kaattaaru cover July17 500

மருத்துவர் அசோக் ராஜகோபால் இந்திய அரசின் பத்ம விருது பெற்றவர். கடந்த 30 ஆண்டுகளில் 25,000 க்கும் மேற்பட்ட முழங்கால் மூட்டு மாற்று அறுவை சிகிச்சைகளைச் செய்து சாதனை படைத்தவர். இந்தத் துறையில் இந்தியாவிலேயே முன்னோடியாகத் திகழ்பவர். இவர் தன் அனுபவத்தில், பல முன்னணி யோகா குருக்களுக்கு மூட்டு மாற்று அறுவை சிகிச்சை செய்திருப்பதாகச் சொல்கிறார்.

யோகா என்பது, பல ஆயிரம் கோடி ரூபாய் பணம் புரள்கிற சர்வதேசத் தொழில் துறையாக இருப்பதாகவும், வயது முதிர்ச்சியின் பாதிப்புகளில் இருந்து மீட்கக்கூடிய வல்லமை கொண்டதாகவும், ஒழுங்காகப் பின்பற்றுகிறவர்களை வலிமையானவர்களாகவும், மன அமைதி கொண்டவர்களாவும் ஆக்கும், என்றெல்லாம் சொல்பவர்களுக்குச் சவால் விடுக்கும் அளவுக்கு அமைந்திருக்கிறது  டாக்டர் அசோக் ராஜகோபால் கொடுக்கும் எச்சரிக்கைகள்.

தொலைக்காட்சி நிகழ்ச்சிகள் மூலம் உலகளாவிய யோகா சாம்ராஜ்ஜியத்தை உருவாக்கியிருக்கும் பாபா ராம்தேவைப் போன்ற மிகப் பிரபலமான யோகா பயிற்சியாளர்களில் சிலர், சுவாசப் பயிற்சிகள் மூலம் எச்.ஐ.வி எய்ட்ஸ் மற்றும் புற்றுநோய் போன்ற நோய்களைக் குணப்படுத்த முடியும் எனச் சொல்லி வருகிறார்கள். வட அமெரிக்கவில் மட்டும், ஆண்டுக்கு 35,000 கோடி ரூபாய்க்கும் அதிகமான அளவுக்கு யோகா உபகரணங்களுக்காகச் செலவழிக்கப்படுகிறது. சுமார் ஒன்னரைக் கோடி மக்கள் அங்கே யோகாவைப் பயிற்சிசெய்கிறார்கள்.

ஆனால், டாக்டர் ராஜகோபாலின் கூற்றுப்படி,  உடல் பாகங்களை அதீதமான அளவில் இழுத்து முறுக்கிச் செய்யப்படும் உடற்பயிற்சிகளினால் (Extreme Streching Arthritis எனப்படுகிற மூட்டு வீக்கம் ஏற்படுவதற்கான வாய்ப்புகளை அதிகப்படுத்துகிறது. மூட்டு மற்றும் எலும்பு சம்பந்தப்பட்ட வியாதிகள்  யோகா பின்பற்றுபவர்களிடம் அதிகமாகத் தான் காண்பதாகவும் அவர் சொல்கிறார்.

மேலும் ‘தி டெய்லி டெலிகிராஃப்’ நாளிதழுக்கு அவர் வழங்கிய பேட்டியில் குறிப்பிட்டவை என்னவென்றால்,

“முறையாகக் கட்டுப்படுத்தப்பட்ட ஒரு சூழ்நிலையில் யோகா பயிற்சி செய்யப் பட்டால் அது சிறப்பான ஒரு விசயமாக இருக்கலாம். அதாவது, முறையான பயிற்சிகளும், யோகா நிலைகளில் உடலை வைத்துக்கொள்ளக்கூடிய அளவுக்கு தேவையான உடல் வலிமை கொண்டவர்களும் முறையான பயிற்சி செய்யலாம். ஆனால் பொத்தாம் பொதுவாக அனைத்து மக்களையும் கடுமையான யோகா நிலைகளைப் பயிற்சி செய்ய உட்படுத்துவது அவர்களுக்கு பிரச்சனைகளைத்தான் கொடுக்கும்.

பல யோகா குருக்களே, அவர்கள் மேற்கொள்ளும் கடுமையான யோகா நிலைகளினால் மூட்டு சம்பந்தப்பட்ட அறுவை சிகிச்சைகளை மேற்கொள்ள வேண்டியிருக்கிறது. முழங்காலை வளைத்து, மடித்துத் செய்யப்படும் கடுமையான யோகா நிலைகள், அத்தகைய எந்தவித உடல்பயிற்சியை செய்து பழக்கப்படாதவர்களுக்கு, மோசமான விளைவுகளை ஏற்படுத்தக் கூடும்.

நூற்றுக்கும் மேற்பட்ட மக்களை ஒரு வகுப்பில் கொண்டு நடத்தப்படும் யோகா பயிற்சிகளில், பயிற்சியை மேற்கொள்பவர் களிடத்தில் இத்தகைய பிரச்சனைகளை அதிகமாகக் காணமுடிகிறது. பல யோகா குருக்களுக்கு முழங்கால் மற்றும் மூட்டு சம்பந்தமான பிரச்சனைகள் வருவதற்கு  ‘வஜ்ராசனா’  என்கிற யோகா நிலைகூட காரணமாக இருந்திருக்கிறது.”

இந்தியாவில் Yogalife Center என்கிற அமைப்பை நடத்திவருகிற சாவித்ரி குப்தா என்பவர், யோகா பயிற்சியினால் உடல் பாதிப்பு ஏற்பட வாய்ப்பிருப்பதை ஏற்றுக்கொள்வதாகவும், ஆனால் முறையான பயிற்சிகளின் மூலமும், கடுமையான பயிற்சிகளைக் கொஞ்சம் கொஞ்சமாக, மெதுவாகக் கற்றுக் கொண்டு பின்பற்றுவதன் மூலமும் அத்தகைய பாதிப்புகளை தவிற்க முடியும் என்றும் கூறுகிறார்.

பிரிட்டனில் 1910ஆம் ஆண்டு முதன்முதலில் ஒரு யோகா ஆர்வலர்கள் குழு தொடங்கப் பட்டுள்ளது. ஆனால், 1950 களில் சர் யெகுடி மெகுனின் என்கிற பிரபல வயலின் இசை கலைஞருக்கு  யோகா கலையின் முன்னோடியான பி.கே.எஸ் அய்யங்கார் என்பவர் பயிற்சி கொடுக்க ஆரம்பித்த பிறகுதான் அங்கு யோகா பரவலாக கவனத்தைப்பெற்றது.  அதன் பிறகு, பிரபல இசைகுழுவான பீட்டில்ஸ் (Beatles) இந்தியாவிற்குச் சென்று ரிஷிகேஷில் இருந்த குரு மஹரிஷி மகேஷ் யோகி என்பவருடைய ஆசிரமத்தில் யோகா முகாமில் பங்கேற்றபின், அதிகம் கவனம் பெற்றது.

தி டெலிகிராஃப், 23.10.2010

Pin It

‘மஞ்சள்’ மங்களகரமானது என்ற இந்துப் பொதுப் புத்தியின் செவிட்டில் அறைந்துள்ளது ‘மஞ்சள்’ நாடகம்.  வலியின் நிறமே மஞ்சள். இழிவின் நிறமே மஞ்சள் என்று மனிதர்கள் என்று சொல்லிக் கொள்பவர் களின் அழுக்குப்படிந்த மூளைகளைத் தட்டி எழுப்பிப் பதிய வைத்துள்ளது இந்த நாடகம்.

நாம் இந்த நாடகத்தைப் பார்க்கவில்லை.  நாடகம் நடந்த ஊருக்கும் நமக்கும் வெகுதூரம். ஆனால், இந்த நாடகத்தைப் பார்க்காத நம்மைப் போன்ற இலட்சக் கணக்கானவர்களுக்கும் ஒரு தாக்கத்தை உண்டாக்கியது இந்நாடக நிகழ்வு.

நாடகம் குறித்த Promo Video’s  களின் பயன் மிகப்பெரியது. தமிழ்நாட்டில் இதுபோல, இதுவரை  தமிழர் உரிமைகள், தமிழ்ஈழம், சுற்றுச்சூழல், இயற்கை விவசாயம் தொடர்பான நிகழ்வுகளுக்குரிய Promo Video’s களைப் பார்த்திருப்போம். ஊடகங்களும், பெரும் வணிக நிறுவனங்களும் அதற்காக விளம்பரத் தூதர் களாகப் பணியாற்றியதையும் பார்த்திருப்போம்.

முதன்முறையாக தமிழ் நாட்டின் அடித்தட்டு மக்களின் மிகப்பெரும் துயரத்தையும், நீங்காத இழிவையும் வெகுமக்களின் கவனத்திற்குக் கொண்டு செல்லும் கடமையில் - பெரும் ஊடகங்களையும், நவீன பரப்புரை உத்திகளையும் பயன்படுத்தியுள்ளார் தோழர் ஜெயராணி. அவருக்குத் துணையாக தோழர் சரவணன், பாரதி ஆகியோரும் கடமையாற்றியுள்ளனர்.

இயக்குநர் இரஞ்சித் அவர்கள் மெட்ராஸ், கபாலி படங்கள் மூலமாக மிகப் பெரும் ஜாதி ஒழிப்புப் புரட்சி நடத்திவிட்டார் என்று சமூக வலைத்தளங்களில் பரபரப்புகள் காணப்பட்ட நேரத்தில் நாம், சாதி ஒழிப்புக்கோ, தீண்டாமை ஒழிப்புக்கோ அவை துளியும் பயன்தராது என்றோம். இப்போதும் நமக்கு அதில் மாற்றுக் கருத்துக்கள் இல்லை.

ஆனால், தோழர் இரஞ்சித் நம்மை ஏமாற்ற வில்லை. மிகப்பெரும் உச்சத்தில் இருக்கும் இதே நேரத்தில், ஜாதி ஒழிப்புக்காகக் களத்தில் நிற்கும் தோழர் இரஞ்சித் அவர்களின் பணியைப் பாராட்டுகிறோம்.

நாடகத்தை ஊர் ஊராகக் கொண்டு செல்வதற்கு நீண்ட காலம் ஆகிவிடும். சிறு சிறு வீடியோக்களாக மாற்றி வெளியிட்டால் இன்னும் கூடுதல் பலன் இருக்கும்.

காலங்காலமாக திராவிடர் இயக்கங்களின் பரப்புரைப் பயணங்களில் பேசி வந்த செய்திகளை இன்று, வெகுமக்களின் பெரு ஊடகங்களில் இடம்பெற வைத்து - ஒரு கருத்துருவாக்கத்தைச் செய்துள்ள, தோழர்கள் இதழியலாளர் ஜெயராணி, இயக்குநர் இரஞ்சித், வழக்கறிஞர் சரவணன், பாரதி இன்னும் முகக்காட்டாத ஜெய்பீம் மன்றம், நீலம் அமைப்புகளின் தோழர்கள் அனைவருக்கும் கருப்புச்சட்டைகளின் சார்பில் நன்றி.

“மஞ்சள் எதிர்ப்புப் பாடல்”

கொழம்புல மஞ்சள்

கோயில்ல மஞ்சள்

மூஞ்சியில மஞ்சள்

தாலியில மஞ்சள்

மாலையில மஞ்சள்

சேலையில மஞ்சள்

புதுசுலயும் மஞ்சள்

ஆரத்தியில மஞ்சள்

அம்மா போட்ட மஞ்சள்

கும்பத்துலயும் மஞ்சள்

தங்கத்துல மஞ்சள்

வாசல்ல மஞ்சள்

பூஜையில மஞ்சள்

கொளத்துல மஞ்சள்

கொள்கையில மஞ்சள்

நல்லதுக்கு மஞ்சள் வேணும்

நாளுக்கெல்லாம் மஞ்சள் வேணும்

வெட்டுப்பட்டா மஞ்சள் வேணும்

நோயிக்கெல்லாம் மஞ்சள் வேணும்

ஷிட்...ஷிட்...ஷிட்...

போடாத நீ... தூத்தேறியே....

சாலையோரம் மஞ்சள்

சாக்கடையில் மஞ்சள்

கழிப்பறையில் மஞ்சள்

மலக்குழியில் மஞ்சள்

கைகளியே மஞ்சள்

கண்ணீரில் மஞ்சள்

வலியின் நிறம் மஞ்சள்

இழிவின் நிறம் மஞ்சள்

அந்த மஞ்சள் உனக்கு

இந்த மஞ்சள் எனக்கா?

நல்ல மஞ்சள் உனக்கு

நாத்த மஞ்சள் எனக்கா?

உன்னோட மஞ்சள் உனக்கே உனக்கு

உன்னோட மலமும் உனக்கே உனக்கு

ராக்கெட் விடுற, சாட்டிலைட் விடுற

மலமள்ள மட்டும் மனுசன விடுற

மேக் இன் இந்தியா, டிஜிட்டல் இந்தியா

நிறுத்து... நிறுத்து... உன் வேசத்த நிறுத்து

ஏ டி எம் இப்போ பேடிஎம் ஆச்சு

ப்ளாஸ்டிக் பணமும் கேஷ்லெஸ் ஆச்சு

ஆதார் இந்தியா, அல்ட்ரா இந்தியா

உன் அறிவியல் அறிவு எங்க போச்சு?

ஷிட்...ஷிட்...ஷிட்...

போடாத நீ... தூத்தேறியே....

 

Pin It

670 கோடி மக்கள் வாழும் இவ்வுலகில் 50 முதல் 75 கோடி மக்கள் கடவுள் நம்பிக்கையற்ற நாத்திகர்களாக வாழ்கிறாார்கள். கடந்த பத்தாண்டுகளில் மேற்கொள்ளப்பட்ட பலகட்ட ஆய்வுகளின் அடிப்படையில் இந்தப் புள்ளி விபரங்கள் தொகுக்கப்பட்டுள்ளன.

அமெரிக்கா உள்ளிட்ட பொருளாதார வளர்ச்சிபெற்ற நாடுகளில் நாத்திகமும் வேகமாக வளர்ந்து வருவதாக கலிபோர்னியா பிட்சர் கல்லூரியின் பேராசிரியார் பில் ஜுகர்மேன்  கூறுகிறார். வளர்ச்சி பெறாமல் பின் தங்கியுள்ள நாடுகளில் மதம் இன்னமும் மக்களின்மேல் ஆதிக்கம் செலுத்துவதால் இந்த நாடுகளில் மக்கள் தொகைப் பெருக்கமும் விரைவாக உள்ளது.

நாத்திகர்கள் அதிகம் வாழும் பத்து நாடுகள்

1. ஸ்வீடன் 46.85%,

2. வியட்நாம்  81%

3. டென்மார்க் 43.80%

4. நார்வே 31.72%

5. ஜப்பான் 64.65%

6. செக் குடியரசு 54.61%

7. பின்லாந்து 26.80%

8 .பிரான்ஸ் 43.54%

9. தென்கொரியா 30.52%

10 . எஸ்டோனியா 49%

அய்ரோப்பா, வட அமெரிக்க போன்ற வளர்ச்சி பெற்ற நாடுகளில் மக்களிடம் கடவுளைப் பற்றியும் மதத்தைப்பற்றியும் கேட்கப்பட்ட கேள்விகளுக்கு, மக்கள்  கடவுள் என்பதில் முழமையான நம்பிக்கையில்லை (Absolutely Not Believe in God)    எனக்கு மதத்தில் நம்பிக்கையில்லை(I am Not into Religion) என்று அளித்த பதிலின் அடிப்படையில் இந்தப் புள்ளி விபரங்கள் மிகச்சரியானவையே என்று உறுதிப்படுத்தப்பட்டது.

நாத்திகர்கள் வழக்கம்போல் இளைஞர்கள், ஆண்கள், அதிகம் படித்தவர்களாகவே இருக்கிறார்கள். இவர்கள் சரியான தேர்வையே ஆதரிப்பவர்கள். பெண்ணுரிமை ஆதரவாளர்கள், மனிதாபிமானவர்கள், உடலை வருத்தும் தண்டனைகள் அளிப்பதற்கு எதிரானவர்களாக இருக்கிறார்கள்.  மகிழ்ச்சியாக வாழக் கூடியவர்கள் என்று மக்கள் தொகையியல் ஆய்வுகள் காட்டுகின்றன

இந்தியாவில் 3 சதவீதம் பேர் நாத்திகர்களாக இருப்பதாக 2004 - ல் பி.பி.சி. நடத்திய ஆய்விலும் 5 சதம் பேர் நாத்திகர்களாக இருக்கிறார்கள் என்று நோரிஸ் மற்றும் ஈங்கிள்-ஹார்ட் என்னும் இரண்டு பிரிட்டிஷ் ஆராய்சியாளர்கள் கண்டுள்ளனர் என்று ஜுகர்மேன் தெரிவிக்கிறார். இந்தச் செய்தி நாத்திகர்களைப்பற்றி இணைய தளத்தில் தேடியபோது கிடைத்தக் கட்டுரை. இது 2010-ல் டைம் ஆஃப் இந்தியா நாளிதழ் வெளியிட்டதாக அந்தக் கட்டுரை முடிகிறது.

உலகில் மற்ற நாடுகளில் உள்ள நாத்திகத்திற்கும் இந்தியாவில் உள்ள  நாத்திகத்திறகும் அதிக வேறுபாடுகள் உள்ளது. மற்ற நாடுகளில் கடவுளையும் மதத்தை மட்டும்  மறுத்தால் போதும்.  ஆனால் இந்தியாவில் கூடுதலாக,  சாதியையும் மறுத்து அதற்கு எதிராகவும் போராட வேண்டிள்ளது. தோழர் பெரியார், நாத்திகம் தொடர்பாக சொன்ன கருத்து இந்தியாவிற்கு மிகவும் பொருத்தமானதாக  இன்றும் இருக்கிறது.

“மனிதனை மனிதன் தொடக்கூடாது, கண்ணில் படக்கூடாது, தெருவில் நடக்கக்கூடாது, குளத்திள் தண்ணீர் எடுக்கக்கூடாது போன்ற தீண்டாமைக் கொடுமைகள் தாண்டவமாடுகின்ற ஒரு நாட்டை பூகம்பத்தால் அழிக்காமலோ, எரிமலை கொண்டு எரிக்காமலோ, சமுத்திரம் பொங்கி மூழ்கச் செய்யாமலோ, சண்டமாருதத்தால் துகளாக்கப்படாமலோ இருப்பதைப்  பார்த்த பிறகும், கடவுள் ஒருவர் இருக்கிறார் என்றும், அவர் சர்வ தயாபரர் என்றும் நம்பும் மக்களை என்னவென்று சொல்லுவது”

என்று சமூகம் சார்ந்த நாத்திகம் பேசினார்.  உலகில் மற்றவர்கள் நான்கு சுவர்களுக்குள் பேசிய நாத்திகத்தை பெரியார் மக்கள் மத்தியில் பட்டி தொட்டியெல்லாம் மூலைமுடுக்கெல்லாம் பேசினார்.  நாத்திகத்தை இந்கு இயக்கமாக அதுவும் மக்கள் இயக்கமாக நடத்தினார். இந்தச் சிறப்பு தோழர் பெரியாரைத் தவிர  உலகில் வேறு எந்தத் தலைவர்க்கும் இல்லை.  நாத்திகம் பேசி தன் வாழ்நாளில் வெற்றியும் கண்டவர் பெரியார் மட்டுமே.

மேற்கண்ட கட்டுரையில் உள்ளதைப்போல் இளைஞர்கள்  ஆண்கள் அதிகம் படித்தவர்கள் மட்டும் பேசிய நாத்திகத்தை இங்கு இளைஞர் முதியோர் என்ற பாகுபாடில்லாமல் படிக்காத பாமரனையும், பெண்களையும் நாத்திகம் பேச வைத்தத் தலைவர் பெரியார் மட்டுமே.  சாமி இல்லாத கட்சிகாரன்  என்று தத்துவத்தைச் சொல்லி அடையாளம் காணும் நிலையை உருவாக்கினார்.  

நாத்திகம் பேசி, பண்பட்டதால்தான்  காந்தி சுட்டுக் கொல்லப்பட்டபோதும், பாபர் மசூதி இடிக்கப்பட்டபோதும்,  இரு மிகப் பெரிய கலவரங்களை நாடு சந்தித்தபோது  தமிழகம் மட்டும்  எவ்வித பாதிப்புமின்றி அமைதியாக இருந்தது. மற்ற மாநிலங்களில் கால் பதித்த பஜக இங்கு கால் பதிக்க முடியாமல் திணறுவதற்கும் பெரியார் பேசிய நாத்திகமே காரணம்.  

பா.ஜ.க  எந்தப் பிள்ளையாரையும் இராமனை வைத்து அரசியல் களமாடுகிறதோ அந்தப் பிள்ளையாரைத் தெருவில் போட்டு உடைத்தும் இராமன் படத்தைச் செருப்பால் அடித்தும் எரித்தும் தவிடு  பொடியாக்கியதால் தான் இராமன் பிள்ளையார் செல்வாக்கு தமிழகத்தில்  எடுபாடாமல் போய்விட்டது. அதனால்தான் மிகப்பெரிய பணபலம், அரசியல், அதிகார பலத்தை முழமையாகப் பயன்படுத்தியும் பா.ஜ.க இங்கு செல்லாக் காசாகி விட்டது. நாத்திகர்களுக்குப் பாதுகாப்பான இடம் தமிழகமேயாகும்.

தமிழகத்திற்கு வெளியே  பெங்களுரு, டெல்லி போன்ற இடங்களில் நாத்திகம் பேசுபவர்கள் அறிஞர்களாக இருந்தாலும் சுட்டுக் கொல்லப்படுவதும், வெட்டிக்கொல்லப்படுவதும், நாத்திகம் பேசுபவர்களை அச்சுரத்துவதாக இருக்கிறது. ஆனால் தமிழகத்தில் உடனே எதிர்விளைவுகள் ஏற்படும் என்பதாலும் இங்கு சாமானியனும் நாத்திகம் பேசுவதாலும், நாத்திகம் இங்கு மக்கள் இயக்கமாக இருப்பதாலும் இங்கு நாத்திகர்கள்மேல் கைவைக்க அச்சப்படுகிறார்கள். பா.ஜ.க வட நாடுகளில் சங் பரிவாரங்களை கட்டவிழ்த்துவிட்டு ஆடுகின்ற ஆட்டத்தைப் பார்க்கும் போது நாடு முழவதற்கும் நாத்திகம் கட்டாயம் தேவை என்பதை உணர்த்துகிறது.

கடவுள் நம்பிக்கை நாட்டின் முன்னேற்றத்திற்கு மிகப்பெரிய தடையாக உள்ளது. இந்தியாவில் கடவுள் நம்பிக்கை தனிமனிதனின் நம்பிக்கை சார்ந்த விசயமாக இல்லாமல்,  மனிதர்களை பிறப்பின் அடிப்டையில் பிரித்து கூறு போட்டு வைக்கும் சாதியைப் பாதுகாக்கும் பணியினையும் சிறப்பாக செய்து வருகிறது.  

இந்திய கிராமங்களில் நடைபெறும் அத்துனைக் கலவரங்களுக்கும் அனால் ஏற்படும் படுகொலைகளுக்கும் கடவுள்களுக்கு கொண்டாடப்படும் திருவிழாக்களும் பிறந்த நாட்களுமே காரணம். விழிம்பு நிலை மக்களை பொருளாதார நிலையில் முன்னேறவிடாமல் தடுப்பதும் இந்த திருவிழாக்களேயாகும்.  2000 மக்கள் தொகையுள்ள கிராமத்தில் நடைபெறும் ஒரு திருவிழாவில் செய்யப்படும் செலவு 20 இலட்சம் முதல் 30 இலட்சம்வரை ஆகிறது. ஆனால் அவர்களின்  குழந்தைகளின் கல்வி செய்யப்படும் செலவோ இரண்டு லடசத்தைக்கூடத் தாண்டாது.

கடவுள் நம்பிக்கையின்பேரால் கொண்டாடப்படும் தீபாவளி, கோவில் திருவிழாக்களில் வாணவேடிக்கை என்னும்பெயரில் கொளுத்தப்படுகின்ற பாட்டாசுப் புகையினால் ஏற்படும் மாசு கெடுதலால் ஓசோன் படலத்தில் ஓட்டை விழ்ந்து இந்தியாவில் வெப்பத்தின் தாக்கம் அதிகமாக இருப்பதற்கும் - கடவுள் நம்பிக்கையின்பேரால் கொண்டாடப்படும் திருவிழாக்கள்தானே காரணம்.

மேற்கண்ட கட்டுரையில் உள்ளதைப் போல் மதம் மக்கள் மீது ஆதிக்கம் செலுத்தும் நாடுகளில் மக்கள் தொகை பெருக்கம் விரைவாக உள்ளது என்பதற்கு இந்தியா மிகப்பெரிய சான்றாக உள்ளது. குழந்தைப் பிறப்பைக்கூட கடவுள் தந்த வரம் என்று இங்கு நம்புவதால்தான், உலகில் மக்கள் தொகையில் முதலிடத்தை ஒருசில ஆண்டுகளில் எட்டிப் பிடித்துவிடும் என்ற அபாயமும் நம்மை அச்சுறுத்துகிறது. எனவே உலகில் மற்ற நாடுகளைக் காட்டிலும் இந்தியாவின் வளர்ச்சிக்கும்,  மக்கள் நிம்மதியாகவும் மகிழ்ச்சியாகவும்  வாழ்வதற்கு  இந்த நாட்டிற்குத் தேவை நாத்திகமே.

Pin It

சங்க இலக்கியங்களில்  ஆரியர் தம் வருணாசிரமக் கருத்துக்கள், வேத வேள்விகள், மூடப்பழக்க வழக்கங்கள் முதலியன எப்படிக் குடி புகுந்து விட்டனவோ அதுபோலவே வடமொழி இதிகாசங்கள் புராணங்கள் ஆகியவற்றில் காணப்படும் செய்திகள் கருத்துக்கள் ஆகியவைகளும் சங்கஇலக்கியங்களில் காணக்கிடக்கின்றன.

இராமாயணக்கதைச் செய்திகள்

இராமன் சீதையை இலங்கையினின்று மீட்டுவரும் பொருட்டு வானர சேனைகளுடன் தனுஷ்கோடியில் ஓர் பெரிய ஆலமரத்தின்கீழ் அமர்ந்து அலோசனை நடத்தினான். அப்போது அம்மரக்கிளையில் தங்கி இருந்த பறவை இனங்கள் ஒன்றோடொன்று சண்டையிட்டுக் கூச்சலிட்டுக் கொண்டிருந்தன. இதனால் இராமனுடைய மந்திராலோசனைக்குத் தடை ஏற்பட்டுவிட்டது.

உடனே இராமன் தனது கையினைக் குவித்து அப்பறவைகளின் ஒலியினை அடக்கினான். இப்படி அகநானூற்றுப் பாடல் ஒன்று கூறுகின்றது.

வெவ்வெல் கவுரியர் தொன்முதுகோடி

முழங்கு இரும் பெளவம் இரங்கு முன்துறை

வெல்போர் இராமன் அருமறைக்கு அவித்த

பல வீழ் ஆலம் போல - பாடல் 70 : 13 -16

புறநானூற்றுப் பாடல் ஒன்று “இராமன் காட்டில் சீயுைடன் வசிக்கும்போது இலங்கை வேந்தனான இராவணன், சீதையினை இராமன் அறியாவண்ணம் தூக்கிச் சென்றான் என்றும், அப்போது சீதையானவள் தன்னுடைய ஆபரணங்களை ஒவ்வொன்றாகக் கழற்றி வழிநெடுகப் போட்டுக்கொண்டே போனாள் என்றும், இந்தக்காட்சியினைக் கண்ட குரங்குக் கூட்டங்கள் அந்த ஒளிமிக்க ஆபரணங்களைக் கண்டு மிக்க வியப்படைந்தன ” என்றும் கூறுகின்றது.       

கடதெறல் ராமன் உடன்புணர் சீதையை

வலித்தகை அரக்கன் வவ்விய ஞான்றை

நிலம்சேர் மதர் அணிகண்ட குரங்கின்

செம்முகப் பொருங்கினை  - பாடல் 378 : 18 -21

இராவணன் கைலை மலையைப் பெயர்த்த செய்தி

கலித்தொகை பாடல் ஒன்றில் “சிவபெருமான் உமாதேவியுடன் கைலைமலையில் வீற்றிருக்கும் போது, பத்துத் தலைகளை உடைய அரக்கனான இராவணன், தனது வலிமைமிக்க கைகளால் அம்மலையினை எடுக்கத் தலைப்பட்டான் என்றும் அது கண்டு சிவபெருமான் தனது கட்டை விரல் நுனியினால் அம்மலையினை அழுத்த - அதனுள் அகப்பட்டு இராவணன் வருந்தினான்” என்றும் கூறப்படும் புராணக்கதை குறிக்கப்பட்டுள்ளது.

இமையவில் வாங்கிய ஈர்ஞ்சடை அந்தணன்

உமையமர்ந்து உயர்மலை இருந்தனன் ஆக

தொடிப்பொலி தடக்கையின் கீழபுகுத்து அம்மலை

எடக்கல் செல்லாது உழப்பவன் போல - பாடல் 38 : 1 - 5

மகாபாரதக் கதைச்செய்திகள்

மேற்கண்ட இராமயணக் கதைகளின் செய்திகள் போலவே, மற்றொரு இதிகாசமான பாரதக் கதைச் செய்திகளும் பல காணப்படுகின்றன.

அரக்குமாளிகைக்குத் தீயிட்டது

துரியோதனன் அரக்கினால் பொய்யாக ஓர் மாளிகை அமைத்து அம்மாளிகைக்குப் பாண்டவர்களை அழைத்து இருக்கச்செய்தான் என்றும், அப்படி அவர்கள் தங்கி இரவில் உறங்கிக் கொண்டு இருக்கும் நேரத்தில், அவன் அந்த அரக்குமாளிகைக்குத் தீ இட்டான் என்றும் கூறப்படும் புராணச் செய்தியும் கலித்தொகை நூலில் காணப்படுகிறது.

வயக்குறு மண்டலம் வடமொழிப் பெயர் பெற்ற

முகத்தவன் மக்களுள் முதியவன் புணர்ப்பினால்

அய்வர் என்று உலகேத்தும் அரசர்கள் அகத்தராக

கைபுனை அரக்கில்லைக் கதழ்எரி சூழ்ந்தாங்கு  - பாடல் 25 : 1-4

தீப்பற்றிய அரக்குமாளிகையிலிருந்து பீமன் அய்வரையும் காப்பாற்றியது

அரக்குமாளிகை தீப்பற்றி எரியும் காலத்தில் தருமன் , அர்ச்சுனன்,  நகுலன், சகாதேவன், திரெளபதை ஆகிய அய்வரும் நன்கு உறங்கிக்கொண்டு இருந்தார்கள் என்றும், அதுசமயம் விழித்துக்கொண்ட பீமன்,  அந்த அய்வரையும் தோளின் மேல் தூக்கிப் போட்டுக்கொண்டு சுரங்கத்தின் வழியாக வெளியேறி, காப்பாற்றினான் என்றும் கூறப்படும் செய்தி மேற்படி பாடலிலேயே உள்ளது.

ஒள்ளுரு வரக்கில்லை வளிமகன் உடைத்துத்தன்

னுள்ளத்துன் கிளைகளோ டுயப்போகு வான்போல - என்று வந்துள்ளது.

மேலும் பீமன் துர்ச்சாதனன் நெஞ்சத்தைப் பிளந்து தன் சபதம் முடித்த செயல், கலித்தொகையில்  பாடல் 101 : வரிகள் 18 - 20 லும், போர்க்களத்தில் துரியோதனன் தொடையினை பீமன் அறுக்கும் செய்தி, பாடல் 52 : வரிகள் 2 - 3 லும், அசுவத்தாமன் தன் தந்தையாகிய துரோணச்சாரியனைக் கொன்றவனைத் தன் தோள்வலியினால்  கொன்ற செய்தி, பாடல் 101 : வரிகள் 30 - 32 உள்ளன.

பரசுராமன் சூளுரை

பரசுராமன்  “இம்மண்ணுலகிலேயே Bத்திரிய அரசத் தரப்பினர் ஒருவர்கூட இல்லாமல் பூண்டோடு ஒழிப்பேன்” என்று சபதம் செய்து, மிக்க முயற்சியோடு ஓர் பெரிய வேள்வியைச் செய்து முடித்தான் என்ற செய்தி

மன்மருற் கறுத்த மழுவாள் நெடியோன்  

முன்முயன் றரிதினின் முடித்த வேள்வி  

கயிறரை யாத்த காண்டகு  வனப்பின்

அருங்கடி நெடுந்தூண் போல ” அகப்பாடல் 220 : 5-8

கிருஷ்ணன் ஆயர் பெண்களின் ஆடைகளை ஒளித்தல்

ஆயர் பெண்கள் யமுனை ஆற்றின் கரையில் ஆடைகளையெல்லாம் வைத்துவிட்டு, நதியில் நீராடிக்கொண்டு இருந்தனர். அவர்கள் அறியாவண்ணம் கண்ணன் அவர்களது உடைகளை எல்லாம் எடுத்துக்கொண்டு அருகில் இருந்த குருந்த மரத்தில் ஏறிக்கொண்டான்.

அது கண்ட ஆயர்மகளிர் தங்கள் கைகளால், தங்கள் அங்கங்களை மறைத்துக்கொண்டு, உடையினைத் தரும்படி கண்ணனை வேண்டிக் கொண்டனர். கண்ணணோ எல்லோரும் தங்கள் இரு கைகளையும் நீட்டி வெளியில் வந்து கேட்டால் தருவதாகக் கூறிக்கொண்டு இருக்கும்போது, கண்ணனுக்கு மூத்த பலராமன் அவ்விடம் வந்தான்.  அது கண்ட கண்ணன் குருந்த மரத்தின் கிளையினை மிதித்து அதனைத் தாழும்படி செய்து அதில் அப்பெண்களை மறைத்துக் கொள்ளும்படி செய்தான். இச்செய்தியும் அகநானூற்றில் காணப்படுகின்றது.       

வடா அது வண்புனல் தொழுதை  

வார்மணல் அகன்றுறை அண்டர்மகளிர்

மரஞ்செல மிதித்த மாஅல் போல  ”

அகநானூறு பாடல் 59 : வரிகள் 3 - 6

இவைமட்டும் அல்லாமல் சங்க இலக்கியங்களில் அருந்ததி, அகலிகை, பிரகலாதன் பற்றிய செய்திகள், சிவன் விஷ்ணு, பிரம்மா, முருகன், பலராமன் ஆகியவர்கள் பற்றிய புராணக்கதைகள் ஆகியவைகளும் ஆங்காங்கு காணப்படுகின்றன. இவற்றினைச் ‘சங்க இலக்கியங்களில் கடவுள்கள்’ என்ற தலைப்பின் கீழ் அடுத்துக் காண்போம்.

எனவே இதுகாறும் மேலே காட்டிய எடுத்துக்காட்டுகளில் இருந்து சங்க காலம் எனப்படும் இன்றைக்கு சற்றேறக்குறைய 1800 அண்டுகளுக்கு முன்னமேயே தமிழகத்தில் வடமொழிப் புராணக் கதைகள் நன்கு பரப்பப்பட்டு இருந்திருக்கின்றன எனத் தெரிய வருகிறது. பண்டை இலக்கியங்களில் இச்செய்திகளை எடுத்தாளும் அளவுக்கு இவைகள் செல்வாக்குப் பெற்று இருக்கின்றன என்பதனைப் பார்க்கும் போது ஆரிய ஆதிக்கம் எந்த அளவுக்கு தமிழ்நாட்டில் வேரூன்றி இருந்தது என்பது விளங்கும்!

இந்தக் காலத்தில் எப்படி நமது மந்திரிகள், சட்டசபை உறுப்பினர்கள், அரசியல்வாதிகள், ஆங்கிலம் படித்த மேதாவிகள், பட்டதாரிகள் எனக் கூறப்படுபவர்கள் புலவர்கள் ஆகியவர்கள் மூடநம்பிக்கையும் புராண நம்பிக்கையும் உடையவர்களாக இருந்து வருகின்றனரோ - அது போலவே சங்ககாலத்துப் புலவர்கள், அரசர்கள், பொதுமக்கள் ஆகியவர்களும் மூடநம்பிக்கை உள்ளவர் களாகவே இருந்திருக்கின்றனர். இப்படி, பன்னெடு நாட்களுக்கு முன்னமேயே நம் நாட்டில் குடிபுகுந்து வேரூன்றிய ஆரிய ஆதிக்கம், இன்று செழித்து வளர்ந்து, பூத்துக் காய்த்து, கனிந்து காணப்படுகின்றது.

சங்க இலக்கியங்களில் புராணக் கடவுள்கள்  

பண்டைய தமிழர்கள் “ஒன்றே குலமும் ஒருவனே தேவனும்” என்ற உயரிய நெறி நின்று ஒழுகி வந்தார்கள் என்றும், அவர்கள் பல்வேறு தெய்வங்களைக் கொண்டவர்கள் அல்லர் என்றும் தாங்கள் தாம் தமிழ்பற்றுக்கும், தமிழ் நாகரீகத்துக்கும் கர்த்தாக்கள் என்று எண்ணிக்கொண்டு சிலர் எழுதியும் கூறியும் வருகின்றனர்.

தமிழன் என்றைக்குமே ‘ஒன்றே குலமும் ஒருவனே தேவனும்’ என்ற உயரிய கொள்கையினைக் கொண்டு  வாழ்ந்தான் என்று பெருமை பாராட்டிக்கொள்ள நமக்கு எந்தவித ஆதாரமும் இல்லை.

“ஒன்றே குலமும் ஒருவனே தேவனும்” என்பது, சங்ககாலத்திற்கு மிகப் பிந்திய காலத்தில் வாழ்ந்த திருமூலரின் திருமந்திரத்தின் ஒரு பாட்டின் ஒரு அடியில் வரக்கூடியதை மட்டும் எடுத்துக்கொண்டு பெருமிதப்பட்டால் போதுமா ?

இலக்கிய ஆதாரமென்ன?

இன்றைக்கு நமக்குக் கிடைத்திருக்கும் இலக்கிய ஆதாரங்களை வைத்துக் கொண்டு பார்த்தால் காலத்தால் முற்பட்ட தொல்காப்பியத்தில் ஆகட்டும், பத்துப்பாட்டு, எட்டுத்தொகை முதலிய சங்க நூல்களில் ஆகட்டும் தமிழன் ஏகதெய்வ வணக்கத்துடன் வாழ்ந்தான் என்பதற்கு ஆதாரமே இல்லை.

அவன் ஆரியர்களின் இதிகாசங்களிலும், புராணங்களிலும் காணப்படும் சிவன், விஷ்ணு, பிரம்மா, முருகன், கொற்றவை (துர்க்கை), இந்திரன், பலராமன் போன்ற தெங்வங்களை வணங்கியதோடு சிறுதெய்வங்களையும், துஷ்ட தெய்வங்களையும் வணங்கி வந்திருக்கின்றான். மேற்கூறிய செய்திகள் பற்றி இக்கட்டுரையில் ஆய்வோம்.

சிவன்

சிவன் திருவாதிரை நட்சத்திரத்தில் பிறந்தவன்; காளை வாகனன்; கங்கையைச் சடையில் கொண்டவன்; நெற்றியில் பிறைச் சந்திரனைத் தரித்தவன்; உமையொருபாகன்;  நீலகண்டன்; திரிபுரம் எரித்தவன்;  முக்கண்ணன்;  மழுப்படையை உடையவன்; கொடுகொட்டி, பாண்டுரங்கம், கபாலம் முதலிய கூத்துக்களை ஆடுபவன் ”  என்பவைகள் சங்க இலக்கியங்களில் குறிக்கப்பட்டுள்ளமையினை இங்கு காண்போம்.

திருவாதிரை நட்சத்திரத்தில் பிறந்தவன்  

அரும்பெறல் ஆதிரையான் அணிபெற மலர்ந்க . கலி 150 : 20

ஆதிரை முதல்வனின் கிளந்த நாதர் பன்னொருவரும் - பரிபாடல் 8 : 6-7

காளை வாகனன்

காளை மாட்டை வாகனமாகக் கொண்டு ஊர்ந்து வருவபவன்.

ஊர்தி வால் வெள்ளேறே - புறநானூறு  1 : 3

புங்கவம் ஊர்வோனும் ( புங்கவம்-காளை) - பரிபாடல் 8 , 2  

உருவ ஏற்று ஊர்தியான் - கலி 150 : 13

கங்கையினைச் சடையில் வைத்திருப்பவன்

விரி சடைப் பொறை ஊழ்த்து

விழுநிகர் மலர் ஏய்ப்பத்

தனிவுற தாங்கிய தனி

நிலைச் சலதாரி

மணி மிடற்று அண்ணற்கு - பரிபாடல் 9 : 5 - 7

தேறுநீர் சடைக் கரத்து திரிபுரம் தீமடுத்து - கலி :  1 -2

இமைய வில் வாங்கிய ஈர்ஞ்சடை யந்தணன் - கலி: 38 : 1

பிறங்குநீர் சடைக் கரந்தான் ”  -  கலி 150 : 9

நெற்றியில் பிறைச்சந்திரனைச் சூடியவன்

கொலைவன் சூடிய குழவித் திங்கள் போல - கலி 103  : 15

“ கோடுவாய் கூடாப் பிறையைப் பிறிதொன்று

நாடுவேன் கண்டனென் சிற்றிலுட் கண்டாங்கே

ஆடையான் மூஉ யகப்படுப்பேன் சூடிய

காணான் றிரி தருங்கொல்லோ மணிமிடற்று

மாண்மலர்க் கொன்றையவன் - கலி : 142 : 24-28

புதுத்திங்கள் கண்ணியான் பொற்பூண் ஞான் றன்னநின் - கலித்தொகை 150 : 17

தன்னுள் அடக்கிக் கரக்கினும் கரக்கும்

பிறைநுதல் வண்ணம் ஆகின்று அப்பிறை - புறநானூறு 1 : 8 – 9

கறை மிடற்று அண்ணல் காமர் சென்னிப்

பிறைநுதல் விளங்கும் ஒருகண் போல - புறநானூறு 55 : 4 – 5

உமாதேவியை இடப்பாகத்தில் கொண்டவன்:

உமையமர்ந்து விளங்கும் இமையா முக்கண் - திருமுருகாற்றுப்படை 153

பெண்ணுரு வொருதிறன் ஆகின்றது ; அவ்வுருத்

தன்னுள் அடக்கின் கரக்கினும் கரக்கும் - புறநானூறு 1 : 7-8  

நீலகண்டன்

தேவர்களும் - அசுரர்களும் மேருமலையை மத்தாகவும், வாசுகி என்ற பாம்பை நாணாகவும் கொண்டு அமிர்தம் வேண்டிக் கடல்கடைந்த போது,  வாசுகி என்ற அந்தப் பாம்பானது வலி பொறுக்க மாட்டாது நஞ்சைத் திரண்டுவரும் அமிர்தத்தில் கக்கிவிட்டது.

அதுகண்ட தேவர்கள் கலங்கினர். சிவன் அந்த விஷத்தை எடுத்து உண்டான்.  உமாதேவி அதுகண்டு பயந்து ஓடிப்போய், அவனது கண்டத்தினைப் பிடித்தாள். அதனால் அந்த நஞ்சானது கண்டத்திலேயே நின்றுவிட்டது. இதன் காரணமாக சிவன் நீலகண்டன் என்று பெயர் பெற்றான் என்பது புராணக்கதை.

நீலமணிமிடற்று ஒருவன் போல - புறநானூறு : 91 -6

மறுமிடற்று அண்ணற்கு மாசிலோள் தந்த - பரி பாடல் 8 : 127

மணி மிடற்று அணி போல - கலித்தொகை : 105 , 13

மணிமிடற்று  மாண்மலர்க் கொன்றையவன் - கலித்தொகை : 142 : 27-28

கறைமிட றணியலு மணிந் தன்றக் கறை

மறைநவி லந்தணர் நுவலவும் படுமே - புறநானூறு : 1 : 5 - 6

திரிபுரம் எரித்தவன்

பொன், வெள்ளி, இரும்பு ஆகியவற்றால் ஆகிய மதிற் சுவரைக் கொண்ட மூன்று கோட்டை களையுடைய அவுணர்கள் தேவர்களை துன்புறுத்தினர். தேவர்கள் எல்லாம் பிரம்மாவினிடம் சென்று முறையிட, பிரம்மா தேவர்களை கூட்டிக்கொண்டு சிவனிடம் சென்று முறையிட்டான்.

அப்போது சிவன் பூமியை இரதமாகவும், தேவங்களை குதிரைகளாகவும், பிரம்மாவைத் தேரோட்டியாகவும், விஷ்ணுவை அம்பாகவும், மேரு மலையை வில்லாகவும், வாசுகி என்ற பாம்பை நாணாகவும் கொண்டு ஒரே அம்பினால் மூன்று கோட்டைகளையும் தகர்த்து, அவுணர்களையும் அழித்தானென்பது புராணக்கதை. இதுவும் சங்க இலக்கியங்களில் காணப்படுகின்றது.

ஆதியந்தணனறிந்து பரிகொளுவ

வேதமாபூண் வையத்தேரூர்ந்து

நாகம் நாணா மலை வில்லாக

மூவகை ஆரெயில் ஓரழல் அம்பின்முளிய

மாதிரம் அழவவெய் தமரர் வேள்வி - பரிபாடல் 5 : 22-26

ஓங்குமலைப் பெருவிற்பாம்பு ஞான்கொளீஇ

ஒருகனை கொண்டு மூவெயிலுடற்றிப்

பெருவிற லமரர்க்கு வென்றி தந்த

கறைமிடற்றண்ணல்………” தியந்தணனறிந்து பரிகொளுவ - புறநானூறு   55 : 1-4

மூன்று கண்களை உடையவன்

முக்கட் செல்வர் நகர்வலம் செயற்கே - புறநானூறு 6 : 18  

உமையமர்ந்து விளங்கும் இமையா முக்கண்- திருமுருகாற்றுப்படை 153

மிக்கொளிர் தாழ்சடை மேவரும் பிறைநுதன்

முக்கண்ணா னுருவேபோன் - கலித்தொகை  104 : 11-12

இது மட்டுமல்லாமல் கலித்தொகை என்னும் சங்க இலக்கிய நூலுக்குக் கடவுள் வாழ்த்தாகக் கூறப்பட்ட பாட்டில் சிவன் ஆடியதாகக் கூறப்படும் கொடுகொட்டி, பாண்டரங்கம், கபாலம் ஆகிய கூத்துக்கள் கூறப்பட்டு உள்ளன.

கொடு கொட்டி

இது சிவன் உலகை எல்லாம் அழித்து நின்று கை கொட்டி ஆடும் கூத்தாகும்.

படுபறை பல வியம்பப்  பல்லுருவம் பெயர்த்து நீ

கொடுகொட்டி யாடுங் காற் கொடுய ரகல் குறிக்

கொடிபுரை நுசுப்பினாள் கொண்ட சீா தருவாளோ - கலித்தொகை ; கடவுள் வாழ்த்து 5:7

பாண்டரங்கம் கூத்தாடல்

இது சிவன் திரிபுரங்களையும் அழித்து நின்று, எரிந்த சாம்பலைப் பூசிக்கொண்டு ஆடிய கூத்தாகும்.

மண்டமர் பல கடந்து மதுகையானீறணிந்து

பண்டரங்கம் ஆடுங்காற்பணை யெழி லணைமென்றோள்

வண்டரற்றுங் கூந்தலாள் வளர் தூக்குத் தருவாளோ- கலித்தொகை ; கடவுள் வாழ்த்து 8 -10

கபாலக் கூத்தாடல்

இது சிவன் எல்லாவற்றையும் அழித்து மண்டையோட்டைக் கையில் ஏந்தி அடிய கூத்தாகும்.

கொலையுழுவைத் தோலைசக்இக் கொன்றைத்தார் சுவற்புரளத்

தலையங்கை கொண்டு நீ காபால மாடுங்காண்

முலையணிந்த முறுவலான் முற்பாணி தருவாளோ - கலித்தொகை ; கடவுள் வாழ்த்து  11 – 13

‘உண்மை’  இதழ் - 14.05.1970

- தொடரும்

Pin It

periyar kamaraj 350கடவுளையும் தர்மத்தையும் காப்பாற்றப் புறப்பட்டிருப்பதாக அடிக்கடி கூறிக்கெண்டிருக்கிற திரு. ஆச்சாரியார் அவர்கள் இன்னறய ஆட்சியை நாத்திக ஆட்சி என்றே கூறினார்.

‘தெய்வத்தை ஒதுக்கிவிட்ட ஆட்சி’ என்ற தலைப்பில்  8.12.61 ‘கல்கி’யில் தம் கையெழுத்துடன் எழுதியிருந்த தலையங்கத்தில்,

“நாட்டின் தலைவர்களும் மன்னர்களும் மக்கள் ஒப்புக்கொண்ட எல்லாச் சமயங்களையும் மதங்களையும் போற்றிவர வேண்டும்” என்றும், “மடையர்களின் பூசல்களைக் கண்டு பயந்து, எந்த சமயமும், எந்தமதமும் வேண்டாமென்று, தெய்வத்தையே ஒதுக்கிவிட்டு, உடுப்பு அணிந்த போலீஸ்காரர்களையே நம்புவது பெரிய அறியாமையாகும்” என்றும், “ தர்மத்துக்கு வரிபோடுவது அறிவற்ற அரசாட்சி முறையாகும்” என்றும் எழுதியிருந்தார்.

இவர் இவ்வாறு பேசுவதும் எழுதுவதும் திரு.பண்டிட்நேரு அவர்களையும், திரு. காமராசர் அவர்களையும் மனத்தில் கொண்டுதான் பேசுகிறார்,  எழுதுகிறார் என்பதை அறியாதவர்கள் இல்லை.

ஏனெனில், இந்த நாட்டிலுள்ள எல்லாமந்திரிகளிலும், இந்த இரண்டுபேர் மட்டும்தான் ‘கடவுள்’ என்றோ, ‘தலைவிதி’ என்றோ ‘மதக்கட்டளை’ என்றோ கூறாதபடி பேசிவருகிறவர்கள் ஆவர். இதுமட்டுமல்ல. இருவரும் திடீரென்று இவற்றையெல்லாம் கண்டித்தும்கூடப் பேசிவிடுகிறார்கள். தமக்கு அதிகாரம் இருக்குமானால்  சோதிடர்களையும் மந்திரவாதிகளையும் சிறையில் தள்ளிவிடுவேன் என்றுகூட திரு.நேரு அவர்கள் ஒருமுறை பேசியிருக்கிறார்.

இதோ,  மூன்று வாரங்களுக்கு முன்னர்,  சிண்டிஆடம்ஸ் என்பவருடன் பேசிக் கொண்டிருக் கையில் “நான் மதவாதியல்ல, என்னை மதநம்பிக்கையற்றவன் என்றே கூறுகிறார்கள். மதங்களின் சட்ட திட்டங்கள், சடங்குகள் முதலியவற்றை நான் நம்புவதில்லை” என்று இந்தியப் பிரதமர் நேரு அவர்கள் திட்டவட்டமாகக் கூறுயிருக்கிறார்.

இவரது நூல்களிலும் பலஇடங்களில், தாம் ஒரு பகுத்தறிவுவாதி என்பதை வெளிப்படையாகவும் அழுத்தமாகவும் குறிப்பிட்டிருக்கிறார். அடுத்த மாதத்தில் எட்டுக்கிரகங்கள் ஒன்றுசேருவது பற்றிச் சென்றவாரம் பேசும்போதுகூட,  “இதனால் உலகத்துக்கு ஒரு கேடும் வராது” என்று கூறியுள்ளார்.

அதாவது, மதத்தின் பெயராலும்,  கடவுள் பெயராலும் தலைவிதி என்ற பெயராலும் மக்கள் ஏமாற்றப்படுவதை அறவே வெறுக்கும் ஒருசில உலகப் பெரும்தலைவர்களில் திரு.நேருவும் ஒருவர்.

ஆனால், ஆச்சாரியாரோ இதற்கு நேர்மாறானவர். இவற்றிலெல்லாம் சொந்த முறையில் தமக்கு நம்பிக்கையில்லாதிருந்தும் மக்களை அடிமைகளாகவும், மடையர்களாகவும் ஆக்கி வைத்திருப்பதற்காக மட்டும் இவற்றை நம்புகிறவர்கள் போல எழுதிவருகிறார்.  ஆனால்,  காமராசர் அவர்களோ நாத்திகர் அல்லது பகுத்தறிவுவாதி என்று தம்மைச் சொல்லிக் கொள்ளாமலே நடைமுறையில் பச்சைப் பகுத்தறிவுவாதியாக இருந்து வருபவர்.

முன்பு, தலைவிதி நம்பிக்கையைப்பற்றி இவர் கண்டித்துப்பேசியது நினைவிருக்கலாம். இதோ, சென்ற டிசம்பர் 31 ம் தேதியன்று இராஜபாளையத்தில் பேசுகையில்,  இவர் கூறியிருப்பதைத்த ருகிறோம்.

“ஏழைகளை வாழவைப்பது சிலருக்குப் பிடிக்கவில்லை.  அவர்கள் ஒருவேளையாவது நல்லபடி சாப்பிட வகைசெய்ய வேண்டாமா? படிக்க வழிசெய்ய வேண்டாமா?  இதைச் செய்தால் காங்கிரஸ் ஒழியணும் என்கிறார்கள்.  மரம் வைத்தவன் தண்ணீர் விடுவானாம்! இதுதர்மமாம்! ஏழைகளை ஆண்டவன் காப்பாற்றுவான் என்கிறார்கள். மரம்வைத்தவனும் தண்ணீர் ஊற்றவில்லை, மற்றவர்களும் ஊற்றவில்லை. இதை நான் பார்த்தபிறகுதான் ஏழைகளுக்குச் சர்க்கார்தான் வசதிசெய்ய வேண்டும் என்கிறேன்.”

ஆச்சாரியாருக்கு இன்றைய ஆட்சிமீது ஏன் ஆத்திரம் வருகிறது என்பது விளங்குகிறதல்லவா? தமிழ்நாட்டிலோ, திரு.காமராசர் பாமர மக்களுக்கு வேண்டிய நன்மைகளைச் செய்து ‘நாத்திக’ ஆட்சி நடத்துகிறார். டில்லியிலோ திரு. நேரு அய்ந்தாண்டுத் திட்டங்கள் மூலம் நாட்டின் ஏழ்மையை ஒழிப்பதற்கான திட்டம் வகுத்துக்கொண்டு ‘நாத்திக’ ஆட்சிநடத்திவருகிறார்.

ஏழ்மையை ஒழித்துவிட்டால் கடவுளுக்கும் மதத்திற்கும் மதிப்பிருக்காதே! எல்லோருக்கும் படிப்பைத் தந்துவிட்டால் உயர்சாதிகளுக்கு மதிப்பிருக்காதே! அதனால்தான் தர்மம் கெட்டுவிட்டது! நாத்திகஆட்சி நடக்கிறது என்று ஓலமிடுகிறார் ஆச்சாரியார் அவர்கள்.

பிறப்பினால் சாதி! படிப்பினால் சாதி! பணத்தினால் சாதி! இந்த மூன்றுதுறைகளையும் சமமாக்கி, மேடுகளை வெட்டிப் பள்ளத்தில் போட்டு நிரப்பிவிட்டால் இந்தநாடும் பிறநாடுகளைப் போல முன்னணியில் நிற்குமல்லவா?

“எல்லாச்சாதிகளும் படித்துவிட்டால் வேலை எங்கிருந்து கிடைக்கும்? வண்ணார் பிள்ளைகள் துணிவெளுக்கவும் மற்றவர்களும் அவரவர் குலத்தொழிலைச் செய்யவும் கற்றுக்கொண்டால் போதும்” என்று அன்றுமுதல், இன்றுவரை கூறிவருகின்ற ஆச்சாரியாருக்கும் (இராஜாஜி) இந்த இரு தலைவார்களின் (நேரு, காமராசர்) போக்கு  “தெய்வத்தை ஒதுக்கிவிட்ட ஆட்சி” யாகத் தானேே தான்றும்?

அதனால், “சுதந்திரம் என்பது சர்வ நாசமாகிவிடும் என்பதும் எனக்குப் புலனாகிறது” என்று “என் கோபத்திற்குக் காரணம்” என்ற தலைப்பில் 29.10.61 ‘கல்கி’ யில் கையெழுத்துடன் தலையங்கம் எழுதியிருப்பவரல்லவா ஆச்சாரியார்?

அதனால்தான் சோசலிசப்பாதையில் செல்கின்ற காங்கிரஸ் ஆட்சியின் காலை வாரிவிடுவதற்குக் கச்சை கட்டப் புறப்பட்டிருக்கிறார்.

நாம் அடிக்கடி கூறிவருவதுபோல் இந்த நாட்டில் இரண்டு நல்லதலைவர்கள் ஐனநாயகச் சேற்றில் சிக்கிக்கொண்டு தவிக்கிறார்கள். நேருவோ “காமராசரோ இந்த நாட்டில் சர்வாதிகாரி ஆக நேரிட்டால் ஒரே அய்ந்தாண்டுத் திட்டத்தில் இந்நாட்டின் வறுமையையும் படிப்பின்மையையும் மூடநம்பிக்கைகளையும் மதவெறியையும் சாதிக் கிறுக்கையும் ஒழித்துக் கட்டிவிடுவார்கள் என்பது நம்நம்பிக்கை!

இவ்வளவு ஊழல்களிலும் அழுந்திக்கிடக்கின்ற இந்நாட்டு மக்களின் வாக்குகளில் நம்பிக்கை கொண்டிருக்கிற வரையில் இவர்களால் எந்தக்காரியத்தையாவது துணிந்துசெய்ய முடியுமா? கம்பிமீது சைக்கிள் விடுவதுபோல பயந்துபயந்து ஆட்சிநடத்தும்போதே ஆச்சாரியார் திருக்கூட்டத்தார்  “அய்யோ! கடவுளை ஒதுக்கிய ஆட்சி நடக்கிறதெ” என்று ஓலமிடுவது அயோக்கியத்தனம்அல்லவா?

(தோழர் மே.கா கிட்டு தொகுத்து, தோழமை வெளியீடாக வந்துள்ள ‘காரியக் காமராசர் பற்றி காரணப் பெரியார்’ நூலில் இருந்து)

Pin It