பேராசான் ஜீவா அரசியல், பொருளாதாரம், பண்பாடு ஆகிய மூன்று களங்களிலும் மூழ்கி முத்தெடுத்தவர். பொருளியல் சமத்துவத்துக்கான அரசியல் சமரில் பலரும் முழுக்கவனம் செலுத்திய தருணத்தில் காலம் காலமாக மனித உள்ளங்களின் உள்ளியக்கத்தைத் தீர்மானித்தப் பண்பாடு குறித்து சிந்தித்தார்; கவனம் செலுத்தினார். மொழி குறித்தும் மக்கள் பண்பாடு குறித்தும் அக்கறை கொண்டார்.  ஏராளம் எழுதினார்.  பேசினார்.

ஜீவாவின் பன்முகப் பணிகள் இன்று அரசியல் கடந்து கவனம் பெறுகின்றது. தமிழிய வீரியம் தப்பிய விதைகளங்காய்த் தகிக்கின்றது. இத்தருணத்தில் பத்திரிக்கையாளரும் சிவப்புச் சிந்தனையாளருமான தோழர் சு. பொ. அகத்தியலிங்கம் ஜீவாவின் பாடல்களை முன்வைத்து கோடிக்கால் பூதமடா... (ஜீவாவின் கவிதைப் பயணம்) என்ற தலைப்பில் ஒரு நூலினைப் படைத்துள்ளார். "தோழர் ஜீவாவை அறிமுகப்படுத்திய அளவுக்குக் கூட கவிஞர் ஜீவாவை அறிமுகப்படுத்தவில்லை" என்ற ஆதங்கத்தில் இந்நூலைப் படைத்துள்ளார்.

ஜீவாவின் கவிதைகளில் தற்போது கிடைத்துள்ள 122 கவிதைகளை அதன் உள் ஆற்றல்களோடு அறிமுகப்படுத்துகின்றார்.

“இவற்றில் 25 பாடல்கள் பெண் விடுதலையை உயர்த்திப் பிடிப்பன :  48 பாடல்கள் தொழிலாளி வர்க்க எழுச்சி, சோசலிசம் சார்ந்து எழுந்தவை : கட்சி, தியாகம் குறித்து நேரடியாகப் பேசும் பாடல்கள் 7 : புரட்சி பற்றிய பாடல்கள் 5: இது போக பாசிசம், யுத்தம் குறித்த பாடல்கள் 6 : சுயமரியாதை , பகுத்தறிவு சார்ந்த பாடல்கள் 11, தேசியம் சார்ந்த பாடல்கள் 15, பாப்பா பாடல் 2, பொது 2, தமிழகம் 1. எனப் பத்து வகைபாடுகளில் அவற்றை நாம் அனுகலாம்'' என்று பகுத்துக் கூறுவது கல்விப்புல ஆய்வு போன்ற வியப்பைத் தருகின்றது.

ஜீவாவின் பாடல்கள் இன்றைக்கும் பொருத்தப்பாடு உள்ளதாக உள்ளன என்பதைச் சான்றுகளுடன் காட்டுகின்றார். 

மிக எளிமையாகவும், சுவைபடவும் பல பாடல்களைப் பற்றி ஆசிரியர் விவரிக்கின்றார்.  1930 ஆம் ஆண்டு வெளிவந்த சுயமரியாதைச் சொல்மாலையில் ஆத்திச்சூடி போல எழுதியுள்ள கீழ்க்காணும் அடிகளைப் பொருத்தமாக எடுத்துக்காட்டுகின்றார்.

"காதல் மணத்தாலே தருமின்பம்
"தாசியர் வேணுமாய் பேசுவார் கயவர்"
"தையலர் விடுதலை வையக விடுதலை"
"பெண்ணும் ஆணும் எண்ணில் நிகரே"
"மெல்லியர் கல்விக்கு அல்லும் பகலுழை"
"கற்பெனப் பெண்களை அற்பரே குலைத்தார்"

அதே நேரத்தில் “பெண்கல்வி'' பற்றி கூற வந்தவர் "மெல்லியர்' என பெண்ணை உடல் சார்ந்து குறைத்து மதிப்பிடும் வார்த்தைகளைக் கையாண்டது அன்றைய சிந்தனை வழக்கில் பிழையெனப் பாடவிடினும், பெண்ணியப் பார்வை விரிந்து பரந்துள்ள இக்கால கட்டத்தில் இவ்வார்த்தை பயன்பாட்டை பெண்ணியவாதிகள் ஏற்கமாட்டார்கள்'' என விமர்சிக்கவும் செய்கின்றார்.  மற்றொரு இடத்தில் “சிந்தனைச்சிற்பி சிங்காரவேலரும் ஜீவாவும் பெண்விடுதலை குறித்து எழுதியவை மீண்டும் வாசிக்கப்பட வேண்டும்.  பெரியாருக்கு ஒப்பவும் சில இடங்களில் அதற்கு மேலாகவும் பெண் விடுதலை குறித்து சிந்தித்தவர்கள் இவர்கள்.  இது குறித்து தனியே ஒரு நூலே எழுதலாம்''.  என்று கூறுவது மிக நல்ல மதிப்பீடாக அமைகின்றது.

மூட நம்பிக்கை, மத நம்பிக்கை ஆகியன குறித்த ஜீவாவின் தீவிர எதிர்ப்புணர்வை அவர்தம் பாடல்கள் வழி உணர்த்துவது சிறப்பு.

"இடி விழுந்தது கடவுள் மேல்" என்றும் "தலைக்கொரு பாழ் மதம்" என்றும்;  "கற்சாமி பிழைத்திட வேலி நிலம்" என்றும் "புத்தி கெட்ட ஆத்திகம்" என்றும் ஜீவா ஆவேசமாய் கூறும் இடங்களைச் சுட்டி எழுதிச் செல்வது அருமை.

ஜீவாவின் உள்ளத்தில் சுடராய் தகித்த பாட்டாளிவர்க்க உணர்வு அவர்தம் பாடல்களில் பற்றிப்படர்வதை அகத்தியலிங்கம் நுட்பமாகப் பதிவு செய்கின்றார்.

“ஜீவாவின் பாடல்கள் காலாவதியானவை அல்ல.  இன்றும் கால ஓட்டத்தின் சுருதியே அவை.  பணத்திமிருக்கு பணியாத நா  ஜீவாவின் பேனா. அவர் பணத்திமிர் பற்றி எழுதுகிறார்.

"யானை போற் கொழுத்த மேனி
இடர் செய்யும் நச்சு நெஞ்சு
பூனைபோல் நிறைந்த வாழ்வு
பொய்புலை நிறைந்த வாழ்வு
ஏனையோர் குடிகெடுக்கும்
எத்தனம் பொழுதுபோக்கு
பானைபோல் வயிறு கொண்ட
பணத்திமிர் வீழ்க! வீழ்க!"

எனக்கூறி விளக்கிச் செல்கிறார். குவலயம் நாற்றிகையும் அதிர  "கோடிக்கால்பூதம்" போன்ற அற்புதமான சொற்சேர்க்கைகளை ஜீவா பாடல்களில் காண முடியும்.

அதிகம் பேசப்படாதப்பாடல்களை எடுத்து அவற்றின் இலக்கிய நயத்தினை விளக்கும் போது ஆசிரியர் ஜீவா மீதும் உழைக்கும் மக்களின் சித்தாந்தத்தின் மீதும் கொண்டுள்ளப் பற்று பளிச்சிடுகின்றது. 

வாடாத மக்களும் வாழ்வதெங்கு?
மாதர் சுயேட்சை மணப்பதெங்கு?
நாடக முற்போக்கு காண்பதெங்கு?
நல்லிளைஞர் வேகம் பூண்பதெங்கு?
கோடாலி மண்வெட்டி ஆள்வதெங்கு?
குக்கிராம மக்கள் தழைப்பதெங்கு?
தேடும் மனித சமமெங்கு?
சீர்மிகும் ரஷ்யப் பொன்னாட்டிலன்றோ?

அடடா... அடடா... எவ்வளவு பொருள் பொதிந்த வரிகள்.  கோடாளி, மண்வெட்டிதூக்கி வியர்வை சிந்த உழைப்பவன் ஆட்சி எனில் கசக்குமோ ஏழைக்கு? பொறுக்குமோ பணச் கொள்ளையருக்கு? “ என்று துள்ளித் துள்ளி எழுதிச் செல்கிறார்.  29 பாடல்கள் நூல் இறுதியில் தரப்பட்டுள்ளது நன் முயற்சி.

ஜீவாவின் ஒட்டு மொத்த ஆளுமையை, ஜீவாவுக்கு லட்சியக் கனவு ஒன்று இருந்தது.  அது தேச விடுதலையில் காலூன்றி, சுயமரியாதையில் கிளை விரித்து, பொதுவுடைமையில் பூத்துக் குலுங்கும் கனவு.  அந்தக் கனவு கைகூட தனது நாவை, பேச்சாற்றலை ஆயுதமாக்கினார்.  தனது எழுத்தாற்றலை பேனாவை சாதனமாக்கினார்.  வாகனமாக்கினார் என நூலாசிரியர் சு.பொ. அகத்தியலிங்கம் சித்தரிக்கிறார்.

இது ஜீவாவின் பாடல்களை மக்களிடம் புது முறையில் எடுத்துச் செல்லும் நூல். சுயநல அரசியலும், உலகமய பொருளியலும், நுகர்வுப் பண்பாடும் பெருகிவரும் இக்காலத்தில் நேர்மையான அரசியலை, மக்கள் மய பொருளியலை, தமிழியப்பண்பாட்டை முன்னெடுக்க ஜீவா ஓர் அடையாளமாக, ஆயுதமாகப் பயன்படுவார்.  அந்த ஆயுதத்தை உணர்வுப் பொங்க கூர்தீட்டி கையளித்திருக்கிறார் தோழர் அகத்தியலிங்கம் என்றால் மிகையில்லை.

கோடிக்கால் பூதமடா... ஜீவாவின் கவிதைப் பயணம், சு.பொ.அகத்தியலிங்கம், நாம் தமிழர் பதிப்பகம் பக். 104, விலை ரூ.50/

Pin It

 “யப்பாடி
நாலுநாளா வூடு
இருட்டிங்கெடக்குது
எவ யவனயோ
கூப்புட்டு பார்த்துட்டேன்
யாரும் வரலசாமி
ரெவ வெந்து
அந்த லைட்ட பார்த்துட்டு வந்துடு”

கடுக்கலூர் முகத்தில் தெரிய
இடுப்பில் கை வைத்தபடி பேசுவாள்
கன்னியம்மாள் பெரியம்மாள்
மின்கம்பம் ஏறி இறங்கி
பழுது நீங்கி
வீட்டு விளக்குகள் எரியும்

மகிழ்ச்சி பொங்க
“யப்பா இந்தா” வென
புடவையிலிருந்து அவிழ்த்துதந்த
கசங்கிய பத்து ரூபாய் தாள்களை
ஒரு நாள்கூட வாங்கியதில்லை

கல்வீட்டுத் தெருவில்
கசங்கு கூடையுடன்
எதிர்படும் போதெல்லாம்
“வா, யப்பா சாப்பிட்டுட்டுபோ
அம்மா எப்படி இருக்குது,
அய்யனாரு அண்ணன் வந்து இருக்கான்
பாத்தியா”
வெள்ளை நாயை அதட்டிக் கொண்டே
விடை தருவாள்

மாடு அவிழ்க்க போனவள்
சாயங்காலம்
சவுக்கு தோப்போரம்
செத்துக்கிடந்தாளென
சேதிவர அதிர்கிறேன்
தேனாம்பேட்டை
மூன்றாவது மாடியில்

மடியிலிருந்து அதிரசமும் வாழைப்பழமும்
அவிழ்த்துக்கொடுத்துவிட்டு
கடைசியாய் கேட்டது
திரும்பவும் கேட்கிறது
“எப்பத்தான் கல்யாணம் பண்ணிக்கப்போற”

Pin It

“எப்பவும் போல.. பஸ்ஸைப் பிடிஞ்சிருந்தா நல்லா இருந்திருக்கும். டாண்ணு ஒன்பதுக்கு சிவகெங்கயில போய் நிறுத்தி இருப்பான்... ஒன்பது மணிக்கு சிவகெங்கையில இருந்து கிளம்பும் பரமக்குடி வண்டியில ஏறினா... ஒன்பதரைக்கு மானாமதுரை ஆபீ”க்குப் போயிருக்கலாம்... ஒரு அரை மணி நேரம்  அசந்ததால  லேட்டாப் போச்சு. இப்பவே மணி ஏழாச்சு. சிவகெங்கைக்கு  ஏழரை மணிக்குத்தான்  வண்டியாம். இங்க இருந்து ஏழரைக்கு பஸ் கிளம்பினா. சிவகெங்க போயிச் சேர. பத்தரை மணி ஆகிப்போயிடும்.''

கவலை கவ்வி  எண்ணங்கள்  ஆக்கிரமிக்க.. சிவகெங்கை பேருந்து வருகையை எதிர்பார்த்துக் காந்திருந்தார்  சந்திரமோகன்.

சந்திரமோகன்.. இந்தப் பகுதிக்குப் புதியவர். பதவி உயர்வைக் காரணம் காட்டி புதுக்கோட்டை கிளைக்கு மாற்றி விட்டார்கள். புதுக்கோட்டை வந்து நான்கு மாதங்கள் ஆகின்றன. இங்கு மாற்றியதோடு. மானாமதுரை அலுவலகப்  பொறுப்பையும் கூடுதலாக் கொடுத்துவிட்டார்கள். வாரம் இரண்டு தினங்கள் மானாமதுரை ஆபீசுக்குப் போய்;  வர வேண்டும்.

சந்திரமோகன் வித்யாசமானவர். “கால்குலேடிவ்'' மனநிலைக்குச் சொந்தக்காரர். வார்த்தைகளைச் சிக்கனமானச் செலவளிப்பவர். அலுவலகத்தில் இவருக்கு  அடுத்த நிலையில் இருக்கும் அலுவலர்களிடந்தான்  அளவுடன் உரையாடுவார். அதற்கு கீழ்நிலை ஊழியர்களிடம் பேச்சு வைத்துக் கொள்ள மாட்டார். வெளியிலும்  அப்படித்தான்.. பஸ் நிலையங்களில்.. பஸ் ரூட்  பற்றிக் கேட்பது... தெரியாத இடங்களில் விலாசம்  விசாரிப்பது இத்தியாதிகள்  கூட.. ஒயிட்கலர்; வாசிகளிடந்தான்  சுருக்கமாகக் கேட்டுத் தெரிந்து கொள்வார். அழுக்கு மனிதர்களின் தொடர்பை அவமானமாகக் கருதுபவர்.

ஏழு நாற்பதுக்கு சிவகெங்கைப் பேருந்து வந்தது. கும்பல் அதிகமாக இருந்தாலும் முண்டியடித்து  ஏறி உட்க்கார இடம் பிடித்து விட்டார் சந்திரமோகன். பத்து நிமிடங்கள்  பஸ் தாமதமாக வந்ததால்  பஸ்  உடனே  கிளம்பிற்று.

எப்படியும் சிவகெங்கை  போய்ச் சேர பதினோரு மணியாகிவிடும். உடனே மானாமதுரைக்குப் போக பஸ் இருக்குமான்னு தெரியல. எல்லாருக்கும் புரமோசன் வரும்போது சென்னை ஆபிசிலேயே வேகன்ஸி இருந்திச்சு. நம்ம நேரம். அங்க காலி இடம் இல்லாமப் போச்சு.. இங்க தள்ளி விட்டுட்டாங்க.. இன்னம் எத்தன நாளைக்கி.. இப்படி அலஞ்சு.. அவஸ்தப்படனுமோ.. தெரியல..''

பேருந்து வேகத்திற்கு ஈடு கொடுத்து. சந்திரமோகனின் மனப் பறவை பறந்தது.  ஒரு வழியாக. பதினொரு மணி சுமாருக்குபேருந்து சிவகெங்கை பேருந்து நிலையத்திற்குள் நுழைந்து விட்டது.

பேருந்தை விட்டு இறங்கினார்  சந்திரமோகன். மானாமதுரைக்குப் போகும் பேருந்துகள் நிற்கும் இடத்தில் வந்து நின்றார். அடுத்து எத்தனை மணிக்கு மானாமதுரை பஸ் வரும் என்று விசாரிக்க அவரது ஈகோ இடந்தரவில்லை. அப்போது வயதான பெரியவர் ஒருவர். ''மானாமதுரை போகனுப்பா. எந்தக் கார் போகும்னு சொல்லு எனக்குப் படிக்கத் தெரியாது.'' அருகில் இருந்த வாலிபரிடம் கேட்டார்.

“மானாமதுரக்கிப் பஸ் வர இன்னும் அரைமணி நேரமாகும் அங்க. இங்க போய் அடிபட்டிடாத அப்படிப் போய் ஒக்காரு. பெருசு.''  என்றான் அந்த வாலிபன்.

“என்ன அரமணி நேரத்துக்கு  பஸ் கிடையாதுங்கிறான்..''  மனதுக்குள்  சந்திரமோகன் முணுமுணுக்க. அப்போது பரமக்குடி பஸ் வந்து நின்றது. வேகமாக போய் வண்டியில் ஏறி ஜன்னல் ஓர இருக்கையில் இடம் பிடித்தார் சந்திரமோகன். சற்று முன்  வாலிபனிடம் விசாரித்த பெரியவர். இவர் பக்கம் வந்து பேருந்திற்கு வெளியில் நின்றபடி. “அய்யா.. இந்த கார் மானாமதுரைக்குப் போகுமா?''  என்று கேட்க..  சந்திரமோகன்  அவரைப் புழுவைப் பார்ப்பது  போல் பார்த்துவிட்டு பதில் சொல்லாமல் வேறு பக்கம் திரும்பி விட்டார்.

பரமக்குடி பேருந்து சிவகெங்கை பேருந்து நிலையத்தில் இருந்து கிளம்பிற்று. பேருந்தில் ஏகக் கூட்டம். நடத்துநர் டிக்கெட் தந்து சில்லறை பெறுவதற்குள் படாத பாடு பட்டார். அவர் சந்திரமோகன்  இருக்கைக்கு வந்திட பதினைந்து நிமிடங்கள் ஆயிற்று.

பத்து ரூபாயைக் கொடுத்து'' ஒரு மானாமதுரை..'' என்று சந்திரமோகன் கேட்க.''சார் இது மானாமதுரை போகாது'' என்றார் நடத்துநர்.

“பரமக்குடி வண்டிதானே. இதுல மானாமதுரைக்கிப் போயி இருக்கேனே.''

“பரமக்குடி வண்டிதான். மானாமதுரை போகாது. இளையாங்குடி வழியா.. பரமக்குடி   போகிது கேட்டு ஏறி இருக்கப்பிடாதா. படிச்சவன் பாட்ட கெடுத்தான் எழுதினவன் ஏட்டக் கெடுத்தான்கிற கதையா இருக்கு தாயமங்கலத்தில இறங்கிடுங்க.அங்க மானாமதுரைக்கி பஸ் வரும் அதுல ஏறி மானாமதுரை போங்க.''

சந்திரமோகன் எதுவும் பேசவில்லை. தாயமங்கலத்திற்கு டிக்கெட் வாங்கி.. அங்கு இறங்கினார். சிறிது நேரத்தில் மானாமதுரை  பேருந்து வர அதில் ஏறி. பனிரெண்டரை மணி வாக்கில். மானாமதுரை பேருந்து நிலையத்தில் களைப்புடன் இறங்கினார்.   அதே நேரத்தில் சிவகெங்கையில் இருந்து..  ஒரு பேருந்து அங்கு வர. ''மானாமதுரைக்கு இந்த கார் போகுமா'' என்று இவரிடம் கேட்ட அந்தப் பெரியவரும்  அந்த வண்டியில் வந்து இறங்கினார்.

சந்திரமோகனுக்கு ஒரே அவமானமாகப் போய்விட்டது.  படிக்காத பட்டிக் காட்டுக் கிழவர் கேட்டுக் கேட்டு…கரெக்டாக  வந்து விட்டார். கேட்பதைக் கௌரவக் குறைவாக நினைத்த நாம் இப்படி அவஸ்தைப் பட்டுப் போயிட்டோமே. என்கிற எரிச்சல் அவர் மனதைப் பிசைந்து எடுத்தது.. தன்னைப் பார்த்து ஊரே சிரிப்பது போல் தோன்றியது..

பிறரிடம் பேசுவதைக் கௌரவக் குறைவாக நினைத்த மனிதரிடம் இப்போது….கலகலப்பு பூ  மலரத் தொடங்கி விட்டது. உரையாடல்கள்  புதுப்புது உறவுகளை உருவாக்கும். உருவான   உறவுகளை பலமாக்கும்.. இந்த யதார்த்தங்களை சந்திரமோகன் உணர அவர் பேருந்து  மாறிப் பயணப் பட வேண்டி இருந்தது.

Pin It

தலைவர் ஆர்.நல்லகண்ணு பாராட்டு

தில்லி மாநகரில் கடந்த ஏப்ரல் மாதம் சிறப்பாக நடைபெற்ற அனைத்திந்திய முற்போக்கு எழுத்தாளர் சம்மேளனத்தின் 15வது தேசிய மாநாட்டில் அகில இந்திய தலைவராகத் தேர்ந்தெடுக்கப்பட்ட மக்கள் எழுத்தாளர் பொன்னீலனுக்கு நாகர்கோவிலில் நடைபெற்ற பாராட்டு விழாவில் கலந்து கொண்டு சிறப்புரையாற்றும் போது தலைவர் நல்லகண்ணு குறிப்பிட்டுச் சொன்ன ஒரு மதிப்பீடுதான் “பண்பாட்டுத் துறையில் ஜீவாவுக்குப் பின் தனி முத்திரை பதித்தவர் பொன்னீலன்'' என்பது.

திருத்தமிழர் போராட்டத்தில் ஈடுபட்டு திருவனந்தபுரம் சிறைச்சாலையில் இருந்தபோது, கேரளத் தோழர்களுடன் கொண்ட உறவால், விடுதலையாகும்போது ஒரு இடதுசாரியாக வெளிவந்த தோழர் கொடிக்கால் ஷேக் அப்துல்லா தலைமையில் பாராட்டு விழா நாகர்கோவில் ரோட்டரி கம்யூனிட்டி சென்டரில் வைத்து 5.5.2012 மாலை 6.00 மணிக்கு சிறப்பாக நடைபெற்றது.

குமரி மாவட்ட இலக்கிய வரலாற்றில் நாற்பது ஆண்டுகளுக்கும் மேலாக தொடர்ந்து இயங்கி வரும் தமிழாலயம் இயக்குநர் புலவர் கு. பச்சைமால் வரவேற்றுப் பேசினார்.  பொன்னீலனோடு இளமைக்காலம் முதலே நட்பு பாராட்டி வருகின்ற கொடிக்கால் ஷேக் அப்துல்லா பாராட்டு விழாவுக்கு ஏற்பாடு செய்தமைக்கு நன்றியும் தெரிவித்தார்.

ஆர். நல்லகண்ணு:

காட்சிக்கு எளியராய், கடமையையும் கண்ணியத்தையும் உயிர்மூச்சாகக் கொண்டு எல்லோருக்கும் தோழராய்த் திகழ்கிற, பொதுவுடைமை இயக்கத்தால் புடம்போட்டு எடுக்கப்பட்ட, இன்று அனைத்துத் தரப்பு மக்களாலும் தோழர் என அன்புடன் அழைக்கப்படும் மக்கள் தலைவர் நல்லகண்ணு பாராட்டுப்பெறும் பொன்னீலனை வியந்து பாராட்டினார்கள். இது பாராட்டு நிகழ்வுக்கு மகுடம் சூட்டியது போலிருந்தது.

“சமூக நோக்கத்தோடு 1936ல் அனைத்திந்திய முற்போக்கு எழுத்தாளர் சம்மேளனம் தொடங்கப்பட்டது.  மக்கள் வாழ்க்கையை எழுத்தில் எடுத்துச் சொன்ன முன்ஷி பிரேம்சந்த் என்ற மாபெரும் எழுத்தாளர்தான் முதல் தலைவர். சஜ்ஜாத் ஜாஹீர் பொதுச்செயலாளர்.  முல்க்ராஜ் ஆனந்த் என்ற மாபெரும் எழுத்தாளர் நீண்ட காலம் தலைவராக இருந்தார்.

அரசியல் போராட்டங்கள் உணர்ச்சிமயமான போராட்டங்கள்.  சுதந்திரப் போராட்டம் என்பது நீண்ட பயணம்.  இங்கே அறிவு பூர்வமான சிந்தனை வேண்டும்.  அதற்கு அனுபவரீதியான ஆற்றல் வேண்டும். இங்கேதான் எழுத்தாளர்களின் சமூக முக்கியத்துவம் வருகிறது.  தோவாளை சுந்தரம் பிள்ளை வில்லுப்பாட்டில் “ஏன் பஞ்சம் வந்தது'' என்பதைப் பாடுவார்.

பட்டாபி சீதாராம அய்யர் எழுதிய காங்கிரஸ் சரித்திரம்தான் அதிகாரபூர்வமான காங்கிரஸ் கட்சி வரலாறு.  வெள்ளைக்காரர்களுக்கு எதிராக சுதேசி கப்பலோட்டிய வ.உ.சிதம்பரம் பிள்ளை ஏகாதிபத்தியத்தின் ஒரு சரடைப் பிடித்தவர். ஆனால் அந்த வரலாறு சீதாராம அய்யர் எழுதிய காங்கிரஸ் சரித்திரத்தில் இடம் பெறவில்லை. இதைப் போலவே சிங்கார வேலர் முதன் முதலில் சென்னையில் மேதினத்தைக் கொண்டாடியவர். காங்கிரஸ் மாநாட்டில் பூரணச் சுதந்திரம் பற்றி பேசியவர். தென்னிந்தியாவின் முதல் கம்யூனிஸ்ட். முதல் கம்யூனிஸ்ட் மாநாட்டில் தலைமை தாங்கியவர்.  கட்சி வரலாற்றை எழுதும்போது வடக்கே உள்ளவர்களுக்குச் சிங்காரவேலரைப் பற்றி தெரியவில்லை. தோழர்கள் முருகேசனும், சி.எஸ். சுப்பிரமணியமும் சிங்காரவேலர் பற்றி ஆங்கிலத்தில் நூல் எழுதிய பிறகுதான் சிங்காரவேலர் பற்றி வடக்கே அறிமுகம் கிடைத்தது. இதேபோல் பாரதிக்கும் நூற்றாண்டு விழாவின் போதுதான் பாரதி பற்றி வடக்கே தெரிய வந்தது.

பொன்னீலன் முற்போக்கு எழுத்தாளர் சம்மேளனத்தின் அகில இந்திய தலைவராக தேர்ந்தெடுக்கப்பட்டிருக்கிறார் என்றால் அது தமிழ்நாட்டுக்கு கொடுக்கப்பட்ட அங்கீகாரம். ஜீவா உருவாக்கிய கலை இலக்கிய பெருமன்றத்துக்கு கொடுக்கப்பட்ட அங்கீகாரம்.

பொன்னீலன் விளாத்திகுளம் வட்டாரத்தில் பள்ளி ஆய்வாளராக வந்த நாட்களிலிருந்து எனக்கு அவர் அறிமுகம். அந்த வட்டாரத்தில் பணி என்பது ஒரு தண்டனை போலத்தான். யாரும் அங்கு போகமாட்டார்கள். ஆனால் பொன்னீலன் அங்கு சென்று தங்கி பணியாற்றினார்கள். அதுபோல் வயலூரில் பள்ளி தலைமையாசிரியர் அங்கு யாரும் விரும்பி பணிக்குப் போகமாட்டார்கள். சாலையிலிருந்து இறங்கி ஆறு மைல்கள் சைக்கிள் மிதித்தால்தான் அந்த ஊருக்கு போக வேண்டும்.  ஓட்டுவீடு கூட கிடையாது.  அந்த ஊரிலும் சென்று தங்கி பணியாற்றினார் பொன்னீலன். அதேபோல் புதுக்கோட்டை மாவட்டத்திலும் அத்தாணி ஊரில் ஒரு குடிசையில் தங்கி, அவரே சமையல் செய்து சாப்பிட்டு பணியாற்றினார். ஆனால் போன இடங்களிலெல்லாம் அவர் நல்லாசிரியராக பணியாற்றி பெருமை சேர்த்தவர்.  அவருடைய பழக்கமுறையும், பண்பாடும் மிகச் சிறப்பானவை.

1967ல் என்று நினைக்கிறேன்.  எட்டயபுரம் பாரதி விழாவில் கவியரங்கத்தில் பொன்னீலன் கவிதை வாசித்தார்.  அதுதான் தொடக்கம். தொடர்ந்து இலக்கியப் பணிகள், சிறுகதைகள், நாவல்கள், படைப்புக்கள், பேச்சுக்கள் என அவருடைய பணிகள் சிறப்பானவை.

பேச்சு என்றால் பொன்னீலன் பேச்சு சிறப்பாக இருக்கும்.  திருமண வீடுகளில் திருமணத்துக்கு நான் தலைமை தாங்கி இரண்டொரு வார்த்தைகள் பேசிவிட்டு அமர்ந்துவிடுவேன்.  மணமக்களை வாழ்த்திப் பேச பொன்னீலன் வந்து பேசுவார்.  வாழ்வைப் பற்றி, வாழ்க்கையின் ருசிகளைப்பற்றி, மணமகள் பற்றி, மணமகன் பற்றி, மணமக்களின் குடும்பம் பற்றி மிகமிக ரசனையாக பேசி எல்லோரையும் சந்தோஷப்படுத்தி விடுவார்.  அவர் பேசும் போது எல்லோரும் சிரித்த முகத்துடன் கேட்டுக் கொண்டிருப்பார்கள்.  நிகழ்ச்சி முடிந்த பிறகும் அவருடைய பேச்சை ரசித்து பேசிக் கொண்டிருப்பார்கள். அப்படிப்பட்டது அவருடைய பேச்சு. கரிசலுக்கு தமிழ்நாடு அரசின் பரிசு கிடைத்தது.  புதிய தரிசனங்களுக்கு சாகித்திய அகாதமி விருது கிடைத்தது.  அவருடைய பல நூல்கள் கல்லூரிகள், பல்கலை கழகங்களில் நூலாக வைக்கப்பட்டுள்ளன. அவருடைய கரிசல் மலையாளத்திலும் ஹிந்தியிலும் மொழிபெயர்க்கப்பட்டுள்ளது.  மறுபக்கமும் வேறு மொழிகளில் பெயர்க்கப்பட வேண்டும். மறுபக்கம் நாடு தழுவிய ஒரு இலக்கியமாக மாற வேண்டும்.

அகில இந்திய முற்போக்கு எழுத்தாளர் சம்மேளனம் வரலாற்று சிறப்பு மிக்க ஒரு அமைப்பு, 75 ஆண்டுகளாக சிறப்பாக செயல்பட்டு வரும் பண்பாட்டு அமைப்பு.  கலை இலக்கிய பெருமன்றத்தின் துணைச் செயலாளராக, பொதுச்செயலாளராக, தலைவராக பல்லாண்டுகள் பணியாற்றிய பொன்னீலன் இன்று அகில இந்திய தலைவராக தேர்ந்தெடுக்கப்பட்டிருக்கிறார்.  எல்லா தகுதிகளும் பெற்ற அவர் தலைவராக தேர்ந்தெடுக்கப் பட்டிருக்கிறார் என்ற செய்தி அறிந்ததும் மிகவும் மகிழ்ந்தேன்.  அவர் இத்தகைய தகுதியை அடைந்ததில் நான் மிகவும் பெருமைப்படுகிறேன்.

பாராட்டு பிறந்த மண்ணில் நடப்பது மிகச் சிறப்பு.  இந்தப் பாராட்டு விழாவில் கலந்து கொண்டதில் எனக்கு பெரு மகிழ்ச்சி.  இந்த பாராட்டு விழாவை ஏற்பாடு செய்த தோழர் கொடிக்கால் ஷேக் அப்துல்லாவுக்கு என் பாராட்டுக்கள்''.

நிகழ்ச்சியில் பொன்னீலனின் பால்ய கால நண்பர்கள், தோழர்கள் முதல், கலை இலக்கியப் பெருமன்ற தோழர்கள், மாவட்டம் முழுவதிலும் இருந்து பேராசிரியர்கள், அறிஞர்கள், எழுத்தாளர்கள் என திரளாக கலந்து கொண்டார்கள். வாழ்த்துக்களுக்கும் பாராட்டுக்களுக்கும் நன்றி தெரிவித்து பொன்னீலன் ஏற்புரை வழங்கினார்.

விழா நிகழ்ச்சிகளை ஒருங்கிணைத்து பெருமன்றத்தின் மாநில துணைப் பொதுச் செயலாளர் பேராசிரியர் எச். ஹமீம் முஸ்தபா சிறப்பாக தொகுத்தளித்தார்.  இறுதியில் மாவட்ட இணைச் செயலாளர் எஸ்.ஜே.சிவசங்கர் நன்றி கூறினார்.

பாராட்டப்பட வேண்டிய ஒரு சின்னஞ்சிறு விஷயத்தைப் பார்த்தாலும், ஓடோடிச் சென்று பாராட்டி மனிதர்களை உற்சாகப்படுத்துகின்ற, உத்வேகப்படுத்துகின்ற மானுடப் பண்பை தன் வாழ்வியலாகவே கொண்டிருக்கிறவர் பொன்னீலன்.  அவருக்கானப் பாராட்டுவிழாவுக்குத் தலைவர் நல்லகண்ணுவை சிறப்பு அழைப்பாளராக அழைத்து, நிகழ்வில் கலை இலக்கியப் பெருமன்றத்தையும் இணைத்து, விழாவுக்குப் பொறுப்பேற்று சிறப்பாக நடத்திய தோழர் கொடிக்கால் ஷேக் அப்துல்லா அவர்களை எவ்வளவு பாராட்டினாலும் தகும்.

Pin It

கவிதை மொழியின் அரசு!
கவிஞனின் சரசி!

நடமிடுவாள் கலைமகள்
காதலுடன்
கவிஞனின் நாவரங்கில்!

அவத்தை அகற்றும்
கவிதைத் தவமோ
பிரபஞ்சத்தையே அணைக்கும்!

வெற்றிக்கும் தோல்விக்கும்
சம்பந்தமே இல்லாத
விளையாட்டு & கவிதை!
கவிஞன் விளையாடிக் களித்திடுவான்!

விதைப்பவனுமல்ல
கவிஞன்
அறுப்பவனுமல்ல
விளைச்சல் விளைச்சல்
விளைச்சல் அவன்!
தகர்ப்பவனல்ல கவிஞன்
கட்டுமானம்
சபிப்பவன் அல்ல கவிஞன்
வாழ்த்துப் பாடல்!

அறிமுகமற்றோர்
சோகத்துக்காகவும்
அழுது துடிப்பவன்!

நிராகரிக்கவே
முடியாதவன் கவிஞன்!
அப்புறம் ஏனவன்
நிராகரிப்பவரை
நிராகரிக்க வேண்டும்

சிறைப் பட்டாருக்கும்
குற்றவாளிகளை விடவும்
பெருங் குற்றவாளிகள்
சிறைக்குவெளியே
திரிவதைப் பார்ப்பவன்!

அரசாசனத்தை விடவும்
கவிஞன்
சிரசாசன் விரும்புவான்!

அலங்காரங்களை விடவும்
கவிஞன்
நிருவாணங்கள் ரசிப்பவன்!

கூவுவதில்லை குயில்கள்
வருமானத்திற்காக!
காய்ப்பதில்லை மரங்கள்
சன்மானத்திற்காக!
கவிஞனும் அப்படித்தான்!

மதமும் இல்லை
மத
மாற்றமும் இல்லை!
மொழிமாற்றமுண்டு கவிஞனுக்கு!

தீண்டத் தகுந்தோரை
தீண்டுவதைவிடத்
தீண்டத் தகாதோரைத்
தீண்ட விரும்புவான்!

புறாக்களின் கூடு & கவிஞன்
நிராதரவின் வீடு!
அகதிகளின் நாடு&கவிஞன்
ஆதிக்கத்தின் கேடு!

வேரிலிருந்து மரம்!
பூவிலிருந்து பழம்!
மரபை மீறுபவன் அல்ல!
கவிஞன்
மரபை மாற்றுபவன்!
ஆற்றுப்படுத்தும் இலக்கியத்தை
மாற்றிப்படைத்தவன்
அழிபசி தீர்த்திட வடலூரின்
அணையாத நெருப்பும் அவன்!

பரதேசிபோலிருக்கும்
சுகவாசி&கவிஞன்
மூட்டை முடிச்சற்ற
யாத்திரிகன் கவிஞன்!

ஆதிபத்திய முள் முடிகளை
இறக்கி வைத்து
ரத்தம் துடைத்து
இளைப்பாறல் தருபவன்!

எதேச்சாதிகாரம்
விழுங்கி
ஜீரணிக்க முடியாத
வைரத் தகடு கவிஞன்!

Pin It