அண்மைப் படைப்புகள்
- மேற்கிலிருந்து வந்த செம்பரிதி
- மேகாட்டு மேய்ப்பன்
- புதிய தடத்தில் ரஷ்ய இலக்கியம்
- குழந்தைகளுக்கான கலை இலக்கிய கொண்டாட்டம்
- ஏழைத்தாயின் மகன்
- கட்டணக் கொள்ளையில் தமிழகக் கல்லூரிகள்
- ‘மாதவி’ எனும் புரட்சிப் பெண்மணி!
- தமிழகத்தின் பிரச்சினைகளுக்கு என்னதான் தீர்வு? - கருத்தரங்கம்
- பள்ளிச் சீருடைகள்
- Ashes in the snow - சினிமா ஒரு பார்வை
கீற்றில் தேட
ஜுலை16_10
- விவரங்கள்
- எழுத்தாளர்: சுப.வீரபாண்டியன்
- பிரிவு: ஜுலை16_10
முள்ளிவாய்க்கால் குருதி நாற்றம் இன்னும் நம் மூக்கைத் துளைத்துக் கொண்டுதான் இருக்கிறது. உலகில் எந்த இனமும் சந்தித்திராத இனப்பேரழிப்பை நாம்தான் எதிர்கொண்டோம்.
ஓராண்டிற்குப் பிறகு இப்போதுதான் ஐக்கிய நாடுகள் அவை அந்தப் பக்கத்தில் கண்திறந்து பார்த்திருக்கிறது. ஈழத்தில் போர்க்குற்றங்கள் நடந்திருக்கின்றனவா என்று ஆராய்ந்து அறிக்கை தர வேண்டியது அக்குழுவிற்கு இடப்பட்டுள்ள பணி. அக்குழுவினருக்கு விசா தரமாட்டோம் என்று கொக்கரித்தது இலங்கை அரசு. ஐ.நா அவைக்கு இப்படி ஓர் அவமானம் இதற்கு முன் நேர்ந்திருக்குமா என்று தெரியவில்லை. ஐ.நா அவை என்பது, உலக நாடுகளின் அவையே என்பதால், அமெரிக்கா முதலான வல்லரசுகள் தொடங்கி உலகின் கடைசி அரசு வரையில் அனைவருக்கும் இது ஓர் அவமானம். ஆனாலும், ஐ.நா வோ, உலக நாடுகளோ இதைக் கேட்டுக் கொதித்தெழவில்லை.
சில நாட்களுக்கு முன்பு இன்னொரு அட்டூழியமும் கொழும்பில் அரங்கேறியுள்ளது. இலங்கை அமைச்சர் விமல் வீரவன்ச தலைமையில் ஓர் அடாவடிக் கும்பல், கொழும்பில் உள்ள ஐ.நா அவை அலுவலகத்தை முற்றுகையிட்டுள்ளது. அவ்வலுவலகத்தின் அதிகாரிகள், ஊழியர்கள் எவரையும் உள்ளே போக விடாமல் தடுத்தும், உள்ளே இருந்தவர்களை வெளியேற விடாமல் தடைப்படுத்தியும் தன் அரக்கத்தனத்தை வெளிப்படுத்தி உள்ளது. காவல்துறையினர் அந்த அடாவடித்தனத்திற்கு அரணாக இருந்துள்ளனர்.
ஒரே ஒரு ஆறுதல், இத்தனைக்குப் பிறகும் குழுவை அனுப்புவதில் எந்த மாற்றமும் இல்லை என, ஐ.நா அவையின் பொதுச்செயலாளர் பான் கி மூன் கூறியுள்ள செய்தி மட்டும்தான். இந்த ஆறுதலும் தொடர்ந்து நீடிக்கும் என்று உறுதி கூறிவிட முடியாது. இலட்சக்கணக்கான மக்களை இரண்டே நாட்களில் கொன்று குவித்த போர்க்குற்றவாளியான ராஜபக்சேயும், கூட்டாளிகளும் குற்றவாளிக் கூண்டில் நிறுத்தப்பட்டுத் தண்டிக்கப்படும் நாளே, குறைந்தபட்சம் காலம் கடந்தாவது நீதி தன் கடமையைச் செய்யும் என்று நம்பக் கூடிய நாளாக இருக்கும்.
நந்திக் கடல் பகுதியிலும், முள்ளி வாய்க்கால் பகுதியிலும் தடைசெய்யப்பட்ட இராசாயனக் குண்டுகள் பயன்படுத்தப்பட்டிருப்பதற்கான ஆதாரங்கள் இப்போதும் கிடைக்கக்கூடும் என்றே கூறுகின்றனர். தடய அறிவியல் துறையின் வளர்ச்சி அதற்கான வாய்ப்புகளைக் கொண்டதாக உள்ளது. எனவே ஐ.நா. குழுவினர் தங்களோடு பல்வேறு ஆய்வுக் குழுவினர்களையும் அழைத்துச் செல்லுவதே பயனுடையதாக இருக்கும். இப்போது செல்லவிருக்கின்ற குழுவினர், வெறும் ஆய்வறிக்கை கொடுக்கும் அதிகாரம் மட்டுமே உள்ளவர்கள் என்பதை நாம் அறிவோம். அதற்கே சிங்கள இனவெறி அரசு இத்தனை தடைகளை ஏற்படுத்துகிறது. இதிலிருந்தே அவர்கள் குற்றம் இழைத்துள்ளனர் என்பதை மறைமுகமாக உலகுக்குத் தெரிவித்து விட்டனர் என்று கொள்ளலாம். இனிமேல் உலகம் என்ன செய்யப் போகிறது என்பதுதான் நம்முன் உள்ள கேள்வி.
உலகம் ஒருபுறம் இருக்கட்டும், இந்தியா என்ன செய்யப் போகிறது என்பதே அதற்கும் முந்திய ஆயிரம் டாலர் கேள்வியாக இருக்கிறது. எப்போதும் போல் இப்போதும் இந்தியா எந்தமிழ் மக்களுக்குத் துரோகம்தான் செய்யும் என்பது பெரும்பான்மைக் கருத்தாக இருப்பதை அறிய முடிகிறது. கடந்த காலங்களில் இழைத்த ஆயிரம் துரோகங்களைத் தாண்டி இப்போதேனும் இந்திய அரசு, ஐ.நா குழுவிற்கு ஆதரவாகக் குரல் கொடுக்குமானால், காலகாலமாக இந்தியாவின் மீது நேசமும், நம்பிக்கையும் வைத்திருந்த ஈழ மக்களுக்குச் சின்ன ஆறுதலாவது கிடைக்கும்.
..............................................................................,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,..........................................................
பேரவையின் இரண்டாவது மலர்
அம்பேத்கர் - பாரதிதாசன் பிறந்தநாள் மலரை அடுத்து, திராவிட இயக்கத் தமிழர் பேரவையின் இரண்டாவது மலர் அறிவியல் மலராக மலர்கிறது. அறிவியல் செய்திகளை எளிமையானதாக மக்கள் மன்றத்திற்குக் கொண்டு செல்வதும், பகுத்தறிவுக் கருத்துகளை மக்களிடையே பரப்புவதும் இம்மலரின் நோக்கம்.
இம்மலர் வரும் செப்டம்பர் 25 ஆம் நாள் சென்னையில் வெளியிடப்பட உள்ளது.
- சுப.வீரபாண்டியன்
- விவரங்கள்
- எழுத்தாளர்: இனியன்
- பிரிவு: ஜுலை16_10
உலகமே போற்றும் வண்ணம், கேரள, மராத்திய அரசியல் தலைவர்கள் எல்லாம் தங்கள் மொழிக்கு இப்படி ஒரு மாநாடு நடத்த முடியவில்லையே என்று ஏங்கும் வண்ணம், மொழியைப் போற்ற இத்தனை இலட்சம் மக்கள் ஒன்று கூடுவார்களா என்று வெளிநாட்டு அறிஞர்கள் வியக்கும் வண்ணம் கோவையில் உலகத் தமிழ்ச் செம்மொழி மாநாடு மிகச் சிறப்புடன் நடந்து முடிந்திருக்கிறது.
அறிஞர்கள் கூறிய ஆய்வரங்கம், கணிப்பொறியாளர்கள் கூடிய இணையத்தள அரங்கம், பொதுமக்கள் கூடிய பொது அரங்கம் என மூவரங்குகளும் சிறந்து திளைத்தன. ஏறத்தாழ ஐந்து மணி நேரம் காத்திருந்து பல்லாயிரக்கணக்கான மக்கள் கண்காட்சியைக் கண்டு மகிழ்ந்தனர்.
இத்தனை சிறப்புகள் இருந்தாலும், தேடித் தேடி, துருவித் துருவி குறைகள் சிலவற்றைக் கண்டுபிடித்து, அவற்றைப் பெரிதுபடுத்தி வெளியிடுவதில் உள்ளம் பூரித்திருக்கின்றன சில ஏடுகள். நம்மைப் பொறுத்தவரையில் அறிவுத் தளம், உணர்வுத்தளம் ஆகிய இரு இடங்களிலும் மாநாடு நல்ல பயனைத் தந்திருக்கிறது.
மாநாட்டின் நிறைவு விழாவில் சிறப்பான தீர்மானங்கள் பல நிறைவேற்றப்பட்டுள்ளன. அவற்றுள் முதன்மையானது, தமிழில் பயின்றவர்களுக்கு அரசு வேலைவாய்ப்பில் முன்னுரிமை வழங்கப்படும் என்னும் தீர்மானம் பெருமகிழ்வைத் தந்துள்ளது. தமிழ் உணர்வாளர்களின் நீண்ட நாள் கோரிக்கை இது. 1999 ஆம் ஆண்டு, தமிழ்ச் சான்றோர் பேரவையின் சார்பில் 100 தமிழறிஞர்கள் பட்டினிப் போராட்டம் நடத்தினர். அவர்கள் வைத்த கோரிக்கைகளில் இதுவும் ஒன்று. பத்து ஆண்டுகளுக்குப் பிறகு அவர்களின் விருப்பம் செயல் வடிவம் பெறத் தொடங்கியுள்ளது. எனினும், என்ன ஒரு முரண் எனில், காலமெல்லாம் அந்தக் கோரிக்கைக்காகக் குரல் எழுப்பிக் கொண்டிருந்த பெருமக்கள், இப்போது அது ஏற்கப்பட்டிருக்கும் வேளையில், பாராட்டி ஒரு சொல்லும் கூறாமல் பதுங்கி இருப்பதுதான்.
இத்தருணத்தில், இன்னொரு செய்தியையும் நாம் நினைவு படுத்திக் கொள்வது நல்லது. நல்லனவற்றை அரசு செய்ய முன்வந்தாலும், சில வேளைகளில் சட்டம் குறுக்கிடும். 1999 இல், ஒன்று முதல் ஐந்தாம் வகுப்பு வரை தமிழே பயிற்று மொழி என்று கலைஞர் அரசு ஆணை பிறப்பித்தது. ஆனால் ஆங்கில வழிக் கல்வி நிறுவனங்களை நடத்துகின்றவர்கள் நீதிமன்றத்தில் வழக்குத் தொடுத்து, அவ்வாணையைச் செல்லாததாக ஆக்கி விட்டனர். இப்போதும் அதுபோன்ற முயற்சிகள் நடக்கவே செய்யும். அதனைக் கவனத்தில் கொண்டு, உரிய வகையில் சட்டத்தை இயற்ற, முதல்வர் அமைச்சரவையில் கலந்துரையாடி இருக்கிறார் என்னும் செய்தி வரவேற்கத்தக்கது.
- இனியன்
- விவரங்கள்
- எழுத்தாளர்: சூ.யோ.பாத்திமாகரன்
- பிரிவு: ஜுலை16_10
செம்மொழி மாநாட்டிற்குக் கட்டுரையாளராக வந்திருந்த ஆக்ஸ்போர்டு பல்கலைக்கழகத்தின் மேனாள் ஆய்வாளர் சூ.யோ.பாத்திமாகரன் அவர்கள் செம்மொழி மாநாடு குறித்துக் கூறிய கருத்து கீழே தரப்பட்டுள்ளது:
செம்மொழி மாநாடு உலகெங்கும் வாழும் தமிழ் அறிஞர்கள், புத்தி ஜீவிகள், படைப்பாளர்கள் ஒருங்கிணைவதற்கான வாய்ப்பினை உருவாக்கி உள்ளது. இதன் மூலம் உலகின் பல பாகங்கிலும், தனியான முறையிலும், கூட்டாகவும் தமிழ் மொழி, கலாச்சாரம், பண்பாடு, தமிழில் தொழில் நுட்பத்தினுடைய தேவைகள் குறித்து நடைபெற்று வந்த ஆய்வுகள் ஒருங்கிணைக்கப்பட்டு எதிர்காலத்தில் முழுமையான, திறமையான ஆய்வு முடிவு வெளிவருவதற்கு வழி சமைக்கப்பட்டுள்ளது. இந்த இணைப்பு இருவகைகளில் ஏற்பட்டுள்ளது. ஒன்று, பொது அமர்வுகள் மூலம் மக்களிடையே தம் மொழி செம்மொழி என்கின்ற உணர்வை உருவாக்கியுள்ளது. மிருகங்களுடைய அரசில் “சாப்பிடு அல்லது சாப்பிடப்படுவாய்” என்பது வேதவாக்காக உள்ளது. அதேபோல் மனிதர்களுடைய அரசில், “அடையாளப்படு அல்லது அடையாளப்படுத்தப்படுவாய்” என்பது கட்டளை மொழியாக உள்ளது. அந்த வகையில் தமிழர்கள் தங்கள் மொழியை, செம்மொழி என அடையாளப்படுத்துகின்ற பொழுதே, அதுவும் பல லட்சம் மக்கள் திரண்டெழுந்து மகிழ்ச்சியுடன் எம்மொழி செம்மொழி என்று முழங்குகின்ற பொழுதே, என்றும் செம்மொழியாக உள்ள தமிழ், மக்களால் மீளவும் செம்மொழிதான் என பிரகடனப்படுத்தப்படுகிறது.
இதற்குப் பொது அமர்வுகளில் நடைபெற்ற கலை நிகழ்ச்சிகள், கவிதைகள், பேச்சுகள், நாடகங்கள், இசை என்பன உதவியுள்ளன. அதேபோல் இரண்டாவதாக ஆய்வாளர்கள் பழமையையும், புதுமையையும் இணைக்கின்ற வகையில் சங்கம் முதல் இன்றுவரை தமிழ் படைத்த இலக்கண இலக்கிய எழுச்சிகளை செம்மொழி மாநாட்டின் மூலம் விளக்கித் தமிழின் செம்மொழித் தன்மையை வெளிப்படுத்தினர். அதே வேளை, இன்றைய யுகத்தின் கணிணித் துறையில் தமிழ் அடைந்த, அடைய வேண்டியனவற்றையும் இணைய மாநாட்டின் மூலம் எடுத்து விளக்கினர். இவ்வகையில் செம்மொழி மாநாடு 21 ஆம் நூற்றாண்டில் தமிழ் பெற வேண்டிய வளர்ச்சிகளுக்கு வித்திட்டுள்ளது. மக்களை ஒருங்கிணைப்பதிலும், ஆய்வுகள் குறித்த கட்டுரைகள் மூலம் ஆய்வுத் தேடலுக்கான ஒரு புதிய பரிணாமத்தைத் தோற்றுவிப்பதிலும் இம்மாநாட்டை ஒழுங்கு செய்தவர்களும், பங்குபெற்றவர்களும், இதற்கு ஆக்கமும் ஊக்கமும் அளித்த தமிழக முதல் அமைச்சர் அவர்களும் இந்த மகாநாடு தொடர்ந்தும் மக்கள் ஆய்வாளர் உறவுப் பணியாக வளர்த்துச் சென்று தமிழ் வளமும், பலமும், தமிழர் சிறப்பு வாழ்வும் பெற உதவவேண்டிய பொறுப்புள்ளவர்களாக இருக்கின்றார்கள்.
- விவரங்கள்
- எழுத்தாளர்: சுப.வீரபாண்டியன்
- பிரிவு: ஜுலை16_10
கடலுக்குள் மீன்பிடிக்கச் சென்றிருந்த தமிழக மீனவர்களை அடித்து உதைத்துச் சிங்கள இராணுவம் வழக்கம்போல் அட்டூழியம் செய்துள்ளது. வேதாரண்யத்தைச் சார்ந்த செல்லப்பன் என்னும் மீனவர் அத்தாக்குதலில் உயிர் இழந்துள்ளார்.
கடந்த இருபது ஆண்டுகளுக்கும் மேலாக இக்கொடுமை தொடர்ந்து கொண்டே இருக்கிறது. ஒரு முறை, சிங்கள் இராணுவம் நம் மீனவர்களைத் துரத்திக் கொண்டே வந்து, பாம்பன் அருகில் உள்ள ஓலைக்குடா என்னும் கிராமத்தில் அவர்களைச் சுட்டுக் கொன்றது. மானமுள்ள ஒரு சிறிய நாடு கூட இதனைப் பொறுத்துக் கொண்டிருக்காது.
சிங்களம் செய்யும் அனைத்துக் கொடுமைகளுக்கும், இந்திய அரசு தொடர்ந்து பரிசுகளை வழங்கிக்கொண்டே இருக்கின்றது. தமிழீழ உறவுகளை அழிப்பதற்கு இந்திய அரசு ராடார் முதலான கருவிகளை வழங்கி உதவியது. அதன் பயன்தான் இன்று அவர்கள் எந்த அச்சமும் இன்றி நம் மீனவர்களையே கொன்று குவிக்கின்றனர்.
அங்கே கிளிநொச்சி, ஆனையிறவு போன்ற பகுதிகளில் புதிதாய் முளைத்திருக்கும் நீலக் கூடாரங்களில் சீன எழுத்துகள் காணப்படுவதாய் சென்று வந்தவர்கள் கூறுகின்றனர். ஆம், இலங்கையைத் தன் நாட்டின் ஒரு பகுதியாக ஆக்கிக்கொண்டிருக்கும் சீனா, நாளை இந்தியாவின் மீது போர் தொடுக்க ஒரு வசதியான தளத்தை உருவாக்கிக் கொண்டிருக்கிறது.
அதனால் என்ன, ஈழப்போரில் இறந்தவன் கரைக்கு அந்தப் பக்கத்தில் இருந்த தமிழன் என்றால், சீனப்போரில் இறப்பவன் கரைக்கு இந்தப் பக்கத்தில் இருக்கும் தமிழனாய் இருப்பான்.
இந்திய அரசுக்குச் சொல்வோம், இனியும் நாங்கள் பொறுப்பதற்கில்லை.
- சுப.வீரபாண்டியன்
- விவரங்கள்
- எழுத்தாளர்: மு.சுந்தரராசன்
- பிரிவு: ஜுலை16_10
“கொறமுழி” யென்றும் “கொறச்சாலம்” என்றும் குன்றத்துக்
குறவரின் வரலாறு அறியா அறிவுக் குருடர்கள்
குறைத்துக் கூறும் பேச்சுக்கள் எங்கள்
உள்ளத்துள் உண்டாக்கும் ஊமை வலிதனை இந்த
உலகிற்கு உணர்த்த உகந்தவர் யாருமில்லை.
சாதிகள் அனைத் திற்கும் பொது வுடைமையே
சமுதாயக் கேடான திருட்டுக் குற்றம் - ஆனால்
ஏதோஅது எமக்கென்றே ஏற்பட்டது போல
எள்ளி நகையாடி ஏளனமாய்ப் பேசுமிச் சமூகம்
எம்நெஞ்சைப் பிளக்கிறதே வேற்கூர்மை வார்த்தைகளால்
வம்சாவளித் திருடராய் வக்கிரமாய் வகைப்படுத்தி
வைத்ததுவே போலீசில் வாழ்நாள் அடமானம்
தமிழனின் தொடக்கமாய்த் தலைநிமிர்ந்து வாழ்ந்த இனம்
தாழ்த்தப்பட்ட சாதி வடிவில் தரந்தான் குறுகியதே !
அட்டவணைச் சாதியாய், அட்டவணைப் பழங்குடியாய்ப்
பிற்படுத்தப் பட்டோராய், மிகப் பிற்படுத்தப் பட்டோராய்த்
தப்புத்தப்பாயத் தரம்பிரித்துத் தத்தம்பங் காற்றியதால்
அல்லோல கல்லோலமாய் அலைகிறோமே அநாதைகளாய்
போலீசின் பொய்வழக்கு, அரக்கத்தன அடக்குமுறை
பெண்களுக் கெதிரான பாலினத் தாக்குதல் களால்
நாதியற்றுப் போன நாங்கள் சாதி சொல்ல அச்சப்பட்டு
நாடெல்லாம் ஓடியோடி நாடோடி களாகிப் போனோம்.
பேசிவந்த மொழி மறைத்துப் பிறசாதிப் பெயர் கூறி
ஊருக்கு ஒருவீடாய் ஒளிந்தொளிந்து வாழு மின்னிலை
பாருக்குள் படர்ந்திருக்கும் எச்சாதிக்கும் வரவேண்டாம்.
எழுச்சிமிகு தமிழினத்தை ஈன்றெடுத்த தாயினம்
எங்களது “குன்றத்துக் குறவரினமே” யெனும்
என்றோ மறந்துபோன என்றும் மாறா உண்மைதனைத்
தரணி புகழ் “உலகத் தமிழ்ச் செம்மொழி மாநாடு” தனில்
தரணிக்கே பறை சாற்றித் தமிழர்தம் தாயினத்தைத்
தனயனாயக் காத்து நிற்கும் கருஞ்சட்டைப் பெருந்தகையீர் !
குன்றத்துக் குறவர் இனத்தின் நன்றிகள் பலகோடி !
- மு.சுந்தரராசன், கூடுதல் காவல் கண்காணிப்பாளர் (ஓய்வு), கோவை - 42.