எட்டுமணிநேரமல்ல!

சாயபட்டறைகளில் எங்கள்
சந்ததிகள் வளருது!
காலையில் காய போட்ட
துணியெடுக்க -சூரியன்
போனபிறகு வருகிறாள் அம்மா

நிக்க நேரமில்லை நினைத்து
பார்க்க வழியுமில்ல - வேலை
எட்டுமணிநேரமல்ல!

நீங்கள் போட்டுருக்கிற பனியனுக்குள்
புதைந்திருக்கு எங்கள்
வாழ்க்கை - வேலை
எட்டுமணி நேரமல்ல!

படிக்க போன பிள்ளைக்கு
பசியாத்த வழியுமில்ல
குடிக்கிற கூழுக்கே
குடும்பம் முழுக்க
வேலைக்கு - வேலை
எட்டுமணிநேரமல்ல

பள்ளிகூடம் விட்டவுடன்
பறந்து வருவான் பிள்ளை-அம்மா
பாயாசம் வைத்திருப்பாளென
பாசத்துடன் அள்ள வழியில்ல-வேலை
எட்டுமணி நேரமல்ல

நின்னுகிட்டே பார்க்கிறாள்
வேலை அம்மா
உட்கார வாரத்தில்
ஒரு நாள் லீவு
அன்னைக்கும் வேலையாம்
அர்ஜென்டாம் ஆர்டரு-வேலை
எட்டுமணி நேரமல்ல


[திருப்பூரில் பனிரெண்டு மணிநேர வேலை கட்டாயம் குறித்து எனது வேதனையை எழுதியுள்ளேன்]
- தியாகு (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)