kaithadi logo

மாணவர் பருவம் தொட்டு தந்தை பெரியாரை, அன்னை மணியம்மையாரை, தமிழர் தலைவர் ஆசிரியரை நேரில் பார்த்தும் பேசியும் அவர்களின் கட்டளைகளுக்கு ஏற்ப கழகப் பணியாற்றியவரும், கழகத்தின் பல்வேறு பொறுப்புகளை வகித்தவருமான, இன்றைய திராவிடர் கழகத்தின் பொதுச் செயலாளர்களுள் ஒருவருமான வடலூர் துரை. சந்திரசேகரன் அவர்களுடன் சில நிமிடம்...

நேர்காணல் மு.சி.அறிவழகன்

அன்னை மணியம்மையார் பிறந்தநாளை ஏன் எழுச்சியோடு கொண்டாடப்பட வேண்டும்...?

அறிவுலக ஆசான் தந்தை பெரியாரின் மறைவுக்குப்பின் உடல் நலம் குன்றிய சூழலிலும் பெரும் புயலுக்கு நடுவே ஒளிவிளக்கைப் பாதுகாப்பாக அணையாமல் கொண்டு செல்லும் நிலையில் திராவிடர் கழகத்தை வழிநடத்திச் சென்றவர்.

durai chandrasekaranதந்தை பெரியாரின் மறைவுக்குப் பின் திராவிடர் கழகம் இருக்குமா? என்று வெகுளித்தனமாக கேள்வி கேட்டவர்கள் உண்டு. விசமத்தனமாக ஆசைப்பட்டவர்களும் உண்டு. அவர்களுக்கெல்லாம் அதிர்ச்சி வைத்தியம் தருவது போன்று அன்னையார் செயல்பட்டதுதான் வியப்பு.

பல்லாயிரம் பேர் திரண்டிருந்த அந்த துயரச் சூழலில் அன்னையார் சொன்னார்..... 30 ஆண்டு 3 மாதம் 13 நாட்கள் பெரியாருடன் இருந்தேன், அவரால் வாழ்ந்தேன்.... அவருக்காக வாழ்ந்தேன். இனியும் அவரின் கொள்கைக்காக வாழ்வேன். . . அவரின் இயக்கத்துக்காக வாழ்வேன் என்ற உறுதி முழக்கத்தை வெளிப்படுத்திய விந்தை... அனைவர் உள்ளத்திலும் பால்வார்த்தது.

பெரியாரின் இயக்கத்துக்கு - பகுத்தறிவு இயக்கத்துக்கு ஒரு பெண்மணி தலைமை தாங்கியதும், விராங்கனையாய் செயல்பட்டதும் ஒரு உலக சாதனைதான்.

அனைத்துச் சாதியினரும் அர்ச்சகராகக் கோரி அஞ்சலகங்கள் முன்னால் அறப்போர் நடத்தினார்...

அதைத் தொடர்ந்து தமிழகம் வந்த மத்திய அமைச்சர்களுக்கு கருப்புக்கொடி காட்டும் போராட்டம் நிகழ்த்தினார்...

‘மிசா’ எனும் கருப்புச் சட்டத்தை ஏவி ஜனநாயகத்தின் குரல்வளையை நெரித்த இந்திராகாந்தி தமிழகம் வந்தபோது அவருக்கு எதிராகத் தமிழர்களின் உணர்வை வெளிப்படுத்தும் வண்ணம் ‘கருப்புக்கொடி காட்டி” ‘திரும்பிப் போ” என முழங்கிய தீரமிகு அன்னையாராய் சென்னையை குலுங்கச் செய்து நூற்றுக்கணக்கானத் தோழர்கள் காவல்துறையால் கைது செய்யப்பட்டு காராகிருகத்தில் அடைக்கப்பட்டனர்.

Thiru. Ravana Vs. Sri Rama. . . வீராங்கனையாய் அன்னையாரை இந்தியத் துணைக் கண்டமே திரும்பிப் பார்க்கும் வண்ணம் நடத்தப்பெற்ற நிகழ்வு ‘இராவண லீலா”. ஆம், டெல்லியில் ‘ராம் லீலா” நடத்தப்பட்டு இராவணன் உருவம் தீயிட்டு எரிப்பது என்பது தென்னாட்டு மக்களை, குறிப்பாகத் திராவிடர்களை இழிவுபடுத்தும் செயலாகக் கருதுகிறோம், கதையாக கற்பனையாக, கதாபாத்திரங்கள் இருந்தாலும் அதில் தமிழர்கள் இழிவுபடுத்தப்படுவதை அனுமதிக்க முடியாது. இராம் லீலா அங்கே நடந்தால் இங்கே ‘இராவண லீலா” நடத்துவோம், ‘பேடி’ இராமன் உருவத்தை எரிப்போம்” என்றார் அன்னையார். அதுபோலவே ‘இராவண லீலா” நடத்தப்பட்டது சென்னையில் உணர்வுப் பேரலையாய், எழுச்சி எரிமலையாய் தோழர்கள் ஆயினர். திட்டமிட்டவாறு சென்னை பெரியார் திடலில் இராவண லீலா நடந்தது. அன்னை மணியம்மையாரும் மேலும் தோழர்கள் சிலரும் கைது செய்யப்பெற்றனர். வெற்றிகரமாக அன்னை இட்டதீ மூண்டு இராமனை, இலட்சுமணனை, சீதையை சுட்டுப் பொசுக்கியது - நாள் 25.12.1974

இல்லஸ்டிரேட் வீக்லி ஏடு இந்நிகழ்வைப்பற்றி எழுதும்போது Thiru. Ravana Vs. Sri Rama... என தலைப்பு போட்டு கழகத்தின் போராட்டத்தை விளக்கி போராட்டத்தின் நியாயத்தை உலகறியச் செய்தது.

கருணை மழை மேகத்தைக் காலம் காக்கும் என்பார்கள். அப்படித்தான் அன்னையார் 1976இல் மிசா கொடுமைக்கு ஆட்பட்டு எப்போது விடுதலை என்று தெரியாமல் சிறையிலடைக்கப்பட்டு இருந்த தோழர்களின் இல்லங்களுக்கு நேரில் சென்று தக்க உதவிகளை செய்ததுடன், ஆறுதலை, தைரியத்தை குடும்பத்தினர்க்கு வழங்கினார்.

வீட்டுக்கு வீடு பெண்ணைப் பூட்டி வைத்து பழங்கதை பேசும் நாடு நம் நாடு. பெண்ணுக்கு வாய்ப்பும் உரிமையும் மறுக்கப்பட்டிருந்த சூழலில் 1943இல் அன்னையார் பெரியாருக்கு சேவை செய்ய தம் வீட்டை விட்டு வெளியே வந்தது என்பது எப்பேர்பட்ட செயல்?

இளமையை-வாழ்வை ஒரு தலைவருக்காக, ஒரு இயக்கத்துக்காக தத்தம் செய்யும் மனத்துணிவு எத்தனைப் பேருக்கு வரும்? பெண் குலத்தின் பொன்விளக்காய் அம்மா வந்தார். அய்யாவுக்கு அருந்தொண்டாற்றினார்.

இயக்கத்தின் பாதுகாப்பு ஏற்பாடாக பெரியார் செய்த ஏற்பாடு தான் பெரியார்-மணியம்மை திருமணம் என்பது. தனிப்பட்ட ஆசாபாசத்துக்கு இடமே இல்லை. ஆனால் எத்தனை ஏச்சு, பேச்சு, ஏகடியம், கண்டனம், நாட்டில் திட்டமிட்டு உருவாக்கப்பட்டது. அத்தனையையும் தாங்கிக்கொண்டு தான் கே.ஏ.மணி ஈ.வெ.ரா.மணியம்மையானார். அறிஞர் அண்ணா சொன்னதைப் போல் ‘தந்தை பெரியாரின் நீண்ட ஆயுளின் இரகசியம் அன்னை மணியம்மையார்தான் என்பதற்கொப்ப பெரியாரை 95 ஆண்டு காலம் பாதுகாத்து பெருமை பெற்றார்.

அய்யா பெரியாருக்குப்பின் இயக்கத்தைப் பாதுகாத்ததைப் போல, தமது மறைவுக்குப் பின்னாலும் இயக்கம் கட்டுக்கோப்பாக இயங்கிட, அறக்கட்டளை சொத்துக்களை பாதுகாப்பாக நிறுத்திட ஆசிரியர் அய்யா அவர்களை பெரியார் அறக்கட்டளை, பெரியார் மணியம்மை அறப்பாதைக் கழகம் இவற்றின் ஆயுட்கால செயலாளராக நியமனம் செய்து சென்ற செயல் சாதாரண செயல் அல்ல, பெரியாரின் ஏற்பாடு, எண்ணம் எந்த அளவு சரியானது என்று மெய்ப்பித்தார் அம்மா.

கவிஞரின் எழுத்துப்படி மணியம்மையார்-பெண்ணில் மணிதான், இயக்கத் தோழர்கள் அனைவர்க்கும் அவர் கண்ணில் மணிதான்.

புதிய கல்விக்கொள்கை, நீட் இதை எப்படி பார்க்கிறீர்கள்...?

கல்வி 1976 வரை மாநிலங்களின் அதிகாரத்தின் கீழ் இருந்தது. மாநில உயர்வு, மொழி, பண்பாட்டுக் கூறுகளை கல்வியின், மூலம் வழங்கிடும் வாய்ப்பு அதனால் உண்டு, தாய்மொழி வழிக்க்ல்வி பாடத்திட்டம், தேர்வுமுறை என கல்விக்கான வளர்ச்சி நோக்கிய முடிவுகளை மாநில அரசே முடிவெடுத்திட முடியும். 3.1.1977 முதல் கல்வி மாநிலப்பட்டியலிலிருந்து மத்திய அரசின் மேலாதிக்கம் கொண்ட ‘பொது அதிகாரப்பட்டியலுக்கு, வஞ்சகமாகக் கொண்டு செல்லப்பட்டது, அதன் மூலம் பல்வேறு இழப்புகளை, உரிமைகளை கல்வி சந்திக்க வேண்டிய அவலநிலை தமிழ்நாட்டுக்கு ஏற்பட்டது.

வாஜ்பேய் ஆட்சிக்காலத்தில் மனிதவளமேம்பாட்டுத் துறை அமைச்சராக முரளிமனோகர் ஜோஷி எனும் ஆர்.எஸ்.எஸ். பார்ப்பனர் பல்கலைக்கழகப் பாடத்திட்டத்தில் ஜோதிடம், வேதக்கல்வி, வேத பொறியியல், யோகா என்றெல்லாம் புகுத்தியதும், சமாஸ்கிருதமயப்படுத்த முனைந்ததும் எதைக் காட்டுகிறது? தமிழ்நாட்டில் காமராசர் பல்கலைக் கழகத்தில் நுழைக்கப்பட்டதா இல்லை?

2001 மக்கட்தொகை கணக்குப்படி 102.86 கோடி மக்கள்தொகை கொண்ட இந்தியாவில் வெறும் 14,135 பேர் மட்டுமே பேசுவதாக பதிவு செய்துள்ள சமஸ்கிருதத்தை கல்வித்திட்டத்தில் நுழைத்திட முனைவதன் காரணம் என்ன? செத்த மொழி என்று உலகில் அறியப்பட்ட ஒரு மொழிக்கு சிங்காரம் தேவையா? சடங்கு மொழியாக-மந்திர ஸ்லோகங்களாக இருக்கும் ஒரு மொழியை பாடத்திட்டத்தில் நுழைப்பதா? இதற்காகத்தான் தேசிய புதிய கல்விக் கொள்கையா? வேற்றுமையில் ஒற்றுமை காணும் தேசத்தில் ஒரே கல்விக் கொள்கை எப்படி சாத்தியம்? தேசியம் என்ற பேரால் எதுவந்தாலும் நாம் எதிர்த்து முறியடிக்க வேண்டும்.

கிராமங்கள் தோறும் கல்வி என்பதை ஒழிக்க, சமூக நீதியை குழிதோண்டிப் புதைக்க, குழந்தை தொழிலாளர் முறையை ஊக்குவிக்க, மாணவர்களை பல்வேறு முறைகளில் வடிகட்டி, மிண்டும் ஒரு குலக்கல்வித் திட்டத்தை கொண்டு வரவே தேசிய கல்விக் கொள்கை. மதச்சிறுபான்மை, மொழிச் சிறுபான்மையரின் பள்ளிகளை - உரிமைகளை நசுக்கவே இந்த கொள்கை.

பல்வேறு மத, மொழி, தேசிய இனங்கள் என பரந்து வாழும் பன்முகத் தன்மை உடைய நாட்டில், பல்சமுதாய பிரதிநிதித்துவம் இல்லாத வெறும் இந்துத்துவா-ஆர்.எஸ்.எஸ். குழுவால் மட்டுமே உருவாக்கப்பட்டுள்ள தேசிய கல்விக் கொள்கையை எப்படி அனைவருக்கும் பொதுவானது என்று ஏற்றுக் கொள்ள முடியும்? ஒற்றை ஆரிய கலாச்சாரத்தை திணிக்க முயலும் தேசிய கல்விக் கொள்கையை எதிர்த்து முறியடிக்க வேண்டியது நமது கடமை. திராவிடர் கழகம் புதிய தேசிய கல்விக் கொள்கையை அதனால் தான் எதிர்த்து செயலாற்றுகிறது.

அதுபோலவே தேசிய பொது நுழைவுத் தேர்வு என்பதும் மோசடியானது. தாழ்த்தப்பட்ட, மிகவும் பிற்படுத்தப்பட்ட, பிற்படுத்தப்பட்ட மாணவர்களின் மருத்துவக் கனவை சிதைப்பதற்காக, ஏழை-எளிய கிராமப்புற மாணவர்களின் மருத்துவ ஆசையை முளையிலேயே கிள்ளி எறிவதற்காக மோடி அரசால் கொண்டுவரப்பட்டதே ‘நீட்” 1 முதல் 12ஆம் வகுப்பு வரை படித்து பெறும் மதிப்பெண்ணுக்கு எந்தவித மரியாதையும் இல்லையாம் - ‘நீட்”டில் பெறும் மதிப்பெண்ணே எம்.பி.பி.எஸ். சேர்க்கையை தீர்மானிக்கும் என்றால் இது மோசடியான முறைதானே. அரசாலும், நீதிமன்றத்தாலும் நிராகரிக்கப்பட்ட நுழைவுத் தேர்வு முறையை மத்திய அரசு வேண்டும் என்றே நீட் என்ற பேரால் கொண்டு வருகிறது என்றால் - மாநில உரிமையை பறித்திடும் சூழ்ச்சி தானே. தமிழநாட்டில் 90 சதவிகித மாணவர்கள் மாநில பாடத்திட்ட முறையில் படிப்பவர்கள். 10 சதவிகித பேரே மத்திய பாடத்திட்ட முறையில் (சி.பி.எஸ்.இ.) படிப்பவர்கள். சி.பி.எஸ்.இ. பாடத்திட்ட அடிப்படையிலேயே ‘நீட்” தேர்வுத்தாள் தயாரிக்கப்படும் என்றால் சமபோட்டிக்கான வாய்ப்புண்டா? தமிழில் சி.பி.எஸ்.இ. பாட நூல்கள் உண்டா? கிராமப்புற ஏழை எளிய குடும்பங்களைச் சேர்ந்த மாணவர்களை எந்த அளவு பாதிக்கும்? அதனால் தான் அரியலூர்-குழுமூர் அனிதா ‘நீட்”டை எதிர்த்து தமது உயிரையே ஈகம் செய்ய வேண்டிய அவலம். 1200க்கு 1176 மதிப்பெண் வாங்கிய தாழ்த்தப்பட்ட ஏழை குடும்பத்தைச் சேர்ந்த அனிதாவுக்கு எம்.பி.பி.எஸ். சேர்க்கையில் இடம் கிடைக்காமல் செய்ததே ‘நீட்”

இந்தியா முழுவதும் ஒரே முறையான நுழைவுத் தேர்வு என்று ஏன் சொல்கிறது? வடநாட்டு மாணவர்களை, பார்ப்பனர்களை தமிழ்நாட்டு கல்வி நிறுவனங்களில் நுழைப்பதற்கே.

சமூகநீதி மற்றும் அடிப்படை உரிமைகளை பாதுகாப்பதான கல்விக்காக.... நாட்டின் முன்னேற்றத்தின் வளர்ச்சிக்கும், பயன்படும் கல்விக்காக, அனைத்து மக்களுக்குமான கல்விக்காக சமத்துவ சமுதாயத்தை நோக்கிய கல்விக்காக நாம் ‘நீட்” தேர்வை எதிர்க்கிறோம். எவ்வளவு காலம் போராடுவது என்று நீங்கள் கேட்கலாம். நீட் அகற்றப்படும் வரை நமது போராட்டம் ஓயாது என்பதே திராவிடர் கழக நிலை. ‘நீட் நீட்டானது அல்ல, நேர்மையற்றவர்களால், மோசடிப் பேர்வழிகளால் கொண்டு வரப்பட்ட மாநில உரிமையை, நமது மருத்துவக் கனவை பறிப்பதற்காக கொண்டு வரப்பட்ட மோசடி தேர்வு முறையே ஆகும். நீட்டை முறியடித்திட டெல்லியிலேயே களம்காண இருக்கிறது திராவிடர் கழகம்.

கடவுள் - மதம் – மூடநம்பிக்கை இம்மூன்றையும் எப்படி பார்க்கிறீர்கள்...?

மூடநம்பிக்கை என்பது தொற்று நோய் போல, கால வெள்ளத்தில் மக்களை காவு கொள்ளும் கொள்ளை நோய் என்று கூட சொல்லலாம். மூடநம்பிக்கை மனித வளர்ச்சிக்குத் தடை. அறிவு வளர்ச்சிக்கும், ஆராய்ச்சி மனப்பான்மைக்கும், சிந்தனை வளர்ச்சிக்கும் தடை. அச்சமும், ஆசையும், தன்னம்பிக்கை இன்மையுமே மூடநம்பிக்கைக்கு அடிப்படை. நகர்ப்புற             மக்களைக் காட்டிலும் கிராமப்புற மக்களே பெரிதும் மூடத்தனத்துக்கு இலக்காகின்றனர். ஆண்களைக் காட்டிலும் பெண்களே அதிகம் மூடநம்பிக்கையில் மூழ்கிப் போகின்றனர்.

புற்றீசல் போல மூடநம்பிக்கைகளை மூலதனமாகக்கொண்டு போலிச் சாமியார்கள் புறப்படுவதும் பிரேமானந்தாக்கள் முதல் நித்யானந்தாக்கள் வரை, சாயிபாபா முதல் சங்கராச்சாரி வரை, கல்கி, அமிர்தா, பங்காரு என எத்தனை எத்தனை அவதாரங்கள் உலாவருவதும் மக்களை மயக்கி உல்லாசிகளாக வாழும் அவலம் நம் நாட்டில் தான் அதிகம்.

குறிசொல்வோராக - அருள்வாக்கு அருள்பவராக - பரிகார பூசை நடத்துபவராக - யாகயோகங்கள் செய்பவராக - தோஷம் கலைப்பவராக - மோசம் செய்வோரின் எண்ணிக்கை இந்து மதத்துக்குள்ளே ஏராளம்... ஏராளம்...

கொலை, கொள்ளை, பாலியல் பலாத்காரம், மோசடி, போதை, விருந்துகள், சூழ்ச்சிகள், முறைகேடுகள், ஏமாற்றுவித்தைகள் அவர்கள் மூலம் சமுதாயத்தில் மலிந்து கிடக்கின்றன. சாமியார்களின் வண்டவாளங்களை திராவிடர் கழகம் மக்கள் மத்தியில் பரப்பினாலும் அவர்கள் மீதான மோகம் குறைந்துள்ளதா? ஒருவன் போனால் இன்னொருவன் வந்துகொண்டே இருக்கிறான். இப்படிப்பட்ட மூடநம்பிக்கைகளைத் தகர்த்து பகுத்தறிவுப் பாதையில் உங்களை பயணிக்கச் செய்யவே பெரியார் வழியில் நாங்கள் போராடி வருகிறோம்.

மூடநம்பிக்கைகளின் தாய் கடவுள் நம்பிக்கையே. மதம் பற்றுதலே. கடவுள் நம்பிக்கை மனிதனின் மூளைக்கு போடப்பட்ட விலங்கு. தளைகளிலே கொடிய தளை மூளைக்கு இடப்பட்ட தளைதான். அறிவு அற்றம் காக்கும் கருவி என்கிறது வள்ளுவம். அறிவுக்குத் தடை என்கிறது மவுடீகம். அறிவுக்கு விடுதலை தா என்கிறது பகுத்தறிவு இயக்கமான திராவிடர் கழகம். கையிலோ, காலிலோ விலங்கு பூட்டப்பட்டிருந்தால் கண்ணுக்கு உடனே தெரியும் - உடைத்துக்கொண்டு விடுதலை அடைய வேண்டும் என்ற எண்ணம் உருவாகும்.

ஆனால் மூளைக்கு போடப்பட்டுள்ள விலங்கு உடனடியாகத் தெரியாததால்.... விடுதலை பெற வேண்டும் என்ற வேட்கை தாமதமாகிறது. தத்துவப் பேராசான் தந்தை பெரியார் தமிழனின் மூளைக்குப் போடப்பட்டள்ள விலங்கை ஒடிக்க வந்த பகுத்தறிவுப் பகலவன். அவரால் உருவாக்கப்பட்ட சுயமரியாதை இயக்கமும், திராவிட கழகமும் தொடர்ந்து பெரியாரின் எண்ணத்தை ஈடேற்றி மக்களின் உள்ளத்திலிருந்து, பழக்கவழக்கத்தில் இருந்து கடவுள் - மத - வேத - இதிகாசப்புரட்டுகளை வெளியேற்றி புதியதொரு பாதையில் நடை பயிலச்செய்ய உழைத்து வருகிறது.

அந்த வகையிலே தான் காமலாபுரத்தை பெரியார் புரமாக - பகுத்தறிவு புரமாக மாற்றிட மான உணர்ச்சியும், அறிவு வளர்;ச்சியும் உள்ளவர்களாக ஆக்கிடும் அறிவார்ந்த பரப்புரை நிகழ்ச்சிகளை நடத்துகிறோம். கட்சியால், ஜாதியால், மதத்தால் மாறுபட்டு நிற்கும் மக்களை ஒற்றுமைப்படுத்துவதற்காகவும், உரிமையுள்ளவர்களாய் ஆக்குவதற்காகவும் தமிழர் தலைவர் ஆசிரியர் தலைமையிலே பாடுபட்டு வருகிறோம். எங்களுக்கு எந்தவித எதிர்பார்ப்பும் இல்லை. மானுடப்பற்று ஒன்றையே கொண்டு போராடி வருகிறவர்கள் நாங்கள் எந்தவிதமான ஏற்றத்தாழ்வும் இருக்கக்கூடாது - சமத்துவ சமுதாயம் படைக்கப்பட வேண்டும் என்று பாடுபட்டு வருபவர்கள் நாங்கள்.

தாங்கள் பொதுச் செயலாளரக அங்கம் வகிக்கும் திராவிடர் கழகம் பற்றி ..?

படிப்பு மறுக்கப்பட்ட மக்கள் நாம். அதனால் வேலை வாய்ப்புக்கு செல்ல முடியாதவர்களானோம். உரிமையும், வாய்ப்பும் மறுக்கப்பட்டவர்களாகக் கிடந்தோம். அடிமைப்படுத்தி ஆதிக்கம் செய்தது ஆரியம். உழைக்காது வாழ பார்ப்பனர்களால் முடிந்தது: உழைத்தும் வாழக் கதியற்றோராக கிடந்தோம் நாம். உற்று நோக்கினார் பெரியார். உடைத்து நொறுக்கினார் பார்ப்பனர் தம் மேலாதிக்கத்தை. எழுச்சி பெற்றோம் - ஏன்? எல்லாமும் பெற்றவரானோம். காரணம் பெரியாரும், பெரியாரின் இயக்கமான திராவிடர் கழகமுமே. இன்று வரை தமிழ் மக்களுக்கு, ஒடுக்கப்பட்ட மக்களுக்கு கேடாய் எது வந்தாலும் அதை எதிர்த்துப் போராடி வீழ்த்தும் பணியிலே திராவிடர் கழகத் தலைவர் ஆசிரியர் வீரமணி அவர்களே முன் நிற்கிறார்.... முனைப்பு காட்டுகிறார்.

அவரின் தலைமையிலே இயங்கிடும் திராவிடர் கழகத்திலே... தன்மான பகுத்தறிவு இயக்கத்திலே இளைய தலைமுறையே சேரவாரீர். ஊராரே வாரீர். திராவிடர் கழகம் ஒப்புமை இல்லா இயக்கம். மனித சமத்துவத்துக்காக போராடிவரும் இயக்கம். உண்மை - நேர்மை - நியாயம் - எளிமை இவற்றை கவசமாகக் கொண்டு சமரில் ஈடுபட்டுள்ள இயக்கம். இன்னமும் நிறைய பேர் சேருங்கள். பெரியார் கொள்கை எனும் ஒளிவீச்சால் உயர்வு பெறட்டும் உங்கள் ஊர். அனைத்து விதமான ஒடுக்குமறையிலிருந்தும் மக்களை மீட்டெடுத்து விடுதலைக் காற்றை, சமத்துவக் காற்றை எல்லோரும் சுவாசிக்க பெரியாரை நேசியுங்கள். பெரியாரின் நூல்களை வாசியுங்கள், வாழ்வில் வளம் பெருகும்: நலம் சூழும்.

பெரியார் சிலை உடைப்பு இதை எப்படி உணர்கிறீர்கள்...?

தேன்கூட்டிலே விரலை விட்ட கதை போல....

பாம்பு புற்றிலே கைவிட்ட கதை போல...

தீக்குள் விரல்பட்டதை போல்...

தமிழ் மக்களின் மானத் தலைவர் பெரியார். சமநீதி மறுக்கப்பட்ட மக்களுக்கு சமூகநீதி கிடைக்கச் செய்த பெம்மான். உழைத்து உருக்குலைந்த கூட்டத்தின் வாழ்வுரிமைக்கு வழிகாட்டிய தீரர். பெண்ணடிமைப் போக்கி, பெண்ணுரிமை பெற்றிட புயலைப்போல் சீரிய சீலர். கடவுள்-மத-புராணம்-இதிகாச-சாஸ்திர-சம்பிரதாய மடமைச் சரக்குகளை மண்ணுக்குள் இட்டு மூடிட சளைக்காது சமர்புரிந்த போராளி. தமிழர்களின் முகவரி. சுருக்கமாகச் சொன்னால், அவரின் சிலையை உடைப்பேன் என்றான் ஒரு உளுத்தன். பேரலையாய் நாடெல்லாம்... தமிழர் வாழும் ஊரெலாம் எழுச்சிப் பிரவாகம் உடைத்துப்பார் உளுத்தனே உருத்தெரியாமல் ஆக்குவோம் உன்னை... உன் கூட்டத்தை என ஆர்த்தெழுந்தது தான் தாமதம்... அந்த உளுத்தன் சொன்னான்... நானில்லை என் அட்மின் என்று. இதுநாள் வரை எந்த ஒரு பிரச்சனைக்கும் பதில் சொல்லிப் பழக்கமில்லாத பிரதமர் மோடி, பா.ஜ.க. தலைவர் அமித்ஷா ‘சொன்னது தவறு” ‘அப்படி யாராவது செய்தால் நடவடிக்கை எடுப்போம்” ‘தலைவர்களின் சிலை மரியாதைக்குரியவை” என்றனர் 24 மணி நேர அவகாசத்தில். ஈடு இணையற்ற தலைவராய் எல்லோர் மனத்திலும் இடம்பெற்றுள்ளார் பெரியார் என்பது எல்லோராலும் உணர முடிந்தது. தமிழர் தலைவரின் எச்சரிக்கை... தமிழகத் தலைவர்களின் கோபாவேச கண்டன குரல்... தோட்டத்துப்புடலங்காய் அல்ல தமிழர்நாடு என்பதை இந்துத்துவா கும்பலுக்குப் புரியவைத்தன. தந்தை பெரியார் மண் தன்மானச் சிங்கங்களின் அணிவகுப்பு என்பதை தெரியவைத்தன... நாடெங்கும் எழுந்த அதிர்வலைகள்.

அமைதியாய் இருப்போம்: கட்டுப்பாடு காப்போம் என்பது ஒரு கட்டம் வரைதான். பெரியாரின் சிலைமீதே கைவைப்பாய் என்றால்... எதையும் இழப்பதற்கு தயாரானவர்கள் நாங்கள் என்பதை... வன்முறையை வன்முறையால் சந்திக்கத் தயார் என்பதை கருஞ்சிறுத்தை பட்டாளம் வெளிப்படுத்தியது. விளைவு மோசமாகும்... தேன் கூட்டிலே கைவைக்கிறீர்கள் பார்ப்பனர்களே... இந்துத்துவா வாதிகளே... எச்சரித்தார் தலைவர். பணிந்தனர்... பெரியாரை... அவரின் ஆளுமையை மக்கட் செல்வாக்கைப் புரிந்து கொண்டதற்கு... ஒரு வாய்ப்பு.

பெரியார் கொள்கை எனும் கவசத்தை அணிந்து நிற்கிறோம் களத்தில். எங்கள் உள்ளமெல்லாம் பெரியார் நிறைந்திருக்கிறார். அவரால் வீரியம் பெற்ற நாங்கள் எதிரிகளை களமாடிடத் தயார்... தயார்...

திராவிட இயக்கங்களின் தாய் கழகமாக இருக்கும் திராவிடர் கழகத்தின் தலைவர் ஆசிரியர் கி.வீரமணி பற்றி, பொதுச்செயலாளராக அய்யாவோடு தொடர்ந்து பயணிக்கும் அனுபவங்கள் பற்றி...

தந்தை பெரியாரின் அறிய கண்டெடுப்பு ஆசிரியர், பால பருவம் தொடங்கி 85 வயதை எட்டி இருக்கக்கூடிய இந்நாள்வரை கொண்ட கொள்கையில் வழுவாது பயணிப்பவர். பவள விழா கண்ட பொதுவாழ்வில் ஒரே கொள்கை, ஒரே தலைமை, ஒரே இயக்கம், ஒரே கொடி என நிலையாகத் தொண்டாற்றி வருபவர் தமிழர் தலைவர். பெரியார் கொள்கையை உலகளாவிய அளவில் கொண்டுபோய் சேர்த்தவர், பெரியாரின் விழா இன்று உலகத்தின் பல நாடுகளில் முன்னெடுக்கப்படுவதற்கு அவரே காரணம், பெரியார் காண விரும்பிய சாதி அற்ற மூடநம்பிக்கை நீங்கிய பெண்ணடிமை இல்லாத சமத்துவ சமுதாயத்தை உருவாக்குகின்ற பணியில் தொய்வின்றி ஈடுபட்டு வருபவர். பெரியார் காலத்தில் தமிழகம் பெற்ற இட ஒதுக்கிடு 49 விழுக்காடு இவரின் தொடர்ந்த போராட்டத்தால் இடஒதுக்கீட்டின் அளவு 69 விழுக்காடாக உயந்தது.

இந்தியாவிலேயே தமிழகத்தில் மட்டும் தான் 69 விழுக்காடு உள்ளது. மத்திய அரசின் பிற்படுத்தப்பட்டோருக்கு 27% இடஒதுக்கீடு கிடைக்கச் செய்ததில் இவரின் பங்கு மிகையானது, மண்டல் குழு அறிக்கை அமலாக்கதிற்காக திராவிடர்கழகத்தின் பங்களிப்பு அளப்பரியது. இன எதிரிகளால் இவர் தாக்கப்பட்ட போது நாடாளுமன்றத்தில் ‘வீரமணிக்கு ஜிந்தா பாத்’ என்று வடபுலத்து நாடாளுமன்ற உறுப்பினர்களால் பாராட்டப்பட்டவர்.

யாருக்கும் எதற்கும் அஞ்சாது பெரியார் கொள்கையை முன்னெடுப்பவர் உலகத்தின் ஒரே பகுத்தறிவு நாளேடான 83 ஆண்டுகால வரலாறு படைத்த ‘விடுதலை’ ஏட்டின் நீண்ட கால ஆசிரியர், இடஒதுக்கிடு, பகுத்தறிவு, மொழி உரிமை, ஒடுக்கப்பட்ட மக்களின் வாழ்வுரிமை என்பதற்காகவே தொடர்ந்து போராளியைப் போல் போராடி வருபவர். பெரியார் கொள்கையின் பால் ஆயிரம் ஆயிரம் இளைஞர்களை ஈர்த்து வருபவர்.

இன்றைக்கு எரியும் பிரச்சனையாக உள்ள பெரியார் சிலை உடைப்போம் என்ற இந்துத்துவா வெறியர்களின் ஆணவப் போக்கை எதிர்த்து தமிழ்நாட்டுத் தலைவர்களை ஒருங்கிணைத்ததும், இவரின் எச்சரிக்கை உடன் கூடிய கண்டனமும் எதற்குமே பதில் சொல்லாத மோடியையும் அமித்ஷாவையும் அசைத்தது 24 மணி நேரத்திற்குள்ளாக பதில் உரைக்க வைத்ததில் இவரின் ஆளுமைக்கு உதாரணம். பெரியார் மண்ணில் மதவெறிக்கோ சாதி வெறிக்கோ இடமில்லை என்ற நிலை ஏற்பட இவரின் உழைப்பு அடிப்படை.

Pin It

தோழர்களே, தாய்மார்களே,

இன்று பொதுவாகவே உலகம் முழுவதும் ஒரு தொல்லை இருக்கிறது. அந்தத் தொல்லை பல்வேறு உருவங்களில் காட்சியளிக்கின்றது. அந்தத் தொல்லை என்னவென்றால், மனித சமுதாயத்தில் உடையவன் - இல்லாதவன் என்ற தொல்லை. இந்தத் தொல்லை உலகம் முழுவதும் நீக்கமற நிறைந்துள்ளது. மனிதன் இயற்கையாகவே ஆசை குடிகொண்டுள்ள ஜீவன். அதன் பயனாகத்தான் உலகில் உடையவன்-இல்லாதவன் என்கின்ற இரண்டுவித நிலைமைகள் உண்டாகிவிட்டன. இந்த நிலைமைகளை மதமும் கடவுளும் பாதுகாத்து வருகின்றன. அதற்கு ஏற்ப அரசாங்கமும் அமைந்துவிடுகிறது.

ஆனால், நம் நாட்டைப் பொறுத்தவரையில் உடையவன் - இல்லாதவன் என்கின்ற கவலையோடு மற்றொரு கவலையும் சேர்ந்துகொண்டது. அதுதான் சமுதாயத்தில் மேலான சாதி, கீழான சாதி என்று பாகுபடுத்தப்பட்டுள்ள தொல்லை. இந்தத் தொல்லை உலகில் வேறெங்கும் இல்லாத தொல்லை. இதற்கு எந்தவிதமான ஆதாரமும் இல்லை. நம் மக்களிடம் குடிகொண்டுள்ள முட்டாள் தனத்தினாலும் மானமற்ற தன்மையினாலும் இந்தத் தொல்லை நீண்டநாட்களாக நம்மடையே இருந்துவருகிறது. உடையவன்-இல்லாதவன் என்ற தொல்லையை ஒழிக்க உலகில் போராட்டம் நடந்தபடியே உள்ளது. அதைக் காக்க சட்டம், வெடிகுண்டு, ஆகாயக் கப்பல், அணுகுண்டு ஆகிய அனைத்தும் உண்டு.

ஆனால், மேல்சாதி-கீழ்சாதி என்ற குறை அஸ்திவாரம் இல்லாமலேயே வளர்ந்தது. நம் மக்களின் முட்டாள்தனமும், மானமற்ற தன்மையும் சேர்ந்து தான் அதை வளர்த்து நம் சாட்டில் நிலைநிறுத்தி வைத்துள்ளன. அதை நீக்க நாம் முயல வேண்டும். உடையவன்-இல்லாதவன் என்ற தொல்லை நீங்க உலகில் கிளர்ச்சிகள் நடந்தபடியே உள்ளன. தொழிலாளர்கள் கிளர்ச்சி, விவசாயிகள் கிளர்ச்சி ஆகிய கிளர்ச்சிகளெல்லாம் முதலாளித்துவம் நிலைக்க உபயோகப்படுகின்றனவே ஒழிய அடிப்படையை மாற்றியமைக்கவில்லை. நம் நாட்டிலுள்ள மேல்சாதி-கீழ்சாதிக் கொடுமை அஸ்திவாரம் இல்லாததும் மூடநம்பிக்கைகளை அடிப்படையாகக் கொண்டதுமாக இருப்பதால் கிளர்ச்சிகள் செய்ய முடியாதபடி தந்திரமாக அமைந்துள்ளது. இங்கு சாதித்தொல்லைகளை ஒழிக்கப் பாடுபட வேண்டியது தான் முதல் தேவை என்பது என் கருத்து.

முதலாளி-தொழிலாளி என்கிற பிரச்சினை எங்கிருந்து வந்தது? மூடநம்பிக்கையிலிருந்து வந்ததல்ல. அந்தப் பிரச்சினை ஆதாரத்தோடு தான் உள்ளது. எப்படி இருக்கிறான் முதலாளி? சட்டத்தின்படி இருக்கிறான். அரசாங்கத்தின் பாதுகாப்பின்படி இருக்கிறான். அரசாங்கத்தின் சலுகையால் தான் அவன் முதலாளியாக வாழ முடிகிறது. ஆகையால், முதலாளி கூடாது என்றால் அவனைப் பாதுகாக்கும் அரசாங்கத்தின் மீது திரும்ப வேண்டும். முதலாளி மீது பாய்வதால் பலன் ஏதுமில்லை. முதலாளி மீது போராட்டம் துவக்கி, தொழிற் சங்கங்கள் இந்த அய்ம்பது வருட காலமாகச் சாதித்தது என்ன?

- (பொன்மலையில், 27-9-1953இல் சொற்பொழிவு

- ‘விடுதலை’ 3-10-1953)

Pin It

நீண்டகால கனவு எப்படியாவது ஒரு இதழ் ஆரம்பிக்க வேண்டும் என்றெல்லாம் வாய் கூசாமல் பொய் சொல்லிவிட்டுக் கடந்து செல்ல நீண்ட நேரம் ஆகாது. குழந்தைப் பருவம் முதல் பகுத்தறிவுக் கூட்டங்களில் கலந்துகொண்டதும், பகுத்தறிவு சார்ந்த தோழர்களைத் தொடர்ந்து சந்தித்ததும் தான் திடீர் என்று இப்படி ஒரு இதழ் துவங்குவதற்கான காரணம். சமூக வலைத்தளமான முகநூலும் இதற்கு ஒருவகைக் காரணம் என்று சொல்லலாம். இதை விட பெருமையாகச் சொல்லவேண்டுமானால் பெரியார் தொண்டனுக்கே உரிய முரட்டுத்தனமான தன்னம்பிக்கையே இதற்கும், தொடர் முயற்சிகளுக்கும் காரணம் என்று சொல்வதே சரியாக இருக்கும். காரணம் என்னவென்றால் கடவுள் நம்பிக்கை கொண்ட ஒருவனாக இருந்து இருந்தால் நிச்சயம் நானும் எடுத்த செயலுக்கு எல்லாம் கல் சிலை முன்போ சிலை வடிவம் கொண்ட புகைப்படம் முன்போ நின்று ‘‘கடவுளே என்னைக் காப்பாற்று’’ என்று முணகிக்கொண்டு தான் இருந்து இருப்பேன் அதில் அய்யம் ஏதும் இல்லை.

என்னுடைய முரட்டுத்தனமான தன்னம்பிக்கைக்குக் காரணம் என்னுடைய பெற்றோரும் நண்பர்களும் தான். எல்லோரும் சொல்வது போல என்னுடைய பெற்றோரும் நண்பர்களும் தான் தொடர்ந்து என்னை ஊக்கப்படுத்தி தொடர்ந்து செயல்பட வைத்தார்கள் என்று வாய் அளவில் சொன்னால் சிறப்பாக இருக்காது. உண்மையில் யாரெல்லாம் இந்த இதழுக்கு வாழ்த்துகள் சொல்கிறீர்களோ அவர்களெல்லாம் உண்மையில் வாழ்த்து சொல்ல வேண்டியது என்னுடைய பெற்றோருக்குத்தான். ‘நீ செய்தால் சரியாக தான் இருக்கும் முட்டி மோதி எழுந்து வா’ என்று சுயமாய் சிந்திக்க முடிவு எடுக்க வழியை உருவாக்கி கொடுத்தார்களே அவர்களுக்கு தான் அந்த நன்றிகள் வாழ்த்துகள் சென்று சேர வேண்டும், அதுதான் நியாயமும் கூட!

மார்ச் மாதம் இதே நாள் அதாவது இன்று கட்டுரையை எழுதிக் கொண்டு இருக்கும் அதே நாள் மார்ச் 22- 2017, இப்படியாக ஒரு இதழ் ஆரம்பிக்க வேண்டும் என்று தோன்றியது. சற்றும் சிந்திக்கவில்லை நாளை என்ன நடக்கும் என்று. ஆனால் தொடர்ந்து எந்தமாதிரியான முன்னெடுப்புகள் எடுக்க வேண்டும் என்ற சிந்தனை மட்டும் மனதில் இருந்தது, ஓராண்டு மின்னிதழாக நடத்துவோம் என்ற முடிவுக்கு வந்தேன், அதை ஒரு அச்சகத்தில் பகிர்ந்தேன் குறைந்த விலையில் கருப்பு வெள்ளையில் நான் செய்து கொடுக்கிறேன் என்று ஒரு மாற்றுத் திறன் நண்பர் சொல்லியதோடு பல அனுபவங்களைப் பகிர்ந்தார் வீட்டில் ஒரு பொய்யைச் சொல்லி எப்படியோ 2000 ரூபாயைத் தயார் செய்தேன், இதழ் தயார் ஆனது எப்படி அறிமுகம் செய்வது என்று புரியவில்லை செலவு செய்ய கையில் பணமும் இல்லை, கல்லூரி நண்பர்களை அழைத்தேன் அவர்களும் மனம் மறுக்காமல் வருகை தந்தார்கள், நண்பர்கள் அனைவரும் இணைந்தோம் கருத்தைப் பகிர்ந்தோம்.

புத்தகத்தின் வாயிலாக அன்று தான் துவங்கப்பட்டது கைத்தடி மாத இதழ், அந்த நாளே ஏப்ரல் 02, பிறந்து என்ன தான் செய்தாய் என்று யாரும் கேட்கா வண்ணம் அமைந்தது அந்த நாள். அன்று என்னுடைய பிறந்தநாளாம் (22வது பிறந்தநாள்). பிறந்தது புது இதழ், பிறக்கட்டும் புதிய சமூகம் என்று துவங்கியது கைத்தடி பணி. அன்று துவங்கி இன்று வரை அதே வேகத்தோடு பயணிக்கிறது... அந்த பயணம் பல படிப்புகளை கற்றுக்கொடுத்தது “படிப்பறிவை விட பட்டறிவே’’ சிறந்தது என்னும் வரிகளை போல அந்த அனுபவங்களை, அதற்கான நன்றியை இந்த இதழில் பதிவு செய்யவே இவ்வளவு பெரிய பதிவு...

வணக்கம் தம்பி நான் உங்கள் முகநூல் நண்பன் நீண்ட காலமாக உங்களை முகநூலில் பார்த்து வருகிறேன். மகிழ்ச்சி தங்களின் முயற்சியைப் பார்த்து மகிழ்ந்து வருகிறேன். தொடர்ந்து பயணிப்போம் என்று சொல்லிவிட்டு வைத்துவிட்டார். நீண்ட நாட்களுக்குப் பிறகு மீண்டும் அழைத்தார். ‘‘வணக்கம் தம்பி, நலமா? எப்படிச் செல்கிறது தங்கள் பணி’’ என்றார். நானும் எப்போதும் போல என்னுடைய உடல் மொழியில் பதில் கொடுத்தேன், சட்டென்று நீங்கள் ஏன் கருப்பு வெள்ளையில் இதழ் நடத்த வேண்டும் வண்ணத்தில் நடத்தினால் என்ன முயற்சி செய்வோம் என்றார்.

எனக்கும் அதுவே சரி என்று பட்டது அப்படியே ஆகட்டும் என்று நானும் அதற்கான முன்னெடுப்புகளை எடுத்தேன் வடிவமைப்பாளர் முதல் அச்சகத்தார் வரை புதியதாகத் தேட வேண்டி இருந்தது, பேருந்து பிடித்து நாடு விட்டு நாடு சென்று தேடவில்லை கைபேசியை எடுத்தேன் பெயர்களைத் தேடினேன் இரண்டு நண்பர்கள் எண் கிடைத்தது சற்றும் சிந்திக்கவில்லை எப்போதும் போல உண்மையை உணர்வோடு எனக்கான உடல் மொழியில் உரைத்தேன் நான் செய்யும் தொகையில் நட்டம் இல்லாமல் செய்கிறேன் என்று இருவரும் ஒருசேர உரைத்தார்கள் அவர்களின் வார்த்தைகள் மனதில் ஆழமாகப் பதிந்தது நம்மால் முடியும் என்று தமிழர் தலைவர் சொல்லிய “நம்மால் முடியாது யாராலும் முடியாது. யாராலும் முடியாதது நம்மால் மட்டுமே முடியும்’’ வரிகளைப் போல். நம்பிக்கையோடு கூடவே மனதில் உறுதி இருந்தது.

“மானமும் அறிவும் மனிதனுக்கு அழகு” எதற்காகவும் தன்மானத்தை அடகுவைக்கக் கூடாது என்று... இப்படியாக முடிவு செய்து இதழை வண்ணத்தில் துவங்கினோம். ‘‘ஆயிரம் இதழ்கள் இருக்கும் போது இப்படி ஒரு இதழ் எதற்கு’’ என்றெல்லாம் பல பல கேள்விகள் எழுந்தன. ‘‘ஆயிரம் இதழ்கள் இருக்கும்போது இப்படி ஒரு இதழ் ஏன் இருக்கக் கூடாது’’ என்ற கேள்வியை மனதில் நிறுத்தி தொடர்ந்து பயணமாகி வருகிறோம். தொடர்ந்தும் பயணிப்போம் எங்களுக்காக அல்ல எம் மக்களை என் சகோதர சகோதரிகளை வேசி மகன் என்று சொல்லும் மதத்தின் கருவை அறுத்து எறிய, தாழ்ந்து கிடக்கும் எம் சமூகத்தை உயர்த்த சமூக மாற்றத்தின் ஊன்றுகோல் கைத்தடியோடு பயணிப்போம்! தந்தை பெரியார் கொள்கையின் அடிப்படையில் பணி முடிப்போம்!

ஏப்ரல்: கருப்பு வெள்ளை தாளில் குறைந்த பக்கங்களோடு குறைந்த எண்ணிக்கையில் வேக வேகமாக இதழ் தயாரித்தோம் அனுபவம் துளியும் இல்லாத நிலையில், ரூ.12,500/- செலவு செய்து முதல் மாதத்தைக் கடந்தோம்...

மே: முதல் முறை வண்ணத்தில் இதழ் தயாரிக்க வேண்டும். மனதில் அச்சம் இல்லை மாறாக துணிவு இருந்தது. அறிவியல் வளர்ந்த இந்த சூழ்நிலை நம்மைச் சிறப்பாகச் செயல்பட வைக்கும் என்று அதே நேரம் அறிவியலை முறையாகப் பயன்படுத்தவில்லை என்றால் நம்மை வருந்த செய்துவிடும் என்று. முதல் முறை நேர்க்காணல் செய்யத் திட்டமிட்டோம் யாரை செய்வது எப்படி அதை பதிவு செய்வது என்ற பயம் ஒருபக்கம் நம்பிக்கையோடு அனுமதி கோரினோம் வழக்குரைஞர் அருள்மொழி அம்மா அவர்களிடம். அவர்களும் அனுமதி கொடுத்தார்கள். நேர்க்காணலை சிறப்பாக முடித்தோம். இதழை அச்சிட்டு கொடுத்தோம் வாசகர்களுக்கு. ரூ.19,850/- செலவில் புதியதாக சில நண்பர்கள் இதழை வாங்கத் துவங்கினார்கள்....

சூன்: வழக்குரைஞர் அருள்மொழி அம்மா அவர்களின் நேர்காணல் மக்களால் விரும்பிப் படிக்கப்பட்டது. தொடர்ந்தது நேர்காணல். புதியதாக பல தோழர்களின் கட்டுரைகளும் இடம்பெற்றது. பொறியாளர் பார்த்திபன்.ப அவர்களின் மார்க்சின் மூலதனம் ஒரு பொறியாளனின் இன்றைய பார்வையில் புதிய தொடராக இடம்பெற்றது. ரூ.19,850/- செலவில் இதழ் மக்கள் வாசிப்பிற்கு அனுப்பிவைக்கப்பட்டது.

சூலை: கவிக்கோ அப்துல் ரகுமான் அவர்கள் எதிர்பாராத விதமாக இறந்த அந்த நேரத்தில் பழனி மதிவதனி அவர்கள் காலத்தை வென்ற கவிக்கோ என்ற தலைப்பில் கட்டுரையை இரங்கல் கட்டுரையாக புகழ் கட்டுரையாகப் பதிவு செய்ததும், வடிவமைப்பாளர் அட்டைப் படத்தை உயிர்ஓட்டமாக கொடுத்ததும் மக்களைக் கவர்ந்தது. ‘தமிழர் விளையாட்டுகள்’ என்ற புதிய தொடரும் இடம்பெறத் துவங்கியது, ரூ.19,850/- பண மதிப்பில் இதழ் அடுத்த கட்ட நகர்வுக்கு சென்றது...

ஆகஸ்ட்: மக்களைப் பெரிதும் பாதித்த இரண்டு என்று சொன்னால் அது நீட் மற்றும் GST என்று சொல்லலாம். அவை பற்றிய முழுமையான ஆய்வுக் கட்டுரைகளால் மக்களுக்கு தெளிவு பிறக்க வாய்ப்பாக அமைந்தது, அதே நேரத்தில் மாட்டுக்கறி அசிங்கம் அல்ல என்ற ஷாலின் அவர்களின் கட்டுரை மாட்டுக்கறி பற்றிய புரிதலை மக்களுக்கு கொடுத்தது. கூடுதல் எண்ணிக்கைகளில் புத்தகங்கள் அச்சிடப்பட்டு ரூ.24,100/- ரூபாய் மதிப்பில் புத்தகங்கள் வெளியிடப்பட்டது...

செப்டம்பர்: தந்தை பெரியார் அய்யா அவர்களின் பிறந்தநாளைக் கொண்டாடும் வகையில் சிறப்பிதழாக கூடுதல் பக்கங்களோடு, கூடுதல் எண்ணிக்கையில் பல வண்ணப் பக்கங்கள் இணைப்போடு தந்தை பெரியார் அய்யா பற்றிய சிறப்புக் கட்டுரைகள் ஓவியா அவர்களால் எழுதப்பட்டு மக்கள் வாசிப்பிற்கு ரூ.38,500/- செலவில் கொடுக்கப்பட்டது...

அக்டோபர் : நடப்புகள் நமக்கு சொல்வதென்ன? என்ற கேள்விகளோடு வே. மதிமாறன் அவர்களின் நேர்காணல் துவங்கியது. அரிய பல வரலாற்றுத் தகவல்கள் அடங்கிய அந்த நேர்காணல் பரவலாக பேசப்பட்டது. தொடர்ந்து மருத்துவம் சார்ந்த கட்டுரைகள் மருத்துவர் யாழினி அவர்களால் எழுதப்பட்டு வெளியிடப்பட்டது. ரூ.24,100/- மதிப்பில் புத்தகங்கள் வெளிவந்தது...

நவம்பர் : நதிகளை மீட்ப்போம் யாரிடமிருந்து, பத்திரிகையாளர் ப.திருமாவேலன் நேர்காணல், எச்சில் தொட்டி போன்ற பகுதிகள் இதழின் செரிவை கூடுதல் சிறப்புக்கு கொண்டு சென்றது. இப்படியாக எட்டு இதழைக் கடந்தது கைத்தடி. ரூ.24,100/- செலுத்தாத நிலை எல்லாம் ஏற்பட்டது...

டிசம்பர்: வணக்கத்திற்குரிய தமிழர் தலைவர் ஆசிரியர் கி.வீரமணி அவர்களின் பிறந்தநாளைக் கொண்டாடும் விதமாக ‘வெறுப்புக்கு அஞ்சாத பெருநெருப்பு’ என்ற அட்டைப் படத்தோடு ஆசிரியரின் ஓவியம் இடம்பெற்றது, அத்தோடுகூட ‘மாட்டிறைச்சியும் மனிதக்கொலையும்’ என்ற தொடர் கட்டுரை பல விளக்கங்களை கற்பித்தது. வாசகர்கள் அதிகரிக்க கூடுதல் இதழ்களை அச்சிட நேரிட்டது. கூடுதல் பணத்தையும் தயார் செய்ய நேரிட்டது. ரூ.24,100/- தயார் செய்து இதழை மக்களுக்கு கொடுப்பதில் பல்வேறு சிரமத்திற்கு உள்ளானோம் என்பது பெரிய செய்தி அல்ல, எப்போது கஷ்டம் இல்லாமல் கடந்தோம் என்று நினைக்கும் போது...

சனவரி: ‘கேள்விகள் ஒருமுகம் பதில்கள் பல முகம்’ என்று பலதுறைகளில் உள்ள ஆளுமைகளைச் சந்தித்து அவர்களிடம் ஒரே வகையான சமூகம் சார்ந்த கேள்விகளை வைத்து அவர்களின் பார்வையை மக்களுக்கு கொண்டு சேர்த்தோம். தமிழர் திருநாள் சிறப்பிதழாக பல வண்ணப் பக்க இணைப்புகளோடு ரூ.44,500/- மதிப்பில் ....

பிப்ரவரி: மனித மனத்தின் குறுகிய வெறித்தனம் ஆணவக்கொலை என்ற நேர்காணல் உடன் ‘காதல் என்பது அதுவல்ல’ என்ற கட்டுரையோடு காதலர் தின சிறப்பிதழ் வெளியீடு செய்யப்பட்டது, சுமார் ரூ.31,000/- மதிப்பில்.

மார்ச்: உலக வரலாற்றில் ஒரு நாத்திக அமைப்பிற்கு தலைவராகப் பொறுப்பு ஏற்ற முதல் பெண் அன்னை மணியம்மையார் என்ற அன்னை மணியம்மையார் பிறந்தநாள் சிறப்பிதழ், முதலாம் ஆண்டின் நிறைவு இதழாக மக்களைக் கவர்ந்தது. அதோடு எழுத்தாளர் சல்மா அவர்களின் நேர்காணல் இளைஞர்களுக்கு ஊக்கமாக அமைந்தது, ரூ.31,000/- என்ற மதிப்பில் இதழ் வெளிவந்தது...

இப்படியாக கடும் பொருளாதார நெருக்கடிகள் மற்றும் பிற இடையூறுகளுக்கு இடையிலும் ஓராண்டைக் கடந்து இனிவரும் ஆண்டுகளிலும் தோழர்களின் மேலான ஆதரவோடு வெற்றிநடைபோடும் என்பதில் சிறிதும் ஐயமில்லை. ஓராண்டு இதழில் பயணித்த அனைத்து எழுத்தாளர்களுக்கும், விளம்பரதாரர்களாகிய அனைவருக்கும் நன்றிகள் பல... சிலரின் பெயரை மட்டும் பதிவு செய்து இருக்கிறோம் என்று யாரும் தவறாக கருத வேண்டாம், அனைவரின் பெயரையும் பதிவிடவே விரும்புகிறேன்

ஆனால் இடம் போதவில்லை, உங்களின் தொடர் ஆதரவு என்பது எனக்கும் இதழுக்கும் அவசியமே! சென்னையில் இதழை எங்கு இருந்து அனுப்புவது என்று சிந்தித்த போது என் இல்லத்தை பயன்படுத்திக்கோ என்று ஆதரவு கொடுத்த அன்பு தோழர் கா.தமிழரசன் அவர்களுக்கும் தற்போது என்னை அவர்கள் குடும்பத்தில் ஒருவராக இணைத்து தொடர்ந்து என்னோடும் இதழோடும் பயணித்து வரும் அருமைத் தோழர் பொறியாளர் வீரவேல் அவர்களுக்கும் என்னுடைய மனமார்ந்த நன்றிகள் பல...

நான் நன்றிகள் பலருக்குச் சொல்ல வேண்டி உள்ளது அவர்களின் பெயர்கள் விடுபட்டு இருக்கிறது அதை நன்கு அறிவேன் கோபம் கொள்ள மாட்டீர்கள் என்ற நம்பிக்கையோடு அடுத்த ஆண்டின் இதழில் பயணிக்க விரும்புகிறேன். கைத்தடி களப்பணி குழு தோழர்களுக்கும், கைத்தடி வாசகர்களுக்கும் ஆதர்வாளர்களுக்கும் என்னுடைய நன்றிகள்!

சமூக மாற்றம் ஒன்றே நம் குறிக்கோள் வாருங்கள் பயணிப்போம்...! நன்றி...!

கைத்தடியோடு... மு.சி.அறிவழகன்

Pin It

‘உலகப் பெண்கள் தினம்’ ஆண்டு தோறும் வருகிறது. ஒவ்வொரு ஆண்டும் ஊடகங்கள், சில "பெண் சாதனையாளர்களை" பற்றி எழுதுவது, காட்டுவது என கடந்து செல்வார்கள். இந்த முறையும் அப்படி ஆங்கிலக் காட்சி ஊடகம் ஒன்றில் பதிவு செய்யும்போது, அந்த சாதனையாளர்கள் ‘பெண்’ என்பதால் எப்படி ‘கடினங்களை எதிர்கொண்டு தாண்டி’ வந்தார்கள் என்பதையும் குறிப்பிட்டது.

நாம் எல்லோருமே ‘கண்ணை’ பெரிதும் பாதுகாக்க வேண்டும் என எண்ணுபவர்கள்தான். ஆனாலும், "கேட்ராக்ட்" என்ற திரை வளர்ந்து விடுகிறது என வருத்தப்படுகிறோம். அந்த கேட்ராக்ட்டை ‘எடுத்து விடுவதற்காக’ ‘லேசர் அறுவைச் சிகிச்சை’ என்ற நவீன முறையைக் கையாள்கிறோம். அந்த லேசர் முறையை ‘கண்டுபிடித்தவர்’ ஒரு பெண். 1981இல், ‘பேட்ரிகா எக்சா பாத்’ என்ற பெண்மணி தான் அந்த ‘லேசர் முறையை’ ஆய்வு மூலம் அறிமுகப்படுத்தியவர். 2000மாவது ஆண்டில் அதே ‘பேட்ரிக்கா’ இன்னொரு உரிமத்திற்காக பரிசு பெற்றார். அது, ‘அல்ட்ரா சவுண்ட்’ மூலம், ‘கேட்ராக்ட்’ திரையை விலக்கும் கண்டுபிடிப்பை அறிவித்தார்.

கறுப்பர் இனத்தைச் சேர்ந்த ஒரு பெண்மணியான, ‘பேட்ரிக்கா’ ‘வெள்ளை இனத்தவர் ஆதிக்கம் செலுத்தும்’ ஒரு ‘ஆணாதிக்க சமூகத்தில்’ சாதாரண மக்களுக்கும் பயன்பாடாகக் கூடிய ஒரு ‘கேட்ராக்ட்’ விலக்கும் முறையைப் பயன்படும்படி கண்டுபிடித்ததும், பயன்பட்டதும் பாராட்டத்தக்கது.

இன்றைய உலகம் இளைஞர்களின் கைகளுக்கு மாறி வருகிறது. இளைஞர்களோ, இணையத்தின் கைகளில் தவழ்ந்து வருகிறார்கள். இணையத்தை முழுமையாகச் சார்ந்தே வாழும் நமக்கு, அதன் முக்கிய கண்டுபிடிப்புகளை வெளிக் கொண்டு வந்தவர்களில், ‘கிரேஸ் ஹாப்பர்’ என்ற பெண்மணியைத் தெரிந்திருக்க வேண்டும். அவர் கணினிகளைப் புரட்சிகரப்படுத்தியவர். (ஐ.பி.எம்.மின் மார்க் 1) அது பல கணித பிரச்சனைகளைத் தீர்க்க உதவியது. ஆங்கிலத்தை, கருவியின் கோடுக்கு மாற்ற உதவியது. அவரது சம கால ஆண்களால், ஒரு பெண்ணாக இருக்கும் காரணத்தால், கிரேஸ் ஹாப்பர் தொடர்ந்து உற்சாகப்படுத்தப்படாமல், உளவியல் அளவில் அணுகப்பட்டார். சவாலுக்கு உள்ளாக்கப்பட்டார். தனது தொடர் முயற்சிகளினால், ‘சாதனையை’ எட்டிய பிறகு, அவர் பாராட்டப்பட்டார். நவீன கணினிப் பயன்பாட்டை இன்று இருக்கும் நிலைக்கு உயர்த்தியவர்களில் பேசப்படுகிறார்.

டி.என்.ஏ. என்ற மானுடத்தின் அடிப்படை பற்றிய பல்வேறு ஆராய்ச்சிகளில், பல அறிவியலாளர்கள் பாராட்டப்படுகின்றனர். பிரான்சிஸ் கிரீக், ஜேம்ஸ் வாட்சன், மவுரிஸ் வில்கின்ஸ், ஆகியோர் டி.என்.ஏ.யின் இரட்டை ஹெலிக்ஸ் கட்டமைப்புக்காக பாராட்டப்படுகின்றனர். ஆனால் அவர்களது கண்டுபிடிப்புகளுக்கு, அடிப்படையான, ‘முக்கிய பிம்ப புள்ளிவிவரத்தை’ (குறிப்பாக இமேஜ் 51) ‘ரோஸலிண்ட் பிராங்கிளின்’ என்ற பெண்மணியால் கண்டுபிடிக்கப்பட்டது ரோஸலின்ட் உடைய கண்டுபிடிப்பு இல்லாமல், மேற்கூறிய மூன்று ஆண் அறிவியலாளர்களும், தங்களது ‘நோபல் பரிசை’ பெற்றிருக்க முடியாது. ரோஸலிண்ட் பிராங்கிளின் தனது மறைவுக்கு பிறகே ‘அங்கீகரிக்கப்பட்டார்’. வில்கின்ஸ், க்ரீக்கிடமும், வாட்சனிடமும், பிராங்கிளினிடம் ‘அனுமதி பெறாமலேயே’ ‘இமேஜ் 51ஐ காட்டிவிட்டார் என்கின்றனர். இல்லாவிட்டால், பிராங்கிலே கூட, டி.என்.ஏ. கட்டமைப்பை வெளிக் கொண்டு வந்திருக்கலாம். எது எப்படியோ, அறிவியலின் புதிய கண்டுபிடிப்பின் அவர்களே பிராங்கிளினின் கண்டுபிடிப்பை ஒப்புக்கொள்கிறார்கள். பெண் என்ற காரணத்தால், ஆணாதிக்க அறிவியல் உலகம் கூட இப்படித்தான் என்பதற்கு இதுவே உதாரணம்.

அறிவியல் உலகில், ‘மேரி க்யூரி’ நோபல் பரிசை பெற்றார். ரேடியோ ஆக்ட்டிவிட்டி என்ற கதிர் வீச்சு பற்றி கண்டுபிடித்தார். முதலாம் உலகப் போர் காலத்தில், போர்க் களத்தில் பயன்படுத்த, ‘நகரும் எக்ஸ்ரே’ கருவியைக் கண்டுபிடித்தார். அவர் கண்டுபிடித்த ‘பொலோனியம்’ அவரது சொந்த நாடான, போலந்து பெயரில் அழைக்கப்பட்டது. பெண் என்ற காரணத்தால், மேரி க்யூரி ‘க்ரகோவ் பல்கலைக்கழகத்தில்’ சேர மறுக்கப்பட்டார். அவர்தான் இன்றைய வரலாற்றில் புகழ் பெற்று நிற்கிறார்.

பெண்களின் வாழ்க்கையில், ‘மார்புக் கச்சையை’ (பிரா) அணிய ‘சௌகரியமான ஒன்றை’ உருவாக்கித் தந்தவர், ‘க்ரேஸ் கிராஸிலி’ என்ற பெண்மணி. எளிமையான, நெளிவு சுளிவான ஒரு ‘பிராவை’ அவர் கைக்குட்டைகளைப் பயன்படுத்தி, கண்டுபிடித்து, உருவாக்கித் தந்தவர்.

1914ஆம் ஆண்டு நவம்பர் மாதம் அதற்கான, காப்புரிமையைப் பெற்றார்.

இவ்வாறு பெண் சாதனையாளர்கள் பலர் இருந்தாலும், எப்படி ‘ஆணாதிக்க அறிவியல் உலகம்’ பெண் சாதனையாளர்களை ‘மேலே வர விடாமல்’ உற்சாகம் இழக்கச் செய்ய வழி செய்தது என அது பற்றிய உண்மைகளைக் கூட நாம் தெரிந்து கொள்ள வேண்டிய ஒன்றே.

- தொடரும்

Pin It

2001-ஆம் ஆண்டு மக்கள் தொகை கணக்கெடுப்பின்படி 14,135 பேர் மட்டுமே தங்களின் தாய்மொழியென கூறிய சமற்கிருதமொழி நாட்டின் எல்லா மக்களிடமும் சென்று சேரவேண்டும் என்ற கொள்கை நோக்கம் ஒவ்வொரு காலகட்டத்திலும் பார்ப்பனியத்தினால் தீவிரமாக செயல்படுத்தப்பட்டு வரும் கொள்கை திட்டம்தான் இது மொழியைக் கொண்டு சேர்ப்பதற்கான திட்டவரையறை மட்டுமே இல்லை. ஏனெனில் சமற்கிருத மொழி சாதாரண வழக்குமொழியாகவெல்லாம் பேசுவதற்கு உகந்த மொழியல்ல.

சமற்கிருத மொழியில் உச்சரிப்பு ஒலிகள் போன்ற அனைத்தும் சுலோகங்கள், வேத மந்திரங்கள் போன்றவைகளாகவே உள்ளன. வேதங்களும் வேத சுலோகங்களும் மனுநூல் போன்றவைகளும் மக்களை சென்று சேர்வது வெறுமனவே மொழியாக மட்டுமல்ல, வேதங்களிலும் மனுநூல்களிலும் சொல்லப்படுகின்ற பாகுபாடுகளை மக்களிடம் தீவிரமாக கொண்டு சேர்க்கின்ற முயற்சியே இப்போதைக்கு தேவபாஷை என்று அவாள் சொல்கின்ற சமற்கிருத திணிப்பின் பிரதான நோக்கம்.

17ஆம் நூற்றாண்டில் நாயக்க மன்னர்களின் ஆட்சியில் பீடத்தில் வைத்து சமற்கிருதம் போற்றப்பட்டதொரு நிகழ்வை மீண்டும் நிறுவ கடுமையாக முயன்று வருகிறார்கள். கிரேக்கத்தின் கிரீக்மொழியும் - ஜெர்மனியின் டொச்சு மொழியும், கோதிக்மொழியும் சமற்கிருத மொழியோடு எழுத்து, உச்சரிப்பு, ஒலிகளில் ஒத்திருக்கிறது. என்றும், அத்தகைய மொழி பல மொழிகளின் கூட்டுக்கலவையாகவே இருப்பதற்கான பல்வேறு சான்றுகளை மொழியியல் அறிஞர்கள் ஆய்வுகள் மூலமாக நிறுவியுள்ளனர். அப்படிப்பட்ட மொழியை நாடு முழுக்க கட்டாயமாகத் திணிக்க வேண்டுமென 1939இல் ஆர்.எஸ்.எஸ்-ன் பிதா மகனான கோல்வாக்கர் தாம் எழுதிய “நமது தேசத்தின் வரைவு” என்ற நூலில் குறிப்பிடுகிறார்.

இதே காலகட்டத்தில் 1938இல் சென்னை லயோலா கல்லூரியில் பேசிய அப்போதைய சென்னை மாகாண முதல்வர் ராஜாஜி, சமற்கிருதத்தை புகுத்தவே இந்தி இப்போதைக்கு புகுத்தப்படுவதாக நிகழ்ச்சி மேடையிலேயே வெளிப்படையாகவே சொன்னார். 1952ஆம் ஆண்டு இப்போதைய பா.ஜ.க.வின் தாய் அமைப்பான ஜனசங்கத்தின் மாநாட்டுத் தீர்மானமும் சமற்கிருதத்தை நாடு முழுக்க பரப்ப வேண்டும் என்ற உறுதியேற்றவுடனேயே கலைந்தது.

கல்வித்துறையினூடாக திணிப்பு வேலை

2014ஆம் ஆண்டில் தமிழகத்தில் இயங்கிவரும் மத்திய அரசின் கேந்திரிய வித்யாலயா பள்ளிகளிலும், CBSE பள்ளிகளிலும் ஆகஸ்ட் 7 முதல் 13 வரை சமற்கிருத வாரம் கொண்டாட வேண்டுமென அவசரமான உத்தரவை வழங்கி, சமற்கிருதத்தை மாணவர்களுக்கு கட்டாயமாகத் திணிக்க முற்பட்ட நிகழ்வைத் தொடர்ந்து குருஉத்சவ் என ஆசிரியர் தினத்தை சமற்கிருத பண்பாட்டின்படி தமிழகத்தின் உள்ள மாணவர்களை கொண்டாட வைத்ததும் பள்ளிகளை குறிவைத்த சமற்கிருதம் திணிக்கப்படுவதை வெளிக்காட்டியது. சமீபத்தில் சென்னை ஐஐடியில் நடைபெற்ற நிகழ்ச்சியில் நிகழ்ச்சி தொடங்குவதற்கு முன்பாக தமிழ்த்தாய் வாழ்த்துப்பாடல் பாடப்படாமல் மகாகணபதி எனத் தொடங்கும் சமற்கிருத பாடலைப் பாடியதோடு இந்த தவறுக்கு எவ்வித வருத்தமும் தெரிவிக்காத நிலையைப் பார்த்தால், இனி தமிழ்த்தாய் வாழ்த்துப் பாடல் பாடப்படும் மரபுகளை தவிர்ப்பதற்கான முன்னோட்டம் என்பதையே இந்நிகழ்வு நமக்கு உணர்த்துகிறது.

2014ஆம் ஆண்டு சமற்கிருதத்தை மேம்படுத்த பல்கலைக்கழகங்களுக்கு 70 கோடியும் CBSE பள்ளிகளுக்கு 320 கோடியும் நிதி ஒதுக்கி கல்வி நிலையங்களுக்குள் சமஸ்கிருத திணிப்பை தீவிரப்படுத்தியுள்ளார்.

மாணவர்களிடத்தில், சமற்கிருதத்தில் அறிவியல் மருத்துவம், விஞ்ஞானம், போன்றவை பற்றிய பல்வேறு செய்திகள் இருப்பதாக பொய்யுரை பேசுகின்றனா். புஷ்பக விமானம் இன்றைய நவீன விமானத்தை விட உயர்வானது என அறிவியல் மாநாட்டில் பேசி குட்டுப்பட்டதும், இதுவரை நோபல் பரிசு பெற்ற எவருமே சமற்கிருதம் அறியாதவர்கள் தான் என்பதுமே சமற்கிருதத்தில் எவ்வித அறிவியலும் இல்லை என்பதற்கான சான்றாகும். எட்டாம் வகுப்பு தேர்விலேயே மாணவர்களின் திறன் அடிப்படையில் தொழிற்கல்வியை புகுத்தும் குலக்கல்வி முறையிலான திட்டமும், பெண்களுக்கு டி.டி.எச் வழியே வீட்டிலிருந்தபடியே கல்வி என்ற பெண்ணடிமை, கல்வி மறுப்பு, சமூகத்தில் பாலின பாகுபாட்டை தீவிரப்படுத்துதல் என, புதிய கல்விக் கொள்கையில் பல அம்சங்களும் வேத கால வர்ணப்பாகுபாடுகளையும் கல்வி மறுப்புகளையும் இம்மண்ணில் மீண்டும் நிறுவுவதற்கான முயற்சியாகவே இருக்கிறது. மருத்துவம் படிக்க சமற்கிருதம் அறிந்திருக்க வேண்டுமென்ற நிலையை 1930களிலேயே மாற்றிய நீதிக்கட்சியின் சாதனையை மாற்றி மீண்டும் சமற்கிருதத்தையே தகுதியாக அளவீடு செய்யவே கல்விநிலையங்கள் குறிவைக்கப்படுகிறது.

சமற்கிருதம் வேண்டாமென்பது ஏன்?

  1. எம்மொழித் துணையுமின்றி தனித்து இயங்கும் ஆற்றல் கொண்ட தமிழ்மொழியை நீச மொழி என்கிறது சமற்கிருதம்.
  2. இந்திய மொழி அனைத்திற்கும் மூலமொழி சமற்கிருதமே என்ற பொய்யான ஆய்வு முடிவை சுமந்தபடி புகுத்தப்படுகிறது. இதனால் பிறமொழிகள் மீது ஆதிக்கத்தை நிறுவவே சமற்கிருதம் நுழைக்கப்படுகிறது.
  3. தில்லை கோவிலின் சிற்றம்பலமேடை மீது தமிழ் ஏறத் தகுதியற்றது. என்று சொன்னவர்களின் தாய்மொழியான சமற்கிருதம் தமிழகத்திலே நுழைய தகுதியற்றது.
  4. சமற்கிருத நூலான மனுநூல் மூலமாக இம்மக்களை வர்ணபாகுபாடு கொண்டு பிரித்த மொழியே சமற்கிருதம். நால்வருணங்களை சமூகம் தொடர்நது நினைவில் வைத்துக்கொள்ள ஏற்படுத்தும் நவீன ஏற்பாடு.
  5. வழக்கொழிந்த மொழி வரிசையில் உள்ள மொழி, மிகவும் சொற்பமான மக்களே தாய்மொழியாகக் கொண்ட மொழி, பிற மொழிகளை விட உயர்வானது என்ற ஆதாரமற்ற பொய்களை சுமந்தபடி ஆட்சியதிகாரத்தின் துணையுடன் திணிப்பாக நுழைக்கப்படுவதை ஒரு போதும் சுயமரியாதை மண்ணில் அனுமதிக்க இயலாது.

இதனையெல்லாம் கருத்தில் கொண்ட பெரியார் “சமற்கிருதம் பரவினால்தான் பார்ப்பனர்கள் வாழ முடியும், சுரண்ட முடியும், நம்மை கீழ்சாதி மக்களாக்க முடியும் அவர்கள் பார்ப்பனர்களாகவே இருக்கமுடியும் சமற்கிருத நலிவு பார்ப்பன ஆதிக்கத்தின் நலிவு அதை உணர்ந்து தான் ஒவ்வொரு பார்ப்பனரும் சர்வ ஜாக்கிரதையாக காரியம் ஆற்றுகின்றனர்”

என 15.12.1960இல் வெளியான விடுதலையில் எழுதினார்.

“திணிப்பை உணர்வோம்!

தீரத்துடன் திணிப்பை முறியடிப்போம்!

Pin It