makkal vidhuthalai logo

தொடர்புக்கு: எண் 40/456, மாதவரம் நெடுஞ்சாலை, மூலக்கடை, சென்னை - 60.
பேசி: 94446 87829, 86809 08330; இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.
தனி இதழ்: ரூ.10, ஆண்டுச் சந்தா ரூ.120

பா.ச.க.வின் வியூகம்

பா.ச.க. வென்றால் அதன் அடை யாளம் அகண்ட பாரதம், இராமர் கோயில், பார்ப்பன பனியா சமூக அடித்தளம் என்பவை பழையக் கதை. வளர்ச்சி, ஊழல் எதிர்ப்பு என்ற முழக்கங்களுடன் காங்கிரசு எதிர்ப்பை அறுவடை செய்த பா.ச.க. ஒவ்வொரு மாநிலமாக கைப்பற்றி நாடெங்கும் காவிக் கொடியை நாட்டி வருகிறது. உத்தர பிரதேசம், மகாராஷ்டிரம், அரியானா வீழ்ந்துவிட்டன. கேரளா, அசாம், மேற்கு வங்கத்திலும் கால் பதிக்கும் என்று ஆரூடங்கள் வருகின்றன. ஒவ்வொரு மாநிலத்திற்கும் ஒரு வியூகம். தமிழ்நாட்டிற்கு என்ன?

இந்திய அளவிலேயே தன் பார்ப்பன பனியா அடையாளத்தை மூடி மறைத்து பிற்படுத்தப்பட்ட அடையாளத்தைக் காட்டி வருகிறது பா.ச.க. அதன் தலைவர் அமித் ஷா பனியாவென்றாலும் பிரதமர் மோடி பிற்படுத்தப்பட்ட சமூகத்தைச் சேர்ந்தவர் என்பதைக் கவனிக்க வேண்டும். தமிழ்நாட்டின் அடையாளம் சமூக நீதி, இட ஓதுக்கீடு, பெயரளவிலானப் பார்ப்பன எதிர்ப்பு, தமிழ் மொழிப்பற்று ஆகியவையாகும். இதை எல்லாம் வைத்துத் தான் கருணாநிதியும், ஜெயலலிதாவும் இன்ன பிற தமிழ்நாட்டவர்களும் கடை நடத்தி வருகிறார்கள். நாம் ஏன் இவற்றைக் கையில் எடுக்கக் கூடாதென்று பா.ச.க. துணிந்து விட்டது.

 அரசமைப்புச் சட்டம் எழுதப்பட்டு 64 ஆண்டுகள் ஆன நிலையில் இட ஒதுக்கீட்டை ஆதரிப்பதாக ஆர்.எஸ்.எஸ். தலைவர் மோகன் பகவத் சொன்னார். உடனே, திராவிடர் கழகத்தின் தலைவர் கி.வீரமணி பாராட்டி அகம் மகிழ்ந்தார். அரசு துறையில் தான் இன்று இட ஒதுக்கீடு அமலில் இருக்கிறது. அரசு துறையோ கழுதை தேய்ந்து கட்டெறுப்பான கதையாக நாளுக்கு நாள் தேய்ந்து வருகிறது. தனியார் துறைதான் இன்று வளர்ந்து வருகிறது. தனியார் துறைகளில் இட ஒதுக்கீடு இல்லாமல் அரசு துறையில் மட்டும் இட ஒதுக்கீடு இருப்பதால் பிற்படுத்தப்பட்ட, தாழ்த்தப்பட்ட மக்களுக்கு குறிப்பிடும்படியான பயன் ஒன்றும் இல்லை. இதை ஆர்.எஸ்.எஸ். நன்கு உணர்ந்திருப்பதால் ’மனமிறங்கி’ இப்போது அரசு துறையில் மட்டும் நடைமுறையில் இருக்கும் இட ஒதுக்கீட்டை ஏற்பதாகச் சொல்லியுள்ளது. கிட்டதட்ட காதில் பூ சுற்றும் கதைதான்.

அடுத்து, தமிழக பா.ச.க. வின் தலைவராக தமிழிசை சவுந்தர்ராஜனைக் கொண்டு வந்திருப்பதாகும். முன்பு பா.ச.க. வின் தமிழக முகமாக இருந்தவர் இல. கணேசன் அவர்கள். அவரை மெல்லப் பின்னுக்கு தள்ளி பொன். இராதாகிருஷ்ணனும், தமிழிசையும் பா.ச.க வின் முகமாகியுள்ளனர். வேலூர் தொகுதியில் போட்டியிட விரும்பிய தமிழிசையின் ஆசையில் மண்ணைப் போட்டார் புதிய நீதிக் கட்சியின் ஏ.சி. சண்முகம். அவர் கொடுத்த பெருந்தொகைக்கு கைமாறாய் வேலூரில் போட்டியிடும் வாய்ப்பை பெற்றார். அதற்கு பதிலீடாகத்தான் தமிழிசைக்கு தலைவர் பதவி. மொத்தத்தில் பா.ச.க. வின் நோக்கம் தனக்கொரு பிற்படுத்தபட்ட சமூக அடையாளத்தைக் காட்டுவதுதான். எனவே, பழைய பாணியில் பா.ச.க. எதிர்ப்பையும் பார்ப்பன எதிர்ப்பையும் சமப்படுத்தி அரசியல் செய்யும் போக்கைத் தடுத்துவிட்டனர். இதை குழப்பும் வேலையை அவ்வப்போது சுப்பிரமணிய சுவாமி செய்தாலும் அவர் வாயை அடைக்கும் வேலையை மெல்ல மெல்ல பா.ச.க. செய்யும்.

அடுத்து பா.ச.க. கையிலெடுத்திருப்பது இந்துப் பெருமிதத்திற்கு மாறாகத் தமிழ் பெருமிதத்தை ‘‘வெளிமாநிலங்களில் நாங்கள் பூஜ்யத்திலிருந்து ஆரம்பித்து ஆட்சியதிகாரம் வரை சென்று விட்டோம். தமிழகத்தில் தேசிய எதிர்ப்பு, இந்தி எதிர்ப்பு, இந்து எதிர்ப்பு, பிராமண எதிர்ப்பு என நிறைய மாயையான விஷயங்கள் இருந்தன. இதனால் எங்களை வடநாட்டு கட்சியாகவே பார்த்தார்கள். அதனால் நாங்கள் மைனஸிலிருந்து ஆரம்பித்து தற்போதுதான் பூஜ்யத்துக்கு வந்துள்ளோம். மக்களுக்கு இப்போதுதான் எங்கள் மீது நம்பிக்கை ஏற்பட்டுள்ளது. எனவே இனி எங்கள் கட்சி தமிழகத்தில் வளரும்.” என்று நம்பிக்கை தெரிவித்துள்ள இல.கணேசன், ஒருபக்கம் சமஸ்கிருத வாரத்தைக் கொண்டாடிக் கொண்டே மறுபக்கம் தமிழ் புத்தாண்டில் (தை மாதமல்ல, சித்திரை மாதத்தில்) தமிழ் மொழி வாரம் கொண்டாட வேண்டும் என்று மத்திய அரசுக்கு மனு போடுகிறார். தருண் விஜய் தமிழ் மொழிக்காக மோடியிடம் பேசுகிறார். வடநாட்டுக்காரரின் தமிழ்ப் பற்றைப் பார்த்து பரவசத்தில் இருக்கிறது மொழிப் பற்றாளர்கள். வைரமுத்து தருண் விஜய்க்குப் பாராட்டு விழாவே எடுத்துவிட்டார்.

நாடெங்கும் ஆர்.எஸ்.எஸ்ஸின் 90 ஆம் ஆண்டு விழாவைக் கொண்டாடிய ஆர்.எஸ்.எஸ் காரர்கள் தமிழ்நாட்டில் இராஜேந்திர சோழனின் 1000வது முடிசூடிய ஆண்டு விழாவையொட்டி பேரணி நடத்துவதாகச் சொல்கிறார்கள். மராட்டியத்திற்கு ஒரு சிவாஜி, தமிழ்நாட்டிற்கு ‘இராஜேந்திர சோழன். ஆர்.எஸ்.எஸ்ஸுக்கு அவுரங்கசிப்பும், அக்பருக்கும், ஹுமாயுனும்தான் பிரச்சனை. இராஜ இராஜ சோழனும், இராஜேந்திரனும், பண்டார வன்னியனும் பிரச்சனையில்லை. தமிழ் மன்னரைப் போற்றி தெலுங்கு மன்னரைத் தூற்றி வடுகர் எதிர்ப்பு அரசியல் பேசுவோர்க்கும், சோழர் பரம்பரை என்று பெருமை பேசும் தமிழ்நாட்டு மன்னர் தேசியவாதிகளுக்கும் வேட்டு வைத்தது ஆர்.எஸ்.எஸ். கருணாநிதிக்கு கை கொடுத்த சோழன் நமக்கும் கை கொடுப்பான் என்று புரிந்துவிட்டது போலும்.

பா.ச.க. கண்ணி வைத்து முன்னேறி வருகிறது. புதைந்துப் போன மன்னர்களின் வரலாற்றுக்குள்ளும் மொழிப் பெருமை அரசியலுக்குள்ளும் தலையைவிட்டு மாட்டிக் கொண்டுள்ளவர்களுக்கு பா.ச.க. பொறி வைத்துவிட்டது. சமஸ்கிருதத்தையும், அகண்ட பாரதத்தையும், தமிழையும், இராஜேந்திர சோழனையும், உலகமயத்தையும் ஒரு வரிசையில் நிறுத்தும் இரசவாதத்தைப் பயின்று வருகிறது. அதானியையும், சங்கரச்சாரியாரையும், கமலஹாசனையும், அமீர்கானையும், சசி தரூரையும், சச்சினையும் ஒரு வரிசையில் நிறுத்திவிட்டார்கள் தானே!

பாரதத்தின் பெருமைகளில் தமிழ் மொழியும் ஒன்றென்று சொல்லிக் கொண்டு மோடியும், பொன்னாரும், தமிழிசையும், தருண் விஜய்யும் தேர்தலின் போது படையெடுத்து வந்து தமிழர் நெற்றியில் பட்டை நாமம் போடுவார்கள். பா.ச.க. வின் தமிழ்நாட்டு வியூகத்தில் தமிழ் பெருமிதத்திற்கு ஓர் இடமுண்டு.

மொழிப் பற்றாளர்கள் விழித்து கொள்ள வேண்டும். மக்கள் பற்றோடு மொழிப் பற்றையும் இணைக்கும் இரசவாதம் தான் பா.ச.க. வின் வியூகத்தை முறியடிக்க முடியும்.

Pin It

கேள்வி பதில்

செயலலிதா ஊழல் வழக்கில் தண்டனை பெற்று இரண்டு மாதமாகி விட்டது. ஆனாலும் தமிழக அரசு அலுவலகங்களில் செயலலிதாவின் படம் தான் உள்ளது. தற்போதைய முதல்வர் ஓ. பன்னீர் செல்வத்தின் படம் எங்கும் இல்லை. ஏனைய கட்சிகள் இதைக் கேள்விக்குட்படுத்தாதது ஏன்?

தமிழக அரசின் செய்தி மக்கள் தொடர்புத் துறையின் தமிழரசு இதழ் செப்டம்பர் வரை தான் இணைய அலமாரியில் உள்ளது. செப் 27 தண்டனைக்குப் பிறகு அக்டோபர், நவம்பர் இதழ்கள் இல்லை. சென்னை கோட்டையில் முதலமைச்சர் பெயர்ப்பலகை மாற்றப்படவில்லை. அரசு அலுவலகங்களில் முன்னாள் முதல்வர் எனும் வகையில் படம் இருக்கிறது என்றால் முன்னாள் முதல்வர்கள் படம் அனைத்தும் இருக்க வேண்டும். முதலமைச்சர் படம் இருக்க வேண்டிய இடத்தில் தற்போதைய முதல்வர் ஓ. பி. எஸ் படம் உடனடியாக மாற்றப்பட்டிருக்க வேண்டும். ஆனால் இல்லை. உத்தரவு வந்தால் அரசு அலுவலகங்களில் உடனடியாக படம் மாற்றப்படும். யார் முதலமைச்சராக வந்தாலும் செயல்பட வேண்டிய தலைமைச் செயலாளர்கள் உள்ளிட்ட ஆட்சிப்பணி அதிகாரிகளிடம் அடிமை மனோபாவம், விசுவாசம் மண்டிக்கிடக்கிறது. ஆட்சிக்கு வருகிற தலைவர்களுக்கு கோடிகளுக்கான ஊழல் வாய்ப்புகளை உருவாக்கித் தருவதில் முதன்மையானவர்கள் இந்த உயர்மட்ட அதிகார வர்க்கத்தினரே. தொடர்ந்து ஆட்சியிலிருக்கும் கட்சி என்பதால் அவர்கள் தங்களது வாலை ஆட்டிக் கொண்டு போயஸ்கார்டனுக்கு அடிமை சேவகம் செய்கின்றனர். இந்திய ஆட்சிப் பணியின் அடிமை மகத்துவம் வெளிப்படையாகத் தெரிகிறது. அதிகாரி சகாயம் போன்றவர்களை விதிவிலக்காகச் சொல்லலாம்.

ஏனைய கட்சிகள் தி.மு.க, தே.மு.தி.க, பா.ம.க, காங்கிரஸ், பி.ஜே.பி, ம.தி.மு.க, வலது, இடது கட்சிகள் என பட்டியல் நீளமாக இருந்தாலும் தமிழகத்தில் முதுகெலும்புள்ள, துணிச்சல் உள்ள எதிர்க்கட்சி என ஒன்று இல்லை. வெற்றிடமே உள்ளது என்பது வெளிப்படையாகத் தெரிகிறது. அரசியல் சட்டத்தை வடிவமைத்த அறிஞர் அம்பேத்கர் படத்தை வைக்க தமிழகத்தின் பல்வேறு ஒன்றிய, வட்ட அலுவலகங்களில் அரசியல் முன்னணிகள் போராடிக் கொண்டுள்ளனர். சமீபத்தில் திருவாரூர் நகராட்சியில் பல்வேறு இயக்கங்களின் போராட்ட முயற்சியால் தற்போதுதான் அவரது படம் மாட்டப்பட்டுள்ளது. மதுரை மாவட்டம் உசிலம் பட்டி நகராட்சியில் உள்ள கோட்டாட்சியர் அலுவலகத்தில் 6 மாதத்திற்கு முன்புதான் அறிஞர் அம்பேத்கார் படம் வைக்கப்பட்டுள்ளது. பணவெறி, சாதி வெறிக்கு அடிமையாவ தால், அதிகார வெறிக்கு அடிபணியும் புத்திதான் உள்ளது. அண்ணல் அம்பேத்கர் படத்தை வைக்க இயக்கங்கள் போராடுவது போல ஊழல் ராணியின் படத்தை எடுக்க, போராடும் இயக்கங்கள்தான் முயற்சியை முன்னெடுக்க வேண்டும்.

கத்தி படம் எடுத்த நிறுவனம் கொலைகார இராஜபக்சேவுக்கு நெருக்கமானது என்றால் அதை நேரடியாக எதிர்க்காமல் திரையரங்கைத் தாக்குவது, படத்தில் நடித்த நடிகருக்கு எதிராகப் போராடுவது சமூகத்தில் என்ன தாக்கத்தை ஏற்படுத்தும்?

சென்னை தவிர தமிழகத்தின் பல இடங்களில் கத்தி படத்திற்கு எதிர்ப்பு இருந்தது தெரியவில்லை. முகநூல் மற்றும் செய்தி ஊடகத்துடன் உயிரோட்ட முள்ள தொடர்பு வைத்திருந்தவர்களுக்கு மட்டுமே கத்தி படத்தைத் தயாரித்த லைக்கா நிறுவனத்தை எதிர்த்துதான் சென்னையில் போராட்டம் நடந்தது என்பது தெரியும். யார் இந்த லைக்கா? லைக்கா மொபைல்ஸ் நிறுவனத்தின் உரிமையாளர் சுபாஸ்கரன் எனும் ஈழத்தமிழன். ஐரோப்பிய நாடுகளில் மிகப் பெரிய அளவில் வளர்ந்துள்ள முதலாளி. இனப்படுகொலையாளன் இராஜபக்சேவுக்கு நெருக்கமானவர். புலம்பெயர்ந்த தமிழர்கள் மத்தியில் இவரை ஆதரிப்பவர்களும் உண்டு. எதிர்ப்பவர்களும் உண்டு. தமிழகத் திரையுலகத்தில் காலூன்றுவதற்காக முருகதாஸ் இயக்கத்தில், விஜய் நடிப்பில் லைக்கா நிறுவனம் தனது முயற்சியை கத்தி படம் மூலம் தொடங்கியது. தமிழ்நாட்டு இயக்குநர்களுக்கு பணம் போடுபவன் எவனாக இருந்தால் என்ன? பன்னாட்டு கார்ப்பரேட் ஆதிக்கத்துக்கு அடிபணிந்து சலாம் போடும் மனோநிலைதான் உள்ளது.

தென் மாவட்டங்களிலிருந்து பெருமளவில் வட்டிக்கு விடுபவர்கள், வடமாநிலத் தயாரிப்பாளர்கள், கார்ப்பரேட்டுகள் என தமிழ்த் திரையுலகம் கோடிக்கணக்கான கோடிகளில் மிதக்கிறது. கத்தி திரைப்படம் தடைபடுவதால் இயக்குனருக்கோ, நடிகர்களுக்கோ என்ன இழப்பு? தயாரிப்பு நிறுவனத்துக்குத்தான் இழப்பு. தமிழ்த்திரையுலக ரசிகர்கள் மத்தியில் செல்வாக்குச் செலுத்த அனுமதித்தால் வருங்காலத்தில் இராஜபக்சேவுக்கு ஆதரவான செயல்பாடுகளுக்கு லைக்கா நிறுவனம் முயற்சிக்காதா? அதனால்தான் இந்த எதிர்ப்பு. தமிழக அமைப்புகளின் எதிர்ப்பு லைக்கா தயாரிப்பு நிறுவனத்துக்கான எதிர்ப்பு. அரங்கில் எதிர்ப்பாளர்கள் தாக்கப்படும்போது மேடையிலிருந்தும் தடுக்காத, கண்டிக்காத இயக்குனர், நடிகர் தமிழகத்தின் தலைவராக நினைப்பது நகை முரணே. நடிகர் விஜய் ரசிகர்களைத் தூண்டிவிடுவதும், இயக்குனர் முருகதாஸ் தனது சாதியப் பின்புலத்தைப் பேசி போராடும் இயக்கங்களைத் தரக்குறைவாகப் பேசியதும் வன்மையாகக் கண்டிக்கத்தக்கது.

எந்தவொரு திரைப்படைப்பையும் எதிர்க்க, விமர்சிக்க பார்வையாளர்களுக்கு உரிமை உண்டு. நான் நாட்டை விட்டு போயிடுவேன் என கமல் சொன்னதும், முருகதாஸ் சொல்வதும் நகைப்பிற்குரியது. போறதுன்னா போக வேண்டியதுதானே! அதற்காக திரையரங்கைத் தாக்குவது சரியானது இல்லை. லைக்கா தயாரிப்பில், லைக்கா இலாபமடைய, லைக்கா அடையாளமில்லாமல் கத்தி திரைப்படத்தை வெளியிட சமரசமானது மிகப்பெரிய நகைச்சுவை. படத்தில் கோலா கம்பெனியை எதிர்ப்பது, கோலா கம்பெனியின் அடையாளமாக விளம்பரத்தில் நடிப்பது என இரட்டை வேடம் போடாதே என நடிகர் விஜய்க்கு எதிராகப் போராடினால் சரியானது. ஒரு நடிகர் கதாநாயகனாக, வில்லனாக, சிரிப்பு நடகனாக, குணச்சித்திர நடிகனாக என இயக்குனரின், கதையின் தேவைக்காக நடிப்பதற்கு நாம் எதிரானவர்கள் இல்லை. கோலா நிறுவனத்தின் அம்பாசிடராக கோலா முன்னிறுத்தும் நடிகர் கோலா எதிர்ப்பில் நடிப்பது எதிர்க்கப்பட வேண்டியது அவசியமே. தயாரிப்பு நிறுவனங்கள், இயக்குனர்கள், நடிகர்கள், படைப்புகள என தமிழகப் பார்வையாளர்களுக்கு விமர்சன, எதிர்ப்பு மனோபாவத்தை வளர்த்தெடுக்க வேண்டிய அவசியம் உள்ளது. திரைப்பட மயக்கத்தில் உள்ள தமிழக ரசிகர்களின் மயக்கம் அரசியல் வரை பாதிக்கிறது. தமிழக திரைப்படக் கதாநாயகர்கள் மீதான மயக்கத்திலிருந்து மீள வேண்டிய தேவை உள்ளது.

நிலத்தடி நீர் உரிமை, விவசாயம், கார்ப்பரேட் எதிர்ப்பு, கோலா, மீத்தேன் போன்ற செய்திகளைப் பேசுகிற படம் என்பதால் அவசியம் பாருங்கள். பாராட்டு விழா நடத்தாதீர்கள். விமர்சனக் கூட்டங்கள் நடத்துங்கள்.

தண்ணீர்ப் பிரச்சனைக்காக கர்நாடக, கேரள, ஆந்திராவிற்கு எதிராக போராட்டம் நடத்தும் அமைப்புகள், தமிழகத்தில் பெய்த மழைநீரைத் தேக்க எதையும் செய்யாத தமிழக அரசுக்கு எதிராகத் தீவிரமான போராட்டங்களை முன்னெடுக்காமல் மௌனமாய் இருப்பது, சம்பிரதாயமாக அறிக்கை விடுவதோடு நிறுத்திக் கொள்கிறார்களே ஏன்?

தண்ணீரால் சூழப்பட்டுள்ள நாடுகளைக் கேள்விப்பட்டுள்ளோம். தண்ணீர்ப் பிரச்சனைகளால் சூழப்பட்டுள்ள நாடு தமிழ்நாடுதான். போராடித்தான் தண்ணீர் உரிமையை நிலைநாட்ட வேண்டியுள்ளது. மாறி மாறி ஆட்சியில் அமரும் கட்சிகள் பேச்சுவார்த்தை, நீதிமன்றம் என மாறி மாறி இழுத்தடித்து தற்போதுதான் முல்லை பெரியாறு அணையில் 142 அடி நீர் தேக்க உரிமை பெற்றுள்ளோம். பள்ளிகளில் வரலாறு படிக்கும்போது ஏரி, கண்மாய், குளம் வெட்டினார், மரம் நட்டார் என அரசர்களைப் பற்றி படித்தோம். ஆறுகளின் அகலம் குறைந்துள்ளது. கண்மாய், ஏரி, குளங்களின் மீது எழுப்பப்பட்ட நீதிமன்றங்களின் மீது அமர்ந்து கொண்டு நீதியரசர்கள் நீர்நிலைகள் அழிக்கப்படுவது தவறு என தீர்ப்பு எழுதிக் கொண்டிருக்கிறார்கள். ஆளும் தமிழக அரசோ ஒருபுறம் பெய்யக்கூடிய மழை நீரைச் சேகரித்து வைக்கும் ஏற்பாடுகள் ஏதுமின்றி நிலத்தடி நீர் சேகரிப்புத் திட்டம் என விளம்பரத் திட்டம் அறிவித்து, வீட்டு உரிமையாளர்களை நிர்ப்பந்தித்து வருகிறது. மறுபுறம் பன்னாட்டு குளிர்பான நிறுவனங்கள், குடிநீர் நிறுவனங்கள் நிலத்தடிநீரை வியாபாரப் பண்டமாக்க அனுமதிப்பதுடன், அரசே தண்ணீர் வியாபாரத்தில் ஈடுபட்டு வருகிறது.

பாரம்பரிய நீர்நிலைகளை அழித்து கட்டிடம் கட்டும் அரசு, புதிய நீர்நிலைகளை (கண்ணன்கோட்டை ஏரி) உருவாக்கப் போவதாக நாடகம் நடத்துகிறது. காவிரி, முல்லைப் பெரியார், பாலாறு ஆற்று நீர்உரிமை என தங்கள் அமைப்பு, அரசியல் நலனுக்காகப் போராடுவதுபோல பாவனை செய்யும் ஆண்ட, ஆளத் துடிக்கும் கட்சிகள் தமிழகத்தின் பாரம்பரிய நீர்நிலைகள் பல மாடிக் கட்டிடங்களாகவோ, கழிவுநீர்க் குட்டைகளாகவோ மாற்றப்பட்டு வருகின்றதை எதிர்த்து எதையும் செய்வதில்லை. மேலும் யார் ஆக்கிரமிப்பது, கோடிகளைச் சம்பாரிப்பது என போட்டியில் ஈடுபடுகின்றனர். நிலத்தடி நீர் வற்றி வரும் நிலையில் நீரை வியாபாரப் பண்டமாக, விலை பொருளாக தனியாருக்கு தாரைவார்ப்பதை எதிர்த்தும், பாதுகாக்கப்பட்ட சுகாதாரமான குடிநீருக்காகவும் மக்கள் இயக்கங்கங்களை நடத்த வேண்டிய அவசியம் நம் முன் உள்ளது. காவிரி, முல்லைப் பெரியார், பவானி, பாலாறு நீர் உரிமைக்காகப் போராடுவோம். பெரும்பான்மை நீர்த்தேவையைப் பூர்த்தி செய்யும் தமிழகத்தின் நிலத்தடி நீர், குறையாமல் பாதுகாக்க ஏரி, குளங்கள், கண்மாய், ஆறுகளைப் பாதுகாக்கப் போராடுவோம்! ஆற்று மணல், ஏரி, குளம், கண்மாய் மணலை விற்கும் அடாவடிக் கெதிராகப் போராட வேண்டும்!

கனிமவளப் பிரச்சனை குறித்து சகாயம் அவர்களின் தலைமையிலான குழுவின் நடிவடிக்கையும், அதன் விளைவும் தமிழ்நாட்டில் என்ன பாதிப்பை ஏற்படுத்தும்?

மதுரை மாவட்டம் மேலூரைக் கடந்து செல்பவர்கள் மலைகளை அறுத்துப் போடப்பட்டுள்ள கிரானைட் கற்களைப் பார்த்து வியப்புடன் செல்வது வழக்கம். அனுமதிக்கப்பட்டது எவ்வளவு? கூடுதலாக அறுத்தது எவ்வளவு? அரசு நிறுவனமான டாமின் தமிழ்நாடு கனிமவள நிறுவனத்திற்கு எவ்வளவு கோடி நட்டம் என்பதை ஆய்வறிக்கையில் பார்க்க முடிந்தது. கிரானைட் அதிபர் பி. ஆர். பழனிச்சாமி கைதானார். சிறையில் சொகுசாக இருந்தார். விடுதலையானபின் மீண்டும் தனது செல்வாக்கைக் காட்ட ஆரம்பித்தார். அறிக்கை கொடுத்த அதிகாரி சகாயம் ஆட்சியாளர்களால் தூக்கியடிக்கப்பட்டார். வழக்கறிஞர் டிராபிக் இராமசாமி மனுவால் தற்போது உயர்நீதிமன்றம் அதிகாரி சகாயம் தலைமையிலான குழு, கனிம வளக் கொள்ளையை கண்டுபிடித்து அறிக்கை கொடுக்க உத்தரவிட்டுள்ளது. மதுரை, தர்மபுரி, திருவண்ணாமலை கிரானைட் கொள்ளை, ஆற்று மணல் குவாரிகள், காடுகள் நிலத்தடிநீர், கடலோரத் தாதுமணல் கொள்ளை என தமிழ்நாடு முழுவதும் நடைபெறும் கனிமவளக் கொள்ளை ஆய்வுக்கு நீதிமன்றம் உத்தரவிட்டால் தமிழக அரசு மீண்டும் மதுரை மட்டுமே என குறுக்கி நிறுத்துகிறது. அதிகாரி சகாயம் தனக்கு வழங்கப்பட்ட தீர்ப்பு குறித்து உயர்நீதிமன்றம் தெளிவுபடுத்துமா? என விளக்கம் கேட்டு மனுத் தாக்கல் செய்துள்ளார். அப்படியே அனைத்துக் கொள்ளை ஊழல்களையும் கண்டுபிடித்துக் கொடுத்தால் தமிழகத்தின் கனிவளங்கள் தனியார் கொள்ளைக்கு ஆளாகும் புள்ளி விபரங்களைத் தெரிந்து கொள்ளலாம். ஒரு சிலர் மீண்டும் சிறைக்குப் போய்த் திரும்புவர். இவர்கள் மீதும் துணை போன அதிகாரிகள், அரசியல் தலைவர்கள் மீதும் நடவடிக்கை எடுப்பது யார்? இதே 60 கோடி ஊழல் அரசுதானே. எடுக்குமா? தமிழகத்தின் கனிமவளக் கொள்ளையைத் தடுக்க, சுற்றுச் சூழலைப் பாதுகாக்க, பன்னாட்டு நிறுவனங்களுக்கு எதிராக பாதிக்கப்படும் பகுதிவாரி மக்கள் இயக்கங்களும், தமிழ்நாடு தழுவிய அரசியல் முயற்சிகளும் அவசரத் தேவை.

தமிழக நலனையும், தமிழக காங்கிரஸ்காரர்களின் உணர்வையும் டில்லி ஏற்க மறுத்ததால் தனிக் கட்சி அமைப்பதாக வாசன் தரப்பு சொல்கிறதே உண்மையில் இவர்களுக்கு என்னதான் பிரச்சனை?

காங்கிரஸ் கட்சிதான் பிரச்சனை, இவர்களால் காங்கிரசில் இருக்க முடியாது. காங்கிரசை விட்டுட்டும் இருக்க முடியாது. தமிழ்நாட்டில், இந்தி யாவில் பல்வேறு குழுக்களின் சங்கமமே காங்கிரஸ். காங்கிரஸ் ஆட்சியில் பதவியிலிருந்த தேசியவாத காங்கிரஸ் தலைவர் சரத்பவார் மராட்டியத்தில் பி.ஜே.பி ஆட்சி அமைக்க கை கொடுப்பார். காமராசர் மட்டும்தான் இந்திரா காந்தியுடன் முரண்பட்டு ஸ்தாபன காங்கிரஸ் தொடங்கினார். தேர்தல் கூட்டணி செயலலிதாவுடன் வேண்டாம், கருணாநிதியுடன்தான் என்ற தகராறில் தமிழ் மாநில காங்கிரசைத் தொடங்கினார் கருப்பையா மூப்பனார். அமைதிப்படை எனும் பெயரில் இராசீவ் காந்தி இலங்கைக்கு இந்திய இராணுவத்தை அனுப்பிய போது உடனிருந்தார். ஈழத்தமிழர் படுகொலை செய்யப்பட்டபோது அமைதியாக வேடிக்கை பார்த்தார். தமிழகமே கொந்தளித்த போதும் தமிழக உணர்வை அவர் மதித்ததில்லை.

காங்கிரஸ் த.மா.க எனும் பெயரில் புதுப்பிக்கப்பட்டு கருப்பையா மறைவுக்குப் பின் அவரது மகன் வாசன் முடிவால் மீண்டும் காங்கிரசில் இணைக்கப்பட்டது. ஈ.வே.கே.எஸ் இளங்கோவன், தங்கபாலு, வாசன், சிதம்பரம், ஞானதேசிகன் என ஒவ்வொருவரும் ஒரு காங்கிரஸ். இவர்களின் இணைப்பே தமிழ்நாடு காங்கிரஸ், இவர்களைத் தாண்டி டில்லி சோனியா, இராகுல் காங்கிரஸ் வேறு. கப்பல் போக்குவரத்து அமைச்சர். காங்கிரஸ் கூட்டணி ஆட்சியிலிருக்கும் காலம் வரை பதவியிலிருந்த வாசன் தற்போது தனிக்கட்சி காண்கிறார். 2009 தமிழகமே கொந்தளித்தது. ஈழத்தில் நடந்த முள்ளிவாய்க்கால் இனப்படுகொலை தமிழகத்தில் எதிரொலித்தது. காங்கிரஸ் சோனியாவின் பழிவாங்கல் செயலில் இராசபக்சேவுக்கு இராணுவ ரீதியாகத் துணை நின்ற இந்திய அரசின் அமைச்சராக வலம் வந்தார் வாசன், தமிழக மக்களின் உணர்வுகளுக்கு அப்பன் கருப்பையாவும், மகன் வாசனும் முகம் கொடுத்ததில்லை. காங்கிரசிற்குள் நிலவும் குழுச்சண்டையின் உணர்வுகளையும், வாசன் குழுவினரின் நலன்களையும் வைத்தே தனிக்கட்சி தொடங்குகிறார் வாசன். காங்கிரஸ் இனி எந்தப் பெயரிலும் தமிழகத்தில் உயிர்பெற அனுமதிக்கக் கூடாது. சோனியாவை, டில்லித் தலைமையை விமர்சித்தால் நடவடிக்கை என வாசன் எச்சரித்துள்ளார். கபிஸ்தலம் பண்ணையின் வாரிசு தமிழக மக்கள் உணர்வுகளை என்றுமே மதிக்காது.

இயக்குனர் இரஞ்சித் இயக்கிய ‘மெட்ராஸ்’ திரைப்படம் வழக்கமானதா? புதிய வகையா?

‘மெட்ராஸ்’ அவசியம் பேசப்பட வேண்டிய படம். பார்த்தவுடன் மட்டுமல்லாமல் விமர்சனம் அவசியம், விவாதம் அவசியம். கண்டுகொள்ளாமல் விடப்பட்ட பல படங்கள் போல போய்விடக்கூடாது. மூன்று நாட்கள் மட்டுமே ஓடிய படம். ஆனால் சிறந்த படம் எனும் கருத்துக் கொண்டதுபோல் இல்லை. 80களின் தொடக்கத்தில் வந்த ‘கண் சிவந்தால் மண் சிவக்கும்’ 3 நாட்கள் மட்டுமே ஓடியது. பெரிதாக பேசப்படவில்லை. ஆனால் தனி அரங்குகளில், முற்போக்கு முகாம்களில் இன்றும் தேடக்கூடிய படமாக உள்ளது. இயக்குனர் ருத்ரையா இயக்கத்தில் கமல், இரஜினி, ஸ்ரீப்பிரியா நடித்த ‘அவள் அப்படித்தான்’ பெண் விடுதலை குறித்த விவாதங்களை மையமாகக் கொண்ட படம். இயக்குனர் ருத்ரையா மறைவு 30 ஆண்டுகளுக்குப் பின்னர் ‘அவள் அப்படித்தான்’ திரைப்படத்தை கூடுதலாக அறிமுகப்டுத்துகிறது. ‘மெட்ராஸ்’ இந்தப் படங்களைப் போலில்லை. பாரதிராஜாவின் ‘என்னுயிர் தோழன்’ திரைப்படம் கட்சித் தலைவர்கள் மீதுள்ள விசுவாசம் தொண்டர்களை எப்படி பலி எடுக்கிறது என்பதை மட்டுமே சென்னைச் சூழலில் தந்த படம்.

‘மெட்ராஸ்’ கட்சித் தலைவர் விசுவாசத்தைத் தாண்டி அடித்தட்டு, ஒடுக்கப்பட்ட மக்களின் அதிகாரம் குறித்து படம் முழுவதும் முன்வைக்கிறது. தமிழ்நாடெங்கும் வெற்றிகரமாக ஓடிய திரைப்படம். தமிழ்த்திரையில் விளிம்புநிலை மக்களாகவும், சமூகரீதியாக தலித் மக்களையும், அவர்களது வாழ்விடத்தின் சூழலையும், அவர்கள் பங்கேற்கும் அரசியலும், எதிர்கொள்ளும் அரசியலும், காதலும், விளையாட்டும் என இதுவரை பார்க்காத கோணங்களில், மொழியில் வெளிப்பட்டுள்ளது. ‘இதற்குத் தானே ஆசைப்பட்டாய் பாலகுமாரா’ படத்தில் வருகிற அதே போன்ற குடியிருப்புதான். ஆனால் ‘மெட்ராஸ்’ குடியிருப்பும், சுவரும் விளையாட்டு மைதானமும், குழாயடியும் இதுவரை பேச மறுத்த மொழியில் பேசுகிறது. அடித்தட்டு வர்க்கமாக, விளிம்பு நிலை மக்களாக, தலித் மக்களாக பலவகையில் பரிமாணம் பெறுகிறது. இத்திரைப்படத்தில் நாம, அவங்க எனும் எதிர் நிலை தொடர்ந்து இயங்குகிறது. முகத்தில் நாமம் போட்ட மேல்தட்டுச் சாதிய அடையாளம் வீடு, பண்பு என உயர்வர்க்க, உயர்சாதி, அரசியல் தலைமை ஒருபுறமும், அன்பு மேரி குடும்ப இயல்பான உரசல்களுடன், காளி அம்மா, அப்பா, பாட்டி என முட்டல், மோதல், அன்பு எனவும், கலை கட்சிக்காரர் என நீலவண்ணக் கொடிகளும் பல செய்திகளை நமக்கு உணர்த்துகிறது. படம் முழுவதும் வண்ணம் குறிப்பாக நீலவண்ணம் கருப்பு இருட்டு என கதாபாத்திரமாகவே வலம் வருகிறது. சுவர் மிக முக்கியமான கதாபாத்திரம். தொடக்கம் முதல் இறுதிவரை உருமாறுகிறது. குணம் மாறுகிறது. அது சுவர் இல்லை. அதிகாரம் எனப் பேசும் மொழி காத்திரமாக உள்ளது. விளிம்பு நிலைப் பார்வையாளனைத் தனக்கான படமாக, அடித்தட்டு வர்க்கத்தைத் தனக்கான படமாக, தலித் மக்களைத் தங்களுக்கான படமாக, இறுதிக் காட்சியில் வெளிப்படையாக தலித்துகளுக்கான படமாக என பல பரிமாணத்தை வெளிப்படுத்துகிறது. இயக்குனர் இரஞ்சித் அவர்களை, படக்குழுவினரை கலைஞர்களை பாராட்டுவதுடன் இதுபோன்ற படங்களைத் தொடர்ந்து தர வாழ்த்துவோமாக. 

Pin It

மகாராஷ்டிரா, அரியானா தேர்தல் முடிவுகள் அனைந்திந்திய அரசியல் களத்தில் ஆட்சியில் பங்கு பெறாத கட்சிகளிடையே வலுவான கூட்டணி உருவாக்கத்தை நோக்கி காய்களை நகர்த்த வைத்துள்ளது. மகாராஷ்டிராவில் பா.ச.க. பெரும்பான்மை இடங்களைப் பெற்றுவிட்டது. அரியானாவில் தனித்து ஆட்சியே அமைத்துவிட்டது. இவ்விரு மாநிலங்களிலும் பா.ச.க. ஆட்சி அமைப்பது இதுவே முதல் முறை. கேரளா, மேற்கு வங்கம், அசாம் போன்ற மாநிலங்களிலும் பா.ச.க. காலூன்றும் என்று அரசியல் ஆய்வாளர்களில் ஒரு சாரார் முன் வைக்கின்றனர்.

இவை அனைத்தும் ஜனதா பரிவார் குடும்பத்தைச் சேர்ந்த ஆறு கட்சிகளை நெருங்கி வர வைத்துள்ளன. ஆம்! நவம்பர் 6 ஆம் நாள் சமாஜ்வாதிக் கட்சியின் தலைவர் முலாயம் சிங் யாதவ் அவர் வீட்டில் மதிய உணவுக்கு 5 கட்சிகளின் தலைவர்களை அழைத்திருந்தார். ஐக்கிய ஜனதாதளத்தின் சரத் யாதவ், மதச்சார்பற்ற ஜனதாதளத்தின் தேவ கௌடா , இராஷ்டிரிய ஜனதாதளத்தின் லல்லு பிரசாத் யாதவ், இந்திய தேசிய லோக் தளத்தின் துசியந்த் சௌதாலா, சமதா ஜனதா கட்சியின் கமல் மொரார்கா ஆகியோர் அதில் பங்கு பெற்றனர்.

அடிக்கும் மோடி அலைக்கு தடை போடுவதே அவர்கள் எண்ணம். நாடாளுமன்றத் தேர்தலில் பீகாரில் பா.ச.க. கூட்டணி மொத்தமுள்ள 40 இடங்களில் 31 ஐ பெற்றது. இது ராஷ்டிரிய ஜனதா தளத்தையும், ஐக்கிய ஜனதாதளத்தையும் கூட்டணிக்கு தள்ளியது. அக்டோபர் முதல் வாரத்தில் சரத் யாதவ், முலாயங் சிங் யாதவை ’நட்புரீதியாக’ சந்தித்தார். நாடாளுமன்றக் கூட்டத் தொடரில் பா.ச.க. வை எதிர்கொள்வதற்காகவே இந்தக் கூட்டணி என்று நிதிஷ் குமார் பத்திரிக்கையாளர்களிடம் சொன்னார். மகாத்மா காந்தி ஊரக வளர்ச்சித் திட்டம், நிலம் கையகப்படுத்தும் சட்டம், கருப்புப் பணம் ஆகிய மூன்றும்தான் இவர்கள் எடுக்கப் போகும் விவகாரங்கள் என்று சொன்னார் நிதிஷ்.

இந்த ஆறு சோசலிசக் கட்சிகளும் இணைந்து ஜனதா தளத்தை மீண்டும் உருவாக்கப் போவதாக செய்தி வெளியாகியுள்ளது. நவம்பர் 25 ஆம் நாள் குளிர்காலக் கூட்டத் தொடருக்கென்று திட்டமிட இருக்கிறார்கள். இவ்வணிகளுக்கு மக்களவையில் 15 இடங்களும், மாநிலங்களவையில் 25 இடங்களும் உள்ளன. மக்களவைக்கு முலாயம் சிங் தலைமை தாங்குவார் என்றும் மாநிலங்களவையை சரத் யாதவ் தலைமை தாங்குவார் என்றும் சொல்லியுள்ளனர்.

அவர்கள் திரும்பி பார்க்கிறார்களோ இல்லையோ நாம் திரும்பிப் பார்த்தாக வேண்டும். 1970 களில் இந்திரா தலைமையிலான காங்கிரசின் அவசர கால கட்டத்தில் ஜெயப்பிரகாசு நாராயணன் என்ற மாபெரும் தலைவரின் உருவாக்கம்தான் ஜனதா கட்சி. அவசர கால நிலைமைக்கு எதிரானப் போராட்டம் இந்தியாவின் இரண்டாவது சுதந்திரப் போராட்டம் என்று ஜெயப்பிரகாசு நாராயணன் முழங்கினார். ஸ்தாபன காங்கிரஸ், ஜனசங்கம், சோஷலிஸ்ட் கட்சிகள், பாரதிய லோக்தளம் ஆகியவை இணைந்து 1977 இல் அக்கட்சி உருவாக்கப்பட்டது. அவசர கால கட்டம் முடிவுக்கு வந்தது. ஜனதா கட்சி ஆட்சிக்கும் வந்தது. சுதந்திரத்திற்குப் பிறகு மத்தியில் காங்கிரசு ஆட்சி அதிகாரத்தில் இருந்து கீழிறங்கியது அப்போதுதான். ஆனால் கூட்டணி கட்சிகளின் அகந்தையாலும் பதவி வெறியாலும் மக்களின் நம்பிக்கையை இழந்த ஜனதா கட்சி சுக்கு நூறாய் உடைந்தது.

பாரதிய ஜனசங்கம், பாரதிய ஜனதாவாக உருவெடுத்தது. சோஷலிஸ்டுகள் சமதா என்றும் பிறகு சமாஜ்வாதி என்றும் உருக்கொண்டனர். ஜனதா, ஜனதா தளமானது. அதுவும் மதச்சார்பற்ற ஜனதா தளம், ஐக்கிய ஜனதா தளம் என்று உடைந்தது. மற்றொன்று, ராஷ்ட்ரிய ஜனதா தளம் என்று உருவமெடுத்தது. இக்கட்சிகள் மாநில அளவிலும் அக்கட்சித் தலைவர்களின் சாதிக்குள்ளும் சுருங்கிப் போயின. அதிலும் அவர்கள் குடும்ப அரசியல், ஊழல் என்று சீரழிந்துப் போனார்கள்.

1988 ஆம் ஆண்டு அக்டோபர் 11 ஆம் நாள் சோசலிசக் கட்சிகளை இணைத்து ஜனதா தளத்தை உருவாக்கினார் வி.பி. சிங். வி.பி. சிங் தலைமையிலான ஆட்சியும் நீடிக்கவில்லை. இப்போது, திசம்பரில் மீண்டும் ஜனதா தளம் உருவாக்கப்படலாம் என்று செய்தி வந்துள்ளது. இதை சி.பி.ஐ (எம்) வரவேற்றுள்ளது. எப்படியாயினும் பாசிசத்தை நோக்கிச் செல்லும் ஒரு ஆட்சிக்கு எதிராக இவர்கள் ஒன்றுபடுவது வரவேற்க வேண்டியதுதான். பா.ச.க. வின் செய்தி தொடர்பாளர் செய்யது சானாவாஸ் உசேன் மூன்றாவது அணியோ நான்காவது அணியோ பா.ச.க.வையும் சரி மோடியையும் சரி ஒன்றும் பாதிக்காது என்று அசட்டையாக சொல்லியுள்ளார்.

இக்கட்சிகளின் கடந்த கால வரலாறு பல கேள்விகளை எழுப்புகின்றன. காங்கிரசின் காட்டாட்சிக்கு எதிராகத் தோன்றியக் கட்சிகள் என்றாலும் காங்கிரசோடு இவை கூட்டணி வைத்தன. பா.ச.க.வோடும் கூட்டணி வைத்துள்ளன. அப்படி இருக்கையில் பா.ச.க. வையும் காங்கிரசையும் எதிர்க்கத்தான் இந்த ஐக்கியமா? மாநிலக் கட்சிகளின் பல்லைப் பிடுங்கும் பா.ச.க. வின் நகர்வுகளை எதிர்கொள்ளத்தான் இந்த ஐக்கியா? மதச் சார்பின்மை என்ற ஒற்றை கொள்கையின் அடிப்படையில் பா.ச.க. வினை எதிர்கொண்டுவிட முடியுமா? அப்படியெனில், காங்கிரசோடு கூட்டணி வைப்பார்களா? பா.ச.க. வின். உலகமய, தாராளமய, தனியார்மயக் கொள்கையை இவர்கள் எதிர்க்க வில்லையா? பா.ச.க., காங்கிரசுக்கு மாற்றாக இவர்கள் முன்வைக்கும் கொள்கை என்ன? கொள்கையில்லாமல் அதிகாரப் பசிக்காக ஓர் ஐக்கியமென்றால் வேலையின்றி, போதிய வருமானம் இன்றி பட்டினியால் வாடும் கோடிக்கணக்கான மக்களின் வயிற்றுப் பசிக்கு இவர்களிடம் என்ன தீர்வு இருக்கிறது?

2003 ஆம் ஆண்டு ஜனதா தளத்தில் இருந்து உடைந்தக் கட்சிகள் ஒன்றுபட வேண்டும் என்று விருப்பம் தெரிவித்த தேசியவாத காங்கிரசு கட்சியின்(இப்போது இக்கட்சி மகாராஷ்டிராவில் பா.ச.க. ஆட்சி அமைக்க ஆதரவு தந்திருக்கிறது) தலைவர் சரத் பவார் பின்வருமாறு சொன்னார். ‘‘இக்கட்சிகள் இணைவதை இந்நாட்டில் உள்ள விவசாயிகளும், இளைஞர்களும், உழைக்கும் வர்க்கமும் மதச்சார்பான்மையை உறுதியாகப் பேணும் மூன்றாவது அணியை எதிர்ப்பார்த்திருக்கிறார்கள். கட்சித் தலைவர்கள் மூன்றாவது அணியை உருவாக்காவிட்டால் அவர்கள் இவர்களைத் தோற்கடித்து எள்ளி நகை யாடுவார்கள்’’ என்று சொன்னார். மூன்றாவது அணி அமைக்காவிட்டாலும் சரி மாற்றுக் கொள்கையற்ற மூன்றாவது அணியை உருவாக்கினாலும் சரி மக்கள் இவர்களைப் புறந்தள்ளி எள்ளி நகையாடவே செய்வார்கள். மூன்றாவது அணி என்பதை விட கொள்கை வழிப்பட்ட மாற்று அணிதான் பா.ச.க அரசை வீழ்த்த முடியும் என்பதை கல்லறையிலிருந்து எழும் ஜனதா தளம் கருத்தில் கொள்ள வேண்டும்.

Pin It