அண்மைப் படைப்புகள்

கீற்றில் தேட

periyamuz logo

விருதுநகர் சுயமரியாதை மாநாட்டுத் தீர்மானங்கள்

விருதுநகர் மாவட்ட திராவிடர் விடுதலைக் கழகம் சார்பாக ‘விருதுநகர் சுயமரியாதை மாநாடு’ 23.9.2017 அன்று மாலை விருதுநகர் விஸ்வேஸ்வரர் அரங்கில் சிறப்புடன் நடைபெற்றது.

1931ஆம் ஆண்டு விருதுநகரில் நடந்த மூன்றாவது சுயமரியாதை மாநாட்டின் வரலாற்றை நினைவு கூர்ந்து ஏற்பாடு செய்யப்பட்டிருந்தது இம்மாநாடு. மாநாட்டையொட்டி விருதுநகர் மாவட்டத்தில் பெரியார் பங்கேற்ற நிகழ்ச்சிகளின் வரலாற்றுப் பதிவுகள் பேரறிஞர் அண்ணா சிலை வளாகத்தில் அமைக்கப்பட்டிருந்தது. கழகத் தலைவர் கொளத்தூர் மணி, இந்த வரலாற்றுச் சுவடுகள் கண்காட்சியை திறந்து வைத்தார்.

அங்கிருந்து பறை இசை முழங்க ஊர்வலமாக புறப்பட்டு மாநாட்டு அரங்கிற்கு தோழர்கள் வந்து சேர்ந்தனர். டபிள்யூ.பி.ஏ. சவுந்தரபாண்டியன் நினைவரங்கத்தில் கழகத் தலைவர் கொளத்தூர் மணி தலைமையில் மாநாட்டு நிகழ்ச்சிகள் தொடங்கின. மாவட்ட ஒருங்கிணைப்பாளர் செந்தில் வரவேற்புரையாற்றினார். மாவட்ட கழகத் தலைவர் அல்லம்பட்டி நாத்திகபாண்டி முன்னிலை வகித்தார். தோழர்கள் டார்வின்தாசன் (திருச்சி மாவட்ட கழகப் பொறுப்பாளர்), ஆசிரியர் சிவகாமி (தமிழ்நாடு அறிவியல் மன்றம்), இரா உமாபதி (சென்னை மாவட்ட செயலாளர்), ஈரோடு இரத்தினசாமி (கழக அமைப்புச் செயலாளர்) ஆகியோர் உரையைத் தொடர்ந்து தி.மு.க. கலை இலக்கியப் பேரவையின் தெற்கு மாவட்ட அமைப்பாளர் பா.அசோக் உரையாற்றினார்.

மாநாட்டின் சிறப்பு விருந்தினராகப் பங்கேற்று தமிழ்நாடு முற்போக்கு எழுத்தாளர்கள், கலைஞர்கள், சங்கத்தின் தலைவர் ச. தமிழ்ச்செல்வன், 1931இல் விருதுநகர் சுயமரியாதை மாநாட்டுத் தீர்மானங்களை எடுத்துக் கூறி இன்றைய காலகட்டத்தில் அத் தீர்மானங்களில் வலியுறுத்தப்பட்ட கருத்துகளை செயலாக்குவது குறித்தும் அதற்கான திட்டங்கள் குறித்தும் விரிவாகப் பேசினார். தொடர்ந்து தி.மு.க. கலை இலக்கியப் பகுத்தறிவுப் பேரவையின் மாநில துணை அமைப்பாளரும், விருதுநகர் மாவட்டத்தைச் சார்ந்தவருமான தமிழச்சி தங்க பாண்டியன், விருதுநகர் மாவட்டத்தின் சுயமரியாதை வீரர்களை நினைவுகூர்ந்தும் வரலாற்றில் திராவிட இயக்கத்தின் பங்களிப்பை விளக்கியும் ஒரு மணிநேரம் சிறப்புரையாற்றினார்.

தொடர்ந்து பொதுச் செயலாளர் விடுதலை இராசேந்திரன், 1931இல் விருதுநகர் மாநாடு நடந்த காலத்தில் நிலவிய சமூகச் சூழலை விளக்கிப் பேசினார். நிறைவாக கழகத் தலைவர் கொளத்தூர் மணி விருதுநகர் சுயமரியாதை மாநாட்டு வரலாற்று நிகழ்வுகளையும் நீட் தேர்வின் ஆபத்துகளையும் விளக்கி, மாநாட்டுத் தீர்மானங்களை முன் மொழிந்தார்.

virdhunagar kolathurmani 600நிறைவேற்றப்பட்ட தீர்மானங்கள்:

1931ஆம் ஆண்டு ஆகஸ்டு 8, 9 தேதிகளில் விருதுநகரில் நடந்த மூன்றாவது சுயமரியாதை மாநாடு மனிதத்திற்கும் சகோதரத்துவத்திற்கும் எதிரான மதங்கள் ஒழிக்கப்படவேண்டும் என்று தீர்மானம் நிறைவேற்றியது. அன்றைய காலகட்டத்தில் கடும் எதிர்ப்புகளை சந்தித்தது அத்தீர்மானம். எதிர்ப்பு களுக்கு அஞ்சாது பெரியாரின் சுயமரியாதை இயக்கம் மக்கள் மன்றத்தில் எதிர்நீச்சல் போட்டு பரப்பிய கருத்துகளால் தான் தமிழ்நாடு மதவெறிக்கு இடம் அளிக்காத மண்ணாக பக்குவம் பெற்றது. இப்போது பா.ஜ.க., சங் பரிவாரங்கள் ஆட்சி அதிகாரங்கள் வழியாக தமிழ்நாட்டை மதவெறி மண்ணாக மாற்றும் தீவிர முயற்சியில் இறங்கி இருக்கின்றன. சகோதரத்துவத்தை பேணும் மதவெறி அற்ற தமிழ்நாட்டுக்கு சங்பரிவாரங்கள் விடுக்கும் சவாலை தனித்துவமான தமிழகத்தின் மதச் சார்பற்ற சமூகநீதி கொள்கைகளில் ஊன்றி நிற்கும் அனைத்து கட்சிகள், இயக்கங்கள் மக்களோடு ஒருங்கிணைந்து முறியடிப்போம் என்று இம்மாநாடு 1931இல் பெரியார் முழங்கிய இந்த விருதுநகரில் இருந்து சூளுரைக்கிறது.

பெண்களுக்கு முக்கிய பங்கு: பெண்களின் சம உரிமைக்கும், விடுதலைக்கும் குரல் கொடுத்த பெரியார் பொது வாழ்க்கையில் பெண்களின் பங்கேற்பை தொடர்ந்து வலியுறுத்தினார். தமிழ்நாட்டில் பெண்ணுரிமை ஜாதி ஒழிப்பு சமூகநீதி போராட்டக்களம் நோக்கி ஏராளமான பெண்கள் முன்வரத் தொடங்கி விட்டார்கள். இந்த வரலாற்று மாற்றத்தை கருத்தில் கொண்டு பொது வாழ்க்கையில் பெண்களுக்கான ‘சுதந்திர வெளியை’ உருவாக்கித் தருவதற்கு கட்சிகளும் இயக்கங்களும் முன்வர வேண்டிய அவசியத்தை இம்மாநாடு சுட்டிக்காட்டு கிறது அதேபோல் குடும்பங்களிலும் பெண்களுக்கான ஜனநாயக உரிமைகளை மதிக்கும் சுயமரியாதை பண்பாடுகளையும் பேணி வளர்த் தெடுப்போம் என்று இம்மாநாடு உறுதி ஏற்கிறது.

மூடநம்பிக்கை எதிர்ப்புப் பிரச்சாரம் : மதவெறியர்களின் துப்பாக்கி குண்டுகளுக்கு குறி வைக்கப்பட்ட தபோல்கர், பன்சாரே, கல்புர்கி, கௌரிலங்கேஷ் அனைவரும் மதவெறி எதிர்ப்புடன் மூடநம்பிக்கை களுக்கு எதிரான அறிவியலை பரப்பியவர்கள்.  மதவெறி எதிர்ப்பு பரப்புரையுடன் அறிவியலையும் இணைப்பது தான் மக்களிடத்தில் உறுதியான மதவெறி எதிர்ப்பை உருவாக்கும் என்று மதவெறியர்கள் அஞ்சுகிறார்கள் என்பதையே இந்த படுகொலைகள் உணர்த்துகின்றன. எனவே மதவெறி எதிர்ப்பை அரசியல் கண்ணோட்டத்தோடு நிறுத்தி விடாமல் மூடநம்பிக்கைகளில் இருந்து மக்களை விடுவிக்கும் அறிவியல் மனப்பான்மையை வளர்த் தெடுக்கும் பரப்புரையையும் மக்களிடம் கொண்டு செல்ல வேண்டும் என்று இம்மாநாடு கேட்டுக் கொள்கிறது.

கழகத் தோழர்கள் கணேசமூர்த்தி, செந்தில் ஆகியோர் முன்னின்று தோழர்களை ஒருங்கிணைத்து கடும் உழைப்பில் இந்த மாநாட்டை நடத்தி முடித்துள்ளனர்.  நிகழ்வுகளை பரப்புரை செயலாளர் பால். பிரபாகரன் ஒருங்கிணைத்தார்.

Pin It

‘குடிஅரசு’ வெளியிட்ட செய்திகள்

ஈரோட்டில் 1931ஆம் ஆண்டு விருதுநகர் 3ஆவது சுயமரியாதை மாநாடு ஜூன் 8, 9 தேதிகளில் நடந்தது. மாநாட்டின் வரவேற்புக் குழுத் தலைவராக டபிள்யூ.பி.ஏ. சவுந்திரபாண்டியன் மாநாட்டுக்கு முழு பொறுப்பு ஏற்று நடத்தினார். மாநாட்டுக்கு பொருளாதார மேதையும் சுயமரியாதைக்காரருமான ஆர்.கே. சண்முகம் தலைமை தாங்கினார்.

இரண்டாவது சுயமரியாதை பெண்கள் மாநாடும், மூன்றாவது சுயமரியாதை , வாலிபர் மாநாடும் இதே மாநாட்டில் நடந்தன. மாநாடு குறித்து ‘குடிஅரசு’ விரிவாக செய்திகளை பதிவு செய்திருக்கிறது.

ஊர்வலத்தில் 15,000 பேர் பங்கேற்றனர். மாநாட்டில் 5000 பிரதிநிதிகள் பங்கேற்றனர். பெண்கள் மாநாட்டில் 3000 பெண்களும், வாலிபர் மாநாட்டில் 2000 வாலிபர்களும் பங்கேற்றனர். இரண்டு யானைகள் ஊர்வலத்தில் வந்தன. 6 குதிரைகள் பூட்டிய ரதத்தில் தலைவர்கள் ஊர்வலமாக வந்தனர். பெரிய மைதானத்தில் 5 ஏக்கர் சுற்றளவில் அடைப்பு தட்டிகள் போட்டு மாநாட்டு பந்தல் மலர்களால் அலங்கரிக்கப்பட்டிருந்தது. கடைகளும் கட்டப்பட்டிருந்தன. மாநாட்டு பந்தலில் 200 கம்பங்களில் சுயமரியாதை கொள்கைகள், புராண மரியாதைக் காரர்களின் புரட்டு வாக்கியங்கள், தேசியப் புரட்டு வாக்கியங்கள் பெரிய எழுத்துகளில் அச்சடிக்கப்பட்டு தொங்கவிடப்பட்டிருந்தன.

மாநாட்டின் நடு மண்டபத்தில் பனகல் அரசர் படம் ஒரு பக்கமும், ஈ.வெ.ராமசாமி படம் இன்னொரு பக்கத்திலும் பெரிய அளவில் வைக்கப்பட்டிருந்தன. சுகாதார கண்காட்சி, மருத்துவம் விகிச்சை முறைகளை விளக்கும் கண்காட்சிகள் இடம்பெற்றிருந்தன. 150 அடி நீளத்தில் தனி சமையல் கொட்டகை அமைக்கப்பட்டு, 40 அடுப்புகளில் உணவு தயாரிக்கப்பட்டன. 100 ஆதி திராவிட வாலிபர்கள் இராணுவ உடையுடன் காப்பாளர்களாக செயல்பட்டனர்.

மாநாட்டில் பங்கேற்ற பிரமுர்களின் நீண்ட பட்டியலில் பட்டுக் கோட்டை அழகிரி, எஸ். இராமநாதன், ப. ஜீவானந்தம் பெயர்களும் இடம் பெற்றுள்ளன. மாநாட்டுத் தலைவர் ஆர்.கே. சண்முகம், மாநாட்டுக்கு முதல் நாளே வந்தார். ஊர்வலமாக அவர் அழைத்து வரப்பட்டார். விருதுநகர் நகரசபை அவருக்கு வரவேற்புத் தந்தது.

சுயமரியாதை மாநாட்டில் ‘எல்லா மதங்களும் ஒழிய வேண்டும்; மதங்கள் ஒழியாத வரை சகோதரத்துவம் வளராது’ என்ற தீர்மானம் நிறைவேற்றப்பட்டது.

‘மத நடுநிலை’ என்ற பெயரில் மத சீர்திருத்த சட்டங்களைக் கொண்டு வருவதை தடைப்படுத்துவதைக் கண்டித்தும், வர்ணாஸ்ரமக் கொள்கை ஒழிய வேண்டும் என்றும், தீண்டாமை சமூகத்தைப் பிடித்த நோய்; அது ஒழிக்கப்பட வேண்டும் என்றும், இந்தியைத் திணிப்பது வர்ணாஸ்ரமத்தைத் திணிப்பதாகும் என்றும் கதர் தேசியப் பொருளாதாரத் திட்டம், பொருளாதார வளர்ச்சிக்கு தடை என்றும் பெண்களுக்கு சொத்து உரிமை, திருமண உரிமை, விவாகரத்து உரிமை வேண்டும் என்ற தீர்மானங்களும் நிறைவேற்றப்பட்டன. தேவகோட்டையில் ஆதி திராவிடர்கள் மீது நடத்தப்பட்ட ஜாதிவெறி தாக்குதல் குறித்து விசாரணை ஆணையம் நியமிக்கப்பட வேண்டும். மதப் பண்டிகைகளுக்கு அரசு விடுமுறை தரக் கூடாது; தேவைப்பட்டவர்கள் தனியாக விடுப்பு எடுத்துக் கொள்ளலாம் என்றும் தீர்மானங்கள் நிறைவேற்றப் பட்டன.

பெண்கள் மாநாட்டுக்கு இந்திராணி பாலசுப்பிரமணியம் தலைமை தாங்கினார். பெண்களின் கல்வியை 11 வயதிலேயே நிறுத்திவிடாமல் 30 வயது வரை படிக்க வைக்க வேண்டும். ‘பால்ய விவாகத்தை’ தடை செய்யும் ‘சாரதா’ சட்டத்தை உடனே நிறைவேற்றவேண்டும். பெண்களை ஆசிரியர், மருத்துவத்தொழிலுக்கு மட்டும் எடுக்காமல், காவல் துறை, இராணுவத்திலும் வேலைக்கு எடுக்கவேண்டும். ஆண்களைப்போல் சொத்துரிமை வேண்டும். சேர்ந்து வாழ முடியாத கணவர்களிடமிருந்து விவாகரத்து உரிமை வேண்டும். தேவதாசி ஒழிப்புச் சட்டம் கொண்டு வரவேண்டும். பள்ளிகளில் சேரும் மாணவர்களிடம் அதற்கான விண்ணப்பங்களில் ஜாதி கேட்பதை நிறுத்த வேண்டும். (அப்போது ஜாதி கேட்கப் பட்டது, ஜாதியப் பாகுபாடு கண்ணோட்டத்தில் - ஆர்.) ஜாதி மற்றும் வர்ணாஸ்ரம அடிப்படையில் நடத்தப்படும் மாணவர் விடுதிகளுக்கு அரசு உதவித் தொகையை நிறுத்த வேண்டும். இரயில் நிலையங்களில் தங்கும் அறைகள் பெண்களுக்காக தனியாக ஒதுக்கவேண்டும் என்ற தீர்மானங்கள் நிறைவேற்றப்பட்டன. தீர்மானங்களை ஆதரித்து நீலாவதி, சிவகாமி, குஞ்சிதம், மரகதவல்லி, நாகம்மாள், ரங்கம்மாள், ஈ.வெ. ராமசாமி பேசினர்.

வாலிபர் மாநாட்டுக்கு வரவேற்புக் குழு தலைவர் எஸ். ஜெயராம், பி.ஏ., அரசியல் விடுதலையைவிட சமூக விடுதலையே அவசியம் என்று அவர் கூறினார்.

வாலிபர் மாநாட்டுக்கு தலைமை தாங்கியவர் டி.வி. சோமசுந்தரம், பி.ஏ., பி.எல்., சமதர்மத்தை வலியுறுத்தி அவர் பேசினார்.

Pin It

“இடஒதுக்கீடு எங்கள் உரிமை: அதை இழக்க முடியாது”

தமிழ்நாடு தீண்டாமை ஒழிப்பு முன்னணி தமிழ் மாநிலக் குழுவின் ஏற்பாட்டில் ‘தேவேந்திர குல வேளாளர் சமூக உரிமைப் பாதுகாப்பு மாநாடு” 24.9.2017 ஞாயிறு மாலை 6 மணியளவில் திருநெல்வேலி வானவில் திருமண மண்டபத்தில் எழுச்சியுடன் நடந்தது. ‘தேவேந்திர குல வேளாளர்’ எஸ்.சி. இடஒதுக்கீடு பட்டியலில் இடம் பெற்றிருப்பது இழிவு என்று பேசி வரும் புதிய தமிழகம் கட்சித் தலைவர் டாக்டர் கிருஷ்ணசாமி, இடஒதுக்கீட்டால் தேவேந்திர குல வேளாளர்களுக்கு எந்தப் பயனும் கிடைக்கவில்லை என்று கூறி பட்டியலிலிருந்து வெளியேற வேண்டும் என்று பேசி வருகிறார். இதற்கு எதிராக தேவேந்திரகுல வேளாளர்கள் பல ஆயிரக்கணக்கில் திரண்டு, மாநாட்டின் வழியாக டாக்டர் கிருஷ்ணசாமிக்கு  கண்டனத்தைத் தெரிவித்ததோடு, இடஒதுக்கீடு போராடிப் பெற்ற உரிமை, அதை இழக்க முடியாது என்று தீர்மானம் நிறைவேற்றி யுள்ளனர். மாநாட்டுக்கு தமிழ்நாடு தீண்டாமை ஒழிப்பு முன்னணி பொதுச் செயலாளரும் முன்னாள் சட்டமன்ற உறுப்பினருமான ஆர்.கிருஷ்ணன் தலைமை தாங்கினார்.

கழகப் பொதுச் செயலாளர் விடுதலை இராசேந்திரன், தியாகி இமானுவேல் பேரவை பொதுச் செயலாளர் பூ. சந்திரபோசு, தீண்டாமை ஒழிப்பு முன்னணி தலைவர் பி.சம்பத், பொதுச் செயலாளர் கே. சாமுவேல்ராஜ், பொறியாளர் ஊர்க்காவலன், நெல்லை மருத்துவக் கல்லூரி முன்னாள் முதல்வர் டாக்டர் எஸ். ராமகுரு, எம்.எஸ். (ஆர்த்தோ) உள்ளிட்ட பலரும் பேசினர். மாநாட்டு அரங்கம் நிரம்பி வழிந்தது. மண்டபத்துக்கு வெளியே போடப்பட்டிருந்த நாற்காலிகளிலும் கூட்டம் நிரம்பி வழிந்தது. அவர்களுக்கு மாநாட்டு நிகழ்ச்சிகள் ‘காணொளி’ காட்சிகள் வழியாக ஒளிபரப்பப்பட்டது. இட ஒதுக்கீட்டின் உரிமைகளால்தான் ஓரளவு தலைநிமிர முடிந்தது என்பதை மாநாட்டுத் தீர்மானம் சுட்டிக் காட்டியது.

1918இல் சென்னை பல்கலைக்கழகத்தில் பட்டம் பெற்ற 14,927 பேரில் பார்ப்பனர்கள் மட்டும் 11,532 பேர்; மீதமுள்ள அனைத்து சாதிகளிலிருந்தும் பட்டம் பெற்றவர்கள் 3395 பேர் மட்டுமே என்று சுட்டிக்காட்டிய தீர்மானம் மத்திய அரசுத் துறைகளில் ‘ஏ’ பிரிவு பதவிகளில் பட்டியல் இனப் பிரிவினர் 11.5 சதவீதம் மட்டுமே இடம் பிடிக்க முடிந்திருப்பதை சுட்டிக் காட்டியுள்ளது. இடஒதுக்கீடு இல்லை என்றால், என்னவாகும் என்பதற்கு உச்சநீதிமன்ற நீதிபதிகளே சான்று என்பதை தீர்மானம் எடுத்துக் காட்டியது. “2012இல் உச்சநீதிமன்ற நீதிபதிகள் மொத்தம் 28 பேர். இதில் பட்டியல் சாதியினர் ஒருவர்கூட இல்லை. உயர்நீதிமன்ற நீதிபதிகள் 1036. இதில் பட்டியல் சாதியினர் 26 பேர் (2.5 சதவீதம்) மட்டுமே. ஏன் உச்சநீதி மன்ற வரலாற்றிலேயே வரதராசன், கே.ஜி.பாலகிருட்டிணன் ஆகிய இருவர் மட்டுமே பட்டியல் ஜாதி யினராக இருந்திருக்கிறார்கள். இட ஒதுக்கீடு இல்லை என்றால் இந்த நிலை தான் அனைத்துத்துறைகளிலும் நீடிக்கும்.

பட்டியலிலிருந்து விலகிக் கொண்டால் உள்ளாட்சித் தேர்தல் களில் சட்டமன்ற நாடாளுமன்றத் தேர்தல்களிலும், பிரதிநிதித்துவம் பறிபோய்விடும். தமிழ்நாட்டில் 1.5 இலட்சத்துக்கும் மேற்பட்ட பட்டியல் ஜாதி மாணவர்கள் அரசு ஆணை 92இன்படி ஆண்டுக்கு ரூ.70,000 பெற்று, பொறியியல் படித்து வரு கிறார்கள். இதில் 25,000 மாணவர் களாவது தேவேந்திரகுல வேளாளர் சமூக மாணவர்களாக இருக்க மாட்டார்களா? இதில் பெரும் பாலோர் கூலித் தொழிலாளர்களின் பிள்ளைகள்தானே!

சிறப்பு உட்கூறு திட்டம், தாட்கோ போன்ற திட்டங்களின் மூலம் பட்டியல் ஜாதிப் பிரிவினருக்கு கிடைக்கும் பயன்களை இழந்து விட முடியுமா?” என்றும் தீர்மானம் குறிப்பிடுகிறது.

“தேவேந்திர குல வேளாளர் மக்கள் மீதான ஒடுக்குமுறைகளை எதிர்த்துப் போராட 1953இல் தியாகி இமானுவேல் சேகரன் ஒடுக்கப்பட் டோர் கழகத்தை தொடங்கினார். 1954இல் அருப்புக்கோட்டை மற்றும் முதுகுளத்தூரில் இரட்டைக் குவளை ஒழிப்பு மாநாடுகளை நடத்தினார். கோயில் திருவிழாக்களில் பட்டியல் இன ஜாதியினர் மீது திணிக்கப்பட்ட தீண்டாமைகளை எதிர்த்துப் போராடினார். 1957இல் ஜாதி வெறியர்களால் படுகொலை செய்யப் பட்டார். எனவே இழிவு என்று இகழ்ந்தால் இமானுவேல் சேகரன் வழியில் போராடுவோம். சமூக, பொருளாதார, அரசியல் தளத்தில் நமக்கு உரிய பங்கு கிடைக்கும் வரை இடஒதுக்கீட்டு உரிமையை விட்டுத் தர மாட்டோம்” என்று மாநாட்டுத் தீர்மானம் அறிவித்தது.

மாநாட்டில் ஏராளமான மாணவர்கள், வழக்கறிஞர்கள், இளைஞர்கள் திரண்டிருந்தனர்.

Pin It

பால பாரதி (முன்னாள் சட்டமன்ற உறுப்பினர்)

புதிய தமிழகம் கட்சித் தலைவர் கிருஷ்ணசாமி, தொலைக்காட்சி பேட்டியில் மார்க்சிஸ்ட் கம்யூனிஸ்ட் கட்சியின் முன்னாள் சட்டமன்ற உறுப்பினர் பாலபாரதி பற்றி கூறும்போது அந்த ‘பொம்பள’ய நான் பார்த்ததே இல்லை என்று கூறினார். இதற்கு பதிலளித்து ‘தமிழ் இந்து’ நாளேட்டின் பெண்கள் மலரில் (செப்.17) பாலபாரதி எழுதியுள்ள கட்டுரையிலிருந்து சில பகுதிகள்:

அனிதாவின் மரணத்துக்கு நியாயம் கேட்டு அவரது உயிரைப் பறித்த நீட்டை ரத்து செய்யக்கோரிய மாணவர்களின் போராட்டம் தமிழகமெங்கும் வியாபிக்கத் தொடங்கியது. அதைத் திசை திருப்பும் நோக்கோடு நீட்டை ஆதரித்தும் அனிதாவின் மரணத்தை சிபிஐ விசாரிக்க வேண்டுமெனவும் ஊடகங்கள் வழியாக விவாதங்கள் நிகழ்ந்து கொண் டிருந்தன. அதிலும் குறிப்பாக அனிதா நீட் தேர்வில் தோற்றுவிட்டதால் அவருக்கு மருத்துவக் கல்லூரியில் சேர்வதற்கான தகுதி யில்லையென்றும் நீதிமன்றத்தின் வழியாக அனிதாவின் உரிமையைப் பெற உதவ முன் வந்தவர்கள்தான் அவரது மரணத்துக்குக் காரணமானவர்கள் என்று டாக்டர் கிருஷ்ண சாமி போன்ற தலைவர்கள் பிரச்சாரத்தை நடத்தியதும் பெரும் வேதனையைத் தந்தன.

இதன் பின்னணியில்தான் 2015-ல் தமிழக சட்டமன்றத்தில் நடந்த நிகழ்வொன்றை சமூக வலைத்தளத்தில் பதிவிட்டிருந்தேன். மறைந்த முதலமைச்சர் ஜெயலலிதா, டாக்டர் கிருஷ்ண சாமியின் மகளுக்கு மருத்துவ மேற்படிப்புக்கு சீட் வழங்கினார் என்பதை அன்றைய நிதியமைச்சர் ஓ.பன்னீர்செல்வம் சட்ட மன்றத்தில் தெரிவித்திருந்தார். தமக்கென்றால் ஒரு நீதி அனிதாவுக்கென்றால் இன்னொரு நீதியா என்ற எனது கேள்விக்கு நேரடியாகப் பதில் சொல்ல முடியாதவர், “அந்தப் பொம்பளை யாரென்றே எனக்குத் தெரியாது” என்று ஊடகத்தில் மறுப்பு தெரிவித்தார். “உங்களைப் போன்றே பொதுச்சேவைக்கு வந்த ஒரு பெண்ணை பொம்பளை எனச் சொல்லலாமா?” என்ற ஊடகத்தாரின் கேள்விக்கு மீண்டும் அவர், “பொம்பளையைப் பொம்பளை என்று சொல்வதிலே என்ன தவறு? அது அழகான தமிழ் வார்த்தைதானே” என்றார். அதே தூய தமிழ் வார்த்தையைப் பயன்படுத்தி, “அந்தப் பொம்பளையிடம் நான் சீட் வாங்கவில்லை” என ஏனோ அவர் சொல்லவில்லை. அதன் அரசியல் நமக்குப் புரியாமலும் இல்லை.

அந்தக் கேள்வியோடு நிறுத்தாமல், “பிறகு அந்தம்மா பொம்பளை இல்லையா?” என அடுத்த கேள்வியையும் தொடுத்தார். இதை விடக் கூர்மையான ஆயுதம் வேறு இருந்துவிட முடியாதுதான். நிகழ்ச்சித் தொகுப்பாளர் அசந்தே போனார். இத்தனை நெருக்கத்தில் ஆணாதிக்கத்தின் விஷ அம்பை அவரும் எதிர்கொண்டிருந்திருக்க மாட்டார். ஒரு அரசியல் கட்சியின் முக்கியத் தலைவரிட மிருந்து இப்படியொரு கேள்வியை யாரும் எதிர்பார்க்கவில்லை. போர்க்களத்தில் எனது ஆயுதம் பறிக்கப்பட்டதைப் போன்ற அனுதாபத் தோடும் இரக்கத்தோடும் பலரது பார்வையும் இருந்தது. அதே நேரம் எனக்கு ஆதரவாகக் குரல் கொடுத்தவர்களின் எண்ணிக்கையும் அதிகரித்தது.

அனிதாவுக்கு நியாயம் கேட்டுத் தன் ஆசிரியர் பணியைத் துறந்த சபரிமாலாவை அதிமுகவின் பிரமுகர் ஒருவர், “இந்தம்மா வெல்லாம் டீச்சராக வேலை பார்த்தால் விளங்குமா? வேலையைவிட்டுப் போனதே நல்லது” என்று கொச்சைப்படுத்தினார். போற்ற வேண்டிய போர்க்குணத்தை, வளர்க்க வேண்டிய தியாகக் குணத்தை இத்தனை கேவலமாக இழிவுபடுத்த இவர் யார் என்ற கேள்வியை யாரும் எழுப்பவில்லை.

இந்துத்துவவாதிகளை எதிர்த்துப் பேசினார் என்பதற்காகத் தான் கௌரி லங்கேஷ் மீது ஏழு புல்லட்டுகளை வெறித்தனத்தோடு பாய்ச்சி, உடலைச் சல்லடையாக்கினார்கள் சமூக விரோதிகள். வேறு சிலரோ போதைப்பொருள் கடத்தலில் அவர் ஈடுபட்டதாகக் கூச்சநாச்சமின்றி அவதூறு சொல்லி உயிரற்ற உடலை மேலும் சல்லடையாக்கினார்கள். மதவெறியர், சமூகவிரோதிகளை விட்டுவிட்டு மாணவி வளர்மதியைக் குண்டர் சட்டத்தில் சிறைக்குள் தள்ளிய அரசு பயங்கரவாதம் உள்ளிட்ட பெண் மீதான வன்முறைகள் கூர்மையடைந்தே வருகின்றன.

குடும்பத்தில் மட்டுமல்ல பெண்கள் அரசியலுக்கு வந்தாலும் அங்கேயும் அடக்கமானவர்களாக இருக்க வேண்டும் என்றே உலகம் எதிர்பார்க்கிறது. அடக்க மானவர்கள் எல்லாம் சுடுகாட்டில்தான் இருப்பார்கள். அந்த அடக்கம் தேவையற்றது. டாக்டர் கிருஷ்ணசாமி என் எதிரியல்ல, நாவடக்கம் தேவை என என்னை மட்டுமல்ல ஒட்டுமொத்த பெண்களையும் எச்சரிக்கிறார். அது அவரது குரல் அல்ல, ‘மனு’வின் குரல். ஆகவே, அவரது கருத்தை எதிர்க்கிறேன்.

‘பொம்பளை’ என்றால் பொம்பளை அல்ல. போராட்டம் என்பதே அதன் பொருளாகும் என மாணவிகள் உணர்த்திக் கொண்டிருக் கிறார்கள். எந்தவொரு பெண்ணுக்கு எதிராகவும் எங்கே அநீதி நிகழ்ந்தாலும் சாதி, மதம், அரசியல் வேறுபாடின்றி தடியைச் சுழற்றித் தட்டிக் கேட்பதற்கு ஒரு தந்தை பெரியார் நிச்சயம் வேண்டும்.

Pin It

gowri langas 450மதவெறி கோழைகளின் துப்பாக்கிக் குண்டுக்கு பலியான கவுரி லங்கேஷ் (இராவணன்) வீரமரணத்துக்கு திராவிடர் விடுதலைக் கழகம் - வீரவணக்கம் செலுத்துகிறது. அவரது எதிர்நீச்சல் வரலாறு குறித்த ஒரு தொகுப்பு.

“கோழையே உன்னிடம் தோட்டாக்கள்; என்னிடம் அழியா வார்த்தைகள்”

• பத்திரிகையாளரும் சமூகப் போராளியுமான 55 வயது கவுரி லங்கேஷ் - மதவெறியர்களால் துப்பாக்கியால் சுட்டுக் கொல்லப்பட்ட நாள் செப்டம்பர் 5 - இரவு 7.45க்கும் 8 மணிக்கும் இடையில். காரிலிருந்து இல்லம் திரும்பியபோது காரை நிறுத்துவதற்காக முன் கதவை திறக்க முயற்சித்தபோது மோட்டார் பைக்கில் வந்த 3 பேரில் இருவர் அவரது மார்பு, வயிறு, கழுத்தில் நேருக்கு நேராக சுட்டு வீழ்த்தி பிணமாக்கி விட்டனர்.

• கவுரியின் தந்தை லங்கேஷ் அவர்களும் ஒரு பத்திரிகையாளர், எழுத்தாளர், மதவாத சக்திகளுக்கு எதிரான முற்போக்கு சிந்தனையாளர். அவர் நடத்தி வந்த ‘லங்கேஷ் பத்திரிகா’ என்ற கன்னட இதழை கவுரி தொடர்ந்து நடத்தினார். ‘லங்கேஷ் பத்திரிகா’, ‘டேபிளாய்டு’ என்ற வடிவத்தில் (‘புரட்சிப் பெரியார் முழக்கம்’ இதழ் வடிவத்தைப்போல்) வார ஏடாக வெளி வந்தது.

• லங்கேஷ் என்ற கன்னடச் சொல், திராவிட மாவீரன் இராவணனைக் குறிப்பதாகும்.

• இளமையில் மருத்துவர் படிப்பு, கவுரியின் கனவாக இருந்தது. ஆனால் புதுடில்லியில் உள்ள இந்திய தகவல் தொடர்புக் கல்விக்கான நிறுவனத்தில் படித்தார்.

• ‘டைம்ஸ் ஆப் இந்தியா’ நாளேட்டில் அதன் பெங்களூர் பதிப்பில் 1980ஆம் ஆண்டு சில காலம் பணியாற்றினார். அதிலிருந்து விலகி, ‘சண்டே’ ஆங்கில வார ஏடு உள்ளிட்ட முன்னணி பத்திரிகையில் பணியாற்றினார். பிறகு தெலுங்கு தொலைக்காட்சி ஒன்றின் டெல்லிப் பிரிவுக்கு தலைமைப் பொறுப்பில் இருந்தார். பார்ப்பனப் பன்னாட்டு ஆதிக்கம் நிறைந்த இந்த ஊடகங்கள் அவரது கொள்கை உணர்வுக்குத் தடையாக இருந்ததால் அதிக ஊதியம் தரும் பதவிகளை உதறி எறிந்து விட்டு, தந்தை நடத்திய கன்னட பத்திரிகையை கன்னட மொழியில் நடத்தினார்.

• அரசு விளம்பரங்கள், கார்ப்பரேட் விளம்பரங்கள் ஏற்பது இல்லை என்ற கொள்கை முடிவு எடுத்தார். சமரசமின்றி துணிவோடு மதவெறி சக்திகளை தோலுரித்ததால் மதவெறி சக்திகளின் எதிர்ப்புகளை சந்தித்தார்.

• குடும்பத்துக்குள் சகோதரர் இந்திரஜித்திடம் (இவர் திரைப்படத் துறையில் பணியாற்றுகிறார்) கருத்து வேறுபாடு ஏற்பட்டதால் தந்தை நடத்திய பத்திரிகை உரிமையை இந்திரஜித்திடம் ஒப்படைத்து விட்டு, 2005ஆம் ஆண்டு முதல் ‘கவுரி லங்கேஷ் பத்திரிகா’ என்ற பெயரில் பத்திரிகையைத் தொடங்கி நடத்தினார்.

• பத்திரிகையைத் தவிர, தந்தை நடத்திய பதிப்பகத் துறை வழியாக நூல்களை வெளியிட்டு வந்தார்.

• 2016இல் பா.ஜ.க. நாடாளுமன்ற உறுப்பினர் பிரகாஷ் ஜோஷிக்கு எதிராக அவர் கடுமையான கட்டுரையை எழுதியதால் பார்ப்பனர் ஜோஷி நீதிமன்றத்தில் அவமதிப்பு வழக்கு தொடர்ந்தார். ஹீபால்லி நீதிமன்றம், கவுரிக்கு 6 மாத சிறைத் தண்டனையும் ரூ.15,000 அபராதமும் விதித்தது. கைது செய்யப்பட்ட கவுரி, வழக்கை மேல் முறையீடு செய்து பிணையில் வெளி வந்தார். அடக்குமுறைக்கு அவர் அஞ்சவில்லை.

• மார்க்சிய லெனினிய அறிஞரும் நக்சல்பாரியுமான சாஜ்தேத் ரஞ்சன் தலைமறைவாக இருந்தபோது அவரைச் சந்தித்து, அவரது பேட்டியை தனது ஏட்டில் வெளியிட்டார். ரஞ்சன் பெங்களூருவை நோக்கி வந்தபோது போலீஸ் அவரை சுட்டுக் கொன்றது. ரஞ்சன் சடலம் வைக்கப்பட்ட இடத்துக்கு விரைந்தார் கவுரி. காவல்துறை விதித்த கெடுபிடி கட்டுப்பாடுகளை எதிர்த்து காவல் துறையுடன் போராடினார். உடல் எரியூட்டு இடம் வரை சென்று காவல்துறை உயர் அதிகாரிகளின் மனித விரோதப் போக்கை போலி என்கவுண்டரை எதிர்த்து நேருக்கு நேர் வாதம் செய்தார்.

• ஆயுதம் தாங்கிப் போராடும் குழுக்களிடம் நேரில் விவாதித்து, அரசின் நல்லெண்ணத் தூதராக செயல்பட்டு, அவர்களை சமூகப் போராட்டக் களத்துக்குக் கொண்டு வந்தவர் கவுரி. ‘கோமு சவுத்தார்தா வேதிகா’ என்ற அமைப்பு, அடிப்படை மதவாத எதிர்ப்பாளர்கள், பகுத்தறிவாளர்கள், ஜாதி எதிர்ப்பாளர்களை அணி திரட்டும் மய்ய அமைப்பாக உருவெடுத்தது. மதவெறிக் கலவரங்கள் உருவாக்கக்கூடிய பகுதிகளுக்குச் சென்று மக்களிடையே மதவாதத்துக்கு எதிராக விழிப்புணர்வூட்டும் கடமையாற்றியது இந்த அமைப்பு.

• கடந்த மார்ச் மாதம் யோகேஷ் மாஸ்டர் என்ற முற்போக்கு எழுத்தாளர் எழுதிய ‘துந்தி’ என்ற கன்னட நாவலுக்கு இந்துத்துவ சக்திகளிட மிருந்து கடும் எதிர்ப்பு வந்தது. கவுரி ஏற்பாடு செய்த ஒரு புத்தக வெளியீட்டு விழா நிகழ்ச்சி ‘தேவநாகரே’ என்ற இடத்தில் நடந்தது. அவ்விழாவுக்கு சிறப்பு விருந்தினராக யோகேஷ் மாஸ்டரை அழைத்தார் கவுரி. மதவெறியர்கள் மாஸ்டர் முகத்தில் கருப்பு மையை வீசி அவமதித்தனர். இந்துத்துவவாதிகளை எதிர்த்து நின்றார் கவுரி. யோகேஷ் நாவலை உறுதியாக ஆதரித்தார். அதற்காக இந்துத்துவ சக்திகள் கவுரி மீது கடும் ஆத்திரமடைந்தன.

• “இந்து அமைப்பில் உள்ள ஜாதி அமைப்பை தொடர்ந்து எதிர்ப்பேன்; மதவாதத்துக்கு எதிராகத் தொடர்ந்து முழங்குவேன்” என்று கூறி வந்த கவுரி - குஜராத்தில் மோடி முதல்வராக இருந்தபோது நடத்திய இஸ்லாமிய இனப்படு கொலைகளை ஆதாரங்களுடன் அம்பலப் படுத்தி, ‘ராணா அய்யூப்’ எழுதிய ‘குஜராத் கோப்புகள்’நூலை, கன்னடத்தில் மொழி பெயர்த்தவர்.

• கவுரியின் தந்தை லங்கேஷ், பார்ப்பனியத்தையும் பார்ப்பன மடங்களையும் எதிர்த்து கவிதை நாடகங்கள் வழியாக சமுதாய சீர்திருத்தக் கருத்துகளை பரப்பியவர்.

• பெங்களூருவில் பெரும்பாலான இளம் பத்திரிகையாளர்களின் நேசிப்புக்கும் ஈர்ப்புக்கும் உரியவர் கவுரி. பத்திரிகை மன்றத்தில் அவர் நுழைந்தால் திரும்பி காரில் ஏறும் வரை இளையோர் கூட்டம் அவரை சூழ்ந்து நிற்கும்.

• பசுமை வேட்டை என்ற பெயரில் நக்சலைட்டுகள் அழிக்கப்பட்டபோது அப்பாவி மலை வாழ் மக்கள் காவல்துறையால் வேட்டையாடப் பட்டனர். கெடுபிடிகளை மீறி அப்பகுதிக்குச் சென்று நக்சல்பாரிகளை பேட்டி கண்டு காவல்துறை அடக்குமுறையை அம்பலப்படுத்திய தோடு கருநாடக அரசுடன் பேச்சு வார்த்தை நடத்தி நக்சலைட் மறுவாழ்வு திட்டத்தை உருவாக்கினார். அதற்குப் பிறகு தான் மேற்கு தொடர்ச்சி மலையில் தோட்டாக்கள் வெடிக்கும் சத்தம் ஓய்ந்தது.

• பார்ப்பன புரோகிதர்கள் சாப்பிட்டு வீசிய எச்சில் இலை மீது படுத்து ‘அங்கப் பிரதட்சம்’ செய்தால் நோய் நீங்கும் என்ற பார்ப்பன சடங்கு, அந்தரத்தில் முதுகில் அலகு குத்தி தொங்குவது, நிர்வாண பூஜை, நரபலி போன்ற வைதீக மூட நம்பிக்கை சடங்குகளுக்கு எதிராக மூடநம்பிக்கை ஒழிப்புச் சட்டம் கொண்டுவர கர்நாடக அரசிடம் வலியுறுத்தினார். (அரசு கொண்டு வந்த மசோதா எதிர்கட்சிகள் எதிர்ப்பால் முடங்கியிருக்கிறது) எந்த நேரத்திலும் முதல்வர்  சித்தராமய்யாவை சந்திக்கும் உரிமையைப் பெற்றிருந்தார். பார்ப்பன எச்சில் இலை மீது உருளும் சடங்கை முதல்வர் சித்தராமய்யா தடை செய்தார். பார்ப்பனர்கள் நீதிமன்றம் போனார்கள். நீதிமன்றம் தடையை உறுதி செய்தது.

• சில மாதங்களுக்கு முன், ‘தனது காரின் மீது காக்கை உட்கார்ந்ததால் ஆட்சிக்கு ஆபத்து ஏற்படும் என்று நம்பி முதலமைச்சர் காரை மாற்றிவிட்டார்’ என்று ஊடகங்களில் செய்தி பரவியது. அடுத்த நாளே சித்தராமய்யா வீட்டுக்குச் சென்று “மூடநம்பிக்கை ஒழிப்புச் சட்டம் கொண்டு வருவதாகக் கூறும் நீங்களே இப்படி செய்யலாமா” என்றுநேரில் கேட்டார். சித்தராமய்யா அப்படி காரை மாற்றவில்லை, அது புரளி என மறுத்தார். “சித்தராமய்யா அப்படியெல்லாம் காரை மாற்றவில்லை; காரணம் அவர் எடியூரப்பா இல்லை” என்று கட்டுரை எழுதினார், கவுரி.

• தபோல்கர், கன்சாரே, கல்புர்கி சுட்டுக் கொல்லப் பட்ட போதும் சரி; கன்னட எழுத்தாளர் யு.ஆர்.அனந்தமூர்த்தி கொலை மிரட்டலுக்கு உள்ளானபோதும் ‘மாதொரு பாதகன்’ நாவலுக்காக ஜாதி வெறியர்கள் பெருமாள் முருகனை மன்னிப்பு கேட்க வைத்தபோதும் வெகுண்டெழுந்து குரல் கொடுத்தவர் கவுரி.

• பிறப்பால் ஒரு கன்னடராக இருந்தாலும் காவிரி உரிமைப் பிரச்சினையில் தமிழர்கள் தாக்கப்பட்ட போது கன்னட அமைப்புகளைக் கண்டித்து தொலைக்காட்சி அலைவரிசைகளில் பேசினார். நடிகர் பிரகாஷ் ராஜூக்கு எதிராக கன்னட ஊடகங்கள் கொந்தளித்தபோது பிரகாஷ் ராஜ் பக்கம் நின்றார். (கவுரி மரணமடைந்த சேதி கேட்டு விரைந்த நடிகர் பிரகாஷ்ராஜ், இறுதி ஊர்வலம் வரை உடனிருந்தார் என்பது குறிப்பிடத்தக்கது)

• உருவ வழிபாடு, வேத வழிபாடு எதிர்ப்பை உள்ளடக்கி, ஜாதி, மதம், பெண்ணடிமைக்கு எதிராக கருநாடகாவில் 12ஆம் நூற்றாண்டில் எழுச்சி பெற்ற ஒரே முற்போக்கு இயக்கம் பசவண்ணரின் லிங்காயத்து நெறி இந்து மதத்தை முற்றிலும் நிராகரித்ததோடு ஜாதியையும் புறந்தள்ளியது. பார்ப்பனர், தலித் உள்ளிட்ட பல்வேறு ஜாதிப் பிரிவினர் லிங்காயத்தில் இணைந்து தங்களுக்குள் ஜாதி கடந்த திருமண உறவுகளை உருவாக்கிக் கொண்டனர். பார்ப்பனியம் லிங்காயத்தையும் சீரணித்து விழுங்கியது. அண்மையில் ‘லிங்காயத்துகள்’ நாங்கள் இந்துக்கள் அல்ல என்று அறிவித்தனர். அதை ஆதரித்து கட்டுரைகளை எழுதினார் கவுரி லங்கேஷ்.

• இந்துத்துவ பார்ப்பனியத்துக்கு எதிராக வெடித்துக் கிளம்பிய டெல்லி ‘ஜெ.என்.யூ’ பல்கலைக் கழக மாணவர் கன்யாகுமார், குஜராத் உனா போராட்ட ஒருங்கிணைப்பாளர் ஜிக்னேஷ் மேவானி, ஜேய்பீம் ஆர்மி சந்திரசேகர் ஆகியோரை, தனது சொந்த மகன்களாக அங்கீகரித்தார். சுதந்திரம், சமத்துவம், சகோதரத்துவத்தை முன்னெடுக்கும் ‘ஜெய் பீம்’ முழக்கமே இந்தியாவை மீட்டெடுக்கும் என முழங்கிக் கொண்டே இருந்தார்.

“காந்தியைப் போல், கல்புர்கியைப்போல் என்னைக் கொன்றாலும் எனது பணியை நிறுத்த மாட்டேன்; நாளை நடக்கக் கூடியது இன்றே நடக்கட்டும்! இங்கே யாரைக் கண்டு அச்சம்?” என்ற பசவண்ணனின் வசனத்தை அடிக்கடி கூறுவார்.

“கோழையே, உன்னிடம் தோட்டாக்கள்

என்னிடம் அழியா வார்த்தைகள்

எதற்கும் அஞ்ச மாட்டேன்

நான் கவுரி லங்கேஷ்”

- இது அண்மைக்காலமாக கூட்டங்களில் கவுரி லங்கேஷ் முன் வைத்த முழக்கம்.

தமிழ்நாட்டுச் சூழலில் பெரியாரியப் போராளி என்று அடையாளப்படுத்தும் அனைத்துத் தகுதி களுக்கும் உரியவர் கவுரி லங்கேஷ்.

வர்ணாஸ்ரம மதவாதத்தை எதிர்த்த வீராங்கனை வரலாறாகி நிற்கிறார்! வீரவணக்கம்!

Pin It