சந்தை விதிகள் உழைப்பவர் தம்மைச்
சிந்தையில் செயலில் ஒருபுறம் ஒடுக்க
கூடுதல் கெடுதலாய்ப் புவிவெப்ப உயர்வு
பீடு நடையுடன் அழிவுப் பாதையில்
உயிரினம் தன்னை மெதுவாய்த் துரத்த
பயின்ற அறிஞர் இடித்துரைக்க அஞ்ச
மனித குலமே காணாய் இதனை
இனியும் எழேலெனில் அழிவது தகுதியே
 
((சமூகத்தில் ஏற்றத் தாழ்வுகளையும் வேலையில்லாத் திண்டாட்டத்தையும் ஏற்படுத்தும்) சந்தை விதிகள் உழைக்கும் மக்களின் சிந்தனையையும் செயலையும் ஒரு புறம் வாட்டி எடுக்க, கூடுதல் கெடுதலாய் (இலாபம் தருகிறது என்பதற்காக இப்புவியின் வெப்பத்தை உயர்த்தும் பொருட்களின் உற்பத்தியைக் கட்டாயப்படுத்தி) இப்புவியின் வெப்பத்தை உயர்த்தி, (அதனால் இப்புவில் உள்ள) உயிரினங்களை அழிவுப் பாதையில் வெற்றிகரமாகத் துரத்திக் கொண்டு இருக்க, கற்றறிந்த அறிஞர்கள் (இப்போக்கிற்கு எதிராக, சோஷலிச உற்பத்தி முறையை ஏற்பது தான் இப்பிரச்சினைகளுக்குத் தீர்வு என்று) ஆதிக்கவாதிகளுக்கு இடித்து உரைக்க அஞ்ச, மனித குலமே! (இந்த இழி நிலையைப்) பாராய்! இனியும் (இந்த இழி நிலைக்கு எதிராகப் பொங்கி) எழவில்லை என்றால் (மனித குலம்) அழிந்து போவதற்குத் தகுதியுடையதே ஆகும்.)

- இராமியா