கேடுகெட்ட நடுநிலை

சில நாள்களுக்கு முன், இந்தியப் பொதுவுடமைக் கட்சியின் விருதுநகர் மாவட்டச் செயலாளரும், திருவில்லிபுத்தூர் சட்டமன்ற உறுப்பினருமான பொண்ணுப் பாண்டி இந்தியப் பொதுவுடமைக் கட்சியிலிருந்து விலகி, ஜெயலலிதா முன்னிலையில், ஒரு பொதுக்கூட்டத்தில், அ.தி.மு.க. உறுப்பினராகச் சேர்ந்து விட்டார்.

peter alphonseஅவர் பொதுவுடமைக் கட்சியில் நெடுநாள் உறுப்பினர். அவருடைய தொலைபேசி கூட, “இன்னும் என்ன தோழா, எத்தனையோ நாளா...” என்றுதான் பாடி அவரை அழைக்குமாம். அப்படிப்பட்டவர் திடீரென்று கட்சி மாறி விட்டார்.

உடனே அவர் எவ்வளவு கோடி ரூபாய் வாங்கிக் கொண்டு கட்சி மாறினார் என்று நம் வைகோ சொல்லி விடுவார் என்று எதிர்பார்த்தேன். எல்லோருக்கும் எவ்வளவு பணம் பரிமாறப்படுகிறது என்பதைக் கணக்கிடும் அதிகாரி அவர்தானே! ஆனால் இம்முறை அவர் வாயே திறக்கவில்லை.

யாரேனும் தி.மு.க. பக்கம் சென்றால் மட்டும்தான் அந்தக் கூக்குரல்கள் எழும் போலிருக்கிறது. அண்மையில் பீட்டர் அல்போன்ஸ் த.மா.கா..விலிருந்து விலகியவுடன் கூட அப்படி ஒரு குரல் எழுந்தது. தந்தி தொலைக்காட்சியில் உரையாடிய விடியல் சேகர், பீட்டருக்கு எவ்வளவு விலை பேசப்பட்டதோ என்றார். மனசாட்சி உள்ள எவருக்கும், பணத்துக்கு விலை போகக் கூடியவர் அல்லர் பீட்டர் என்று தெரியும். ஆனாலும் விடியல் சேகர் ஏன் அப்படிச் சொன்னார்? “இன்றையத் தேர்தலின் கதாநாயகன் கலைஞர்தான்” என்று பீட்ட்டர் சொல்லி விட்டார் அல்லவா! உடனே சேற்றை வாரி இறைக்க வேண்டியதுதான்.

யார் வேண்டுமானாலும் அ. தி.மு.க.விற்குப் போகலாம். அதில் ஒன்றும் தப்பில்லை. அவர்கள் எல்லோரும் காசுக்கு ஆசைப்பட்டுப் போகின்றவர்கள் இல்லை. அவர்கள் கொள்கை மறவர்கள். ஆனால் தி.மு.க. பக்கம் சென்றுவிட்டால், விலை போகின்றவர்கள் ஆகி விடுவார்கள்.

தி.மு.க., அ.தி.மு.க. இரண்டையும் ஒரே மாதிரி நாங்கள் எதிர்க்கிறோம் என்று சொல்கின்றவர்களை எல்லாம் கவனித்துப் பாருங்கள். இரண்டு எதிர்ப்புக்கும் இடையே பெரிய வேறுபாடு தெரியும். “நடுநிலையாளர்” தமிழருவி மணியன் தன் இதழில், “அ.தி.மு.க. ஓர் அரக்குக் கோட்டை, தி.மு.க. காகிதப் புலி” என்று எழுதுகிறார். இதுதான் இவர்களின் கேடுகெட்ட நடுநிலை.

===============

2ஜி வழக்கும் சில கணக்கும்

தவறான கணக்குகளால் சிலர் தற்காலிகமாகத் தப்பித்தனர் - அது பெங்களூருவில் நடைபெற்ற சொத்துக் குவிப்பு வழக்கு. தவறான கணக்குகளால் சிலர் சிறை சென்றனர் -அது 2ஜி வழக்கு!

தேவை ஏற்படும் போதெல்லாம் அல்லது தேர்தல் வரும் போதெல்லாம் சிலர் 2ஜி வழக்கு பற்றிப் பேசுவார்கள். இப்போது அந்த ‘சீசன்’ தொடங்கியுள்ளது.

2ஜி வழக்கு பற்றிப் பேசுகின்றவர்கள் மிகுதி. அந்த வழக்கு பற்றிய உண்மைகள் அறிந்தவர்கள் சிலர், மிக மிகச் சிலர். 2ஜி பற்றி நெடு நேரம் பேசுகின்றவர்களிடம் ஒரே ஒரு சின்னக் கேள்வியை முன்வையுங்கள். அவர்களின் அறியாமையை நாம் அறிந்து கொள்ளலாம். வேறொன்றுமில்லை, 1.76 லட்சம் கோடி என்று தொடர்ந்து இந்த வழக்கில் ஒரு தொகை பேசப்படுகிறதே அது எப்படி வந்தது என்று மட்டும் கேளுங்கள். அடுத்தததாக, அந்தத் தொகை அந்த வழக்கின் குற்றப் பத்திரிகையில் எங்கும் காணப்பட வில்லையே ஏன் என்று கேளுங்கள். இந்த இரண்டு கேள்விகளுக்கும் விடை தெரியாதவர்கள்தாம் 2ஜி பற்றி நிறையப் பேசிக் கொண்டுள்ளனர்.

பணிவோடு ஒன்றைக் குறிப்பிட விரும்புகிறேன், 2ஜி குறித்துக் காரசாரமாக மேடைகளில் பேசும் எதிர்க்கட்சித் தலைவர்கள் சிலருக்கே கூட இந்த விளக்கம் தெரிந்திருக்க வாய்ப்பில்லை.

சரி, அந்த உண்மைகளைச் சின்னக் கணக்குகளின் மூலம் நாம் பார்த்து விடுவோம். ஆ. ராசா அவர்கள் மத்திய அமைச்சராக இருந்தபோது, இரண்டாம் தலைமுறை (2ஜி) அலைக்கற்றைகள் விற்பனைக்குக் கொடுக்கப்பட்டன. இன்றிருப்பது போல் அன்று பலரிடம் கைத் தொலைபேசி இல்லை. எனவே 52.75 மெகா ஹெட்ஸ் அலைக்கற்றைகள் மட்டுமே விலை போயின. ஒரு மெகா ஹெட்ஸ் 276 கோடிக்குப் போயிற்று. அதன்மூலம் அரசுக்குக் கிடைத்த வருமானம் 14,559 கோடி.

தலைமைத் தணிக்கைக் கணக்காளராக அன்று இருந்த வினோத் ராய் கற்பனையில் ஒரு கணக்குப் போட்டார். அவர் 2008 முதல் 2013 வரை அப்பதவியில் இருந்தார். ‘முதலில் வருபவருக்கு முதலில்’ என்று இல்லாமல் அலைக்கற்றைகளை ஏலத்துக்கு விட்டிருந்தால் ஒரு மெகா ஹெட்ஸ் 3350 கோடிக்கு விற்பனையாகி இருக்கும் என்பது அவர் கணக்கு. அது அவருடைய கற்பனைக் கணக்கு. அதன்படி பார்த்தால், 1,76,712 கோடி ரூபாய் வருமானம் வந்திருக்கும் என்றாகிறது. போனால் போகிறது என்று 712 கோடியை விட்டுவிட்டு ஒரு லட்சத்து 76 ஆயிரம் கோடி என்று திரும்பத் திரும்பக் கூறிக் கொண்டுள்ளனர். இப்படித்தான் அந்த 1.76 என்னும் தொகை வந்தது.

இங்கும் கூட இரண்டு செய்திகள் கவனிக்கப்பட வேண்டியவை. வினோத் ராய் கணக்குப் படியும் அது ஊழல் அன்று, அரசுக்கான இழப்புத் தொகை. அவ்வளவே. இரண்டாவது, 1.76 இல் வரப்பெற்ற 14ஆயிரம் கோடியைக் கழிக்க வேண்டும் இல்லையா? அதனைக் கழித்துவிட்டு 1.62 லட்சம் கோடி என்றாவது சொல்லியிருக்க வேண்டும்.

இந்த வழக்கில் ஆ. ராசா, 2011 பிப்ரவரி 2 ஆம் நாள் கைது செய்யப்பாட்டார். அதாவது, தேர்தலுக்கு இரண்டு மாதங்களுக்கு முன்பு! 2011 ஏப்ரல் 2 ஆம் தேதி குற்றப்பத்திரிகை நீதிமன்றத்தில் சமர்ப்பிக்கப்பட்டது. அதில் 1.76 லட்சம் கோடி என்ற தொகை எங்கும் குறிக்கப்படவில்லை. தணிக்கையாளரின் கணக்கை சி.பி.அய் ஏற்றுக் கொள்ளவில்லை. அவர்கள் ஒரு கணக்குப் போட்டு 32 ஆயிரம் கோடி அரசுக்கு இழப்பு ஏற்பட்டிருக்கலாம் என்றனர்.

தணிக்கையாளர் கூறியது போல், ஒன்றரை ஆண்டுகளுக்கு முன் 2ஜி மற்றும் 3ஜி அலைக்கற்றைகள், ஏலத்துக்கே விடப்பட்டன. 2008ஆம் ஆண்டே ஒரு மெகா ஹெட்ஸ் 3350கோடிக்கு விற்றிருக்க வேண்டுமென்றால், 6 ஆண்டுகளுக்குப் பின் எவ்வளவு கோடி ரூபாய் கூடுதலாக விற்பனை ஆகியிருக்க வேண்டும்? ஆனால் 367.2 மெகா ஹெட்ஸ் அலைக்கற்றை ஒரு லட்சத்து ஒன்பதாயிரம் கோடி ரூபாய்க்குத்தான் ஏலம் போனது. அதாவது ஒரு மெகா ஹெட்ஸ் 297 கோடி ரூபாய். அவ்வளவுதான்.

ஏலத்துக்கு விட்டும், 6 ஆண்டுகளுக்குப் பின் ஒரு மெகா ஹெட்ஸ் 21 கோடி ரூபாய்தான் கூடுதல் விலைக்குப் போயுள்ளது. வினோத் ராய் கணக்குப்படி 3350 கோடிக்கே விற்பனை ஆகியிருந்தால், 11 லட்சத்து 30 ஆயிரம் கோடி ரூபாய் அரசுக்கு வந்திருக்க வேண்டும் ஆனால் வந்ததோ வெறும் ஒரு லட்சத்து ஒன்பது ஆயிரம் கோடிதான். அப்படியானால் இப்போது 10 லட்சம் கோடி ரூபாய் ஊழல் நடந்துள்ளது என்று கூறலாமா? மோடி உட்பட எல்லோரையும் கைது செய்யலாமா?

தலைமைத் தணிக்கைக் கணக்காளர் போன்ற மிக உயர்ந்த பதவியில் இருந்தவர்கள் ஓய்வு பெற்றபின், அவர்களுக்கு வேறு அரசு பதவிகள் வழங்கக்கூடாது என்று இந்திய அரசமைப்புச் சட்டம் கூறுகிறது. ஆனால் இப்போது ஓய்வு பெற்றபின், வினோத் ராய், இன்னொரு பெரிய பொறுப்பில் (UN panel of external auditors and honorary advisor to the railways) அமர்த்தப்பட்டுள்ளார்.

புரிய வேண்டிய கணக்குகள் இப்போது புரிந்திருக்கும்!

======================

ஏலம் விடும் வைகோ

விஜயகாந்த்துடன் கூட்டணி சேர்ந்த நாள் முதல், அமைச்சரவையே அமைந்து விட்டது போல ஒரு கற்பனையில் வாழ்ந்து கொண்டிருக்கிறார் வைகோ. போதாக்குறைக்கு, தே.மு.தி.க. சுதீஷ் வேறு, யார் யாருக்கு என்னென்ன அமைச்சர் பதவி என்று அறிவித்து விட்டார். இப்போதெல்லாம் மக்கள் நலக் கூட்டணியினர், உள்துறை அமைச்சராக, நிதித்துறை அமைச்சராகப் பவனி வருகின்றனர். துணை முதல்வர் பதவியை வைகோதான் பாவம் வேண்டாம் என்று கூறி விட்டார். (சிறுவனாக இருந்தபோது போலீஸ் திருடன், டாக்டர்-நோயாளி விளையாட்டு விளையாண்டது  நினைவுக்கு வருகிறது).

vijayakanth 248கோவில்பட்டி மறியல் போராட்டத்தில் கலந்துகொண்ட வைகோ, ஒரு காவல் துறை அதிகாரியிடம் ஆவேசமாகப் பேசுவது அனைத்துத் தொலைக்காட்சிகளிலும் படமாக ஓடிக் கொண்டிருந்தது. (அவர் யாரிடம்தான் ஆவேசம் இல்லாமல் பேசினார்?) சும்மா நிற்கும் காவல் அதிகாரியை, “எங்கே என்னை அடியுங்கள் பார்க்கலாம்“ என்கிறார். யாராவது தொட்டால் அல்லது கைது செய்தால் அதில் ஒரு பரிவு கிடைக்காதா என்று மனத்திற்குள் ஒரு கணக்கு இருக்கலாம்.

தாங்கள் ஆட்சிக்கு வந்தவுடன், தி.மு.க., அ.தி.மு.க ஊழல் சொத்துகளை எல்லாம் பறிமுதல் செய்து, பொது இடத்தில், “ஒரு தரம், இரண்டு தரம், மூன்று தரம்....” என்று ஏலம் விடுவாராம். சொல்கிறார். அந்த உரிமை எல்லாம், சட்டப்படி மாநில அரசுக்கு உள்ளதா என்பது ஒரு புறமிருக்க, எனக்கு இன்னொரு நினைவு வந்தது.

தி.மு.க.வில் இருந்தபோது கலைஞர் இவரை நாடாளுமன்ற மாநிலங்களவைக்கு ஒரு தரம், இரண்டு தரம், மூன்று தரம் அனுப்பி வைத்தார் அல்லவா! அதனால்தான் இவரும் இப்போது ஒரு தரம், இரண்டு தரம், மூன்று தரம் என்று ஏலம் விடுகிறார்!!

================

அடவு கட்டி ஆடுகிறார்கள்!

அறைகூவல்கள், அவதூறுகள், ஆவேசப் பேச்சுகள் என அமர்க்களப்பட்டுக் கொண்டிருக்கிறது தமிழ்நாடு. எல்லாவற்றிலும் முதல் இடத்தில் நிற்பவர் இன்று வைகோதான். களத்தில் கதாநாயகனாகி விடவேண்டும் என்று முடிவெடுத்து விட்டார் போலிருக்கிறது.

தி.மு.க விஜயகாந்த்துக்கு 500 கோடி கொடுக்க முன்வந்தது என்று குற்றம் சாடுகின்றார் வைகோ. பாவம், விஜயகாந்த் விலைக்கு வாங்கப்படும் பொருள் ஆக்கப்பட்டு விட்டார் என்பதுதானே பொருள்! தன் அணியின் தலைவரையே ஏன் இப்படி அவர் கொச்சைப் படுத்துகிறார் என்று தெரியவில்லை.

அதே போன்ற ஒரு கேள்வியைப் பாலிமர் தொலைக்காட்சி அவர் முன் வைத்தபோது சினம் கொண்டு சீறி எழுகிறார். நேர்காணலைப் பாதியிலேயே முடித்துக் கொள்கிறார். “ஒரு பெண்ணைப் பார்த்து நீ கற்புடையவளா என்று கேட்டாலே அவளுடைய கற்பு சந்தேகத்துக்கு உரியதாகி விடுமாம்“ - சொல்கிறார் வைகோ. மற்றவர்களின் கற்பைப் பற்றி இவர் கேள்வி கேட்கலாமாம். ஆனால் இவரிடம் எவரும் எதுவும் கேட்கக் கூடாதாம். நல்ல கற்பு, நல்ல முற்போக்குச் சிந்தனை!

இன்னொரு பக்கம் சீமான், வரும் தேர்தல், தமிழனுக்கும் தெலுங்கனுக்கும் இடையிலான போர் என்கிறார். அவதூறுக்குப் பெயர் வைகோ என்றால், இனவாதத்தின் பெயர் சீமான் என்றாகிறது.

தமிழர் முன்னேற்றப் படை என்னும் அமைப்பின் நிறுவனத் தலைவர் கி. வீரலட்சுமி, “தமிழரைத் தமிழரே ஆள வேண்டும் என்னும் கோரிக்கையை வலியுறத்தி, தில்லியில் நாடாளுமன்றத்தின் முன் நான் தீக் குளிக்கத் தயார், சீமான் தயாரா?” என்று கேட்கிறார். இப்போது அவர் ம.ந.கூ.வில் இனைந்துவிட்டார். ஆதலால் விஜய்காந்தும், வைகோவும் தமிழர்கள் ஆகிவிட்டனர். எனவே இனிமேல் தீக் குளிக்க வேண்டியதில்லை.

இன்னும் ஒன்றரை மாதத்தில் இப்படி எத்தனை எத்தனை கூத்துகள் அரங்கேறுமோ தெரியவில்லை.

==============

அம்மாவும் 21 அடிமைகளும்

சென்னை தீவுத்திடலில் கடந்த 9ஆம் தேதி தன் கட்சியின் வேட்பாளர்கள் 21 பேரை ஜெயலலிதா அறிமுகம் செய்து வைத்தார். மேடையில் 8 குளிர் சாதனக் கருவிகள். அமர்திருந்ததோ அவர் மட்டுமே. மேடைக்கு கீழே எந்தக் குளிர் சாதன வசதியும் இல்லாமல் 21 சட்டமன்ற வேட்பாளர்கள்.

jayalalitha election campaign

==============

சாதனைதான்

கடந்த 10ஆம் தேதி மாமண்டூரில் நடைபெற்ற மாநாட்டில், விஜயகாந்த் 20 நிமிடங்கள் பேசினார். எந்தச் செய்தியையும் சொல்லாமல், எந்த அரசியலும் பேசாமல் 20 நிமிடங்கள் ஒருவரால் புரிந்தும், புரியாமலும் பேச முடிகிறது என்பது சாதனைதானே!

எதற்கு எடுத்தாலும் நாக்கை வெட்டு, தலையை வெட்டு என்று சொல்லிக்கொண்டு திரிகின்ற சாமியார்களின் மத வெறி தலைக்கேறிக் கொண்டு இருக்கிறது.

அண்மையில் சனி பகவான் கோயிலுக்குள் பெண்களை அனுமதித்தால் பாலியல் பலாத்காரங்கள் அதிகரிக்கும் என்று துவாரகா பீடத்தின் தலைவர் ஸ்வரூபநந்தா என்ற சாமியார் சொல்லியிருக்கிறார்.

400 ஆண்டுகளாக மராட்டியத்தின் சிங்கணாப்பூர் சனி கோயிலுக்குள் பெண்கள் நுழையக் கூடாது, வழிபடக்கூடாது என்று இந்து மதம் தடை விதித்திருந்தது.

பெண்களின் வலிமையான போராட்டமும், நீதிமன்ற அனுமதியும் பெண்கள் அக்கோயிலுக்குள் நுழைய வாய்ப்பாக அமைந்தன.

பெண்கள் அக்கோயிலுக்குள் நுழைந்தால், பாலியல் வன்கொடுமை நடக்கும் என்று மதவெறியுடன் அந்தச் சாமியார் சொல்கிறார். சாமியாரின் இந்தப் பேச்சு, இப்படி நடக்க வேண்டும் என்பது போன்ற நாக்குத் தடித்த பேச்சு.

கேரளாவில் சபரிமலைக் கோயிலிலும் பெண்கள் வழிபட இந்து மதம் தடை செய்கிறது. அதற்கு எதிரான வழக்கில் உச்ச நீதிமன்றம், பாலின நீதி அபாயத்தில் இருக்கிறது என்ற வாதத்தை ஏற்கவில்லை. மரபாகப் பின்பற்றப்படும் நடைமுறைகளைப் பொறுத்து முடிவு எடுக்க முடியாது. அரசியல் அமைப்புக் கோட்பாடுகளின் கீழ்தான் முடிவு எடுக்க முடியும் என்று சொல்லியிருக்கிறது.

அத்துடன் “பொது இடத்திற்குள், கோயிலுக்குள் நுழைவதற்குப் பெண்களுக்கு அனுமதி மறுப்பவர்கள் எந்த உரிமையின் கீழ் அதைச் சொல்கிறார்கள்?” என்று கோள்வி எழுப்பியுள்ளது.

இது பெண்களுக்குள்ள உரிமையை நிலைநாட்டுவதோடு, “மரபாகப் பின்பற்றப்படும்” என்ற இந்துமத வாதத்தைச் சிதறடிக்கிறது.

பெண்கள் இன்று எவரெஸ்ட் மலை ஏறுகிறார்கள், விமானங்களை ஓட்டுகிறார்கள், விண்வெளியில் பறக்கிறார்கள். ஆனால் இந்து மதம் தீட்டு என்றும் பாலியல் அடிப்படையிலும் பெண்களைப் பார்ப்பது மனு அநீதியின் அடையாளம்.

சனி பகவானைப் பெண்கள் வணங்கக் கூடாது என்று சொல்ல துவாரகா சாமியார் யார்--? அவருக்கென்ன உரிமை?

பெண்களால் சனியனுக்குத் தீட்டு இல்லை.

சனியனால்தான் பெண்களுக்கு அவமானம்.

இது சபரிமலைக்கும் பொருந்தும்.

chandrakumar 600

உடைந்தது தே.மு.தி.க., உடைந்தது த.மா.க. இரண்டு கட்சிகளுக்கும் ஓர் ஒற்றுமை இருக்கிறது.

இவர்கள் இருவரும் பா.ஜ.க.வுடன் பேசுவார்கள் கம்யூனிஸ்ட்டுகளுடன் பேசுவார்கள் அ.தி.மு.க.வுடன் பேசுவார்கள், இடையில் தி.மு.க.வுடனும் பேசிக் கொள்வார்கள்.

அப்படியானால் இவர்களின் கொள்கைதான் என்ன? அது விஜய்காந்திற்கும் தெரியாது, வாசனுக்கும் தெரியாது.

நான் ‘கிங்’ ஆக வேண்டுமா? ‘கிங் மேக்கர்’ ஆக வேண்டுமா? என்று பொதுக் கூட்டத்தில் போய்க் கேட்டுக்கொண்டிருந்தார் விஜய்காந்த். அவரை விட்டால் இந்த நாட்டில் வேறு யாருக்கும் முதல்வராகும் தகுதியில்லை என்றார் பிரேமலதா. உலகமே சுற்றிக்கொண்டிருந்தது விஜய்காந்திற்கு.

ஆனால் முதல்வராகும் வாய்ப்பை, யாருடன் கூட்டுச் சேர்வதன் மூலம் பெற முடியும் என்று முடிவெடுக்கத் தெரியாமல் ஜவ்வாக இழுத்துக்கொண்டிருந்தார்.

ஆமை புகுந்த வீடு உருப்படாது என்பார்கள் கிராமத்தில். இங்கே வைகோ புகுந்தார் - உடைந்தது தே.மு.தி.க.

vasan 283அதிலிருந்து உருவானது மக்கள் தே.மு.தி.க. அதன் நிறுவனர் சந்திரகுமார். பிரேமலதாவால் பாதிக்கப்பட்டவர்கள் ஏராளம். தே.மு.தி.க. வீழ்ச்சிக்குப் பிரேமலதா காரணம், தற்போதைய நிலைக்கு விஜய்காந்த் காரணம். இவருடன் 7 மாவட்டச் செயலாளர்கள், மூன்று சட்டமன்ற உறுப்பினர்கள், பல மாவட்ட முன்னணியினர் கைகோத்து விட்டார்கள்.

இது ஒரு புறம் இருக்க ஆட்சி முடியும்வரை மத்திய அமைச்சராக இருந்த ஜி.கே.வாசன், ஆட்சி முடிந்த உடன் முதல்வர் கனவில் த.மா.க.வைத் தொடங்கினார்.

தி.மு.க - காங்கிரஸ் தேர்தல் கூட்டு உரிய நேரத்தில் முடிவு செய்யப்பட்டுவிட்டது.

வாசன் போயஸ் தோட்டத்துக் குரலுக்காகக் காத்துக்கிடந்தார், இலவு காத்த கிளியைப்போல.

ஆனால் போயஸ் தோட்டத்து கதவு இவருக்கு இரட்டைத் தாழ்ப்பாள் போட்டுவிட்டது.

விடுவாரா வைகோ! ஓடிப்போய் அவரையும் இழுத்துக்கொண்டு வந்தார் மக்கள் நலக் கூட்டணி என்று.

உடைந்தது த.மா.க. கட்சியின் மூத்த தலைவர்கள் பிட்டர் அல்போன்ஸ், எஸ்.ஆர்.பாலசுப்பிரமணியம், பொதுச் செயலாளர் விஸ்வநாதன், கார்வேந்தன், ராணி என்று பல முன்னணியினரும், 15 மாவட்டத் தலைவர்களும் த.மா.க.வை விட்டு வெளியோருகிறார்கள்.

எனக்கு இரண்டு கண் போனாலும் பரவாயில்லை. அவர்களுக்கு ஒரு கண்ணாவது போக வேண்டும் என்பது வைகோவின் அரசியல் விளையாட்டு.

இதற்குப் பலியானவைதாம் தே.மு.தி.க.வும், த.மா.க.வும்!

சில நாள்களுக்கு முன்பு ஊடகவியலாளர் சந்திப்பில், மதிமுக வின் பொதுச்செயலாளர் வைகோ, தலைவர் கலைஞர் அவர்கள் பிறந்த சாதியைக் குறிப்பிட்டு, மிகத் தரம்தாழ்ந்தும் தன்நிலை மறந்தும் பேசினார். அடுத்த சில மணி நேரங்களிலேயே அது குறித்துத் தன் மன்னிப்பு அறிக்கையை வெளியிட்டார்.

vaiko 320உடனே அவருக்குப் பாவமன்னிப்பு வழங்கி விட்டனர், படித்தவர்கள் பலர். “ அடடா என்ன மாதிரியான மன்னிப்பு அது..... ஏனோ தானோ என்று கூறப்பட்ட ஒன்றில்லை, விரிவான மன்னிப்பு” என்று வைகோவைச் சிலாகித்தனர். தொலைக்காட்சியில் உரையாடிய தோழர் அருணன், “வைகோவுக்கும் பேசிய பின் எவ்வளவு மன உளைச்சல் இருந்திருக்கும்“ என்று எண்ணிக் கவலைப்பட்டார் (பாவம், அடித்தவரின் கை எவ்வளவு வலித்திருக்கும் என்பது போல). இதனால் “பேசு பொருள்” மாறிவிட்டதே என்றும் வருந்தினார்.

நமக்கும் கூட ஒரு அய்யம் ஏற்பட்டது. எதனால் வைகோ திடீரென்று “மனம் திருந்திய மைந்தர்” ஆனார் என்று எண்ண வேண்டியதாயிற்று.

மற்ற நேரங்களில் எல்லாம் வழக்குப் போட்டுக்கொள்ளுங்கள் என்று சொல்லும் வழக்கமுடையவர் அவர். யார் யார் பெயரிலோ குற்றச்சாட்டு, அவர் மூன்று கோடி வாங்கிவிட்டார், இவர் ஆறு கோடி வாங்கி விட்டார் என்று மனம் போன போக்கில் குற்றச்சாட்டுகளை அள்ளி வீசுவதும், ஆதாரம் எங்கே என்று கேட்டால், ‘நீதி மன்றத்தில் கூறுகிறேன்’ என்பதும் அவருடைய ‘அஞ்சாத சிங்கம் அண்ணன் வைகோ’ என்னும் பிம்பத்தைக் கட்டி எழுப்பின.

இதே வேளையில் உங்களுக்கு இவ்வளவு கோடி கை மாறியுள்ளதாமே என்று ஒரு தொலைக்காட்சியில் கேட்டால், நேர்காணலைப் பாதியிலேயே முடித்துக் கொண்டு வெளியேறுவதும் அவர் போக்காக இருந்தது. ‘கேள்வி கேட்டாலே கற்பு போய்விடும்‘ என்னும் உலகமகா அதிசய முற்போக்குச் சிந்தனையை வேறு அவர் வெளிப்படுத்தினார். மற்றவர்களின் கற்பு பற்றி மட்டும் அவர் எப்போதும் கவலைப்பட்டதில்லை. எல்லாம் “எனக்கு வந்தால் ரத்தம், உனக்கென்றால் தக்காளிச்சட்டினி” தத்துவம் தான்.

இப்படிப்பட்ட வைகோ இப்போது மட்டும் ஏன் இப்படி உடனடி மன்னிப்புக் கேட்டார் என்பது எண்ணிப் பார்க்கத் தக்கதுதானே!.

வேறொன்றுமில்லை, மற்ற குற்றச் சாட்டுக்களுக்கெல்லாம் வழக்குப் போட்டால் அது விசாரணைக்கு வந்து, தீர்ப்பு சொல்லப்பட்டு, பிறகு மேல் முறையீட்டிற்க்குச் சென்று, இறுதி முடிவு வருவதற்குள் எல்லோருக்கும் வயதாகிவிடும்.

ஆனால் சாதி குறித்த இந்தப்பேச்சு அப்படிப்பட்டதன்று, தேர்தல் ஆணையத்திடம் உடனே யார் வேண்டுமானாலும் புகார் கொடுக்கலாம். தேர்தல் நேரம் என்பதால், தேர்தல் ஆணையம் தானாகவே வழக்கை எடுத்துக்கொள்ளலாம். அப்படி ஏதேனும் நடந்தால், இந்தத் தேர்தலிலேயே ம.தி.மு.க. விற்குச் சிக்கல் வந்துவிடும். மிகக் கடுமையான விளைவுகளைச் சந்திக்க நேரிடும். அதனால் தான் அவசரம், அவசரமாக, ஐந்து, ஆறு மணி நேரத்திற்குள்ளாகவே, கண்ணீர் விட்டுக்கலங்கி, ஒரு மன்னிப்பு அறிக்கை வெளியாகி உள்ளது என்று தோன்றுகிறது. மன்னிப்பு அறிக்கை ஒரு கவசமாக இருக்குமல்லவா!