மூன்று கவிதைகள்

விறகுடைக்க வந்த
வெட்டியானின்
பசிஅறியாமல்
பழைய கஞ்சியை
ஊற்றினாள்
ஆண்டைவீட்டு அம்மா .
மூச்சிரைக்க
பிளந்து போட்டவனின்
முன்னால்
விறகுகள் கிடக்கிறது
அடித்து எரிய வைக்க இருக்கும்
ஆண்டைகளின்
மண்டை ஓட்டு கபாலமொத்து.

2

அரைகுறை ஆடையுடன்
வரும் பெண்களை
வேடிக்கை பார்த்தபடி
"காஃபி டே"யில் குடித்த
காஃபியின் விலை
முப்பது ரூபாய்...
கருக்கலில் சென்று
கரும்புக்குகளை வெட்டி
உச்சி வெய்யிலில் வீடுதிரும்பும்
அம்மாவுக்கு கூலி
இருபைத்தைந்து ரூபாய்.

3

துளி நுனி கொழுந்து
இல்லாமல்
பட்டுப்போய் நிற்கிறது
வேம்பு ,துளசி,நொச்சி,.....

3டி மூவ்மென்டில்
டீ.வீ. பெட்டிக்குள்
உலா வருகிறது
வேம்பு,புதினா, துளசியை
கொண்டு தயாரான
சோப்பு விளம்பரம்.

- வீரமணி (mani_இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)