makkal vidhuthalai logo

தொடர்புக்கு: எண் 40/456, மாதவரம் நெடுஞ்சாலை, மூலக்கடை, சென்னை - 60.
பேசி: 94446 87829, 86809 08330; இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.
தனி இதழ்: ரூ.10, ஆண்டுச் சந்தா ரூ.120

இந்திய துணைக் கண்டத்தில் வாழும் ஒட்டு மொத்த மக்களில் எண்பத்தைந்து (85) விழுக்காடாக இருக்கிற பட்டியலின, பட்டியல் பழங்குடியின, மிகவும் பிற்படுத்தப்பட்ட, பிற்படுத்தப்பட்ட, சிறுபான்மையினர், பெண்கள் உள்ளிட்ட மக்களின் வாழ்வாதாரம், வாழ்வுரிமை, மனித உரிமை வாய்ப்புகள் அனைத்தும் தொடர்ச்சியாக பதினைந்து விழுக்காட்டிற்கும் குறைவாக உள்ள ஆதிக்க, ஆளும் வர்க்கத்தால் மறுக்கப்பட்டு வருகிறது. இத்தகைய பெரும்பான்மை மக்களின் வாழ்வின் மாற்றத்திற்கும், ஏற்றத்திற்கும், விடுதலைக்கும்தான் கௌதம புத்தர் தொடங்கி மகாத்மா ஜோதிபா பூலே, சாவித்திரிபாய் பூலே, சத்ரபதி சாகுமகராஜா, தந்தை பெரியார், பாபாசாகேப் டாக்டர் அம்பேத்கர் ஆகியோர் தங்கள் வாழ்வை அர்ப்பணித்தனர். அதன் விளைவாகத்தான் சமூகத்தில் பல்வேறு மாற்றங்கள் உருவானது.

court scale brahmins

அதன் அடிப்படையில்தான் மேற்கண்ட பெரும்பான்மை மக்களின் வாழ்வுரிமைக்கான மேம்பாட்டு திட்டங்களும், சட்டங்களும் உருவாக்கப்பட்டன. அதனையொற்றியே இந்திய அரசியலமைப்பு சட்டத்தில் பாபாசாகேப் டாக்டர் அம்பேத்கர் அவர்களின் சீரிய முயற்சியால் சமூக நீதிக்கான இடஒதுக்கீடு மற்றும் அது சார்ந்த கொள்கைகள் உறுதிப்படுத்தப்பட்டன. அதன்படிதான் பல வாய்ப்புகள் இன்று பெரும்பான்மை மக்களுக்கு வாய்த்தது. மேற்கண்ட இந்திய அரசியலமைப்பு சட்டத்தின் பிரிவு 12-ன் படி, அரசு என்கிற வரையறைக்குள் வரும் அத்துனை துறைகளிலும் வாய்ப்பு மறுக்கப்பட்ட சமூகத்தினருக்கு கல்வியிலும், வேலைவாய்ப்பிலும் உரிய பிரதிநிதித்துவம் வழங்கிட பிரிவுகள் 15(4) மற்றும் 16(4) ஆகியவற்றில் வகை செய்யப்பட்டுள்ளது. அரசு என்கிற பதத்தில் மூன்று முக்கிய துறைகள் வரையறுக்கப்படுகிறது.

அவை, 1. சட்டமியற்றும் துறை (சட்டமன்றம், நாடாளுமன்றம்), 2. நிர்வாகத் துறை, 3. நீதித்துறை. இவற்றில் நீதித்துறையைத் தவிர மேற்கண்ட இரண்டு துறைகளில் முழுமையாக இல்லையென்றாலும், ஓரளவாவது இடஒதுக்கீடு கொள்கை அமல்படுத்தப்படுகிறது. ஆனால், நீதித்துறையில் குறிப்பாக, உயர் நீதித்துறையில் (உயர் நீதிமன்றம், உச்ச நீதிமன்றம்) முற்றிலும் சமூகநீதி மறுக்கப்பட்டு வருகிறது.

அதற்குக் காரணம் கேட்டால், நீதித் துறையில் இடஒதுக்கீடு அளிக்க சட்டத்தில் இடமில்லை என்று அரசியலமைப்புச் சட்டத்திற்கே எதிரான ஒரு விதண்டாவாதத்தை முன்வைக்கின்றனர். ஆனால், இந்தியாவில் உள்ள 24 உயர் நீதிமன்றங்களிலுள்ள 964 நீதிபதிகளில் SC/ST சமூகத்தைச் சேர்ந்தவர்கள் வெறும் 17 பேர்தான். சுமார் 15 உயர் நீதிமன்றங்களில் SC/ST பிரிவைச் சார்ந்த ஒருவர் கூட நீதிபதியாக இல்லை. அதேபோல BC, MBC, சிறுபான்மையினர், பெண்கள் இவர்களின் எண்ணிக்கையும் வெறும் 100-க்கும் குறைவாகத்தான் உள்ளது. உச்சநீதிமன்றத்திலுள்ள 31 நீதிபதிகளில் 85 சதவீதத்திற்கும் மேல் பார்ப்பனர்களும், அவர்களுக்கு நிகரான முற்பட்ட சமூகத்தைச் சேர்ந்தவர்களும்தான் உள்ளனர். உச்ச நீதிமன்றம் தொடங்கிய காலம் தொடங்கி இன்று வரை நீதிபதிகளாக இருந்தவர்களில் தாழ்த்தப்பட்ட சமூகத்தைச் சேர்ந்தவர்கள் வெறும் 4 பேர் மட்டுமே. ஆனால் இன்று ஒருவர் கூட இல்லை. மீதமிருக்கிற அத்துனை இடங்களையும் பார்ப்பனர் மற்றும் பார்ப்பனர்களுக்கு நிகரான முற்பட்ட சமூகத்தைச் சார்ந்தவர்கள்தான் ஆக்கிரமித்துள்ளனர். அதிலும் நீதிபதியின் மகன், பேரன், நீதிபதியின் சாதியைச் சார்ந்த அவரது ஜூனியர் ஆகியோரையே தேர்ந்தெடுக்கும் வாரிசுரிமை நீடித்து வருகிறது. மேலும் நியமனம் வெளிப்படைதன்மையின்றி இரகசியமாக நடைபெறுகிறது. இவற்றையெல்லாம் கேள்வி கேட்டால் நீதிபதிகள் நியமனத்தில் தகுதி - திறமைதான் முக்கியம். ஆகவே, இடஒதுக்கீடு கொடுக்க முடியாது என்று சொல்கின்றனர். நாமும் அதைத்தான் சொல்கிறோம். SC/ST, MBC, BC, சிறுபான்மையினர் மற்றும் பெண்கள் உள்ளிட்ட பிரிவுகளில் இன்று இலட்சகணக்கான திறமையான, தகுதி வாய்ந்த, நேர்மையான வழக்கறிஞர்கள் வந்துவிட்டனர். அவர்களை நியமிக்க வேண்டும் என்றுதான் கேட்கிறோம்.

நீதித் துறையில் இடஒதுக்கீடு கொள்கையை நடைமுறைப்படுத்திட நடவடிக்கை எடுக்க வேண்டி இந்திய உச்ச நீதிமன்ற தலைமை நீதிபதிகளுக்கு மத்திய சட்ட அமைச்சர்களாக இருந்த P. சிவசங்கர், B. சங்கரானந்த் மற்றும் H.R. பரத்வாஜ் ஆகியோர் கடிதம் எழுதியுள்ளனர். மேலும் உயர் நீதித்துறையில் இடஒதுக்கீடு கொள்கையை உரிய வகையில் அமல்படுத்துவதற்கு ஆதரவாக மத்திய அரசால் அமைக்கப்பட்ட காரியமுண்ட கமிட்டி, சுதர்சன நாச்சியப்பன் கமிட்டி ஆகியவைத் தங்களது பரிந்துரைகளை வழங்கியிருக்கின்றன. மிக முக்கியமாக உச்ச நீதிமன்றத்தால் வழங்கப்பட்டுள்ள பல்வேறு தீர்ப்புகளில் நீதிபதிகள் நியமனத்தில் சமூகநீதியைக் கடைபிடிக்க வேண்டிய அவசியம் குறித்து வலியுறுத்தப்பட்டுள்ளது. ஆனாலும் அதற்கான எந்த நடவடிக்கையும் இதுவரை எடுக்கப்படவில்லை.

இச்சூழலில்தான் சென்னை உயர்நீதிமன்றத்தில் இப்பொழுது அனுமதிக்கப்பட்ட நீதிபதிகளின் எண்ணிக்கையான 60 நீதிபதிகள் பணியிடங்களில் 42 நீதிபதிகள் மட்டுமே உள்ளனர். மீதமுள்ள 18 நீதிபதிகளுக்கானப் பணியிடங்கள் காலியாக இருக்கின்றன. காலியாக உள்ள மேற்கண்ட பணியிடங்களை நிரப்பிட நடவடிக்கை எடுக்க வேண்டும் என்று தமிழ்நாடு முற்போக்கு வழக்கறிஞர்கள் சங்கம், சென்னை வழக்கறிஞர்கள் சங்கம் உள்ளிட்ட பல்வேறு சங்கங்களின் கோரிக்கைகளையடுத்து 18 நீதிபதிகளையும் நியமிப்பதற்கான நடவடிக்கை உயர் நீதிமன்றத்தில் மேற்கொள்ளப்படுகிறது. 18 நீதிபதிகளையும் ஒரே பட்டியலாக தயாரித்து பரிந்துரைத்திட வேண்டும், அதில் உரிய முறையில் சமூகநீதி பின்பற்றப்பட வேண்டும் என்று வழக்கறிஞர்கள் சார்பில் கோரிக்கைகள் எழுப்பப்பட்டு வந்தபோதும், சென்னை உயர் நீதிமன்ற தலைமை நீதிபதி திரு. சஞ்சய் கிஷன் கௌல் அவர்கள் அவற்றையெல்லாம் புறக்கணித்துவிட்டு, இரண்டு பட்டியலாக பரிந்துரைக்கத் திட்டமிட்டு முதல் 9 பேர் கொண்ட பட்டியலைப் பரிந்துரைத்திருக்கிறார். அந்த பட்டியலில் ஏற்கனவே அதிக எண்ணிக்கையில் நீதிபதிகளாக இருக்கின்ற முற்பட்ட சமூகத்தைச் சேர்ந்தவர்களையே மீண்டும் பரிந்துரை செய்திருக்கிறார்.

சென்னை உயர் நீதிமன்றத்தில் உள்ள 42 நீதிபதிகளில், 50 சதவீதத்திற்கு மேற்பட்டவர்கள் நான்கே நான்கு வகுப்பைச் சார்ந்த முற்பட்ட வகுப்பினர் உள்ளனர். ஆனால் 22 சதவீதமுள்ள SC/ST வகுப்பினர் வெறும் 3 பேர் மட்டுமே உள்ளனர் ( பதவி உயர்வு மூலம் உயர் நீதிமன்ற நீதிபதிகளாக வந்தவர்களை கணக்கில் கொள்ளக்கூடாது. மேலும் தற்போதுள்ள மூன்று பேரில் நீதிபதி தனபாலன் அவர்களுடைய பதவிக்காலம் ஓரிரு மாதங்களில் நிறைவடைய உள்ளது என்பது குறிப்பிடத்தக்கது). அதேபோல பெரும்பான்மை சமூகங்களான மிகவும் பிற்படுத்தப்பட்ட மற்றும் பிற்படுத்தப்பட்டவர்களின் நிலையும் இவ்வாறுதான் உள்ளது. இசுலாமியர்களிலும், கிறிஸ்துவர்களிலும் ஒருவர் கூட இல்லை. பெண்களுக்கான பிரதிநிதிகள் குறைவாகவே உள்ளனர். ஆனால் 1% சதவீதம் மட்டுமே உள்ள பார்ப்பன சமூகத்தைச் சேர்ந்தவர்கள் 7 பேரும், பார்ப்பனருக்கு அடுத்த நிலையிலுள்ள, மிகவும் குறைவான சதவிகிதமுள்ள மிகவும் முற்பட்ட வகுப்பைச் சேர்ந்தவர்கள் 6 பேர், 5 பேர் என்ற எண்ணிக்கையிலும் உள்ளனர். ஆனால், மீண்டும் மேற்கண்ட முற்பட்ட வகுப்பினருக்கே வாய்ப்பு வழங்கப்படுகிறது. இந்நிலையில் நியமிக்கப்பட உள்ள 18 பேரில் 5 பார்ப்பனர்களை நியமிப்பதற்கான சீரிய முயற்சியை சென்னை உயர் நீதிமன்ற தலைமை நீதிபதி மேற்கொண்டுள்ளார். அவருக்கு மற்ற பார்ப்பன மற்றும் முற்பட்ட சமூகத்தைச் சேர்ந்த நீதிபதிகள் துணையாக உள்ளனர். வேண்டுமென்றே தலித் உள்ளிட்ட பிற்படுத்தப்பட்ட சமூகங்களைச் சேர்ந்த நீதிபதிகளின் கருத்துகளை தலைமை நீதிபதி புறக்கணிக்கிறார்.

ஆகவே, உயர் நீதித்துறையில் இந்திய அரசியலமைப்புச் சட்டம் வழங்கியுள்ள சமூகநீதியைச் செயல்படுத்தக் கோரியும், நியமனத்தில் வெளிப்படைத் தன்மையை வலியுறுத்தியும், சென்னை உயர் நீதிமன்றத்திற்கு தேர்வு செய்யப்படும் நீதிபதிகள் பட்டியலில் வாய்ப்பு மறுக்கப்பட்ட மற்றும் குறைவான பிரதிநிதித்துவம் உள்ள சமூகங்களுக்கு உரிய பிரதிநிதித்துவம் வழங்க வேண்டும் உயர்நீதி மன்ற நீதிபதிகள் நியமனத்தில் சமூகநீதியைக் கோருவது தவறல்ல. அதுவே நம் நாட்டில் சனநாயகம் ஆகும்.

Pin It


1. நிலம் கையகப்படுத்தும் சட்டத்தை அதிமுக ஆதரித்தது குறித்து கலைஞரும் ஜெயலலிதாவும் மாறி மாறி அறிக்கைப் போர் நடத்துவது பற்றி?

ஜெயலலிதா சொத்துக் குவிப்பு வழக்கில் இருந்து விடுபடுவதற்காக நாடாளுமன்றத்தில் நிலம் கையகப்படுத்தும் சட்டத்தை அதிமுக ஆதரிப்பதாக ஊடகங்களும் கருணாநிதி உள்ளிட்ட பல அரசியல் கட்சித் தலைவர்களும் கருத்து சொல்லி வருகின்றனர். இதில் எந்தளவுக்கு உண்மை இருக்கிறது என்பதை வழக்கினுடைய மேல் முறையீட்டுத் தீர்ப்பைப் பொருத்துத்தான் நாம் உறுதிப்படுத்த முடியும். ஆனால், கொள்கை அளவிலே கூட அதிமுக இந்த சட்டத்தை ஆதரிப்பதில் எந்த வியப்பும் நமக்கு இல்லை. ஜெயலலிதாவை சாடி விட்டு அன்னா அசாரேவுக்கு ஆதரவு தெரிவித்திருக்கும் கருணாநிதிக்கும்கூட இந்த அவசர சட்டத்தில் கொள்கை அளவில் மாறுபாடு இருக்க வாய்ப்பில்லை. ஏனென்று சொன்னால், விவசாயிகளிடம் இருந்து நிலத்தைக் கையகப்படுத்தி பெருமுதலாளிகளுக்கும் சிறப்புப் பொருளாதார மண்டலங்களுக்கும் வழங்குவதில் மற்ற மாநிலங்களுக்கு முன்னுதாரணமாக செயல்பட்டவர்கள்தான் இரு கழகத்தின் தலைவர்களும் அவர்தம் ஆட்சிகளும்.

நில வள வங்கியை உருவாக்கி நிறைய நிலங்களைக் கையகப்படுத்தி வைத்திருக்கின்றது தமிழக அரசு. விவசாயம் சாராத பயன்பாட்டிற்காகப் பல இலட்சம் ஏக்கர் விவசாய நிலங்களைத் ’தரிசு நிலம்’ என்ற பெயரில் மாற்றியவர்களும் இவர்களே. நந்திகிராம் போல நிலத்திற்கான போராட்டம் பெரிய அளவில் தமிழகத்தில் எழாததற்கு ஆயிரக்கணக்கான ஏக்கர் நிலங்களை நிலவள வங்கியில் வைத்து பன்னாட்டு நிறுவனங்களுக்கு அளிப்பதுகூட ஒரு காரணம். 1,70,000 ஏக்கர் வளமான தஞ்சை நிலம் மீத்தேன் திட்டத்திற்கு ஒதுக்கும் போது புரிந்துணர்வு ஒப்பந்தத்தில் கையெழுத்திட்டது, ஐம்பதிற்கும் மேற்பட்ட அனல்மின் நிலையங்களுக்கும் சிறு துறைமுகங்களுக்கும் புரிந்துணர்வு ஒப்பந்தம் போட்டது இந்த இரு கட்சியின் தலைவர்களுமே. அதற்கு நிலத்தைக் கையகப்படுத்திக் கொடுத்தது இரு கட்சிகளின் உள்ளூர் குண்டர்களும் கொள்ளையர்களும்தான்.

உழுதவன் கணக்குப் பார்த்தா உலக்குகூட மிஞ்சாதுங்கிறது பழைய மொழி. இன்று அவன் கோவணத் துண்டு நிலத்தையும் உருவுறதுன்னு முடிவு செஞ்சுறுச்சு இந்த கொள்ளைக் கூட்டம். இதில் அறிக்கைப் போர் வேற.

2. பெங்களூரில் ஐ.ஏ.எஸ். அதிகாரி ரவி கொலை செய்யப்பட்டது எதை காட்டுகிறது?

சகாயம் ஐ.ஏ.எஸ். அதிகாரிக்கு கொலை மிரட்டல் தொடர்ந்து வருகிறது. வேளாண் துறை அதிகாரி முத்துக்குமாரசாமி அதிமுக அமைச்சர் அக்ரி. கிருஷ்ணமூர்த்தியால் மிரட்டப்பட்டு தற்கொலைக்கு தள்ளப்பட்டார். மணல் மாஃபியாக்கள் வருவாய் துறை அதிகாரிகள் பலரை லாரியால் ஏற்றி கொலை செய்துள்ளனர். சத்யேந்திர துபே என்ற நெடுஞ்சாலை துறை அதிகாரி பீகாரில் கொடூரமாக கொலை செய்யப்பட்டார். இவை அனைத்தும் சமீபகாலமாக அதிகார வர்க்கத்தில் நேர்மைக்குப் பெயர் போன அதிகாரிகள் எவ்வாறு கிரிமினல் மயமான அரசியல் மாஃபியாக்களால் நடத்தப் படுகிறார்கள் என்பதை வெட்ட வெளிச்சமாகக் காட்டுகிறது. இது மட்டுமின்றி கர்நாடகாவில் ரெட்டி சகோதரர்கள், தமிழகத்தில் தாது மணல் கொள்ளையன் வைகுண்டராஜன், கிரானைட் கொள்ளையன் பி.ஆர்.பழனிச்சாமி, ஆற்று மணல் கொள்ளையன் ஆறுமுகச்சாமி போன்றோரெல்லாம் ஒரு நிழல் அரசாங்கத்தை நடத்திக் கொண்டிருக்கிறார்கள்.

இந்த நிழல் அரசாங்கத்தில் தலையிடுகின்ற யாவருமே கொல்லப்படுகின்றனர். இதில் அதிகாரிகளும் ஒருவகைப் பிரிவினர். நடுத்தர வர்க்க மனப்பான்மையோடு, தான் நல்லது செய்தால் நாட்டை மாற்றிவிட முடியும் என்று நம்புகின்ற இவர்களால் நாட்டின் உண்மையான அரசியல் பொருளாதாரம், நிர்வாகம் இந்த கொள்ளையர்களால்தான் நடத்தப்படுகிறது என்ற அரசியல் சூட்சமத்தைப் புரிந்து கொள்ள முடியவில்லை. உலகமயப் பொருளாதாரக் கொள்கையில் பயனடையும் பெரும்பிரிவினரின் மூலதனத் திரட்டலுக்கான அடிப்படையே நாட்டின் பொதுச் சொத்தையும் இயற்கை வளத்தையும் கொள்ளை அடிப்பதுதான். இதற்கு உடன்படிக்கையான ஓர் அரசியல்தான் கார்ப்பரேட் மயமான கிரிமினல் மயமான மாஃபியா அரசியல். இதை வழிநடத்துபவர்கள் மூன்று முக்கியப் பிரிவினர் - பெரும் கார்ப்பரேட் நிறுவனங்கள், ஊழல் ஆளும் வர்க்க அரசியல்வாதிகள், அதிகார வர்க்கம். இவர்களை எதிர்த்துப் போராடுவதன் ஊடாகத்தான் இது போன்ற கொலகளைத் தடுத்து நிறுத்த முடியும். நாட்டின் பொருளாதாரத்தையும் இந்த கிரிமினல் கூட்டத்திடம் இருந்து மீட்க முடியும்.

3. ”இந்தியாவின் மகள்” ஆவணப்படத்தைத் தடை செய்தது பற்றி?

நிர்பயாவின்(பயமற்றவள்) மீது ஆணாதிக்கத்தின் கோழைத்தனமான ஒரு கூட்டு வன்முறை, சிதைக்கப்பட்ட குற்றுயிரும் குலை உயிருமான அந்த உடலும் ஆன்மாவும் தட்டி எழுப்பிய ஆயிரக்கணக்கான மக்களின் கோப உணர்வு தில்லி அதிகார வர்க்கத்தின் மீது பெரும் புயலாய் வீசி சென்றது. அந்த வன்முறை சமூகத்தின் மீது உண்டாக்கிய அச்ச உணர்வு பற்றியோ சனநாயக உணர்வு கொண்ட மக்களின் கோபம் பற்றியோ அக்கறை கொள்ளாத அரசுகள் குறிப்பாக காவி கட்சி இந்தப் படத்தைத் தடை செய்வது குறித்து அவமான உணர்வோடு ஓர் அவசரத்தைக் காட்டியது. அந்த வன்முறை இச்சமூகத்தைப் படம்பிடித்துக் காட்டியதைவிட இக்குற்றவாளிகள் சொல்லுகின்ற குற்றத்திற்கான நியாயக் கூற்றுகள் இந்துச் சாதிய சமூகத்தின் அவமானகரமான ஆணாதிக்கத் தர்க்கத்தை நிர்வாணமாகத் திரையிட்டது, தாங்கள் பல சமயத்தில் நாடாளுமன்றத்திலும் அரசியல் கூட்டங்களிலும் பேசியதையே இக்குற்றவாளிகள் எளிமையான வார்த்தைகளில் கதையாக சொல்லியிருக்கிறார்களே என்று இந்துத்துவ சக்திகளைக் கலக்கம் அடையச் செய்தது.

இன்னொருபுறம், தில்லிப் போராட்டத்தில் பங்கேற்றவர்களும் சனநாயக சக்திகளும் ஆவணப் படத்தில் பேட்டி கொடுத்திருந்த கவிதா கிருஷ்ணன் போன்ற இடதுசாரித் தலைவர்களும் இப்படம் குறித்து தங்கள் விமர்சனங்களைப் பதிவு செய்துள்ளனர். மேற்கத்திய ஊடகங்கள் இது பற்றி பரபரப்பாக பேசினாலும் இந்த வன்முறைகளுக்கு பின்னணியில் உள்ள சாதி, மத, வர்க்க, உலகமயச் சிக்கல்கள் பற்றிய அவர்களுக்குப் போதிய புரிதல் இல்லை, திகார் சிறைக்குள் சென்று குற்றவாளியிடம் பேட்டி எடுக்க ஆவணப்படத்தின் இயக்குனர் லெஸ்லி உட்வினுக்கு எப்படி அனுமதி கிடைத்தது?, அடித்தட்டு மக்களுடைய சேரி வாழ்க்கையின் நெருக்கடிகளை இந்த பாலியல் வன்முறைக்கான காரணம் போல் காட்டுவது போன்ற சில கேள்விகளை எழுப்பியுள்ளனர். இவற்றின் நியாயத்தை நாம் கவனத்தில் கொள்ள வேண்டி இருக்கிறது.

4. தமிழகத்தில் சட்டம், ஒழுங்கு, அமைதி நிலை பெற,காப்பாற்றப்பட ஒரு பெரும் புரட்சி தேவை என திமுக தலைவர் கலைஞர் கூறியிருப்பது பற்றி?

அதிமுக அமைச்சர்களின் அதிகாரிகளின் மீதான அச்சுறுத்தல்கள் , கொலை , கொள்ளைப் பாலியல் வன்முறை போன்ற சம்பவங்களில் பதிவான குற்றங்களின் எண்ணிக்கையைக் காரணம் காட்டி வழக்கம் போல் சட்டம் ஒழுங்கு பிரச்சனையைக் கிளப்பியிருக்கிறார் கருணாநிதி. உண்மைதான். ஆனால், இதை மாற்ற புரட்சி தேவை என்று அவர் கூறியிருப்பதைப் பார்த்தால் புரட்சி என்றால் ’புய்பம்’ என்று அவர் கருதுகிறாரோ என்று படுகிறது.

மத்திய பா.ச.க. அரசின் பாசிச ஆட்சியும் இந்திய ஆளும் வர்க்கத்திற்கு பல்லக்குத் தூக்கிக் கொண்டிருக்கும் தி.மு.க., அ.தி.மு.க. ஆகிய இரண்டு தரப்பும்தான் இன்று நிலவும் அனைத்துப் பிரச்சனைகளுக்கும் காரணம். டாஸ்மாக், ஊழல், சாதி மத வெறிப் பாசிசம், உலகமயம் – இயற்கை வளக் கொள்ளை, மாநில உரிமைப் பறிப்பு என்ற தமிழகத்தைச் சூழ்ந்துள்ள ஐந்து தீமைகளுக்கும் இவ்விரண்டு கட்சிகளும் பொறுப்பாகும் இவ்விரண்டு தரப்பும் மக்கள் ஆதரவை இழந்து வரும் வேளையில் ’எரிகிற கொள்ளியில் எந்தக் கொள்ளியைக் கொண்டு தலை சொரிவது என்ற பழைய கதை உதவாது. உண்மையான புரட்சி என்பது தி.மு.க., அ.தி.மு.க. ஆகிய இரண்டு கட்சிகளையும் அப்புறப்படுத்துவதுதான் என்று மக்களிடம் நாம் கொண்டு சொல்ல வேண்டும்.

Pin It

மஸ்ரத் ஆலம் காசுமீர் விடுதலைக்காக போராடிவரும் முஸ்லிம் லீக்கின் தலைவர்களில் ஒருவர், 2010 ஆம் ஆண்டு மக்களின் தன்னெழுச்சியான கல்லெறி போராட்டங்கள் நடைபெற்ற பொழுது, அதை தூண்டி விடுகின்றார் என்ற குற்றச்சாட்டின் அடிப்படையில் "பொது பாதுகாப்புச் சட்டத்தின்" (Public Security Act) கீழ் கைது செய்யப்பட்டு சிறையிலடைக்கப்பட்டவர், அதன் பின்னர் அதாவது அவர் சிறையில் இருந்து பொழுது அவர் மேல் இது வரை 14 முறை பல வழக்குகள் பதிவு செய்துள்ளது காசுமீர் அரசு. அதில் பல பொது பாதுகாப்புச் சட்டத்தின் கீழ் வருகின்றன.

masrath aalam"பொது பாதுகாப்புச் சட்டம்" என்பது நம்மூர் "தடா", "பொடா" போன்ற அடக்குமுறைச் சட்டத்தின் வழிவந்த சட்டமாகும். இந்த சட்டத்தின்கீழ் குற்றம் சாட்ட எந்தவொரு ஆதாரமும் தேவையில்லை, ஒருவர் வெளியில் இருந்தால் சட்டம் ஒழுங்கு சீர்குலையும் என்பது போன்ற வெறும் அனுமானத்தின் அடிப்படையிலேயே கைது செய்ய முடியும். இப்படித் தான் மஸ்ரத் ஆலமும் கைது செய்யப்பட்டார். இப்படி கைது செய்யப்படுபவர்களை ஆறு மாத காலம் மட்டுமே சிறையில் வைத்திருக்க முடியும், மேலும் ஒருவர் மேல் இரண்டு முறை தான் இச்சட்டம் பிரயோகப்படுத்த முடியும். ஆனால் மஸ்ரத் ஆலம் மீது பலமுறை இந்த சட்டத்தைப் பயன்படுத்தி விதி மீறல்களில் ஈடுபட்டுள்ளது காசுமீர் அரசு.

2010 ஆம் ஆண்டு ஏப்ரல் 30 அன்று மூன்று பாகிசுதான் தீவிரவாதிகளைக் கொன்று விட்டதாக இராணுவம் கூறியது, பின்னர் நடந்த விசாரணையில் குப்வாரா மாவட்டத்தில் வாழ்ந்த காசுமீரி இளைஞர்களை ”வேலை தருகின்றோம்” என ஏமாற்றி அழைத்துச் சென்று சுட்டுக்கொல்வது தெரிய வந்தது, இதனையடுத்து இராணுவத்தைக் காசுமீரைவிட்டு வெளியேறிக்கோரி இளைஞர்கள் பெரும்போராட்டங்களை முன்னெடுத்தார்கள். இப்போராட்டங்களில் பங்கெடுக்கும் இளைஞர்களை இராணுவம் சுட்டுக்கொல்ல போராட்டம் பற்றி எரிந்தது. போராட்டத்திற்கு காரணமான போலி மோதல் கொலைகளையும், இராணுவத்தின் அத்துமீறல்களையும் தடுப்பதை விட்டு, போராடும் மக்களின் மீது அடக்குமுறையை ஏவியது அரசு. இராணுவம் சுட்டுக்கொன்றதில் 110 பொது மக்கள் கொல்லப்பட்டனர், இதில் பெரும்பாலும் சிறுவர்களும், இளைஞர்களுமாவர். தங்களது பதவி உயர்வுக்காக போலி மோதல்கள் மூலம் மக்களைக் கொல்வது என்பது காசுமீரில் உள்ள இராணுவமும், காவல்துறையும் அரங்கேற்றும் செயல் என்பது ஊரறிந்த உண்மை, இதற்கெதிரான மக்கள் போராட்டத்தை மஸ்ரத் ஆலம் போன்றோர் தூண்டுவிடுகின்றார்கள் என பொய்க் குற்றம் சாட்டி தான் அரசு சிறையில் அடைத்தது. இங்கு ஈழ ஆதரவு போராட்டங்கள் நடைபெறும் பொழுது ஈழ ஆதரவு தலைவர்களைச் சிறையில் அடைப்பது போன்று தான் இந்த நிகழ்வும்.

மஸ்ரத் ஆலம் தன் மீது குற்றம் சாட்டப்பட்ட அனைத்து வழக்குகளிலிருந்தும் நீதிமன்றத்திலிருந்து பிணை பெற்ற பின்னர்தான் விடுவிக்கப்பட்டாரே அன்றி, சட்டத்திற்கு புறம்பான வழிகளில் அல்ல. இந்த நேரத்தில் காசுமீர் அரசை 370ஆவது சட்ட பிரிவைப் பயன்படுத்தி கலைக்க வேண்டும் என அதிமுக உறுப்பினர்கள் தங்கள் பாசிச, சர்வாதிகார முகத்தை வெளிக்காட்டியுள்ளனர். மஸ்ரத் ஆலம் விடுவிக்கப்பட்டதை வைத்து ஆடிய நாடகத்தின் மூலம் அப்பொழுது நாடாளுமன்றத்தில் விவாதிக்கப்பட்டு வந்த ’நிலம் கையகப்படுத்தல்’ மசோதாவை மறக்க வைத்தது பா.ச.க. காசுமீரில் தனது பலத்தை அதிகரித்துக் கொள்ள இதைப்பயன்படுத்தியது ஆளும் மக்கள் சனநாயகக் கட்சி.. மொத்தத்தில் மஸ்ரத் ஆலம் விடுதலை மூலம் மக்கள் சனநாயக கட்சியும் சரி, பா.ச.க.வும் சரி அவர்களது நலன்களைப் பாதுகாத்துக் கொண்டார்கள் என்பது உண்மை. அதே நேரத்தில் மஸ்ரத் ஆலம் சிறையில் இருந்து வெளியில் வந்தது காஷ்மீரிகளுக்கு சற்றே ஆறுதல் தருவதாகும். கூஜா தூக்கி அ.தி.மு.க. நாடாளுமன்ற உறுப்பினர்கள் ஆளும் வர்க்கத்தின் அடிவருடியப் படி அடிமை கீதம் பாடினாலும் தமிழ்நாட்டில் மட்டுமின்றி நாடெங்கும் உள்ள விடுதலை உணர்வு கொண்டோர் மஸ்ரத் ஆலமை உளப் பூர்வமாய் வரவேற்கிறார்கள்.

Pin It