நீரிடை சீறி காற்றைக் கிழிக்கும்
சித்துக்கல் போல் இலக்கடைந்திருந்தது
"போட்டி அறிவிப்பு"
நகரின் முக்கிய வீதி இஸ்திரிக்காரர்கள்
நடமாடும்,பேசும் பதாகைகளாகி
மூலை முடுக்கிலும் கொண்டு சேர்த்திருந்தார்கள்
அச்செய்தியை
எச்சில் தெறிக்க அவர்கள் மொழியும்
பரிசுத் தொகைக்கு மயங்காதோரில்லை
பரிசுத் தொகை வானமென விஸ்தரிக்க
போட்டிக்குள் நுழையும் ஆசைகள்
எங்கும் கொழுந்துவிட்டு எரியத்துவங்கின
வெத்து வேட்டுக் கூட்டத்தில் சிக்கி
விழிபிதுங்கியது விழாக் கமிட்டி
"போட்டி" ஒரு அரசனின் கால்மிதியாகவும்
"பரிசு" அவனமரும் சிம்மாசனமாகவும்
காட்சி தந்த நிலை அந்தோ பரிதாபம்
போட்டியானதைப்போல் கேட்பாரற்று
சுணங்கிக் கொண்டிருந்தது அன்று கொண்டாடப்
படவேண்டிய பெருமழையும்..!
- சுஜய் ரகு