அரியானாவின் பல்வேறு மாவட்டங்களிலிருந்தும் வந்திருந்தனர். அணி வகுத்துச் சென்ற அவர்கள், வீரத்தியாகி பகத் சிங்கினுடைய வாழ்க்கையையும், பணிகளையும் போற்றி முழக்கங்களை எழுப்பினர். அவர்கள் முதலாளித்துவத்திலிருந்து சோசலிச புரட்சிகர மாற்றத்தை நிறைவேற்றுவதில் தங்களுடைய அசைக்க முடியாத உறுதியை வெளிப்படுத்தினர். பேரணி நடைபெற்ற வளாகம் முழுவதும் வீரத்தியாகி பகத் சிங் மற்றும் பிற புரட்சியாளர்களுடைய உணர்வூட்டும் முழக்கங்களால் அலங்கரிக்கப்பட்டிருந்தது.

Bhagavita singhபேரணியை வீரத்தியாகி பகத் சிங் திஷா அறக் கட்டளை ஏற்பாடு செய்திருந்தது. 18 அடி உயர வெண்கலத்தாலான பகத் சிங்கினுடைய சிலையை ஜன் சங்கர்ஷ் மன்ச், அரியானாவின் தலைவர் திரு பூல் சிங் கௌதமால் திறந்து வைத்தார். குருஷேத்திரா இரயில் நிலையத்தின் அருகிலேயே பகத் சிங்கின் சிலை நிறுவப்பட்டிருப்பது, முதலாளித்துவத்திற்கு எதிராக புரட்சியும் சோசலிசமும் வெற்றி பெறுவதற்காக நமது நாட்டு உழைக்கும் மக்களைத் திரட்டுவதில் வீரத்தியாகி பகத் சிங் திஷா அறக் கட்டளை கொண்டுள்ள உறுதியைப் பிரதிபலிப்பதாக இருக்கிறது.

பேரணியைத் தொடர்ந்து ஒரு பொதுக் கூட்டம் நடைபெற்றது. ஜன் சங்கர்ஷ் மன்ச்னுடைய துணைத் தலைவர் தோழர் சுதேஷ் குமாரி நிகழ்ச்சிகளை நடத்தினார். கூட்டத்திற்குத் தலைமை தாங்க டாக்டர்.சி.டி.சர்மா அவர்களை அவர் அழைத்தார்.

பின்னர் அவர், வீரத்தியாகி பகத் சிங் திஷா அறக் கட்டளையின் தலைவர் தோழர் ஷியாம் சுந்தர், ஜன் சங்கர்ஷ் மன்ச் அரியானாவின் மாநிலத் தலைவர் திரு பூல் சிங் கௌதம், இந்திய கம்யூனிஸ்டு கெதர் கட்சியின் செய்தித் தொடர்பாளர் தோழர் பிரகாஷ் ராவ், கிரான்திகாரி நௌஜவான் சபாவின் தலைவர் அமித் சக்ரவர்த்தி, இன்குலாபி மஸ்தூர் கேந்திரா-வின் துணைத் தலைவர் நாகேந்தர், புரோகிரசிவ் ஆர்கனெய்சேசன்ஸ் ஆப் பீப்பிள்-னுடைய தலைவர் பட்டானி சீனிவாச ராவ், தில்லி புரோகிரசிவ் போரத்தின் பேராசிரியர் நாரேந்திர் நாவட், மஸ்தூர் ஷியோக் கேந்திரா-வின் திரு ராம்நிவாஸ் குஷ், ஷிரம்ஜீவி சங்கர்ஷ் மோர்ச்சா-வின் தலைவர் திரு பால் சிங், நிர்மான் காரிய மஸ்தூர் - மிஸ்திரி யூனியனின் பொதுச் செயலாளர் திரு பகவத் சுரூப் சர்மா, சாம்தாமுலக் மகிலா சங்கத்தின் ஒருங்கிணைப்பாளர் டாக்டர்.சுனிதா வீரத்தியாகி, ஸ்டுடன்ட்ஸ் ஆர்கனெஸ்சேசன் பார் சோசலிச டெமாகிரசி ஒருங்கிணைப்பாளர் கவிதா வித்ரோகி மற்றும் நேஷ்னல் கன்பெடரேஷன் ஆப் தலித் ஆர்கனைசேஷன்ஸ்-இன் தலைவர் திரு சுரேஷ் டானக் ஆகியோரை மேடையில் வந்து அமருமாறு அழைத்தார்.

தோழர் சுதேஷ் தன்னுடைய துவக்கவுரையில், ஆங்கிலேயர்கள் வெளியேறிய பின்னர், முதலாளிகள் ஆட்சியைக் கைப்பற்றுவார்களேயானால், உழைக்கும் மக்களுடைய வாழ்க்கை நரகமாகிவிடுமென பகத் சிங் தெளிந்த சிந்தனையோடும், தொலை நோக்குப் பார்வையோடும் நம்முடைய மக்களுக்கு எச்சரிக்கை விடுத்ததை நினைவு கூர்ந்தார்.

ஒரு மதிப்புள்ள வாழ்க்கை நடத்துவதற்கு ஒருவருக்கு ரூ 10,000 தேவைப்படுகையில் ரூ 2000 மட்டுமே ஊதியமாகக் கொடுக்கப்படுகிறது. இரவு 8 மணிக்குப் பிறகு பெண்கள் வெளியே போக அச்சப்படுகிறார்கள். தேர்தல் பரப்புரைகளுக்காக கட்சிகள் நூற்றுக் கணக்கான கோடி ரூபாய்களை வாரி இறைக்கிறார்கள். தேர்ந்தெடுக்கப்பட்டு வந்த பின்னர், அத்தியாவசியப் பொருட்களின் விலைகளை உயர்த்துவதன் மூலம் அதை உழைக்கும் மக்களிடமிருந்து கரந்துவிடுகின்றனர்.

மருத்துவம் பெறுவதற்காக ஒருவர் காலையிலிருந்து மாலை வரை அரசு மருத்துவமனைகளில் காத்திருந்து நேரத்தைக் கழிக்க வேண்டும், அல்லது தனியார் மருத்துவமனைகளுக்குச் சென்று நமது பணம் கொள்ளையடிக்கப்படுவதை அனுமதிக்க வேண்டும். மக்களைத் தாக்குவதற்கு வகுப்புவாத வன்முறை பயன்படுத்தப்படுகிறது. இவற்றிலிருந்து மீளவதற்கு ஒரே வழி புரட்சிக்கு வேலை செய்வதாகும் என்றார் அவர்.

நிகழ்ச்சியில் உரையாற்றிய வீரத்தியாகி பகத் சிங் திஷா அறக்கட்டளையின் தலைவர் தோழர் ஷியாம் சுந்தர் வீரத்தியாகி பகத் சிங்கினுடைய சிலையை வைப்பதன் முக்கியத்துவத்தை எடுத்துரைத்தார். இந்துஸ்தானி கெதர் கட்சியின் வீரத்தியாகி கர்தார் சிங் சாராபா-வின் உருவப் படத்தை தன் பையில் பகத் சிங் எப்போதும் வைத்திருந்த போதிலும். பகத் சிங் சிலை வழிபாட்டின் ஆதரவாளர்கள் அல்ல. நிலைமையை மாற்றமின்றி அப்படியே நீடிக்க விரும்புபவர்கள், புரட்சியாளர்களை சிலைகளாக்கி அவர்களுக்கு பூசை செய்வதோடு திருப்தியடைகிறார்கள். வீரத்தியாகி பகத் சிங்கினுடைய நினைவகமானது நமக்கு புரட்சிக்கான ஒரு அடையாளமாகும்.

இப்படிப்பட்ட அடையாளங்கள் வகுப்புப் போராட்டத்தைப் பிரதிபலிக்கின்றன. சோவியத் யூனியன் உடைந்த பின்னர், லெனின், ஸ்டாலினுடைய சிலைகள் உடைக்கப்பட்டது, முதலாளி வகுப்பு பாட்டாளிகளுக்கு எதிராக நடத்திய வகுப்புப் போராட்டத்தின் வெளிப்பாடாகும். பகத் சிங்கினுடைய சிலை, புரட்சிக்காக செயல்படுவதில் உறுதியாக இருக்க வேண்டுமென சக்திவாய்ந்த அழைப்பாக நமக்கு இருக்கிறது. பகத் சிங்கினுடைய பணிகளைப் பற்றி படித்தறிய வேண்டுமென இளைஞர்களுக்கு கொடுக்கப்படும் அறைகூவலாகும் அது. பகத் சிங் தூக்கிலிடப்பட்ட அன்று கூட அவர் லெனினுடைய புத்தகத்தைத் தான் படித்துக் கொண்டிருந்தார். அவர் சோசலிச புரட்சிப் போராட்டத்திற்கான அடையாளம் என்பதை நாம் புரிந்து கொள்ள வேண்டும்.

செல்வத்தை உற்பத்தி செய்பவர்கள் என்றும், இந்த செல்வத்தைக் கொள்ளையடிப்பவர்கள் என்றும் இரண்டு வகுப்புகளாக நமது சமுதாயம், பிளவுண்டு இருப்பதை தோழர் சியாம் சுந்தர் விளக்கிக் கூறினார். கொள்ளையடிப்பவர்கள் தான் இன்று ஆட்சியாளர்களாக இருக்கிறார்கள். அவர்கள் அட்டையைப் போல இரத்தம் உறிஞ்சிகளாக இருக்கிறார்கள். நம்முடைய மோசமான நிலைமைகளுக்கு, நாம் முற்பிறவிகளில் செய்த பாவங்களின் விளைவு என்றும், நம்முடைய அடுத்த பிறவியில் நல்ல வாழ்க்கை கிடைக்கும் என்று நம்பியிருக்க வேண்டுமெனவும் அவர்கள் விரும்புகிறார்கள். தொழிலாளர்கள் தங்களுடைய மோசமான நிலைமைகளுக்கு கடவுளைக் குறை கூறிக் கொண்டிருப்பதில் எந்தப் பயனும் இல்லையெனவும், இதற்கு ஆங்கிலேய ஆட்சியாளர்களே காரணமெனவும் பகத் சிங் தொழிலாளர்களை எச்சரித்தார். பகத் சிங் வானத்திலிருந்து வந்துவிட வில்லை. நாம் அனைவருமே பகத் சிங்குகளாக மாற முடியும். அவருடைய வாழ்க்கையிலிருந்தும், உயர்வான சிந்தனையிலிருந்தும் நாம் புத்துணர்வு பெற வேண்டும். பகத் சிங்கினுடைய வேலைகளை முன்னெடுத்துச் செல்வதே நாம் அவருக்கு செலுத்தும் உண்மையான புகழுரையாக இருக்கும்.

நம்முடைய மாபெரும் தியாகிக்கு அவருடைய பிறந்தநாளில் மிகவும் பொருத்தமான புகழஞ்சலியாக இந்த நிகழ்ச்சியை ஏற்பாடு செய்திருப்பதற்கு, வீரத்தியாகி பகத் சிங் திஷா அறக்கட்டளையைப் பாராட்டி இந்திய கம்யூனிஸ்டு கெதர் கட்சியின் செய்தித் தொடர்பாளர் தோழர் பிரகாஷ் ராவ் தன்னுடைய உரையைத் துவக்கினார். ஆங்கிலேய ஆட்சிக் காலம் முழுவதும் இரண்டு போக்குகள் இருந்தன என்பதை அவர் சுட்டிக் காட்டினார். அவை ஆங்கிலேய காலனி ஆட்சியைத் தூக்கியெறிவதற்காக சமரசமின்றிப் போராடியவர்களுடைய பாதை ஒன்றாகவும், காலனிய ஆட்சியோடு ஒத்துழைத்து சமரசம் செய்து கொண்டவர்களுடைய போக்கு இன்னொன்றாகவும் இருந்தன.

1857 மாபெரும் கெதர் எழுச்சி முதல் பாதைக்கு உரியதாகும். இந்த எழுச்சியில் கிளர்ந்தெழுந்தவர்கள், மத நம்பிக்கைகளுக்கு அப்பாற்பட்ட அளவில் ஒரே தட்டியின் கீழ் ஒன்று திரண்டு, நம்முடைய முதல் கடமையானது அன்னிய ஆக்கிரமிப்பாளர்களை தூக்கியெறிவதும், அதற்குப் பின்னர் எப்படிப்பட்ட இந்தியா நமக்கு வேண்டுமென்பதைத் தீர்மானிப்பதும் ஆகுமென அறிவித்தனர். "நாமே இந்தியா, நாமே இந்தியாவின் மன்னர்கள்" என்ற அறைகூவலையொட்டி அவர்கள் திரண்டெழுந்தனர். இன்னொரு போக்கானது ஆங்கிலேயர்களோடு துரோகத்தனமாக ஒத்துழைத்த டாடாக்கள், பிர்லாக்கள், நேருக்கள், காந்திகள், குவாலியர், பட்டியாலா மன்னர்கள் மற்றும் பிறருடைய போக்காகும்.

ஆங்கிலேய காலனிய ஆட்சியைத் தூக்கியெறிவதற்காக ஒரு நூற்றாண்டிற்கு முன்னர் புரட்சியாளர்கள் இந்துஸ்தானி கெதர் கட்சியை உருவாக்கினர். கர்தார் சிங் சாராபா, விஷ்னு கணேஷ் பிங்லே, சச்சிந்திர நாத் சன்யால் மற்றும் எண்ணெற்ற புரட்சியாளர்கள் இந்தப் புரட்சிகர இயக்கத்தில் அங்கம் வகித்தனர். சரியாக நூறு ஆண்டுகளுக்கு முன்னர் காலனியர்கள் காந்தியை இந்தியாவிற்கு வரவேற்று, காந்தியையும், காலனிய ஆட்சியோடு அவருடைய சமரசப் பாதையையும் புரட்சிகர பாதைக்கு ஒரு மாற்றாக அவர்கள் முன்னேற்றவும், பரப்புரை செய்யவும் தொடங்கினர்.

பின்னர் இந்துஸ்தான் ரிப்பளிகன் அசோசியேசன் போன்ற அமைப்புக்களை புரட்சியாளர்கள் அமைத்தனர். சோவியத் யூனியனில் புரட்சியின் வெற்றியால் ஆர்வமுற்று வீரத்தியாகி பகத் சிங், இந்துஸ்தான் ரிப்பளிகன் அசோசியோசனை இந்துஸ்தான் சோசலிச ரிப்பளிகன் அசோசியோசனாக மாற்றியமைத்தார். இன்னொரு பக்கம், காலனியர்கள் கட்சிகளையும், அமைப்புக்களையும் உருவாக்கி, செழிப்பூட்டினார்கள். அவை ஆங்கிலேய மணி மகுடத்திற்கு உண்மையான விசுவாசிகளாக இருந்தனர்.

அவர்கள் மக்களைப் பிளவுபடுத்தி, காலனிய ஆட்சியைத் தூக்கியெறியும் புரட்சிகர பாதையிலிருந்து அவர்களைத் திசை திருப்பினர். இன்று இந்த இரு போக்குகளும், உழைப்பாளர்களுடைய சுரண்டலுக்கும் ஒடுக்குமுறைக்கும் முடிவு கட்ட விரும்புபவர்கள் ஒரு போக்காகவும், இன்றுள்ள அமைப்பையும், அரசையும் வலுப்படுத்தி, அதை அலங்கரித்து மக்களின் சுரண்டலையும், ஒடுக்குமுறையையும் தொடர விரும்புபவர்கள் இன்னொரு போக்காகவும் இருக்கின்றன.

தொழிலாளி வகுப்பினரும், உழைக்கும் மக்களும் அரசாங்கத்தையும், அரசையும் வேறுபடுத்திக் காண்பது மிகவும் அவசியமென தோழர் பிரகாஷ் ராவ் சுட்டிக் காட்டினார். தேர்தல்கள் மூலம் அதிகாரத்திற்கு வரும் அரசாங்கங்கள், ஆளும் முதலாளி வகுப்பின் மேலாண்மைக் (மேனேஜ்மென்ட்) குழு என்பதன்றி வேறு எதுவும் இல்லை. தங்களுடைய நிகழ்ச்சி நிரலை மேலும் திறமையாக நடைமுறைப்படுத்துவதற்காக, முதலாளிகள் தங்களுடைய மேலாண்மைக் குழுக்களை அவ்வப்போது மாற்றுகிறார்கள். சரியான கட்சியை அதிகாரத்திற்குத் தேர்ந்தெடுப்பதன் மூலம் இந்த அமைப்பிலேயே மக்களுடைய விருப்பங்களை நிறைவேற்ற முடியும் என்ற மாயையை அவர்கள் உருவாக்குகிறார்கள். அரசாங்கங்களை மாற்றுவது, அதிகாரத்தில் இருக்கும் வகுப்பை மாற்றுவதில்லை என்பதை நாம் புரிந்து கொள்ள வேண்டும். சுரண்டலுக்கும் ஒடுக்குமுறைக்கும் முடிவு கட்ட, சுரண்டுபவர்கள் மற்றும் ஒடுக்குபவர்களுடைய அரசை நாம் அகற்ற வேண்டும். இங்கு கூடியுள்ளவர்கள் அனைவருமே பகத் சிங் பங்கேற்ற அதே புரட்சிகரப் போக்கின் அங்கமாவோம். புரட்சியின் மகத்தான பணியின் வெற்றிக்கு நம்மை நாமே அர்பணித்துக் கொள்ளுவோமென்று கூறி தோழர் பிரகாஷ் ராவ் உரையை முடித்துக் கொண்டார்.

ஆங்கிலேயர்களோடு கூடிக் குலாவியர்களுக்கு எதிராக வீரத்தியாகி பகத் சிங் போராடினார் என தோழர் அமித் சக்கரவர்த்தி கூறினார். முன்னேற்றத்திற்கான பாதையானது கடந்த காலத்திலிருந்து அடிப்படையில் உடைத்துக் கொண்டு வரும் புரட்சி மற்றும் சோசலிசப் பாதையே என்பதில் பகத் சிங் தெளிவாக இருந்தார். நாம் அனைவரும் போராடிக் கொண்டிருக்கும் புதிய அமைப்பிற்கான ஒரு அடையாளமாக பகத் சிங்கினுடைய சிலை இருக்கிறது என்று அவர் குறிப்பிட்டார். புரட்சி என்ற இலக்கை அடைவதற்காக பகத் சிங் போல நாம் உறுதியாகவும், சமரசமின்றியும் போராடவேண்டுமென்று கூறி உரையை முடித்துக் கொண்டார்.

திரு நாகேந்திர சிங், நம்முடைய மக்களுடைய இதயத்தில் பகத் சிங் என்றென்றும் வாழ்ந்து கொண்டிருக்கிறார் என்றார். தற்போதைய பாகிஸ்தானில் லாகூரில் பகத் சிங் தூக்கிலிடப்பட்ட இடத்திற்கு பகத் சிங் சௌக் என்று பெயரிட வேண்டுமென்றும் அவருடைய சிலையை அங்கு நிறுவ வேண்டுமென்றும் அங்குள்ள மக்கள் கேட்டு வருகிறார்கள். இது புரட்சியின் அடையாளமாக இந்தியாவில் மட்டுமின்றி பாகிஸ்தானிலும் பகத் சிங் இருந்து வருகிறார் என்பதைக் காட்டுகிறது. பகத் சிங் தன்னுடைய தந்தைக்கு கடைசியாக எழுதிய கடிதத்தில், தான் ஒவ்வொரு நாள் காலையிலும் செவ்வானமாக உதிப்பேனென்று குறிப்பிட்டிருந்ததை அவர் எடுத்துக் கூறினார். எல்லா சுரண்டலுக்கும், பாகுபாடுகளுக்கும் முடிவு கட்ட வேண்டுமென்றும் ஒரு புதிய மனிதனை உருவாக்க வேண்டுமென்றும் வீரத்தியாகி பகத் சிங் கொண்டிருந்த கருத்துக்கள் காலை செவ்வானத்தைப் போல எல்லா இடங்களுக்கும் பரவி வருகிறதென திரு நாகேந்திர சிங் குறிப்பிட்டார்.

மக்களுக்கு எடுத்துக் காட்டவும், ஆர்வமூட்டவும் மிகச் சிறந்த அடையாளம் தான் வீரத்தியாகி பகத் சிங் என பேராசிரியர் நரேந்தர் சிங் ராவட் கூறினார். சோசலிசத்திற்கான கோரிக்கைதான் இக் காலத்தின் தேவையாகும் என்றார். நாம் மக்களோடு வேலை செய்து, நம்முடைய உரிமைகளுக்காகப் போராடி, மக்களை விழிப்புணர்வு கொண்டவர்களாக மாற்ற வேண்டும் என்றார்.

ஆந்திர பிரதேச புரோகிரசிவ் ஆர்கெனெய்சேசன்ஸ் ஆப் பீப்பீள்-ஐ சார்ந்த திரு பாட்டினி சீனிவாசராவ், ஆங்கிலேய அதிகாரிகளுக்கு பதிலாக இந்திய முதலாளி வகுப்பின் பிரதிநிதிகள் ஆட்சியாளர்களாக மாறுவார்களேயானால் மக்களுக்கு அதனால் எந்தப் பயனும் இல்லையென பகத் சிங் தெளிவாகக் கூறியதை நினைவு கூர்ந்தார். அமைப்பை மாற்ற வேண்டிய அவசியத்தை அவர் வலியுறுத்தினார்.

மக்களுடைய சிறப்பான பண்புகளையும், செயல்களையும் வெளிக் கொண்டு வருவதற்கு ஒரு புரட்சிகர அமைப்பின் முக்கியத்துவத்தை திரு பூல் சிங் கௌதம் வலியுறுத்தினார். பாசிச சக்திகளுக்கு எதிராகப் போராடுவதற்கு, சாதி, மத வேறுபாடுகளைக் கடந்த அளவில் ஒன்றுபட்டுப் போராட தொழிலாளி வகுப்பு முன்வர வேண்டுமென அவர் கூறினார்.

பகத் சிங்கை பூசை செய்வதற்கான ஒரு சிலையாக மாற்றி விட்டால், அதனால் முதலாளிகளுக்கு எந்தப் பிரச்சனையும் இல்லை. ஆனால் பகத் சிங் எதற்காகப் போராடினாரோ அதை நீங்கள் நடைமுறைப்படுத்தத் தொடங்கினால், அரசின் எல்லா நிறுவனங்களும் குர்காவூனில் மாருதி தொழிலாளர்களை ஒடுக்குவது போல உங்களையும் ஒடுக்க முயற்சிப்பார்கள் என்றார்.

ஆளும் வகுப்பினரின் தாக்குதல்களுக்கு இந்தக் கூட்டம் ஒரு சரியான பதிலடியென திரு பகவத் சொரூப் சர்மா கூறினார். சுரண்டலையும், ஒடுக்குமுறையையும் அகற்றுவதற்கான போராட்டத்தின் ஒரு அடையாளம் தான் வீரத்தியாகி பகத் சிங்கினுடைய இந்தச் சிலையாகும் என்றார் அவர். நாங்கள் போராடவும், ஒற்றுமையோடு புரட்சியைக் கொண்டுவரவும் தயாரென அவர் அறிவித்தார். ஒடுக்கப்பட்ட எல்லா பிரிவு மக்களும் புரட்சிக்காக ஒரு மாபெரும் சக்தியாக எழ வேண்டுமென்ற ஒரு கவிதையோடு அவர் தன்னுடைய உரையை முடித்துக் கொண்டார்.

பொது மக்களிடையே வீரத்தியாகி பகத் சிங்கினுடைய சிந்தனைகளைப் பரப்பிவதற்காக அமைப்புக்களுக்கு திரு சுரேஷ் தான்க் வணக்கம் கூறினார். இந்த அமைப்பிலுள்ள அரசியல் கட்சிகள் மக்களைப் பிளவுபடுத்துவதற்காக வேலை செய்கின்றன. மக்களுடைய பிரச்சனைகளுக்குத் தீர்வு காண்பதற்கு பதிலாக, அவை சாதி, மத அடிப்படையில் மக்களைப் பிளவுபடுத்தியும், இளைஞர்களுடைய சக்திகளைச் சுரண்டியும், அல்லது அவர்களை போதைக்கு அடிமையாக்கி சீரழிக்கவும் செய்கின்றன என்றார் அவர்.

டாக்டர் சுனிதா தியாகி, மகளிர் மீது ஆளும் வகுப்பினருடைய தாக்குதல்களைக் குறிப்பிட்டார். ஆளும் வகுப்பின் ஒரு அரசியல்வாதியின் பேச்சைக் குறிப்பிட்ட அவர், ஆடவரை மகிழ்விப்பதற்கான பொருட்களாக பெண்களை அவர்கள் நினைக்கிறார்கள் என்றார். பெண்களைப் பற்றிய பகத் சிங்கின் அணுகு முறையோடு அவர் இதை ஒப்பிட்டார். ஆயிரக் கணக்கான பகத் சிங்குகளை நம்மிடையே நாம் உற்பத்தி செய்ய வேண்டுமென அவர் உறுதி கூறினார்.

உழைப்பாளர்களின் விடுதலைக்கு வீரத்தியாகி பகத் சிங் காட்டிய வகுப்புப் போராட்டப் பாதையே ஒரே வழியென்று கூறி, தொழிலாளர்கள் ஒன்றுபட வேண்டுமென திரு பால் சிங் கேட்டுக் கொண்டார்.

வீரத்தியாகி பகத் சிங்கைப் போலவே, கவிதா வித்ரேகியும் பகத் சிங்கினுடைய வேலையை முன்னெடுத்துச் செல்லும் தோழர்களே தன்னுடைய உண்மையான உறவினர்களென தான் உணர்வதாக கூறினார். போர் தொடர்கிறது என்றும், சுரண்டல் முடிவுக்கு வரும் வரை அது தொடர்ந்து கொண்டே இருக்குமெனவும் பகத் சிங் கூறியதை நினைவூட்டி அவர் தன் உரையை முடித்தார்.

இந்த வரலாற்றுச் சிறப்பு மிக்க நிகழ்ச்சியில் நேரத்தை ஒதுக்கி வந்து பங்கேற்ற அனைவரையும் டாக்டர் சி.டி.சர்மா வாழ்த்தினார். பாசிசம் வளர்ந்து வருவது, சோசலிச புரட்சி நெருங்கி வருவதைக் காட்டுகிறது என்றார் அவர். வீரத்தியாகி பகத் சிங்கினுடைய புரட்சிகர பண்புகளை வெளிக் கொண்டு வருவதற்காக செய்யப்பட்ட வேலையை அவர் பாராட்டினார். ஒரே ஆண்டில் சுய ஆட்சியை அடைவோமென்ற காந்தியின் வாக்குறுதி முழுவதுமாக தோல்வியடைந்த பின்னர், எங்கும் விரக்தி நிலவி வந்த நிலையில், ஆங்கிலேய ஆட்சிக்கு எதிராக பொது மக்களுடைய எதிர்ப்பை பகத் சிங்தான் மீண்டும் தட்டி எழுப்பினார்.

கெதர் இயக்கத்தின் சுயநலமற்ற வேலையிலிருந்து ஆர்வத்தையும், மகத்தான அக்டோபர் புரட்சியிலிருந்து புரட்சிக்குப் பாதையை காட்டும் மார்க்சிச-லெனினிச அறிவியலையும் பகத் சிங் கற்றுக் கொண்டார். அவர் ஆரம்பித்த அந்த முக்கிய படிப்பு, அவருடைய வாழ்க்கையின் கடைசி நாள் வரை தொடர்ந்தது. வன்முறை கலாச்சாரத்திலிருந்து பகத் சிங் தன்னை தெளிவாக விலக்கிக் கொண்டார். வரலாற்றின் சில குறிப்பிட்ட சந்திப்புகளில் மட்டுமே வன்முறைக்கு ஒரு பங்கு இருக்கிறதென அவர் கூறினார்.

கருத்தியல் மற்றும் நடைமுறை வேலையின் பெரும் முக்கியத்துவத்தை அவர் நன்றாக புரிந்து வைத்திருந்தார். சமூக மாற்றத்திற்காகவும், பொருளாதார மற்றும் அரசியல் மாற்றத்திற்காகத் தொடர்ந்து போராடுவதற்கு தாழ்த்தப்பட்ட மக்கள் அணிதிரள வேண்டுமென பகத் சிங் கூறியதாக அவர் கூறினார். இது, 1915 கெதர் எழுச்சியினுடைய நூற்றாண்டாகும், இன்னும் இரண்டாண்டுகளில் மாபெரும் அக்டோபர் புரட்சியின் நூற்றாண்டு விழாவை நாம் கொண்டாடுவோமென டாக்டர்.சர்மா கூறினார். எல்லா புரட்சிகர சக்திகளுடைய போராட்ட ஒற்றுமையை வலுப்படுத்தி, போராட்டத்தை முன்கொண்டு செல்ல வேண்டுமென அவர் அனைவரையும் கேட்டுக் கொண்டார்.

வீரத்தியாகி பகத் சிங்கினுடைய வாழ்க்கையையும், பணிகளையும் போற்றி முழக்கங்கள் எழுப்பியும், அனைவரையும் ஒன்றுபடுத்தி அணிதிரட்டி பகத் சிங்கினுடைய கனவுகளை நனவாக்க வேண்டுமென ஒவ்வொருவருடைய இதயத்தில் உறுதியோடும், பேரார்வத்தோடும் கூட்டம் நிறைவு பெற்றது.

Pin It

நவம்பர் 22 அன்று பாராளுமன்ற குளிர்காலத் தொடர் துவங்கியிருக்கிறது. அண்மையில் அமைச்சரவை ஒப்புதல் வழங்கிய பல்வேறு புதிய மசோதாக்கள், பாராளுமன்றத்தின் ஒப்புதலுக்கு முன்வைக்கப்படும்.

காப்பீடுத் துறையிலும், ஓய்வூதிய நிதியிலும் அந்நிய முதலீடு நுழைவது பற்றிய இரண்டு மசோதாக்களும் கொண்டு வரப்பட உள்ளன. இது தொழிலாளி வர்க்கமும், நடுத்தட்டு மக்களுடைய எல்லாக் குடும்பங்களும் தங்களுடைய கடுமையான உழைப்பின் மூலம் சம்பாதித்த சேமிப்புக்கள், முதலாளித்துவ இலாப வேட்டைக்காரர்களுக்கும், சூதாட்டக்காரர்களுக்கும் திறந்துவிடக்கூடிய அச்சுறுத்தல் இருப்பதால் இவர்களுக்கு கவலையளிப்பதாக இருக்கிறது. மேலும், நிலம் கையகப்படுத்துவது குறித்தும், மறுவாழ்வளிப்பது குறித்தும் ஒரு மசோதா வர இருக்கிறது. இது விவசாயிகளுக்கும், பிற நிலம் வைத்திருப்பவர்களுக்கும், பழங்குடி சமுதாயத்தினருக்கும் முக்கியமானதாகும். நிலத்தைக் கையகப்படுத்தும் இந்த மசோதா 2013பிப்ரவரி-மார்ச் வரவு செலவு கூட்டத்தொடருக்கு தள்ளி வைக்கப்படலாமென கூறப்படுகிறது.

பல நிறுவன பொருள் சில்லறை வணிகத்தை அந்நிய நேரடி முதலீட்டிற்குத் திறந்து விடுவது பற்றிய பிரச்சனை பற்றிய ஒரு கசப்பான போராட்டத்தில் இந்த குளிர்காலத் தொடரின் முதல் மூன்று வாரங்கள் கழிந்திருக்கின்றன. இந்த கசப்பான சண்டையில் இரு சாராரருமே உழைக்கும் மக்களுடைய நலன்களுக்காகவே தாங்கள் செயல்பட்டு வருவதாகக் கூறிக் கொள்கின்றனர்.

காங்கிரசு கட்சியும், வணிகத்துறை அமைச்சரும், பெரும் வணிக நிறுவனங்களின் நுழைவு, ஒரு கோடி மக்களுக்கான வேலை வாய்ப்பை பெரும் அங்காடிகளிலும், குளிர் பதன கிடங்குகளிலும், மற்றும் தொடர்பான செயல்பாடுகளிலும் உருவாக்குமென கூறிவருகின்றனர். இந்த பெரிய நவீன சில்லறை வர்த்தக மையங்களின் வளர்ச்சி, "இடைத் தரகர்களை அகற்றும்" என்றும், கெடக்கூடிய உணவுப் பொருட்கள் பெரிய அளவில் வீணாவதைக் குறைக்கும் என்றும், விவசாயிகளுக்கு நல்ல விலையை அளிக்குமென்றும், நகர்புற குடும்பங்களில் உள்ள நுகர்வோருக்கு செலவைக் குறைக்குமெனவும் அவர்கள் கூறிவருகின்றனர்.

பாஜகவும், சிபிஎம்-உம் முக்கியமாக பங்கேற்கும் எதிர்க்கட்சி முகாம், இந்தக் கொள்கைத் திட்டத்தின் காரணமாக கோடிக்கணக்கான சில்லறை வணிகர்கள் மற்றும் விவசாயிகளுடைய வாழ்வாதாரம் அழியுமென்று கூறுகின்றனர். வணிகத்திற்காக வந்த ஆங்கிலேய கிழக்கிந்திய கும்பெனி, நமது நாட்டை வெற்றி கொண்டு அடிமைப்படுத்தியதோடு அவர்கள் இதை ஒப்பிடுகிறார்கள்.

உண்மை என்ன? இந்த இரண்டு சண்டையிடும் குழுக்கள் யாருடைய நலன்களைப் பாதுகாக்கிறார்கள்? அவர்களுடைய நிலைப்பாடுகள் யாரை பிரதிநிதித்துவப் படுத்துகின்றன?

ஆளும் கட்சி முகாமின் நிலைப்பாடு

காங்கிரசு கட்சி கூறுவதில் ஓரளவிற்கு உண்மையிருக்கிறது. ஆனால் அது அவர்கள் கூறும் அண்டப் புளுகுகளின் காரணமாக மறைந்து விடுகிறது.

நமது நாட்டினுடைய வர்த்தக அமைப்பானது, நவீன மயப்படுத்தப்பட வேண்டுமென்பதும், கெடக்கூடிய உணவுப் பொருட்கள் பெரிய அளவில் வீணாவதைக் குறைக்கக் கூடிய குளிர்பதன சேமிப்புக் கிடங்குகள் போன்றவற்றின் மூலம் பெரிய அளவில் அது மேலாண்மை செய்யப்பட வேண்டுமென்பதும் உண்மையாகும். இப்படி வீணாவது, சமுதாயத்திற்கு விலையை உயர்த்தவும், உழைக்கும் மக்கள் செலவு செய்ய வேண்டிய தொகையைக் கூட்டவும் செய்கிறது.

ஆனால் வர்த்தகத்தை நவீனப்படுத்த நல்ல அல்லது ஒரே வழியானது, அதைத் கொள்ளை இலாபத்திற்காக இயங்கும் தனிப்பட்ட நிறுவனங்களின் கைகளில் ஒப்படைப்பதாகும் என்பது ஒரு மிகப் பெரிய பொய்யாகும். தர்க்க ரீதியான தீர்வும், சரியான மாற்றும், செயல்பாடுகளின் அளவு மட்டுமின்றி, அதன் உடமையையும், வர்த்தகத்தின் மீதான கட்டுப்பாட்டையும் சமூக மயமாக்குவதாகும். இதற்குப் பொருள், மொத்த விலையில் வாங்குவதற்கும் வினியோகிப்பதற்கும் சமுதாய மையங்களை நிறுவுவதும், அவற்றின் விற்பனைக்காக பல்வேறு பொது மற்றும் தனிப்பட்ட சில்லறை கடைகளை நிறுவுவதும் அவசியமாகும்.

எங்கெல்லாம் வால்மார்ட்டும் பிற நிறுவன வர்த்தக ஏகபோகங்களும் நுழைந்தார்களோ அங்கெல்லாம் வாழ்வாதாரம் பெருமளவில் சீரழிக்கப்பட்டுள்ளது. பாரம்பரியமாக இருக்கும் வர்த்தக இடையாளர்கள் விரைவாக நவீன ஏகபோக முதலாளித்துவ இடையாளர்களால் மாற்றப்பட்டுள்னர். மிகப் பெரிய சந்தை சக்தியைக் கொண்டு, இவர்கள் உற்பத்தியாளர்களையும், நுகர்வோரையும் பிழிவதற்காக மொத்த விற்பனையிலிருந்து சில்லறை வணிகம் வரை அனைத்தையும் ஒருங்கிணைக்கிறார்கள்.

உலக பொருளாதார நெருக்கடி காரணமாகவும், வட அமெரிக்காவிலும், ஐரோப்பாவிலும் தீவிரமடைந்து வரும் பொருளாதார வீழ்ச்சி காரணமாகவும், வால்மார்ட், கேர்போர், மெட்ரோ, டெசுகோ போன்ற பெரும் சில்லறை வர்த்தக நிறுவனங்கள் இந்திய சந்தையில் ஊடுருவ மிகவும் ஆர்வத்தோடு இருக்கிறார்கள். அவர்கள் நமது நாட்டை, மேலும் அதிகமாக கசக்கிப் பிழியக்கூடிய பகுதியாகவும், பெரும் அளவில் நவீன சில்லறை வர்த்தக மையங்களை நிறுவவும், அதிகபட்ச இலாபத்தை அறுவடை செய்வதற்கும் ஏற்றதொரு இடமாகவும் அவர்கள் நமது நாட்டைப் பார்க்கிறார்கள்.

கடந்த 10 ஆண்டுகளுக்கும் மேல் ரிலையன்சு, டாட்டாக்கள், பிர்லாக்கள், பாரதி மற்றும் பிற இந்திய நிறுவனங்கள் சில்லறை வணிகத்தில் ஈடுபட்டு வந்திருக்கிறார்கள். சந்தையில் 5 சதவிகிதத்திற்கும் குறைவான அளவையே அவர்களால் தங்களுடைய கட்டுப்பாட்டின் கீழ் கொண்டுவர முடிந்திருக்கிறது. அவர்கள் அனைவரும் இதுவரை தங்களுடைய வர்த்தகத்தை அந்நிய போட்டியிலிருந்து பாதுகாத்துக் கொள்வதற்காக, அந்நிய நேரடி முதலீட்டை ஒற்றை நிறுவன பொருள் விற்பனையில் மட்டுமே அனுமதிக்க வேண்டுமென்றும், பல நிறுவன பொருள் சில்லறை வணிகத்தில் அனுமதிக்கக் கூடாதெனவும் விடாப்பிடியாகக் கூறி வந்திருக்கின்றனர். ஆனால் அவர்களில் பெரும்பான்மையோர், உலகப் பெரும் நிறுவனங்களோடு 49 சதவிகித பங்காளிகளாக ஆவதே நமது நாட்டின் சில்லறை சந்தையை தம் கட்டுப்பாட்டின் கீழ் கொண்டு வருவதற்கான விரைவான வழியாகுமென இன்று உணர்ந்திருக்கிறார்கள்.

எதிர் கட்சிகளின் முகாமின் நிலைப்பாடு

குறிப்பாக ஒரு உலக வர்த்தக ஏகபோகத்தின் நுழைவுதான் இந்தியா அடிமைப்படுத்துவதற்கு வழி வகுத்தது என பாராளுமன்றத்தில் உள்ள எதிர்க்கட்சிகள் கூறுவதில் ஓரளவு உண்மை இருக்கிறது. ஆசியா, ஆப்ரிக்கா மற்றும் தென் அமெரிக்க நாடுகளில் உள்ள பெரும்பான்மையான நாடுகளை சிறுபான்மையான ஏகாதிபத்திய சக்திகள் நவீன காலனிய முறையில் கொள்ளையடிப்பதற்கு, இன்றைய மிகப்பெரிய உலகளாவிய வர்த்தக ஏகபோகங்கள் ஒரு முக்கிய பங்காற்றுகின்றன.

இந்த உண்மையை சுட்டிக்காட்டுகின்ற அதே நேரத்தில், இரண்டு முக்கிய உண்மைகளை எதிர்க்கட்சிகள் மறைக்கின்றனர். நமது நாட்டில் வர்த்தக சங்கிலியை ஏற்கெனவே நிறுவியிருக்கின்ற இந்திய நிறுவன ஏகபோகங்களும் தம் ஏகாதிபத்திய போக்கை விரிவுபடுத்தி வருகிறார்கள் என்பது ஒன்று. வர்த்தகத்தைத் தம் கட்டுப்பாடின் கீழ் கொண்டு வருவதற்காக ஏகபோக முதலாளித்துவம் தொடுக்கும் தாக்குதலில் இவர்கள் 49 சதவிகித கூட்டாளிகளாக இருப்பார்கள். எனவே அந்நிய நேரடி மூலதனத்தை மட்டுமின்றி, சில்லறை வணிகத்தில் உள்ள இந்திய நிறுவன ஏகபோகங்களையும் எதிர்த்துப் போராடுவது அவசியமாகும்.

இரண்டாவது உண்மையானது, ஏகபோக முதலாளித்துவ தாக்குதலானது சில்லறை வணிகர்களை அச்சுறுத்துவது போலவே வேளாண்மை மற்றும் தொழிற்சாலை உற்பத்தி சந்தையில் பாரம்பரியமாக ஈடுபட்டு வந்துள்ள முதலாளித்துவ மொத்த வணிகர்களையும் அச்சுறுத்துகிறது. முதலாளி வர்க்கத்தின் இப்பிரிவினர், அந்நிய நேரடி மூலதனத்தை தடுப்பதன் மூலம், தங்களுடைய சொந்த நிலையையும் சந்தை சக்தியையும் வலுப்படுத்தி, உற்பத்தியாளர்களையும் நுகர்வோரையும் பிழிய விரும்புகிறார்கள்.

ஐமுகூ-யில் உள்ள முக்கிய கட்சியான திமுக-வின் தலைவர் மு.கருணாநிதி, நவம்பர் 25 அன்று, "தமிழ்நாட்டிலுள்ள எங்களுடைய அரசியல் தொகுதியில், சில்லறை வணிகத்தில் அந்நிய நேரடி முதலீட்டிற்கு எதிராக கடுமையான எதிர்ப்பு உள்ளது" என்று கூறியிருக்கிறார். தனது கட்சியின் முக்கிய ஆதரவாளர்களாக பல்வேறு நகரங்களிலுள்ள முதலாளித்துவ மொத்த வியாபாரிகளும், கிராமப்புறங்களிலுள்ள பாரம்பரியமாக வர்த்தகம் செய்யும் இடைப்பட்டவர்களும் இருக்கிறார்கள் என்பதை அவர் ஒப்புக் கொண்டிருக்கிறார். இதே நிலைமைதான் மேற்கு வங்கத்தில் உள்ள திருனாமுல் காங்கிரசுக்கும், உத்திரபிரதேசத்தில் உள்ள சமாஜ்வாத கட்சிக்கும், பீகாரில் உள்ள ஜெடியு, போன்றவர்களுக்கும் இருக்கிறது.

மாநில அரசாங்கங்கள் மீது முதலாளித்துவ வியாபாரிகள் கணிசமான செல்வாக்கைக் கொண்டிருக்கிறார்கள். இதன் காரணமாகவே பன்னாட்டு வர்த்தக நிறுவனங்களின் நுழைவை பல பிராந்திய கட்சிகள் எதிர்க்கின்றன. இந்த கொள்கை மாற்றத்தை எதிர்க்கும் இந்தக் கட்சிகள் வேறு மாற்று திட்டம் எதையும் முன்வைக்க வில்லை. இது, இன்றுள்ள நிலைகளோடு மகிழ்ச்சியடைந்துள்ள, அதில் மாற்றம் எதுவும் வரக்கூடாதென விரும்பும் முதலாளி வர்க்கத்தின் ஒரு பிரிவினரை இந்தக் கட்சிகள் பிரதிபலிக்கிறார்கள் என்பதை இது வெளிக் காட்டுகிறது.

மக்களுடைய தேவை

பண்டைய காலந்தொட்டு, தட்டுப்பாடுகளை தனிப்பட்டவர்கள் தங்களுடைய சுயலாபத்திற்காக பயன்படுத்திக் கொள்வதை அரசு தடுக்க வேண்டுமென்ற சிந்தனையின் அடிப்படையில் நமது பண்பாடு வளர்ந்து வந்திருக்கிறது. இந்திய அல்லது அந்நிய தனிப்பட்ட ஏகபோகங்கள் வர்த்தகத்தை ஆதிக்கம் செலுத்த அனுமதிக்கும் முதலாளி வர்க்கத்தின் திட்டமானது சமுதாயத்தின் பொதுவான நலன்களுக்கு எதிரானதாகும். சமுதாயத்திற்கு ஆதரவான, மக்களுக்கு ஆதரவான திட்டமானது, வர்த்தகத்தை சமூக கட்டுப்பாட்டின் கீழ் கொண்டு வருவதாகும்.

வாங்குவதும், விற்பதுமான வர்த்தகம், பொருட் செல்வத்தை எந்தவகையிலும் கூட்டுவதில்லை. அது ஒரு குழுவினருடைய கைகளிலிருந்து இன்னொரு கைகளுக்கு, உற்பத்தியாளர்களிடமிருந்து இறுதி நுகர்வோர்களுக்கு சரக்குகளை வினியோகிக்கும் வழிமுறையாகும். அப்படி இருக்கையில், இந்தத் துறையில் தனிப்பட்ட இலாபம் சம்பாதிப்பதை ஏன் அனுமதிக்க வேண்டும்? தனிப்பட்ட வணிகர்கள் சம்பாதிக்கும் எல்லா இலாபமும் உற்பத்தியாளர்களிடமிருந்தோ நுகர்வோரிடமிருந்தோ அல்லது இருவரிடமும் இருந்தோ மதிப்பைத் திருடுவதன் மூலம் வர வேண்டியுள்ளது.

மொத்த வர்த்தகத்தை உடனடியாக தேசியமயமாக்க வேண்டுமென்றும், தொழிலாளி-விவசாயிகளின் மேற்பார்வையின் கீழும், கட்டுப்பாட்டின் கீழும் ஒரு நவீன பொது வினியோக அமைப்பு முறையை நிறுவ வேண்டுமென்றும் கோருவதற்காகவும், அதற்காகப் போராடுவதற்காகவும் சமுதாயத்திலுள்ள தொழிலாளிகளும், விவசாயிகளும், பிற நடுத்தட்டு மக்களும் ஒன்றுபட வேண்டுமென இந்திய கம்யூனிஸ்டு கெதர் கட்சி கருதுகிறது. விவசாயிகளுடைய குழுக்களும், கூட்டுறவுகளும், விவசாய விளை பொருட்கள் நியாயமான முறையில் வாங்கப்படுவதை உறுதி செய்ய வேண்டும். இறுதியில் பொருட்கள் விற்கப்படும் நியாய விலைக் கடைகளை நகரங்களில் உள்ள மக்கள் குழுக்கள் மேற்பார்வையிட வேண்டும். மொத்த வர்த்தகத்தின் மேல் அரசின் கட்டுப்பாடு, எல்லா சில்லறை கடைகளும் தங்களுடைய சரக்குகளுக்கு இந்த ஒரே மூலத்தைச் சார்ந்திருப்பதை உறுதி செய்யும்.

முடிவுரை

தங்களுடைய நலன்களைப் பாதுகாப்பதற்குத் தொழிலாளி வர்க்கமும், மக்களும் பாராளுமன்ற எதிர்ப்பை நம்பியிருக்கக் கூடாது. சுரண்டப்பட்ட பெரும்பான்மையான மக்களுடைய நலனுக்கான எந்த இடத்தையும் மறுக்கும் அதே நேரத்தில், பாராளுமன்றமானது போட்டியிடும் முதலாளி வர்க்க நலன்கள் தங்களுடைய முரண்பாடுகளை தீர்த்துக் கொள்வதற்கான ஒரு களமாகும்.

மொத்த வர்த்தகமானது உடனடியாக தேசியமயமாக்கப்பட வேண்டுமென்றும், அத்தியாவசியமான வேளாண்மை மற்றும் தொழிற்சாலை நுகர் பொருட்களைக் கொண்டதாக ஒரு நவீன பொது வினியோக அமைப்பை நிறுவ வேண்டுமென்றும் கோருவதற்கு, ஏகபோக முதலாளித்துவ தாக்குதல்களுக்கு எதிரான அனைவரும் ஒன்றுபட வேண்டுமென இந்திய கம்யூனிஸ்டு கெதர் கட்சி அறைகூவல் விடுகிறது.

ஓய்வூதிய நிதி முறைப்படுத்துதல் மற்றும் வளர்ச்சி ஆணைய மசோதாவையும், காப்பீட்டு குழுமங்களில் அந்நிய முதலீட்டு சதவிகிதத்தை 26-இலிருந்து 51 ஆக உயர்த்தும் மசோதாவையும் பாராளுமன்றத்திலும், வீதிகளிலும் எதிர்க்கவும், ஆர்பாட்டங்களில் ஈடுபடவும், தொழிலாளி வர்க்கத்தின் எல்லாக் கட்சிகளும், அமைப்புக்களும் ஒன்றுபட ஒரு உடனடித் தேவை இருக்கிறது.

நில கையகப்படுத்தும் மசோதா இந்தக் கூட்டத் தொடரில் கொண்டுவர விட்டாலும் கூட, இந்த மசோதாவிற்கு எதிராக தொழிலாளி விவசாய அமைப்புக்கள் ஒன்றுபடுவது மிகவும் முக்கியமானதாகும். நிலத்தை உழுபவர்களுடைய நிலங்களை கட்டாயத்தின் அடிப்படையில் பறிக்கக் கூடாது, ஒரு பொது நலனுக்காக கையகப்படுத்தப்பட்ட நிலமானது, தனிப்பட்டவர்களுக்கு விற்கப்படக் கூடாதென்ற கோட்பாடுகளுக்கு ஆதரவாக இந்த இந்த ஐக்கியமானது, கட்டப்பட வேண்டும். 

வர்த்தகத்தின் இன்றைய கட்டுமானமும், முன்வைக்கப்பட்டுள்ள சீர்திருத்தமும்

வர்த்தகம் என்பது சரக்குகள் வாங்கி விற்கப்படும் முழு வழிமுறையையும் உள்ளடக்கியதாகும். வர்த்தகத்தின் மூலம் நாட்டின் ஒரு பகுதியில் உற்பத்தி செய்யப்படும் பொருட்கள் மற்ற இடங்களிலுள்ள இறுதி நுகர்வோர்களைச் சென்றடைகிறது. இதில் வேளாண்மை மற்றும் தொழிற்சாலை பொருட்கள் வாங்கி விற்பதும் இருக்கிறது.

ஆடைகள், பேனாக்கள், கடிகாரங்கள் போன்ற உற்பத்தி செய்யப்படும் நுகர்பொருட்கள் இறுதி நுகர்வோர்களுக்கு மூன்றடுக்கு வர்த்தக இடையீட்டாளர்கள் மூலமாக சென்றடைகிறது. அனைத்திந்திய மட்டத்தில் செயல்படுகின்ற உற்பத்தி செய்யும் ஒரு கம்பெனிக்கு 40-இலிருந்து 80 மறு வினியோகர்கள் இருப்பார்கள். இந்த ஒவ்வொரு வினியோகரும் தங்களுடைய பொருட்களை 100 இலிருந்து 450 மொத்த விற்பனையாளர்களுக்கு விற்பார்கள். மறு வினியோகர்களும், மொத்த விற்பனையாளர்களும் சேர்ந்து நாடெங்கிலும் உள்ள 2.5 இலிருந்து 7.5 இலட்சம் சில்லறை வணிகர்களுக்கு விற்பனை செய்கின்றனர்.

ஒரு குறிப்பிட்ட மாநிலத்தில் இயங்குகின்ற தொழிற்சாலைகளுடைய உற்பத்திப் பொருட்கள் மொத்த விற்பனையாளர்கள் மற்றும் சில்லறை வணிகர்கள் என்ற இருவகையான இடையீட்டாளர்கள் மூலம் செல்கின்றன. வேளாண்மைப் பொருட்கள், பல்வேறு இடையீட்டாளர்கள் மூலம் செல்கிறது. பாரம்பரிய கிராமப்புற வணிகர்கள், மொத்த வர்த்தகர்களுடைய தரகு முகவர்கள், இந்திய உணவு நிறுவனத்தினுடைய முகவர்கள், அதிகாரபூர்வமான பொது வினியோக கடைகள், குடும்பங்கள் நடத்தும் கோடிக்கணக்கான சில்லறை கடைகள், தள்ளுவண்டி விற்பனையாளர்களும் இதில் அடங்குவர்.

ஐந்தாண்டுகளுக்கு ஒரு முறை நடத்தப்படும் அதிகாரபூர்வமான பொருளாதார புள்ளிவிவர கணக்கெடுப்பின்படி நாட்டில் சில்லறை வர்த்தக நிறுவனங்களின் மொத்த எண்ணிக்கை 2005-இல் 1.5 கோடியாக இருந்தது. மொத்த விற்பனை நிறுவனங்களின் மொத்த எண்ணிக்கை 8.5 இலட்சமாக இருந்தது.

சில்லறை வர்த்தகத்தில் பெரிய அளவிலான அங்காடிகள் 5 சதவிகிதமாகவே இருக்கின்றன. மீதமுள்ள 95 சதவிகித விற்பனை குடும்பங்கள் நடத்தும் கடைகள், தனிப்பட்ட கடைக்காரர்கள், தள்ளுவண்டி விற்பனையாளர்கள் ஆகியோர் அடங்கிய "அமைப்புசாரா" துறையினர் மூலமாக நடைபெறுகிறது.

மொத்த வர்த்தகத்தில் வட்டார மட்டத்திலும், மாநில அளவிலும் கணிசமான அதிகாரம் கொண்டுள்ள பாரம்பரிய முதலாளித்துவ வியாபாரிகள் மேலாதிக்கம் செலுத்துகின்றனர். இதில் விவசாய உற்பத்தியாளர்களிடம் அதிகாரபூர்வமான மற்றும் பிற கிராமப்புற மண்டிகள், சந்தைகள், நாட்டின் வெவ்வேறு இடங்களிலிருந்து தொழிற்சாலை சரக்குகளை வாங்கி ஒரு குறிப்பிட்ட மாநிலத்திலுள்ள சில்லறை வணிகர்களுக்கு வழங்குகின்றவர்களும் அடங்குவர்.

பல நிறுவன சில்லறை வணிகம் என்பது, பல்லாயிரக்கணக்கான சதுர அடி பரப்பில் அமைக்கப்படும் பெரிய அளவிலான அங்காடிகளைக் குறிக்கிறது. அங்கு பல்வேறு நிறுவனங்களுடைய பொருட்கள், பல்வேறு உற்பத்தியாளர்களிடமிருந்தும், வினியோகிப்பவர்களிடமிருந்தும் பொருட்கள் பெறப்பட்டு விற்கப்படுகின்றன. ரிலையன்சு பிரஷ், ரிலையன்சு மார்ட், ஸ்டார் பசார், இசிடே, மோர், பிக் பசார் மற்றும் நிறுவன ஏகபோகங்களுக்குச் சொந்தமான பிற பெரிய அங்காடி சங்கிலிகள் இப்படிப்பட்ட நிறுவனங்களுக்கு எடுத்துக் காட்டுகளாகும். இவை உற்பத்தியாளர்களிடமிருந்து நேரடியாக வாங்கி இறுதி நுகர்வோருக்கு விற்பனை செய்யும் மொத்த மற்றும் சில்லறை வர்த்தக சங்கிலிகளாகும்.

ஒற்றை நிறுவன சில்லறை வணிகம் என்பது நைக், ஆப்பிள், பிளாக்பெரி போன்று ஒரு நிறுவனத்தின் பொருட்களை மட்டும் விற்கின்ற அங்காடிகளைக் குறிக்கும். ஒரு நிறுவன சில்லறைக் கடைகளை அயல்நாட்டு கம்பெனிகள் நமது நாட்டில் நிறுவுவதற்கு ஏற்கெனவே அனுமதி அளிக்கப்பட்டுள்ளது. ஆனால், எந்த அந்நிய கம்பெனிக்கும் பல நிறுவன சில்லறை அங்காடிகளை ஏற்படுத்த அனுமதிக்கப்படவில்லை. செப்டெம்பர் மாதத்தில் அமைச்சரவை எடுத்த முடிவு, இதை அவர்களுக்கு திறந்து விட்டிருக்கிறது.
Pin It

வி.எச்.எஸ் மருத்துவமனை தொழிற்சங்கத்தின் பொதுச் செயலாளர் தோழர். எஸ்.மணிதாசனுடன் நேர்முகம்

தொழிலாளர் ஒற்றுமை குரலின் நிருபர், வி.எச்.எஸ் மருத்துவமனை தொழிற்சங்கத்தின் பொதுச் செயலாளராக பல்லாண்டுகளாக பணியாற்றிவரும் தோழர். எஸ்.மணிதாசனிடம் இன்றைய நிலைமைகள் குறித்து நேர்முகம் கண்டார். அதன் சாராம்சம் பின் வருமாறு.

தொழிலாளர் ஒற்றுமை குரல் (தொ.ஒ.கு) - அண்மையில் சென்னையிலும், தமிழகத்தின் பிற நகரங்களிலும் மருத்துமனையில் பணியாற்றும் செவிலியர்களும், துணை மருத்துவப் பணியாளர்களும், பிற தொழிலாளர்களும் பல்வேறு போராட்டங்களை நடத்தியிருக்கிறீர்கள். இதன் பின்னணி என்ன?

manidasan_300தோழர். மணிதாசன் - உலகெங்கிலும் உள்ள நோயாளிகளுக்கு மருத்துவம் அளிக்கும் மருத்துவ சுற்றுலாவிற்கான முக்கிய இடமாக சென்னை இருந்து வருகிறது. உலகத் தரமான மருத்துவ சேவைகளை நம்முடைய செவிலியர்களும், பிற மருத்துவப் பணியாளர்களும் நோயாளிகளுக்கு அளித்து வருகின்றனர். இவர்களுடைய உழைப்பைக் கடுமையாகச் சுரண்டுவதன் மூலம், மருத்துவமனைகளை நடத்தும் முதலாளிகளும், டிரஸ்டுகளும் மிகப் பெரிய அளவில் இலாபத்தைச் சம்பாதித்து வருகின்றனர். ஆனால் இந்த இலாபத்தை உருவாக்கிய செவிலியர்கள், துணை மருத்துவப் பணியாளர்கள் மற்றும் மருத்துவ மனைகளில் பணிபுரியும் தொழிலாளர்களின் ஊதியம் பல்லாண்டுகளாக எவ்வித மாற்றமுமின்றி இருந்து வந்திருக்கிறது. தொடர்ந்து உயர்ந்துவரும் விலைவாசி காரணமாகவும், பணவீக்கத்தின் காரணமாகவும் இவர்களுடைய உண்மை ஊதியம் கடுமையாக வீழ்ச்சியடைந்து வருகிறது. இதன் காரணமாக வாழ்க்கையே நடத்த முடியாத நிலைமைக்கு இவர்கள் தள்ளப்பட்டுள்ளனர்.

இத்தகைய சூழ்நிலையில் அண்மையில் சென்னையில் உள்ள அப்போலோ மருத்துவமனை, எம்.எம்.எம். மருத்துவ மனை, ஃபோர்டிசு மலர் மருத்துவமனை, வி.எச்.எஸ் மருத்துவமனை, விஜயா மருத்துவமனை, உட்பட பல்வேறு மருத்துமனைகளிலும், கோவை பி.எஸ்.ஜி மருத்துவமனையிலும், தமிழகத்தின் பிற நகரங்களிலும் பணிபுரியும் செவிலியர்கள், துணைமருத்துவப் பணியாளர்கள் மற்றும் தொழிலாளர்கள் ஒன்றுபட்டும் தனித்தனியாகவும் வேலை நிறுத்தப் போராட்டத்தில் ஈடுபட்டோம். முதலில் எங்களுடைய போராட்டத்தை நசுக்குவதற்கு முதலாளிகளும், தமிழக அரசும் முடிந்த அளவும் முயற்சி செய்தனர். தொழிலாளிகளுடைய ஒற்றுமை காரணமாக இந்த முயற்சி முறியடிக்கப்பட்டது. பின்னர் நிர்வாகம் இறங்கி வந்து எங்களுடைய ஒரு சில கோரிக்கைகளை ஏற்றுக் கொண்டனர். இந்தப் போராட்டத்தின் காரணமாக ஓரளவிற்கு ஊதிய உயர்வைப் பெற முடிந்தது.

தொ.ஒ.கு - இன்று இந்தத் துறையில் பணி புரிபவர்களுடைய பிரச்சனைகள் என்னென்ன?

தோழர். மணிதாசன் - நிர்வாகத்தின் பேராசை காரணமாக பணியாளர்களைச் சுரண்டுவதும், வேலை பளுவும் தொடர்ந்து அதிகரித்து வருகிறது. பெரும்பாலான மருத்துவமனைகளில் 10-12 மணி நேரம் நாங்கள் வேலை செய்ய வேண்டியுள்ளது. இந்த கடுமையான வேலைக்கு ஒவர்டயம் ஊதியமும் அளிக்கப்படுவதில்லை. நாளுக்கு நாள் உயர்ந்துவரும் விலைவாசிக்கு ஏற்ப எங்களுடைய ஊதியம் உயராததால், வாழ்க்கைத் தரம் படிப்படியாக குறைந்து வருகிறது. பெரும்பாலான பணிகளை ஒப்பந்த முறையில் நிர்வாகம் மேற்கொண்டு வருவதால், நிரந்தரப் பணியாளர்களின் எண்ணிக்கையும் குறைந்து வருகிறது. ஒப்பந்தப் பணியாளர்களுடைய பணி நிலைமைகள் மிக மோசமாக இருக்கின்றன. இப்படிப்பட்ட நிலைமைகளை எதிர்த்துப் போராடும் பணியாளர்களுடைய அடிப்படை தொழிற் சங்க உரிமைகளைக்கூட முதலாளிகளும், அரசாங்கமும் மறுத்து வருகிறார்கள். மருத்துவப் பணியாளர்கள் தங்களுக்கு விருப்பமான தொழிற் சங்கம் அமைக்கும் உரிமையும், கோரிக்கைகளுக்காகப் போராடும் உரிமையும் சட்ட விரோதமாக மறுக்கப்படுகிறது.

அரசாங்கத்தின் தொழிலாளர் துறை அதிகாரிகள், நிர்வாகத்தின் கையாட்களாக செயல்படுகிறார்கள். நிர்வாகம் தொழிலாளர்களை வேலை நீக்கம் செய்தும், பல்வேறு தாக்குதல்களை நடத்தியும் வருகையில் அரசாங்கமும், தொழிலாளர் நலத்துறையும், அதை வேடிக்கைப் பார்த்துக் கொண்டு, நீதி மன்றங்களுக்கு செல்லுமாறு தொழிலாளர்களை அறிவுறுத்தி வருகின்றனர். நீதி மன்றங்களில் தொழிலாளர்களுக்கு நீதி கிடைப்பதில்லை என்பதையும் சில சிறிய வெற்றிகளைப் பெறுவதற்குக் கூட 10-20 ஆண்டுகள் போராட வேண்டியிருப்பதையும் நன்றாகத் தெரிந்து கொண்டே அரசாங்கமும் அதிகாரிகளும் போராடும் தொழிலாளர்களையும், தொழிற் சங்கத் தலைவர்களையும் அலைக்கழிக்கிறார்கள். மொத்தத்தில் அரசாங்கமும், அரசின் தொழிலாளர் நலத் துறையும், முதலாளிகளுடைய தேவைகளை நிறைவேற்றுவதற்காக செயல்படுகிறார்கள். தொழிலாளிகளைத் தாக்குகிறார்கள். இந்த நிலைமைக்கு தொழிலாளி வர்க்கம் முடிவு கட்ட வேண்டும்.

இன்றைய தாராளமயக் கொள்கைகளும், அந்நிய நேரடி முதலீடும் மற்ற எல்லாத் தொழிலாளர்களையும் மக்களையும் பாதிப்பது போலவே, மருத்துவனை பணியாளர்களையும் கடுமையாக பாதிக்கிறது.

தொ.ஒ.கு - அந்நிய முதலீட்டை நீங்கள் ஏன் எதிர்க்கிறீர்கள்?

தோழர். மணிதாசன் - அந்நிய முதலீடு இந்திய மக்களை மேலும் சுரண்டவும், நாட்டை அடிமைப்படுத்தவும் வழிவகுக்கிறது. நமது நாட்டிலுள்ள கோடிக்கணக்கான வணிகர்களும், விவசாயிகளும் தங்களுடைய வாழ்வுரிமை இழக்க நேரும். இதனால் வணிகமானது சிறுபான்மையான ஏகபோக வர்த்தக நிறுவனங்களின் கைகளில் சேர்ந்துவிடும். விலைவாசி மேலும் கடுமையாக உயரும், மக்களின் வாழ்க்கைத் தரம் கடுமையாக பாதிக்கப்படும்.

மெட்ஆல் (Medall) போன்ற பெரிய முதலாளித்துவ நிறுவனங்கள் சிறிய மருத்துவமனைகளையும், ஆய்வுக் கூடங்களையும் சீரழித்து வருகிறது. இதன் காரணமாக நடுத்தர மற்றும் சிறிய மருத்துவ ஆய்வுக் கூடங்களில் வேலை செய்யும் எண்ணெற்ற லேப் டெக்னிசியன்கள் வேலை இழக்கும் நிலை உருவாகி வருகிறது. அது போலவே ஜிகிட்சா நிறுவனமும் (Ziqutza Healthcare Ltd) மருத்துவம் சார்ந்த பல்வேறு சேவைகளில் நுழைந்து வருகிறது. இதன் காரணமாக தனிப்பட்ட முறையில் ஆம்புலன்சு சேவைகளை வழங்கி வந்தவர்கள் வாழ்வாதாரத்தை இழக்கும் நிலைக்குத் தள்ளப்பட்டு வருகின்றனர். இந்திய மற்றும் பன்னாட்டு மூலதனத்தின் நுழைவின் காரணமாக மருத்துவத் துறையின் பல்வேறு பணியாளர்களும், மருத்துவ சேவைகளைப் பெறுகின்ற மக்களும் கடுமையாக பாதிக்கப்படுவார்கள்.

இந்திய மக்களைப் பற்றி சிறிதும் கவலைப் படாத காங்கிரசு, பாஜக மற்றும் இவர்களுடைய ஆதரவுக் கட்சிகள் இந்திய பெரு முதலாளிகளுக்காகவும், அந்நிய முதலாளிகளுக்காகவும் அந்நிய நேரடி மூலதனத்தைக் கொண்டு வருகிறார்கள். அன்று இந்திய சுதந்திரத்திற்காக ஆங்கிலேய ஆதிக்கத்தை எதிர்த்துப் போராடிய போது, சில எட்டையப்பர்கள் ஆங்கிலேயர்களுக்கு ஆதரவாக செயல்பட்டனர். இன்று இந்தக் கட்சிகள் இன்றைய எட்டைப்பர்களாக அந்நிய மூலதனத்திற்காகவும், இந்திய ஏகபோக முதலாளிகளுக்காகவும், மக்களுக்கு எதிராகச் செயல்படுகின்றனர். தனியார்மயம், தாராளமயம் மூலம் உலகமயமாக்குதல், அந்நிய நேரடி முதலீடு, தொழிலாளிகள் மற்றும் மக்களுடைய உரிமைகள் மீறல் ஆகிய சூழல், இன்று நாம் மீண்டும் ஒரு சுதந்திரப் போர் நடத்த வேண்டிய தேவையைச் சுட்டிக் காட்டுகின்றன.

இன்று அன்றாடம் நடக்கும் பல்வேறு போராட்டங்களை அடக்கி ஒடுக்கி வரும் ஆளும் வர்க்கங்களுடய செயல்களும், வெளிப்படையாகவே மக்களுக்கு எதிரான கொள்கைகளை நடைமுறைப்படுத்துவதும் எதைக் காட்டுகின்றன? இன்று நாட்டை ஆண்டு வருபவர்கள், பரந்துபட்ட மக்களின் நலன்களுக்காக ஆளவில்லை, மாறாக முதலாளி வர்க்கத்தின் ஏவல்களை நிறைவேற்றும் நிர்வாகிகளாக இருக்கின்றனர்.

தொ.ஒ.கு - மக்களை எதிர் கொண்டுள்ள முக்கியப் பிரச்சனைகளைத் தீர்ப்பதில் இன்றைய ஊடகங்கள் எவ்வித பங்காற்றுகிறார்கள்?

தோழர். மணிதாசன் - ஊடகங்கள் இன்று மிகுந்த வளர்ச்சியடைந்துள்ளது. ஆனால் பல ஊடகங்கள் சினிமா, கேளிக்கை, பொழுதுபோக்கு மற்றும் பணம் ஈட்டும் கருவியாக தான் செயல்படுகின்றன. கடந்த காலங்களில் இவை அன்றைய மக்கள் பிரச்சனைகளை பிரதிபலித்து அவர்களுக்கு ஆதரவாகவும், காலக் கண்ணாடியாகவும் செயல்பட்டிருக்கிறார்கள். இன்று ஊடகங்கள் பெரு முதலாளிகளின் கைகளில் இருக்கின்றன. எனவே அவை நம்முடைய எல்லாப் போராட்டங்களையும் நசுக்குவதற்காக செயல்படுகின்றன. நம்முடைய போராட்டங்களைப் பற்றி இந்த ஊடகங்கள் குறிப்பிடுவது கூட அரிதாகிவிட்டது. எனவே நாம் தொழிலாளிகளுக்காக நம்முடைய சொந்த செய்தியிதழ்களையும் ஊடகங்களையும் உருவாக்க வேண்டும். அவை நம் மக்கள் அடிமை சங்கிலியை உடைத்தெறிய பக்க பலமாக இருக்க வேண்டும். அப்படிப்பட்ட இதழ்களை நாம் மக்களிடையே பிரபலப்படுத்த வேண்டும்.

தொ.ஒ.கு - அந்நிய நேரடி மூலதனத்தை எதித்தப் போராட்டத்தில் தொழிலாளிகள் எவ்வித பங்காற்ற முடியும்?

தோழர். மணிதாசன் - அந்நிய மூலதனத்தை எதிர்த்த போராட்டத்தில் நமது நாட்டுத் தொழிலாளிகள் முன்னணியில் இருக்க வேண்டும். இந்திய விடுதலைப் போராட்டத்தில் நமது நாட்டுத் தொழிலாளர்கள் முக்கிய பங்காற்றினர். சென்னை, கோவை, தூத்துக்குடி மற்றும் பிற நகரங்களைச் சேர்ந்த தொழிலாளர்கள் ஆங்கிலேயர்களை எதிர்த்துப் போராடினர். மும்பையைச் சேர்ந்த மில் தொழிலாளர்களும், கப்பற் படை வீரர்களும் ஆங்கிலேய ஆட்சிக்கு எதிரான போராட்டத்தில் முன்னணியில் நின்றனர். ஆங்கிலேயர்களை விரட்டியதில் தொழிலாளர்கள் முக்கிய பங்கு வகித்தனர்.

இன்று தொழிலாளர்கள் தீவிரமாக அரசியலில் பங்கேற்க வேண்டும். இன்றுள்ள அரசியல் கட்சிகள் தொழிலாளர்களுடைய உரிமைகளைப் பாதுகாப்பார்கள் என்று எண்ணுவது பகற்கனவாகும். அரசியல் கட்சிகள் ஏகபோக முதலாளிகளுக்கு சேவைகள் செய்வதையே முதற் கடமையாக எண்ணுகிறார்கள். முதலாளிகளுடைய தேவைகளை நிறைவேற்றுவதற்காகவே - மூலதனத்தைக் கவருவதற்காகவே அந்நிய நேரடி முதலீட்டை அனுமதித்திருப்பதாக, காங்கிரசு கட்சி ஒப்புக் கொள்கிறது. அந்நிய நேரடி முதலீட்டை எதிர்ப்பதாகக் கூறும் கட்சிகளும் கூட பாராளுமன்ற போட்டிக்காகச் சொல்கிறார்களே தவிர உண்மையில் அவர்கள் அதை எதிர்க்கவில்லை. ஏகபோக முதலாளிகளுக்காக ஆட்சி நடத்துகின்றவர்களும், அவர்களுக்காக விவசாயிகளிடமிருந்து நிலத்தை பிடுங்குபவர்களும் தொழிலாளிகள் - விவசாயிகளுடைய நலன்களைப் பாதுகாப்பார்கள் என்பதை நாம் நம்ப முடியாது.

தொ.ஒ.கு - தொழிற் சங்கங்கள் எப்படி செயல்பட வேண்டும் என்று நீங்கள் கருதுகிறீர்கள்?

தோழர். மணிதாசன் - தொழிற் சங்கங்கள் தொழிலாளர்களை ஒன்றுபடுத்த வேண்டும். தொழிலாளர்களுடைய வாழ்வாதாரத்தை மேம்படுத்துவதற்காகவும், சுரண்டலை ஒழிப்பதற்காகவும் பாடுபட வேண்டும். தொழிலாளர்களுக்கு அரசியல் விழிப்புணர்வை தொழிற் சங்கங்கள் கொடுக்க வேண்டும். அதே நேரத்தில் தொழிற் சங்கங்கள் அரசியல் கட்சிகளுடைய வாலாக இருப்பதையும், வாக்கு வங்கிகளாக தொழிலாளர்களை நடத்துவதையும் நாம் கடுமையாக எதிர்க்க வேண்டும். பல தொழிற் சங்கங்களும், கட்சிகளும், தொழிலாளிகளை தங்களுடைய அடிமைகளாக நடத்தியும், அரசியல் விழிப்புணர்வை மழுங்கடித்தும் வேலை செய்து வருகிறார்கள். முதலாளி வர்க்கத்திற்கு எதிராகவும், தொழிலாளிகள் - விவசாயிகளை ஆட்சியதிகாரத்திற்குக் கொண்டு வருவதற்காகவும் பாடுபடும் கட்சிகளுடைய தலைமையில் தொழிலாளர்களை அரசியல் ரீதியாக ஒருங்கிணைக்க தொழிற் சங்கங்கள் பாடுபட வேண்டும். தொழிலாளி வர்க்கம் ஆட்சி அதிகாரத்தைக் கைப்பற்றுவது குறித்து தொழிலாளர்களிடையே பரந்துபட்ட விவாதங்களை நாம் நடத்த வேண்டும்.

தொ.ஒ.கு - நாம் மேற்கொண்டு என்ன செய்ய வேண்டும்?

தோழர். மணிதாசன் - தொழில் தகராறுகள் சட்டம், குறைந்தபட்ச கூலி சட்டம் போன்ற சட்டங்களைக்கூட செயல்படுத்த எண்ணமில்லாததாகவும் சிறுபான்மையான ஏகபோக முதலாளிகளுக்கு ஆதரவாகவும் எல்லா செயல்களிலும் ஆளும் வர்க்கங்களும் நிர்வாகமும் உள்ளன.

இப்படிப்பட்ட நிலமைகளில் தொழிலாளர்களின் நேரடி நடவடிக்கையான போராட்டம் மட்டுமே தீர்வை நோக்கிச் செல்லும் என தொழிலாளர்கள் வீதிகளில் போராட்ட களத்தில் இறங்கியுள்ளனர். நம்மை பிளவுபடுத்தும் அடிமை சங்கிலி என்ற இன்றுள்ள இந்த அரசியல் அமைப்பை மாற்றி புதியதொரு அரசியல் அமைப்பை, தொழிலாளர்கள் விவசாயிகள் மற்றும் உழைக்கும் மக்களின் உரிமைகளை மீறப்படமுடியாததாக பாதுகாக்கும் ஒரு அரசியல் அமைப்பை நாம் நிறுவ வேண்டும். நாமே இந்தியா நாமே அதன் மன்னர்கள் என்ற முழக்கத்தோடு தொழிலாளிகள் விவசாயிகள் மற்றும் உழைக்கும் மக்கள் அனைவரையும் ஒன்று சேர்ப்போம், போராடுவோம். விடுதலைப் போர் தொடர்கிறது. வெற்றி நமக்கு நிச்சயம்.

தொ.ஒ.கு - விழிப்புணர்வை ஊட்டும் வகையில் உங்களுடைய கருத்துக்களைப் பகிர்ந்து கொண்டதற்கு நன்றி.

Pin It

நவம்பர் 24, 2012இல் கன்னியாகுமரி மாவட்டம் அருமனையில் இந்திய கம்யூனிஸ்டு கெதர் கட்சியின் தோழர் தாஸ் நினைவுப் பொதுக் கூட்டம் நடைபெற்றது. கூட்டத்தில் பேசிய எல்லா கம்யூனிஸ்டு கெதர் கட்சியின் தோழர்களும், மக்களாட்சி இயக்கத்தின் செயல்வீரர்களும், முற்போக்கு சிந்தனையாளர்களும் தோழர் தாஸ் அவர்களுக்கு புகழாரம் சூட்டினர்.

cgpi_meeting_600

இக்கூட்டத்திற்கு தோழர் ஆப்ரகாம் அவர்கள் தலைமை வகித்தார். கம்யூனிச இயக்கத்தைக் கட்டுவதற்காகவும், தொழிலாளர்கள் - விவசாயிகளுக்கு ஒளிமயமான ஒரு எதிர்காலத்தை உருவாக்குவதற்காகவும் இரவு பகலாக ஓடி உழைத்துப் பணியாற்றியவர் தோழர் தாஸ் அவர்கள் என்றார். தன்னைப் பற்றியும், தன் குடும்பத்தினருடைய பிரச்சனைகளைப் பற்றியும் பொருட்படுத்தாமல், கம்யூனிசம் ஒன்றே தனது உயர் மூச்சென வாழ்ந்து தன் முழு வாழ்க்கையையும் அர்பணித்தவர் தோழர் தாஸ். அவருடைய வாழ்க்கை இன்றைய இளைஞர்களும், தொழிலாளர்களும், கம்யூனிஸ்டுகளும் ஒரு சிறந்த எடுத்துக்காட்டாகப் பின்பற்றத் தக்கதாகும் என்றார் அவர்.

இக்கூட்டத்தில் உரையாற்றிய தோழர் பாஸ்கர், தோழர் தாஸ் ஆற்றிய முன்னணிப் பணிகளை நினைவு கூர்ந்தார். கம்யூனிச இயக்கத்தை கன்னியாகுமரி மாவட்டத்தில் கட்டியமைக்கவும், அதைச் சரியான பாதையில் வழி நடத்தவும் அவர் பல்வேறு போராட்டங்களை மேற்கொண்டார். கம்யூனிசம் பற்றிய தீவிர ஆய்வும், இந்திய கம்யூனிச இயக்கத்தைப் பற்றிய சரியான கணிப்பும் அவரை இந்திய கம்யூனிஸ்டு கெதர் கட்சியை நிர்மாணிக்கும் பணியில் ஈடுபடுத்தியது. தன் கடைசி மூச்சு இருக்கும்வரை தோழர் தாஸ் இந்திய கம்யூனிஸ்டு கெதர் கட்சியைக் கட்டி பலப்படுத்துவதற்காகவும், கம்யூனிஸ்டுகளுடைய ஒற்றுமையைக் கட்டியமைக்கவும் அயராது பாடுபட்டார். தொழிலாளி - விவசாயிகளுடைய ஆட்சியதிகாரத்தை அமைக்க வேண்டுமென்பதை வாழ்நாள் முழுவதும் தன்னுடைய நோக்கமாகக் கொண்டிருந்தார். அவருடைய பணிகளை நாம் தொடர்ந்து எடுத்துக் கொண்டு செல்ல வேண்டும், அவற்றை நிறைவேற்றுவதே தோழர் தாஸ் அவர்களுக்கு நாம் செலுத்தும் அஞ்சலியாக இருக்க முடியும் என்றார் அவர்.

இன்றைய அரசியல் சூழ்நிலை பற்றி பேசுகையில், கடந்த சட்டமன்றத் தேர்தலுக்குப் பின்னர் தமிழக மக்கள் மீது அதிகரித்துவரும் தாக்குதல்களைப்  பற்றி விரிவாகக் குறிப்பிட்டார். அதிமுகவின் கூட்டணி அரசாங்கம் ஆட்சிக்கு வந்தவுடன் தனியார் மெட்ரிகுலேசன் பள்ளிகள் கொள்ளையடிப்பது தடையின்றித் தொடர்வதற்காக சமச்சீர் கல்வியை முடக்க முயற்சிகள் மேற்கொள்ளப்பட்டன. மக்களுடைய விழிப்புணர்வு காரணமாகவும், மக்கள் இயக்கங்களின் போராட்டம் காரணமாகவும் செயலலிதாவின் இந்த முயற்சிகள் முறியடிக்கப்பட்டன.

மக்கள் அன்றாடம் பயன்படுத்தும் பாலினுடைய விலை கடுமையாக உயர்த்தப்பட்டது. குழந்தைகளுடைய நல்வாழ்விற்கு மிகவும் அத்தியாவசியமான பாலின் விலையை அதிமுக அரசு உயர்த்தியதன் காரணமாக குழந்தைகளுடைய ஊட்டம் மேலும் சீரழியும் நிலை ஏற்பட்டுள்ளது. போக்குவரத்துக் கட்டணங்களையும் செயலலிதா இருமடங்கிற்கும் மேல் ஒரேயடியாக உயர்த்தி அனைத்துத் தரப்பு மக்களுடைய போக்குவரத்துச் செலவினங்களைப் பல மடங்கு உயர்த்தியிருக்கிறார். வேலைக்காக போக்குவரத்தைப் பயன்படுத்தும் மக்களுக்கு கடுமையான பிரச்சனையை உருவாக்கியிருக்கிறார்கள். மின்சார கட்டணங்களையும் கடுமையாக உயர்த்தி, மக்களுடைய சுமையை தமிழக அரசாங்கம் மேலும் கூட்டியிருக்கிறது.

மின்சார கட்டணங்களை உயர்த்தியிருப்பதன் பின்னணி என்ன? அரசுக்குச் சொந்தமான மின் உற்பத்தி ஆலைகளில் உற்பத்தி செய்ய ஒரு யூனிட் மின்சாரத்திற்கு ரூ 1.95 மட்டுமே ஆகிறது. ஆனால் மத்திய அரசும் மாநில அரசும் கொண்டு வந்துள்ள தனியார்மயப்படுத்தும் திட்டத்தின் காரணமாக, மின்சார உற்பத்தித் துறையில் வலுக்கட்டாயமாக நுழைந்துள்ள தனியார் மின் உற்பத்தி ஆலைகளுக்கு ஒரு யூனிட் மின்சாரத்திற்கு அரசாங்கம் அவர்களுக்கு 14 இலிருந்து 18 ரூபாய் விலை கொடுக்கிறது. இப்படி பொது மக்களுடைய வரிப்பணத்தை தனிப்பட்ட முதலைகள் கொள்ளையடிக்க வாரி வழங்கினால், மின்வாரியத்தில் நட்டம் ஏற்படாமல் இலாபமா கிடைக்கும்? இந்த நட்டத்தை பொது மக்கள் மீது சுமத்துவதற்காகவே செயலலிதா மின்கட்டணங்களைப் பன்மடங்கு உயர்த்தியிருக்கிறார். இப்படித்தான் டீசல் விலை உயர்விலிருந்து ஒவ்வொரு விலை உயர்வும், கட்டண உயர்வும், முதலாளிகள் இலாபமடிப்பதற்காக பொதுமக்களைக் கொள்ளையடிக்கின்றனர்.

மக்கள் அன்றாடம் பயன்படுத்தும் பல்வேறு பொருட்களின் விலைவாசியை உயர்த்தியும், வரிச் சுமையை மேலும் கூட்டியும் அரசாங்கம், மக்களுடைய வாழ்க்கைத் தரத்தை சீரழித்து வந்திருக்கிறது. வருகின்ற ஐந்தாண்டுகளுக்கு விருப்பம்போல கொள்ளையடிக்க தமிழ்நாடு குத்தகைக்கு விடப்பட்டு விட்டதாக எண்ணி, ஆட்சிக்கு வந்ததிலிருந்து மக்கள் மீது கடுமையான தாக்குதல்களை அதிமுக அரசாங்கம் தொடுத்து வருகிறது. தொழிலாளிகள் மீதும் அரசாங்கம் கடுமையான தாக்குதல்களை நடத்திவருகிறது. பதிமூன்றாயிரத்திற்கு மேற்பட்ட மக்கள் நலப் பணியாளர்களை நீதி மன்றத் தீர்ப்பினையும் மீறி பாசிச முறையில் செயலலிதா, வேலை நீக்கம் செய்திருக்கிறார். வாகனத் தொழிலில் ஈடுபட்டுள்ள உண்டாய், ஃபோர்டு போன்ற தொழிற்சாலைகளில் பணிபுரியும் தொழிலாளர்களுடைய அடிப்படை உரிமைகளைக் கூட மறுத்து, இந்த முதலாளிகளுக்கு ஆதரவாக தமிழக அரசு செயல்பட்டு வருகிறது. அணுமின் நிலையத்தை எதிர்த்து அமைதியான முறையில் போராடிவரும் கூடங்குளம் மக்களுக்கு எதிராக பயங்கரமான அடக்குமுறைத் தாக்குதல்களையும், ஊரடங்குச் சட்டத்தையும் செயலலிதா தீவிரமாக கட்டவிழ்த்து விட்டிருக்கிறார்.

இப்படிப்பட்ட தாக்குதல்களுக்கு எதிராக பல்வேறு மக்கள் அமைப்புக்களும் கட்சிகளும் போராடி வந்திருக்கின்றனர். அதிமுக-வை ஆட்சியதிகாரத்திற்குக் கொண்டுவந்த கூட்டணி கட்சிகள் மக்களுடைய கடுமையான வெறுப்பைப் புரிந்து கொண்டு, அதிமுகவை அரியணையில் அமர்த்தியதற்கும் அரசாங்கத்தின் இந்தத் தாக்குதல்களுக்கும் தங்களுக்கும் எந்த சம்பந்தமும் இல்லாதது போலவும், அவர்களும் இந்த மக்கள் விரோதத் தாக்குதல்களை எதிர்ப்பது போலவும் நாடகம் ஆடுகின்றனர். அதிமுக ஆட்சியதிகாரத்திற்கு வருவது முதல் முறையல்ல. முன்னர் செயலலிதா ஆட்சியில் இருந்த போது தொழிலாளர்களுக்கு எதிராகவும், மக்களுக்கு எதிராகவும் பாசிச நடவடிக்கைகள் மூலமாகவும், ஊழல்கள் மூலமாகவும் தாக்குதல்கள் நடத்தியதை யாரும் மறந்துவிடவில்லை.

இருந்துங்கூட சிபிஎம் போன்ற கட்சிகள் கடந்த காலத்திலிருந்து எவ்வித பாடத்தையும் கற்றுக் கொள்ளாமல் மீண்டும் அதே கட்சியை ஆட்சியில் அமர்த்தியிருக்கிறார்கள். அது மட்டுமின்றி குழந்தையையும் கிள்ளி விட்டு, தொட்டிலையும் ஆட்டுவது போல, அதிமுகவை ஆட்சியதிகாரத்தில் அமர்த்திவிட்டு, இன்று மக்களை ஏமாற்றுவதற்காக, அதிமுக அரசாங்கத்திற்கு எதிராக போராட்டங்களையும் நடத்தி வருகிறார்கள். இந்த இரட்டை வேடத்தை நம்புவதற்கு மக்கள் இன்னமும் தயாராக இல்லை. ஒரு கம்யூனிஸ்டு கட்சி சமுதாயத்தைப் பற்றியும் அதில் இயங்குகின்ற பல்வேறு சக்திகளைப் பற்றியும் தெளிவான புரிதலோடு செயல்பட வேண்டும். ஒரு முதலாளித்துவக் கட்சியை மாற்றி வேறு ஒரு முதலாளித்துவக் கட்சியை அதிகாரத்திற்குக் கொண்டுவருவதன் மூலம், மக்களுடைய பிரச்சனைகளுக்குத் தீர்வு காண முடியாதென மார்க்சிசம்-லெனினிசம் நமக்குத் தெளிவாக அறிவுறுத்துகிறது.

கடந்த தேர்தலில் சிபிஎம், பெரு முதலாளி வர்க்கத்தின் கட்சியான அதிமுக-வோடு கூட்டணி அமைத்துக் கொண்டு, அவர்களை அதிகாரத்திற்குக் கொண்டு வருவதற்காக வேலை செய்த அதே நேரத்தில் இந்திய கம்யூனிஸ்டு கெதர் கட்சி என்ன செய்தது? கெதர் கட்சி, இந்த சமுதாய அமைப்பை மாற்றாமல், தொழிலாளிகள்-விவசாயிகளுடைய ஆட்சியதிகாரத்தை அமைக்காமல் சுரண்டலுக்கும், ஒடுக்குமுறைக்கும், மக்கள் வரிப்பணம் கொள்ளையடிக்கப்படுவதற்கும், ஊழலுக்கும் முடிவு கட்ட முடியாதென்பதைத் தெள்ளத் தெளிவாக எடுத்துரைத்தது.

இன்றுள்ள தேர்தல் வழிமுறையானது தொழிலாளிகள், விவசாயிகள் மற்றும் பொது மக்களுடைய வேட்பாளர்களை தேர்தல் களத்தில் நிறுத்தவோ, அவர்களுடைய கருத்துக்களை மக்களிடம் கொண்டு செல்லவோ, சமுதாயத்தில் உண்மையான மாற்றங்களை உருவாக்கவோ பெரிய தடையாக இருப்பதை கெதர் கட்சியினுடைய தோழர்கள் எடுத்து விளக்கினர். இன்று செயலலிதாவின் மக்கள் விரோத நடவடிக்கைகளும், அவருக்கு ஆதரவாக செயல்பட்ட கட்சிகளின் பித்தலாட்டமான இரட்டை வேடங்களும், கம்யூனிஸ்டு கெதர் கட்சி கூறியதை ஆணித்தரமாக நிரூபித்து வருகின்றன. கெதர் கட்சி, சமுதாயத்தில் மாற்றத்தைக் கொண்டுவருகின்ற விடிவெள்ளியாக செயல்பட்டு வருகிறது என்பதை தோழர் பாஸ்கர் தெள்ளத் தெளிவாக எடுத்துக் கூறினார்.

கம்யூனிஸ்டு இயக்கம் இன்று பிளவு பட்டிருந்தாலும், மார்க்சிச-லெனினிச அடிப்படையில் கம்யூனிஸ்டு களிடையே ஒற்றுமையை நிறுவ வேண்டும் என்ற நோக்கத்தோடு இந்திய கம்யூனிஸ்டு கெதர் கட்சி இடைவிடாமல் செயல்பட்டு வருகிறது. சில கம்யூனிஸ்டு கட்சிகளுடைய தலைமையின் துரோகத்தனத்தால் கம்யூனிஸ்டுகள் மனந்தளர்ந்து விடாமல், கம்யூனிச இயக்கத்தை ஒன்றுபடுத்திக் கொண்டு செல்ல முன்வர வேண்டுமென எல்லா கம்யூனிஸ்டுகளையும் தோழர் தாஸின் நினைவு நாளன்று வேண்டிக் கேட்டுக் கொண்டார்.

தமிழக விவசாயிகள் சங்கத்தின் தலைவர்களில் ஒருவரான தோழர் சரவணமுத்துவேல் பேசுகையில், தோழர் தாஸ் விவசாயிகளுடைய நலன்களுக்காக ஆற்றிய பணிகளை நினைவுகூர்ந்தார். இலவச மின்சாரத்தைப் பெறுவதற்காக மாபெரும் போராட்டத்தை விவசாயிகள் நடத்திய போது தோழர் தாஸ் அவர்கள் அப்போராட்டத்தின் முன்னணியில் நின்று போராடியவர் ஆவார். அது போலவே, விவசாய விளை பொருட்களுக்கு நியாயமான விலை கிடைப்பதற்காகவும், விவசாய நெருக்கடிக்குத் தீர்வு காண்பதற்காகவும் நடைபெற்றப் போராட்டங்களில் தோழர் தாஸ் தன்னுடைய பங்களிப்பைத் தந்திருக்கிறார். விவசாயிகளுடைய நல்வாழ்விற்காகவும், தொழிலாளி-விவசாயி கூட்டணியை உருவாக்கவும், அவர்களுடைய ஆட்சியதிகாரத்திற்கு வழிவகுக்கவும் தன் வாழ்நாளெல்லாம் உழைத்த தோழர் தாஸ் அவர்களுக்கு தன்னுடைய செவ்வணக்கத்தைத் தெரிவித்து உரையை முடித்துக் கொண்டார்.

கன்னியாகுமரி மாவட்ட மக்களாட்சி இயக்கத்தின் தலைவர்களில் ஒருவரான தோழர் ஐசக் தாமஸ் தொடர்ந்து பேசினார். அவர், தோழர் தாஸ் மக்களுடைய பிரச்சனைகளுக்குத் தீர்வு காணவும், உண்மையான போராட்ட இயக்கங்களைக் கட்டியமைக்கவும், இரப்பர் தோட்டத் தொழிலாளர்களுடைய பிரச்சனைகளுக்கு தீர்வு காணவும், தொழிலாளிகள்-விவசாயிகளுடைய சுரண்டலை ஒழிக்கவும் கடுமையாக உழைத்தவர் ஆவார் என்று கூறினார். மக்களாட்சி இயக்கத்தை குமரிமாவட்டத்தில் நிறுவுவதற்காக அடிக்கல் நாட்டியவர், தோழர் தாஸ். அவருடைய கொள்கைத் தெளிவும், மக்களுக்கு ஆதரவாக அவர் கொண்டிருந்த விடாப்பிடியான உறுதியும் நாம் அனைவரும் பின்பற்ற வேண்டிய முன் உதாரணமாகும் என்றார் அவர்.

தோழர் தாஸோடு பல்லாண்டுகள் உழைத்த தோழர் இராஜேந்திரன் தன்னுடைய உரையில் சிபிஎம்-னுடைய துரோகத் தனத்தையும், அந்த கட்சி தொழிலாளர்களுக்கு எதிராக முதலாளி வர்க்கத்தின் நலனுக்காக செயல்பட்டு வருவதையும் அவர் எடுத்துரைத்தார். தோழர் தாஸ் ஒரு தொழிலாளியாக இருந்திருந்தாலும், மார்க்சிச அறிவியலைப் படித்து, அதில் தேர்ச்சி பெற்றிருந்தார். அதன் காரணமாகவே தொழிலாளிகள்-விவசாயிகளுடைய ஆட்சியதிகாரத்திற்காக அவர் கடுமையாக உழைத்தார். மார்க்ஸ் - லெனினுடைய கோட்பாட்டில் எப்போதும் உறுதியாக நின்றார். அவருடைய பணிகளை நாம் மேலும் முன்னெடுத்துச் செல்வதும், கம்யூனிஸ்டு கெதர் கட்சியை கட்டி வளர்ப்பதும் மட்டுமே நாம் அவருக்கு ஆற்றுகின்ற கடமையாக இருக்கும் என்று தோழர் இராஜேந்திரன் கூறினார்.

கெதர் கட்சியின் முன்னணி செயல் வீரர்களில் ஒருவரான தோழர் பி.ஆர்.வில்லியம் அவர்கள் பேசுகையில், சாதாரணத் தொழிலாளியாக இருந்த தோழர் தாஸ் அவர்கள் கம்யூனிசத்தின் மீது கொண்டிருந்த பற்றுதல் காரணமாகவும், தொழிலாளி வர்க்கத்தை நாட்டின் ஆட்சியதிகாரத்திற்குக் கொண்டுவர வேண்டுமென்ற உறுதியான கொள்கைப் பிடிப்பின் காரணமாகவும், இந்திய கம்யூனிஸ்டு கெதர் கட்சியில் தன்னை இணைத்துக் கொண்டு, தன் இறுதிவரை உழைத்தவர் ஆவார். அவருடைய உழைப்பையும், கோட்பாட்டையும் நாம் என்றும் நினைவில் கொள்ள வேண்டும். தொழிலாளர்களுடைய ஒற்றுமையைக் கட்டியமைக்கவும், அவர்களுடைய போராட்டங்களை தோழர் தாஸ் காட்டிய வழியில் கொண்டு செல்லவும் நாம் பாடுபட வேண்டுமென்றார்.

கம்யூனிஸ்டு கெதர் கட்சி - கன்னியா குமரி மாவட்டத்தின் தலைவர் தோழர் வில்சன் அவர்கள் தோழர் தாஸ் ஆற்றிய கம்யூனிச முன்னோடிப் பணிகளை எடுத்துக் கூறினார். கம்யூனிச இயக்கத்தை திசை திருப்புவதற்காகவும், முதலாளி வர்க்கத்திற்கு சேவை செய்வதற்காகவும், பல கம்யூனிச கட்சிகள் செயல்பட்ட போது, கம்யூனிச கொள்கையிலிருந்து சிறிதும் விலகாமலும், விட்டுக் கொடுக்காமலும், அரசின் அடக்குமுறைக்கு பணிந்துவிடாமலும் தன் வாழ்நாள் முழுவதும் போராடியவர் தோழர் தாஸ். முதலாளித்துவ அரசு அவரை பல்வேறு பொய்க் குற்றச்சாட்டுகளாலும், சதிகளாலும் பலமுறை சிறையிலிட்டிருக்கிறது. அவர் ஏறத்தாழ 7 ஆண்டுகளை சிறையில் கழித்திருக்கிறார். குமரி மாவட்டத்தில் கம்யூனிச இயக்கத்தின் ஒற்றுமையைக் கட்டியமைக்கவும், இந்திய கம்யூனிஸ்டு கெதர் கட்சியை கட்டி வளர்க்கவும் இரவு பகலாக தன்னுடைய உழைப்பை ஈந்தவர் அவர். தோழர் தாஸினுடைய உயர்ந்த வாழ்க்கையைப் பின்பற்றி தொழிலாளர்களும், இளைஞர்களும், கம்யூனிச ஆதரவாளர்களும், கம்யூனிஸ்டு கெதர் கட்சியில் இணைந்து வேலை செய்ய வேண்டுமென்றும், சுரண்டலுக்கும் வறுமைக்கும் முற்றுப்புள்ளி வைக்கும் வரலாற்றுச் சிறப்புமிக்க பணியில் தங்களையும் இணைத்துக் கொள்ள வேண்டுமென்று அழைப்பு விடுத்தார்.

குமரி மாவட்டத்தின் கெதர் கட்சித் தோழர்களும், கம்யூனிஸ்டுகளும் மிகுந்த ஆர்வத்தோடு இக்கூட்டத்தில் கலந்து கொண்டனர். தோழர் தாஸ் அவர்களுக்கு நினைவஞ்சலி செலுத்துவதோடு, கட்சியை இடைவிடாமல் கட்டி வலுப்படுத்துவோமென்ற உறுதியோடு கூட்டம் நிறைவு பெற்றது.

Pin It

மாருதி-சுசூகி தொழிலாளர் சங்கத்தின் தலைமையில் குர்க்கானில் உள்ள மானேசரில் அமைந்துள்ள மாருதி-சுசூகி ஆலைத் தொழிலாளர்கள் தொழிலாளர் ஆணையர் அலுவலகம் முன் 2012 நவம்பர் 8, 9 தேதிகளில் இரண்டு நாள் உண்ணாவிரத போராட்டத்தில் ஈடுபட்டனர். வேலை நீக்கம் செய்யப்பட்ட தொழிலாளர்களை மீண்டும் வேலையில் சேர்க்கக் கோரியும் சிறை செய்யப்பட்ட தொழிலாளர்களை உடனடியாக விடுதலை செய்யக் கோரியும் இந்தப் போராட்டத்தில் அவர்கள் ஈடுபட்டனர்.

பாதிக்கப்பட்ட தொழிலாளர்களின் குடும்ப உறுப்பினர்கள் மட்டுமின்றி, பல்வேறு தொழிற்சங்கங்கள் மற்றும் தொழிலாளர்களின் அமைப்புக்களும் இந்த போராட்டத்தில் பங்கேற்றனர்.

அரியானாவின் பாசிச அரசாங்கம் இந்த வேலைநிறுத்தம் தொடங்குவதற்கு முன்பே அடக்கி ஒடுக்கிவிட கடுமையாக முயற்சி செய்தது. அப்போது தொழிலாளர் ஆணையர் அலுவலகத்திற்கு வெளியே நிறைய போலீஸ் குவிக்கப்பட்டு இருந்தது. தொழிலாளர்கள் உண்ணாவிரத போராட்டத்திற்கு கூடியவுடன் போலீசார் அவர்களை கைது செய்ய தொடங்கியது. இருப்பினும், மேலும் தொழிலாளர்கள் குவிந்தவுடன் எழுச்சி மிக்க வேலை நிறுத்தம் தொடங்கியது.

18 சூலையில் மாருதி மானேசர் ஆலையில் தீ ஏற்பட்டு ஒரு மேலாளர் மூச்சுமுட்டி இறந்துவிட்டார் என்பது நன்கு தெரிந்ததே. அதற்கு பின், எந்த விசாரணையும் இல்லாமல் "கொலை மற்றும் கொலை செய்ய சதி" செய்ததாக இந்திய குற்றவியல் சட்டத்தின் பல்வேறு பிரிவுகளின் கீழ் 655 தொழிலாளர்கள் மீது கடுமையான குற்றச்சாட்டுகள் சாட்டப்பட்டுள்ளனர். இதில் வெறும் 55 நபர்களுக்கே பெயர் குறிப்பிடப்பட்டுள்ளது. அதில் 160 நபர்களை சிறையில் அடைக்கப்பட்டு சித்திரவதைக்கு உள்ளாக்கப்பட்டுள்ளனர். நிறுவனம், 546 தொழிலாளர்களை எந்த முன்அறிவிப்பும் இல்லாமல் வேலைநீக்கம் செய்துள்ளது. இது தவிர, மேலும் 2000 தற்காலிக தொழிலாளர்கள் வெளியேற்றப்பட்டனர். தொழிலாளர்கள் தங்கள் விருப்பத்திற்கு ஏற்ற ஒரு தொழிற்சங்கம் அமைப்பதை நிர்வாகம் கடுமையாக எதிர்க்கிறது.

வேலை நிறுத்தம் செய்த தொழிலாளர்களிடத்தில் உரையாற்றிய தொழிலாளர் ஒற்றுமைக் குழுவின் பிரதிநிதி, நாட்டின் தொழிலாளர்களும் முதலாளிகளும் மாருதி-சுசூகி தொழிலாளர்களின் போராட்டத்தை கூர்ந்து கவனித்து வருகின்றனர், என்று கூறினார்.

அநீதி இழைக்கப்படுவதற்கு எதிராக நீதிக்கான போராட்டங்களை முன்னெடுக்கவும் சுரண்டலுக்கு எதிரான போராட்டங்களை முன்னெடுக்கவும், தங்கள் விருப்பப்படி போராட்ட அமைப்புக்களை அமைக்கும் உரிமையை தொழிலாளர்களுக்கு மறுப்பதற்காக தொழிலாளர்களின் இந்த போராட்டத்தை எப்படியாவது நசுக்க வேண்டும் என்று முதலாளிகள் பெருமுயற்சி செய்து வருகிறார்கள் என்று அவர் விளக்கினார். தொழிலாளர்களின் வெற்றி நோக்கிய பயணத்தை தடுத்து நிறுத்தவும் அவர்களின் முயற்சியை மக்களின் பார்வையில் இழிவுபடுத்தவும் தான் மாருதி-சுசூகி நிர்வாகமும் அரசாங்கமும் சதி செய்து வருகின்றன.

கடந்த பல ஆண்டுகளாக, முதலாளிகளின் அரசாங்கம் இன்றுள்ள தொழிலாளர் சட்டங்கள் இந்தியாவின் முன்னேற்றத்திற்கு தடைக்கல்லாக உள்ளன என்று சித்தரித்து நம் நாட்டு மக்களை குழப்பி வருகின்றனர். வேறு வார்த்தைகளில் கூறினால், முதலாளிகளின் முன்னேற்றமே நாட்டின் முன்னேற்றம் என்று அவர்கள் சொல்கிறார்கள். முதலாளித்துவ அரசியல் கட்சிகள் இந்திய முதலாளிகளை உலகளாவிய முதலாளிகளாகப் பார்க்க வேண்டும் என்று ஆவலாக உள்ளனர். சுரண்டலுக்கு எதிராக தொழிலாளி வர்க்கம் இருப்பது அவர்களுக்கு முட்டுக்கட்டையாக உள்ளது.

மாருதி தொழிலாளர்களின் போராட்டம் தொழிலாளி வர்க்கத்திற்கு மிக முக்கியமானது என்று சுட்டிக்காட்டினார். இது மானேசர் குர்க்கானுடைய ஒரு போராட்டம் என்பது மட்டுமல்ல, இது பரிதாபாத்திலிருந்து பாவல் வரையிலான இந்தியாவின் அனைத்து தொழிலாளி வர்க்கம் மற்றும் உழைக்கும் மக்களுடைய போராட்டமுமாகும். இந்த போராட்டம் வெற்றிபெற வேண்டும் என்று அவர் வலியுறுத்தினார். அப்பொழுது தான் நாம் எந்த முன்னேற்றத்தையும் பெற முடியும்.

ஐந்து ஆண்டுகளுக்கு ஒரு முறை வாக்களித்துவிட்டு நாட்டை நடத்துவதை முதலாளிகளிடமும் அவர்களது அரசியல் கட்சிகளிடமும் ஒப்படைத்துவிட்டு நாம் அரசியலில் ஒதுக்கப்பட்டு இருக்க முடியாது என்று விளக்கினார். நாம் தான் செல்வத்தின் படைப்பாளிகள், நாம் தான் நாட்டின் உந்து சக்தி. நாம் முதலாளிகளுடைய கைகளில் நாட்டை விட்டுவிட முடியாது, மாறாக நாமே ஓட்டுநர் இருக்கையை ஆக்கிரமிக்க வேண்டும். நாட்டின் தொழிலாளர்கள் ஒரு அரசியல் சக்தியாக உருவெடுக்க வேண்டும். நாம் முதலாளித்துவ கட்சிகளின் வாலாக இருப்பதை எதிர்க்க வேண்டும். நாம் தொழிலாளி வர்க்கத்தின் திட்டத்தை முன்னுக்கு கொண்டு செல்ல வேண்டும்.

இந்தியாவின் பல பகுதிகளிலும் இருந்து வந்த பல தொழிற்சங்க மற்றும் தொழிலாளர்களின் அமைப்புக்களின் பிரதிநிதிகள் இரண்டு நாள் உண்ணாவிரத போராட்டத்தில் உரையாற்றினார்.

அடுத்த நாள், தொழிலாளர்கள் தொழிலாளர் ஆணையர் அலுவலகத்தில் இருந்து பாராளுமன்றத்தின் உள்ளூர் உறுப்பினர் வீட்டிற்கு ஒரு ஊர்வலமாக சென்று தங்களுடைய கோரிக்கையை வலியுறுத்தினர்

Pin It

உட்பிரிவுகள்