நகர் நீங்கும் பறவைகள்

கோபுர கலசத்தின் உச்சியில்

கடவுளின் கடவுளாய்

அமர்ந்திருக்கிறதோர் பறவை

கடவுளை

ஆசீர்வதித்ததின்

அடையாளமாய் பிரசாதமென

எச்சமிட்டு பறக்கிறது

மின் கம்பங்களின் எண்ணிக்கைக்கு

இணையாகக்கூட

மரங்கள் நடப்படாத நகரத்தில்

பறவைகள் இறங்குவதில்லை

பறவைகளின் சிறகசைவில்

சுழலும் காற்றில் மாசு நீங்கக்கூடும்

தங்க நாற்கர சாலைகளால்

இணைக்கப்படும் இந்நகரத்தின்

பழைய வரைபடத்தில்

பறவைகள்

இரையருந்திப் பறக்கும்

மாபெரும் மண் கிண்ணத்தைப்போல்

குளமொன்று இருந்தது

பெரும் மழைக்காலங்களில்

குளம்தேடி நீர்சூழ

நகராத காங்கிரிட் கப்பல்களாய்

மிதக்கும் குடியிருப்புகள்.