உங்களிடம் பேச நேரமில்லை

சகபையன்கள் உச்சி எடுத்து
தலை வாரியிருக்க
பலமுறை என் சுருள் முடியை நேராக்க
முயன்றிருக்கிறேன்

என் நண்பர் கூட்டம்
சுஜாதாவைப் படிக்க
அவசரமாக அம்புலிமாமாவையும் கோகுலத்தையும்
விசிறி எறிந்திருக்கிறேன்

விடலை பருவத்தில்
சகாக்கள் புகைப்பிடிக்கக் கண்டு
நானும் உள்ளிழுத்து தொண்டை வலிக்க
இருமியிருக்கிறேன்

ஆளுக்கொரு பெண்ணைத்
தேடிப்பிடித்துக் காதலிக்க
கிறுக்குத்தனமாய் கடிதம் கொடுத்து நண்பியை
இழந்திருக்கிறேன்

இன்று இப்போது வந்து விட்டுப் போன
நண்பன் பைக் வாங்கியிருப்பதாகச் சொல்ல
வேகமாக லோன் போடப் போகிறேன்
வங்கிக்கு

வழிவிடுங்கள் எனக்கு
உங்களிடம் பேச நேரமில்லை...! 

- கார்த்திக் பிரபு இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.