எனக்கு இந்த முகம் வேண்டாம் தோழர்களே
மற்றவர்கள் வெறுப்புடன் பார்க்காத
ஒரு முகம் வேண்டும்
உருண்டைவடிவம் செவ்விதழ் கூர்நாசி கொண்டது
கறுப்புதான் என்றாலும் களையான முகம்தான் எனது
அந்த முகத்துமேல் இருபிறப்பாளார்களால் பூசப்பட்டுள்ள
அரிதாரத்தின் பொருள் இருக்கிறதே
அதைத்தான் நான் மலையளவு வெறுக்கிறேன்
மற்றவர்களால்
அருவருப்பாய் பார்க்கப்படுகிறது என் முகம்
இழிவுபடுத்தப்படுகிறது
துச்சமாய் நினைக்கப்படுகிறது
ஒதுக்கி வைக்கப்படுகிறது
ஒடுக்கப்படுகிறது
நசுக்கப்படுகிறது
அடித்து நொறுக்கப்படுகிறது
எனவே என் முகம் வாடி வதங்கி
மேலும் கறுத்து ஓவென்று அழுது வடிகிறது இப்போது
உங்களிடம் சொல்வதற்கு என்ன
சில சமயங்களில் என் முகத்துமேல்
நானே காரி உமிழ்ந்துகொள்கிறேன்
என் முகத்தைக் கழற்றி எறிந்துவிட்டு
அமெரிக்கனின் சீனாக்காரனின் முகம் வரைந்துகொள்ள ஆசை
என் முகத்தின் பரிணாமம்
அதன் வரலாறு அழகு அம்சங்களால் நிறைந்ததுவாம்
சொல்கிறார்கள் அறிவாளிகளும் என் மூதாதையரும்
கேட்பதற்கு பெருமிதமாக இருக்கிறதுதான்
பெருமிதத்தை வைத்துக்கொண்டு நாக்கு வழிக்கவா
பார்த்த மாத்திரத்தில் மற்றவர்கள் புன்முறுவல் செய்து மதிப்பளிக்கும்
ஒரு முகத்தேடலுக்கான போராட்டம்
என்றாகிவிட்டது எனது வாழ்க்கை
இக்கவிதை மூலம் உங்களுக்கு நான்
அடித்துச் சொல்ல விரும்புவது என்னவென்றால் கேளுங்கள்
எனக்கு இந்த முகம் வேண்டாம் அவ்வளவுதான்.
- வெ.வெங்கடாசலம்