சாம்பல் நிற மேகங்களைக் குழைத்து
மான் மறை குதிரை யானை என
வரைந்து கொண்டிருந்தது காற்று
இன்னும் சில
பொம்மைகளுக்கு நடுவில்
உருவமற்றுக் கிடந்த
இளங் கபில நிற மேகத்தைப் பற்றியும்
யோசித்துக் கொண்டிருந்த
அக் காற்றை
ஓரமாய் நின்று
வேடிக்கை பார்க்கும்படி
தள்ளி விடும்
எனது கூர்மையான விழிகள்
ஓவியத்தை
விசித்திரமாய் வரையத் துவங்குகின்றன
இறுதியில்
உங்களிடம் காண்பிப்பதற்காய்
அதனை அழைக்கிறேன்;
நிலவுக்குப் பின்னால்
நகம் கடித்த படி
வெட்கப்படுகிறது ஓவியம்.
- ஏ.கே.முஜாரத்