ஆதவனும் நுழைய அஞ்சும்
ஆளரவமற்ற அடர்ந்த காடு
மனித சஞ்சாரம் மருட்டுவதாய்
காற்றோடு ஒரு சேதி
செவி வழி செய்தி மீது அவரவர்
தன்மைக்கேற்ற தீர்மானங்கள் சில
ஊரைக் கொள்ளையிடும்
கொள்ளைக் கும்பலென சிலர்
திருமகள் பெட்டகத்திற்குள்
அடைக்கப்பட்டாள்
நாட்டை சீரழிக்கும்
தீவிரவாதமென சிலர்
ரத்தம் குடிக்க பூமாதேவி
தயாரானாள்
ஊர் விட்டு வந்து ஆதரவு நாடும்
ஜோடிக் கிளிகள் என்க
மருதாணி மணத்துடன்
மல்லிகை பூக்கின்றது
அச்சமூட்டும் பூச்சாண்டி ஆகையில்
போராடும் குழந்தையும்
பூவிதழ் திறக்கிறது
அவரவர் தீர்மானம்
அவரவர் எண்ணங்களின் மீது
சீந்துவதற்கு ஆளின்றி
சிதறிக் கிடக்கும் சருகுகளை
சுழல வைக்கிறது சூறைக்காற்று
வனத்தினுள்

- பத்மாகிரஹ‌ம்