நூலகம் என்றாலே
நூலுக்குப் பகையா - நீண்ட
கால இனப்பகைக்
களிப்பின் நகையா? (நூலகம்)
ஆடிப் பெருக்கிலே
அழிந்தவை பாதி - வெற்று
அனல்வாதம் புனல்வாதம்
அழித்தவை மீதி
தேடி அறிவினைத்
தீக்கிரை யாக்குதல் - தன்னைத்
தெய்வக் குலமென்னும்
பார்ப்பன நீதி (நூலகம்)
கோட்டூர் புரத்திலோர்
அறிவு நற்கோயில் - இன்று
கொள்ளிவாயின் பிடியில்
அதனுடை வாயில்
கேட்டினுக்கும் இங்கோர்
எல்லையே இல்லையா - இருவர்
கீரியும் பாம்புமாய்க்
கிடப்பதன் தொல்லையா? (நூலகம்)
திருவள்ளுவ ராண்டில்
தீயை வைப்பதும் - இங்குச்
செம்மொழி நூலகம்
காணாமற் போவதும்
ஒருவர்மேல் ஒருவர்
கொண்ட பழிப்பா - இவர்
உட்பகைக் கெல்லாம்
தமிழின அழிப்பா? (நூலகம்)
காழ்ப்பான அரசியல்
கைவிட் டொழிக! - அடிமைக்
கட்டுகள் பொடிப்பொடி
யாகி உதிர்க!
யாழ்ப்பாணச் சாம்பலில்
தமிழன் எலும்புகள் - இனி
யார்க்குமே வேண்டாம்
இனக்கொலைத் தழும்புகள்! (நூலகம்)