அம்மாகுட்டிக்குச்
சோறூட்டும் மதிய நேரத்தில்
இடுப்புயர மதில்சுவற்றில்
சரியாக வந்தமர்கின்றன
சில காகங்கள்

காகத்திற்கு கொடுத்துவிடுவதாக
ஏய்ப்புக் காட்டி
ஊட்டும் சமயங்களில்
காகம் ஏமாந்து போய்விடுமென
மீதிச் சோற்றை
மதிலில் வைக்க எத்தனிக்க
கையிலேயே வந்து
கொத்தித் தின்கின்றன
பசியுற்ற காக்கைகள்

இப்பெருநகரில்
எப்படி பசியாறுகின்றன காக்கைகள்
எனும் கேள்வியுடன் கதவடைக்கிறேன்
சமையலறைச் சன்னலில்
அடைக்கப்பட்ட கொசுவலையைக்
கொத்திக் கொண்டிருந்த காகம்
திடுமெனப் பறந்து
பக்கத்துவீட்டு தென்னை மரத்திலிருந்து
நோக்கியது
இடுப்பிலிருந்த குழந்தை
கைதட்டிச் சிரிக்கிறது..

இப்போதெல்லாம்
தனக்கு ஊட்டும்போது
காகத்துக்கும் வைத்தால்தான்
சாப்பிடுவேன் என
அடம்பிடிக்கிறது குழந்தை
காகம் குழந்தையிடம்
தன் குறை சொல்லியிருக்கலாம்

- இவள் பாரதி (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)