அண்மைப் படைப்புகள்

கீற்றில் தேட

ம.தி.மு.க.விலிருந்து விலகி மு.கண்ணப்பன் தி.மு.க.வில் சேர்ந்தபோதுதான் கலைஞருக்கு 1976 ஆம் ஆண்டின் நெருக்கடி காலக் கொடுமைகள் எல்லாம் நினைவுக்கு வந்திருக்கிறது. “நெருக்கடி நிலை பிரகடனப்படுத்தப்பட்டிருந்தபோது இந்தியாவிலே முதன்முதலாகச் செயற்குழுவைக் கூட்டி நெருக்கடி நிலையைக் கண்டித்து அதைத் திரும்பப் பெறவேண்டும் என்று தீர்மானம் நிறைவேற்றிய ஒரே அரசியல் கட்சி திராவிட முன்னேற்றக் கழகம்... நாம் ஜனநாயகத்திற்கு விரோதமான இந்த நெருக்கடிக்காலச் சட்டத்தை மிசா கொடுமையை எதிர்க்கிறோம் என்று பிரகடனப்படுத்திய காலக் கட்டம் அது” (‘முரசொலி’ மார்ச் 24) - என்று கலைஞர் மலரும் நினைவுகளை அசை போட்டிருக்கிறார்.

மு.க. ஸ்டாலின் தனது பேரன் பேத்தி குடும்ப சகிதமாக இடிக்கப்பட இருக்கும் சென்னை சிறையைப் பார்வையிட்டு, தாம் அடைக்கப்பட்டிருந்த சிறைப்பகுதிக்குள் சென்று, பேரனை புகைப்படம் எடுக்கச் சொல்லி கண்களில் நீர் மல்க, அந்தக் கால நினைவுகளை அசை போட்டிருக்கிறார். கலைஞருக்கு அவை மலரும் நினைவுகளாகவே முடிந்து போயிருந்தால் - நாமும் கூட மகிழ்ச்சியடைந்திருப்போம். ஆனால், அந்த அடக்குமுறைகளை மலரும் நினைவுகளாக அல்ல, நிகழும் நடப்புகளாக மாற்றிக் கொண்டிருக்கிறோமே என்ற உணர்வுகளோ, உறுத்தலோ, அதற்கான சலனமோகூட கலைஞரிடம் இல்லாமல் போய்விட்டதே! அன்று - விசாரணை ஏதுமின்றி ஓராண்டு சிறையில் அடைக்கும் ‘மிசா’வை காங்கிரஸ் தலைவர் இந்திராகாந்தி கைகளில் எடுத்தார் என்றால், இன்று - அதற்கு மாற்றாக கலைஞர் விசாரணை ஏதுமின்றி ஓராண்டு சிறையில் அடைக்கும் “தேசிய பாதுகாப்பு சட்டத்தை” தனது கைகளில் தூக்கியிருக்கிறார்; அவ்வளவுதான் வேறுபாடு!

அன்று - இந்திராகாந்தியின் அவசர நிலையை எதிர்த்து தி.மு.க. வெடிகுண்டு தூக்கவில்லை. கடற்கரையிலே மக்களை கூட்டி வைத்துக் கண்டனக் குரல் எழுப்பி பேசியது; அவ்வளவு தான். அதற்கு ஓராண்டு ‘மிசா’. இன்று - கொளத்தூர் மணியும், இயக்குனர் சீமானும், நாஞ்சில் சம்பத்தும் வெடிகுண்டு தூக்கவில்லை. எந்த காங்கிரஸ் ‘மிசா’வின் கீழ் தி.மு.க.வை ஒடுக்கியதோ, அதே காங்கிரஸ், ஈழத் தமிழர்களைக் கொன்று குவிக்கும் சிங்களத்துக்கு துணை போவதை மக்களைக் கூட்டி வைத்து அன்று தி.மு.க. கடற்கரையில் பேசியதுபோல் இன்றும் மேடையில்தான் பேசினார்கள்.

ஆனால், அன்று - ‘அவசர நிலை எதிர்ப்புக் களத்தின் போர் வீரனாக’ நின்ற கலைஞர், இன்று - தேசிய பாதுகாப்புச் சட்டத்தின் பாதுகாவலனாக மாறியிருக்கிறார். அன்று - இந்திரா அவசர நிலை பிரகடனம் செய்தபோது - கலைஞரின் ‘முரசொலி’ இந்திராவின் படத்தை ஹிட்லராக மாற்றி கேலிச் சித்திரம் போட்டது. இன்று - நாஞ்சில் சம்பத், எந்த அரசுப் பதவியிலும் இல்லாத சோனியாவை முசோலினி என்று குறிப்பிட்டதற்காக கலைஞர் ஆட்சி ஓராண்டுக்கு சிறையில் வைக்கும் ஆள் தூக்கி சட்டத்தை ஏவுகிறது.

எந்த இந்திராகாந்தி ‘மிசா’வின் கீழ் தி.மு.க.வினரை சிறைப்படுத்தி சர்க்காரியா விசாரணை ஆணையத்தை நிறுவி அலைக் கழித்தாரோ, அவமதித்தாரோ அதே இந்திராவை - ‘நேருவின் மகளே வருக; நிலையான ஆட்சி தருக’ என்று பட்டுக் கம்பளம் விரித்து கைகொடுத்தவரும் இதே கலைஞர் தான்! அன்றும் - கலைஞரின் பச்சை அரசியல் சந்தர்ப்பவாதம் தான் அரங்கேறியது. கடற்கரைக் கூட்டத்திலே இந்த ‘தமிழினத் துரோக நாடகத்தில்’ கதாபாத்திரமேற்றிருந்த கலைஞர், இந்திராவுடன் கைகுலுக்கியபோது, அன்று - கலைஞரை திராவிடர் கழகம் ஆதரித்த நிலையிலும் - பொறுக்க முடியாத கோவை இராமகிருட்டிணன் தலைமையில் செயல்பட்ட திராவிடர் கழக இளைஞரணி - இந்த கூட்டணியைக் கண்டித்து சென்னை நகரிலே சுவரொட்டிகளை ஒட்டி, தனது எதிர்ப்பைப் பதிப்பு செய்தது.

சென்னை சிறையிலே மிசாவில் கைதானவர்கள் கொடூரமாக தாக்கப்பட்டனர். தி.மு.க. நாடாளுமன்ற உறுப்பினர் சிட்டிபாபுவும், சாத்தூர் பாலகிருட்டிணனும் சிறையில் பட்ட அடியால் மரணத்தையே தழுவினர். சிட்டிபாபு சிறையில் எழுதிய ‘டைரி’ சிறைக் கொடுமைகளை பதிவு செய்தது. முரசொலி மாறன் முதுகுத் தண்டும் பாதிக்கப்பட்டது. அதே ‘மிசா’வின் கொடுமையினால் தான். அன்று - இந்திராவின் காங்கிரஸ் தமிழ்நாட்டில் தமிழின உணர்வை நசுக்கி, ஆளுநர் ஆட்சியை அறிவித்து, ஆர்.வி.சுப்ரமணியம், தவே என்று இரண்டு பார்ப்பன ஆலோசகர்களை அனுப்பி, தமிழின உணர்வுக்கு எதிராக திட்டமிட்ட ‘அழிப்பையே’ நடத்தி முடித்தார்கள்; தமிழகம் பார்ப்பன அதிகார நாடாக மாற்றப்பட்டது. இன்று - இந்திராவின் மருமகள் சோனியாவின் ஆட்சியில் என்ன நடக்கிறது?

ஈழத் தமிழர்களையும், அவர்களின் விடுதலைப்படையான விடுதலைப் புலிகளையும் பூண்டோடு ஒழிக்க சபதமேற்று செயல்படுகிறது. பணத்தையும், ஆயுதங்களையும் வாரி வழங்கி, உளவு நிறுவனங்களின் சேவைகளைப் பகிர்ந்து, ராடார்களையும், கப்பல்களையும் தூக்கிக் கொடுத்து தமிழர்களை நன்றாகக் கொன்று குவிக்க வைத்து வேடிக்கைப் பார்த்து மகிழ்கிறது. அன்று - இந்திரா ஆட்சியில் தமிழகத்தில் ‘தமிழின’ அழிப்புக்கான ஒடுக்குமுறைகள்; இன்று - சோனியா ஆட்சியில் ஈழத்தில் திட்டமிட்ட தமிழின அழிப்புக்கு பேராதரவு.

அன்று - இந்திரா ஆட்சியின் அடக்குமுறையை எதிர்த்துப் பேசியதால் - தீர்மானம் போட்டதால் - விசாரணையின்றி ஓராண்டுக்கு மேல் சிறை; இன்று - தி.மு.க. ஆட்சியில் சோனியாவை எதிர்த்தால், காங்கிரசின் துரோகத்தைக் கண்டித்துப் பேசினால், ராஜீவ் மரணத்தை விமர்சித்தால் - விசாரணையின்றி ஓராண்டு சிறை. இரண்டுக்கும் வேறுபாடு ஒன்றுதான். அன்று காங்கிரசின் ஆணையில் அடக்கு முறை; இன்று காங்கிரசே கேட்க வேண்டாம்; ‘நான் எதற்கு இருக்கிறேன் தாயே’ என்று கலைஞரே - காங்கிரசின் ‘பாத்திரத்தை’ ஏற்றுக் கொண்டு விட்டார். அவ்வளவுதான் வேறுபாடு. கரம் என்றாலே இப்போது கலைஞருக்கு உடனடியாக நினைவுக்கு வருவது காங்கிரஸ்தான் என்றாகிவிட்டது. தி.மு.க.வில் இணைந்த கண்ணப்பன், ‘உங்கள் கரத்தைப் பலப்படுத்துவோம்’ என்று கலைஞரிடம் கூறியவுடன், ‘தோழமைக் கட்சியின் சின்னம் கரம்; காங்கிரஸ் கட்சியின் சின்னம் கரம்; அதைப் பலப்படுத்துவோம் என்று கண்ணப்பன் சொல்லியிருக்கிறார்” என்று கலைஞர் அதற்கு விளக்கம் தரும் எல்லைக்குப் போய் விட்டார்.

• அந்தக் ‘கரம்’ தான் - மிசாவின் கரம்;
• அந்தக் ‘கரம்’ தான் - சிட்டிபாபுகளையும், பாலகிருஷ்ணன்களையும் பிணமாக்கிய ‘கரம்’.
• அந்தக் ‘கரம்’ தான் - ஸ்டாலினையும், முரசொலிமாறனையும் - சிறைக்குள் அடித்து உதைத்த ‘கரம்’.
• அந்தக் ‘கரம்’ தான் - இன்றும் ஈழத் தமிழர்களின் இனப் படுகொலைகளுக்கு நீண்டிடும் கரம்.

இன்னமும் தமிழின உணர்வை இழந்திடாமல், அந்த உணர்வுக்காக - எந்தப் பலனையும் எதிர்பாராமல் தி.மு.க.வில் உழைத்துக் கொண்டிருக்கும் உண்மை தமிழின உணர்வாளர்களே; தமிழின இளைஞர்களே!

உங்கள் குருதியோட்டத்தோடு கலந்து நிற்கும் - அந்த இன உணர்வோடு சிந்தியுங்கள்! கலைஞரின் இந்த நிலைப்பாடுகள் சரி தானா? துரோக காங்கிரசைத் தூக்கி நிறுத்தி - அவர்கள் நடத்தும் இனப் படுகொலையின் கோர முகத்தை மறைக்கத் துடிப்பது - நேர்மை தானா? காங்கிரசை மகிழ்விக்க - தேசிய பாதுகாப்புச் சட்டத்தை கையில் எடுப்பது நேர்மைதானா? உள்ளத்தைத் தொட்டு சிந்தியுங்கள்!

Pin It

பெரியார் பிறந்த மண்ணான ஈரோட்டில், தமிழின உணர்வாளர்கள் திரளுகிறார்கள். ஈழத் தமிழர்களுக்கு எதிராக ஒவ்வொரு நாளும் இலங்கை ராணுவம் தமிழர்களை கொத்து கொத்தாக பிணமாக்கி வருகிறது.அய்.நா.வும், அமெரிக்காவும், பிரிட்டனும் போரை நிறுத்துமாறு வலியுறுத்தியும் - இலங்கை அரசு கேட்க மறுக்கிறது. கடந்த ஜன.20 முதல் மார்ச் 7 ஆம் தேதி வரை 46 நாட்களில் 2683 அப்பாவித் தமிழர்கள் படுகொலை செய்யப்பட்ட தாகவும், 7 ஆயிரத்து 241 பேர் படுகாயமடைந்ததாக வும் அய்.நா.வின் தகவல் கூறுகிறது. அய்.நா.வின் மனித உரிமை ஆணையத் தலைவர் முதலில் இதை வெளியிட மறுத்த நிலையில் மனித உரிமைக் குழு உறுப்பினர்கள் அறிக்கையை கசிய விட்டதைத் தொடர்ந்து உண்மைகள் வெளிவந்தன.

இந்த நிலையில் அய்.நா. பாதுகாப்புக் கவுன்சில் - தமிழர்கள் மீது ராணுவம் நடத்தும் இனப் படுகொலையை விவாதத்துக்கு எடுத்துக் கொள்ள முடிவு செய்து, அதற்கான பட்டியலில் இணைத் துள்ளது. அய்.நா. பாதுகாப்புக் கவுன்சிலின் நிரந்தர அமெரிக்க பிரதிநிதி சூசன் ஈ ரைஸ் பாதுகாப்புக் குழுவில் இதை விவாதிக்க, தமது ஆதரவைத் தெரிவித்துள்ளார். இலங்கையில் தமிழர்கள் மீது நடத்தப்படும் தாக்குதலினால் அமெரிக்கா மிகவும் கவலை கொண்டுள்ளதால் இது பற்றி விசாரிக்க வேண்டும் என்று அவர் வற்புறுத்தியுள்ளார். அய்ரோப்பிய ஒன்றியத்தின் உறுப்பினர்கள் சார்பாக பிரிட்டனுக்கான அய்ரோப்பிய ஒன்றியத்துக்கான தூதர் ஜான் சேவேர்ஸ் பாதுகாப்புக் கவுன்சில், இது பற்றி விசாரிக்க வேண்டும் என வலியுறுத்தியுள்ளார்.

இந்த நிலையில் அய்.நா. பாதுகாப்புக் கவுன்சிலில் விவாதம் வந்துவிடக் கூடாது என்று இலங்கை, சீனாவிடம் தஞ்சமடைந்துள்ளது. இலங்கையின் உள்நாட்டுப் பிரச்சினையில் அய்.நா. தலையிடக் கூடாது என்று சீனா எதிர்ப்பு தெரிவித்துள்ளது. போர் நிறுத்தம் செய்யாவிட்டால், இலங்கையை ‘காமன் வெல்த்’ அமைப்பிலிருந்து நீக்கவேண்டும் என்று இங்கிலாந்து நாட்டின் ஆளும் கட்சியான தொழிலாளர் கட்சியின் பெண் மக்களவை உறுப்பினர் ஜோன்மேரி ரியான் - இங்கிலாந்து பிரதமர் கார்டன் பிரவுனிடம் வலியுறுத்தியுள்ளார்.

இனியும் இனப்படுகொலைகள் தொடர்வதை தாங்கிக் கொள்ள முடியாது என்று விடுதலைப்புலிகள் அறிவித்துள்ளதோடு, இலங்கையில் உடனடியாக போர் நிறுத்தம் செய்யப்படவேண்டும் என்றும் வற்புறுத்தியுள்ளனர். விடுதலைப்புலிகளின் அரசியல் பிரிவு பொறுப்பாளர் நடேசன், லண்டனிலிருந்து வெளிவரும் ‘தி சண்டே டைம்ஸ்’ இதழுக்கு அளித்த பேட்டியில், இலங்கை அரசுடன் நிபந்தனையற்ற பேச்சுவார்த்தைக்கு தயாராக இருப்பதாகவும் அறிவித்துள்ளார். சர்வதேச பிரதிநிதிகள் - முல்லைத் தீவுக்கு வந்து நேரில் பார்வையிட்டு உண்மைகளைத் தெரிந்து கொள்ளட்டும் என்றும் விடுதலைப்புலிகள் இயக்கம் அறிவித்துள்ளது. ஆனால், இந்தியா இவ்வளவுக்குப் பிறகும் வாய் திறக்கவில்லை. தமிழக முதலமைச்சர் கலைஞர், இலங்கையின் இறை யாண்மையில் தலையிட முடியாது என்று - ராஜபக்சே கூறும் கருத்தை இப்போது வெளிப்படையாகப் பேசத் தொடங்கிவிட்டார்,. சோனியா இதுவரை ஈழத் தமிழர் பிரச்சினைப் பற்றி வாயே திறக்கவில்லை. இந்தியப் பார்ப்பன வல்லாதிக்க ஆட்சியின் துரோகம் தொடர்ந்து கொண்டிருக்கிறது.

இந்த நிலையில் நாடாளுமன்றத் தேர்தலில் இனப் பகைக்கு பாடம் புகட்ட தமிழின உணர்வாளர்கள் தயாராகி வருகிறார்கள். காங்கிரசை தோற்கடிக்க வற்புறுத்தி, பெரியார் திராவிடர் கழகம் வெளியிட்ட குறுந்தகடு, தமிழகத்தில் பெரும் பரபரப்பை உருவாக்கி வருகிறது. பெரியார் திராவிடர் கழகம் - தமிழ்த் தேச பொது வுடைமை கட்சி, தமிழ்த் தேசிய விடுதலை இயக்கம் ஆகிய அமைப்புகள் இணைந்து உருவாக்கியுள்ள ‘தமிழர் ஒருங்கிணைப்பு’ ஈழத் தமிழர்களின் பிரச் சினையை மக்களிடம் கொண்டு செல்லும் தீவிர முயற்சிகளில் இறங்கியுள்ளது. அதன் மற்றொரு செயல்பாடாக எதிர்வரும் ஏப்.11 ஆம் தேதி ஈரோட் டில் தமிழின வாக்காளர் மாநாட்டை கூட்டியுள்ளது. இதற்கான ஆலோசனைக் கூட்டம் கடந்த மார்ச் 18 ஆம் தேதி ஈரோட்டில் அபிநயா ரீஜென்சி ஓட்டல் அரங்கில் நடைபெற்றது. கழக பொதுச் செய லாளர்கள், கோவை இராமகிருட்டிணன், விடுதலை இராசேந்திரன், பெ. மணியரசன் (தே.பொ.க), தியாகு (த.தே.வி.இ.), ஈரோடு ரத்தினசாமி, கழகப் பொறுப் பாளர்கள் நாத்திக ஜோதி, இராம இளங்கோவன், த.தே.பொ.க., த.தே.வி.இ. தோழர்கள், உணர்வாளர்கள் உள்ளிட்ட 50 பேர் பங்கேற்றனர். 15 பேர் கொண்ட வரவேற்புக்குழு மாநாட்டுக்காக அமைக்கப்பட் டுள்ளது.

ஏப்.11 ஆம் தேதி ஈரோடு திருநகர் காலனி மாவீரன் முத்துக்குமரன் அரங்கில் மாலை 4 மணியளவில் மாநாடு தொடங்குகிறது. ஈரோடு ரத்தினசாமி தலைமை தாங்குகிறார். மோகனராசு வரவேற்புரை யாற்றுகிறார். இராம. இளங்கோவன் முன்னிலை வகிக்கிறார். இயக்குனர் மணிவண்ணன், தமிழருவி மணியன், புலவர் புலமைபித்தன், ஓவியா, பெ.மணியரசன், தியாகு, கோவை இராமகிருட்டிணன், விடுதலை இராசேந்திரன் மற்றும் மதுரை உயர்நீதி மன்ற வழக்கறிஞர் சங்கத் தலைவர் ஆகியோர் பங்கேற்று பேசுகின்றனர். சமர்பா குழுவினரின் இசை நிகழ்ச்சியும் உண்டு. மாநாட்டில் தேர்தல் குறித்து இன உணர்வுள்ள தமிழர்களுக்கு வேண்டுகோள் விடுக்கும் முக்கிய தீர்மானங்கள் நிறைவேற்றப்பட உள்ளன. தமிழ்நாடு முழுதுமிருந்தும் தனிப் பேருந்துகளில் கட்சிகளைக் கடந்து இன உணர்வாளர்கள் ஈரோடு நோக்கித் திரள இருக்கிறார்கள்.

நாடாளுமன்றத் தேர்தல் களத்தில் புதிய திருப்புமுனையை இம்மாநாடு உருவாக்கப் போகிறது. தமிழக முழுதும் பரவியுள்ள இன எழுச்சி உணர்வுக்கு வடிவம் தந்து ஒருங்கிணைத்து உணர்வுகளை ஓட்டு சக்தியாக மாற்றும் மாநாடாக இது திகழப் போகிறது. மாநாட்டை தடுத்து நிறுத்திடும் முயற்சிகள் ஆளும் கட்சிகளால் மேற்கொள்ளப்பட்டு வருகின்றன என்றாலும் அந்த முயற்சிகளை முறியடித்து, மாநாட்டை உறுதியாக நடத்திட தீவிரப் பணிகள் தொடங்கி விட்டன.

Pin It

‘இனி என்ன செய்யப் போறீங்க?’ எனும் தலைப்பில் பெரியார் திராவிடர் கழகம் தயாரித்துள்ள குறுந்தகடு நாடு முழுதும் அதிர்வு அலைகளை உருவாக்கி வருகிறது. காங்கிரஸ்வட்டாரங்கள் கலக்கமடைந்திருப்பதாக ஏடுகள் செய்திகளை வெளியிட்டுள்ளன. ‘தினமலர்’ பார்ப்பன ஏடு அந்தக் குறுந்தகடு தடை செய்யப்பட வேண்டும் என்ற நோக்கத்தோடு மூன்று நாட்களாக எதிர்ப்பான செய்திகளை வெளியிட்டுள்ளது. ‘தினமலர்’, பார்ப்பன நாளேட்டுடன் கடந்த சில காலமாக நட்பு பாராட்டத் தொடங்கியுள்ளது தி.மு.க. என்பது குறிப்பிடத்தக்கது. சீமான், கொளத்தூர் மணி கைது செய்யப்பட வேண்டும் என்று ‘தினமலர்’ வலியுறுத்தியதைத் தொடர்ந்து - உடனே தி.மு.க. ஆட்சி, அவர்களை தேசிய பாதுகாப்பு சட்டத்தில் கைது செய்து விட்டது. கழகத்தின் குறுந்தகடு பற்றி ‘ஜூனியர் விகடன்’ வார ஏடு (மார்ச் 11, 2009) காங்கிரசுக்கு எதிராக ‘ஆயுத்தமாகும் சி.டி.கள்’ என்ற தலைப்பில் இரண்டு பக்க கட்டுரையை வெளியிட்டு, அதில் அடங்கியுள்ள கருத்துகள், படங்களை விவரித்துள்ளது. கழகத் தோழர்கள் பேட்டியையும், காங்கிரஸ் தலைவர் தங்கபாலு பேட்டியையும் வெளியிட்டுள்ளது. இதைத் தடை செய்யும் நடவடிக்கைகளை எடுக்கப் போவதாக தங்கபாலு கூறியுள்ளார்.

‘நக்கீரன்’ ஏடு இது குறித்து இரண்டு பக்க கட்டுரையை பொதுச் செயலாளர் இராமகிருட்டிணன் பேட்டியோடு வெளியிட்டுள்ளது. கட்டுரை இவ்வாறு தொடங்குகிறது. “பதினைந்து நிமிடங்கள்தான் ஓடுகிறது அந்த குறுந்தகடு. ஆனால், ஐந்தாண்டுகால ஆட்சியின் ஆணிவேரையே அசைக்கும் வலிமை அதற்கு இருப்பதை, அதிலுள்ள காட்சிகளைக் காணும் மக்களிடமிருந்து வெளிப்படும் உணர்வின் மூலமாக அறிய முடிகிறது.”

தமிழகம் முழுதும் - பல்லாயிரக்கணக்கில் பிரதி எடுத்து வழங்கப்பட்டு வரும் இந்தக் குறுந்தகடு காங்கிரசாரை கலக்கத்தில் ஆழ்த்தியுள்ளது.

Pin It

பெரியார் பேச்சு - எழுத்துகள் - நாட்டுடைமையாக்கப்பட வேண்டும் என்று வலியுறுத்தி வரும் எஸ்.வி.ராஜ துரைக்கு எதிராக, ‘விடுதலை’யில் கட்டுரை தீட்டிய மின்சாரம் - வ.கீதா பார்ப்பனப் பெண் என்றும், எஸ்.வி.ஆர். பெண் தோழி என்றும் எழுதியுள்ளதற்கு - எதிர் வினையாக - தமிழின உணர்வுடன் தோழர் ஒருவர் எழுதியுள்ளதை வெளியிடுகிறோம். எஸ்.வி.ராஜதுரையுடன் வ.கீதா எழுதியவை பெரியார் குறித்த நூல்கள் மட்டுமல்ல; பல்வேறு மார்க்சிய நூல்கள், கவிதை, சிறுகதை மொழியாக்கங்கள் உண்டு. வ. கீதா, எம்.எஸ். எஸ்.பாண்டியனுடன் இணைந்தும் எழுதியுள்ளார். அதேபோல இராமாயணம் பற்றி பெரியார் எழுதிய விமர்சனங்களை ஆங்கில மொழிக்குக் கொண்டு சென்ற பாலா ரிச்மன் என்னும் அமெரிக்க அறிஞருடனும் இணைந்து எழுதியுள்ளார்.

பெரியாரையும் அவரது சுயமரி யாதை இயக்கத்தையும் குறிப்பிட்ட வரலாற்று, அரசியல் சூழலில் வைத்தும் பெரியார் இயக்கத்தவரால் எந்த நூலும் எழுதப் பட்டிராத நிலையில், எஸ்.வி. ராஜ துரையுடன் இணைந்து வ.கீதா எழுதியுள்ள ‘பெரியார்: சுயமரியாதை சமதர்மம் நூலுக்கோ, எஸ்.வி. ராஜதுரை தனியாக எழுதியுள்ள ‘பெரியார்: ஆகஸ்ட் 15’ நூலுக்கோ இணையான நூலொன்றை வீரமணி கூட்டத்தார் என்றேனும் எழுதியிருக்கிறார்களா? அதேபோல, பெரியாரின் வாழ்வையும் சிந்தனையையும் இந்தியா முழுவதற்கு மட்டுமின்றி உலகெங்கினுமுள்ள அறிஞர் பெருமக்களுக்கும் எடுத்துச் செல்வதற்காக வ.கீதாவும், எஸ்.வி.ராஜ துரையும் இணைந்து எழுதியுள்ள ‘Towards a Non-Brahmin Millennium: From Iyothee Thass to Periyar’ என்னும் நூல் மூன்றாவது பதிப்பைக் கண்டிருக்கிறது. வ.கீதாவும், எஸ்.வி. ராஜதுரையும் எழுதிய ஆங்கிலக் கட்டுரைகளின் தொகுப்பு ‘The Periyar Century: Themes in Caste and Gender’ என்னும் தலைப்பில் பாரதிதாசன் பல்கலைக் கழகத்தால் சென்ற ஆண்டு வெளியிடப்பட்டுள்ளது. இதில் வ.கீதாவின் பங்களிப்பு தான் முதன்மையானது. ஹைதராபாத், மும்பை, டெல்லி, திருவனந்தபுரம், கோல்கத்தா போன்ற இந்திய நகரங்களில் மட்டுமல்லாது அமெரிக்கா, இலங்கை போன்ற நாடுகளும் நடத்தப்பட்ட பல்வேறு கருத்தரங்குகளில் கலந்து கொண்டு பெரியார் கருத்துகளைப் பரப்பியவர் வ.கீதா.

பெண் விடுதலை குறித்த சிந்தனைகளுக்கும் செயல்பாடுகளுக்கும் தந்தை பெரியாரும் சுயமரியாதை இயக்கப் பெண்களும் வழங்கிய பங்களிப்புகளை ‘காலக் கனவு’ என்னும் நாடக வடிவத்தில் அமைத்து அதைத் தமிழகத்தின் முக்கிய நகரங்களில் மட்டுமின்றி டெல்லி ஜவகர்லால் நேரு பல்கலைக் கழகத்திலும் அரங்கேறச் செய்தவர் வ.கீதா தான். ‘இந்துப் பண்பாட்டைக் காப்பாற்றுதல்’ என்னும் பெயரால் கர்நாடக மாநிலத்தில் ராம் சேனையினர் நடத்தி வரும் காலித்தனங்களைக் கண்டித்து டெல்லி பல்கலைக்கழக மாணவர்கள் அருந்ததி ராய் போன்ற அறிஞர்களைக் கொண்டு நடத்திய கண்டனக் கூட்டங்களில் பெண் விடுதலை பற்றி பெரியார் கூறிய கருத்துகளும் படிக்கப்பட்டன. அவற்றை ஆங்கிலத்தில் மொழியாக்கம் செய்து அந்த மாணவர்களுக்குக் கொடுத்துவிட்டு வந்தவர் வ.கீதா தான்.

வ. கீதா எழுதிய ஆங்கில நூல்கள், மும்பை எஸ்.என்.டி.டி. பெண்கள் பல்கலைக்கழகத்தில் பாட நூல்களாக வைக்கப்பட்டுள்ளன. இவற்றில் பெரியார் கருத்துகள் கணிசமாக இடம் பெற்றுள்ளன. ‘அனைவருக்கும் கல்வி’ என்னும் மத்திய அரசின் திட்டத்தின் கீழ் தமிழக அரசின் பள்ளிக் கல்வித் துறை, தொடக் கப் பள்ளிச் சிறுவர் சிறுமிகளுக்காக ‘வாசிப்பு நூல்கள்’ சிலவற்றைக் கொண்டு வந்துள்ளது. அவற்றைக் கொண்டு வரும் பொறுப்பு வ.கீதா விடம் ஒப்படைக்கப்பட்டது. வ.கீதா வின் பொறுப்பின் கீழ் கொண்டு வரப்பட்ட நூல்களிலொன்று ‘அனைவரும் உறவுகளே’. பார்ப்பனிய கல்வி முறையே இதுகாறும் ஆதிக்கம் செலுத்தி வந்த நிலையில் துப்புரவுத் தொழிலாளிகளையும் செருப்புத் தைக்கும் தொழிலாளியையும் குழந்தைகள் ‘மாமா’, ‘அண்ணன்’ என்று உறவு முறை வைத்து அழைக்கும்படி செய்கிறது அந்த நூல். அந்த ‘வாசிப்பு நூல்கள்’ வெளியீட்டு விழா சென்னையில் சென்ற ஆண்டு நடந்தது. அதில் சிறப்புரையாற்றிய அமைச்சர் தங்கம் தென்னரசு, வ.கீதாவின் பணிகளைப் போற்றிப் புகழ்ந்தார். ‘கீதோபசங்களை வெறுப்பவன் நான். ஆனால், இந்த கீதாவின் (வ.கீதாவின்) உபதேசங்களை மணிக்கணக்கில் கேட்பதில் எனக்கு விருப்பமுண்டு’ எனப் பேசியிருக்கிறார்.

தோழர் எஸ்.வி. ராஜதுரை மார்க்சிய சிந்தனையாளர். பல ஆண்டுகள் பொதுவுடைமை இயக்கங்களில் இருந்தவர். தற்போது எந்தக் கட்சியையும் நிறுவனத்தையும் சாராமல் இருக்கும் அவர், பெரியார் சிந்தனையை உலகெங்கும் பரப்புவதற்காக, இப்பணியில் ஈடுபட்டுக் கொண்டிருந்ததன் காரணமாக ஒரு கண் பார்வையை இழந்து, மும்முறை மாரடைப்பால் பாதிக்கப்பட்டிருந்த போதிலும் புற்று நோயால் அவதியுற்ற தனது துணைவியாரின் ஓய்வூதியத்தையும், தனது எழுத்துகளுக்குக் கிடைக்கும் அற்ப சன்மானங்களையும் கொண்டு எழுபது வயதை நெருங்கும் இந்த நேரத்திலும் சலிப்பின்றி உழைத்து வருபவர்.

- ஓர் உணர்வுள்ள தமிழன்

Pin It

‘விடுதலை’ நாளேடு அறிவார்ந்த கூர்மையான வாதங்களை முன் வைத்து இன எதிரிகளைக் கலங்கடித்த காலம் ஒன்று இருந்தது. ஆனால், ‘விடுதலை’ இப்போது போராட்டப் பண்புகளை இழந்து சமரசங்களோடு தனி மனித துதிப்பாடலில் மூழ்கிப் போய் கிடக்கிறது. அந்தக் கழகமே உறுதியான கொள்கைப் பயணமும், லட்சியத் தெளிவுமின்றி சந்தர்ப்பவாத சேற்றில் மூழ்கிவிட்ட போது அதன் மோசமான பிரதிகளாகவே அந்த அமைப்பின் ஏடுகளும் - மாறி விடுகின்றன!

பெரியார் நூல்கள் நாட்டுடைமை பற்றி பெரியாரிய சிந்தனையாளர் தோழர் எஸ்.வி. ராஜதுரை, ‘தினமணி’யில் எழுதிய கட்டுரைக்கு ‘விடுதலை’ (3.3.2009) ஏற்கனவே எழுதிய பழைய சொத்தை வாதங்களையே மீண்டும் எழுதித் தீர்த்திருக்கிறது. தோழர் எஸ்.வி.ஆர். தனது கட்டுரையில் எழுப்பியுள்ள ஒரு கேள்விக்குக் கூட ‘விடுதலை’யின் மின்சாரத்தால் பதில் கூற முடியவில்லை. எஸ்.வி.ஆர். எழுப்பிய முக்கிய கேள்விகள் இவை தான்!

1. நீதிமன்றத்தில் விசாரணையில் உள்ள வழக்கு பெரியார் நூல்கள் நாட்டுடைமை பற்றியது அல்ல; பெரியார் ‘குடி அரசு’ ஏட்டில் எழுதியது, பேசியது பற்றிய முழுமையான தொகுப்பை வெளியிடுவது பற்றிய வழக்கு தான். காலவரிசைத் தொகுப்பு என்பது வேறு; நூல்கள் நாட்டுடைமை என்பது வேறு.

2. தலைப்பு வாரியாக பெரியார் கட்டுரைகளை வெளியிடுவது பெரியார் பற்றிய முழுமையான பரிமாணத்தை வெளிப்படுத்தாது. பெரியார் சிந்தனையில் சாதி ஒழிப்பு, பெண் விடுதலை, கடவுள் மறுப்பு, மத மறுப்பு, பொருளாதாரம் தொடர்பான கருத்துகளைத் தனித்தனியே பிரித்துப் பார்க்க முடியாது. அவரது சிந்தனைகள் ஒன்றிலிருந்து ஒன்று பிரிக்க முடியாதவை. எனவே, அவர் வாழ்ந்த சமூக அரசியல் பண்பாட்டுப் பின்புலத்திலிருந்து அவர் சிந்தித்த கருத்துகளை அந்தப் பின்புலத்தோடு காலவரிசைப்படி தருவதே சரியானது.

3. பெரியாரால் - ஏற்கனவே வாங்கப்பட்ட சொத்துக்களின் அறங்காவலர்களாக சுயமரியாதைப் பிரச்சார நிறுவனத்தின் ஆயுட்கால உறுப்பினர்கள் செயல்படுவார்கள் என்று சுயமரியாதை பிரச்சார நிறுவனத்தின் சட்ட திட்டம் கூறுகிறது. இதில் பெரியாரின் - எழுத்தும் பேச்சும், எப்படி வரும்? தனது பேச்சையும், எழுத்தையும் பெரியார் ஏற்கனவே வாங்கி வைத்திருந்ததாக வீரமணி கூறுகிறாரா? இது பெரியாரை இழிவுபடுத்துவதல்லவா?

4. சுயமரியாதை சங்கத்தின் சட்டத் திட்டம் சுயமரியாதை சங்கத்துக்காக, சுயமரியாதை சங்கத்தின் நிதியிலிருந்து பெரியார் வாங்கிய சொத்துகளைப் பற்றித்தான் குறிப்பிடுகிறது. ஆனால், பெரியார் நடத்திய ‘குடிஅரசு’, ‘பகுத்தறிவு’, ‘புரட்சி’, ‘விடுதலை’, ‘ரிவோல்ட்’, ‘ஜஸ்டிஸ்’ முதலிய ஏடுகள் ‘சுயமரியாதை பிரச்சார நிறுவன’த்தால் வெளியிடப்பட்டவையே அல்ல. அந்த நிறுவனம் பதிவு செய்யப்பட்டது 1952 இல் தான்! பிறகு சுயமரியாதை பிரச்சார நிறுவனத்தின் சார்பில் எப்படி உரிமை கோர முடியும்?

5. எழுத்துப்பூர்வமாக - ஒருவருக்கு ஒப்புதல் தந்தால் தான் பதிப்புரிமை கோர முடியும் என்று பதிப்புரிமை சட்டம் கூறுகிறது. பெரியார் - வீரமணிக்கு அப்படி எழுத்துப்பூர்வமாக பதிப்புரிமை வழங்கியுள்ளாரா? இல்லையே!

6. ஏறத்தாழ எட்டு ஆண்டுகால ‘குடிஅரசு’ம், இரண்டு ஆண்டுகால ‘விடுதலை’யும் தம்மிடம் இல்லை என்று ‘விடுதலை’யில் வீரமணியே அறிக்கை வெளியிடுகிறார். இதுதான் பெரியாரின் ‘அறிவுசார்ந்த சொத்தை’ - இவர் பாதுகாத்த லட்சணமா?

- இப்படி தோழர் எஸ்.வி. ராஜதுரை எழுப்பிய எந்தக் கேள்விக்கும் ஒருவரி பதில்கூட மின்சாரத்தின் கட்டுரையில் கிடையாது. பதில் சொல்ல வந்ததாக - பேனா பிடித்தவர்கள் ஒன்றுக்குக்கூட பதில் கூறாமல் திணறிப் போய் நிற்பது அவர்களின் பரிதாப நிலையையே படம்பிடித்துக் காட்டுகிறது; சரி விட்டு விடுவோம்.

வேறு என்ன கருத்துகளை அக்கட்டுரை, முன் வைக்கிறது? எல்லாமுமே பழைய பல்லவி. பெரியார் நூல்களை காலவரிசைப்படி - பெரிய பெரிய தொகுதிகளாக வெளியிட்டால் அது கண்டிப்பாக அலமாரியில்தான் தூங்குமாம்! வெகு மக்களுக்கு போய்ச் சேராதாம்! வெகு மக்களுக்கு சென்றடைய வேண்டுமானால் என்ன செய்ய வேண்டுமாம்! எந்த பதிப்பகத்தாருக்கும் இதுவரை தெரியாத ஆராய்ச்சியை நடத்தி, ‘மின்சார’த்தின் கட்டுரை விளக்கம் அளித்திருக்கிறது. 300 பக்கங்களுக்கு மிகைப்படாமல் இருந்தால் அது, வெகு மக்களுக்கு போய்ச் சேர்ந்துவிடுமாம்! அதுவே 301 பக்கங்களாகிவிட்டால், அது ‘கண்டிப்பாக’ அலமாரிக்குள் முடங்கிவிடுமாம்! 299 பக்கங்கள் வரை இருந்தால் மட்டுமே அது கடை கோடி பொது மக்களுக்கு போய் சேரும் என்ற திடுக்கிடும் ஆய்வுகளைக் கூறி ‘விடுதலை’ திணற வைத்துள்ளது. பெரியாரின் கருத்துகளை தலைப்பு வாரியாகத் தொகுத்து - இதுவரை 31 தொகுதிகளை வெளியிட்டுள்ளதாகவும், அக்கட்டுரை கூறுகிறது. பெரியாரியலை வெகு மக்களிடம் கொண்டு செல்லும் ‘சூட்சமம்’ பக்கங்களின் எண்ணிக்கையில் அடங்கியிருப்பதைக் கண்டறிந்துள்ள மின்சாரத்துக்கு நாம் பதில் சொல்ல வேண்டாம்; அவர்கள் நடத்தும் ‘திராவிடன் புத்தக நிலையமே’ பதில் தந்திருக்கிறது.
தங்களின் நோக்கம் வெகுமக்களிடம் பெரியாரியலைப் பரப்புவதைத் தவிர, அறிவுஜீவிகளுக்கோ, ஆராய்ச்சியாளர்களுக்கோ அல்ல என்று மின்சாரம் எழுதுவதற்கும் இதில் பதில் கூறப்பட்டுள்ளது.

‘சாதி - தீண்டாமை’ எனும் தலைப்புகளில் வெளி வந்துள்ள 31 தொகுதிகளிலும் கடைசி பக்கத்தில் ஒரு விளம்பரத்தை வெளியிட்டிருக்கிறார்கள்.

“ஒவ்வொரு பாகமும் 300 பக்கங்களுக்கு மேல்! மக்கள் பதிப்பு... ஆய்வு மேற்கொள்ளும் மாணவ மணிகளே! மதிப்புமிகு வரலாற்று ஆசிரியர்களே கைவிளக்காய் பயன்படும் அய்யாவின் இந்த வழிகாட்டி நூலை வாங்கிப் பயன் அடையுங்கள்” - என்று அந்த விளம்பரம் கூறுகிறது. வரலாற்று ஆசிரியர்களுக்கும், ஆய்வாளர்களுக்கும் ‘கை விளக்காக’ - வெளியிடுகிறோம் என்று விளம்பரம் செய்து கொண்டு, இன்னொரு பக்கம் ‘வெகு மக்களுக்கு’ கொண்டு செல்வதே தமது நோக்கம் அறிவு ஜீவிகளுக்கு அல்ல என்று ‘மின்சாரங்கள்’ எழுதிக் கொண்டிருக்கிறார்கள். 2005 ஆம்ஆண்டில் - பெரியார் சிந்தனைகளை 503 பக்கங்களில் தொகுத்து, திராவிடர் கழகம் வெளியிட்டுள்ளது - மின்சாரத்துக்கு தெரியாது போலும்! கருத்தியல் தளம் ஏதுமின்றி சந்தர்ப்பவாத நோக்கத்தோடு, பெரியார் திராவிடர் கழகத்தின் முயற்சிகளை தடைப்படுத்த வேண்டும் என்ற நோக்கத்தோடு - எதையாவது ஒரு பதிலைக் கூற வேண்டுமே என்ற ‘நெருக்கடிக்குள்’ சிக்கி பேனாவைப் பிடிப்பதால் தான் இப்படி - முரண்பாட்டுக்குள் சிக்கிக் கொள்கிறார்கள்.

மற்றொரு ‘திடுக்கிடும்’ ஆராய்ச்சியையும் மின்சாரம் கட்டுரை முன் வைத்துள்ளது. பெரியார் காலத்தில் - அவர் வாழ்ந்த போது பெரியார் கருத்துகளைப் பற்றி கவலைப்பட்டவர்கள் தான். இப்போது பெரியார் கருத்துகளையே பேசத் தகுதி படைத்தவர்கள் என்கிறது அந்த ஆராய்ச்சி! பெரியார் காலத்துக்குப் பிறகு உணர்ந்து, பெரியாரியலைப் புரிந்து கொண்டு - அந்த தத்துவம் மக்களை சென்றடைய வேண்டிய அவசியத்தைப் புரிந்து, அதைப் பரப்புவதற்கு முன் வந்தால் பாராட்ட மாட்டார்களாம். நீ பெரியார் காலத்தில் என்ன செய்தாய்? உனக்கு என்ன தகுதி என்று கேட்பார்களாம். அப்படியே இருக்கட்டும்; ஒரு கேள்வியை கேட்கிறோம்; தி.மு.க. தோன்றிய காலத்திலிருந்து 1967 ஆம் ஆண்டு வரை பெரியாரை குறை கூறி, பெரியாரை கடுமையாக விமர்சித்தவர் தானே கலைஞர். அவரைப் பார்த்து இப்போது பெரியாரைப் பற்றிப் பேச உமக்கு தகுதி உண்டா? என்ற கேள்வியை மின்சாரங்கள் கேட்பார்களா?

அதே கலைஞர் கருணாநிதி - வீரமணிக்கு வழங்கிய பாராட்டுரைகளை தங்கள் தலைவருக்கான நற்சான்றிதழ்களாக இதே கட்டுரையில் எடுத்துக் காட்டி பெருமைப்படுகிறதே, மின்சாரத்தின் கட்டுரை! ஏன் இந்த முரண்பாடு! தமிழகத்திலே ‘விடுதலை’ நாளேடு ஒன்றினால் மட்டுமே “தமிழர் தலைவர்” என்று அழைக்கப்படும் இவர் தான், பெரியார் காலத்திலிருந்து இருந்து வருகிறாராம். எனவே, பெரியார் நூல்கள் பரவுவது பற்றி அவருக்கு மட்டுமே கவலை உண்டாம். மற்றவர்கள் எவரும் கவலைப்படத் தேவை இல்லை என்கிறது மின்சாரம் கட்டுரை! “என் புருசனுக்கு என்மீது இல்லாத அக்கரை உனக்கு என்னாடி?” என்கிற ‘குழாயடி’ தரத்துக்கு - ‘விடுதலை’யின் ‘அறிவார்ந்த’ வாதங்கள் சுருங்கிப் போய் விட்டனவே! அந்தோ பரிதாபம்!

பெரியார் நூல்கள் நாட்டுடைமையாக்க வேண்டும் என்பது அல்ல பிரச்சனை. பெரியாரின் எழுத்து பேச்சுகள் கால வரிசைப்படி தொகுக்கப்பட வேண்டும். இதுதான் வழக்கு என்று எஸ்.வி.ராஜதுரை எழுதியதற்கு மின்சாரம் கூறும் பதில் என்ன? “பெரியாரின் நூல்களில் - அவரின் எழுத்துகள், பேச்சுகள் இல்லையா? இதுவரை 31 தொகுதிகளை வெளியிட்டுள்ளோமே!” என்று பதில் கூறுகிறது கட்டுரை. முதலில் ஒன்றை புரிந்து கொள்ளட்டும்! அவை எல்லாம் பெரியாரின் நூல்களிலிருந்து எடுக்கப்பட்டவையல்ல. பெரியார் நடத்திய ‘குடிஅரசு’, ‘புரட்சி’ போன்ற இதழ்களிலிருந்தும், ‘விடுதலை’ நாளேட்டிலிருந்தும் எடுக்கப்பட்டு, இப்போதுதான் முதன்முதலாக நூல் வடிவமே பெறத் தொடங்கியுள்ளன. தங்களின் வெளியீடு எதிலிருந்து தொகுக்கப்படுகிறது என்பதுகூட தெரியாமலேயே அவ்வளவு அவசரம் காட்டி பேனாவை எல்லாம் தூக்கிவிடக் கூடாது!

பார்ப்பன ஏடுகள் - பெரியார் கருத்தைத் திரிக்க வில்லையா என்று ஒரு கேள்வி. பார்ப்பனர்கள் எப்போதுமே பெரியார் கருத்தைத் திரித்துத் தான் கூறுவார்கள்! அப்படி திரிபுவாதங்கள் நடக்கும்போது முறியடிப்பதுதான் பெரியாரியலாளர்களின் வரலாற்றுக் கடமை! எவருமே பெரியார் கருத்துகளை ‘திரித்து’ விடாதபடி - பெரியார் நூல்களை, ஏடுகளை ‘சேப்டி லாக்கரில்’, ‘தமிழர் தலைவர்கள்’ பூட்டி விடக் கூடாது; அப்படி பூட்டி வைத்திருக்கும் போதே சேலம் மாநாட்டுத் தீர்மானங்களை பார்ப்பன ஏடுகள் திருத்தி வெளியிட்டுவிட்டதாக, ‘மின்சாரம்’ கட்டுரை கூறுகிறதே! அப்போது மட்டும் எப்படி ‘திருத்தல் வாதம்’ நடந்ததாம்? இதிலிருந்து ஒரு உண்மையை ‘மின்சாரங்கள்’ புரிந்து கொள்ள வேண்டும். பெரியார் நூல்கள் அரசுடைமையாகா விட்டாலும் திருத்தல் வாதம் நடக்கும்; அரசுடைமையானாலும் திருத்தல் வாதம் நடக்கும்; அப்படி திருத்தல் வாதங்கள் வரும் போது - அதை எதிர் கொண்டு முறியடிப்பதுதான் - உண்மையான பெரியாரியல்வாதிகள் கடமையாக இருக்கும். இத்தகைய ‘விவாதக் களங்கள்’ எதிர் நீச்சல் வழியாகத்தான் பெரியாரியலே - தனது வெற்றிப் பயணத்தை நடத்தி வந்திருக்கிறது. அதனால்தான் தன்னுடைய கருத்துகளுக்கு எப்போதுமே எதிரிகள் தான் விளம்பரப்படுத்தி வருகிறார்கள் என்று அறிவு ஆசான் பெரியார் கூறி வந்திருக்கிறார். விவாதங்களுக்கும், எதிர்ப்புகளுக்கும் உள்ளாகும் போதுதான் பெரியாரியல் மக்களிடம் சென்றடையும். பார்ப்பன இருட்டடிப்பைக் கிழித்து பெரியாரியம் வளர்ந்ததே - அவர்கள் காட்டிய எதிர்ப்பு - திரிப்புகளால் தான்.

பெரியார் கருத்தை - பார்ப்பனர்கள் மட்டுமா திரிக்கிறார்கள்; பெரியாரை - தங்களுக்கு மட்டுமே உரிமை கொண்டாடும் “தமிழர் தலைவர்”களும் திரிக்கிறார்களே? அடுக்கடுக்கான ஆதாரங்களோடு - ‘புரட்சி பெரியார் முழக்கம்’ அம்பலப்படுத்தி வருகிறதே; அதற்கெல்லாம் பதில் உண்டா? பாரதியார் பாடல்கள் திரிக்கப்பட்டுவிட்டதாக - பாரதியாரின் பெயர்த்தி குமுறுகிறாராம்! “இதற்கு என்ன பதிலை வைத்துள்ளார்கள் ராஜதுரைகள்?” என்று சவால் விடுகிறது அந்தக் கட்டுரை! இதற்கு ராஜதுரை ஏன் பதில் வைத்திருக்க வேண்டும்? அதைத் தான் பாரதியின் பேத்தியே பார்த்துக் கொள்வாரே!

பெரியார் - தனித்தமிழ் நாடே கேட்கவில்லை என்று ‘தினமணி’யில் கி.வீரமணி கட்டுரை எழுதிய போது, வீரமணியின் திரிபுவாதத்தை ஆதாரத்தோடு அம்பலப்படுத்தி, ‘மரபும் - திரிபும்’ நூலை எழுதினாரே ராஜதுரை! 2001 ஆம் ஆண்டு வெளிவந்த இந்த நூலுக்கு கடந்த எட்டு ஆண்டுகளாக ‘விடுதலை’யோ, ‘தமிழர் தலைவரோ’ - மின்சாரமோ வாய் திறக்காதது ஏன்? பதில் கூறுவார்களா?

பெரியார் தனித் தமிழ்நாடு கேட்கவில்லை என்று, வீரமணி திரித்தாரா இல்லையா? அந்த திருத்தல்வாதத்தை எப்படி முறியடிக்க முடிந்தது? பெரியார் பேச்சு - எழுத்துகளைக் கொண்டுதானே! இந்த எழுத்தும் பேச்சும். பெரியார் பிறந்தகத்துக்குள் முடங்கி விட்டால் திரிப்பவர்கள் திரித்துக் கொண்டுதானே இருப்பார்கள்? இந்த ஆபத்துகள் நிகழக் கூடாது என்பதற்குத் தான் பெரியார் எழுத்து பேச்சுகளை ‘பிறந்தகத்தை’ விட்டு வெளியே கொண்டு வரவேண்டும் என்ற கருத்து வலியுறுத்தப் படுகிறது. தலைப்பு வாரியாகத் தொகுக்கிறோம் என்று கூறுகிறவர்களைக் கேட்கிறோம்; பெரியார் தனித்தமிழ் நாடு பற்றி பேசிய ஏராளமான பேச்சுகளை தனித் தலைப்பாகத் தொகுத்து வெளியிடுவீர்களா?

‘தினமணி’ பார்ப்பன நாளேட்டில் எழுதலாமா? ‘தினமணி’ வெளியிடுகிறது என்றாலே, அதன் நோக்கம் புரியவில்லையா என்று மின்சாரம் கேட்கிறார். ‘தினமணி’ பார்ப்பன ஏடு தான். அந்த பார்ப்பன ஏட்டுக்கு பெரியார் ‘தனிநாடு’ கேட்கவில்லை என்று இதே வீரமணி கட்டுரை எழுதவில்லையா? பார்ப்பன இந்துத்துவ சக்திகளை மகிழ்விக்க ஜெயலலிதா ஆட்சியில் மதமாற்றத் தடைச் சட்டம் கொண்டு வரப்பட்டபோது, அதை ஆதரித்து நீதிபதி வேணுகோபால் ‘தினமணி’க்கு கட்டுரை எழுதி, அந்தக் கட்டுரையை ‘தினமணி’க்கு நன்றி தெரிவித்து, ‘விடுதலை’ மறு வெளியீடாக வெளியிடவில்லையா?

தனது வாதத்துக்கு வலிமை சேர்க்க வரலாற்று நிகழ்ச்சி ஒன்றுக்கு தாவுகிறது மின்சாரம் கட்டுரை! அது ‘பெரியார் பொன்மொழிகள்’ நூல் தடை செய்யப்பட்டு, பெரியார் கைது செய்யப்பட்ட வரலாறு. சரி; இந்த வரலாற்று நிகழ்வாவது இவர்களின் வாதங்களுக்கு வலிமை சேர்க்கிறதா என்றால், அதுவும் இல்லை. திருச்சி திராவிட மணி பதிப்பக சார்பில் 1947 இல் வெளியிடப்பட்டது ‘பொன் மொழிகள்’. பெரியார் அனுமதியோடுதான் - இந்த நூலை அந்த பதிப்பகம் வெளியிட்டுள்ளது. இதை பெரியாரே நீதிமன்றத்தில் கூறியுள்ளார். எனவே பெரியார் தனது காலத்திலேயே பிற நிறுவனங்கள் தமது நூலை வெளியிட அனுமதித் துள்ளார் என்பதும், தான் மட்டுமே வெளியிட கருத வில்லை என்பதும் தெளிவாகிறது. அந்த வழக்கில் நீதிமன்றத்தில் பெரியார் மற்றொரு கருத்தையும் கூறினார்:

“‘பொன்மொழிகள்’ நூலில் இடம் பெற் றுள்ளவை பொறுக்கி எடுக்கப்பட்டு தொகுக்கப் பட்டவை. அதிலுள்ள வாசகங்கள் நுணுக்கமாகப் படித்துப் பார்த்து கவலை கொள்ளவில்லை. அவைகள் என்னால் எழுதப்பட்ட, பேசப்பட்டவை தானா என்பதும் எனக்குத் தெரியாது. இவ்வளவு காலத்துக்குப் பிறகும் அவைகள் சரியாகக் குறிப்பிடப்பட்டுள்ளன என்றும் என்னால் சொல்ல முடியாது” என்று நீதிமன்றத்தில் கூறிய பெரியார், இப்படி பொறுக்கி எடுத்து தொகுக்கப்பட்டதால் - இப்போது, அதன் சரியான அர்த்தத்தைப் புரிந்து கொள்ள முடியாமல் போய்விட்டது என்பதை இவ்வாறு கூறுகிறார்: “பெரும்பாலும் அவைகள் அக்காலங்களில் பயிற்சியில்லாத இளைஞர்களால் நெட்டெழுத்திலே எழுதப்பட்டவைகள். மேலும் அவைகள் வெளியிடு பவர்களின் கருத்துக்கேற்றபடி வெளியிட்டிருக்க லாம். எனவே அவைகளிலிருந்து தொகுக்கப் பட்ட இத் தொகுப்பு நான் அன்று என்ன கருத்துடன் சொல்லியிருப்பேனோ அதைக் கொண்டிருக்க முடியாது” என்று தெளிவாகக் கூறியுள்ளார்.

ஒரு காலத்தில் - எந்த சமூகப் பின்னணியில் எத்தகைய அரசியல் சூழலில் ஒரு கருத்து முன் வைக்கப்படுகிறது என்பதைப் புரிந்து கொள்வதற்குத் தான் காலவரிசைத் தொகுப்பு வரவேண்டும் என்ற கருத்தே வலியுறுத்தப்படுகிறது. காலச் சூழல் - சமூக அரசியல் பின்னணியிலிருந்து துண்டித்து, கருத்து களை மட்டும் தலைப்பு வாரியாக பிரித்து வெளி யிடுவது சரியான புரிதலுக்கு இட்டுச் செல்லாது என்பதையே பெரியாரின் இந்த நீதிமன்ற வாக்கு மூலமே சான்றாக உணர்த்திக் கொண்டிருக்கிறது. “அன்று என்ன கருத்துடன் சொல்லியிருப்பேனோ” என்று பெரியார் கூறியிருப்பதுதான் இங்கே ஆழமாகக் கவனத்தில் கொள்ளத்தக்கதாகும். பெரியார் கூறுவதற்காவது மதிப்பளித்து தங்களை திருத்திக் கொள்ள வேண்டும் என்பதைத்தான் கட்டுரையாளர்களுக்கு பதிலாக முன் வைக்க விரும்புகிறோம்.

கால்பந்து விளையாட்டில் - பந்தை விட்டுவிட்டு விளையாடுகிறவர் காலை உதைப்பது போல் எஸ்.வி. ராஜதுரை அவர்களையும், அவரோடு துணையாசிரியராக இருந்தது பெரியாரியம் பற்றிய ஆழமான தமிழ் ஆங்கில நூல்களை வெளியிட்டவருமான வ.கீதாவையும், மிகவும் கீழ்த்தரமாக அக்கட்டுரையில் குறிப்பிடப்பட்டுள்ளது. வ. கீதா - எஸ்.வி. ராஜதுரையின் ‘பார்ப்பனத் தோழி’யாம்! தரம்தாழ்ந்த எழுத்து! வ.கீதா பிறப்பால் பார்ப்பனர் தான்; ஆனாலும் பெரியாரியல்வாதி. பெரியாரியலுக்கு மகத்தான பங்களிப்புகளை அறிவுத்தளத்தில் வழங்கியவர். (தோழர் எஸ்.வி. ராஜதுரை, வ. கீதாவின் பெரியாரியல் பங்களிப்பு குறித்து தோழர் ஒருவர் எழுதியதை 4 ஆம் பக்கத்தில் வெளியிட்டிருக்கிறோம்) - பெரியாரியலுக்கு இவர்கள் வழங்கிய பங்களிப்பில் ஒரு சிறு அளவாவது கி.வீரமணி அறிவு தளத்தில் வழங்கியது உண்டா?

“நான் ஒரு பாப்பாத்தி தான்” என்று சட்ட மன்றத்தில் ஆணவத்தோடு அறிவித்து, இந்து பார்ப்பனிய கொள்கைகளை முழுமையாக ஏற்றுக் கொண்ட, ஜெயலலிதாவை ‘சமூகநீதி காத்த வீராங்கனையாக்கி’ 12 ஆண்டு காலம் தோளில் சுமந்து திரிந்தவர்கள், பெரியாரியலை ஏற்றுக் கொண்ட பார்ப்பனரைக் குறை கூறத் தகுதி உண்டா? கலைஞர் கருணாநிதிக்கும் வீரமணிக்கும் ‘வழக்கறிஞராக’ நின்று கட்டுரை எழுதும் சின்னக் குத்தூசி யார்? அவரும் ஒரு பார்ப்பனர் தானே? அவரது ‘முரசொலி’ கட்டுரைகளை ‘விடுதலை’ வெளியிடுகிறதே! ஆந்திர நாத்திகர் கோரா - பார்ப்பனர் தானே? அவரை பெரியார் திடலுக்கு அழைக்கவில்லையா? இப் போதும் அவரது மகன் நடத்தும் நாத்திகர் மாநாடுகளுக்கு - வீரமணி போவதில்லையா? ‘நக்கீரன்’ வார ஏட்டில் “இந்து மதம் எங்கே போகிறது?” என்று அக்னிஹோத்ரம் ராமானுஜ தாதாச்சாரி எழுதி வந்த கட்டுரையை வாரம் தவறாமல் ‘விடுதலை’யும் வெளியிட வில்லையா? தாத்தாச்சாரியார் - என்ன “சூத்திரரா”?

பெரியார் நூல்களைப் பரப்புவது பற்றி, “யாரும் கவலைப்படத் தேவையில்லை” என்று கூறுகிறது. மின்சாரத்தின் கட்டுரைத் தலைப்பு; தி.மு.க. கூட்டணியில் ‘கலைஞரின் இதயத்தில் சீட்டு’ வாங்கிக் கொண்டு சோனியாவின் தூதுவர்களாக புறப்படும் “தன்மானத் தமிழர் தலைவர்களுக்கும்” அவரது அரசவை பாராட்டுரையாளர்களுக்கும் வேண்டுமானால் பெரியார் நூல்கள் சிந்தனைகள் பற்றிய கவலை இல்லாமல் இருக்கலாம். ஆனால் உண்மையான பெரியாரியல்வாதிகள் கவலைப்படத்தான் செய்வார்கள். முனை மழுங்கிய வாதங்களை எழுப்பிப் பயன் இல்லை.

வேதங்களைப் பார்ப்பனர்கள் அச்சில் ஏற்றாமல், தங்களுக்குள்ளேயே மனப்பாடம் செய்து வைத் தார்கள். எனவே அதற்கு ‘மறை’ என்று பெயர் சூட்டப்பட்டது. மக்களிடம் வேதத்தை கொண்டு செல்ல பார்ப்பனர்கள் மறுத்த காரணம் - அது தங்களின் சுரண்டும் உடைமை என்பதால் தான். வேத எதிர்ப்பாளரான பெரியாரின் சிந்தனைகளை தங் களுக்குள் முடக்கிட துடிப்பதும்கூட பார்ப்பனியம் தான். பெரியாரியம் பார்ப்பனர் சுரண்டலுக்கான வேதம் அல்ல; பார்ப்பனரல்லாத மக்களின் உரிமைப் பெட்டகம்; அது மக்களிடம் தான் வரவேண்டும்! மின்சாரங்கள் பெரியாரியலை ‘வேத’மாக்க முயல வேண்டாம்.

- இராவணன்

Pin It