தமிழகத்தின் சமூகநீதி வரலாறு மிக நீண்டது. ஏறத்தாழ ஒரு நூற்றாண்டுக்கு முன், அதற்காகவே தொடங்கப்பட்ட இயக்கம்தான் திராவிட இயக்கம். கல்வி, வேலைவாய்ப்பு, அரசியல் ஆகிய மூன்று தளங்களிலும், பிற்படுத்தப்பட்ட, தாழ்த்தப்பட்ட மக்களுக்கு இடஒதுக்கீடு தேவை என்னும் கோரிக்கை, படிப்படியாகத்தான் நடைமுறைக்கு வந்தது. இன்னும் கூட அதில்நாம் முழுமையை எட்டவில்லை. அதற்குள்ளாகவே ஆயிரத்தெட்டு தடைகளைச் சந்திக்க வேண்டி வருகிறது.

அப்படிப்பட்டத் தடைகளில் ஒன்றுதான், நுழைவுத் தேர்வு என்பது. ஆண்டின் இறுதியில் நடைபெறும் தேர்வுகளில், இரவு பகலாக உழைத்துப் படித்து, நல்ல மதிப்பெண்களை நம் பிள்ளைகள் பெற்றாலும், மிக எளிதில் நுழைவுத் தேர்வுகளின் மூலம் அவர்களை வெளியேற்றிவிட முடியும். நுழைவுத் தேர்வென்பது பெரும்பாலும் நகரக் கலாச்சாரம் சார்ந்தது. வாழ்வியல் சார்ந்த அறிவைக் காட்டிலும், வெறும் புள்ளி விவரங்களை அறிந்து வைத்திருத்தலே அறிவு என்பது போன்ற போலி முகம் காட்டும் தேர்வுகள் அவை.

துணிகளை நெய்வது எப்படி என்பதைச் சென்னைப் பிள்ளைகளைவிட, சென்னிமலைப் பிள்ளைகள்தான் கூடுதலாய் அறிந்து வைத்திருப்பார்கள். வயலில் இறங்கி நாற்று நடுவதும், களை பறிப்பதும், அறுவடை செய்வதும் கிராமத்துப் பிள்ளைகளின் வாழ்வின் ஒரு பகுதி. ஆனால் நுழைவுத் தேர்வில் இவைகளைப் பற்றியயல்லாம் எந்தக் கேள்வியும் இருக்கப் போவதில்லை. எனவே வாழ்க்கை தொடர்பான சிந்தனைகளையும், செயல்முறைகளையும் கொண்டிருக்கும் கிராமத்துப் பிள்ளைகள் பின்னுக்குத் தள்ளப்பட்டு, புத்தக அறிவை மட்டுமே பெற்றிருக்கும் நகரத்துப் பிள்ளைகள் வெற்றி பெற நுழைவுத் தேர்வுகள் உதவுகின்றன.

சமூக நீதிக்கு எதிரான இந்நிலையை மாற்றவே மூன்று ஆண்டுகளுக்கு முன்பு நுழைவுத் தேர்வு நீக்கப்பட்டது. அன்று முதல் ஒடுக்கப்பட்ட ஏழை எளிய மாணவர்கள் பெரும்பயன் அடைந்து வருகின்றனர். ஆனால் இப்போது, மருத்துவம் மற்றும் மருத்துவம் தொடர்பான முதுகலைப் படிப்புகளில் மாணவர்கள் அனுமதி பெற வேண்டுமெனில், அவர்கள் பொது நுழைவுத் தேர்வில் வெற்றி பெற்றாக வேண்டுமென்று இந்திய மருத்துவக் கவுன்சில் முடிவு செய்திருக்கிறது.

ஆண்டாண்டு காலமாக ஒடுக்கப்பட்டுக் கிடக்கும் ஏழை மக்களுக்கு எதிரான இச்சமூக அநீதியை விலக்கிக்கொள்ள வேண்டும் என்னும் கோரிக்கையை உச்ச நீதிமன்றம் தள்ளுபடி செய்துவிட்டது.

இத்தீர்ப்பு சமூக நீதியின் மீது விழுந்த சம்மட்டி அடியாக இருக்கிறது. இதனைக் கட்சி வேறுபாடுகளைக் கடந்து அனைவரும் ஒருங்கிணைந்து எதிர்த்திட வேண்டும். நீதிமன்றத் தீர்ப்புகளுக்கு எதிராகக் குரல் கொடுக்கவே கூடாது என்னும் மூடநம்பிக்கையைத் தகர்த்திட வேண்டும்.

Pin It

திசம்பர் 24 பெரியாரின் நினைவு நாள். பெரியார் சிலைக்கு மாலை அணிவித்தல், ஊர்வலம் போதல், கூட்டம் நடத்துதல் என்ற அளவோடு மட்டும் இந்நாள் முடிந்து போவதில் பொருளில்லை. சாதியயாழிப்பு, மதப் பிடிப்பைத் தூக்கி எறிதல், மானுட விடுதலையை அவாவும் நாத்திக நெறி, பெண்ணுரிமை பேணல், இறுதி இலக்கான பொதுவுடைமை நோக்கிய பாய்ச்சல் நடை இவையே பெரியார் நெறி பேணுவோர் முன்கை எடுக்க வேண்டிய முதன்மைப் பணிகள். தமிழ் மொழிக் காப்பு, தமிழ்த் தேசிய விடுதலை போன்றவை இவற்றோடு இணைந்த வையாம்.

‘தமிழில் என்ன இருக்கிறது வெங்காயம்’ என்று மட்டந்தட்டியே பெரியார் தமிழர் வரலாற்றைச் சிதைத்தார். தான் கன்னடன் என்கிற நினைப்பில் எப்போதும் இருந்துகொண்டே, தமிழ் நாட்டில் அரசியல் நடத்தியவர் அவர்  என்பன போன்ற கூரிய அம்புகள் அவர்மேல் பாய்கின்றன. ‘ பெரியார் தமிழைக் காட்டுமிராண்டி மொழி என்றார். திருக்குறள், சிலப்பதிகாரம், இராமாயனம் போன்ற இலக்கியங்களைத் தூற்றினார் ’ என்கிற பழைய குற்றச்சாட்டும் இன்று புதுப்பிக்கப்படுகிறது.

periyar_330திராவிடம் பேசித் தமிழர் ஓர்மையைக் குன்றச் செய்தார் என்று தமிழ்த் தேசியர்களும், பிற்படுத்தப்பட்டோர்க்கு மட்டும் நலன்சேர்த்த சாதியத் தலைவர் என்று தாழ்த்தப்பட்ட தோழர்கள் சிலரும், தந்தை பெரியார் பணிகள் பற்றி மதிப்பீடு செய்கின்றனர்.

நடுநிலையோடு சொல்லும் கருத்துகளை ஏற்றுப் பெரியாரியத்தை முன் நகர்த்திச் செல்ல வேண்டியது சமூக விடுதலையை அவாவும் நம் அனைவரின் பணியுமாகும்.

‘ நாட்டில் இலக்கியங்கள் இருந்தால் அது நாகரீகத்திற்கு, அறிவு வளர்ச்சிக்கு, புரட்சிக்கு, முற்போக்கு மாறுதலுக்கு உதவிட வேண்டும். ஆனால் நம் நாட்டு இலக்கியங்களோ புலவர்களும், மதவாதிகளும், ஆரியரும் பிழைக்கத்தான் இருக்கின்றன ’ என்பதே தமிழ் இலக்கியங்கள் பற்றிப் பெரியார் கொண்ட கருத்தாகும்.

திருக்குறள் மாநாடுகள் நடத்தியவர் பெரியார்.  “ திருவள்ளுவர் நல்ல அறிவாளி. ஆராய்ச்சிக்காரர். அந்தக் காலத்தில் மக்களிடம் பரவி இருந்த மூட எண்ணங்களோடு போராடிய அறிஞர் ”என்று சொன்ன பெரியார் ‘திருக்குறளில் வேண்டியதை எடுத்துக்கொண்டு வேண்டாததை விட்டுவிட வேண்டும் ’  என்றும் குறிப்பிட்டார்.

இந்து மதக் கருத்தியலோடு கைகோத்துக் கொண்ட எந்த இலக்கியத்தையும் அவர் முரண் இன்றி எதிர்த்தார் என்றாலும் தமிழ் மொழிக்கு, தமிழ் இனத்துக்கு ஒரு தீங்கு நேர்ந்தகாலை, தமிழர்களைத் தட்டி எழுப்பிக் களங்கண்டவர் அவர்தான். 1938 இன் மொழிப்போரில் தமிழறிஞர் தமிழ்மக்களின் இணைப்புப் புள்ளியாய் எழுச்சியூட்டியவர் பெரியார் என்பதை நடுநிலையாளர் ஒப்புவர்.

‘ திராவிடர் ’ என்றும் ‘ தமிழர் ’ என்றும் அவர் உச்சரித்த சொற்கள் எல்லாம், ஒடுக்குண்ட மக்களின் விடுதலையை முன்நிறுத்திய கோட்பாட்டின் அடிப்படையில்தான். இந்தக் கருத்தியல்களின் எந்தக் கரவும் உள்வைத்துக் கொள்ளாத திறந்த புத்தகமே தந்தை பெரியார்.

பண்டித அயோத்திதாசர் தொடங்கி, இரட்டைமலை சீனிவாசன், எம்.சி. இராஜா, மீனாம்பாள் சிவராஜ், மேயர் சிவராஜ், முனுசாமிப் பிள்ளை போன்ற தாழ்த்தப்பட்ட மக்களின் தலைவர்கள் திராவிட இயக்கத்தோடு இணைந்து நின்றனர். பின்னாளில் ஏற்பட்ட இடைவெளி பெரியார் இயக்கத்தில் நேர்ந்த சரிவாகும்.

பார்ப்பனிய நச்சின் கொடுந் தீண்டலில் இருந்தும் சாதியச் சகதியில் இருந்தும், பாமரத் தமிழனைக் காப்பதற்குத்தான் பெரியார் முதலிடம் தந்தார்.

சாதியத்தின் அடித்தளம் தனிச் சொத்துடைமையில் உயிர் வாழ்வதைப் பெரியார் உணர்ந்திருக்கிறார். நிலவுடைமைக் கண்ணிகளைத் தகர்க்காதவரை சாதியத்தின் சல்லி வேர்களைச் சாய்க்க முடியாது என்பதையும் அவர் அறிந்திருந்தார்.

ஆனால் இந்நாட்டின் பொதுவுடைமையர் கருதியது போல் அது வெறும் மேல்கட்டுமானமாக மட்டும் இல்லை. அடிக்கட்டுமானமாயும் இறுகிப் போயுள்ளது என்பதை உணர்ந்து, சாதி அரணை உடைக்கும் போரில் தன் ஆற்றல் முழுவதையும் செலவிட்டார்.

சாதியத்திற்குக் காப்புக் கோட்டையாய் விளங்கிய பார்ப்பனியத்தையும், பார்ப்பனிய இந்து மதத்தையும் சமரசமின்றிச் சாடினார். பாசிசப் பண்பு கொண்ட பார்ப்பனியத்திற்குப் படுகுழி வெட்டாமல் இங்கே சமூக விடுதலையோ,அரசியல் பொருளியல் விடுதலையோ சாத்தியமில்லை என்று ஓங்கி அறைந்தார். தேவைக் கேற்பத் தன் நிறத்தை மாற்றிக் கொள்ளும் தீங்கான அதன் பச்சோந்தித் தனத்தைத் தோலுரித்தார்.

பெரியாரியத்தின் பெருஞ்சிறப்புகளுள் ஒன்று, அன்னாரின் பெண் விடுதலைக் கோட்பாடுகளாகும். வெறும் வாய்ச் சொல் அளவில் மட்டும் நில்லாது, செயல் தளத்திலும் அவற்றை அவர் நிறுவிக் காட்டினார்.

மாந்தர் அனைவர்க்கும் சமஉரிமை, பொதுஉரிமை, சுயமரியாதை ஆகியன வாய்த்தால் மட்டுமே இங்கு புத்தம் புதியதோர் பொதுவுடைமைப் பொன்னுலகைச் சமைக்க முடியும் என்பது பெரியாரின் கருத்து. இவ்வகையில் அண்ணல் அம்பேத்கரும் தந்தை பெரியாரும் இம்மண்ணில் தோன்றிய ஈடிணையற்ற மாபெரும் தலைவர்கள் ஆவர்.

வெகுமக்களால் ஏற்றுக் கொள்ளப்பட்டது, நெடுங்காலமாய்ப் பின்பற்றப்படுவது என்பதற்காக மட்டுமே எந்த ஒன்றையும் ஏற்கக் கூடாது என்பது அறிவு சார் தத்துவ மரபாகும். இதில் பெரியார் வென்ற இடம், அவர் தனது கருத்துக்களை எவ்வகையான பூச்சுகளுக்கும் ஆட்படுத்தாமல் கட்டுடைத்ததுதான். அதனால்தான் இராமன் படத்தை எரித்த இராமசாமியைத் தமது இனமானத் தந்தையாகத் தமிழர்கள் ஏற்றார்கள். பெரியார் சுடரை ஏந்தி நாமும் தொடர்வோம் !

------------------------------------------------------------------------------------

Pin It

ஒரு வழியாக  "அம்பேத்கர் ” வெளிவந்து விட்டார். தமிழில் பெயர்க்கப்பட்ட பிறகும், பூட்டிப் பூட்டி வைக்கப்பட்டிருந்தார். தமிழ்நாடு முற்போக்கு எழுத்தாளர் - கலைஞர்கள் சங்கம் இதை வெளிக்கொணர்வதற்கான முயற்சியில் தீவிரமாக இறங்கிய நிலையில் சட்டென்று படம் வெளியாகிப் போனது.

படத்தைப் பார்த்த போது இப்படியயாரு அருமையான படத்தை அநியாயமாகத் தாமதிக்க வைத்துவிட்டார்களே என்று வருத்தம் ஏற்பட்டது. காந்தி, பாரதி, பெரியார் பட வரிசையில் வைக்கத்தக்கது அம்பேத்கர். தலைவர்களைப் பற்றி ஆவணப்படம் எடுப்பது எளிது. அதையே கதைப்படமாக எடுக்கும் போதுதான் கஷ்டம் தெரியும்.  "அம்பேத்கர்” பட இயக்குனர் ஜாபர் படேல் அதில் பெரு வெற்றி பெற்றிருக்கிறார்.

ambedkar_360"சட்ட மேதை ”,  "அரசியல் சாசனச் சிற்பி ” எனும் அடைமொழிகளுக்குள் அம்பேத்கரை ஒற்றைப் பரிமாணமாக - சகலரும் ஏற்கத்தக்க பரிமாணமாக - சுருக்கிக் காட்டுகிற வேலை வெகுகாலமாக நடந்து வருகிறது. இதைத் தகர்த்தெறிந்து விட்டது இந்தப் படம்.

ஆய்வாளர், ஆசிரியர், சமூகப் போராளி, பார்ப்பன‌ிய எதிர்ப்புப் பண்டிதர், நூலாசிரியர், பவுத்த அறிஞர் எனும் அவரின் இதர பரிமாணங்களையும் பிரமாதமாக முன்னிறுத்தி விட்டது. இவை அனைத்தும் சாதிய எதிர்ப்பு எனும் விரிந்த தளத்தின் வெளிப்பாடுகளே என்பதையும் கச்சிதமாகக் கொண்டு வந்துவிட்டது.

அம்பேத்கர் ஆசிரியப்பணி ஆற்றும்போது அங்கிருந்த பானைத் தண்ணீரைக் குடிக்கவிடாமல் தடுத்து, அவர் வீட்டிலிருந்து தண்ணீர் கொண்டுவரச் சொன்னார்கள் சக ஆசிரியர்கள். அவரோ,  “இதை நான் குடிக்கிறேன். நீங்கள் வேண்டுமானால் வீட்டிலிருந்து தண்ணீர் கொண்டு வாருங்கள்” என்று பதிலடி கொடுக்கும் போது அரங்கமே கைதட்டி ரசித்தது.

சவுதார் குளம் பேராட்டம், காளாராம் கோயில் நுழைவுப் போராட்டம் ஆகியவை மிக உணர்ச்சிப்பூர்வமாகச் சித்தரிக்கப்பட்டுள்ளன. தாழ்த்தப்பட்டோர் நுழையக் கூடாது என்று பார்ப்பன‌ியவாதிகள் கோவிலையே பூட்டினார்கள். ராமர் குடும்ப சகிதமாய்க் கோவிலுக்குள் மாட்டிக்கொள்வார். அவர்களுக்கு ராமரைவிடத் தங்களது வருணாசிரமக் கட்டுப்பாடே முக்கியம் என்பது நிரூபணமாகும். தாழ்த்தப்பட்டோரும் தேரை இழுக்க முதலில் சம்மதம் தந்துவிட்டு, பிறகு அவர்களைத் தொடவிடாமல் செய்ய அவர்கள் ஓடுகிற ஓட்டமும், அதைத் தொடர்ந்து நடைபெற்ற களேபரமும், அம்பேத்கர் தாக்குதலிலிருந்து மயிரிழையில் தப்புவதும் தத்ரூபமாகக் காட்டப்பட்டுள்ளன. பார்ப்பன‌ியத்தின் வஞ்சகமும், அம்பேத்கரின் நெஞ்சுரமும் ஒருங்கே வெளிப்படுகின்றன.

அம்பேத்கர் நடத்திய போராட்டம் பார்ப்பன‌ியத்தை எதிர்த்துத்தானே தவிர தனிப்பட்ட பார்ப்பன‌ர்களை எதிர்த்து அல்ல என்பதும், படத்தில் சொல்லப்பட்டு விட்டது. பார்ப்பன‌ரல்லாத உயர்சாதியினரிடத்தும் சாதியம் வெளிப்பட லாம் என்பதை அவர் சுட்டிக் காட்டியது வந்துவிட்டது.

அம்பேத்கர் வாழ்வின் மிக இக்கட்டான கட்டம் காந்தியின் உண்ணாவிரதம். இது விரிவாகவே காட்சிப்படுத்தப்பட்டுள்ளது. மகாத் மாவின் உயிரைக் காப்பதற்கும் தம்மக்களின் உரிமையைக் காப்பதற்கும் இடையில் இவர் தவியாய்த் தவிக்கிறார்; ஒரு வழியாக விடை காண்கிறார். முத்தாய்ப்பாக  “உண்ணாவிரதத்தை அடிக்கடி பயன்படுத்தாதீர்கள்” என்று அவர் மகாத்மாவுக்குப் புத்தி சொல்லும் போது திரை அரங்கில் ஒரே கோலாகலம்.

அம்பேத்கரை சுதந்திர இந்தியாவின் சட்ட மந்திரியாக்கி, அரசியல் சாசனத் தயாரிப்பு பொறுப்பில் அவரை இருத்தியது மகாத்மா காந்திதான் என்கிற உண்மை பலராலும் மறைக்கப்படுகிறது. அம்பேத்கர் - காந்தி உறவை 1932 புனா ஒப்பந்தத்தோடு நிறுத்தி விடுகிறார்கள். அந்தத் தவறை இந்தப் படம் செய்யவில்லை. இந்தியாவின் அரசியல் சாசனத்தை எழுத உலக சட்ட நிபுணர்களை நேரு தேடிக் கொண்டிருந்த போது, உள்ளூரிலேயே இருந்த மேதையைக் காந்தி பரிந்துரைத்த காட்சியும் இதில் உள்ளது.

எனினும், தாழ்த்தப்பட்டோருக்கான இட ஒதுக்கீட்டிற்குப் பிரதான எதிரியாக இருந்தது, இந்து மகாசபையும், அதன் தலைவராகிய மதன்மோகன் மாளவியா போன்றோரும் என்கிற உண்மை படத்தில் வரவில்லை. ஏதோ காந்திதான் அதற்குப் பிரதான எதிரி என்பது போலக் காட்டப்படுகிறது. வரலாற்றை சற்றே ஆழ்ந்து படித்தால், காந்தியின் உண்ணாவிரதம் அம்பேத்கருக்கு எதிராக மட்டுமல்லாது, மாளவியா போன்ற பார்ப்பன‌ியவாதிகளுக்கு எதிராகவும் நடத்தப்பட்டது என்பதைப் புரிந்து கொள்ளலாம். அவர்கள் தனித் தொகுதி முறைக்கு மட்டுமல்ல இடஒதுக்கீட்டுக்கே எதிராக இருந்தார்கள். அவர்களையும் இறங்கி வரச் செய்தது இந்த உண்ணாவிரதம். பிரிட்டீஷ் ஆட்சியாளர்கள் கொடுக்க முன்வந்த இடங்களைக் காட்டிலும் கூடுதல் இடங்களைத் தாழ்த்தப்பட்டோருக்கு வாங்கிக் கொடுத்தது. புனா ஒப்பந்தமே அம்பேத்கருக்கும் மாளவியா போன்றோருக்கும் இடையேதான் கையயழுத்தானது.

அரசியல் சாசன வரைவுக் குழுவில் மேலும் ஆறுபேர் இருந்தார்கள் என்றாலும் அதை வடிவமைக்கிற பெரிய வேலை நடைமுறையில் அம்பேத்கர் மீதே விழுந்தது. இதை டி.டி.கிருஷ்ணமாச்சாரியே ஒப்புக் கொண்டி ருக்கிறார். இது காட்சி ரூபத்தில் வருவது அம்பேத்கரின் மகத்தான பணியை உதாசீனப்படுத்தும் அருண்ஷோரி போன்றோர் களுக்குச் சரியான பதிலடி.

அம்பேத்கர் சாதிய ஒடுக்குமுறைக்கு எதிராக மட்டுமல்ல, பெண்ணடிமைத்தனத்திற்கு எதிரா கவும் போராடியவர். முற்போக்கான இந்து சட்ட மசோதாவை நிறைவேற்றுவதில் பிரதமர் நேருவும் பின்வாங்குவதைக் கண்டு, வெறுப்புற்றே தனது மந்திரி பதவியை ராஜினாமா செய்தார் அம்பேத்கர். இது எத்தனை இந்து மாதர்களுக்குத் தெரியும்? அவர்களுக்காகப் போராடிய ஒரு மெய்யான ஆண்மகனைத் தரிசிக்க அவர்கள் அவசியம் இந்தப் படத்தைப் பார்க்க வேண்டும்.

படம் அம்பேத்கரின் வாழ்வோடு இணைந்து, இயைந்து வேகமாகச் செல்கிறது. அரசியல் சாசனத்தில் தாழ்த்தப்பட்ட மக்களுக்கு உரிய பாதுகாப்பு ஏற்பாட்டைச் செய்துவிட்டுத்தான், 1952 தேர்தலில் இது நடைமுறைக்கு வந்ததைக் கண்டுவிட்டுத்தான் அவர் கலாச்சார ரீதியான ஒரு அதிரடித் தாக்குதலைத் தொடுத்தார் ; புத்த மதத்திற்கு மாறினார்.

இந்த மதமாற்றம் சாதி ஒழிப்புக்கான சரியான மார்க்கமா என்பது விவாதத்திற்குரியது. ஆனால் இந்த மேதையின் வாழ்வில் அதுவே உச்சமாக மாறி நின்றது. படமும் அதையே உச்சகட்டமாகக் கொண்டு முடிகிறது.

மம்முட்டியின் நடிப்பைப் பற்றி ஏதும் சொல்ல முடியாது. காரணம் அது நடிப்பாகவே இல்லை. எங்கும் மம்முட்டியைக் காணமுடிய வில்லை. எங்கும் அம்பேத்கரே இருக்கிறார். இயல்பான நடிப்புக்கு இலக்கணம் தந்திருக்கிறார். மனைவியிடம் அம்பேத்கர் கொண்டிருந்த அலாதியான பாசத்தை அற்புதமாக வெளிக்காட்டி யிருக்கிறார். அவர்களுடைய வாழ்வில் மழை யானது இன்ப துன்பத்தில் பங்கேற்கிறது. இயக்குனர் ஜாபர் படேலின் கவித்துவமான காட்சிப்படுத்தலுக்கு இது ஒரு உதாரணம்.

படத்தில் ஆங்காங்கே எழுச்சிகரமான பாடல்கள் ஒலிக்கின்றன. அவற்றை ஏனோ தமிழ்ப்படுத்தவில்லை. படத்தைத் தமிழ்ப்படுத் தியவர்களுக்கு அதுவும் முக்கியம் என்று ஏன் தோன்றாமல் போயிற்று? பணப் பற்றாக் குறையோ? இந்த நாட்டு அரசாங்கம் எது எதற்கோ எத்தனை எத்தனையோ கோடி செலவு செய்கிறது. தேசத்தின் ஓர் உன்னதமான புதல்வனின் வாழ்வைப் படமாக்கிச் சகல மொழியினருக்கும் கொண்டு செல்வதில் என்ன கஞ்சத்தனம்?

“அம்பேத்கர்” தமிழகக் கொட்டகைகளில் எத்தனை நாட்கள் ஓடும் என்று சொல்ல முடியாது. இங்கு நிலவும் சமூக  - கலை - கலாச்சார சூழல் அத்தகையது. கலையும் வணிகமயமாகிப்போன சூழல் இது. இதையயல்லாம் மீறி இந்தப் படத்தை மக்கள் மத்தியில், குறிப்பாக, மாணவர்கள், இளைஞர்கள் மத்தியில் கொண்டுசெல்ல வேண்டியது தமிழக அரசின் கடமையாகும். காரணம், சமூகநீதிப் போராட்டத்திற்கு இதுவொரு வலுவான, கலாபூர்வமான ஆயுதம்.  முற்போக்கு இயக்கங்களும் முயற்சி எடுக்க வேண்டும். பள்ளி - கல்லூரிகளின் கதவுகளை உரிமையோடு தட்டவேண்டும்.

Pin It

பெரும்பாலான உலக நாடுகளில், கடவுளின் பெயரால் உறுதிமொழி கூறித்தான் பதவி ஏற்பு நிகழ்வுகள் நடந்து வருகின்றன. தொடக்க காலங்களில் இருந்ததைப் போன்று அரசியலில் மதத்தின் தலையீடு இப்போது இல்லை. ஆனாலும், கிறித்தவ நாடுகளில் பைபிளின் பெயரால், இசுலாமிய நாடுகளில் குரானின் பெயரால், இந்தியாவில் கடவுளின் பெயரால் பதவி ஏற்பது வழக்கமாக இருந்து வருகிறது.

juvaஅண்மையில் கனடாவில் திருக்குறளின் பெயரால் பதவி ஏற்பு நடந்திருக்கிறது. 2010 க்கான கனடா நகர்மன்றத் தேர்தலில், யுணிற்றா நாதன் என்னும் கனடியத் தமிழ்ப்பெண்மணி 60% வாக்குகளுடன் நகர்மன்றத்திற்குத் தேர்ந்தெடுக்கப் பட்டிருக்கிறார். டிசம்பர் 7 ஆம் நாள் நடைபெற்ற பதவிஏற்பு விழாவில், யுணிற்றா நாதன் கைகளில் திருக்குறள் நூலை ஏந்திப்பிடித்து, குறளின் பேரால் உறுதி மொழி கூறிப் பதவி ஏற்றிருக்கிறார். களவியல் , கற்பியல் என்று அக வாழ்க்கை யையும், அரசியல், அமைச்சியல், படையியல் என்று புற வாழ்க்கையையும் நெறிப்படுத்துகின்ற வாழ்வியல் நூலான திருக்குறளின் பெயரால் பதவி ஏற்பது எல்லாவிதத்திலும் மிகவும் பொருத்தமானது.

1967 க்கு முன்பு வரை, வள்ளுவன் தன்னை உலகினுக்கே தந்து வான்புகழ் கொண்ட தமிழ்நாட்டின் சட்டமன்றத்தில் கடவுளின் பெயரால்தான் பதவி ஏற்புகள் நடந்தன. 67 இல் பேரறிஞர் அண்ணா அவர்கள் முதலமைச்சர் ஆனபோது, அவரும், அவருடன் பதவிஏற்ற அவருடைய தம்பிகள் அனைவரும் மனசாட்சியின் பெயரால் உறுதிகூறி பதவிப் ஏற்றுக்கொண்டனர். அன்றிலிருந்து இன்றுவரை,  திராவிட முன்னேற்றக் கழக உறுப்பினர்கள்  பதவி ஏற்கும் போது அதே முறையைத்தான் பின்பற்றுகின்றனர். அண்ணா பெயரை ஒட்டவைத்துக் கொண்ட, புரட்சிகரமான தலைவர்களைக் கொண்ட கட்சியினர் இன்னும் கடவுளின் பெயரால்தான் பதவி ஏற்று வருகின்றனர்.  திருக்குறளின் பெயரால் பதவி ஏற்ற யுணிற்றா நாதனைப் பெருமையோடு பாராட்டுகிறோம்.

 

Pin It

ஏக் பனேசியா என்னும் மனிதவள மேம்பாட்டு நிறுவனத்தின் முதன்மை நிர்வாக இயக்குனர் திரு இளங்கோ தமிழ்நாடு அரசின் விருதினைப் பெற்றிருக்கிறார். அவர் ஒரு பார்வையற்ற  மாற்றுத்திறனாளி என்பது குறிப் பிடத்தக்கது. டிசம்பர் 3 ஆம் நாள் சென்னை வள்ளுவர் கோட்டத்தில் நடைபெற்ற விழாவில், மாண்புமிகு தமிழகத் துணை முதல்வர் மு.க.ஸ்டாலின் கரங்களால் விருதினைப் பெற்றுள்ளார். மாற்றுத்திறனாளியான நிறுவனத்தலைவர் மற்றும் ஒரே பின்னணிக் குரல் கலைஞர் என்பதற்காகத் தமிழ்நாடு அரசு அந்த விருதினை அவருக்கு வழங்கியிருக்கிறது. ஏக் பனேசியா நிறுவனத்தின் மூலம் ஆயிரக்கணக்கானவர்களுக்குத் தன்னம்பிக்கைப் பயிற்சிகளை வழங்கி வருகிறார். பல்கலைக் கழகங்கள், பன்னாட்டு நிறுவனங்கள், தேசிய வங்கிகள் போன்றவற்றிற்கும், மனிதவள மேம்பாட்டுப் பயிற்சிகளை வழங்கிவருகிறார். தடைகளைத் தகர்த்துச் சாதனை படைத்திருக்கும் திரு இளங்கோ அவர்களுக்குப் பாராட்டுகள்.

மாற்றுத்திறனாளிகள் நலனில் சிறப்புக் கவனத்துடன் திட்டங்களைத் தீட்டிச் செயல்பட்டுக் கொண்டிருக்கிறது தி.மு.க அரசு. இதுபோன்ற விருதுகள் மூலம் அவர்கள் மேலும் தன்னம்பிக்கையுடன் வாழ்க்கையை எதிர்கொள்ள ஊக்கமளித்துவரும் நற்செயலையும் வரவேற்கிறோம், பாராட்டுகிறோம்.

---------------------------------------------------------------------------------------------------------------------

Pin It