சுற்றுச்சூழல்

விவரங்கள்

சிதம்பரம் இரவிச்சந்திரன்

பிரிவு: சுற்றுச்சூழல்

வெளியிடப்பட்டது: 12 ஏப்ரல் 2024

• இயற்கைப் பேரிடர்
• புவி வெப்ப உயர்வு

அச்சுறுத்தும் காலநிலை மாற்றம் விரைவில் ஏராளமான மனித உயிரிழப்புகளை ஏற்படுத்தும் வெப்பப் பேரிடரை உருவாக்கும் என்று விஞ்ஞானிகள் எச்சரித்து வரும் நிலையில் ஆட்சியாளர்கள் இதை சமாளிக்க உடனடியாக செயல்பட, வெப்பத்தாக்குதல் முன்னெச்சரிக்கைகள் பற்றிய அனுபவங்களைப் பகிர்ந்து கொள்ள சர்வதேச செஞ்சிலுவை மற்றும் செம்பிறை சங்கம் (The International Federation of Red Cross and Red Crescent Societies (IFRC) யு.எஸ். பன்னாட்டு வளர்ச்சி உதவி முகமைடன் (the United States Agency for International Development (USAid) இணைந்து இது பற்றிய உலகின் முதல் உச்சிமாநாட்டை அண்மையில் நடத்தியது.

இந்த நிகழ்நிலை மாநாட்டில் இதுவரை செயல்படுத்தப்பட்டுள்ள வெப்பத்தை குறைக்க மரம் நடுதல், உட்புற வெப்பநிலையை குறைக்க பிரதிபலிப்பு மேற்கூரைகளை அமைத்தல் போன்ற திட்டங்கள் விவாதிக்கப்பட்டன. 2023ல் உச்சபட்ச வெப்ப உயர்வுக்குப் பிறகு உலக மக்கட்தொகையில் பாதி பேர் அதாவது 3.8 பில்லியன் மக்கள் ஆண்டில் ஒரு நாளேனும் உயிரும் உடலும் நொறுங்கும் அளவுக்கு நிலவிய கொதிக்கும் வெப்பநிலையை அனுபவித்தனர். ஹரிக்கேன், சுனாமி, நிலநடுக்கம் போன்றவற்றுடன் ஒப்பிடும்போது நிசப்த கொலையாளி என்று வர்ணிக்கப்படும் இந்தப் பேரிடர் உரிய முக்கியத்துவத்தைப் பெறவில்லை.

கற்பனைக் கதையும் கண்ணெதிரில் நடப்பதும்

இதில் அரசாங்கங்கள், உள்ளூர் நிர்வாகங்கள், மனிதாபிமான குழுக்கள், நிறுவனங்கள், பள்ளிகள், மருத்துவமனைகள் போன்ற இடங்களில் உயர் வெப்பத்தை சமாளிக்க உதவும் வழிகள் பற்றி பேசப்பட்டது. புயல்களுக்குப் பெயரிடுவது போல வெப்ப அலை வீச்சுகளை பிரபலப்படுத்த அவற்றிற்கும் பெயரிடும் முறையை கொண்டு வருவது பற்றி விவாதிக்கப்பட்டது.“மில்லியன்கணக்கான இந்திய மக்களைக் கொன்ற வெப்பத்தாக்குதல் பற்றிய காட்சியுடன் தொடங்கும் கிம் ஸ்டான்லி ராபின்சனின் (Kim Stanley Robinson) வருங்கால அமைச்சரகம் (Ministry for the Future) என்ற அறிவியல் புனை நாவலில் கற்பனையாக கூறியுள்ளது. இதுபோல உண்மையில் இன்னும் பேரழிவு எதுவும் நடக்கவில்லை” என்று சர்வதேச செஞ்சிலுவை சங்கத்தின் இயக்குனர் ஜெனரல் ஜாகன் சாப்பகயின் (Jagan Chapagain) கூறுகிறார்.

மற்ற பேரிடர்களை விட வெளிப்படையாக கண்களால் பார்க்க முடியாத வெப்பத்தாக்குதல் மனித வாழ்வையும் வாழ்வாதாரத்தையும் திருடிச் செல்கிறது. இந்தப் பேரிடரால் மனித குலத்தின் கூட்ட மரணம் விரைவில் நிகழும் என்று விஞ்ஞானிகள் அஞ்சுகின்றனர். பல உலக நாடுகளில் வெப்பம் மக்களின் துயரங்களுக்கு ஒரு முக்கிய காரணமாகிறது. அமெரிக்காவில் மற்ற பேரிடர்களால் ஏற்படும் உயிரிழப்புகளை விட இதனால் ஏற்படும் மரணங்கள் அதிகமாக உள்ளன.

ஆனால் இது திடீரென்று, மற்ற இடர்களைவிட மெதுவாக நிகழ்வதால் நம் புறக் கண்களால் இதன் தாக்கத்தை சுலபமாகப் பார்த்து உணர முடிவதில்லை. இதனால் இதன் தாக்கம் பற்றிய செய்திகள் மிகக் குறைவாகவே வெளிவருகின்றன. புயல்கள் போன்றவற்றால் ஏற்படும் இழப்புகள் போல் இல்லாமல் இதனால் ஏற்படும் இழப்புகளைக் கண்டறிய பல மாதங்கள் அல்லது பல ஆண்டுகள் ஆகிறது. நாற்பதாண்டுகளுக்கு முன் தொடங்கப்பட்ட செஞ்சிலுவை சங்கத்தின் ரேடார் வரலாற்றில் இப்பேரிடர் செய்திகள் இப்போது அதிகமாக வருகின்றன.

வெப்ப அலையை சமாளிக்க 2018ல் முதல்முறையாக வட கொரியா, 2021ல் வியட்நாம், 2022ல் கிஜிக்ஸ்தான், தஜிக்கிஸ்தான், 2023ல் கிரீஸ், பங்களாதேஷ் மற்றும் கிர்கிஸ்தான் ஆகிய நாடுகள் நிதியுதவி கோரி அவசர அழைப்பு விடுத்தன. இந்த காலகட்டத்தில் வெப்ப அலைக்கான நிதியுதவியின் அளவு நான்கு மடங்கு உயர்ந்தது. புயல், நிலநடுக்கம் போன்ற பேரிடர்களுக்கு வழங்கப்படும் நிதியுடன் ஒப்பிடும்போது இந்த உதவி மிகக் குறைவே.

உயர் வெப்பத்தை சமாளிக்கும் உலகின் முன் மாதிரி நகரம்

இந்த நூற்றாண்டின் நடுப்பகுதியில் 2 டிகிரி வெப்பநிலை உயரும்போது ஏற்படும் உயிரிழப்புகள் நான்கு மடங்கு அதிகரிக்கும் என்று லேன்சட் (Lancet) என்ற பிரபல மருத்துவ ஆய்வு இதழ் கணித்துள்ளது. சீனாவில் ஆண்டிற்கு 20000 முதல் 80,000 வரை வெப்ப அலைகள் உருவாகும் என்று மற்றொரு புள்ளிவிவரம் கூறுகிறது. வெப்ப அலை பற்றிய தரவுகள் நாட்டுக்கு நாடு வேறுபடுகின்றன. பல்வேறு வழிகளில் வெவ்வேறான தர நிர்ணய முறைகள் பயன்படுத்தப்படுகின்றன. இவை துண்டுதுண்டான தரவு செய்திகளாக சேகரிக்கப்படுகின்றன. இதை மேம்படுத்துவதே இம்மாநாட்டின் முக்கிய நோக்கம்.

வெப்ப அலைவீச்சுகளால் 2023ல் பிரான்சில் 5,000, ஜெர்மனியில் 3,000, இங்கிலாந்தில் 2,295 பேர் உயிரிழந்துள்ளனர். ஆனால் இந்த நாடுகளில் மக்கட்தொகை குறைவு. மிகச் சிறந்த சுகாதாரத் துறை செயல்பாடுகள் இங்கு உள்ளன. இதே காலகட்டத்தில் இந்தியாவில் 179, பாகிஸ்தானில் 22, மலேசியா மற்றும் தாய்லாந்தில் இரண்டு பேர் மரணமடைந்துள்ளனர். குழப்பமும் குளறுபடிகளும் நிறைந்த அணுகுமுறையால் முரண்பாடான விவரங்கள் வெளியிடப்படுவதே இதற்குக் காரணம்.

உலக சுகாதார நிறுவனத்தின் கணக்குகள்படி 1998-2017 காலத்தில் 166,000 உயிரிழப்புகள் சம்பவித்துள்ளது. வெப்ப தாக்குதலால் உலக மக்கத்தொகையில் 10% மட்டுமே உள்ள, ஆசியாவை ஒப்பிடும்போது குறைவான வெப்பநிலையுடைய ஐரோப்பிய நாடுகளில் வாழ்ந்தவர்களே மரணமடைந்தவர்களில் பாதி பேர். மிக பலவீனமான, எளிதில் பாதிக்கப்படக்கூடிய முதியோர், நோயாளிகள், திறந்தவெளியில் வேலை செய்யும் மக்கள் காற்றோட்ட வசதியில்லாத இடங்களில் வாழ்கின்றனர். இவர்கள் ஏழை நாடுகளைச் சேர்ந்தவர்கள்.

சியாரோ லியோன் நாட்டில் உள்ள ஃப்ரீ டவுன் நகரம் வெப்ப அலையை சமாளிப்பதில் உலகிற்கு முன் மாதிரியாக உள்ளது. இம்மாநாட்டில் பேசிய அந்நகரின் மேயர் இவானா-கிசாயேர் (Yvonne Aki-Sawyerr) வெப்ப அலை மேலாளரை (heat officer) நியமித்துள்ளார்.

இந்த நகரத்தில் அதிக பாதிப்புக்கு உள்ளாகக் கூடிய இடங்களை அடையாளம் காணுதல், வெப்ப அலை தாக்குதல் பற்றிய முன்னெச்சரிக்கை செய்திகளை வாட்ஸ் ஆப் குழுக்கள் மூலம் அனுப்புதல், திறந்தவெளி சந்தைகளில் நிழற்பரப்புகள் அமைத்தல், 2030ம் ஆண்டிற்குள் மரம் நடும் இயக்கத்தின் மூலம் குளிர்ச்சி தரும் 24 பெருவழிச் சாலைகளை உருவாக்குதல் போன்ற முன் முயற்சிகள் எடுக்கப்பட்டு வருகின்றன.

நகரின் 45% மக்கள் வாழும் குடிசைப் பகுதிகளில் கட்டிடங்கள் மீது சூரிய ஒளியைப் பிரதிபலிக்கும் கண்ணாடி படலங்கள் பொருத்தப்பட்ட மெல்லிய இரும்பு மேற்கூரைகள் அமைக்கப்பட்டுள்ளன. இது கட்டிடங்களின் கீழ்ப்பகுதியில் வெப்பநிலையை 6% குறைக்க உதவியுள்ளது என்று ஆய்வுகள் கூறுகின்றன.

மேற்கூரை அமைக்கும் பணிகள் எளிமையானதில்லை. கடுமையான புயல்களின்போது சந்தைகளில் இருக்கும் நிழற்பரப்புகள் தூக்கி எறியப்படுகின்றன. இதனால் இவை நீண்ட காலம் தாக்குப் பிடிக்கும் பொருட்களால் கட்டப்பட வேண்டியுள்ளது. இதற்கான நிதியைக் கண்டுபிடிப்பது கடினமாக உள்ளது. என்றாலும் வெப்பத்தில் இருந்து பாதுகாக்கப்படுவது மக்களிடையில் மகிழ்ச்சியை ஏற்படுத்தியுள்ளது. இது போன்ற திட்டங்கள் முன்பு செயல்படுத்தப்படவில்லை. புதிய தொழில்நுட்பங்களை நாம் நடைமுறைப்படுத்த வேண்டும்” என்று இவானா-கிசாயேர் கூறுகிறார்.

வெப்பநிலையை சமாளிக்க குளிர்சாதன பேருந்துகள்

வெப்ப அலைக்குத் தயாராக இருக்க உதவும் செயல்களை செஞ்சிலுவை சங்கம் மேற்கொண்டு வருகிறது. ஹனாய் வியட்நாமில் மே 2023ல் ஏற்பட்ட ஒரு வெப்பத் தாக்குதலுக்கு முன்பு தன்னார்வலர்கள், தெரு வியாபாரிகள், இரு சக்கர வாகனங்களில் செல்வோர், வெளிப்புற வேலை செய்பவர்கள் அதிகம் உள்ள பகுதிகளில் குளிர்சாதன வசதியுடைய, குளிர்ச்சி தரும் நகரும் பேருந்துகளை நிறுத்தினர். குளிர்ந்த நீர் விநியோகம், அமர நிழல் தரும் இடங்கள் ஏற்படுத்தப்பட்டன.

வெப்பநிலை அடிக்கடி 45 டிகிரிக்கும் கூடுதலாக நிலவும், ஈரப்பதம் அதிகம் உள்ள நேபாளத்தில் உயரம் குறைவான தென்பகுதிகளில் தன்னார்வலர்கள் முன்னெச்சரிக்கை செயல்முறையை மேம்படுத்த, உள்ளூர் நிர்வாகத்தினர் குளிருந்த தங்குமிடங்களை அமைக்க, உயர்வெப்பநிலை சம்பவங்களின்போது மருத்துவமனைகள் தயார் நிலையில் இருக்க வலியுறுத்திவருகின்றனர். 2023ல் உயர் வெப்பம் காரணமாக டெராய் (Terai) பகுதியில் பள்ளிகள் பல நாட்கள் மூடப்பட்டன.

“இளைஞர்களிடையில் இது பற்றி விழிப்புணர்வு ஏற்படுத்தப்படுகிறது என்று அந்நாட்டின் செஞ்சிலுவை சங்க பேரிடர் பிரிவு இயக்குனர் சாகர் ரெஸ்தா (Sagar Shrestha) கூறுகிறார். கூட்டத்தில் அரசுகள் இந்த பேரிடரை சமாளிப்பது பற்றிய வழிமுறைகளை சமூகங்கள், நகரங்கள், நிறுவனங்களுக்கு வழங்க உதவும் அதிதீவிர வெப்பநிலைக்கான செயல் மையத்தை ஏற்படுத்த ஒப்புக் கொண்டுள்ளன.

வெப்ப அலை பற்றிய விழிப்புணர்வு பிரச்சாரம் உலகளவில் இரண்டு மாதங்கள் நடத்த திட்டமிடப்பட்டுள்ளது. ஜூன் 2 அன்று உலக வெப்ப அலை விழிப்புணர்வு நாள் கொண்டாடப்படும். மற்ற பேரிடர்கள் போல வருங்காலத்தில் செஞ்சிலுவை சங்கம் இந்த பேரிடர்ஐ குறைக்க உதவும் கருவிகள், திட்டமிடுதல்கள், உடனடி மீட்புப் பணிகள், வழிகாட்டுமுறைகளை செயல்படுத்த முடிவு செய்துள்ளது. மற்ற பேரிடர்கள் போல இதற்கு ஒரு நிலைப்படுத்தப்பட்ட வழிமுறை இல்லை. மனித குலம் இன்னும் இதற்கு உரிய முக்கியத்துவம் தரவில்லை.

உலகின் வெப்ப அலைத் தாக்குதல்கள் பற்றிய இந்த முதல் மாநாட்டின் மூலம் அறிவியல் புனைவாக எழுதப்பட்ட நாவலில் கூறப்பட்டுள்ளவை கற்பனையாகவே இருக்க இப்போதே மனித குலம் செயலில் இறங்க வேண்டும் என்று விஞ்ஞானிகள் வலியுறுத்துகின்றனர்.

** ** **

மேற்கோள்கள்

https://www.theguardian.com/environment/2024/mar/27/extreme-heat-summit-to-urge-leaders-to-act-on-threat-from-rising-temperatures?

&

 https://www.ifrc.org/article/heatwaves-ifrc-global-heat-summit-tackle-invisible-killer

&

https://www.ifrc.org/press-release/global-summit-announces-sprint-action-tackle-consequences-extreme-heat#

&

https://www.usaid.gov/news-information/press-releases/mar-28-2024-usaid-and-ifrc-hold-global-summit-extreme-heat-launch-global-action-sprint

- சிதம்பரம் இரவிச்சந்திரன்

விவரங்கள்

சிதம்பரம் இரவிச்சந்திரன்

பிரிவு: சுற்றுச்சூழல்

வெளியிடப்பட்டது: 29 மார்ச் 2024

• இந்தியா
• சுற்றுச்சூழல்
• மருத்துவம்

காற்றுமாசு Type2 வகை சர்க்கரை நோயை ஏற்படுத்துகிறது என்று இந்திய ஆய்வு ஒன்று கூறுகிறது. டெல்லி மற்றும் சென்னை நகரங்களில் குடியிருக்கும் 12,000 பேரிடம் ஏழாண்டு காலம் நடந்த ஆய்வில் இருந்து பி எம் 2.5 (PM 2.5-parts per million) அளவுள்ள துகள்களுக்கும் உயர் இரத்த சர்க்கரை அளவிற்கும் அதன் மூலம் Type2 சர்க்கரை நோய் ஏற்படுவதற்கும் தொடர்பு இருப்பது கண்டுபிடிக்கப்பட்டுள்ளது. இது நுண் துகள்கள் கலந்துள்ள மாசுக் காற்றை சுவாசிப்பதால் ஏற்படுகிறது.

உலக சுகாதார நிறுவனத்தின் முதல் ஆய்வு

ஒரு முடியிழையின் முப்பதில் ஒரு பங்கு மெல்லிய அளவுடைய இந்த நுண் துகள்கள் இரத்த ஓட்டத்துடன் கலந்து பல சுவாசக் கோளாறு நோய்களையும், இதய நோய்களையும் ஏற்படுத்துகிறது. இந்தியாவில் 2010ல் தொடங்கி நடைபெறும் இந்த ஆய்வுகள் நாட்பட்ட நோய்களால் ஏற்படும் பாதிப்புகள் பற்றி ஆராய்கிறது. உலக சுகாதார நிறுவனம் உலகளவில் காற்றின் தரம் மிக மோசமாக இருக்கும் இந்தியாவில் சுற்றுப்புறத்தில் உள்ள பிஎம் 2.5 துகள்களுக்கும் Type2 சர்க்கரை நோய்க்கும் இடையில் இருக்கும் தொடர்பு பற்றி நடத்தும் முதல் ஆய்வு இது.டெல்லியில் பிஎம் 2.5 அளவு துகள்களின் சராசரி அளவு 80- 100 ம்யூ/எம்3. சென்னையில் இதன் அளவு 30-40 ம்யூ/எம்3. உலக சுகாதார நிறுவனம் வரையறை செய்துள்ள அளவு 5 ம்யூ/எம்3 மட்டுமே. இந்தியாவின் காற்றின் தேசிய தர அளவு 40 ம்யூ/எம்3. ம்யூ என்பது காற்றுமாசின் அளவைக் குறிக்க உதவும் ஓர் அலகு. இந்தியர்கள் ஏற்கனவே சர்க்கரை நோய், உயர் இரத்த அழுத்தம், இதய நோய், தொற்றாத நோய்களால் அவதிப்படுகின்றனர். மக்கத்தொகையில் 11% அல்லது 101 மில்லியன் பேர் சர்க்கரை நோயுடன் வாழ்கின்றனர்.

சுமார் 136 மில்லியன் பேர் சர்க்கரை நோய் வரும் வாய்ப்புள்ளவர்கள் என்று பிரபல மருத்துவ இதழ் லேன்சட் (Lancet) வெளியிட்ட ஆய்வறிக்கை கூறுகிறது.

2019ல் ஐரோப்பிய ஒன்றியத்தில் இது 6.2 சதவிகிதமாகவும் 2016ல் யு கேயில் இது 8.6 சதவிகிதமாகவும் இருந்தது. இந்தியாவில் முன்பு கணிக்கப்பட்டிருந்ததைவிட இப்போது சர்க்கரை நோய் வர வாய்ப்புள்ளவர்களின் எண்ணிக்கை அதிகம். இவர்களில் பெரும்பாலோரும் கிராமப் பகுதிகளை விட நகரங்களிலேயே அதிகமாக வாழ்கின்றனர் என்று லேன்சட் ஆய்வுகள் கூறுகின்றன.

பி.எம்.ஜே (BMJ) என்ற சர்வதேச மருத்துவ ஆய்வு அமைப்பால் டெல்லி மற்றும் சென்னையில் வாழும் 12,000 ஆண், பெண்களிடம் 2010 முதல் 2017 வரை குறிப்பிட்ட இடைவெளிகளில் சர்க்கரை அளவுகள் பரிசோதிக்கப்பட்டு இந்த ஆய்வுகள் நடந்தன. பி எம் ஜே என்ற மருத்துவ ஆய்விதழில் விவரங்கள் அடங்கிய அறிக்கைகள் வெளியிடப்படுகின்றன. ஆய்வு நடந்த காலத்தில் ஆய்வில் பங்கேற்ற ஒவ்வொருவரின் வாழிடத்தில் அப்போது நிலவிய காற்றின் தரம் செயற்கைக்கோள் படங்களின் உதவியுடன் அளவிடப்பட்டது.

காற்று மாசு அதிகரித்தால் நோயும் அதிகரிக்கும்

பி எம்2.5 துகள்கள் கலந்துள்ள காற்று உள்ள இடங்களில் ஒரு மாதம் வாழ்ந்தவர்களிடம் இரத்த சர்க்கரையின் அளவு அதிகமாக காணப்பட்டது. இவர்கள் ஓராண்டு அல்லது அதற்கும் மேல் நுண் துகள் மாசினால் பாதிக்கப்படும் போது சர்க்கரை நோய் வரும் வாய்ப்பு அதிகரிக்கிறது. ஒவ்வொரு 10 ம்யூ/எம்3 அளவு நுண் துகள்களால் ஏற்படும் பாதிப்பு அதிகமாகும் போது ஆண்டு சராசரி பிஎம்2.5 அளவில் உள்ள நிலையில் இரு நகரங்களிலும் சர்க்கரை நோய் வருவதற்கான ஆபத்து 22% அதிகரிக்கிறது.

“இந்தியர்களின் நோய்க் குறியியலின்படி (pathophysiology) குறைவான உடற்பருமன் அளவு (BMI) இருந்தாலும் உயர்ந்த அளவு கொழுப்பு எடுத்துக் கொள்ளப்படுவதால் மேற்குலக மக்களை விட சர்க்கரை நோய் இந்தியாவில் அதிகமாக உள்ளது” என்று ஆய்வுக்குழுவின் முன்னணி ஆய்வாளர் மற்றும் டெல்லி நாட்பட்ட நோய்க்கட்டுப்பாட்டு மையத்தின் நிபுணர் சித்தார்த்த மேண்டல் (Siddhartha Mandal) கூறுகிறார்.

40% மக்களிடம் சர்க்கரை நோய் கண்டுபிடிக்கப்படாமலேயே போகிறது என்று மற்றொரு உலகளவிலான ஆய்வு கூறுகிறது. “கடந்த இருபது முப்பது ஆண்டுகளில் ஏற்பட்ட வாழ்க்கை முறை மாற்றங்களால் சூழல் மாசிற்கு ஒரு காரணமாக மட்டும் இருந்த காற்று மாசு இப்போது சர்க்கரை நோய் உயர்விற்கும் முக்கியக் காரணியாக மாறியுள்ளது.

கிராமப்பகுதி மக்களை விட நகர்வாழ் இந்தியர்களிடையில் உடற்பருமன், உணவு மற்றும் உடற்பயிற்சிக் குறைவு போன்றவற்றால் சர்க்கரை நோய் அதிகமாக இருந்தது என்று இது வரை கருதப்பட்டது. ஆனால் இந்த ஆய்வு முடிவுகள் காற்று மாசும் இதற்கு ஒரு முக்கிய காரணம் என்பதை நிரூபித்துள்ளது” என்று ஆய்வுக்குழு ஆசிரியர்களில் ஒருவரும் சென்னை சர்க்கரை நோய் ஆய்வு அறக்கட்டளையின் தலைவருமான டாக்டர் வி மோகன் (Dr V Mohan) கூறுகிறார்.

காற்று மாசும் இரத்த அழுத்தமும்

டெல்லியில் இந்த ஆய்வில் பங்கேற்றவர்களிடம் நடத்தப்பட்ட மற்றொரு ஆய்வில் ஆண்டு சராசரி காற்று மாசின் அளவு 90 ம்யூ/எம்3 ஆக இருக்கும்போது இரத்த அழுத்த உயர்வு மற்றும் அதன் மூலம் உயர் இரத்த அழுத்தத்தால் பாதிக்கப்பட அதிக வாய்ப்பு உள்ளது என்று ஆய்வாளர்கள் கண்டறிந்துள்ளனர். பாதுகாப்பான அளவை விட அதிகமாக பி எம் 2.5 துகள்கள் காணப்படும் இந்திய நகரங்களில் மக்களுக்கு அதிகமாக சர்க்கரை நோய் மற்றும் உயர் இரத்த அழுத்தம் ஏற்படுகிறது.

இது ஆத்தராச்குலரோசிஸ் (atherosclerosis) என்ற நிலையை ஏற்படுத்துகிறது. பெருந்தமனி தடிப்பு என்றும் இது அறியப்படுகிறது. ஆத்தராச்குலரோசிஸ் என்பது தமனிகளின் உட்புறச்சுவரில் கொலஸ்ட்ரால், கொழுப்புப் பொருட்கள் படிந்து அவற்றின் உட்புறம் தடிமனாகி வீக்கம் உருவாவதைக் குறிக்கிறது. இது ஒரு நீண்டகால அழற்சி நோய். இதனால் மாரடைப்பு மற்றும் இதயத்தின் இயக்கம் பாதிக்கப்படுவது போன்ற பிரச்சனைகள் ஏற்படுகின்றன.

“பி எம் 2.5 துகள்களில் சல்பைடுகள், நைட்ரைடுகள், கன உலோகங்கள் மற்றும் இரத்தத் திசுக்களை பாதித்து இதயத் தமனிகளை இறுக்கமடையச் செய்யும் கறுப்பு கார்பன் போன்றவை அடங்கியுள்ளன. இவை கொழுப்பு செல்களில் வீக்கத்தை ஏற்படுத்துகிறது. இதய தசைகளை நேரடியாகப் பாதிக்கிறது” என்று நோய்க் கட்டுப்பாட்டு மையத்தின் இயக்குனர், ஆய்வறிக்கையின் ஆசிரியர்களில் ஒருவர் மற்றும் இதய சிகிச்சை வல்லுனர் டாக்டர் துரைராஜ் பிரபாகரன் (Dr Dorairaj Prabhakaran) கூறுகிறார்.

நாளமில்லா சுரப்பிகளின் செயல்பாட்டைப் பாதிக்கும் காரணியாக உள்ள பி எம்2.5 துகள்கள் உடலில் இன்சுலின் சுரப்பு மற்றும் அதன் செயல்பாட்டைப் பாதிக்கிறது. இந்திய நகரப் பகுதிகளில் ஹைப்போ தைராய்டு நோய் குறைபாடு (hypothyroidism), கருப்பையில் நீர்க்கட்டிகள் தோன்றும் குறைபாடு (polycystic ovarian syndrome (PCOS) மற்றும் கர்ப்பகால நீரிழிவு (gestational diabetes) போன்ற குறைபாடுகள் அதிகரிக்கின்றன. காற்று மாசு உடலில் எல்லா ஹார்மோன்களையும் சுரக்கும் நாளமில்லா சுரப்பிகளைப் பாதிக்கிறது.

காற்று மாசு உடலில் இருக்கும் கொலஸ்ட்ரால் மற்றும் வைட்டமின் டி நிலையில் செலுத்தும் தாக்கம், அதனால் தனிநபர் வாழ்க்கைச் சுழற்சியில் பிறந்தபோது இருந்த எடை, கருவுற்றிருக்கும் பெண்களின் ஆரோக்கியம், வயது வந்தவர்களில் இன்சுலினுக்கு எதிர்ப்பாற்றல், பார்க்கின்சன் மற்றும் ஆல்சைமர்ஸ் (Alzheimer’s) உள்ளிட்டவற்றால் ஏற்படும் பாதிப்புகள் பற்றி நிபுணர்கள் இப்போது ஆராய்ந்து வருகின்றனர்.

இது எச்சரிக்கை அளிப்பதாக இருந்தாலும் காற்று மாசைக் குறைத்து, அதன் மூலம் சர்க்கரை நோய் பாதிப்பையும் வாழ்க்கை மாற்றங்களால் ஏற்படும் மற்ற நோய்களையும் குறைக்க இந்த ஆய்வுகள் உதவும். 2016ல் காற்றுமாசு உயர்விற்கு எதிராக உருவான மக்கள் எதிர்ப்பால் மத்திய மற்றும் டெல்லி அரசுகள் பழைய டீசல் வாகனங்களுக்குத் தடை விதித்தது, கட்டுமானங்களைக் கட்டுப்படுத்தியது, சாலைகளை மேம்படுத்தியது, புறவழிச் சாலைகளை அமைத்தது, வேளாண் கழிவுகளை எரிக்கத் தடை விதித்தது போன்ற கொள்கை முடிவுகளால் 2016-2021 காலத்தில் பிஎம்2.5 மாசின் அளவு 22% குறைந்தது.

காற்று மாசு முற்றிலும் குறையவில்லை என்றாலும் இது வரவேற்கத்தக்கது. இது போன்ற உள்ளூர் அளவிலான நடவடிக்கைகள் நாடு முழுவதும் உடனடியாக எடுக்கப்பட வேண்டும் என்று ஆய்வாளர்கள் வலியுறுத்துகின்றனர்.

மேற்கோள்: https://www.theguardian.com/global-development/2023/nov/01/air-pollution-raises-risk-of-type-2-diabetes-says-landmark-indian-study-acc?

- சிதம்பரம் இரவிச்சந்திரன்