மலர்: பூப்பூவா பூத்திருக்கு பூமியிலே ஆயிரம் பூ. பூவிலே சிறந்த பூ என்ன பூ?

விக்கி: என்ன இன்று பூக்களைப் பற்றிய பாட்டு? ஆராய்ச்சி?

மலர்: மனதில் பதிந்துவிட்டது. ஒரு நண்பர் வீட்டுக்குச் சென்றேன். அங்கு புதியவகைத் தேநீர் என்று ஒரு மஞ்சள் திரவம் கொடுத்தார்கள். சுவைத்தேன். மனம் மகிழ்ந்தேன். அது சாமந்தி தேநீர் என்று கூறினார்கள்.

விக்கி: சாமந்தி பூவில் தேநீரா? விசித்திரமாக உள்ளதே.வீரன்: அமெரிக்க ஆங்கிலத்தில் கேமோமில் என்றும் பிரிட்டிஷ் ஆங்கிலத்தில் கேமோமைல் என்றும் கூறப்படும் சாமந்தி, ஆஸ்டரேசி குடும்பத்தைச் சேர்ந்த, டெய்ஸி மலர்களைப் போன்ற தோற்றமுடைய பல தாவரங்களின் பொதுவான பெயராகும். இவற்றில் ஜெர்மன் சாமந்தி எனும் மேட்ரிகேரியா கேமோமில்லா மற்றும் ரோமன் சாமந்தி எனும் கேமேமெலம் நொபிலே ஆகிய இரண்டு இனங்கள், பானங்களுக்கான மூலிகைச் சாறுகளைத் தயாரிக்கப் பொதுவாகப் பயன்படுத்தப்படுகின்றன. சாமந்தி உணவுகள், பானங்கள் மற்றும் அழகுசாதனப் பொருட்களில் சுவையூட்டியாகவும், மூலிகை தேநீர் தயாரிப்பிலும் பயன்படும் அருமையான மலர். உளவியல் நோக்கில் மனதை அமைதிப்படுத்தும் பூ. தாவரவியல் நோக்கில் தோட்டங்களில் தரையை மூடும் தாவரமாகவும் அமைக்கும் இடத்தைச் சுற்றி அமைக்கும் தாவரமாகவும் பயன்படுத்தப்படுகிறது.

மலர்: சாமந்திப்பூ மூலிகைப் பூவா? மருத்துவ மலரா?

வீரன்: எந்த நோய்க்கும் சிகிச்சையளிக்க சாமந்தியை ஆதரிக்கும் மருத்துவச் சான்றுகள் எதுவும் இல்லை. எந்த நோய்க்கும் சிகிச்சை அளிப்பதில் சாமந்தி பயனுள்ளதாக இருக்கும் என்பதற்கும் மருத்துவச் சான்று எதுவும் இல்லை. சாமந்தி அதன் பதட்ட எதிர்ப்புப் பண்புகளுக்காகப் பூர்வாங்க ஆராய்ச்சியில் உள்ளது. தூக்கமின்மைக்குச் சிகிச்சை அளிப்பதில் பயனுள்ளதாக இருக்கும் என்பதற்கும் சான்று இல்லை. கேமோமில் பல்வேறு மூலிகை மருந்துகளுடன் எதிர்மறை விளைவை ஏற்படுத்தலாம். மகரந்த ஒவ்வாமையை மோசமாக்கலாம். ஹார்மோன் உணர்திறன் கொண்ட உடல்நலப் பிரச்சினை உள்ளவர்களுக்குச் சாமந்திச் சாறு வேண்டாம். இரத்தம் உறைதலைத் தடுக்கும் மருந்துகளுடன் சேர்த்து இதைப் பயன்படுத்தக் கூடாது. வெளிநாட்டு சாமந்திப்பூவான ரோமன் கேமோமில் கருப்பைச் சுருக்கங்களை ஏற்படுத்தக்கூடும். கர்ப்ப காலத்தில் இதை உணவாகவோ பானமாகவோ பயன்படுத்தக் கூடாது. தாய்ப்பால் கொடுக்கும் காலத்தில் இதன் பாதுகாப்புத் தன்மை குறித்த தகவல் இல்லை. முழுமையான மூலிகைப் பூவாக இதைக் கருத முடியாது. மனதிற்கு உற்சாகம் தரும், இரத்த ஓட்டத்தைத் தூண்டிச் சுறுசுறுப்பு தரும் மூலிகை பானமாக இதைக் கருதலாம்.

விக்கி: சாமந்திப் பூவுக்கு வேறு ஏதும் பயன்கள் இல்லையா?

வீரன்: ஜெர்மன் சாமந்தி பலவித பூஞ்சைகள், வைரஸ்கள் மற்றும் பூச்சிகளால் எளிதில் பாதிக்கப்படக்கூடியது. இவை அனைத்தும் அதன் சாகுபடிக்கு அச்சுறுத்தல்களை ஏற்படுத்தும். 'கேமோமில்' என்ற சொல் பிரெஞ்சு மற்றும் லத்தீன் மொழிகள் வழியாக, கிரேக்கச் சொல்லான காமைமெலான் என்பதிலிருந்து உருவானது. இச்சொல் 'நில ஆப்பிள்' என்று பொருள்படும். காமை என்றால் 'தரையில்', மெலான் என்றால் 'ஆப்பிள்'.

"ஜெர்மன் கேமோமில்", "இளமையின் நீர்" (Water of Youth) என்று அழைக்கப்படுகிறது. ரோமன் சாமந்தி ஆங்கிலச் சாமந்தி அல்லது தோட்டச் சாமந்தி எனப்படும். கேமோமில் புல்வெளியை உருவாக்கப் பொதுவாகப் பயன்படுகிறது. வேறு பல தாவர வகைகளின் பொதுவான பெயர்களிலும் 'கேமோமில்' என்ற சொல் இடம்பெற்றாலும், மூலிகை தேநீரில் பயன்படுத்தப்படும் அதே வகை சாமந்தியல்ல. அஸ்ட்ரேசீ குடும்பத்தைச் சேர்ந்த, கேமோமில் என்ற பொதுப் பெயரைக் கொண்ட தாவரங்கள் பல உண்டு. அன்தமிஸ் அர்வன்சிஸ் என்பது கார்ன் சாமந்தி. மணமற்றது. வயல்வெளி கேமோமில் எனப்படும். அன்தமிஸ் கோடுலா என்பது துர்நாற்றம் வீசும் கேமோமில். மேலும் மொராக்கோ கேமோமில் என்று ஒரு வகை உள்ளது. சாயத் தாவரமாகப் பயன்படும் தங்க நிற, ஆக்ஸி-ஐ அல்லது மஞ்சள் கேமோமில் ஒரு வகை. கேப் (Cape) கேமோமில், காட்டு கேமோமில் அல்லது அன்னாசி களை (pineapple weed) சாமந்தி, மன்சானில்லா ஆலிவ் (Manzanilla olive) ஆகியன பிற வகைகள். பொதுவான கேமோமில், கேமோமில் பாஸ்டா, கார்மோனா கேமோமில், வெள்ளை கேமோமில், டூ சிஸ்டர்ஸ் கேமோமில், குளோப் (globe) கேமோமில், காட்டு, மணமற்ற அல்லது போலி கேமோமில் என்றும் சில வகைகள் உள்ளன. எல்லாமே தேநீர் ஆவதில்லை.

விக்கி: சாமந்தி தேநீர் எப்படிச் செயல்படுகிறது நம் உடலில்?

வீரன்: கேமோமில் தேநீர் என்பது உலர்ந்த பூக்கள் மற்றும் சூடான நீர் கொண்டு தயாரிக்கப்படும் ஒரு மூலிகை பானமாகும். தளர்வான இலை கொண்ட சாமந்திப் பூக்களைக் கொதிநீரில் வேகவைக்கும்போது கௌமரின் மற்றும் பிளேவனாய்டுகள் பிரிந்து தேநீர் திரவம் பெறப்படுகிறது. நரம்புகளைத் தூண்டி இரத்த ஓட்டத்தை முறைப்படுத்துகிறது. கேமோமில் உணவு மற்றும் பானங்கள், வாய் கொப்பளிக்கும் திரவம், சோப்புகள் மற்றும் அழகுசாதனப் பொருட்களில் சுவையூட்டியாகப் பயன்படுத்தப்படலாம். 'நேஷனல் சென்டர் ஃபார் காம்ப்ளிமென்டரி அண்ட் இன்டகிரேடிவ் ஹெல்த்' (NCCIH) அமைப்பின் குறிப்பில், ஜெர்மன் மற்றும் ரோமன் கேமோமில் என்ற இரண்டு வகைகள் குறிப்பிடப்பட்டுள்ளன. வரலாற்று ரீதியாகப் பானம் தயாரிப்பில் சுவையூட்டும் பொருட்களில் ஒன்றாகக் கேமோமில் பயன்படுத்தப்பட்டு வந்துள்ளது. இது கசப்பான சுவையைச் சேர்க்கிறது. நிக்கோலஸ் கல்பெப்பரின் 17-ஆம் நூற்றாண்டைச் சேர்ந்த 'தி கம்ப்ளீட் ஹெர்பல்' (The Complete Herbal) நூலில், கேமோமில் குறித்த விளக்கப்படமும் பல குறிப்புகளும் இடம்பெற்றுள்ளன. இங்கிலாந்தின் லண்டனில் உள்ள சாவோய் ஹோட்டலில் கேமோமில் தேநீர் பரிமாறப்படுகிறது. ரோமன் கேமோமில் ரகங்கள் கேமோமில் இருக்கைகளை உருவாக்கப் பயன்படுகிறது. இவை அரை மீட்டர் உயரமுள்ள, மக்கள் அமரும் வகையில் வடிவமைக்கப்பட்ட மேடைகள் (raised beds) ஆகும். சூரிய ஒளி அதிகம் படும் மற்றும் மக்கள் நடமாட்டம் குறைவாக உள்ள பகுதிகளில் கேமோமில் புல்வெளிகளும் அமைக்கப்பட்டு மனமகிழ்ச்சிக்குப் பயன்படுத்தப்படுகின்றன.

மலர்: சாமந்திப் பூவில் உள்ள வேதிப் பொருட்கள் என்ன?

வீரன்: சாமந்தி பூக்களில் உள்ள முக்கிய சேர்மங்கள் கௌமரின்கள், ஃபிளாவனாய்டுகள் மற்றும் பாலிஃபீனால்கள் ஆகும். அபிஜெனின், குவெர்செடின், பாடுலெடின், லுடியோலின் மற்றும் டாஃப்னின் ஆகியனவும் உள்ளன. டெய்ஸி (daisies), நாட்டு சாமந்தி (marigolds) அல்லது ராக்வீட் (ragweed), கிரிசாந்தமம் (chrysanthemums) ஆகியவத்தால் ஒவ்வாமை உள்ளவர்களுக்குக் கேமோமைல் மீதும் ஒவ்வாமை ஏற்பட வாய்ப்புள்ளது. இவை அனைத்தும் டெய்ஸி குடும்பத்தைச் சேர்ந்தவை. கேமோமைல் பூச்சாற்றில் உள்ள கௌமரின் (coumarin), கிளைகோசைடு (glycoside), ஹெர்னியரின் (herniarin), ஃபிளாவனாய்டுகள் (flavonoids), ஃபார்னெசோல் (farnesol), நெரோலிடோல் (nerolidol) மற்றும் ஜெர்மாக்ரானோலைடு ஆகியன ஒவ்வாமை ஏற்படுத்தக்கூடிய வேதிமங்கள் ஆகும். இதில் கௌமரின் இரத்த உறைதல் அமைப்பின் மீது தாக்கம் ஏற்படுத்தும். அது குறித்து ஆய்வு செய்யப்படவில்லை. இரத்த உறைதலைத் தடுக்கும் மருந்துகளுடன் மருத்துவ ரீதியாகப் பக்கவிளைவு பற்றித் தெரியவில்லை. கூடுதல் தகவல் கிடைக்கும் வரை, இரத்த உறைதல் மருந்துடன் சாமந்திச் சாறு பயன்படுத்துவது ஏற்புடையதல்ல. மார்பகம், கருப்பை அல்லது அண்டகம் சார்ந்த புற்றுநோய், எண்டோமெட்ரியோசிஸ் அல்லது கருப்பை நார்த்திசுக்கட்டிகள் உள்ளவர்கள் சாமந்தியை உணவாகவோ பானமாகவோ பயன்படுத்தக் கூடாது. கருப்பைச் சுருக்கம் ஏற்படுத்திச் கருச்சிதைவை உண்டாக்கக்கூடும் என்பதால், கர்ப்பிணிகள் ரோமன் கேமோத்தினை உட்கொள்ள வேண்டாம் என்று அறிவுறுத்தப்படுகிறது. அமெரிக்காவில் கேமோமைல் சாற்றை வாய்வழியாக உட்கொள்வது பாதுகாப்பானதாகக் கருதப்படுகிறது. தாய்ப்பால் குடிக்கும் குழந்தைகளை அது எவ்வாறு பாதிக்கும் என்பது குறித்த மருத்துவச் சான்றுகள் இல்லை.

விக்கி: சாமந்திப் பூக்களைப் பாதிக்கும் நோய்கள் என்ன?

வீரன்: அல்புகோ பூஞ்சை வெள்ளை துரு நோயை ஏற்படுத்துகிறது. உருளைப் பூஞ்சை, பக்சினியா வைரஸ், செப்டோரியா வைரஸ் மற்றும் பல வகையான பவுடரி மில்டியூ (powdery mildew) பூஞ்சைகளும், மஞ்சள் வைரசும் சாமந்திப்பூவிற்குப் பெரும் சேதத்தை ஏற்படுத்துகின்றன. அஃபிட்ஸ் பூச்சிகள் கேமோமில் தாவரங்களை உண்பது காணப்பட்டுள்ளது; மேலும் ஆட்டோகிராபா கிரைசன் என்ற அந்துப் பூச்சி இலை உதிர்தலை ஏற்படுத்துகிறது. நைசியஸ் மைனர் என்ற பூச்சி சாமந்தி மலர்கள் உதிர்வதற்குக் காரணமாக அமைந்தது.

மலர்: சாமந்தி தேநீர் போல வேறு ஏதாவது பூத்தேநீர் உள்ளதா?

வீரன்: சங்குப்பூ அறிவீர்கள் அல்லவா? அதன் தேநீர் நவீன வரவு. கிளிட்டோரியா டெர்னாடியா என்ற பூ சங்குபுஷ்பம் எனப்படும். சங்கு வடிவ மலர், ஆசியப் புறா இறக்கைகள், நீலமணிக்கொடி, நீலப் பட்டாணி, பட்டாம்பூச்சிப் பட்டாணி, நாணல் பட்டாணி அல்லது டார்வின் பட்டாணி என்று பல பெயர்களில் அழைக்கப்படுகிறது. ஃபேபேசியே குடும்பத்தைச் சேர்ந்த ஒரு தாவர இனமாகும். இந்தோனேசியாவின் டெர்னாட் தீவைப் பூர்வீகமாகக் கொண்டது. இந்திய ஆயுர்வேதத்தில் இது பொதுவாக அபராஜிதா என்ற பெயரில் அறியப்படுகிறது. நீள்வட்ட, மழுங்கிய இலைகளைக் கொண்ட ஒரு பல்லாண்டு மூலிகைச் செடியாகும். இது ஒரு கொடியாகப் படர்ந்து வளரும், ஈரமான, நடுநிலையான மண்ணில் நன்றாக வளரும். இதன் குறிப்பிடத்தக்க அம்சம் மலர்களின் நிறம், பிரகாசமான அடடர் நீலம். தனித்தனியாக, வெளிர் மஞ்சள் நிற அடையாளங்களுடன் காணப்படும். அவை 4 செ.மீ. நீளமும் 3 செ.மீ. அகலமும் கொண்டவை. சில வகைகள் வெள்ளை மற்றும் இளஞ்சிவப்பு மலர்களைத் தருகின்றன. பழங்கள் 5 செ.மீ. நீளமுள்ள, தட்டையான காய்களாகும். ஒவ்வொரு காயிலும் ஆறிலிருந்து பத்து விதைகள் வரை இருக்கும். ஐரோப்பாவில் அலங்காரத் தாவரமாக வளர்க்கப்படுகிறது. ஆஸ்திரேலியாவில் நிலக்கரிச் சுரங்கங்களில் பசுமைக்காக வளர்க்கப்படுகிறது. பயிரிடும்போது அதிக பராமரிப்பு தேவையில்லை. ஒரு பருப்பு வகைத் தாவரமாக, இதன் வேர்கள் ரைசோபியா எனும் மண் பாக்டீரியாக்களுடன் ஒரு கூட்டு வாழ்வுத் தொடர்பை உருவாக்குகின்றன. இவை வளிமண்டல நைட்ரஜனைத் தாவரங்கள் பயன்படுத்தக்கூடிய வடிவமாக மாற்றுகின்றன. இந்த செயல்முறை நைட்ரஜன் நிலைநிறுத்தம் என்று அழைக்கப்படுகிறது. நைட்ரஜன் நிறைந்த தாவரப் பொருட்களைச் சிதைப்பதன் மூலம் மண்ணின் தரத்தை மேம்படுத்தவும் சங்குப்பூச் செடிகள் பயன்படுத்தப்படுகின்றன.

விக்கி: சங்குப் பூச் சாற்றில் என்னென்ன வேதிமங்கள் உள்ளன?

வீரன்: சங்குப் பூவிலிருந்து பிரித்தெடுக்கப்பட்ட வேதிச்சேர்மங்களில் பல்வேறு டிரைடெர்பெனாய்டுகள், ஃபிளவனோல் கிளைகோசைடுகள், ஆந்தோசயின்கள் மற்றும் ஸ்டீராய்டுகள் ஆகியவை அடங்கும். சங்குப் பூச்சாற்றின் வெப்ப-நிலைத்தன்மை கொண்ட பகுதியிலிருந்து கிளியோடைடுகள் எனப்படும் வளைய பெப்டைடுகள் பிரித்தெடுக்கப்பட்டுள்ளன. இதன் நீல நிறம் பல்வேறு ஆந்தோசயனின்களின் விளைவாகும். டெர்னாடின்கள், டெல்ஃபினிடின் டிரை குளுகோசைடு இன் பாலிஅசைலேட்டட் ஆகிய ஆந்தோசயனின்கள் பூவுக்கு அழகிய நீலநிறத்தைத் தருகின்றன. குறிஞ்சியும் சங்கும் பிரபலமான நீலப்பூக்கள்.

மலர்: இந்த சங்குப்பூவைப் பற்றி எப்போது கண்டுபிடித்தார்கள்?

வீரன்: சங்குப்பூவைப் பற்றிய முதல் குறிப்பு, விளக்கப்படத்துடன், 1678 ஆம் ஆண்டில் போலந்து இயற்கைவாதியான ஜேக்கப் பிரைன் என்பவரால் விளக்கப்பட்டது. அவர் ஃப்ளோஸ் கிளிட்டோரிடிஸ் டெர்னாடென்சிபஸ் என்று அதை விவரித்தார். இதன் பொருள் 'கிளிட்டோரிஸின் டெர்னாடியன் மலர்'. இந்தச் சிற்றினத்தின் பெயர், தாவரவியலாளர் கார்ல் லின்னேயஸின் மாதிரிகள் தோன்றிய தீவின் பெயரிலிருந்து பெறப்பட்டது. மலுக்கு தீவுகளின் வடக்குப் பகுதியில் அமைந்துள்ள டெர்னாட் தீவில் அந்த மாதிரிகள் தோன்றின. இத்தாவரம் தெற்காசியா மற்றும் தென்கிழக்காசியா உள்ளிட்ட பூமத்திய ரேகைக்கு அருகிலுள்ள ஆசியப் பகுதிகளைத் தாயகமாகக் கொண்டது; எனினும், இது ஆப்பிரிக்கா, ஆஸ்திரேலியா மற்றும் அமெரிக்கக் கண்டங்களுக்கும் அறிமுகப்படுத்தப்பட்டது. சங்குப் பூச்செடி சாமந்திச்செடி போல கடுமையான பூச்சி அல்லது நோய் பாதிப்புக்கு உள்ளாவதில்லை. அரிதாகக் கம்பளிப்பூச்சிகள், வெள்ளை ஈக்கள், சிலந்திப் பூச்சிகள் ஆகியவற்றால் பாதிக்கப்படுகிறது. ஆந்த்ராக்னோஸ் மற்றும் பாக்டீரியா மென் அழுகல் நோய்களால் பாதிக்கப்படுகிறது. பூஞ்சை சார்ந்த வேர் அழுகல் நோய்களால் அரிதாகவே பாதிக்கப்படுகிறது.

உண்மையில் சங்குப்பூவின் சாறு இயற்கை இழைகளுக்குச் சாயம் ஏற்றப் பயன்படுகிறது. ஆசியப் பாரம்பரியச் சமூகங்கள் சாயத்திற்காகத்தான் பயன்படுத்துகின்றன. தென்கிழக்காசியாவில், இப்பூ ஒட்டும் தன்மை கொண்ட அரிசி (glutinous rice) மற்றும் 'புடுகல்' (putugal) போன்ற இனிப்பு வகைகளுக்கு இயற்கையான நிறமூட்டியாகப் பயன்படுகிறது. ஆயுர்வேத மருந்தாகவும் பயன்படுகிறது. தீபகற்ப மலேசியாவின் வடகிழக்குப் பகுதி கெலாண்டனில், 'நாசி கெராபு' (nasi kerabu) என்ற உணவில் இது ஒரு முக்கியப் பொருளாகச் சேர்க்கப்பட்டு, அதற்குத் தனித்துவமான நீல நிறத்தை அளிக்கிறது. பர்மா மற்றும் தாய்லாந்து சமையல் முறையில், பூக்களை வெண்ணெயில் நனைத்துப் பொரித்தும் உண்கிறார்கள். சங்குப்பூ வறுவல் சுவையானது, சத்தானது, எளிதில் செரிக்கக் கூடியது. தாய்லாந்தின் 'தாய் காவ் டோம்' என்ற இனிப்பு, சங்குப்பூக்களால் நீலநிறமாக்கப்பட்டது. 'நியோன்யா' (Nyonya) உணவான 'புலோட் டார்டால்' (pulot tartal) உணவிற்கு நிறமூட்டவும் இது பயன்படுத்தப்படுகிறது. விதைகள் மற்றும் காய்கள் இளசாக இருக்கும்போது உண்ணக்கூடியவை. நிலக்கடலை போலச் சத்தானவை, சுவையானவை.

விக்கி: சங்குப்பூத் தேநீர் என்றாய். அதைப் பற்றிக் கூறலாமே?

வீரன்: 'பட்டாம்பூச்சி பட்டாணிப் பூ' (Butterfly pea) தேநீர், அழகான நீலச் சங்குப்பூ இதழ்களுடன் உலர்ந்த எலுமிச்சைப்புற்களைச் சேர்த்து தயாரிக்கப்படுகிறது. சேர்க்கப்படும் பொருட்களைப் பொறுத்து இதன் நிறம் மாறுகிறது. உதாரணமாக, எலுமிச்சைச் சாறு சேர்க்கும்போது இது ஊதா நிறமாக மாறுகிறது. தாய்லாந்து மற்றும் வியட்நாமில் இந்த நீல பட்டாணி பூ தேநீர் பொதுவாகத் தேன் மற்றும் எலுமிச்சையுடன் கலந்து தயாரிப்பார்கள். அவை அமிலத்தன்மையை அதிகரித்து, பானத்தை இளஞ்சிவப்பு-ஊதா நிறமாக மாற்றுகின்றன. பொதுவாக இரவு உணவிற்குப் பிறகு பரிமாறப்படும் பானமாகவோ அல்லது ஹோட்டல்கள் மற்றும் ஸ்பாக்களில் புத்துணர்ச்சிக்காகவோ தயாரிக்கப்படுகிறது. இந்தப் பானம், உலகின் பிற பகுதிகளில் தேநீர் இருப்பது போல, தாய்லாந்தில் உள்ளூர் பானமாகும். சூடான மற்றும் குளிர்ந்த வகைகளில் கிடைக்கிறது. சங்குப் பூக்கள் சமீபகாலமாக நிறம் மாறும் ஜின் மற்றும் அப்சிந்தேவில் பயன்படுத்தப்படுகின்றன. பாட்டிலில் நீல நிறத்தில் இருக்கும் சங்குப்பூச்சாறு எசன்ஸ், டோனிக் வாட்டர் போன்ற கார்பனேற்றப்பட்ட கலவையுடன் கலக்கும்போது pH மாற்றத்தின் காரணமாக இளஞ்சிவப்பு நிறமாக மாறுகிறது. கரிம நிறங்கள் நிரந்தரமானவை அல்ல என்பதால், இந்த வகை ஜின் அதன் நிறத்தைத் தக்கவைக்க இருண்ட இடத்தில் சேமிக்க வேண்டும். இது ஐரோப்பிய ஒன்றியத்தில் அனுமதிக்கப்பட்ட மூலப்பொருள் அல்ல.

விக்கி: நம்மூரில் சங்குப்பூவின் பயன்பாடு எப்படி?

வீரன்: சங்குப்பூ பாரம்பரிய ஆயுர்வேதத்தில் நீண்ட காலமாகப் பயன்படுத்தப்பட்டு வருகிறது. மனிதர் மீது எந்த மருத்துவ ஆய்வுகளும் நடத்தப்படவில்லை. சங்குப்பூ உற்பத்தி செய்யும் சைக்ளோடைடுகள் எனப்படும் ஒரு வகை வளைய பெப்டைடுகள் சக்திவாய்ந்த பூச்சிக் கொல்லிப் பண்புகளைக் கொண்டுள்ளன. இயற்கையாகக் காணப்படும் இச்சேர்மங்கள், நிலையான வளைய சிஸ்டைன் முடிச்சு அமைப்பைக் கொண்டுள்ளன. இது நொதிச் சிதைவை எதிர்க்கும் திறனுக்கும், பூச்சிகளுக்கு எதிரான உயிரியல் செயல்பாட்டிற்கும் பங்களிக்கிறது. இந்தச் செயல்பாடு, தாவரச் சாறுகளை அடிப்படையாகக் கொண்ட தாவர பூச்சிக்கொல்லிகளை உருவாக்குவதில் பயன்பட்டுப் பூச்சிக் கட்டுப்பாட்டிற்காக வணிகமயமாக்கப்பட்டுள்ளன. பூச்சிக்கொல்லி எதிர்ப்பு நடவடிக்கைக்குழுவால் (IRAC) செயல்திறன்மிக்க பொருளாக அதிகாரபூர்வமாக அங்கீகரிக்கப்பட்டுள்ளது. இதில் இரட்டைச் சங்குப்பூ அரிதானது. வியட்நாம் கிராமப்புறப் பெண்களின் சிறு தொழிலாகப் பட்டாம்பூச்சி பட்டாணி பூக்களை சேகரித்து விற்பது இருக்கிறது. கிராமியப் பொருளாதாரத்துக்கு இது வலுவூட்டுகிறது.

விக்கி: ஒரு மஞ்சள் பூ, ஒரு நீல பூ... தேநீர்ப் பூக்கள் வேறு ஏதும் உள்ளதா?

வீரன்: உங்களுக்கு நன்கு தெரிந்த ஒரு பூ தேநீர் பானமாகவும் அருந்தப் பயன்பட்டு வருகிறது. தெரியுமா?

மலர்: ரோஜா? மல்லிகை? இல்லையே. இவை நறுமணத் திரவியம் செய்வதற்குத்தானே பயனாகின்றன? வேறு என்ன பூ?

வீரன்: நெப்போலியனின் அறுவை சிகிச்சை நிபுணரும் மகப்பேறு மருத்துவருமான பரோன் அன்டோயின் டுபாய்ஸின் சின்னம். சிரில் நியூவால், முதல் பரோன் நியூவால் அவர்களின் தனிப்பட்ட சின்னம். வங்காளதேசத்தின் தேசியச் சின்னம். ஐந்து அழகான இதழ்கள். மனதை இலேசாக்கும், மகிழ்விக்கும் செக்கச் சிவந்த மலர். அனைவரும் விரும்பும் ஐந்து இதழ் மலர்.

மலர்: புரிந்தது. செம்பருத்திப் பூவைத் தானே சொல்கிறாய்?

வீரன்: செம்பருத்தி அல்லது செவ்வரத்தை (Hibiscus rosa-sinensis) என்பது இந்தியா, இலங்கை போன்ற இடங்களில் வளரும் தாவர இனம் ஆகும். செடி இனத்தைச் சார்ந்த செம்பருத்திப்பூ மருத்துவ குணங்கள் கொண்டது. கிழக்கு ஆசியாவில் தோன்றிய தாவரமாகும். இது சீன ரோஜா எனவும் அழைக்கப்படுகிறது. மலேசியாவின் தேசிய மலராகும். பொதுவாக அழகுத் தாவரமாக வளர்க்கப்படுகிறது. இது சப்பாத்துச் செடி, ஜபம், செம்பரத்தை என்றும் அழைக்கப்படுகிறது. செம்மை நிறத்தில் பெரும்பாலும் இதன் மலர்கள் காணப்படுவதால், செம்பரத்தை என்று பெயர் பெற்றது. தற்போது மஞ்சள், ஊதா நிறங்களிலும் வளர்க்கப்படுகிறது. ஆயுர்வேதத்தில் இது ஜபா புஸ்பா, ருத்ர புஷ்ப, ரக்த கார்பாசம் என்றும் அழைக்கப்படுகிறது. பாரதத்தின் புகழ்பெற்ற பூ இது.

விக்கி: செம்பருத்திப் பூவில் அறிவியல் சிறப்பு அம்சம் என்ன?

வீரன்: மால்வேசியே குடும்பத்தின் ஹைபிஸ்கஸ் ரோசாசினென்ஸிஸ் பூச்செடி விதைகள் மூலம் இனப்பெருக்கம் செய்வதில்லை. பெரும்பாலும் விதைகள் உருவாக்கப்படுவதில்லை. தண்டுத் துண்டம் மூலம் பதியமுறையில் எளிதாக இனம்பெருக்கலாம். ஒளிவண்ண மலர்கள் கொண்ட செம்பருத்திச்செடியில் கலப்பின வகைகள் பிரபலமாக உள்ளன. உலகம் முழுவதும் இந்த வெப்பமண்டலத் தாவரங்கள் பொழுதுபோக்குக்காகவும் உளவியல் நோக்கத்துக்காகவும் வீடுகளிலும் தோட்டங்களிலும் வளர்க்கப்படுகின்றன.

மலர்விழி: என்ன? பொழுதுபோக்கா? உளவியலா? புரியவில்லை.

வீரன்: நவீன உளவியல் ஆய்வுகளில் மனஇறுக்கம் அல்லது மன அழுத்தம் குறைக்கும் 'ஸ்ட்ரெஸ் பஸ்டர்' (stress buster) உத்திகளாகப் பரிந்துரை செய்யப்படும் விஷயங்கள் வண்ணமீன் வளர்ப்பு, பறவை வளர்ப்பு போன்றவை. செம்பருத்திப் பூ வளர்ப்பதும் ஒரு உளவியல் சிகிச்சை உத்தி. மன அழுத்தம் உள்ளவர்கள் செம்பருத்திப் பூவை ரசித்து மகிழ்ந்தால் அழுத்தம் குறையும் என்கிறார்கள். காலை எழுந்ததும் செம்பருத்திப் பூவைப் பார்ப்பது மனதுக்கு உற்சாகம் தரும் என்பர்.

விக்கி: செம்பருத்திப்பூச் சாறு தேநீர் பற்றிக் கூறலாமே.

வீரன்: செம்பருத்திப் பூக்கள் தலைமுடி அழகுக்காகப் பல வழிகளில் பயன்படுகிறது. சிலகாலம் வரை பசிபிக் தீவுகளில் செம்பருத்திப் பூவை உணவாகவும் பானமாகவும் மக்கள் பயன்படுத்தினர். சீன மருத்துவ முறைகளிலும் இந்தப் பூ பயன்படுகிறது. இந்தியாவின் பல பகுதிகளில் அழகுப்பொருளாகவும், தலையில் சூடிக்கொள்ளவும், கடவுளை வழிபடவும் செம்பருத்திப்பூ அதிகம் பயன்பட்டது. காலணிகளைப் பொலிவூட்டப் பூ இதழ்களைப் பயன்படுத்தலாம். ஜமாய்க்காவில் இந்தப் பூவைக் கருக்கலைப்புக்குப் பயன்படுத்தினர். செம்பருத்திப் பூ அதிக மருத்துவக் குணங்களைக் கொண்டது என்ற ஆயுர்வேத உண்மையை நவீன அறிவியல் ஆய்வுகள் மூலம் அறிந்தபிறகு அதன் பூச்சாறு அதிக கவனம் பெற்றது. இவற்றின் இலை, பூ, வேர் அனைத்தும் மருத்துவத் தன்மையுள்ளவை. வயிற்றுப்புண், வாய்ப்புண்ணைக் குணமாக்கும். பாதிக்கப்பட்டவர்கள் தினசரி 5 அல்லது 10 பூ இதழ்களை அப்படியே மென்று சாப்பிட்டு வந்தால் புண்கள் குணமாகும். பூவின் சாறு அரைத்துப் பிழிந்து எடுத்தும் அருந்தலாம். பூவை நீரில் கொதிக்கவைத்துச் சாறு இறங்கியபின் வெதுவெதுப்பாகத் தேநீர் போலவும் அருந்தலாம். துவர்ப்புச் சுவை கொண்டது; இனிப்பு சேர்க்கத் தேவையில்லை. கருப்பை பாதிப்பினால் கருவுறாதவர்க்கும், வயது ஆகியும் கரு உருவாகாத பெண்களுக்கும் செவ்வரத்தையின் மனதுக்குச் சுகமளிக்கும் அழகுத் தோற்றம் சிறந்த உளவியல் மருந்து.

செம்பருத்திப் பூவின் இதழ்களை அரைத்து மோரில் கலந்து தினமும் சாப்பிட்டு வந்தால் வெகுவிரைவில் கருப்பையில் நோய்கள் குணமாகும். பூப்பெய்தாத பெண்களும் பூப்பெய்துவார்கள் என்பது நம்மூர் பாட்டி வைத்தியம். மாதவிலக்குக் காலங்களில் ஏற்படும் உபாதைகளைக் குறைக்க செம்பருத்திப் பூக்களைச் சுவைப்பதை இன்றும் கிராமப்புறங்களில் காணலாம். செம்பருத்திப் பூவை நிழலில் உலர்த்திப் பொடி செய்து கசாயமாகக் காய்ச்சி அருந்தி வந்தால், மாதவிலக்குக் காலங்களில் ஏற்படும் அடிவயிற்று வலி, தலைவலி, மயக்கம் போன்றவை குறையும் என்று பயன்பெற்றோர் கூறுவர். வெள்ளைப் படுதலைக் குணமாக்கும். செம்பருத்தியின் இதழ்களைக் கசாயம் அல்லது தேநீர் செய்து அருந்தி வந்தால் வெள்ளைப்படுதல் குணமாகும். இச்செடி இரஷ்யா போன்ற குளிர்நாடுகளில் காலநிலை மாற்றங்களைத் தாண்டி வளரக்கூடியது. வீடுகளில் அலங்காரச் செடியாக வளர்க்கப்படுகின்றது. பூக்கள் பல நிறங்களிலும், பல அடுக்கு இதழ்களைக் கொண்டதாகவும் காணப்படுகின்றன. ஒற்றைச் செம்பருத்தி எனும் ஐந்து இதழ் சிவப்புச் செம்பருத்தியே அதிகம் விரும்பப்படுகிறது. எனினும் அடுக்குச் செம்பருத்தியும் நல்ல பயன்களைத் தரக்கூடியதுதான். கலப்பின முறையில் பெறப்படும் வேறு நிறச் செம்பருத்திகளும் அவற்றின் சாறுகளும் தேநீரும் மருத்துவக் குணத்தில் குறைந்தவையல்ல.

மலர்விழி: முக்கனிகள் போல முத்தான முப்பூக்கள். முச்சாறுகள்.

விக்கி: மருத்துவப் பூக்கள். பூக்கள் வளரட்டும். மனிதகுலம் தழைக்க மணமும் சாறும் தரட்டும். அதில் அறிவியல் ஆய்வுகள் தொடரட்டும்.

- புழல் தி.பாலகுமார்