ஆழத் தோண்டிய கடைக்காலில்
உறுதியாய் நிற்கிறது சுவர்
இந்தச் சுவரற்ற சித்திரங்கள் என
எவரும் இல்லை இங்கே
இடிப்பதாய்தான் சொல்வார்கள்
எல்லோரும் இச்சுவரை
இல்லையென்றால் எங்கிருக்கிறது
அப்படியொரு சுவரென கேள்விகள் நீளும்
அதுவொரு மாயச்சுவர் என்றும்
நீங்கள் தான் தேவையில்லாமல் ஏதேதோ
சொல்கிறீர்கள் என்றும் அறிவுறுத்தல் நிகழும்
சுவர்களின்றி வீடுகளேது
வீடுகளின்றி ஊர் ஏது
ஊரெனில் மக்கள் வசிப்பது
சுவரைத் தாண்டி இந்த மக்கள்
வேறெதையும் யோசிக்க மாட்டார்கள்
வேலியைத் தாண்டாத மந்தைகளாய்
இருப்பதில் கர்வத்தின் உச்சத்தில் கூச்சலிடுவர்
ஆனால் பாருங்கள்
ஒற்றைக் காலைத் தூக்கி
நாய்கள் சுவர் மீது ஒண்ணுக்கடிக்கின்றன
சுவர் எனின் என்ன
ஜாதி மயிர்தான்
-யாழன் ஆதி
